ALATIKE AKO 15
Te ʼu Ako ʼe Tou Taʼofi Mai Te ʼu Palalau Fakaʼosi ʼa Sesu
“Ko toku ʼAlo ʼaeni, toku ʼofaina, ʼae ʼe au fiafia ai. Kotou fakalogo kia te ia.”—MAT. 17:5.
KATIKO 17 “ ʼE Au Loto Ki Ai”
TE ʼU MANATU FAKANOUNOU *
1-2. Kotea ʼae neʼe hoko kia Sesu ʼi muʼa ʼo tana fai ʼana palalau fakaʼosi?
ʼI TE ʼaho 14 ʼo Nisani ʼo te taʼu 33 H.T.S. neʼe fakamauʼi ia Sesu ʼo tukugakoviʼi hala ia ia takua neʼe ina fai he meʼa ʼe kovi. Hili ʼaia neʼe manukiʼi ia Sesu, mo gaohi koviʼi, pea neʼe tutuki leva ia ki he pou. Neʼe ulu te ʼu faʼo ki ʼona nima mo ʼona vaʼe. Neʼe mamahi moka manava pea mo palalau. Logo la te faʼahi ʼaia, kae neʼe tonu ia ke palalau. ʼEi, neʼe ʼi ai te ʼu meʼa maʼuhiga neʼe tonu ke ina fakaha.
2 Tou vakaʼi te ʼu palalau ʼae neʼe fai e Sesu ʼi muʼa ʼo tana mate, pea mo te ʼu ako ʼe feala ke tou taʼofi mai ai. Ko tona fakaʼuhiga ke tou “fakalogo kia te ia.”—Mat. 17:5.
“TAMAI, FAKAMOLEMOLE AGE KIA NATOU”
3. ʼI te ui e Sesu “Tamai, fakamolemole age kia natou,” neʼe ina fakahagahaga kia ai ʼana palalau?
3 Kotea ʼae neʼe ui e Sesu? Hili te tutuki ʼo Sesu ki te pou, neʼe faikole fenei: “Tamai, fakamolemole age kia natou.” Kae ko ai ia natou ʼaia? ʼE tou iloʼi pe ko ai ia natou ʼaia, ʼi te hoko atu fenei e Sesu: “ ʼE mole natou iloʼi te meʼa ʼae ʼe natou fai.” (Luka 23:33, 34) Neʼe lagi palalau ia Sesu ki te ʼu solia Loma ʼae neʼe natou tutuki ʼona nima pea mo ʼona vaʼe. Ko te ʼu tagata ʼaia neʼe mole natou iloʼi neʼe ko ia ko te ʼAlo ʼo te ʼAtua. Pea lagi neʼe toe palalau ia Sesu ki te hahaʼi ʼae neʼe natou kole ke matehi ia ia, kae neʼe natou tui kia te ia ki muli age. (Gaue 2:36-38) Neʼe mole tonu ia ke matehi ia Sesu, kae neʼe mole ita ia. (1 Pet. 2:23) Neʼe ina kole kia Sehova ke fakamolemole kia natou ʼae neʼe natou matehi ia ia.
