1-2. Kai kin tebusen e janah engkai maka kita perlu tebusen?

SANGA Adam erdosa labo ia saja ngenca si lanai banci nggeluh rasa lalap, keturunenna pe lanai banci. Dosa si iban Adam e la terampuni, perban ia sengaja erban dosa. Tapi uga kerna keturunenna? Lenga lit keturunen Adam sanga ilakokenna dosa e. (Rom. 5:12, 14) ) Adam patut ihukum mate perban dosana e. Tapi kai nge si lakoken Jahwe gelah keturunen Adam banci nggeluh rasa lalap? Kenca Adam erdosa, mis icidahken Jahwe uga pagi Ia nelamatken keturunen Adam arah dosa ras kematen. (Kej. 3:15) Bas waktu si enggo tetapken Jahwe isuruhNa anakNa ku doni guna “mereken kegeluhenna jadi tebusen ras penukar man enterem jelma.”​—Mrk. 10:45; Joh. 6:51.

² Kai kin tebusen e? Adi ihubungken ras Kitap-Kitap Junani Kristen, tebusen eme erga si igalari Jesus guna nukur mulihi kai si enggo bene ban Adam. (1 Kor. 15:22) Engkai maka perlu kita tebusen? Perban patoken Jahwe kerna keadilen bagi si lit bas Undang-Undang Musa eme kesah ganti kesah. (Kel. 21:23, 24) Enggo bene ban Adam kegeluhen si sempurna, emaka gelah cocok ras keadilen Dibata ikorbanken Jesus me kegeluhenna si sempurna. (Rom. 5:17) Alu bage, Jesus jadi “Bapak Rasa Lalap” man kerina kalak si tek man tebusen.​—Jes. 9:6; Rom. 3:23, 24.

3. Menurut Johanes 14:31 ras 15:13, engkai maka nggit Jesus ngorbanken kegeluhenna si sempurna?

³ Nggit Jesus mereken kegeluhenna perban keleng kel atena Bapakna si i surga bage pe kita. (Baca Johanes 14:31; 15:13.) Perban kekelengenna e usahakenna setia seh ngasa mate ras ngelakoken peraten Bapakna. Alu bage, sura-sura Dibata man manusia bage pe man doni banci pagi terjadi. Bas artikel enda sibahas kari engkai maka ipediat Dibata inanami Jesus kiniseran si seh  kel beratna sope ia mate. Sibahas ka kari usihen arah sekalak penulis Pustaka si ergaina kel tebusen. Kenca si e, sibahas kari uga carata ncidahken pengatan bujurta man tebusen ras uga carata mpebages pengerganta man kai si enggo ilakoken Jahwe ras Jesus man banta.

4. Jelasken uga cara Jesus mate.

⁴ Situhuna, banci pindo Jesus penampat malekat-malekatna guna ngelindungi ia. Tapi la bage banna. Ipediatna tentera Roma nangkap ia ras mekpeki ia. (Mat. 26:52-54; Joh. 18:3; 19:1) Icambuk ia janah merigaten dagingna. Kenca si e, itamaken tiang kayu si mberat ku gurungna si tedarehen. Jenari isuruh ia maba tiang kayu e ku inganna ibunuh. Usahaken Jesus kel maba tiang kayu e. Tapi la ndekah kenca si e, isuruh tentera Roma kalak si deban mabasa. (Mat. 27:32) Kenca seh Jesus bas ingan ia nandangi ibunuh, ipakuken tentera Roma nahe ras tanna ku tiang. Berat daging Jesus erban reh rigatna luka bekas paku e. Ceda kel ukur teman-temanna ngidahsa janah ngandung kel mamakna. Tapi peminpin kalak Jahudi nokoh-nokohi ia. (Luk. 23:32-38; Joh. 19:25) Erjam-jam dekahna seh kel suina akap Jesus. Sanga bas tiang, jantung ras paru-paruna la banci erdahin alu mehuli, emaka reh serana akapna erkesah. Tapi teh Jesus maka enggo setia ia man Bapakna. Sope ia mate, ertoto ia man Bapakna janah e me totona si terakhir. Kenca si e nungkuk ia, jenari mate. (Mrk. 15:37; Luk. 23:46; Joh. 10:17, 18; 19:30) Manjar-anjar kel perpate Jesus, mesui kel akapna, janah ihina ka ia.

5. Kai nge si mberatna akap Jesus ngadapisa?

⁵ Mberat kel iakap Jesus sanga isiksa. Tapi lit si beraten akapna asangken si e. Kai e? Ituduh ia la ngergai Dibata ras gelar Dibata. (Mat. 26:64-66) Ceda kel ukurna perban ngukuri tuduhen e janah iarapkenna la pediat Bapakna ia mate perban tuduhen e. (Mat. 26:38, 39, 42) Engkai maka ipediat Jahwe anak si ikelengiNa e ngenanami kiniseran ras mate? Mari sibahas telu alasenna.

