1-2. Ino ma raha nahazo Jesosy talohanizy hofoaty?

VOAHELOKO hofoaty i Jesosy tamy 14 Nisana taon̈o 33. Tsy rariny aby fomba nitsaran̈a izy ndreky antony nitsaran̈a izy. Maro raha nan̈odiandro izy, kanefa raha aby zen̈y tsy nataony aby. Nadroadroendro izy avio nampijaliandro mare koa, baka io nahanton̈ondro taminy hazofijaliana. Nipipendro kolò koa vitinany ndreky tan̈anany. Ndray mangala fahin̈ana fo efa namparary izy, intsaka eky hivolan̈a. Kanefa izy taminio tsy maintsy nivolan̈a, fotony nisy raha ten̈a matomboko tiany hambara.

² Alô zahavantsika raha nivolan̈iny Jesosy taminizy efa hofoaty taminy hazofijalian̈a, ndreky raha ianarantsika baka amy zen̈y. Miran̈a mitandren̈y Jesosy fo atsika izikoa fa man̈ano zen̈y.​—Mat. 17:5.

3. Jesosy koa fa nivolan̈a “A Baba, ambilà hadisovan̈andro”, mety ho hadisovan̈anjovy ma izy tiany koran̈iny io?

³ Ino ma raha nivolan̈iny Jesosy? Jesosy koa fa taminy hazofijalian̈a, izy nivavaka karaha ty: “A Baba, ambilà hadisovan̈andro.” Hadisovan̈anjovy ma izy tiany koran̈iny io? Man̈ampy atsika hahita valiny fan̈ontanian̈a io tohiny koran̈anany. Ho izy: “Tsy haindro raha ataondro io.” (Lioka 23:33, 34) Mety ho iro maramila romanin̈y namepiky kolò tan̈anany ndreky vitanany aby io izy tiany koran̈iny io. Iro baka tsy nahay azovy marin̈y izy. Mety ho olo sasany nangataka famonoan̈a izy koa tan̈atiny jerinany, kanefa nisy tamindro io mety niova ke nino izy tafara tatỳ. (Asa. 2:36-38) Marin̈y fa tsy rariny raha navoa i Jesosy, kanefa izy tsy neloko tamindro foeky na nitana heloko  ampô. (1 Pet. 2:23) Ndray izy aby nivavaka baka Jehovah han̈ambela hadisovan̈anolo namono izy aby io!

4. Jesosy nan̈ambela hadisovan̈anolo nan̈enjiky izy aby io. Ino raha ianarantsika baka amy zen̈y?

⁴ Ino ma raha ianarantsika baka amy volan̈any Jesosy io? Mila von̈ono han̈ambela hadisovan̈a koa atsika, karaha nataony Jesosy. (Kol. 3:13) Ny raha misy baka, mety tsy hazava aminolo raha inoantsika ndreky fomba fiain̈anantsika. Ke olo sasany mety hanohitry atsika, an̈isanizen̈y havantsika. Mety han̈odihody raha tsy ataontsika foeky koa iro, na hangala baraka atsika ankilanolo, na han̈atriatriaka na han̈ôro boky ndreky gazetintsika. Iro mety himenasy hamopoko na hamono atsika foeky. Amy leranizen̈y, atsika mety miangavy Jehovah han̈ampy iro olo aby io, baka iro han̈eky fahamarin̈ana andra araiky an̈y. (Mat. 5:44, 45) Mety tsy ho mora amintsika ndraikindraiky han̈ambela hadisovan̈anolo, intsaka eky izikoa tsy rariny raha nataonolo io tamintsika. Kanefa, atsika fo ho voa izikoa atsika mitana heloko ampô. Karaha ty iziô ho ranabavy araiky: “Tontohitry zaho fa kaiky dikany man̈ambela hadisovan̈a zen̈y tsy raha tsy man̈ahoa raha ratsy nataonolo taminten̈a na man̈eky hararaotiny fo fa, mifidy tsy ho meloko aminany eky koa.” (Sal. 37:8) Izikoa atsika manapakevitry han̈ambela hadisovan̈a, tsy ambelantsika hampameloko atsika eky raha nataonolo in̈y.​—Efes. 4:31, 32.