4. Kotea te ako ʼe feala ke tou taʼofi mai te fakamolemole ʼa Sesu kia natou ʼae neʼe fakafeagai ki ai?
4 Kotea te ako ʼe feala ke tou taʼofi mai te ʼu palalau ʼa Sesu? Ohage ko Sesu ʼe tonu ke tou fakamolemole. (Kol. 3:13) Ko ʼihi ʼo feia pe la mo totatou famili ʼe feala ke natou fakafeagai mai, he ʼe mole natou mahino ki te ʼu meʼa ʼae ʼe tou tui ki ai, peʼe ki totatou faʼahiga maʼuli. ʼE feala ke natou fakamafola he ʼu loi ʼo ʼuhiga mo tatou, peʼe ke natou fakalainoaʼi tatou ʼi muʼa ʼo te hahaʼi. ʼE toe feala pe ke natou maumauʼi ʼatatou tohi, peʼe natou fia fai mai he meʼa ʼe kovi kia tatou. ʼE mole tou iita anai, kae ʼe tou kole kia Sehova ke tokoni kia natou ʼaia ke natou tali ʼi he ʼaho te moʼoni. (Mat. 5:44, 45) ʼI ʼihi temi ʼe faigataʼa hatatou fakamolemole, tafito la moka ʼe gaohi koviʼi tatou kae neʼe mole tou fai he hala. Kapau ʼe tou taupau totatou ita, ʼe tou fakamamahiʼi pe ia tatou totonu. ʼE ui fenei e he tuagaʼane: “Moka ʼe au fakamolemole ʼe mole fakaʼuhiga leva ke au fai ohage neʼe mole hoko he meʼa, peʼe ke tuku ke gaohi koviʼi au e ʼihi. Kae ko tona fakaʼuhiga ia, ʼe mole au nofo ita.” (Pes. 37:8) Koia ka tou fakamolemole, ʼe mole tou iita ai ʼuhi ko te ʼu meʼa kovi ʼae neʼe fai mai.—Efe. 4:31, 32.
“ ʼE KE NOFO ANAI MO AU ʼI TE PALATISO”
5. Kotea te fakapapau ʼae neʼe fai e Sesu ki te tagata kaihaʼa ʼae neʼe matehi fakatahi mo ia? Pea kotea tona tupuʼaga?
5 Kotea ʼae neʼe ui e Sesu? Neʼe matehi fakatahi ia Sesu mo te ʼu tagata kaihaʼa ʼe lua. Pea ʼi te kamata neʼe nā laukoviʼi ia ia. (Mat. 27:44) Kae neʼe fetogi leva te tahi tagata, he neʼe mahino neʼe mole fai e Sesu “he meʼa ʼe kovi.” (Luka 23:40, 41) Pea neʼe toe ha ʼi ʼana palalau tana tui ʼae ʼe fakatuʼuake anai ia Sesu, pea ʼe liliu anai ko he haʼu. Neʼe ina ui fenei: “Sesu, manatuʼi au moka ke hu ki tou Puleʼaga.” (Luka 23:42) Neʼe tui malohi ia te tagata, koia ʼae neʼe ui fenei age ai e Sesu: “ ʼE au tala moʼoni atu kia koe ʼi te ʼaho nei, ʼe ke nofo anai mo au [mole ʼi te Puleʼaga, kae] ʼi te Palatiso.” (Luka 23:43) Kotou tokagaʼi neʼe ko Sesu totonu ʼae neʼe ina fai te fakapapau ʼaia ki te tagata kaihaʼa ʼaia, he neʼe ina iloʼi ʼe manavaʼofa tana Tamai.—Pes. 103:8.
6. Kotea ʼae ʼe tou ako mai te tali ʼa Sesu ki te tagata kaihaʼa?
6 Kotea te ako ʼe feala ke tou taʼofi mai te ʼu palalau ʼa Sesu? Neʼe hage pe ia Sesu ko tana Tamai. (Hep. 1:3) Ko Sehova ʼe lotofakamolemole mo lotomanavaʼofa moka ʼe tou fakahemala moʼoni ki te ʼu agakovi ʼae neʼe tou fai. Pea ʼe toe fakamolemole mai moka ʼe tou tui ki te sakilifisio ʼo Sesu Kilisito. (1 Soa. 1:7) Kae ko ʼihi ʼe natou manatu ʼe mole feala kia Sehova ke ina fakamolemole te ʼu agahala ʼae neʼe natou fai ʼi muʼa atu. Kapau ʼe ke manatu feia, manatuʼi ʼi muʼa ʼo tana mate, ko Sesu neʼe lotomanavaʼofa ki te tagata kaihaʼa, ʼae neʼe hoki tui age pe kia te ia. Koia ʼe toe lotomanavaʼofa anai ia Sehova kia natou ʼae ʼe faiga ke natou fakalogo ki ʼana fakatotonu, pea mo tauhi agatonu kia te ia.—Pes. 51:3; 1 Soa. 2:1, 2.
“KOʼENA TAU TAMA! . . . KOʼENA TAU FAʼE!”
