1-2. Okathi xeeni Yesu aalavunle awe moolumo ookiserya ori ene valaponi?

WAARI voosiisu, 14 a Nisani mwaakha wa 33. Yesu aahootheriwa opaka ekrime nto aahilamuliwa wiiviwa. Nuumala-vo, Yesu aahiveehiwa, ohasuliwa ni okhomeliwa vamwirini va nihaaxeryo. Owo aahikhomeliwa matata ni metto. Nto Yesu aanoona owereya vanceene vaavo aalavula awe wala aamumula awe. Masi hata vaari siiso, saahikhala itthu sa faita aaphavela awe olavula.

² Nrowe niwehe moolumo ookiserya Yesu aalavunle awe okathi aakhomeliwe awe vamwirini va nihaaxeryo ni niwehe itthu nniixutta ahu. Opaka eyo enoonikhaliherya ‘omwiiwelela Yesu’.—Math. 17:5.

3. Tani Yesu aahimya awe vaavo aavekenle awe wira: “Tiithi, mwaalevelele”?

³ Etthu xeeni Yesu aahimmye awe? Okathi aakhomeliwe awe vamwirini va nihaaxeryo, Yesu aahivekela oriki: “Tiithi, mwaalevelele”. Masi tani Yesu aaphavela wira Tiithi awe aalevelele? Moolumo anittharelana anninikhaliherya waasuwela tani Yesu aahimya awe. Owo aahimmye so: “Maana khanisuwela etthu aniira aya”. (Luka 23:33, 34) Woonasa wene, Yesu aahimya anakhotto ooRoma yaawo yaakhomenle vamwirini va nihaaxeryo metto ni matata awe, maana awo khiyaamusuwela oratteene Yesu. Nave, pooti wira Yesu aahimya atthu akina yaari muttitthi ole yaawo yaavekenle wira iiviwe vamwirini va nihaaxeryo masi muhoolo mwaya yaarowa omwaamini. (Mit. 2:36-38) Yesu kheemerenrye itthu iye sootakhala iireliwe awe simwiirihaka owunlela ikuhu wala okhootta waalevelela. (1 Ped. 2:23) Yesu aahinvekela Yehova wira aalevelele atthu ale yaamwiivale.

4. Olevelela wa Yesu onniixuttiha exeeni?

⁴ Moolumo a Yesu anniixuttiha exeeni? Nimutakihaka Yesu, nihaana wiimananiha waalevelela atthu akina. (aKol. 3:13) Atthu akina waahela muhina amusi ahu, woonasa wene pooti onilupattha  mwaha woowi khanisuwela itthu ninkupali ahu ni mweettelo ahu. Awo pooti opacerya onootherya wira ninnipaka itthu soohiloka, oniramusa ohoolo wa atthu akina, opaha iliivuru sahu wala onoopopiha wira anooniiriha etthu yootakhala. Nto ohiya opweha mathowa vamurimani wala owunlela ikuhu, nihaana onvekela Yehova wira aakhaliherye wiixutta ekeekhai. (Math. 5:44, 45) Okathi mukina vannivila omulevelela mutthu, otepexa wene akhala wira ooniirela itthu sinceene soohiloka. Musuweleke wira akhala wira nnoovikaniha onyoonyiheya ni opweha mathowa vamurimani, eyo pooti onikumiherya mixankiho. Murokora mmosa ohimmye so: “Kihoona wira olevelela, khontaphulela wira itthu mutthu okiirenle awe sirookisivela wala ohihiye okiirela itthu sootakhala. Masi ontaphulela ohipweha mathowa vamurimani”. (Esal. 37:8) Vaavo nnaalevelela ahu atthu akina, ninnooniherya wira khanneemererya itthu soohiloka niireliwe ahu siniirihaka oriipiwa murima.—aEef. 4:31, 32.

