1, 2. გეჭარით სიტუაცია, მუჟამსით იესოქ, მუჭოთ ადამიანქ, მუშ ბოლო სიტყვეფ თქუ.

ახ. წ. 33 წანაშ 14 ნისანიშ დღა რე. თიშ უკულ, მუთ ტყურა ეკაწამეს დო თი დანაშაულ ეკაბრალეს, მუთ ვა უკეთებ, იესოს გაძიცანა, სასტიკო აწამენა დო წამებაშ ბოძის ხელეფით დო კუჩხეფით მიკაჭკადანა. ირ შურიშ ღალას დო ირ სიტყვაშ რაგადის თიშა ჭუა მოუღ. მარა თიქ ოკო იჩუას, მუშენდა მნიშვნელოვან მუდგარენეფ აფჷ ორაგადე.

² მორთ გუვარჩუათ იესოშ სიტყვეფ, ნამუთ წამებაშ ბოძის ღურუდუნ თიმწკუმა თქუ დო ქობძირათ, მუშ გურაფა შემლებნა თევრეშე. შხვა სიტყვეფით ქოფთქუათინ, ქურჩქილათ თის (მათ. 17:5).

3. მის შილებე გულისხმენდკო იესო სიტყვეფს: „მუმა, ქაპატი“?

³ მუ თქუ იესოქ? წამებაშ ბოძის მიკოჭკადუდუნ თეშ, იესოქ ილოც: „მუმა, ქაპატი“. მის გულისხმენდჷ თინა? თეს იესოშ უკულიან სიტყვეფშე ვორწყეთ: „ვა უჩქნა, მუს ორთნა“ (ლუკ. 23:33, 34). იესო შილებე რომაელ ჯარიშკოჩეფს გულისხმენდკო, მიდგაქ თინა ხელეფ დო კუჩხეფით მიკაჭკადეს. თინეფს ვა უჩქუდეს, სინამდვილეს მი რდუ იესო. თინა შილებე თი ადამიანეფშე ხოლო იჩიებუდკო, მიდგაქ თიშ ჸვილუა მითხუ, მარა ჭიჭე ხანშა ქირწმუნენდჷ თის (საქ. 2:36—38). იესოს უსამართლო ტანჯებაშა ვემუჩამ საშვალება, გურ მორთუმუდკო დო გოჯოგაფუდკო თინეფ, მით თხოზუდ (1 პეტ. 2:23). თეშ მანგიორო, იესოქ იეჰოვას თხუ, ნამდა ქუპატიებუდკო თინეფშა, მიდგაქ ჸვილჷ.

4. მუშ გურაფა შემლებნა იესოშ მზადყოფნაშე, უპატიებუდკო მოწინააღმდეგეეფშა?

 ⁴ მუშ გურაფა შემლებნა იესოშ სიტყვეფშე? იესოცალო, ჩქი ხოლო მზათ ოკო ვორდათ, ნამდა ვაპატუათ შხვეფს (კოლ. 3:13). ნამთინე, თინეფ შქას ნათესეეფ, შილებე მოწინააღმდეგდან, მუშენდა ვარჩქილენა ჩქინ რწმენა დო ცხოვრებაშ წეს. თინეფ შილებე ჩქინ გურშენ ტყურეფს იჩიებდან, შხვეფიშ წოხოლე მამცირენდან, ლიტერატურას მისოფუნდან ვარდა თის ხოლო მორცქინანდან, ნამდა ფიზიკურ ჭუას ქუმმორინუანა. გურიშ მოულაშ მანგიორო, შემლებნა იეჰოვას ქოფთხუათ, თოლეფ გოუნწყას ჩქინ მოწინააღმდეგეეფს, ნამდა თინეფქ აკა დღას ჭეშმარიტება ქოძირან (მათ. 5:44, 45). მინშა შილებე გამჭირდან პატიებაქ, განსაკუთრებულო თიმწკუმა, მუჟამსით მანგარ უსამართლოთ მოქცუნა. მარა, გურიშ მოულას დო გოჯოგაფას გურს ჩხვიჩხვიშ გოდგუმაშ უფლებას ქიმეფჩანთ-და, კინ ჩქინ დუდის ვეცილებუთ. ართ და იჩიებ: „ქიმეფხვად ნამდა შხვეფს ვაპატიენქინ თენა, თის ვა ნიშნენს, თინეფქ სწორას მიქცუეს ვარდა უფლებას ვარზენქ, გლახათ მიმექცუან. თენა უბრალოთ თის ნიშნენს, ნამდა იფსხუნუანქ, ჩეფთხინუე გურიშმოულა“ (ფსალმ. 37:8). მუჟამსით პატიებას გინობჭყვიდუნთ, იფსხუნუანთ, ნამდა უარყოფით შემთხვევეფს საშვალება ვემეფჩათ, გურმოულირ ქუდომტუან (ეფეს. 4:31, 32).