7. Kotea ʼae neʼe ui e Sesu kia Malia pea mo Soane ia Soane 19:26, 27? Pea kotea tona tupuʼaga?
7 Kotea ʼae neʼe ui e Sesu? (Lau ia Soane 19:26, 27.) Neʼe lagi manatu ia Sesu ʼe feala pe ki ʼona tehina mo tuagaʼane ke natou tokakaga ki tanatou faʼe ʼi te faʼahi fakasino, he neʼe lagi kua vitua. Kae neʼe tuʼania ia ki te maʼuli fakalaumalie ʼo tana faʼe. Pea ʼe mole tou iloʼi pe neʼe kua liliu ʼona tehina ko hana ʼu tisipulo ʼi te temi ʼaia. Kae ko Soane neʼe ko he tahi ʼo ʼana apositolo neʼe nofo agatonu pea neʼe nā kaumeʼa lelei. Kia Sesu ko natou ʼae ʼe tauhi fakatahi mo ia kia Sehova, ʼe ko tona famili fakalaumalie ʼaia. (Mat. 12:46-50) Koia neʼe ina kole ai kia Soane ke tokaga lelei ki te maʼuli fakalaumalie ʼo tana faʼe. Neʼe ina ui fenei kia Malia: “Koʼena tau tama!,” pea kia Soane: “Koʼena tau faʼe!” Talu mai te ʼaho ʼaia, neʼe liliu ai ia Soane ko he tama ʼa Malia, pea neʼe tokaga lelei ki ai ohage pe ko hana faʼe totonu. Neʼe ha ʼi te ʼu palalau ʼaia ʼa Sesu tana ʼofa ʼae ki tana faʼe ʼae neʼe tokaga lelei kia ia, pea mo nofo ʼi ʼona tafa ʼi tana mate.
8. Kotea ʼae ʼe tou ako mai te ʼu palalau ʼa Sesu kia Malia mo Soane?
8 Kotea te ako ʼe feala ke tou taʼofi mai te ʼu palalau ʼa Sesu? ʼE lagi malohi age ʼatatou felogoi mo ʼotatou tehina mo tuagaʼane fakalaumalie ʼi ʼotatou famili totonu. ʼE feala ki ʼotatou famili ke natou fakafeagai mai pea mo fehihiʼa ia tatou. Kae ohage ko tona fakapapauʼi mai e Sesu, kapau ʼe tou nonofo ovi kia Sehova mo Tana kautahi, ʼe ina tapuakinaʼi lahi anai tatou. ʼI totatou foʼi famili fakalaumalie, tokolahi ʼe natou ʼoʼofa anai ia tatou ohage ko hatatou ʼu fanau, peʼe ko hatatou ʼu matuʼā. (Mko. 10:29, 30) ʼE logo tahi totatou famili fakalaumalie he ʼe tou tui mo ʼoʼofa kia Sehova, pea mo tou feʼofaʼaki. Pea ʼe tou fiafia ʼi tatatou kau ai.—Kol. 3:14; 1 Pet. 2:17.
“SIʼOKU ʼATUA, HE KOʼE NEʼE KE LIAKĪ AU?”
9. Kotea ʼae ʼe lagi fakaha mai ʼi te ʼu palalau ʼa Sesu ia Mateo 27:46?
9 Kotea ʼae neʼe ui e Sesu? ʼI muʼa ʼo tana mate, neʼe kalaga fenei ia Sesu: “Siʼoku ʼAtua, siʼoku ʼAtua, he koʼe neʼe ke liakī au?” (Mat. 27:46) ʼE mole fakamahino ʼi te Tohi-Tapu pe koʼe neʼe fai e Sesu te ʼu palalau ʼaia. Kae tou vakaʼi pe ʼe kotea ʼae ʼe lagi fakaha mai ʼi ʼana palalau ʼaia. ʼUluaki, ʼi tana fai te ʼu palalau ʼaia, neʼe fakahoko e Sesu te lea fakapolofeta ʼae ia Pesalemo 22:2. * Lua, ʼi tana fai te ʼu palalau ʼaia, neʼe ha ai neʼe mole “puipui” e Sehova ia tona ʼAlo. (Sopo 1:10) Neʼe mahino ai ia Sesu neʼe tuku e tana Tamai ke gaohi koviʼi ia ia e ʼona fili ʼo kaku ki te temi ʼae ʼe tonu ke natou matehi ia ia. Neʼe mole ʼi ai he tahi neʼe gaohi koviʼi feia ohage ko Sesu. Pea tolu, ʼe toe ha ʼi ʼana palalau, neʼe matehi ia ia kae neʼe mole ina fai he meʼa ʼe kovi.