5. Etthu xeeni Yesu aamuleihenrye awe nakrime ni etthu xeeni yamwiirinhe omuleiherya eyo?

⁵ Etthu xeeni Yesu aahimmye awe? Okathi Yesu aakhomeliwe awe, owo aakhomeliwe eriyari ya anakrime anli. Wanipacerya, anakrime oowanli yaaninveeha Yesu. (Math. 27:44) Masi muhoolo mwaya, nakrime mmosa aahituruka moonelo awe. Owo aahoona wira Yesu ‘khaapanke etthu yootakhala’. (Luka 23:40, 41) Etthu yootepa oreera, okhala wira nakrime ole aanikupali wira Yesu aamuhihimuxiwa ni aarowa okhala Mwene. Nto aahimuleela Yesu wira: “Mukuupuwele mwaphiya Moomweneni mwanyu”. (Luka 23:42) Ni moolumo ala, mulopwana ole aahooniherya wira aari mutthu oowaamini! Nto Yesu aahimwaakhula wira: “Olelo, kinooleelani ekeekhai wira, munrowa okhala ni miyo mParayiisu [ohiya Momweneni]”. (Luka 23:43) Moone wira Yesu aahirumeela moolumo oowi: “Munrowa”, “miyo” ni “nyuwo” omuhimyaka nakrime ole. Moolumo ala, anooniherya wira Yesu taamuleihenrye nakrime ole wira aamukhala ni yena mParayiisu. Etthu yaamwiirinhe Yesu onvaha yooleiherya ele nakrime ole, okhala wira Yesu aanisuwela oratteene wira Tiithi awe toomoriwa ikharari.—Esal. 103:8.

6. Moolumo Yesu aamulenle awe nakrime anniixuttiha exeeni?

⁶ Moolumo a Yesu anniixuttiha exeeni? Yesu, onnimutakiha moomalela Tiithi awe. (aHeeb. 1:3) Yehova onniphavela onilevelela ni onimorela ikharari. Masi onoonilevelela ni onimorela ikharari akhala wira ninnittharuwa ni murima ahu wotheene opaka itthu soohiloka naapaka ahu khalai ni ninnaamini mukuttho Yesu ovanhe awe. (1 Yoh. 1:7) Atthu akina vannaavila okupali wira Yehova onimwaalevelela itthu soohiloka apanke aya khalai. Akhala wira okathi mukina nyuwo munnikhalana moonelo owo, nkahaya muupuwele ela: Okathi vakhaani ohinatthi okhwa, Yesu aahimmorela ikharari nakrime yoowo aapacenrye omwaamini. Nto khamunikupali wira Yehova onimwaamorela ikharari arumeyi awe yaawo aniimananiha wiiwelela malamulo awe?—Esal. 51:3; 1 Yoh. 2:1, 2.

7. Ntoko niwenhe ahu Yohani 19:26, 27, etthu xeeni Yesu aamulenle awe Maria ni Yohani ni etthu xeeni yaamwiirinhe ohimya eyo?

⁷ Etthu xeeni Yesu aahimmye awe? (Mmusome Yohani 19:26, 27.) Yesu aaphavela wira maama awe okhapeleliweke. Mwaha woowi woonasa wene aari naamukhweli. Ekeekhai wira axihimaawe yanwerya omukhapelela maama awe anvahaka itthu sa weerutthuni. Masi tani aarowa omukhaliheryaka maama awe ohihiya omwaamini Yehova? Khiivo etthu mBiibiliyani enooniherya wira mpakha okathi ole aahikhala muhima awe aari mutthareli awe. Masi Yohani ari  murummwa a Yesu oororomeleya ni mpatthani awe muulupale. Nto Yesu aanaathokorerya atthu otheene yaamukokhorela Yehova ntoko amusi awe. (Math. 12:46-50) Okhala wira Yesu aanimphenta vanceene Maria, owo aaphavela wira okhapeleliweke saana. Tivonto, anvekenle awe Yohani wira omukhapeleleke maama awe. Yesu aanisuwela wira Yohani ammukhaliherya Maria ohihiya omurumeela Yehova. Nto Yesu aahimuleela maama awe wira: “Mwaninyu owo-vo!” Nave aahimuleela Yohani wira: “Maama anyu owo-vo!” Okhuma nihiku nne, Yohani aarowa okhala mwaana a Maria ni aarowa omukhapelelaka Maria ntoko maama awe. Maria aahimukhapelela moophenta Yesu okhuma nihiku aamuyanre awe ni nihiku akhwa awe Maria aahikhala-vo. Nto eyo ti etthu yaamwiiriha Yesu omphenta vanceene Maria.