5. მუ პირობა მეჩჷ იესოქ ართ-ართ დამნაშავეს, ნამუთ თიშ გვერდით მიკოჭკადუდ წამებაშ ბოძის, დო მუშენ აკეთ თენა?

⁵ მუ თქუ იესოქ? იესოშ გვერდით ხოლო ჟირ დამნაშავე მიკოჭკადუდ წამებაშ ბოძის. დუდშე თინეფ ხოლო გაძიცანდეს თის (მათ. 27:44). მარა ჭიჭე ხანშა ართის დამოკიდებულებაქ დათირ. თიქ ქიმეხვად, ნამდა იესოს „გლახა მუთუნ ვა უკეთებ“ (ლუკ. 23:40, 41). თეს გეძინელ, თიშ რწმენა გეგმირჩქინ, ნამდა იესო გეთელებუდ დო მეფეთ გინირთუდ. თიქ ღურაშ კარს გერდუნ ფერ მარსხებელს, უწუ: „იესო, ქუგომშინ, მუჟამსით სქან სამეფოს იჸიქ“ (ლუკ. 23:42). მუშმადიდა რწმენა გიმირჩქინ თე კოჩიქ! იესოქ უპასუხ თის: „ჭეშმარიტებას გირაგადუქ ამდღა, ჩქიმწკუმა იჸუაფუქ [სამეფოს ვარინ,] სამოთხეს“ (ლუკ. 23:43). ქიდეკვირით, ნამდა იესოქ თე დაპირება პირადო მეჩჷ დო გიმირინუ სიტყვეფ „გირაგადუქ“, „ჩქიმწკუმა“ დო „იჸუაფუქ“. იესოს უჩქუდ, ნამდა მუშ მუმა მოჭყოლოფე რე დო ათეშენ შეულებუდ დუმაიმენდებელ სიტყვეფ უთქუალუდკო ღურაშ კარს გერდუნ ფერ დამნაშავეშა (ფსალმ. 103:8).

6. მუს ბგურაფლენთ იესოშ სიტყვეფშე, ნამუთ დამნაშავეს უწუ?

⁶ მუშ გურაფა შემლებნა იესოშ სიტყვეფშე? იესო მუშ მუმაშ სრულყოფილ ამნახანტ რე (ებრ. 1:3). იეჰოვა მზათ რე, ქუმაპატუან დო ჩქინ მიმართ ჭყოლოფა გეგმირჩქინას, ულირს კეთებულ გლახა საქმეეფს გურით ქობნარღენთ დო იესოშ დობუნილ ზისხირიშ საშვალებათ ცოდვეფ მეპატიებნან, თიშ რწმენას ქიგმიფრჩქინანთ-და (1 იოან. 1:7). ნამთინეს შილებე უჭირდას თიშ დაჯერება, ნამდა იეჰოვა მუთუნ დროს აპატიენს თინეფს ჯვეშ შეცდომეფს. დუდის თაშ ქოგინაფლენთ-და, დეფიქრით: ღურაშახ იესოქ თი დამნაშავეშ მიმართ, ნამდგას თეიშახ ვა უღუდ თიშ რწმენა, ჭყოლოფა გიმირჩქინ-და, მუზმათ უმოსო გეგმირჩქინანს იეჰოვა ჭყოლოფას მუშ ართგურ მსახურეფიშ მიმართ, მით ირფელს ორთნა, ნამდა დემორჩილან თიშ მითითებეფს! (ფსალმ. 51:1; 1 იოან. 2:1, 2).

