1-2. Ano an pantubos, asin taano ta kaipuhan ta iyan?

KAN magkasala an perpektong tawong si Adan, naiwara niya an oportunidad na mabuhay nin daing katapusan asin nadamay pati an magigin mga gikan niya. Mayong kapatawadan an ginibo ni Adan. Tinuyo niya an kasalan niya. Pero paano man an mga gikan niya? Bako man sindang kasangkot sa kasalan na ginibo ni Adan. (Roma 5:12, 14) May magigibo pa daw para iligtas sinda sa sentensiyang kagadanan na maninigo nanggad sa apuon ninda? Igwa! Dai nahaloy pagkatapos na magkasala si Adan, luway-luway na ihinayag ni Jehova kun paano niya ililigtas an minilyon na gikan ni Adan sa sumpang kasalan asin kagadanan. (Gen. 3:15) Sa itinalaan niyang panahon, isusugo ni Jehova hali sa langit an saiyang Aki tanganing “itao an saiyang buhay bilang pantubos na karibay nin dakul.”—Mar. 10:45; Juan 6:51.

² Ano an pantubos? Sa Kristiyanong Griegong Kasuratan, an pantubos iyo an halagang ibinayad ni Jesus para balukaton an naiwara ni Adan. (1 Cor. 15:22) Taano ta kaipuhan ta an pantubos? Huling sa pamantayan ni Jehova sa hustisya na mahihiling sa Katugunan, buhay an dapat na ibayad para sa buhay. (Ex. 21:23, 24) Naiwara ni Adan an saiyang perpektong buhay. Para masunod an hustisya nin Diyos, itinao ni Jesus an saiyang perpektong buhay bilang tawo. (Roma 5:17) Kaya nagi siyang “Amang Daing Sagkod” kan gabos na nagtutubod sa pantubos.—Isa. 9:6, NWT; Roma 3:23, 24.

3. Sigun sa Juan 14:31 asin 15:13, taano ta andam si Jesus na itao an perpektong buhay niya bilang tawo?

³ Andam si Jesus na itao an buhay niya dahil sa dakulang pagkamuot niya sa saiyang Ama sa langit asin sa sato. (Basahon an Juan 14:31; 15:13.) An pagkamuot na iyan an dahilan kaya determinado siyang pagdanayon an saiyang integridad sa  bilog niyang buhay asin na utubon an kabutan kan saiyang Ama. Ginibo iyan ni Jesus paagi sa pagdanay na maimbod sagkod sa kagadanan. Bilang resulta, mauutob na an orihinal na katuyuhan ni Jehova para sa katawuhan asin para sa daga. Sa artikulong ini, pag-uulayan ta kun taano ta tinugutan nin Diyos na magsakit nin grabe si Jesus bago magadan. Pag-uulayan ta man sa halipot an halimbawa nin sarong kagsurat kan Bibliya na pinahalagahan na marhay an pantubos. Asin panghuri, pag-uulayan ta kun paano ta ipapahiling na nagpapasalamat kita sa pantubos asin kun paano ta lalong mapapahalagahan an atang na itinao ni Jehova asin ni Jesus para sato.

4. Iistorya kun paano nagadan si Jesus.

⁴ Imahinara an huring aldaw ni Jesus digdi si daga. Kaya niyang umapod nin mga lehiyon nin mga anghel para protektaran siya, pero tinugutan niyang arestaron siya kan Romanong mga suldados asin daing hirak siyang pigparahampak kan mga ini. (Mat. 26:52-54; Juan 18:3; 19:1) Latigong nakakakaros nin laman an ginamit ninda. Tapos kan rulugad na an likod niya, pinapasan ninda siya nin magabat na harigi. Pasan-pasan na ni Jesus an harigi pasiring sa lugar na paggagadanan saiya, pero dai nahaloy pinagbutan kan Romanong mga suldados an sarong lalaki na pasanon iyan para ki Jesus. (Mat. 27:32) Kan makaabot na si Jesus sa lugar na paggagadanan saiya, ipinako kan mga suldados sa harigi an mga kamot saka bitis niya. An gabat kan hawak ni Jesus lalo pang nagpadakula sa mga lugad kan pinakuan saiya. Grabe an pagmundo kan mga amigo niya saka an pagtangis kan saiyang ina, pero an Judiong mga tagapamahala pigngingirisihan siya. (Luc. 23:32-38; Juan 19:25) Mga pirang oras pang nagsakit si Jesus. Dahil sa posisyon kan hawak niya, nasasakitan an puso saka an baga niya kaya lalong nagin dipisil saiya na maghangos. Sa huring hinangos niya, sinambit niya an saiyang huring pamibi nin kapangganahan. Tapos idinuko niya an saiyang payo dangan nautsan. (Mar. 15:37; Luc. 23:46; Juan 10:17, 18; 19:30) Iyo, nagadan nanggad siya sa luway-luway, makulugon, asin makasupog na paagi!