5. Ino ma raha nampan̈antin̈ainy Jesosy olondratsy nahanton̈o tankilanany in̈y? Nan̈ino?

⁵ Ino ma raha nivolan̈iny Jesosy? Nisy dahalo aroe lahy nahanton̈o tankilany Jesosy. Tamy voanalohany, iro roe lahy samby nan̈adroadro Jesosy. (Mat. 27:44) Fa baka tio, araiky tamindro niova. Tontohitry izy fa ‘tsisy raha ratsy’ nataony Jesosy. (Lioka 23:40, 41) Nino koa izy fa Jesosy io mbala hatsangana amy maty ndreky hanjary panjaka andra araiky an̈y. Baka tamy raha nivolan̈iny ahaizantsika zen̈y. Karaha ty ho izy tamy Jesosy: ‘Ren̈inao Jesosy, tsaraova zaho anao koa fa avy amy fanjakan̈anao.’ (Lioka 23:42) Ten̈a nanan̈a finoan̈a lelahy io! Ho Jesosy taminany: “Niany zaho mivolan̈a aminao fa anao hiaraka aminaka amy Paradisa [fa tsy amy Fanjakan̈any Zan̈ahary] an̈y.” (Lioka 23:43) Hitantsika iô fa Jesosy tompinain̈y foeky nampan̈anten̈a Paradisa tamy lelahy nahanton̈o tankilanany io. Nasaky nan̈ano zen̈y i Jesosy, fotony hainy fa Jehovah Babany io ten̈a Zan̈ahary mamindra fô.​—Sal. 103:8.

6. Ino raha ianarantsika baka amy volan̈any Jesosy taminolondratsy in̈y?

⁶ Ino ma raha ianarantsika baka amy volan̈any Jesosy io? Haintsika fa Jesosy ten̈a miran̈a toetry amy Babany. (Heb. 1:3) Jehovah von̈ono han̈ambela hadisovan̈antsika ndreky hamindra fô amintsika, izikoa atsika ten̈a manen̈iny amy raha ratsy vitantsika ndreky mino soron̈o nataony Jesosy. (1 Jaona 1:7) Mety ho sarotro aminolo sasany man̈eky fa Jehovah han̈ambela hadisovan̈anany. Ke izikoa zen̈y raha tsapanao ndraikindraiky, tsaraova olondratsy nahanton̈o tankilany Jesosy in̈y. Efa marikitry hofoaty i Jesosy tamy lelahy io nan̈aboaka finoan̈anany, kanefa mbala namindra fô taminany fo i Jesosy. Ndray olo karaha zen̈y fo mbala namindrany Jehovah fô, ke intsaka eky panomponany tsy mivadiky sady mifen̈y man̈araka volan̈anany!​—Sal. 51:1; 1 Jaona 2:1, 2.

7. Izikoa Jaona 19:26, 27 zahan̈a, ino raha nivolan̈iny Jesosy tamy Maria ndreky Jaona? Nan̈ino?

⁷ Ino ma raha nivolan̈iny Jesosy? (Vakia  Jaona 19:26, 27.) Tiany Jesosy ho voakarakara tsarabe reniny io, fotony mety efa naty donko Josefa taminio. Mety ho vitandro zandriny aby io ndraiky hamelon̈o renindro, kanefa tsy ho vitandro han̈ampy izy tsy hivadiky amy Jehovah. Nan̈ino ma? Fotony iro zandriny aby io tamy zen̈y tsendriky pan̈aradia izy foeky. Fa i Jaona ndraiky apostoly tsy nivadiky sady an̈isany kamaradiny Jesosy marikitry. Ke tamy Jesosy, zay olo nanompo Jehovah niaraka taminany efa nikonteny havany. (Mat. 12:46-50) Nankin̈iny Jesosy tamy Jaona fikarakaran̈a reniny io, fotony natoky izy fa ho vitany Jaona han̈ampy reniny io hanompo Jehovah fo. Karaha ty ho izy tamy reniny: ‘Io zanakanao!’ Avio ho izy tamy Jaona: ‘Io reninao!’  Nanomboko tamy zen̈y, Jaona nikarakara i Maria fo, fotony izy efa nampitovisiny mira reniny. Hitantsika baka amy zen̈y fa tiany Jesosy mare reniny io. Maria lastio nikarakara izy tampitiavan̈a rango izy vo teraka. Ziska izy niala fahin̈ana, Maria mbala nitsangana tankilanany tio fo.