7. მუჭოთ იოანეშ 19:26, 27-ის ჭარჷ, მუ უწუ იესოქ მარიამს დო იოანეს დო მუშენ?

⁷ მუ თქუ იესოქ? (წეკითხით იოანეშ 19:26, 27). იესო წუხენდჷ დიამუშიშ მდგომარეობაშენ, ნამუთ საეგებიოთ ქომონჯღურელ რდუ. თიშ და დო ჯიმალეფს  ალბათ შეიალებედეს მუნეფიშ დიდაშ ფიზიკურ საჭიროებეფშე ქიზრუნესკო, მარა მი მიკაჯინედ თიშ სულიერ საჭიროებეფს? ჩქი მუთუნნერ მტკიცება ვა მიღნა, ნამდა თიმწკუმა იესოშ ჯიმალეფ თიშ მოწაფეეფ რდეს. მარა იოანე ართგურ მოციქულ დო იესოშ ართ-ართ ხოლოშიან მეგობარ რდუ. იესო თინეფს, მით მუწკუმა ართო ცენდჷ იეჰოვას თაყვანს, სულიერ ოჯახო მირჩქინანდჷ (მათ. 12:46—50). მარიამი უჸორდჷ დო თიშ მდგომარეობა აწუხენდუნ თექ, აღძრჷ, იოანეშა მეუნდებუდკო თიშე ზრუნვა, მუშენდა უჩქუდ, თინა ქიზრუნენდჷ მარიამიშ სულიერ საჭიროებეფშე. მუშ დიდას იესოქ უწუ: „თენა სქან სქუა რე!“ დო იოანეს უწუ: „თენა სქან დიდა რე!“. თი დღაშ უკულ იოანექ სქუაცალო გინირთჷ მარიამშო დო დიდაცალო ზრუნენდჷ თიშე. მუშმადიდა  ჸოროფა გიმირჩქინ იესოქ თე ძვირფას ოსურკოჩიშ მიმართ, მით დაბადებაშე ჸოროფათ ზრუნენდჷ თიშე დო ღურაშ დროს ხოლო თიწკუმა გერდჷ!

8. მუშ გურაფა შემლებნა იესოშ სიტყვეფშე, ნამუთ მარიამს დო იოანეს უწუ?

⁸ მუშ გურაფა შემლებნა იესოშ სიტყვეფშე? ჩქინ და დო ჯიმალეფწკუმა ურთიერთობა შილებე უმოს მტკიცე რდას, ვინემ ოჯახიშ წევრეფწკუმა. ნათესეეფ შილებე მოწინააღმდეგდან დო გვალო მიმოტუან, მარა, მუჭოთ იესო მოპირნა, იეჰოვა დო თიშ ორგანიზაციაწკუმა ხოლოშიან ურთიერთობას ვემვოდინუანთ-და, „ოშმაგო“ მიბღენთ თის, მუთ ვოდინეთ. ბრელ გინირთუ ჩქინო საჸოროფო ქომოლსქუა, ცირასქუა, დიდა ვარდა მუმაცალო (მარ. 10:29, 30). მუს გინაფლენთ თიშ გურშენ, ნამდა რეთ თი ოჯახიშ ნაწილ, ნამუთ გაერთიანებულ რე რწმენათ დო ჸოროფათ — იეჰოვაშ დო ართიანიშ ჸოროფათ? (კოლ. 3:14; 1 პეტ. 2:17).

9. მუს ბგურაფლენთ მათეშ 27:46-ის მოჩამილ იესოშ სიტყვეფშე?

⁹ მუ თქუ იესოქ? ღურაშახ იესოქ ქიმიოძახ: „ჩქიმ ღორონთ, ჩქიმ ღორონთ, მუშენ მიმოტე?“ (მათ. 27:46). ბიბლია ვენწყუნს, მუშენ თქუ იესოქ თე სიტყვეფ. მარა დეფიქრით, ჩქი მუს ბგურაფლენთ თავრეშე. ართ-ართ მუდგას თე სიტყვეფშე ბგებულენთ, თინა რე, ნამდა იესოქ შეასრულ ფსალმუნიშ 22:1-ს მოჩამილ წინასწარმეტყველება. * თეწკუმა ართო, თე სიტყვეფშე ქიძირ, ნამდა იეჰოვა მეტო ვა თხილანდჷ მუშ სქუას (იობ. 1:10). იესოს არჩქილედ, ნამდა მუშ მუმა მთლიანო გეგნოჩანდჷ თის ნტერეფიშ ხეს, ნამდა ბოლოშა გეგმიცადკო თეშ, მუჭოთ ნამთინ ადამიან ვაგმოცადებე. თეს გეძინელ, თე სიტყვეფ ამტკიცენდჷ, ნამდა იესოს თიცალ მუთუნ ვა უკეთებ, მუდგაშ გურშენ ღურას იმსახურენდჷ.

