1-2. Before Jesus talk for the last time, which things happen?

NA DAYTIME for Nisan 14, 33 C.E. After they lie and judge Jesus for bad thing wey e no do, they laugh, suffer, and nail Jesus ontop pole. The nails pass through e hand and leg. Jesus de feel the pain as e de breath and de talk. But e must talk, because e get important things to talk.

² Make we talk about the things wey Jesus talk when e de die ontop the pole, and the things wey we fit learn from them. This one go help us fit “do the things wey e talk.”​—Matt. 17:5.

3. Which people Jesus fit de talk about when e talk say: “Father, forgive them”?

³ Wetin Jesus talk? When Jesus dey the pole, e pray say: “Father, forgive them.” Which people Jesus say make e Father forgive? The next things wey Jesus talk fit help us know the people. E talk say: “They no know wetin them de do.” (Luke 23:33, 34) Maybe na the Roman soldiers Jesus de talk about for here. Na this people nail e hand and leg for the pole. They no know who Jesus really be. Maybe Jesus still de talk about some people for the crowd. This people want make they kill Jesus that time, but they fit still change after and put faith for Jesus. (Acts 2:36-38)  Even though say Jesus no suppose suffer the bad things wey e suffer, e no vex or start to blame the people. (1 Pet. 2:23) Instead, e beg Jehovah make e forgive the people wey kill-am.

4. Wetin we fit learn from Jesus as e forgive people from e heart even as e suffer from their hand?

⁴ Wetin we fit learn from the thing wey Jesus talk? Like Jesus, make we de forgive people from our heart. (Col. 3:13) Some people, even some of our family people, fit de give us trouble because they no understand the things wey we believe and the way we de live our life. They fit lie about us, they fit disgrace us for front of people, they fit destroy our book them, or even threaten to wound us. Instead make we continue to vex, make we beg Jehovah to help the people wey de do us bad to accept the truth one day. (Matt. 5:44, 45) Sometimes, e fit hard us to forgive, especially if we don suffer plenty bad things from them. But if we continue to vex and we no gree forgive them from our heart, we de punish ourself. One sister talk say: “I know say when I de forgive people, this one no mean say I like the thing wey they do or say I de allow people to treat me for bad way. E just mean say I don decide say I no go continue to vex.” (Ps. 37:8) When we decide to forgive, this one mean say, we no gree allow the bad things wey happen to us to make us continue to vex.​—Eph. 4:31, 32.

5. Wetin Jesus promise one of the thief wey they hang near e side, and why e make this promise?

⁵ Wetin Jesus talk? They hang two thief for pole near Jesus. The two of them first join de laugh Jesus. (Matt. 27:44) But after, one of them stop. E come know say Jesus no do “any bad.” (Luke 23:40, 41) E still show say e believe say God go bring Jesus back to life and Jesus go rule as King one day. E tell Jesus say: “Jesus, remember me when you reach your Kingdom.” (Luke 23:42) This man show say e get strong faith. So Jesus tell the man say: “True-true I de tell you today say, you go dey with me for Paradise [no be for the Kingdom].” (Luke 23:43) Notice say when Jesus de make that promise as e de talk to the man, e use the word “I,” “you,” and “me.” Jesus fit give hope to this thief wey de die because e know say e Father de show pity.​—Ps. 103:8.

6. Wetin we learn from the thing wey Jesus tell the thief?

⁶ Wetin we fit learn from the thing wey Jesus talk? Jesus just be like e Father. (Heb. 1:3) Jehovah want forgive us and show us pity. But e go only do this one if we really dey sorry for the bad things wey we don do before, and if we get faith for the sacrifice of Jesus Christ. (1 John 1:7) E fit hard some people to believe say Jehovah go fit ever forgive them for the mistake wey they don do for past. If you de feel like that sometimes, make you think about this thing: Small time before Jesus die, e show pity for the thief wey just start to show faith. So we really dey sure say, Jehovah go show pity to e faithful servants as them de do their best to obey e commandment them!​—Ps. 51:1; 1 John 2:1, 2.