6. Engkai maka Jesus igantung i tiang siksan?

⁶ Si pertama, arus Jesus igantung i tiang guna mbebasken kalak Jahudi arah sumpah nari. (Gal. 3:10, 13) Kalak Jahudi enggo erjanji patuh man undang-undang Dibata tapi la tepati kalak e. Emaka kena sumpah me kalak e. Selain si e, kalak e pe enggo kena sumpah perban kalak e keturunen Adam. (Rom. 5:12) Bas undang-undang Dibata man kalak Israel lit perentah si ngataken maka kalak si ngelakoken dosa si erban ia patut ihukum mate, arus ibunuh. Kenca si e, mayatna igantung i tiang. * Selain si e, undang-undang e pe ngataken maka kalak si igantung eme kalak si kena sumpah Dibata. (Ul. 21:22, 23; 27:26) Emaka sanga Jesus igantung i tiang, ia me si kena sumpah e. Alu bage, kalak Israel banci bebas arah sumpah e janah korban tebusen Jesus banci erguna man kalak e amin pe bangsa e enggo nulak ia.

7. Kai alasen si peduaken maka ipediat Dibata anakNa ngenanami kiniseran?

⁷ Alasen si peduaken engkai maka ipediat Dibata anakNa ngenanami kiniseran eme guna nikapken Jesus jadi Imam si  Mbelin man banta. Enggo teh Jesus uga serana patuh man Dibata sanga ngadapi percuban si seh kel beratna. Latih kel akapna paksa si e. Emaka ertoto ia mindo penampat Jahwe janah “nderkuh ia, mambur iluhna.” Perban enggo pernah inanamina percuban si seh kel beratna, banci angkaina kai keperlunta janah ‘banci sampatina kita si sangana iuji.’ Ngata bujur kel kita man Jahwe perban enggo pilihNa Imam si Mbelin si perkuah si banci “ngangkai kelemahenta.”​—Heb. 2:17, 18; 4:14-16; 5:7-10.

8. Kai alasen si peteluken maka pediat Dibata Jesus ngenanami percuban si seh kel beratna?

⁸ Alasen si peteluken engkai maka ipediat Dibata anakNa ngenanami kiniseran eme guna njawap penungkunen si penting enda: Lit nge manusia si tetap setia man Dibata amin pe ngadapi percuban si seh kel beratna? Nina Setan la lit. Ikatakenna maka kerina manusia nggit ngelayani Dibata perban alasen si mentingken bana. Tek ia maka labo keleng ate kalak e Jahwe bali bagi nini bulangna Adam. (Jop 1:9-11; 2:4, 5) Perban tek Jahwe maka pasti setia Jesus man baNa, ipediatNa anakNa e ngenanami percuban si seh kel beratna. Jesus tetap setia janah buktikenna maka Setan e perbual.   

9. Kai nge usihen si ibereken Rasul Johanes man banta?

⁹ Enterem kalak Kristen si terpegegehi kinitekenna perban ajaren kerna tebusen. Terus kalak e erberita amin pe itentang janah tetap setia ngadapi erbage-bage tentangen segedang geluhna. Cuba siukuri usihen arah Rasul Johanes. Tetap ia setia mberitaken kebenaren kerna Kristus ras tebusen, banci jadi lebih 60 tahun dekahna. Sanga umurna menam 100 tahun, iasingken pemerentahen Roma ia ku Pulau Patmos. Engkai? Ianggap pemerentah ia jadi ancamen perban ‘icakapkenna kerna Dibata janah ersaksi kerna Kristus.’ (Ket. 1:9) Ibereken Johanes usihen si luar biasa man banta perban ia erkiniteken ras setia!

10. Kai buktina maka iergai Johanes kel tebusen?

¹⁰ Bas Pustaka itulis Johanes kerna uga kelengna atena Jesus ras uga bagesna pengerganna man tebusen. Lit lebih 100 kali itulisna kerna tebusen ntah pe manpaat tebusen. Contohna, itulisna bagenda: “Adi lit si ngelakoken dosa, lit kap si nampati kita si tading ras Bapak, eme Jesus Kristus, si benar perbahanenna.” (1 Joh. 2:1, 2) Itulis Johanes ka uga pentingna mereken “kesaksin kerna Jesus.” (Ket. 19:10) Jelas me, iergai Johanes kel tebusen e. Uga carata mbuktikenca maka kita pe ngergai tebusen?

11. Kai si banci nampati kita ngelawan godan?

¹¹ La kita nggit tergoda ngelakoken dosa. Adi siergai kel tebusen labo bagenda carata rukur: ‘Labo perlu aku erjuang kel gelah la ngelakoken dosa. Amin pe kulakoken si salah, banci nge aku mindo ampun.’ Tapi sanga igoda kita ngelakoken kai si salah arus bagenda carata rukur: ‘La aku nggit ngelakokenca! Enggo melala kel si ilakoken Jahwe ras Jesus man bangku.’ Selain si e, banci sipindo gegeh man Jahwe janah ninta man baNa, ‘Ula min pediat aku nyerah man percuban.’​—Mat. 6:13.