5. Ano an mas ikinahadit ni Jesus?

⁵ Para ki Jesus, bako an paagi kan paggadan saiya an pinakaikinahadit niya. Mas nahadit siya sa akusasyon na nagin basehan kan paggadan saiya. Inakusaran siyang paralanghad—saro na mayong paggalang sa Diyos o sa pangaran nin Diyos. (Mat. 26:64-66) Ikinahadit na marhay iyan ni Jesus kaya hinagad niya sa saiyang Ama na palibrehon lugod siya sa kasusupgan na iyan. (Mat. 26:38, 39, 42) Taano ta tinugutan ni Jehova na magsakit asin magadan an namumutan niyang Aki? Pag-ulayan ta an tulong dahilan.

6. Taano ta kaipuhan na ibitay si Jesus sa harigi?

⁶ Inot, kaipuhan na ibitay siya sa harigi para mapatalingkas an mga Judio sa sarong sumpa. (Gal. 3:10, 13) Nag-uyon sinda na susundon ninda an Katugunan nin Diyos alagad dai ninda iyan ginibo. Kaya, nasa irarom man sinda kan sumpang iyan apuwera pa sa maninigo sinda sa kagadanan dahil sa pagigi nindang gikan ni Adan. (Roma 5:12) Sigun sa Katugunan nin Diyos para sa Israel, kun an sarong tawo makagibo nin kasalan na maninigo sa kagadanan, dapat siyang gadanon. Dangan, puwedeng ibitay sa harigi an bangkay niya. * (Deut. 21:22, 23; 27:26) Kaya paagi sa pagbitay ki Jesus sa harigi, pinagin posible niya na makinabang sa saiyang atang an mismong nasyon na nagsikwal saiya.

7. Ano an ikaduwang dahilan kaya tinugutan nin Diyos na magsakit an saiyang Aki?

 ⁷ Pag-isipan an ikaduwang dahilan kaya tinugutan nin Diyos na magsakit an saiyang Aki. Sinasanay niya si Jesus sa magigin papel kaini bilang Halangkaw na Saserdote pag-abot nin panahon. Naeksperyensiyahan ni Jesus kun gurano kadipisil na magsunod sa Diyos pag nasa grabeng pagbalo. Nakamati siya nin grabeng pagsakit kaya naghagad siya nin tabang paagi sa pagpamibi “na may kaibang mga pag-agrangay saka mga luha.” Dahil nag-agi si Jesus nin arog kaiyan kagrabeng pagsakit, siguradong nasasabutan niya an mga pangangaipo ta asin “magigibo niyang tabangan” kita pag “nag-aagi [kita] nin pagbalo.” Nagpapasalamat nanggad kita ki Jehova na nagnombra siya para sa sato nin sarong mahihirakon na Halangkaw na Saserdote na “nakakasabot kan satong mga kaluyahan”!—Heb. 2:17, 18; 4:14-16; 5:7-10.

8. Ano an ikatulong dahilan kaya tinugutan nin Diyos na mabalo nin grabe si Jesus?

⁸ Ikatulo, tinugutan ni Jehova na magsakit nin grabe si Jesus tanganing masimbag an mahalagang hapot: Magdadanay daw na maimbod ki Jehova an mga tawo dawa pag mag-agi nin grabeng pagbalo? Para ki Satanas, dai! Hinihingako niya na naglilingkod sa Diyos an mga tawo dahil sa makasadiring mga dahilan. Asin naniniwala siya na dai ninda namumutan si Jehova, arog kan apuon nindang si Adan. (Job 1:9-11; 2:4, 5) Tiwala si Jehova sa kaimbudan kan saiyang Aki, kaya tinugutan niya na biyong mabalo si Jesus nin sagkod sa kayang tagalan nin tawo. Pinagdanay ni Jesus an integridad niya asin pinatunayan na putikon si Satanas.

