1-2. Fasaspar ido rosai rirya, ma rosai ḇefnai fa kofandun fasaspar ya?

RANDAK iwara, Adam ima snonggaku ḇenapes rirya. Ḇape, rofyor ifrur sasar kwar, swaf fa ikenem fyoro napromes. Adam i kako ifrur fa kpu up ḇesya sakna kankenem fyoro ḇa. Snar Adam ifawi roi ifrur na sasar rirya, rarirya ismai ampun ḇa ma isyus ḇa fa ikenem fyoro. Mboi moḇsa kuker kpu up ḇyesya rai? Rofyor Adam ifrur sasar ya kpu up ḇyesi sḇeḇeaḇen ḇaime. (Rm. 5:12, 14) Yahwe na ifrur roi oso faro Adam kpu up ḇyesi fa sakna saneraro kankenem fyoro ya ke? Imbo! Rofyor Adam ifrur sasar kwar, Yahwe fasaw kaku ifrur roi oso fa moḇsa Byuk ḇaḇemkei ḇe Adam kpu up ḇyesi ro sasar ma marmari. (Kej. 3:15) Ro oras Yahwe dap ya, nari iwan Romawa Ḇyedi ro nanggi fa ”ḇyuk nyawa ḇyedi fa ḇyak namuk snonkaku ḇeḇor sya kam”.​—Mrk. 10:45; Yoh. 6:51.

² Fasaspar ido rosai rirya? Ro Syap-Syap Yunani Kristen, wos ”fasaspar” kyurfasnai ḇe ḇaḇyak Yesus byuk bak namuk kaḇer rosai Adam ifrur fa napromes ya. (1 Kor. 15:22) Rosai ḇefnai fa kofandun fasaspar ya? Snar ro Yahwe sasoser ḇenapes Ḇyena, raris ḇefasnai ro Sasoser ya, kankenem ya fyadwer kankenem ya. (Kel. 21:23, 24) Rofyor Adam ifrur sasar ya, kankenem ḇyedi ḇe snonggaku ḇenapes napromes. Inja, insama Yahwe sasoser ḇenapes Ḇyena nefasnai kaku, Yesus fandun fa byuk kankenem ḇenapes ḇyena. (Rm. 5:17) Ifrur rarirya ido, Yesus ḇye ”Kma ḇekain fyoro” ḇe snonggaku ḇekyar faro fasaspar ya.​—Yes. 9:6; Rm. 3:23, 24.

3. Ro Yohanes 14:31 ma 15:13, rosai ḇefnai fa Yesus imarisen ḇyuk kankenem ḇyedi?

³ Yesus imarisen ḇyuk kankenem ḇyedi kukro iswar fafaya kaku Kmari ma kokame. (Wasya Yohanes 14:31; 15:13.) Naiso ḇewar ra, dun snemuk fa ifrur Kmari marisen  Ḇyena ma isouser pdef isof ro imar. Barakas ya iso, Yahwe marisen Ḇyena faro snonggaku ma supswan ine nari ndarirya kaku. Ro farkarkor ine, nari kawos rosai ḇefnai fa myam monda ḇo Yesus ḇyekandera fyor imar ḇaim. Nari kawos kako manḇefas Refo ḇesyowi fasaspar ya. Ramnai, kawos kako moḇsa kofasnai kasumasa faro fasarser fasaspar Yahwe ma Yesus subuk na ma moḇsa koḇesyowi na raya.

4. Fasnaiḇair pan kandera Yesus ismai na fyor imar ḇaime.

⁴ Wawasen pan rosai ḇeḇejadi kuker Yesus i ro ras papupes kankenem ḇyedi ro supswan. Rofyor sordade Romawi sya sfor ma siprer pyum Yesus i ḇa, bisa monda dor malaikat sya fa skadaunwarek i. Ḇape, Yesus ifrur rarirya ḇa. (Mat. 26:52-54; Yoh. 18:3; 19:1) Sbuk ayos ḇefrur kraf ro ḇaken ḇyena neḇesḇawek. Ramnai, siwan Yesus i fa ḇyar ai ḇemarḇak sbukimuni na ro dokor ḇepar fafaya kwar ya. Yesus ismer ai ḇemarḇak ani ḇe moḇ nari smuni fa imar roya. Fyor syambraḇ wer ḇa kwar, snon oso ḇerodia siwani fa ḇyar pyan fadwer ai ani. (Mat. 27:32) Rofyor Yesus isya kwar ro moḇ nari smuni fa imar, sordade ansya spai wemin ma bramin ḇyesya ro ai kandera ya ramnai sḇein ai ani fa iḇyoḇer. Mamarḇak ro Yesus ḇaken ḇyena nafrur paku anna nasḇak bramin ma wemin ḇyesya. Awin ma Yesus bati ḇyesi smam ḇo sesneso kaku, ḇape manfarkin agama Yahudi sya skoryae Yesus i. (Luk. 23:32-38; Yoh. 19:25) Yesus ḇyekandera oras fyoro kaku ro ai kandera ya, nafrur ken ma barmor ḇyeja nfararur marḇak syadi, ma iḇor imnai rari fyor iyer knaref ḇyena. Yesus ifawi isouser kwar isof papupes ya, ma pupes fyor imar ḇaim, ḇyenadi kaku wer. Ramnai, kyankunem ma imar. (Mrk. 15:37; Luk. 23:46; Yoh. 10:17, 18; 19:30) Inja, Yesus imar fawas kuker nyan ḇyekandera kaku ma sanonef i!