8. Ino raha ianarantsika baka amy raha nivolan̈iny Jesosy tamy Maria ndreky Jaona?

⁸ Ino ma raha ianarantsika baka amy volan̈any Jesosy io? Ndraikindraiky, mety ho iro piaramanompo amintsika aby io ny ten̈a marikitry fontsika mandilatra iro havantsika aby io. Marin̈y ndraiky fa iro havantsika aby io mety han̈enjiky atsika na han̈ary atsika. Ndray zen̈y, Jesosy efa nampan̈anten̈a fa atsika koa tsy miala Jehovah ndreky fandaminan̈anany, mandilatra ny raha mety hafoentsika ny raha mety ho azontsika. (Mar. 10:29, 30) Manjary lafamỳ atsika jiaby sady miray sain̈y, fotony atsika samby tia Jehovah ndreky matoky izy, avio atsika mifankatia. Asa anao mba mahatsapa zen̈y?​—Kol. 3:14; 1 Pet. 2:17.

9. Ino raha ianarantsika baka amy volan̈any Jesosy amy Matio 27:46?

⁹ Ino ma raha nivolan̈iny Jesosy? Taloha helinizy naty, Jesosy niafatrafatra karaha ty: ‘A Zan̈ahariko ô, A Zan̈ahary e, nan̈ino zaho nialanao?’ (Mat. 27:46) Tsy koran̈iny Baiboly nan̈ino Jesosy nivolan̈a izio. Kanefa, misy raha mety ianarantsika baka amizio. Voanalohany, nan̈atanteraka faminanian̈a amy Salamo 22:1 ao izy koa fa nivolan̈a izio. * Faharoe, hitantsika baka amy volan̈any Jesosy io fa Jehovah tsy niaro Zanany io. (Joba 1:10) Efa hainy Jesosy fa Jehovah tsy hiaro izy, fotony tsy maintsy tsapain̈a firaka amy fahafatesan̈a finoan̈anany. Ke nambelany Jehovah izy hampijalindro fahavalony aby io. Tsiary nisy olombelon̈o niaritry fitsapan̈a mare mandilatra niny Jesosy. Raha nivolan̈iny io koa man̈aporofo fa tsisy raha ratsy foeky nataony ke tokony hamonoan̈a izy.

10. Ino ma ianarantsika baka amy raha nivolan̈iny Jesosy tamy Babany?

¹⁰ Ino ma raha ianarantsika baka amy volan̈any Jesosy io? Atsika koa tsy tokony han̈anten̈a fa Jehovah hiaro atsika amy raha mety hitsapa finoan̈antsika. Karaha nataony Jesosy in̈y, atsika mila von̈ono tsy hivadiky firaka amy fahafatesan̈a, izikoa ilain̈a zen̈y. (Mat. 16:24, 25) Ndray izy man̈ano zen̈y, matoky atsika fa Zan̈ahary tsy mety han̈ambela atsika hiaritry fitsapan̈a mandilatrany raha mety ho din̈intsika. (1 Kor. 10:13) Misy raha hafa koa ianarantsika baka amy volan̈anany io. Mety hiaritry raha tsy rariny koa atsika. (1 Pet. 2:19, 20) Tsy baka amy raha ratsy nataontsika avoazantsika zen̈y. Man̈enjiky atsika iro, fotony atsika tsy an̈isany donia ty, sady atsika man̈ambara ny marin̈y amy Baiboly ao. (Jaona 17:14; 1 Pet. 4:15, 16) Hainy Jesosy tsarabe nan̈ino Jehovah nan̈ambela izy hijaly, fa tsy mazava amy panompony Jehovah tsy mivadiky sasany foeky nan̈ino iro ambelany Jehovah hiaritry fitsapan̈a. (Hab. 1:3) Zan̈ahary mamindra fô i Jehovah sady manampaharetan̈a, ke hainy fa iro panomponany aby io tsy raha tsy ampy finoan̈a, fa mila fampahirezan̈a baka aminany fo.​—2 Kor. 1:3, 4.

