1-2. Yesuusi wurssetta qaalata haasayanaappe kase aybi hanidee?

WODEE Niisaana 14, 33 M.Ln seeta gallassa. Yesuusa wordduwan mootidi, I mooribeennaban A bolli pirddi simmidi, A boridosona, pala barchchiyaa bessidosona, yaatidi qassi mittaa bolli misimaariyan xishidosona. Misimaaree A kushetanne tohota kantti kiyiis. SHemppiyoogeenne haasayiyoogeekka A keehi metees. Gidoppe attin, I keehi koshshiyaabaa haasayana haniyo gishshawu, haasayana bessees.

² Yesuusi hayqqana haniiddi haasayidobaanne hegaappe nuuni tamaarana danddayiyoobaa ane beˈoos. Woy qassi, ane ‘I yootiyoobaa siyoos.’—Maa. 17:5.

3. Yesuusi, “Ta Aawau, . . . eta nagaraa atto ga” giido asati geella oonee?

³ Yesuusi woygidee? Yesuusa mittaa bolli misimaariyan xishishin I hagaadan woossiis: “Ta Aawau, . . . eta nagaraa atto ga.” Atto gaanay oossee? Yesuusi kaallidi haasayidobay I obaa haasayidaakko nuuni akeekanaadan maaddees. I hagaadan giis: “Eti bantta oottiyoogaa [erokkona].” (Luq. 23:33, 34) Yesuusi ba tohuwaanne kushiyaa misimaariyan xishiya Rooma wotaaddaratubaa yootennan aggenna. I oonakko eti erokkona. I yootido asati, A woranaadan oychchidaageetu giddon guyyeppe an ammanana amaridaageeta gidanakka danddayoosona. (Oos. 2:36-38) Yesuusi hayqqana bessenna. Gidoppe attin, I hanqqettidi, bana yedettiyaageetussi atto giikke gibeenna. (1 PHe. 2:23) SHin, I bana woriyaageetussi Yihooway atto gaanaadan oychchiis.

4. Yesuusi bana eqettiyaageetussi atto gaanawu eeno giidoogaappe ay tamaariyoo?

 ⁴ Yesuusi yootidobaappe nuuni ay tamaariyoo? Nuunikka Yesuusadan nu dosan haratussi atto gaana koshshees. (Qol. 3:13) Nu dabbota gujjin, amaridaageeti nu ammanuwaabaanne nuuni deˈiyo deˈuwaabaa akeekenna gishshawu, nuna eqettana danddayoosona. Eti nubaa wordduwaa yootana, haratu sinttan nuna kawushshana, nu xuufeta xayssana, woy ubba nuna qohana giidi yashissana danddayoosona. Nuuni nuna eqettiyaageetussi uluwan lancce oyqqiyoogaa aggidi, eti tumaa ammananaadan Yihooway eta wozanaa dooyana mala woossana danddayoos. (Maa. 5:44, 45) Eti nuna keehi naaqqidaba gidikko, atto gaanawu issi issitoo metootana danddayoos. SHin nuuni hanqqettidi aggennaageetanne atto geennaageeta gidikko, qohettoos. Issi michchiyaa hagaadan gaasu: “Haratussi atto giyoogee eti oottidobay likke giyoogaa, woy qassi eti tana qohanaadan eeno giyoogaa gidenna. Hegee taani lancciyoogaa agganawu kuuyaas giyoogaa.” (Maz. 37:8) Nuuni atto gaanawu kuuyiyo wode, qohettidoban yiillotiiddi deˈennaadan dooroos.—Efi. 4:31, 32.

5. Yesuusi ba miyyiyan mittaa bolli kaqettida danobaa oottida bitaniyawu ay qaala gelidee, qassi I he qaalaa gelidoy aybissee?