8. Moolumo Yesu aamulenle awe Maria ni Yohani anniixuttiha exeeni?

 ⁸ Moolumo a Yesu anniixuttiha exeeni? Waataana nrina ahu ni anna ni arokora maKristau, pooti okhala woolipa vanceene ovikana waataana nrina ahu ni amusi ahu a weerutthuni. Amusi ahu pooti onilupattha wala oninyanyala. Masi Yesu oonileiherya wira akhala wira nnoovarexexa mutthenkeso wa Yehova, nnootthuveliwa vanceene ovikana itthu nihiyale ahu. Anna ni arokora anceene anookhala aniihu, axitiithi ahu ni aximaama ahu. (Mar. 10:29, 30) Hiyo, nniirela mpantta emusi yowiiraana. Maana nirina waamini omosaru, ninnimphenta Yehova ni ninniphentana mukina ni mukhwaawe. Munoonela sai wiirela mpantta emusi ela yowiiraana?—aKol. 3:14; 1 Ped. 2:17.

9. Moolumo a Yesu ari Matheyo 27:46, anniixuttiha exeeni?

⁹ Etthu xeeni Yesu aahimmye awe? Ohalaka vakhaani okhwa, Yesu aahilavula voorunya oriki: “Muluku aka, Muluku aka, xeeni muhalaka okinyanyala?” (Math. 27:46) Biibiliya, khonitthokiherya etthu yaamwiirinhe Yesu ohimya moolumo awo. Masi hata vari siiso, nrowe niwehe etthu anniixuttiha aya moolumo awo a Yesu. Mwa ntakiheryo, mwaha woolavula moolumo ale Yesu akhwaniherya eprofesia eri Esalimo 22:2. * Nave moolumo ale annooniherya oratteene wira Yehova ‘khaamwaakihenrye sootakhala sotheene’ Mwanawe. (Yobi 1:10) Yehova, aahiweemererya awanani a Mwanawe omweehererya mpakha okhwa. Nave, khuuvo pinaatamu aatonko weehereriwa onvikana Yesu. Nave-tho, moolumo a Yesu annooniherya oratteene wira aanisuwela wira khaapanke etthu yootakhala ni khaaphwanela wiiviwa.

10. Moolumo Yesu aamulenle awe Tiithi awe anniixuttiha exeeni?

¹⁰ Moolumo a Yesu anniixuttiha exeeni? Etthu yoopacerya nniixutta ahu tiila: Nihilipeleleke wira okathi wotheene Yehova onrowa onaakihaka wira sihinikhumelele mixankiho sinrowa weehererya waamini wahu. Ntoko Yesu eehereriwe awe mpakha okhwa, hiyo nave nihaana wiilokiherya, maana pooti weehereriwa mpakha okhwa. (Math. 16:24, 25) Masi muhiliyale wira Muluku, oonileiherya wira khaninrowa weehereriwa mpakha vahinwerya ahu ovilela. (1 aKor. 10:13) Etthu ekina nniixutta ahu tiila: Hiyo pooti olupatthiwa hata nihipanke etthu yoohiloka. (1 Ped. 2:19, 20) Awanani ahu khahiyo wira annilupattha mwaha woopaka etthu yoohiloka masi awo anninlupattha mwaha woowi khanniirela mpantta olumwenku ni ninlaleya ekeekhai. (Yoh. 17:14; 1 Ped. 4:15, 16) Yesu aanisuwela etthu yaamwiirinhe Yehova oweemererya awanani awe omuhasula. Masi anna akina oororomeleya okathi anikhalana aya mixankiho, awo anniikoha nthowa nimwiirinhe Yehova weemererya itthu iyo waakhumelela. (Hab. 1:3) Hata vari siiso, Yehova onnaapixerya murima ni onnaamorela ikharari anna awo. Maana Yehova onnisuwela wira etthu eniwiiriha opaka eyo khahiyo wira ahirina waamini, masi aniphavela omaalihiwa. Nto owo onnaamaaliha okathi wooreerela.—2 aKor. 1:3, 4.