10. მუშ გურაფა შემლებნა იესოშ სიტყვეფშე, ნამუთ მუშ მუმას უწუ?

¹⁰ მუშ გურაფა შემლებნა იესოშ სიტყვეფშე? ართ-ართ, მუდგაშ გურაფა შემლებნა თინა რე, ნამდა იეჰოვაშე ოკო ვეველდათ თიცალ განსაცდელეფიშ ეჩილითაფას, ნამუთ ჩქინ რწმენას გიმოცადუნს. მუჭოთ იესოქ გიმიცად ბოლოშა, თეშ ჩქი ხოლო მზათ ოკო ვორდათ, საჭიროქ ქიჸუ-და, ღურაშახ ართგურეფ ქიპჸუათ (მათ. 16:24, 25). მარა დარწმუნებულ ვორეთ, ნამდა ღორონთ ვა დუშვენს თიცალ განსაცდელს, ნამდგაშა ვაგმარზინენა (1 კორ. 10:13). ხოლო ართ მუდგარენ, მუდგას ბგურაფლენთ, თინა რე, ნამდა იესოცალო შილებე ჩქი ხოლო უსამართლოთ დებტანჯათ (1 პეტ. 2:19, 20). ჩქი მუთუნ არასწორს ვორთუთინ, თიშენ ვა მოწინააღმდეგნა. თეს თიშენ ორთნა, ნამდა ვა ვორეთ ქვეყნიერებაშ ნაწილ დო ჭეშმარიტებაშ გურშენ ვამოწმენთ (იოან. 17:14; 1 პეტ. 4:15, 16). იესოს არჩქილედ, მუშენ დუშვჷ იეჰოვაქ თიშ ტანჯება. მარა, თეშ გინაწონს, ართგურ მსახურეფს სირთულეეფიშ დროს მინშა უკვენა, მუშენ დუშვჷ იეჰოვაქ თენა (აბაკ. 1:3). ჩქინ მოჭყოლოფე დო მომთმენ მუმას არჩქილე, ნამდა თაშ რწმენა ორკნან, თიშენ ვა ფიქრენა; თინეფს თიცალ გურიშექექაფა ოსაჭირნა, მუნერით ხვალე იეჰოვაშე შილებე მიღან (2 კორ. 1:3, 4).

11. მუშენ თქუ იესოქ იოანეშ 19:28-ს ენოჭარილ სიტყვეფ?

¹¹ მუ თქუ იესოქ? (წეკითხით იოანეშ 19:28). მუშენ თქუ იესოქ: „ჸუმენ მაფჷ“? თე სიტყვეფით თიქ „შეასრულ წმინდა წერილეფს ენოჭარილ“ წინასწარმეტყველება, ნამუთ მოჩამილ რე ფსალმუნიშ 22:15-ის: „თიხაშ ჭკუდიშ ნოტეხცალო გეგშაფსქირ, ნინაქ ცაშა ქინკმაჭაბ“. თეს გეძინელ, თიშ უკულ, მუთ იესოქ გინიღ, თინეფ შქას საშინელ ჭუა წამებაშ ბოძის, თინა მანგარ ჸუმენულ  იჸიდ დო, ათეშენ, თის მოხვარა ოსაჭირუდ.

12. მუშ გურაფა შემლებნა იესოშ სიტყვეფშე „ჸუმენ მაფჷ“?