10. Kotea te ʼu ako ʼe feala ke tou taʼofi mai te ʼu palalau ʼa Sesu ki tana Tamai?
10 Kotea te ʼu ako ʼe feala ke tou taʼofi mai te ʼu palalau ʼa Sesu? ʼUluaki, ʼaua naʼa tou manatu ʼe puipui tuʼumaʼu pe anai tatou e Sehova moka ʼahiʼahi tatou. Ohage ko Sesu, ʼe tou nonofo agatonu anai kia Sehova tatau aipe pe ʼe matehi anai tatou. (Mat. 16:24, 25) ʼE tou iloʼi ʼe fakagafua anai e Sehova ke ʼahiʼahiʼi tatou, kae ʼe mole laka atu leva ʼi te ʼu meʼa ʼae ʼe tou lavaʼi. (1 Ko. 10:13) Lua, ʼe feala ke gaohi koviʼi tatou e te hahaʼi kae neʼe mole tou fai he meʼa ʼe kovi. (1 Pet. 2:19, 20) Kae ʼe natou fakafeagai kia tatou ʼuhi ʼae ʼe mole tou kau ki te malama ʼaeni, pea ʼe tou tala te ʼu moʼoni Fakatohi-tapu. (Soa. 17:14; 1 Pet. 4:15, 16) Neʼe mahino ia Sesu pe koʼe neʼe fakagafua e Sehova ke mamahi. Kae ko ʼihi kaugana ʼa Sehova ʼe mole natou mahino natou moka natou tau mo ni fihifihia. (Hap. 1:3) ʼE lotomanavaʼofa ia te ʼAtua pea mo kataki fualoa kia natou, he ʼe mahino ʼe mole vaivai tanatou tui, kae ʼe ʼaoga pe ke ina fakalotofimalieʼi natou.—2 Ko. 1:3, 4.
“ ʼE AU FIA INU”
11. He koʼe neʼe fai e Sesu te ʼu palalau ʼae ia Soane 19:28?
11 Kotea ʼae neʼe ui e Sesu? (Lau ia Soane 19:28.) He koʼe neʼe ui fenei e Sesu: “ ʼE au fia inu.” Neʼe palalau feia ia Sesu ke fakahoko te lea fakapolofeta ʼae ʼe tuʼu ia Pesalemo 22:16 ʼae ʼe ui fenei ai: “E magemage toku malohi o hage ko te kele kula, pea e pipiki toku alelo ki toku gutu.” ʼI tana ʼutakiʼi tona fakamamahiʼi ʼi te pou, ʼe mahino ia neʼe kovi ʼosi tona fia inu. Neʼe ʼaoga ai ki he tahi ke ina ʼavage hana meʼa inu.
12. Kotea te ako ʼe feala ke tou taʼofi mai te ʼu palalau ʼaeni ʼa Sesu: “ ʼE au fia inu”?
12 Kotea te ako ʼe feala ke tou taʼofi mai te ʼu palalau ʼa Sesu? Neʼe mole koviʼia e Sesu hana fakaha te meʼa ʼae ʼe ʼaoga kia ia, pea ʼe tonu ke feia mo tatou. ʼE lagi mole tou fia fakaha ki ʼihi te ʼu meʼa ʼae ʼe ʼaoga kia tatou. Kae ʼi ʼihi aluʼaga ʼo totatou maʼuli, ʼe tonu ai ke tou kole tokoni ki ʼihi. Ohage la moka kua tou matutuʼa peʼe tou mahahaki, ʼe lagi ʼaoga anai ke tou kole ki he tahi ke tou olo ʼo faifakatau peʼe ke tou olo ki te toketa. Kapau ʼe tou lotovaivai, ʼe feala ke tou kole tokoni ki he tagata ʼafea, peʼe ki he Kilisitiano kua fotufotuʼa ke fagono mai, pea mo fakalotomalohiʼi tatou. (Taag. 12:25) Tou manatuʼi ko te ʼu tehina mo tuagaʼane ʼe ʼoʼofa ia tatou, pea ʼe natou fia tokoni mai ʼi te ʼu temi mamahi. (Taag. 17:17) Kae ʼe mole feala hanatou iloʼi ʼatatou manatu. Koia, tou fakaha age te ʼu meʼa ʼae ʼe ʼaoga kia tatou.
