1-2. Yesu aari vaavini ahimaka masu awe oomalihera ntoko mutthu valaponi?

WAARI oxexelo nihiku na 14 na Nisani eyaakha ya 33 E.C. Yesu aahotheriwa okhala nakrime, ahitthenke ene etthu. Anyoholiwakaru, ahasuliwa ni okhomeliwa vamwirini. Ipreku saatthoowa owithela wa matata ni mwiinanini. Yesu wannamuxupa olokolela ni omumula mwaha wookhomeliwa. Mene owo onnatthuna olokolela—etthu yootthuneya ahinaakuve okhwa.

² Ninrowa othokorora masu oomalihera a Yesu ahinaakuve okhwa, ni woona etthu nintthuneya ahu oxuttera ni masu awo a Yesu. Eyo tiiyo, ‘ninrowa oxuttera omwiiwelela’.—Math. 17:5.

3. Yesu aahima taani ni masu oowera “Tithi, mwàlevelele”?

³ Yesu aahimme heeni? Emaara aaraawe vamwirini va nihaaxero, Yesu aavekela “Tithi, mwàlevelele.” Taani yeera eleveleliwe ni Atithawe Yesu? Masu oottharelana Yesu aahimmaawe anniwoonihera taani yaatthuneya oleveleliwa, owo aahimme há: “niwoko khansuwela aneraya.” (Lu. 23:33, 34) Oweharu Yesu aahima anakhotto ooRooma yaawo yaakhomenle matata awe ni inaani sawe vamwirini. Awo apaale khayaamusuwenle nnene Yesu. Nave pooti weera aahima tho atthu ale yaakhuwela yeeraka weera akhomeliwe, ni muhoolo mwaya yeera emuroromele. (Mit. 2:36-38) Mwaha woohaawa iwe Yesu khawoopopiha atthu naari waahokoloxera. (1 Ped. 2:23) Opwaha mwa yeeyo, owo aanvekela Yehova weera aalevelele atthu ale yaamwiva.

4. Eheeni nikhanlaahu ooxuttera ni masu a Yesu weera naalevelele ale annihasula?

⁴ Eheeni nikhanlaahu ooxuttera ni masu a Yesu? Ntoko Yesu, ontthuneya weera nikhaleke oolikaneene weera naalevelele  atthu akina. (Akol. 3:13) Atthu akina ntoko amusi ahu pooti onisontta mwaha woohisuwela ele ninroromelaahu naari makhalelo a ekumi ahu. Atthu awo pooti onoothera, onuulihiha muru ohoolo wa atthu, onyaanya ibuukhu sahu, naari onoopopiha onimana. Ohiya waanyoonyeriwa, nintthuneya weera ninvekeleke Yehova weera aakhavihere atthu awo oxuttera ekhaikhai muhoolo. (Math. 5:44, 45) Emaara ekina, olevelela khonkhweya, otepaxa wene wakhala weera nnothokororiwa mohixariya. Wakhala weera itthu iyo nnoohiya sunnuwaka vamurimani vahu, nnoonanariha mukhalelo ahu. Murokora mmoha ohimme há: “miyo kaahiwexexa weera olevelela khontaphulela waaleela atthu ale akiveehale weera kohoolevelelani, naari waahiya atthu awo evirelelaka okiveeha. Mene ontaphulela opaka yoothanla ya: ohuupuwela etthu nipakeliwaahu.” (Nsal. 37:8) Naatthunaka olevelela, ontthuneya othanla ohakhulela weera itthu soonanara sihinanarihe mukhalelo ahu.—Aef. 4:31, 32.

5. Mwaha wa heeni Yesu ahalaka omulaihera nakrime ole akhomeliwaiyeno?

⁵ Yesu aahimme eheeni? Anakrime eeli yaari mukina moono woolopwana ni mukina moono woothiyana. Woopatxerani ootheene yanveha Yesu. (Math. 27:44) Mootthareralana mmoha atxentxa muupuwelo awe. Owo aahoona weera Yesu khaapanke “etthu yonanara.” (Lu. 23:40, 41) Opwaha wa yeeyo, owo aroromela weera Yesu anvinyererihiwa ni okhala mwene muhoolo. Nto owo aamweerela Yesu, “okupuwele miyo vanrowawe momweneni mwá.” (Lu. 23:42) Mulopwana ola ahoonihera omuroromela Yesu! Yesu aamwakhula eeraka: “vekhaikhai kinnòlela olelo vava wi onookhale ni miyo mparadiso.” (Lu. 23:43) Moone weera masu ala aahimme Yesu, owo aavarela muteko masu oweera “miyo”, “nyuwo”, munaakhale, “ni miyo”. Yesu ahinaakuve okhwa anvaha yooweherera nakrime ole, mwaha wooweera asuwela weera Atiithawe toomoriwa ikharari.—Nsal. 103:8.