⁵ Yesuusi woygidee? Danobaa oottida naaˈˈu asata Yesuusa miyyiyan mittaa bolli kaqqidosona. Koyro, naaˈˈaykka A bolli qilliiccidosona. (Maa. 27:44) SHin guyyeppe etappe issoy qilliicciyoogaa aggiis. Yesuusi “ainne iitabaa” oottibeennaagaa he bitanee akeekiis. (Luq. 23:40, 41) I Yesuusi hayquwaappe denddidi sinttappe kawo gididi haaranaagaa ammaniyoogaakka bessiis. I hayqqana haniya Ashshiyaagawu hagaadan giis: “Yesuusaa, neeni ne kawotettaa wolqqan yiyo wode, tana dogoppa.” (Luq. 23:42) He bitanee gita ammanoy deˈiyoogaa bessiis! Yesuusi ayyo zaaridi hagaadan giis: “Hachchi taani neessi tumaa odays; neeni tanaara [Kawotettan gidennan] gannatiyan deˈana.” (Luq. 23:43, NW) Yesuusi “taani,” “neessi,” qassi “tanaara” giyoogan izaawussi qaalaa gelidoogaa akeeka. Yesuusi ba Aaway maariyaagaa gidiyoogaa eriyo gishshawu, danobaa oottida he hayqqana haniya bitaniyawu hidootay deˈiyoogaa yootiis.—Maz. 103:8.

6. Yesuusi danobaa oottida bitaniyawu yootidobaappe ay tamaariyoo?

⁶ Yesuusi yootidobaappe nuuni ay tamaariyoo? Yesuusi ba Aawaa duutti ekkiis. (Ibr. 1:3) Yihooway nuussi atto gaanawunne nuna maaranawu koyees. SHin I yaatanay nuuni kase oottido iitaban tumuppe zilˈˈettiyaanne Yesuusa yarshshuwan ammaniya asa gidiyo wodiyaana. (1 Yoh. 1:7) Issoti issoti eti kase mooridobaa Yihooway atto gaanaagaa ammananawu metootana danddayoosona. Neeni issi issitoo hegaadan qoppikko, hagaa akeeka: Yesuusi hayqqanaappe guuttaa kasetidi, ammaniyoogaa biron bessiya, danobaa oottida bitaniyaa maariis. Yaatin Yihooway ayyo azazettanawu banttawu danddayettida ubbaa oottiya, awu goynniya ammanettidaageetussi ay keena darissidi atto gaanee!—Maz. 51:1; 1 Yoh. 2:1, 2.

7. Yohaannisa 19:26, 27y yootiyoogaadan, Yesuusi Mayraamonne Yohaannisa woygidee, qassi I hegaadan giidoy aybissee?

⁷ Yesuusi woygidee? (Yohaannisa 19:26, 27 nabbaba.) Yesuusa A aayeebay qofissiis; A he wode amˈˈe gidennan aggukku. A ishanttinne michchontti asatettawu koshshiyaaban O xeellennan waayi aggana. Gidoppe attin, ayyaanaabawu koshshiyaaban O ooni xeellanee?  A ishantti he wode erissiyo ashkkara gididoogaa bessiyaabi baawa. SHin, Yohaannisi kiitettida ammanettida asa, qassi Yesuusawu mata laggetuppe issuwaa. Yesuusi banaara Yihoowawu goynniyaageeta ba so asadan xeelliis. (Maa. 12:46-50) Yesuusi Mayraamo siiqiyo gishshawu, O issi uri heemmanaadan koyiis. Yaatiyo gishshawu, Yihoowawu A haggaazanaadan Yohaannisi O maaddanaagaa eridi, ayyo hadaraa immiis. I ba aayeesi hagaadan giis: “Ne na7aa hagaa be7a!” Qassi Yohaannisassi hagaadan giis: “Ne aayyiyo hanno be7a!” He gallassappe doommidi, Yohaannisi Mayraamissi naˈa mala gididi, O ba aayeedan xeelliis. Yesuusi I yelettiyo wode koshshiyaabaa assi siiquwan kunttidanne hayqqiyo wode A  matan eqqida alˈˈo maccaasiyo keehi siiqiyoogaa bessiis!