7. Wetin Jesus tell Mary and John as John 19:26, 27 talk, and why Jesus talk like that?

⁷ Wetin Jesus talk? (Read John 19:​26, 27.) Jesus de worry about e mama  wey e husband fit don die that time. Jesus brothers and sisters fit provide the things wey e mama need to survive. But who go help e mama continue to hold Jehovah tight? That time, nothing show say e brothers don be disciples. But John na faithful apostle and one of Jesus tight friend. Jesus see other servants of Jehovah as e own family. (Matt. 12:46-50) Jesus love Mary and e want make sure say they care for Mary. So, e tell John make e care for Mary because e know say John go help Mary dey tight with Jehovah. Jesus tell e mama say: “See your pikin!” And e tell John say: “See your mama!” From that day, John come be like pikin  for Mary and e care for Mary like say na e own mama. Jesus show strong love for this better woman. Mary really take care of Jesus when e dey small and e no leave Jesus when e de die!

8. Wetin we fit learn from the thing wey Jesus tell Mary and John?

⁸ Wetin we fit learn from the thing wey Jesus talk? The relationship wey we get with our Christian brothers and sisters, fit strong pass the one wey we get with our close family members. Our family members fit give us problem or even abandon us. But Jesus promise say if we no leave Jehovah and E organization, we go get the things wey we lose “pass 100 times.” We go get many papa, mama, and children wey love us. (Mark 10:29, 30) How you de feel as you dey part of the brothers and sisters for congregation wey dey as one, because they get faith and they get love for Jehovah and for each other?​—Col. 3:14; 1 Pet. 2:17.

9. Wetin we fit learn from the thing wey Jesus talk for Matthew 27:⁠46?

⁹ Wetin Jesus talk? Small time before Jesus die, e shout say: “My God, my God, why you leave me?” (Matt. 27:46) Bible no tell us why Jesus talk like that. But think about wetin we fit learn from this thing wey Jesus talk. One thing wey we learn na say, this thing wey Jesus talk na wetin Psalm 22:1 don already talk say go happen. * Another thing na say, this thing wey Jesus talk make-am clear say Jehovah no “protect” e Son this time. (Job 1:10) Jesus know say e Father allow make e enemies test e faith finish until e die. Nobody for this earth don ever face test reach the one wey Jesus face. Apart from that one, this thing wey e talk show say e no do any bad thing wey e suppose die for.

10. Which things we fit learn from the thing wey Jesus tell e Father?

¹⁰ Wetin we fit learn from the thing wey Jesus talk? One thing wey we learn be say, make we no expect Jehovah to protect us from problems wey go test our faith. Just as Jesus face complete test till e die, make we dey ready to serve God well even if we face death. (Matt. 16:24, 25) But, we fit dey sure say God no go allow us face test wey we no go fit endure. (1 Cor. 10:13) Another thing wey we learn be say, like Jesus, we fit suffer for something wey we no do. (1 Pet. 2:19, 20) People de give us trouble because we no dey part of the world and we de preach the truth to people, no be because we don do bad thing. (John 17:14; 1 Pet. 4:​15, 16) Jesus understand why Jehovah allow make e suffer. But sometimes, other faithful servants of Jehovah don wonder why Jehovah de allow somethings to happen because of the suffer wey them face. (Hab. 1:⁠3) Because our God de show pity and e dey patient, e understand say no be say this people no get faith. They need the comfort wey only God fit give.​—2 Cor. 1:​3, 4.

11. Why Jesus talk the thing wey e talk for John 19:⁠28?

¹¹ Wetin Jesus talk? (Read John 19:28.) Why Jesus talk say: “I want drink water”? Jesus do like that so that wetin dey Psalm 22:​15, “go happen as Bible don  talk-am.” That place talk say: “My power don dry like piece of clay pot. My tongue don gum the flesh wey hold my teeth.” Apart from that one, Jesus go want really drink water because of the pain wey e suffer for the pole and other things wey e suffer. E want make person help bring water make e drink.