11. Exeeni yaamwiirinhe Yesu ohimya moolumo ari Yohani 19:28?

¹¹ Etthu xeeni Yesu aahimmye awe? (Mmusome Yohani 19:28.) Etthu xeeni yaamwiirinhe Yesu ohimya wira: “Koovoliwa ntthona”? Yesu aahilavula moolumo awo “wira omaliherye soolempwa”, eyo piiyo, eprofesia eri Esalimo 22:16 yeeyo enihimya wira: “Vammilo vokùma ntoko nivali: nlumi naka nophara mwano”. Tthiri ninniwerya woona etthu yaamwiirinhe Yesu ovoliwa ntthona vanceene. Owo aahihaawa vanceene  ohela muhina owereya oonale awe okathi aakhomeliwe awe vamwirini va nihaaxeryo. Nto okathi ole Yesu aahaana okhaliheriwa wira omalihe ntthona.

12. Moolumo a Yesu oowi “koovoliwa ntthona” anniixuttiha exeei?

¹² Moolumo a Yesu anniixuttiha exeeni? Yesu khuupuwela wira ohimya muxankiho awe, atthu yaarowa wuupuwelaka wira aari mulolo. Hiyo nave, nihuupuweleke wira ohimya muxankiho ahu ni sootteettheya sahu naalolo. Ohiya-vo, nihaana waaleela atthu akina wira anikhaliherye. Akhala wira khaninwerya omaliha mixankiho sahu mekhihu, nihaana waavekela nikhaliheryo atthu akina. Mwa ntakiheryo, akhala wira nihuuluvala wala nnoowereiwa nihooveleleke onvekela mpatthani onikuxa mukaaroni mwawe wira oniroihe omerkaatu wala orowa olavula ni meediku. Akhala wira nooriipiwa murima wala nookhulumuwa, nihooveleleke waavekela nikhaliheryo axitokweene wala muKristau oolipa momunepani wira onikhaliherye. Awo pooti ohimya moolumo oolipiha anrowa onihakalaliha vanceene. (Mir. 12:25) Muhiliyale wira anna ni arokora anniniphenta vanceene ni aniphavela onikhaliherya “okathi w’oxanka”. (Mir. 17:17) Xontte, musuweleke wira anna ni arokora khaniwerya oloha ele nnuupuwela ahu. Nto awo khanrowa osuwela ele nimphavela ahu akhala wira khinaaleelale.

13. Itthu xeeni Yesu owenrye awe opaka mwaha woororomeleya mpakha okhwa?

¹³ Etthu xeeni Yesu aahimmye awe? Woonasa wene, 15 oora a 14 a Nisani, Yesu aahilavula ni moolumo oorunya iiraka: “Itthu sotheene soomaliheriwa”. (Yoh. 19:30) Moolumo ala a Yesu, anniixuttiha wira ohalaka okathi vakhaani wira okhwe, owo aanisuwela wira aahipaka itthu sotheene Yehova aamurumme awe opaka. Nto mwaha woororomeleya mpakha okhwa, Yesu aahiwerya opaka itthu sinceene. Yoopacerya, Yesu aahooniherya wira Satana nawoothe. Nave Yesu aahooniherya wira pinaatamu oomalela onoowerya ohihiya ororomeleya hata Satana omweehereryaka vanceene. Ya nenli, Yesu aahivaha okumi awe wira owoopole apinaatamu. Mwaha woovaha okumi awe wira owoopole apinaatamu, Yesu ohaavaha eparakha apinaatamu oohimalela okhala apatthani a Muluku ni okhalana nlipelelo na okhala mahiku otheene. Ya neeraru, Yesu aahooniherya wira Yehova namalamulela a xariya ni aahitteeliha nsina na Tiithi awe.