“ ʼE KUA HOKO IA!”
13. Kotea ʼae neʼe fakahoko e Sesu ʼi tana nofo agatonu ʼaia ʼo kaku ki tona mate?
13 Kotea ʼae neʼe ui e Sesu? ʼI te vaevae hola tolu hili hoʼata ʼo te ʼaho 14 ʼo Nisani, neʼe kalaga fenei ia Sesu: “ ʼE kua hoko ia!” (Soa. 19:30) Neʼe iloʼi e Sesu neʼe ina fakahoko te ʼu meʼa fuli ʼae neʼe loto ki ai ia Sehova. ʼI tana nofo agatonu ʼaia ʼo kaku ki tona mate, neʼe lahi te ʼu meʼa neʼe ina fakahoko. ʼUluaki, neʼe ina fakaha ai ko Satana ʼe gutu loi. Neʼe ina fakamoʼoni ai ʼe feala ki he tahi ʼe haohaoa ke nofo agatonu ʼi te ʼu ʼahiʼahi fuli ʼa Satana. Lua, neʼe foaki e Sesu tona maʼuli ko he sakilifisio ʼo feala ai ki te hahaʼi agahala ke natou felogoi lelei mo te ʼAtua, pea ke natou maʼu te maʼuli heʼe gata. Tolu, neʼe fakamoʼoni ai e Sesu ko Sehova ʼe ko he pule faitotonu, pea neʼe ina fakamaʼa tona huafa mai te ʼu loi ʼae neʼe fai ʼo ʼuhiga mo ia.
14. Kotea ʼe tonu ke tou faiga ke tou fai ʼi te ʼaho fuli? Pea kotea tona tupuʼaga?
14 Kotea te ako ʼe feala ke tou taʼofi mai te ʼu palalau ʼa Sesu? ʼE tonu ke tou nonofo agatonu ʼi te ʼaho fuli. Tou tokagaʼi te meʼa ʼae neʼe ui e te tehina ko Maxwell Friend ʼae neʼe faiako ʼi te Ako Tohi-Tapu ʼo Kileate. ʼI he fakatahi fakamalamanei, neʼe ina fai he akonaki ʼo ʼuhiga mo te nofo agatonu. Neʼe ina ui fenei: “Kotou ui pea mo fai te ʼu meʼa ʼae ʼe tonu ke kotou fai ʼi te ʼaho nei. He ʼe mole kotou iloʼi pe ʼe kei kotou maʼuʼuli anai ʼi te apogipogi.” Kotou fakaʼaogaʼi te ʼu faigamalie fuli ke kotou fakaha ai ʼe tuha mo koutou te maʼuli heʼe gata. Koia, tou faiga ke tou nonofo agatonu tuʼumaʼu, ke feala ai mo kapau ʼe tou mamate, hatatou ui fenei kia Sehova: “Sehova, neʼe au nofo agatonu, pea neʼe au fakamoʼoni ko Satana ʼe gutuloi. Neʼe au fakamaʼa tou huafa pea mo lagolago ki tau pule.”
“ ʼE AU TUKU ATU KI ʼOU NIMA TOKU MAʼULI”
15. Kotea ʼae neʼe tui papau ki ai ia Sesu ʼo mulimuli kia Luka 23:46?
15 Kotea ʼae neʼe ui e Sesu? (Lau ia Luka 23:46.) Neʼe ui fenei e Sesu: “Tamai, ʼe au tuku atu ki ʼou nima toku maʼuli.” Neʼe tui papau ia Sesu ʼe manatuʼi anai ia ia e Sehova ʼo ina fakatuʼuake anai.