8. Yesuusi Mayraamissinne Yohaannisassi yootidobaappe ay tamaariyoo?

⁸ Yesuusi yootidobaappe nuuni ay tamaariyoo? Ayyaanaaban nuussi ishanne michcho gididaageeti nu mata dabbotuppe aaruwan nuussi lagge. Nu dabboti nuna eqettana woy haray atto yeggi bayana danddayoosona, shin nuuni Yihoowaara dabbotaa minttidi deˈikko, Yesuusi yootidoogaadan, nu aggidobaappe ‘xeetutooppe dariyaagaa’ demmana. Daroti nuussi siiqo attuma naˈa, macca naˈa, aayo, woy aawa mala gidana. (Mar. 10:29, 30) Ammanuwan, Yihoowanne issoy issuwaa siiqiyo siiquwan issuwaa gidida ishanttinne michchontti gubaaˈiyan deˈiyo gishshawu, neeyyo aybi siyettii?—Qol. 3:14; 1 PHe. 2:17.

9. Yesuusi Maatiyoosa 27:46n yootidobaappe ay tamaariyoo?

⁹ Yesuusi woygidee? Yesuusi hayqqanaappe guuttaa kasetidi hagaadan giis: “Ta Xoossau, ta Xoossau, tana aissi aggadii?” (Maa. 27:46) Yesuusi ayssi hegaadan giidaakko Geeshsha Maxaafay qonccissenna. SHin he qaalatuppe nuuni tamaariyoobaa qoppa. Yesuusi yaagiyoogan, Mazamure 22:1n deˈiya hiraagaa polidoogee nuuni tamaariyo issiba. * Hegaa bollikka, Yihooway ba Naˈaa yuushuwaa ‘diridi naagibeennaagaa’ he qaalati bessoosona. (Iyy. 1:10) Yesuusi I hayqqana gakkanaashin morkketi A ammanuwaa paaccanaadan ba Aaway eeno giidoogaa akeekiis. Ay asinne Yesuusaagaa keena paacettibeenna. Hegaa bollikka, I hayqqanaadan oottiya aybanne oottibeennaagaa he qaalati qonccissidosona.

10. Yesuusi ba Aawawu yootidobaappe ay tamaarana danddayiyoo?

¹⁰ Yesuusi yootidobaappe nuuni ay tamaariyoo? Nuuni tamaariyoobaappe issoy nu ammanuwaa paacciya metotuppe Yihooway nuna naagees giidi qoppana koshshennaagaa. Yesuusi wurssettay gakkanaashin paacettidoogaadan, nuunikka koshshikko hayqqana gakkanaassi ammanettidaageeta gidanawu giigi uttana bessees. (Maa. 16:24, 25) Gidoppe attin, nuuni danddayiyoogaappe aaruwan paacettanaadan Xoossay eeno geennaagaa ammanettoos. (1 Qor. 10:13) Harabaakka tamaaroos; nuuni aynne moorana xayikkokka, Yesuusaagaadan waayettana danddayoos. (1 PHe. 2:19, 20) Nuna eqettiyaageeti nuuni mooridobi deˈiina gidennan, nuuni alamiyaa bagga gidenna gishshawunne tumaa markkattiyo gishshawu eqettoosona. (Yoh. 17:14; 1 PHe. 4:15, 16) Yesuusi I waayettanaadan Yihooway eeno giidoy aybissakko akeekiis. SHin ammanettidi goynniyaanne waayee gakkiyo harati Yihooway issi issibay gakkanaadan eeno giidoy aybissakko akeekanawu issi issitoo metootoosona. (Ibr. 1:3) Maariyaanne danddayiya nu Xoossay etawu ammanoy paccibeennaagaa erees. A xalaalay immana danddayiyo minttettoy etawu koshshees.—2 Qor. 1:3, 4.