9. Anong halimbawa an ipinahiling ni apostol Juan?

⁹ Dakul na Kristiyano an napagdanay na makusog an pagtubod dahil sa katukduan na pantubos. Padagos sindang naghulit sa ibong nin pagkontra saka tinagalan an gabos na klase nin pagbalo sa bilog nindang buhay. Pag-isipan an halimbawa ni apostol Juan. Posibleng marhay na sa laog nin labing 60 taon, maimbod na ihinulit ni Juan an katotoohan manungod ki Cristo asin sa pantubos. Kan labi na siyang 95 anyos, minalataw na ibinilang siya kan Roma na peligro sa imperyo ninda kaya iprineso siya sa isla nin Patmos. Ano daang krimen an ginibo niya? “Pagpahayag . . . manungod sa Diyos asin pagpatotoo mapadapit ki Jesus.” (Kap. 1:9) Marahayon nanggad siyang halimbawa nin kaimbudan asin pakatagal!

10. Sa mga isinurat ni Juan, paano ta nasabi na pinahalagahan niya an pantubos?

¹⁰ Sa mga libro sa Bibliya na isinurat ni Juan, ipinahiling niya na namumutan niyang marhay si Jesus asin na pinapahalagahan niya an pantubos. Labing 100 na beses siyang nagsurat manungod sa pantubos o sa mga pakinabang na pinagin posible kaiyan. Halimbawa, isinurat ni Juan: “Kun makagibo man nin kasalan an siisay man, igwa kita nin paratabang na kaibanan kan Ama, si Jesu-Cristo, na sarong matanos.” (1 Juan 2:1, 2) Idinuduon man kan mga isinurat ni Juan an kahalagahan kan “pagpatotoo mapadapit ki Jesus.” (Kap. 19:10) Malinaw na pinahalagahan na marhay ni Juan an pantubos. Paano ta siya maaarog?

11. Ano an makakatabang sato na malabanan an sugot?

¹¹ Labanan an sugot na magkasala. Kun tunay tang pinapahalagahan an pantubos, dai ta iisipon: ‘Ano man ta pagparapugulan ko an sadiri ko na magkasala? Kun magkasala man ako, mahagad na lang akong tawad.’ Imbes, pag nasusugutan kitang gumibo nin sala, sabihon ta: ‘Dai! Ano ta gigibuhon ko ini pagkatapos kan gabos na ginibo ni Jehova saka ni Jesus para sako?’  Kasabay kaiyan, makimahirak ki Jehova na tawan ka nin kusog, na sinasabi: ‘Dai mo tabi ako pagpabayaan na madaog nin sugot.’—Mat. 6:13.

12. Paano ta puwedeng iaplikar an sadol na nasa 1 Juan 3:16-18?

¹² Kamutan an mga tugang. Pag ipinapahiling ta an pagkamuot na iyan, ipinapahiling ta man na nagpapasalamat kita sa pantubos. Taano? Huling itinao ni Jesus an buhay niya bako lang para sato kundi para man sa satong mga tugang. Andam siyang magadan para sainda, kaya malinaw na mahalagang marhay sinda sa saiya. (Basahon an 1 Juan 3:16-18.) Maipapahiling ta na namumutan ta an satong mga tugang paagi sa kun paano ta sinda tinatrato. (Efe. 4:29, 31–5:2) Halimbawa, tinatabangan ta sinda pag may hilang sinda o pag may inaagihan sindang grabeng problema, kaiba na an mga kalamidad. Pero paano pag nakulgan kita kan ginibo o sinabi sato kan kapagtubod ta?

13. Taano ta dapat kitang magin mapagpatawad?

¹³ Nasasakitan ka daw na halion an kulog nin buot mo sa saimong kapagtubod? (Lev. 19:18) Kun iyo, sunudon an sadol na ini: “Padagos na pagpasensiyahan an lambang saro asin lubos na patawadon an lambang saro dawa pa kun an siisay man igwa nin dahilan na ireklamo an saro. Kun paanong lubos kamong pinatawad ni Jehova, iyo man an dapat nindong gibuhon.” (Col. 3:13) Sa kada pagkakataon na pinapatawad ta an satong tugang, pinapatunayan ta sa satong Ama sa langit na tunay tang pinapahalagahan an pantubos. Paano ta lalong mapapahalagahan an regalong ini nin Diyos?