6. Eheeni nikhanlaahu ooxuttera ni masu a Yesu aamulenlaawe nakirime?

⁶ Eheeni nikhanlaahu ooxuttera ni masu a Yesu? Yesu annamutakiha nnene Tiithaawe. (Aheb. 1:3) Yehova onnatthuna onlevelala vantxipale, ni wamoorela ikharari atthu ootheene, mene Yehova onrowa opaka eyo wakhala weera noottharuwa ni murima wootheene itthu nipankahu khalayi ni noonihera ororomela mukuttho wa Yesu. (1 Yoh. 1:7) Atthu akina pooti woona ovila ororomela weera Yehova onoowera onlevelela soottheka nipankaahu khalayi. Wakhala weera nyuwo munnoonela tho hiiho, muupuwele ela: Yesu ahinaakuve okhwa, aammorela ikharari nakrime aakhomeliwaaweno yoowo aapatxera woonihera nroromelo. Nto nroromeleke weera Yehova onimwamorela ikharari atthu awe oororomeleya aniilipihera wiiwelela malamulo awe.—Nsal. 51:1; 1 Yoh. 2:1, 2.

7. Ntoko noonaahu va Yohani 19:26, 27 eheeni Yesu aamulenlawe Maria ni Yohani?

⁷ Yesu aahimme eheeni? (Mmusome Yohani 19:26, 27.) Yesu aatthuna oweetetela ameyawe apaale yaawo yaari namukhweli. Asunnawe Yesu yanwera waakhavihera ameyawe itthu sa weerutthuni. Vano, taani yeera yaakhavihereke ni mukhalelo wa omunepani? Khekhanle etthu enoonihera weera asunnawe Yesu yaakhala atthareli awe. Nto Yohani ari murummwa ororomelaya a Yesu, ni mmoha a sinthamwene awe. Mene Yesu aawoona okhala  amusi awe oomunepani atthu yaale paahi yanvarela muteko Yehova. (Math. 12:46-50) Yesu annaasivela ameyawe, nto aatthuna omuhiyera mutthu weera aathokororeke. Nto anvekela Yohani weera apake eyo. Yesu aasuwela weera Yohani amwakhavihera ameyawe ovirelela onvarela muteko Yehova. Owo aaweerela ameyawe: “Omòne mwaná!” ni amwerela tho Yohani: “Owòne amay’á!” Okhuma nihuku nenne, Yohani aarowa okhalaka ntoko mwaana a Maria ni Yohani aarowa omuthokororaka Maria ntoko ameyawe. Maria aamuthokorora nnene Yesu okhuma enamwanaawe ni aakhalavo nihuku akhwiiyaawe. Yesu aakhalano mathowa yamweriha wasivelaxa vantxipale ameyawe!

8. Eheeni nikhanlaahu ooxuttera ni ele Yesu aamulenlawe Maria ni Yohani?

 ⁸ Eheeni nikhanlaahu ooxuttera ni masu a Yesu? Onthamwene nraahuno ni asinnihu ororomela, ti wootthuneyaxa waapwaha amusi ahu. Amusi ahu pooti onisontta naari onnyanyala, mene Yesu oolaihera weera naamwiiwelelaka Yehova ni mareherero awe, hiyo nnimwaakhela “miloko sene muloko (100).” Asinna antxipale anoorowa okhala ntoko anamwane ahu, atiithahu ni ameyahu. (Mar. 10:29, 30) Ninneerela empari emusi ya omunepani yoowiiraana ni nsivelo—nimmusivela Yehova ni osivelana mukina ni mukhwaawe. Eyo enookhaviherani hayi?—Akol. 3:14; 1 Ped. 2:17.

9. Eheeni masu a Yesu ari va Matheyo 27:46 annixuttihaaya?

⁹ Yesu aahimme eheeni? Yesu ahinaakuve okhwa, aakhuwela eeraka: “Muluku aka, okihiyenre-ni?” (Math. 27:46) Biblya khanthaliha nthowa naya naamweerihe Yesu okhuwela hiiho. Mene masu ala annahima itthu sintxipale. Mwa ntakihero, mwaha woohima masu ala Yesu akwanihera yoolohera elempwale va Nsalmu 22:2, [22:1 Tradução do Novo Mundo]. * Opwaha mwa yeeyo, masu ala anoonihera weera Yehova khaarowa “omwakiha” mwanawe. (Yobi 1:10) Mene Yehova ahaakhulela weera mwanawe ereriwe mpaka vankotaayavo amwiittani awe, ni Yesu asuwela eyo. Ela tthiri yaari yoowerera etokotoko, khaavo mutthu eereriwe ntoko Yesu. Masu ala yaahooniherea weera Yesu aasuwela weera aahawa ahitthenke ene etthu ni khaapwanela okhwa.