12. Wetin we fit learn from wetin Jesus talk when e say “I want drink water”?

¹² Wetin we fit learn from the thing wey Jesus talk? Jesus no think say na bad thing to talk how e feel. And so we no suppose feel like that too. Some of us no de like to tell people make they help us. But if we need help, make we no fail to tell other people make they help us. For example, if we don de old or we de sick, we fit beg our friend make e take us go buy something for market or go see doctor. If we no dey happy, we fit need to tell one elder or another mature friend for congregation make e listen to us or encourage us with “good word.” (Prov. 12:25) Make we remember say, our brothers and sisters love us and they want help us “when problem dey.” (Prov. 17:17) But they no go fit know wetin dey our mind. They fit no know say we need help unless we tell them.

13. Wetin Jesus do as e hold God tight till e die?

¹³ Wetin Jesus talk? Around three o’clock for afternoon for Nisan 14, Jesus shout say: “I don do everything wey you say make I do!” (John 19:30) From the thing wey Jesus talk just before e die, e know say e don do everything wey Jehovah want make e do. Because Jesus hold God tight till e die, this one make some things happen. Number one, Jesus show say Satan de lie. Jesus show say perfect person fit remain tight with God no matter wetin Satan do. Number two, Jesus die for people. Because Jesus sacrifice e life, this one make-am dey possible for us to get good friendship with God and get the hope to live forever, even as they born us with sin. Number three, Jesus show say the way Jehovah de rule dey righteous and e make the name of e Papa dey holy.

14. How we suppose try de live our life everyday? Explain.

¹⁴ Wetin we fit learn from the thing wey Jesus talk? We must do everything wey we fit do to remain faithful to God everyday. Think about wetin Brother Maxwell Friend talk. This brother be de teach for Watchtower Bible School of Gilead. For one international assembly, Brother Friend give one talk about how to dey faithful, e talk say: “No carry wetin you fit do or talk today go tomorrow. You sure say tomorrow go dey? Live your life everyday like say na the last chance wey you get to show say you want really live forever.” Make we live our life everyday like say na our last chance to show say we hold Jehovah tight! Then even if we die, we fit talk say, “Jehovah, I don do my best to hold you tight, to show say Satan de lie, and to make your name dey holy and support the way you de rule!”

15. As e dey for Luke 23:46, which strong hope Jesus get?

¹⁵ Wetin Jesus talk? (Read Luke 23:46.) With strong hope, Jesus talk say: “Father, I leave my spirit for your hand.”  Jesus know say e life dey Jehovah hand. Jehovah no go ever forget Jesus and Jesus really dey sure of this one.

16. Wetin you learn from the example of one brother wey dey 15 years?

¹⁶ Wetin we fit learn from the thing wey Jesus talk? Dey ready to put your life for Jehovah hand no matter wetin fit happen. If you want do like that, you must “trust Jehovah with all your heart.” (Prov. 3:⁠5) Think about the example of one brother wey e name na Joshua. E dey 15 years and e get one serious sickness wey fit kill person. E no gree accept some treatment wey Bible no support. Just before e die, e tell e mama say: “Mama, I dey Jehovah hand. . . . Mama, I fit tell you with full trust say: I know say Jehovah go really bring me back to life for the resurrection. E know how my heart be, and I really love Jehovah.” * E good make each of us ask ourself say, ‘If something wey fit make me die test my faith, I go continue to hold Jehovah tight and trust say e go remember me?’

17-18. Which things we don learn? (Still check the box “ Wetin We Learn From the Last Things Wey Jesus Talk Before E Die?”)

¹⁷ The last things wey Jesus talk before e die, don really teach us important things! They remind us say make we de forgive people and trust say Jehovah go forgive us. We dey happy say we get plenty brothers and sisters for congregation wey dey ready to help us. But when we need help, make we try tell them to help us. We know say Jehovah go help us endure any problem. And we see say e dey important make we live our life everyday like say na our last day to show say we hold Jehovah tight. And we get full trust say Jehovah go resurrect us if we die.

¹⁸ True-true, the things wey Jesus talk as e de die for the pole, fit teach us plenty things! When we de use this things wey we don learn, we de obey wetin Jehovah talk about e Son when e say: “Make wuna do the things wey e talk.”​—Matt. 17:5.