11. Yesuusi Yohaannisa 19:28n deˈiya qofaa yootidoy aybissee?

¹¹ Yesuusi woygidee? (Yohaannisa 19:28 nabbaba.) Yesuusi, “Tana saammees” giidoy aybissee? I Mazamure 22:15n deˈiya, “Ta qooree kon77aadan melees; ta inxxarssai kookkiyaara ohettees” yaagiya, “Xoossaa maxaafai giidoogee polettana mala” hegaadan giis. Qassi Yesuusi mittaa bolli barchchetiyoogaa gujjin, he waaye ubbaa waayetti simmidi,  saamettanaagee qoncce. Saamuwaa alanawu ayyo maadoy koshshiis.

12. Yesuusi “tana saammees” giidoogaappe ay tamaarana danddayiyoo?

¹² Yesuusi yootidobaappe nuuni ay tamaariyoo? Yesuusi bawu siyettiyaabaa yootiyoogee bala giidi qoppibeenna; nuunikka nuussi siyettiyaabaa yootana koshshees. Nuuppe amaridaageeti harati maaddanadan oychchanawu waayi dosana. SHin nuussi maaduwaa koshshikko, harati maaddanaadan oychchanawu mammottana koshshenna. Leemisuwawu, nuuni cimikko woy sahettikko, koshshiyaabaa shammanawu woy aakimee keerido gallassi aakime keetti issi ishay nuna efaanaadan oychchana danddayoos. Nuuni hidootaa qanxxikko, ‘shonggaara deˈiya haasayaa’ haasayiyoogan nuna minttettanaadan gubaaˈe cimaa woy hara kayma Kiristtaane laggiyaa oychchiyoogee koshshana danddayees. (Lee. 12:25) Nu ishanttinne michchontti nuna siiqiyoogaanne “metuwaa wode” nuna maaddanawu koyiyoogaa hassayiyaageeta gidoos. (Lee. 17:17) SHin nuuni ay qoppiyaakko eti erana danddayokkona. Nuuni yootennan eti nuussi koshshiyaabaa erana danddayokkona.

13. Yesuusi hayqqana gakkanaashin ammanettiyoogan ay polidee?

¹³ Yesuusi woygidee? Yesuusi Niisaana 14n saateppe guyyiyan uddufun saate heeran ba qaalaa xoqqu oottidi hagaadan giis: “Polettiis”! (Yoh. 19:30) Yesuusi I oottanaadan Yihooway koyido ubbabaa oottidoogaa eriyoogaa, I hayqqana haniiddi haasayidobaappe akeekoos. Yesuusi hayqqana gakkanaashin ammanettiyoogan darobaa poliis. Koyruwan, Seexaanay worddanchcha gidiyoogaa bessiis. Wottiyoobi baynna uri Seexaanay ay oottinkka bali baynnan ammanettana danddayiyoogaa Yesuusi qonccissiis. Naaˈˈanttuwan, Yesuusi ba shemppuwaa wozo oottidi immiis. I yarshsho gididi hayqqido gishshawu, nagaranchcha asay Xoossaara dabbotananne merinawu deˈana danddayees. Heezzanttuwan, Yesuusi Yihooway geeshshatettan haariyaagaa gidiyoogaa qonccissidi, ba Aawaa sunttay tooshiyaappe geeyanaadan oottiis.