11. Nan̈ino Jesosy nivolan̈a raha amy Jaona 19:28 io?

¹¹ Ino ma raha nivolan̈iny Jesosy? (Vakia Jaona 19:28.) Nan̈ino ma Jesosy nivolan̈a: ‘Zaho sakara’? Nan̈ano zen̈y izy baka ho tanteraka faminanian̈a nambarany Soratra Masin̈y, amy Salamo 22:15. Ho izy ao: ‘Efa maiky  aby ain̈inaka, mira bakilany vilan̈y tanimanga. Ndray lelanaka efa nirekitry tamy lan̈ilan̈inaka.’ Izikoa dinihin̈y edy raha niaretany Jesosy ndreky jalinany taminy hazofijalian̈a, rariny izy koa tihigiaka mare. Nila fan̈ampian̈a izy han̈adosoany sakaranany.

12. Ino raha ianarantsika baka amy volan̈any Jesosy ty: ‘Zaho sakara’?

¹² Ino ma raha ianarantsika baka amy volan̈any Jesosy io? Tsy nampamen̈atra Jesosy foeky nivolan̈a raha tsapany, ke tokony han̈ano karaha zen̈y koa atsika. Mety tsy dia tia mikoran̈a raha manahiran̈a atsika donko atsika letrizay. Kanefa atsika koa fa lany hevitry, atsika tsy tokony hisalasala hangataka fan̈ampian̈a. Efa mahazoazo taon̈o ma anao? Sa anao tsy salama? Mety mila miangavy naman̈a donko anao han̈ano bazarinao na hitondra anao amy dokotera. Izikoa ndraiky anao kivy, anao mila mikoran̈a aminy antipan̈ahy na amy Kristianin̈y matotro. Iro io von̈ono hitandren̈y anao ndreky hampahery anao. (Ohab. 12:25) Tsaraova fa anao io tiandro. Mahinakinaka mare iro koa fa mahita anao miôry, ke iro ten̈a tihan̈ampy anao. (Ohab. 17:17) Ndray zen̈y, iro tsy mahay raha an̈aty fonao ndreky jerinao. Anao koa tsy mivolan̈a, tsy ho haindro foeky raha mahazo anao ndreky fan̈ampian̈a ilainao.

13. Ino raha vitany Jesosy baka taminizy tsy nivadiky foeky ziska izy naty?

¹³ Ino ma raha nivolan̈iny Jesosy? Kadiriny 3h folakandrany 14 Nisana, Jesosy nandronton̈o karaha ty: “Vita!” (Jaona 19:30) Ino ma nahavy Jesosy nivolan̈a zen̈y, talohanizy hofoaty? Fotony hainy fa vitany aby raha jiaby nan̈irahany Jehovah izy. Tsy nivadiky foeky Jesosy firaka izy naty, ke nahavita raha maro oe izy. Voanalohany, vitany nan̈aporofo fa Satana io pavandy. Naboakany Jesosy fa vitanolombelon̈o lavorary tsy hivadiky amy Jehovah, na ino na ino raha ataony Satana. Faharoe, nahavita nan̈amia ain̈inany koa izy hatao vidipan̈avotan̈a, ke manjary afaka mihavan̈a amy Zan̈ahary atsika ndray olombelon̈o tsy lavorary, sady man̈anten̈a hiain̈y mandrakizay. Fahatelo, vitany Jesosy koa nanohan̈a zòny Jehovah hitondra ndreky nankamasin̈y an̈aran̈any Babany.