5. Rosai ḇemarḇak syadi faro Yesus i ro kandera ismai na?

⁵ Faro Yesus, oso isya ḇemarḇak syadi ro kandera ismai na. Iḇoryae kaku kukro sbuk samamyai marmari ḇe i kuker skursof ḇo soḇe danonef Allah. Skara iḇe snonggaku ḇesyowi Allah ḇa ma Allah snonsnon Ḇyedi. (Mat. 26:64-66) Snar kyara safsof ismai nane, dor insama Kmari imarisen kada myam monda ḇo imar awer. (Mat. 26:38, 39, 42) Rosai ḇefnai fa Yahwe myam monda Romawa iswar kaku ḇyekandera ma imar ya? Mgorama kawos roi rikyor ḇefnai ya.

6. Rosai ḇefnai fa spai Yesus ro ai kandera ya?

⁶ Ḇepon ya, fandun fa spai Yesus i ro ai kandera insamaido snonggaku Yahudi simkei ro fafras ya. (Gal. 3:10, 13) Sismai fafras ani kukro seasas kwar fa sisouser Allah Sasoser Ḇyena ḇoi sifrur na ḇa. Inja, Adam kpu up ḇyesi sismai marmari monda ḇa, saksmai fafras ani kako. (Rm. 5:12) Ro Allah Sasoser Ḇyedi faro er Israel, rofyor snonggaku oso ifrur sasar na ḇefrur smuni fa imar, na smuni ḇeri. Ramnai, ḇaken ḇyedi skafi ro ai aḇyoḇer oso. * Sasoser ani kako ikofen snonggaku skaf ido ima roi oso Allah ifras dirya. (Ul. 21:22, 23; 27:26) Inja rofyor spai Yesus i ro ai kandera, snonggaku Yahudi ḇepampumi sya bisa sismai payamyum ro Yesus farsarser fasaspar ḇyuk na.

7. Roi ḇesuru ḇefnai fa Yahwe myam monda ḇo Romawa Ḇyedi ḇyekandera iso?

 ⁷ Mampan roi ḇesuru ḇefnai fa Yahwe myam monda ḇo Romawa Ḇyedi ḇyekandera ri. Yahwe ifrur rarirya insama nfasos Yesus i fa imbran fararur ḇyena ḇe Imam Ḇeba koḇedi. Yesus manggundi ḇyaḇir kwar samswen fa isouser faro Allah fyor isya ismai farawrowes ḇemarḇak kaku. Rofyor ḇyekandera, ḇyenadi dor fafnoḇek ro Allah ”kuker kankanes”. Yesus manggundi ismai roi ḇeradine, ryani ifawi pyum rosai kofandun na ma syambraḇ fa ’ifnoḇek ko’ rofyor ’koisya ro fafrorwes’. Kokofen kasumasa kaku kukro Yahwe ryem Imam Ḇeba ḇena saswar ya ma ’ḇefawi raryar ḇa koḇena’!​—Ibr. 2:17, 18; 4:14-16; 5:7-10.

8. Roi ḇekyor ḇefnai fa Yahwe myam monda ḇo Yesus ismai fafrowes ḇemarḇak kaku iso?

⁸ Ḇekyor ya, Yahwe myam monda ḇo Yesus ḇyekandera kaku insama fakfuken ḇefandun kaku ine neḇekarem: Snonggaku sya na sisouser pdef faro Allah rofyor sismai fararwrowes ḇemarḇak kaku ke? Setan doḇe roroḇa ḇeri! Setan doḇe snonggaku syakam sifarmyan ḇe Allah kukro simarisen Allah byuk roi oso ḇe si. Ikyar siswar Allah ḇa, raris Adam ro randak ya. (Ayb. 1:9-11; 2:4, 5) Snar Yahwe ikyar Yesus nari isouser pdef, iso ḇefnai fa myam monda Romawa Ḇyedi ismai fafrowes ḇemarḇak kaku. Yesus isouser pdef isof imar ya ma fyasnai kaku Setan ima danggarkar.

