1, 2. Ka mini lubéi esefuruni, ani ka uagu megei wabalin?

DAN le lafigouhanbei Adán aban meha wügüri mafigounti, aba leferidiruni chansi lun lawinwandun lun súnwandan, dandu ligía kei meha irahüñü ha lúnbaña garahüñü lániña. Mébunati meha Adán lun lóuserun ítara. Ligía lunti meha lounwen. Ágiati lisaanigu? Maduruntiña meha lidan le ladügübei Adán (Rom. 5:12, 14). Gayaraati san ladügǘn somu katei lun hesefurun lídangiñe óunweni? Anha. Murusun dan lárigiñe lafigouha Adán, aba lariñaguni Heowá ida luba lan lesefuruniña saragu míñunu ladügawagun Adán lídangiñe íñarawaguni le lanügübei figóu luma óunweni (Agu. 3:15). Danme buga lachülürün dan ligía lóunahabei meha Heowá lisaani siélugiñe lun líchuguni “libagari lebegime hasalbarun saragu gürigia” (Mar. 10:45; Huan 6:51).

² Ka esefurunibei? Lidan abürüdǘni Güriegu Kristiánu, ligía ebegi lafayeirubei Hesusu lun libihini le leferidirubei Adán (1 Ko. 15:22). Kati uagu megei wabalin esefuruni? Según lilurudun Heowá lunti lafayeirun “ibagari luagu ibagari” (Afu. 21:23, 24). Féridi lumuti Adán libagari le mafigounti. Ligíati lun meha gayara lan lagunfuliruni Bungiu lilurudun le richabei, mosu meha lederegeruni Hesusu libagari keisi aban wügüri mafigounti (Rom. 5:17). Ítara liña lachülürün lun aban lan “Úguchili Magumuchaditi” háguchi sun ha íchugubalin hafiñen luagu esefuruni (Isa. 9:6; Rom. 3:23, 24).

3. Según Huan 14:31 luma 15:13, ka uagu aranseñu liña lubéi meha Hesusu lun lederegeruni libagari?

³ Aranseñu liña meha Hesusu lun lederegeruni libagari ladüga óunwenbu ínsiñeni le lasandirubei luagu Lúguchi luma wawagu (aliiha huméi Huan 14:31; 15:13). Ínsiñeni ligía, ligía ínchahabalin lun úaragua lan darí lounwen, luma lun ladügüni  lugundan Lúguchi. Seremei lun lira lagunfuliruba lisuuni Bungiu houn gürigia luma lun ubóu. Lidan aturiahani le, warihibei ka lan uéigiñe lígira Bungiu lun lasufurirun Hesusu saragu lubaragiñe lounwen. Wakutihabei giñe lani aban abürühati Bíbülia hénpulu le íchugubei saragu seremei luagu esefuruni. Ani, lagumuhóun, wakutihabei giñe ida luba lan warufudun geteingiradi luma lun gebegitima lan sákürifisiu le ladügübei Heowá luma Hesusu wawagu.

4. Afuranguagüda huméi ida liña lan lounwe Hesusu.

⁴ Áfaagua wamá lun wasaminarun luagu lagumuhóun weyu le laubei Hesusu ya Ubouagu. Aba lígiraguagüdün lungua lun hárügüdüni súdaragu rómana luma lun habuleseiruni sin ni murusun gudemehabu íbini gayara lan hamuga lagúarun houn saragu ánheligu lun hóunigiruni (Mat. 26:52-54; Huan 18:3; 19:1). Aba habeichuni lau aban gúrudu le aheiridagubalin lanagan. Lárigiñe, aba hanügagüdüni lihürü luágabun guánarügü lun, íbini leseñeihaña lan lanagan. Aba lagumeserun Hesusu aduruhei wagabu darí lachülürün lidoun fulasu le ñeinba lubéi háfarei. Lárigiñe, aba hafosuruni súdaragu rómana aban wügüri lun ligía lan anügei wagabu lau Hesusu (Mat. 27:32). Dan le lachülürünbei Hesusu lidoun fulasu le ñeinba lubéi háfarei aba hádaraguni láganiñu lúhabu luma lugudi luagu wagabu. Adügati lihürü lúgubu lun ladaaraguni gürabu wounu le luágubei lugudi luma le luágubei lúhabu. Lidan añaha lan lumadagu tuma lúguchu asufurira luma ayahuaha, añaha gumadimatiña huríu adüga bula lau (Luk. 23:32-38; Huan 19:25). Chawaguati asufuriruni le luagu saragu oura. Siñá meha lun Hesusu, eibu dan lásiñarun lawaragun. Subudigaléi úaragua lan lun Heowá, lau lagumuhóun erei le lúmabei aba lafurieidun lun. Ábati labuluchagun aba lederegeruni libagari (Mar. 15:37; Luk. 23:46; Huan 10:17, 18; 19:30). Ma lámarun óunweni, ma luriban ani gari ligía.