¹² მუშ გურაფა შემლებნა იესოშ სიტყვეფშე? იესოს მუს გინაფლენდუნ თიშ გიმოხანტუა, სისუსტეშ ნიშანო ვემიორჩქუდ დო ვართ ჩქი ოკო მიფრჩქინათ. ჩქინდე ნამთინეს ვა მიჸორა შხვეფშა მოხვარაშ თხუალა, მუჟამსით თენა მოსაჭირნა. მარა თეცალ დროქ ქუდომდირთეს-და, დრო ოკო ვებღათ დო ქოფთხუათ შხვეფს მოხვარა. მაგალთო, ხანშამიშულირ ქუვორეთ ვარდა გლახა ჯამრთელობა ქომღუნან-და, შილებე მეგობარშა მაჸუან ოთხუალქ, მიდამიჸონან მაღაზიაშა ვარდა ექიმშა. გურშეჭირებულ ვარდა გურგოტახილ ქუვორეთ-და, შილებე დემესაჭირან მოხვარაშ თხუალაქ უხუცესშა ვარდა მოწიფულ ქრისტიან მეგობარშა, ნამდა ქუმომრჩქილუან ვარდა „გემუან სიტყვეფით“ ემქექუან გურშა (იგავ. 12:25). მორთ ვაგმოჭყორდან, ჩქინ და დო ჯიმალეფს ვუჸორთ დო ოკონა, “გაჭირებაშ დროს“ ქიმმეხვარან (იგავ. 17:17). მარა თინეფს ჩქინ აზრეფიშ კითხირ ვეშულებნა. შილებე თინეფქ თეიშახ ვეგეგან მოხვარა მოსაჭირნან, სოიშახ ჩქი ვა ვუწინთ თეშ გურშენ მუთუნს.

13. მუ დამტკიც იესოქ თით, ნამდა ღურაშახ უმწიკვლობა ვა უდინუაფ?

¹³ მუ თქუ იესოქ? 14 ნისანს, სოდგარენ ნაონდღერიშ სუმ საათშო იესოქ ქიმიოძახ: „შისრულ!“ (იოან. 19:30). ღურაშახ იესოქ ირფელ შეასრულ, მუდგაშ კეთებას იეჰოვა თიშე ელუდ. თის ვა უდინუაფ უმწიკვლობა დო თეშნერო ბრელ საქმე აკეთ. პირველ, იესოქ დამტკიც, ნამდა სატანა მეტყურე რე. თიქ ოძირუ, ნამდა სატანაქ მუდგა ვაკეთასინ, სრულყოფილ ადამიანს შეულებ, ვადინუას უმწიკვლობა. მაჟია, იესოქ მუშ სიცოცხლე გიშაჸიდირალო შეწირ. თიშ მსხვერპლიქ არასრულყოფილ ადამიანეფშო შეიოლებერო გინაშქვჷ, ნამდა იეჰოვაშ წოხოლე მართალეფ რდან დო მარადიულ ცხოვრებაშ იმენდ უღდან. მასმა, იესოქ დამტკიც, იეჰოვაშ უზენაესობა დო განწმინდჷ მუშ მუმაშ სახელ.

14. მუ ოკო მაფდან გინოჭყვიდილ? გენწყით.

¹⁴ მუშ გურაფა შემლებნა იესოშ სიტყვეფშე? გინოჭყვიდილ ოკო მაფდან, დღას ვა ვოდინუათ უმწიკვლობა. დეფიქრით ჯიმა მაქსველ ფრენდიშ სიტყვეფშე. თინა გალაადიშ სკოლაშ მასწავლებერ რდუ. საერთაშორისო კონგრესის ჯიმა ფრენდიქ ართგურობაშ გურშენ მოხსენებაშ დროს თქუ: „ვეგნოდვათ ჭუმანშა თინა, მუდგაშ კეთება ვარდა რაგად ამდღა შეილებნა. დარწმუნებულ ქორეთო, ჭუმანერ დღა იჸუაფუნ? ირ დღას თეშ იცხოვრით, ითამ თენა თქვან ბოლო შანს რდას თიშ დამტკიცებელო, ნამდა მარადიულ ცხოვრებაშ ღირს რეთ“. მორთ თითოულ დღა თეშ გუვატარათ, ითამ თენა ბოლო შანს რდას, ნამდა დუვამტკიცათ ჩქინ უმწიკვლობა! მუთუნ დროს დობღურათინ ხოლო, შემალებენა ფთქუათ: „იეჰოვა, მუთ შემლებუდუნ ირფელ გუვაკეთ, ნამდა ვამდინუაფუდკო უმწიკვლობა, დამიმტკიცებუდკო, სატანა მეტყურე რენ დო გამმართლებუდკო სქან სახელ დო უზენაესობა!“.