9. Nyan ḇepyum risai Manwawan Yohanes fyasnai ḇe ko?

⁹ Snonggaku Kristen ḇebor kakyar sena nsambraḇ kukro sfarkor kakaku kuker fasaspar ya. Naiso ḇewar fa sbaryas ma sfarmku pdef fyor sismai farawrowes ma samswen sarirya ro kenem sena. Mampan Manwawan Yohanes nyan fyasnai na. Imbude syadi ro taun ri 60 kwar, Manwawan Yohanes isouser fa byaryas kakaku ḇekur Kristus ma fasaspar ya. Rofyor ḇyeumur fanam taun 100, pamarenta Romawi sisaweni fa byarek ro Myos Patmos. Rosai ḇefnai ya? Skara byuk samswen ḇe pamarenta snar ḇyaryas ker kakaku ḇekur Allah ma Yesus. (Why. 1:9) Manwawan Yohanes fyasnai nyan ḇepyum ro kakyar ya ma ḇeḇefarmku!

10. Rosai ḇefasnai kaku Yohanes ḇyesyowi farsarser fasaspar ya?

¹⁰ Rofyor kowasya syap-syap ḇero Refo Yohanes fyas na, na komam rodia kada ima iswar kaku Yesus i ma ḇyesyowi farsarser fasaspar ya. Ro syap anna, Yohanes dap fasaspar ḇaido fainda ro fasaspar ya syadi ro kali ri 100. Imnis ra, Yohanes fyas: ”Rofyor ono sifrur sasar, ḇefnoḇek ko isoine Yesus Kristus, ḇenapes ani.” (1 Yoh. 2:1, 2) ) Yohanes ikofen kako fandun ḇe ko fa kobaryas kakaku ḇekur Yesus i. (Why. 19:10) Nasnai kaku rodine, Yohanes ḇyesyowi kaku fasaspar ya. Moḇsa kofasnai kaku koḇesyowi fasaspar ya rai?

11. Rosai kofrur insama kopampum farawrowes ya?

¹¹ Kopampum farawrowes fa kofrur sasar. Rofyor kofasnai koḇesyowi kaku fasaspar ido, nari kopok kokara radine ḇa: ’Yaḇensewar fa yamor awer fa yapampum farawrowes na. Rofyor yafrur sasar kwar ido, na yor ampun ḇae.’ Ḇape, ras kofrur  sasar ya, nari kokara radine: ’Yamewer yafrur roi ine! Yahwe ma Yesus subuk roi nabor ḇe aya kwar. Yamewer yafrur suḇesneso ri.’ Oso wer ido, kor samambraḇ ro Yahwe I kako. Koḇenadi radine: ’Wun nggoḇe fafrowes na awer.’​—Mat. 6:13.

12. Moḇsa kosouser anun ḇero 1 Yohanes 3:16-18 rai?

¹² Koswar naek srar koḇesi kam. Rofyor koswar naek srar koḇesi, nama nfasnai koḇesyowi fasaspar ya. Rosai ḇefnai ya? Snaro Yesus byuk kenem ḇyedi monda ḇe ko ḇa, ḇoi ḇe naek srar koḇesi kako. Yesus imarisen imarwarek sikame. Ine nfasnai kaku iswar kaku si. (Wasya 1 Yohanes 3:16-18.) Kofasnai saswar koḇena ḇe si roro roi kofrur na. (Ef. 4:29, 31–5:2) Imnis ra, kofnoḇek si fyor sisya siduf ḇaido sismai samswen ḇemarḇak kaku, raris rim ḇeba. Ḇape, rosai fandun fa kofrur ya fyor ono ro naek srar koḇesi sisya sawos ḇaido sifrur roi oso ḇefrur sne koḇedi idufe?

13. Rosai ḇefnai kaku fa komarisen kobuk maf?

¹³ Fyorno ido Ausya ḇaḇir samswen fa buk maf ḇe naek srar ḇefrur duf Au ke? (Im. 19:18) Kaku ido, wasouser anun ine: ”Mkokḇaḇyae mko ma mkoḇuk ampunyae rofyor snon oso ikram masasor faro min ḇyedi; imnis raris Manseren ipyos sasar mkoḇena kwar mko kako mkakfrur rarirya kada.” (Kol. 3:13) Ras kobuk maf ḇe naek srar koḇesi ido, kofasnai kaku faro Yahwe I koma koḇesyowi kaku fasaspar ya. Rosai kofrur ya insama kofasnai koḇesyowi kaku hadiah Allah byuk ine ra?