14. Nuuni ubba galla waani deˈanawu murttana koshshii? Qonccissa.

¹⁴ Yesuusi yootidobaappe nuuni ay tamaariyoo? Nuuni ubba galla ammanettidi deˈanawu nuussi danddayettida ubbabaa oottana koshshees. Giiliyaade Geeshsha Maxaafaa Timirtte Keettaa asttamaare gididi haggaazida Ishaa Makiswel Firendi woygidaakko beˈa. Ishaa Firendi ammanettiyoogaa xeelliyaagan, daro biittaappe yiidaageeti shiiqido gita shiiquwan hagaadan giis: “Hachchi oottana woy haasayana danddayiyoobaa wonttoossi keeroppite. Wontto intte deˈanaagaa aybin ereetii? Ubba gallassaa intte merinawu deˈana bessiya asa gidiyoogaa qonccissiyo wurssetta gallassadan xeellite.” Simi taani ammanettada deˈanawu hachchippe hara qaadi baawa giidi ubba galla deˈoos! Yaatikko, nuuni hayqqiyaakkokka, hagaadan gaana danddayoos, “Yihoowaa, taani ammanettada deˈanawu, Seexaanay worddanchcha gidiyoogaa bessanawu, qassi ne sunttaa bonchchanawunne ne haaruwawu exatanawu tawu danddayettida ubbabaa oottaas!”

15. Luqaasa 23:46n odettidaagaadan, Yesuusi ay ammanettiyoogaa yootidee?

¹⁵ Yesuusi woygidee? (Luqaasa 23:46 nabbaba.) Yesuusi ba kumetta wozanaappe ammanettidi hagaadan giis: “Ta Aawau, taani ta shemppuwaa ne kushiyan wottais.” Yesuusi I sinttappe deˈanay woy agganay Yihooway  maaddiina gidiyoogaa erees, qassi ba Aaway bana hassayanaagaa I ammanettees.

16. Layttay 15 gidido Yihoowa Markkaa hanotaappe ay tamaaray?

¹⁶ Yesuusi yootidobaappe nuuni ay tamaariyoo? Ne shemppuwawu hirggissiyaabi gakkikkokka, Yihoowawu ammanettada deˈa. Yaatanawu, neeni ‘ne polo wozanan Yihoowan ammanettana’ bessees. (Lee. 3:5) Woriya harggee oyqqido Yihoowa Markkaa, Joshuwa giyo 15 laytta naˈaa hanotaa beˈa. I Xoossaa Higgiyaara maayenna akkamuwaa akkamettennan ixxiis. I hayqqanaappe guuttaa kasetidi ba aayeessi hagaadan giis: “Taayiloo, taani Yihoowa kushiyaana . . . Taayee, taani aynne sirennan hagaa yootays: Yihooway tana hayquwaappe denttanaagaa geeshshada erays. I ta wozanaa qofaa erees, qassi A taani wozanappe siiqays.” * Nuuni ubbay hagaadan giidi nuna oychchana koshshees: ‘Taani hayqqanaadan oottana danddayiyaaban ta ammanoy paacettikko, Yihoowayyo ammanettada deˈananne I tana hassayanaagaa ammanettana danddayiyaanaa?’

17-18. Nuuni tamaaridobati aybee? (“ Yesuusi Haasayido Wurssetta Qaalatuppe Tamaariyoobaa” giya saaxiniyaakka xeella.)

¹⁷ Yesuusi haasayido wurssetta qaalatuppe keehi koshshiyaabaa tamaaroos! Nuuni haratussi atto gaananne Yihooway nuussi atto gaanaagaa ammanettana koshshiyoogaa hegeetuppe tamaaroos. Nuna maaddanawu koyiya daro ishanttinne michchontti gubaaˈiyan deˈiyoogee keehi ufayssiyaaba. SHin maadoy koshshiyo wode nuuni eta oychchana bessees. Nuna ayba paacee gakkikkonne genccanaadan Yihooway nuna maaddanaagaa eroos. Qassi nuuni hayqqikkokka Yihooway denttanaagaa ammanettoos; yaatidi ammanettada deˈiyoogaa bessanawu hagee tawu wurssetta qaada giidi ubba gallassaa xeellana koshshiyoogaa akeekoos.

¹⁸ Ee tuma; Yesuusi mittaa bolli hayqqana haniiddi haasayidobaappe darobaa tamaarana danddayoos! Nuuni tamaaridoogaadan oottiyoogan, ba Naˈaa xeelliyaagan Yihooway yootidobaa azazettoos: “I giyoogaa siyite.”—Maa. 17:5.