12. Uga carata ndalanken nasehat si lit bas 1 Johanes 3:16-18?

 ¹² Kelengilah turang seninandu. Adi keleng ateta turang seninata sibuktiken maka siergai tebusen. Engkai? Ibereken Jesus kegeluhenna labo man banta saja tapi termasuk man turang seninata. Nggit Jesus mate man kalak e, enda mbuktiken maka keleng kel atena kalak e. (Baca 1 Johanes 3:16-18.) Sibuktiken kekelengenta man turang seninata arah perbahanenta. (Ep. 4:29, 31–5:2) Contohna, sisampati kalak e sanga ia sakit ntah pe sanga ngadapi percuban si mberat, bagi bencana alam. Tapi kai si arus silakoken adi lit perbahanen ras ranan turang seninata si erban kitik ukurta?

13. Engkai maka arus kita nggit ngampuni?

¹³ Mon-mon mesera nge akapndu ngampuni turang seninandu? (Im. 19:18) Adi ue, ikutkenlah nasehat enda: “Bicara lit pe alasen kena megelut, kena arus tetap sabar janah alu bulat ukur ampunilah sada ras si debanna. Bagi Jahwe alu bulat ukur ngampuni kena, lakoken ka bage.” (Kol. 3:13) Adi siampuni turang seninata sibuktiken man Bapakta si i surga maka siergai kel tebusen. Uga carata terus mpebages pengerganta man pemere arah Dibata e?

14. Kai salah sada cara guna mpebages pengerganta man tebusen?

¹⁴ Ngata bujurlah man Jahwe perban enggo bereNa tebusen. Sekalak turang seninata si enggo metua si gelarna Joanna si umurna 83 tahun, janah tading i India ngataken, “Penting kuakap notoken kerna tebusen tiap wari janah ngata bujur aku man Jahwe perban tebusen e.” Bas totondu tiap wari, katakenlah man Jahwe kesalahen si enggo ibanndu bas wari e janah pindolah gelah iampuniNa kam. Tapi adi lakokenndu kesalahen si serius pindolah penampat pertua-pertua. Sanga turikenndu kerinana pasti begikenna kam janah banci berekenna nasehat si perkeleng arah Kata Dibata. Itotoken kalak e kari kam janah ipindona penampat Jahwe gelah iampuni Jahwe kam. Alu bage, banci ka kam rembak mulihi ras Jahwe.​—Jak. 5:14-16.

15. Engkai maka arus siban waktuta mbaca ras ngukuri kerna tebusen?

 ¹⁵ Ukurilah kerna tebusen. Sekalak turang seninata si gelarna Rajamani si umurna 73 tahun ngataken, “Tiap kubaca kerna kiniseran si adapi Jesus, teriluh aku.” Banci jadi kam pe bage perasanndu adi ukurindu uga beratna kiniseran si adapi Anak Dibata. Adi reh rusurna ukurindu pengorbanen si iban Jesus, reh belinna me kekelengenndu man bana ras Bapakna. Guna nampati kam ngukuri kerna tebusen, banlah topik kerna tebusen jadi pelajaren pribadindu.

16. Kai manpaatna man banta adi siajarken kerna tebusen man kalak si deban? (Nen gambar sampul.)

¹⁶ Ajarilah kalak kerna tebusen. Tiap siajari kalak kerna tebusen, reh bagesna me pengerganta man tebusen e. Lit piga-piga baca-bacan ras video si mejile si banci nampati kita njelasken man kalak engkai maka Jesus arus mate guna kita. Contohna, banci sigunaken pelajaren 4 arah buku Berita si Meriah i bas Dibata nari! Bas pelajaren si erjudul “Ise kin Jesus Kristus?” Ntah banci ka sigunaken pasal 5 arah buku Kai Nina Pustaka si Badia? Bas pasal si erjudul “Tebusen—Pemere Dibata si Mehergana Kal.” Tiap tahun reh bagesna pengerganta man tebusen perban reh kita ku acara Peringeten kematen Jesus janah semangat kita ngundang kalak gelah reh ku acara e. Enggo bere Jahwe kehamaten si mbelin man banta guna ngajari kalak si deban kerna AnakNa!

17. Engkai maka tebusen e pemere si mehergana arah Dibata man manusia?

¹⁷ Melala alasenta mpebages pengerganta man tebusen. Perban tebusen, banci kita rembak ras Jahwe amin pe kita la sempurna. Perban tebusen, kerina akibat perbahanen Setan ikernepken pagi. (1 Joh. 3:8) Perban tebusen, sura-sura Jahwe nandangi doni pasti terjadi. Kerina pagi doni enda jadi pardis. Paksa si e, kerina kalak si tading i je engkelengi Jahwe janah ngelayani Ia. Emaka, tiap wari sidaramilah cara guna mpebages pengerganta man tebusen, eme pemere si mehergana arah Dibata man manusia.