14. Khula nihiku, otheene ahu nihaana wiimananiha opaka exeeni? Mutthokiherye.

¹⁴ Moolumo a Yesu anniixuttiha exeeni? Khula nihiku, nihaana wiimananiha ohihiya ororomeleya. Nkahaya nwehe moolumo a munna Maxwell Friend yoowo aasomiha anna yaarowela exikola ya oGileadi. Olavulaka sa ororomeleya, vaavo aalavula awe mwaha awe asembeleya Internacional, munna Friend aahimmye so: “Muhihiyerye meelo etthu mwaakhanle anyu oopaka aahiiso ohimya olelo. Exeeni enookupaliha wira meelo munookhala mukumi? Khula nihiku nikhaleke ntoko nihiku nanyu nookiserya na wooniherya wira munniphwanelela ophwanya okumi woohimala”. Nto khula nihiku, muthokoreryeke ntoko nihiku nanyu nookiserya na wooniherya wira mwa mutthu oororomeleya! Mwiira siiso, hata mukhalanaka muxankiho yoowo munoona anyu wira munimwiiviwa, munoowerya omuleela Yehova wira: “Yehova, kihiimananiha ohihiya ororomeleya wira kooniherye wira Satana nawoothe, otteeliha nsina nanyu ni okhaliherya okhulupale anyu!”

15. Moovarihana ni Luka 23:46, etthu xeeni Yesu aakupali awe?

¹⁵ Etthu xeeni Yesu aahimmye awe? (Mmusome Luka 23:46.) Yesu, aahimuleela ni murima wotheene Yehova wira: “Tiithi, kinnoovahereryani  okumi aka mmatatani mwanyu”. Yesu aanisuwela oratteene wira okumi awe wa muhoolo waari mmatatani mwa Yehova. Nave, aanikupali ni murima wotheene wira Yehova ammuupuwela.

16. Ntakiheryo na munna aarina iyaakha 15, niwiixuttinheni exeeni?

¹⁶ Moolumo a Yesu anniixuttiha exeeni? Muhihiye ororomeleya wa Yehova hata murowaka okhwa. Okathi owo muhaana onvahererya Yehova okumi anyu. Wira mpake eyo, muhaana ‘waaroromela Apwiya [Yehova] ni murima anyu wothene’. (Mir. 3:5) Nkahaya nwehe ntakiheryo na Yoshua, mmiravo Namoona a Yehova yoowo aarina iyaakha 15. Owo aahiphwanyaniwa oretta waarowa omwiiva. Owo aahikhootta enamuna ya olooliwa ehinivarihana ni malamulo a Muluku. Ohalaka vakhaani okhwa, munna ole aahimuleela maama awe wira: “Maama, kiri mmatatani mwa Yehova. . . . Kinnihimya ni murima aka wotheene maama, mwaha woowi kinnisuwela wira Yehova onookihihimuxa. Owo onnisoma mirima sa atthu, nto onnisuwela wira kinnimphenta”. * Otheene ahu, nihaana wiikoha so: ‘Akhala wira waamini waka onimweehereriwa wala kinookhalana muxankiho onrowa okiiriha wiiviwa, kiireke kinoorowa ovikaniha ororomeleya wa Yehova kikupaliki wira onookuupuwela?’

17-18. Itthu xeeni niixuntte ahu? (Nwehe ekaaxa eni: “ Moolumo Ookiserya a Yesu Anniixuttiha Exeeni?”)

¹⁷ Ntoko niwenhe ahu, moolumo ookiserya a Yesu anniniixuttiha itthu sinceene. Muhiliyale wira nihaana waalevelela atthu akina ni okupali wira Yehova onoonilevelela. Nookhalana eparakha ya okhala vamosa ni anna ni arokora yaawo annikhaliherya. Nto nihaana waavekela nikhaliheryo okathi wotheene nimphavela ahu. Noosuwela wira Yehova onoonikhaliherya ovilela khula muxankiho onrowa onikhumelela. Nave, nihoona efaita erina aya othokorerya khula nihiku ntoko nihiku nahu nookiserya na wooniherya wira na atthu oororomeleya. Nihaana ohihiya omuroromela Yehova ni onvahererya okumi ahu mmatatani mwawe nikupaliki wira onoonihihimuxa.

¹⁸ Tthiri itthu Yesu aalavunle awe okathi aakhomeliwe awe vamwirini va nihaaxeryo sinniniixuttiha itthu sinceene! Akhala wira nnoovarihela muteko itthu sotheene niixuntte ahu mwaha ola, nnimooniherya wira ninnipaka ele Yehova onivekenle awe oriki: “Mmwiiweleleke yoowo”.—Math. 17:5.