16. Kotea te ako ʼe tou taʼofi mai te faʼifaʼitaki ʼa te tehina taʼu 15?
Taag. 3:5) Ko te tehina ko Joshua ʼae neʼe taʼu 15, neʼe tau mo he mahaki neʼe mole ʼi ai hona faitoʼo. Neʼe fakafisi ki te ʼu faitoʼo ʼae ʼe fakafeagai ki te lao ʼa te ʼAtua. ʼI muʼa ʼo tana mate neʼe ina ui fenei ki tana faʼe: “Mama, kua au tuku toku maʼuli ki te ʼu nima ʼo Sehova. Mama, ʼe au tui papau ʼe fakatuʼuake anai au e Sehova he ʼe ina iloʼi te meʼa ʼae ʼi toku loto, pea ʼe au ʼofa mamahi ia te ia.” * Koia, ʼe lelei ke tou fakakaukauʼi takitokotahi te faʼahi ʼaeni: ‘Kapau ʼe tonu ke matehi au ʼuhi ko taku tui, ʼe au tuku anai koa toku maʼuli ki te ʼu nima ʼo Sehova, he ʼe au tui papau ʼe ina manatuʼi anai au?’
16 Kotea te ako ʼe feala ke tou taʼofi mai te ʼu palalau ʼa Sesu? Ohage ko Sesu, tou tuku totatou maʼuli ki te ʼu nima ʼo Sehova. Koia, tou falala kia te ia ʼaki he loto katoa. (17-18. Kotea te ʼu ako ʼe tou taʼofi ʼi te alatike ʼaeni? (Vakaʼi mo te fakamatala ʼae ʼi te ʼa takai “ Te ʼu Ako ʼe Tou Taʼofi Mai Te ʼu Palalau Fakaʼosi ʼa Sesu.”)
17 Ko he ʼu ako maʼuhiga neʼe tou taʼofi mai te ʼu palalau fakaʼosi ʼa Sesu. ʼE tonu ke tou fakamolemole ki ʼihi, pea ke tou tui papau ʼe fakamolemole anai e Sehova ʼatatou agahala. ʼE tou fiafia ʼi tatatou kau ki he famili fakalaumalie ʼe fia tokoni mai. Kapau ʼe ʼaoga mai he tokoni, tou kole ki ai. ʼE tou iloʼi ʼe foaki mai anai e Sehova te malohi ke tou lava ʼutakiʼi ai te ʼu ʼahiʼahi fuli. ʼE tou tui papau ki te maʼuhiga ʼae ke tou fakaʼaogaʼi te ʼu faigamalie fuli ke tou fakaha ai tatatou nonofo agatonu. Pea tatau aipe pe ʼe tonu ke tou mamate, kae ʼe tou tui papau ʼe fakatuʼuake anai tatou e Sehova.
18 Koia, ʼe lahi te ʼu ako ʼi te ʼu palalau fakaʼosi ʼa Sesu ʼae neʼe ina fai ʼi muʼa ʼo tana mate. Kapau ʼe tou maʼuliʼi te ʼu ako ʼae neʼe tou taʼofi mai ai, ʼe tou mulimuli ai ki te ʼu palalau ʼa Sehova ʼo ʼuhiga mo tona ʼAlo ʼi tana ui fenei: “Kotou fakalogo kia te ia.”—Mat 17:5.
KATIKO 126 Tou ʼAlaʼala, Mo Tuʼu Malohi
^ pal. 5 ʼO mulimuli kia Mateo 17:5, ʼe kole mai e Sehova ke tou fakalogo ki tona ʼAlo. ʼI te alatike ʼaeni, ʼe tou vakaʼi anai ni ako ʼe tou taʼofi mai te ʼu palalau fakaʼosi ʼa Sesu ʼi muʼa ʼo tana mate ʼi te pou fakamamahi.
^ pal. 9 Vakaʼi te alatike Te ʼu Fehuʼi ʼa Te Kau Lautohi ʼi te nusipepa ʼaeni, ʼe fakamahino ai pe koʼe neʼe lagi fai e Sesu te ʼu palalau ʼae neʼe tohi e Tavite ia Pesalemo 22:2.
^ pal. 16 Vakaʼi te alatike “La foi de Joshua : une victoire pour les droits de l’enfant,” ʼi te Kotou ʼAʼala ʼo te ʼaho 22 ʼo Sanualio 1995 (Fakafalani).