14. Rosai roi oser bisa kofrur na insama kofasnai koḇesyowi kaku fasaspar ya?

¹⁴ Kokofen kasumasa ḇe Yahwe I faro fasaspar ḇyuk ya. Joanna, imbesrar oso ḇeumur 83 taun ḇeḇarek ro India doḇe ”Rofyor yaḇenadi ro ras ḇe ras, yakofen kasumasa ker ḇe Yahwe I faro fasaspar ḇyuk ya. Inema roi ḇefandun kaku.” Ro ras ḇe ras, fyor ḇenadi, wakofenḇair ḇe Yahwe I sasar rosai wafrur ro ras ani, ma wor ampun ro I. Ḇape, fyor wafrur sasar ḇeba kaku ido, fandun fa Au kako wor fafnoḇek ro penatua sya. Simarisen srower Au ma kuker saswar na sbuk anun ro Refo ḇe Au. Nari senadi kuker Au ma sor ḇe Yahwe I fa byuk ampun ḇe Au. Inja, wis ḇena kuker Yahwe ipyum kaḇer wer.​—Yak. 5:14-16.

15. Rosai ḇefnai fandun fa kona oras fa kowasya ma kokarauser fasaspar ya?

 ¹⁵ Kwarauser fasaspar Yahwe ma Yesus subuk na. Rajamani, imbesrar oso ḇeumur taun ri 73, doḇe, ”Ras yawasya kandera Yesus ismai na, mgarui yena nasapi.” Au kako imbude kwanes rofyor wawasenuser kandera Yesus ismai na. Ḇape, fandun fa kwaruser pdef roi Yesus ifrur kwar na. Wafrur rarirya ido, nari waswar kaku syadi i ma Kmari. Infa nafnoḇek Au fa kwarauser pyum fasarser fasaspar ya, bisa ḇe topik ine fa nsun ro farkarkor manggun Ḇedi.

16. Payamyum risai na kosmai ya fyor kofarkor snonggaku ḇese kuker fasaspar ya? (Mam sonin ḇero ḇarpon.)

¹⁶ Farkor snonggaku ḇese fa sakfawi fasaspar ya. Rofyor kokofenḇair ḇe snonggaku ḇese kuker fasaspar ya, nari koḇesyowi syadi fasaspar ani. Insama kofnoḇek snonggaku ḇese sakfawi rosai ḇefnai fandun fa Yesus imarwarek ko, organisasi fyasos syap ḇebor ma vidio ḇepyum na. Imnis ra, na kobuk farkarkor ḇeḇe 4 ro syap ankankinem Ḇeḇye Ḇerama ro Allah!, judul ḇyediso ”Manseiso Yesus Kristus?” Ḇaido kobuk fasal ḇeḇe 5 ro syap Rosai Refo Fyarkor Ḇeko?, judul ḇyediso ”Fasaspar—Roi Ḇefandun kaku Ḇerama Ro Allah”. Ro taun ḇe taun, kofasnai koḇesyowi kaku fasaspar ine kuker koso Swarapepen marmar Yesus ḇyedi ma kuker raryaḇ kor snonggaku ḇesesya fa sakso kako. Inja, Yahwe byuk fararur ine ḇe ko kwar fa kofarkor snonggaku ḇesesya fa sakfawi Romawa Ḇyedi. Inema syowi ḇeba kaku rirya!

17. Rosai ḇefnai fa fasaspar iso hadiah ḇemaeja kaku ḇerama ro Allah?

¹⁷ Snaro koine snonggaku ḇesasar, fama fasaspar Yahwe ma Yesus subuk na, bisa koḇebati kuker Yahwe I. Roro fasaspar ine, roi ḇeḇyeḇa Ibiris ifrur nakam nari neḇepyos. (1 Yoh. 3:8) Snar fasaspar ani, Yahwe marisen Ḇyena faro supswan nari ndarirya ḇeri. Supswan ḇesiper nari ḇye Firdaus. Snonggaku ḇeḇarek rodia syakam nari siswar Yahwe I ma sifarmyan ḇe I. Nasnai kaku, fasaspar ima hadiah ḇemaeja kaku ḇerama ro Allah, ma fandun fa koḇesyowi na. Inja ro ras nakam, mgorama koḇesewar kaku fa kofasnai koḇesyowi hadiah ine!