15. მუჭოთ ლუკაშ 23:46-შე იძირე, მუშა რდუ იესო დარწმუნებულ?

¹⁵ მუ თქუ იესოქ? (წეკითხით ლუკაშ 23:46). იეჰოვაშა სრულ მენდებათ, იესოქ თქუ: „მუმა, სქან ხეშა გეგნომჩამ ჩქიმ შურ“. იესოს უჩქუდ, ნამდა თიშ მომავალ იეჰოვაშა რდუ დამოკიდებულ დო თინა დარწმუნებულ რდუ, მუშ მუმა ქიგიშინანდჷ.

16. მუს გურაფლენთ 15 წანერ ჯოშუაშ მაგალითშე?

¹⁶ მუშ გურაფა შემლებნა იესოშ სიტყვეფშე? მზათ რდათ, თქვან სიცოცხლე იეჰოვაშ ხეს გეგნოჩათ. თეშ ოკეთებელო საჭირო რე, მთელ გურით მიენდათ თის (იგავ. 3:5). დეფიქრით 15 წანერ ჯოშუაშ მაგალითშე, ნამდგას ოღურალ ლახალა ოჭირუდ. თიქ  ვარია თქუ თიცალ სამედიცინო პროცედურეფიშ ჩატარებაშე, მუთ ღორონთიშ კანონს ოწინააღმდეგუდ. ღურაშე ჭიჭე ხანით ადრე ჯოშუაქ მუშ დიდას უწუ: „დედა, მა იეჰოვაშ ხეს ვორექ . . . მიჩქჷ, იეჰოვა აუცილებერო გუმათელენს. თეშა ბოლოშა დარწმუნებულ ვორექ. ღორონთ ორწყე ჩქიმ გურს დო მა მართალო მიჸორს თინა“. ჯგირ იჸი, თითოულქ ჩქინ დუდის ქობკითხათ: „სიცოცხლეს საფრთხეშ თუდო გიორინუანსინ ფერ, გამოცდას ქეშეფხვად-და, გეგნოფჩანქო ჩქიმ სიცოცხლეს იეჰოვას დო ქიმვენდებუქო, ნამდა თინა ქუგომშინანს?“.

17, 18. მუ დიბგურეთ? (ქოძირით ჩარჩო  „მუს ბგურაფლენთ იესოშ ბოლო სიტყვეფშე“)

¹⁷ იესოშ ბოლო სიტყვეფშე ბრელ მნიშვნელოვან მუდგარენს ბგურაფლენთ! თიქ გუმოშინეს, ნამდა ოკო ვაპატუათ შხვეფს დო ბჯერდან, იეჰოვა ხოლო მაპატიენა. ჩქი მიღნა თიშ პატი, ნამდა პჸუნდან ძვირფას სულიერ ოჯახ — და დო ჯიმალეფ — ნამუთ მზათ რე ჩქინ მახვარებელო, მარა მუჟამსით თენა მოსაჭირნა, იშო ოკო ფთხუათ მოხვარა. მიჩქნა, იეჰოვა მიმეხვარებნა ნებისმიერ განსაცდელიშ გარზებას. თეს გეძინელ, ვორწყეთ, მუზმათ მნიშვნელოვან რე, თითოულ დღას თეშ იფცხოვრათ, ითამ თინა ბოლო დღა რდას უმწიკვლობაშ დო თიშ ნდობაშ დამტკიცებელო, ნამდა დობღურათინ ხოლო, იეჰოვა გუმათელენა.

¹⁸ წამებაშ ბოძის ღურაშ დროს იესოშ ნარაგად სიტყვეფშე მართალო ბრელ მუდგარენს ბგურაფლენთ! თე ნაგურეფუშ გიმორნაფათ, ქიმვაჸუნუთ იეჰოვაშ სიტყვეფს, ნამუთ მუშ სქუაშენ თქუ: „თის ურჩქილით“ (მათ. 17:5).