10. Eheeni nikhanlaahu ooxuttera ni ele Yesu aamulenlawe Tiithi awe?

¹⁰ Eheeni nikhanlaahu ooxuttera ni masu a Yesu? Etthu nixunttenrahu ti yooweera, khaninweherera Yehova onaakiha neereriwaka nroromelo nahu. Ntoko Yesu eererinwaiye mpakana okhwa, hiyo tho ontthuneya okhala oolikaneene weera nivirelele ororomeleya mpakana okhwa waawereyaka vale. (Math. 16:24, 25) Mene Muluku khanrowa waakhulela weera neereriwe opwaha ikuru sahu. (1 Akor. 10:13) Etthu ekina nixuttenraahu ni yoowereya ya Yesu, hiyo nneereke ohasuliwa moohixariya. (1 Ped. 2:19, 20) Atthu annisontta, khannisonttela weera hiyo nroottheka, mene mwaha wooweera khaneerela empari elapo ni mwaha wooweera ninnakihera ekhaikhai. (Yoh. 17:14; 1 Ped. 4:15, 16) Yesu aasuwela mwaha wa heeni Yehova amuhiyaawe ahaawaka. Mene asinna akina ororomeleya, yaavirihaka maxupo, emaara ekina annikoha mwaha wa heeni Yehova onaahiyaawe ehaawaka. (Hab. 1:3) Muluku ahu, toomoriwa ikharari ni onnapixera murima asinna awo. Yehova oosuwela weera yuupuwelaka hiiho khaiyene aroohikhalano nroromelo, mene antthuna nimaaliho Yehova onnvahaawe.—2 Akor. 1:3, 4.

11. Mwaha wa heeni Yesu ahalaka ohima masu ari va Yohani 19:28?

¹¹ Yesu aahimme eheeni? (Mmusome Yohani 19:28.) Mwaha wa heeni Yesu ahimmawe weera: “kòvoliwa ntthona”? Owo ahimme eyo mwaha wooweera, “akwanihera yoolohera” elempwale va Nsalmu 22:16 [22:15 NM], masu yaawo aneera: “ikuru saka sòhùma ntoko nivali, ni nlumi naka nòpara wahotokoroko waka.” Veekhaikhai masu ala annoniheera weera Yesu aari ni ntthona: owo eera avenleene vantxipale mwaha  woomaniwa, ohela mpuwa okhomeliwa va mwirini va nihaaxero. Okhala weera aarokhomeliwa, Yesu annatthuna nikhavirero weera awure maahi.

12. Eheeni nikhanlaahu ooxuttera ni masu a Yesu aneera “kòvoliwa ntthona”?

¹² Eheeni nikhanlaahu ooxuttera ni masu a Yesu? Yesu khoova wooniwa okhala oolosowa wuuluma etthu uupuwelaawe. Hiyo tho khontthuneya wuupuwela mooteene yoowo. Emaara ekina, khontthuneya waalela atthu akina itthu nnuupuwelaahu. Mene wakhala weera khaninwera opaka meekhaahu, nihooveleleke waavekela akina nikhavihero. Mwa ntakihero, nuuluvala naari naavoreiwaka, apaale pooti onvekela nthamwene ahu weera aniwelihe vatxinkani nrowaka omerkado naari otxipattaala. Naripiwa murima naari natteettheya, naavekeleke asitokweene naari munna oolipa omunepani aneera aniiweleleke nnene naari onleela “nsu nosiva”. Nenno nneera nnihakalalihe murima ahu. (Mir. 12:25) Muupuweleke weera asinna ni asirokora annasivela ni antthuna onikhavihera “ehuhu yovalavela”. (Mir. 17:17) Mene awo khanwera osuwela ele nuupuwelaahu. Awo tho khanwera woonelela ele nihaawelaahu, hiyo nihaalenleene.

13. Itthu heeni tthaaru Yesu opankaawe aroromeleyaka mpakana okhwa?

¹³ Yesu aahimme eheeni? Ephiyakaru emaara ya 15 nihiku na 14 a Nisani, Yesu aakhuwela ni mmilo wootheene eeraka “yòkwaniheriwa!” (Yoh. 19:30) Masu Yesu uulummawe ahinaakuwe okhwa, annanoonihera weera Yesu asuwela weera saakwaniheriwa naari, saahereya sootheene Yehova aatthunaawe. Mwaha woororomeleya mpaka okhwa, Yesu aapaka itthu sintxipale. Etthu yoopatxera aapankaawe, owo aahona weera Satana namootha. Yesu ahoonihera weera, mutthu onoowera ororomeleya naamwi akumanakano maxupo ankumiheriwa ni Satana. Etthu yanaaweli aapankaawe, Yesu aavaha ekumi awe ntoko mukuttho woowoopola atthu. Mwaha wooveleela ekumi awe, owo aapakiha weera atthu oohikwanela ekhale nthamwene a Muluku ni ekhaleno yooweherera yookhalano ekumi yoohimala. Etthu ya naararu opankaawe, Yesu aahonihera weera Yehova tori namalamulela ni ahakihera ekhaikhai ya Yehova.