14. Ano an sarong paagi na lalo tang mapapahalagahan an pantubos?

¹⁴ Pasalamatan si Jehova dahil sa pantubos. “Para sako, mahalaga na sambiton ko aroaldaw sa pamibi an pantubos saka pasalamatan si Jehova huli kaiyan,” an sabi nin sarong 83 anyos na sister na si Joanna, na taga India. Sa personal mong mga pamibi, girumdumon an espesipikong mga sala na nagibo mo sa bilog na aldaw dangan maghagad nin tawad ki Jehova. Siyempre, kun nakagibo kan nin magabat na kasalan, kaipuhan mo man na maghagad nin tabang sa mga elder. Madangog sinda sa saimo saka matao nin mamumuton na konseho hali sa Tataramon nin Diyos. Mamimibi sinda kaiba mo asin hahagadon ki Jehova na patawadon ka base sa halaga kan atang ni Jesus ‘tanganing maumayan ka’ sa espirituwal.—Sant. 5:14-16.

15. Taano ta dapat tang tawan nin panahon na basahon an manungod sa pantubos asin hurop-hurupon iyan?

¹⁵ Hurop-hurupon an manungod sa pantubos. “Pag binabasa ko an mga pagsakit na inagihan  ni Jesus,” an sabi kan 73 anyos na sister na si Rajamani, “napapaluha talaga ako.” Tibaad arog man kaiyan an namamatian mo pag iniisip mo an grabeng pagsakit na inagihan kan Aki nin Diyos. Pero mantang mas hinuhurop-hurop mo an sakripisyong ginibo ni Jesus, mas magkukusog man an pagkamuot mo sa saiya asin sa saiyang Ama. Para makatabang sa paghurop-hurop mo manungod sa pantubos, puwede mong gibuhon iyan na tema kan sunod na proyekto mo sa pag-adal.

16. Paano kita nakikinabang pag itinutukdo ta sa iba an manungod sa pantubos? (Hilingon an ritrato sa cover.)

¹⁶ Tukduan an iba manungod sa pantubos. Sa kada sinasabi ta sa iba an manungod sa pantubos, mas lalo ta man iyan na mapapahalagahan. May marahayon kitang mga pantabang sa pagtukdo sa iba kun taano ta kaipuhan na magadan si Jesus para sa sato. Halimbawa, puwede tang gamiton an leksiyon 4 kan brosyur na Maogmang Bareta Hale sa Dios! May titulo iyan na “Siisay si Jesu-Cristo?” O puwede tang gamiton an kapitulo 5 kan librong Ano an Itinutukdo Sato kan Bibliya? May tema iyan na “An Pantubos—Pinakamahalagang Regalo nin Diyos.” Asin kada taon, mas lalo kitang magigin mapagpasalamat sa pantubos paagi sa pag-atender sa Memoryal kan kagadanan ni Jesus asin paagi sa maigot na pag-imbitar sa iba na mag-atender man. Dakulang pribilehiyo nanggad an itinao sato ni Jehova na tukduan an iba manungod sa saiyang Aki!

17. Taano ta an pantubos an pinakanangungurog na regalo nin Diyos para sa katawuhan?

¹⁷ Iyo, may marahay na dahilan kita na pahalagahan na marhay an pantubos asin pagdanayon iyan. Huli sa pantubos, puwede kitang magin dayupot na amigo ni Jehova dawa bako kitang perpekto. Huli sa pantubos, lubos na mararaot an mga gibo kan Diyablo. (1 Juan 3:8) Huli sa pantubos, mauutob an orihinal na katuyuhan nin Diyos para sa daga. Magigin paraiso an bilog na daga. Sa panahon na iyan, an gabos na tawo mamumuot asin maglilingkod ki Jehova. Kaya lugod na sa kada aldaw, maghanap kita nin mga paagi kun paano ta maipapahiling na pinapahalagahan ta an pantubos—an pinakanangungurog na regalo nin Diyos para sa katawuhan!