14. Tokony ho tapakevitry han̈ino ma atsika, isanandra? Hazavà.

¹⁴ Ino ma raha ianarantsika baka amy volan̈any Jesosy io? Atsika tokony ho tapakevitry tsy hivadiky fo isanandra. Karaha ty nambarany Rahalahy Maxwell Friend, papianatra tamy Sekoliny Gileada. Nan̈azava momba tsy fivadihan̈a io izy tamy fivoriambe iraisampirenena araiky. Ho izy: “Izikoa misy raha mety koran̈inao na ataonao niany, aza ambesan̈a amaray. Tsisy olo mahay raha hiboaka amaray, na mbala ho velon̈o anten̈a na hofoaty. Isanandra, ataova karaha efa andra io fo tavela anan̈anao, ke araraota izio han̈aboahan̈a fa mendriky hiain̈y mandrakizay anao.” Ataova karaha niany andra farany iain̈anao, han̈aboahanao fa anao tsy mivadiky. Izikoa san̈atrianizen̈y anao tsy maintsy hofoaty, anao mba hahavita hivolan̈a: “Jehovah! Efa nan̈ano zay vitako zaho tsy hivadihan̈a aminao. Efa naboakako fa Satana io pavandy ankitin̈y. Efa niezaka zaho nankamarin̈y an̈aranao ndreky zònao hitondra.”

15. Izikoa zahan̈a Lioka 23:46, ino raha natokisany Jesosy?

¹⁵ Ino ma raha nivolan̈iny Jesosy? (Vakia Lioka 23:46.) Jesosy tsy nisalasala foeky nivolan̈a karaha ty: ‘A Baba, ankin̈iko aminao fahin̈ananaka.’ Hainy Jesosy baka fa miankiny  amy Jehovah fiain̈ananany aminy hoavy. Natoky izy fa Babany io tsy mety han̈adin̈a izy.

16. Ino raha ianaranao baka amy Joshua?

¹⁶ Ino ma raha ianarantsika baka amy volan̈any Jesosy io? Aza mivadiky amy Jehovah foeky anao, ndray tsy maintsy hofoaty. Ho vitanao raha zen̈y, izikoa anao matoky Jehovah amy fonao jiaby. (Ohab. 3:5) Diniha baka raha navoa i Joshua, rahalahy tanora 15 taon̈o. Narary mare izy, ary efa hay fa hamono izy aretin̈inany io. Nisy karazan̈a fitahan̈a araiky tseky natao taminany fa tsy nikeny, fotony izio tsy mifan̈araka amy lalàn̈any Jehovah. Karaha ty ho izy tamy reniny, taloha helinizy hofoaty: “Ren̈inao mama, efa nankin̈iko amy Jehovah fahin̈ananaka. Mino angovo jiaby zaho fa tsy maintsy mbala hivilôminy fo zaho. Hitany raha an̈atiny fonaka, ke hainy fa zaho tia izy ankitin̈y.” Ke ty raha tsara dinihintsika tsiaraikiaraiky: ‘Izikoa misy raha mitsapa finoan̈anaka ke tsy maintsy hofoaty zaho, mba ho vitako edy tsy hivadiky amy Jehovah sady hatoky fa izy tsy han̈adin̈a zaho?’

17-18. Ino aby ma raha nianarantsika tato? (Zahava “ Ino Raha Ianarantsika Baka amy Raha Faramparany Nivolan̈iny Jesosy?”)

¹⁷ Maro matomboko raha nianarantsika baka tamy raha faramparany nivolan̈iny Jesosy aby in̈y! Raha nivolan̈iny aby in̈y mampatsiaro atsika fa mila man̈ambela hadisovan̈a atsika. Mila matoky koa atsika fa Jehovah han̈ambela hadisovan̈antsika. Mahatsiaro sambatra atsika manan̈a piaramanompo marobe von̈ono han̈ampy an̈atiny sarotro. Ndray zen̈y, atsika mila man̈ano dingana voanalohany hangataka fan̈ampian̈a, izikoa ilain̈a zen̈y. Haintsika fa Jehovah han̈ampy atsika hiaritry raha sarotro, na ino zen̈y na ino. Mila alaintsika onon̈o fo isanandra fa, mety ho niany andra farany han̈aboahantsika tsy fivadihan̈antsika. Ke izikoa san̈atria maty atsika, matoky atsika fa Jehovah mbala hanangana atsika.

¹⁸ Hitantsika tio fa ten̈a misy dikany iro raha faramparany nivolan̈iny Jesosy, talohanizy hofoaty taminy hazofijalian̈a in̈y. Mira man̈araka volan̈any Jehovah ty atsika izikoa mampihatra raha nianarantsika tato: ‘Tandrin̈esa izy [Jesosy].’​—Mat. 17:5.