14. Nikhaleke nisuwelaka eheeni mahiku ootheene? Muthalihe

¹⁴ Eheeni nikhanlaahu ooxuttera ni masu a Yesu? Nintthuneya othanla okhala ororomeleya mahiku ootheene. Moone ele munna Maxwell Friend, ovanre muteko ntoko muhusiha a exikola ya oGiladi, ohimmaawe. Wa assembleya Internacional. Munna Maxwell ahuuluma va mwaha aapankaawe waahima sa ororomeleya: “muhihiyere nihuku noomalo etthu mwaatthunaanyu opaka naari ohima olelo. Nyuwo munnaroromela weera omalo munookhala mukumi? Mahiku ootheene munkhalaanyu, musuweleke weera nnene nxiye nihiku nanyu noomalihera. Nto mukhaleke oolikaneene nweheeeraka ekumi yoohimala.” Nenne nxiye nikhaleke ntoko nihiku nahu noomalihera, nooniheraka ororomeleya wa Yehova! Vano, naari nihalaka okhwa, nihimeke há: “Yehova miyo koopaka sootheene weera kivirelele ororomeleya, koone weera Satana namootha. Ni kaakiheraka ekhaikhai ni kikhaviheraka otokweene wa Apwiya!”

15. Moovarihana ni Luka 23:46, Yesu amuroromela taani?

¹⁵ Yesu aahimme eheeni? (Mmusome Luka 23:46.) Amuroromelaka Yehova, Yesu ahima weera: “Tithi, mmatatani mwà kinnavelela munep’aka.” Yesu aasuwela weera yooweherera  awe yaari mmatatani mwa Yehova ni owo aasuwela weera Atiithi awe yaammupuwela.

16. Muxuttenre eheeni ni ntakihero na mmiravo a iyaakha 15?

¹⁶ Eheeni nikhanlaahu ooxuttera ni masu a Yesu? Mulakele ohela mmatatani mwa Yehova ekumaanyu yootheene. Weera nwere opaka eyo, nyuwo ‘mmuroromeleke Yehova ni murimaanyu wootheene.’ (Mir. 3:5) Moone ntakihero na Joshua, Namoona mmoha a Yehova aarinono iyaakha 15, aakhalano eretta ehinlammwa. Owo aakhootta olooliwa ohinvarihana ni malamulo a Muluku. Ahinaakuve okhwa, owo ahaalela ameyawe: “maaye, kiri mmatatani mwa Yehova.” Kinhima eyo ni murimaaka wootheene, maaye. Koosuwela weera Yehova onookivinyereriha. Owo osuwela murimaaka ni miyo kinnamusivela.” * Mahiku ootheene niikoheke há: ‘miyo kakumanano maxupo a ekumi naari woopopiheriwa okhwa weera neereriwe nroromelo naka, keereke kamuhela ekumi aka mmatatani mwa Yehova, kiroromelaka weera owo onookupuwela?’

17-18. Itthu heeni nixuttenraahu? (Nwehe tho ekwadru “Ninxuttera eheeni ni masu oomalihera a Yesu.”)

¹⁷ Ntoko ninsuwelaahu, masu oomalihera a Yesu annanixuttiha itthu sootthuneya! Nuupuweleke weera onnatthuneya waalevelela atthu akina ni ororomela weera Yehova onoonlevelela. Mareeliho mantxipale okhala ni asinna ni asirokora oororomela weera enikhavihereke, mene ontthuneya waavekela weera enikhavihere, waatthuneyaka vale. Noosuwela weera Yehova onoonikhavihera oviriha maxupo eri poothe eneera enikhumelele. Nohoona weera ti wootthuneya okhala nenne nxiiye ntoko nihuku nahu noomalihera ni woonihera ororomeleya wahu. Nroromeleke weera ekumi ahu nahela mmatatani mwa Yehova, owo onoonikasoopa.

¹⁸ Mweekhaikhai, ninnaxuttera etthu yootthuneya ni masu a Yesu uulumaawe emaara aaraawe vamwirini va nihaaxero! Yehova uulumaka sa mwanawe, owo enre: “Munwiriyaneke.” Naavarelaka muteko miruku nixuttenraahu mwa yoosomeene yeela, nneereke opakaka nnene ele Yehova orummaawe.—Math. 17:5.