5. Lun Hesusu, kátima katei wuribatimabei lun sügǘ luéi ligaburi lounwen?

⁵ Mama ligaburi lounwe Hesusu wuribabei lun, le wuribabei lun, duru le uágubei háfarei. Rútiña lidurun, hariñaga luagu anabagua lumuti lan Bungiu, mini lan le, arufuda lan minebenehabuni lun Bungiu luma lun liri (Mat. 26:64-66). Láurügü lasaminarun Hesusu saragu luagu duru le íchugubei luagu, anabagua lani lan Bungiu agurabati yebe lun lesefuruni Lúguchi lídangiñe iyeeni le (Mat. 26:38, 39, 42). Ka uagu ligira Heowá lun lasufurirun Liráü luma lun lounwen? Ariha waméi.

6. Ka uagu lunti lunbei lounwe Hesusu luagu wagabu?

⁶ Lidan furumiñeti lúgaaru, mosu meha ládarawagun Hesusu luagu aban wagabu lun gayara lan lesefuruniña huríu luéi íñarawaguni (Gal. 3:10, 13). Heresibirunbalin íñarawaguni le ladüga füramase hamá gaganbadibaña lan lun Lilurudun Bungiu ani madügün hamuti. Lanwoun lira, anihán meha figóu le galagante habéi lúmagiñe Adán (Rom. 5:12). Ariñagati meha Lúrudu le meha líchugubei Heowá houn ísüraelina, wügüri lan le afigouhati lunti lan láfarun hilagubei. Anihein burí, lidan amu kesi lárigiñe lounwen aba ladibirawagüdün luagu aban wagabu (2 Lur. 21: 22, 23; 27:26). * Ligíati adügati ládarawagun Hesusu luagu wagabu, lun lasagarun néchani le máhabei lun, buiti lídangiñe lani sákürifisiu.

7. Ka libiamanbei resun lígirubei Bungiu lun lasufurirun lisaani?

⁷ Lidan libiaman lúgaaru, ígirati Bungiu lun  lasufurirun Lisaani lun laransehani lubá Fádiri lan le Íñutimabei. Winwan lumuti Hesusu lénrengun gaganbadiwa lan lun Bungiu dan le lásügürün lídangiñe lanarime óuchawaguni. Sanditi kamá siñá lan lun darí lun lamuriahan lidan furíei “lau umalali héreti luma saragu águiraü”. Chóuruti gunfuranda lániwa Hesusu lárigiñe lásügürün lídangiñe sügǘ hénrenguti le ani “guentó gayaraati giñe líderaguniwa dan le wóuchawagun”. Ma rútiwa seremei luagu líridun Heowá aban Fádiri le Íñutimati le gayaraabei gudemehabu lan “woun luagu wadebilin” (Ebü. 2:17, 18; 4:14-16; 5:7-10).

8. Ka lǘrüwanbei resun lígirubei Bungiu lun lóuchawagun Hesusu darí lébeha?

⁸ Le lǘrüwan lúgaaru, lígirubei Heowá lun lasufurirun Hesusu saragu lun lounabún álügüdahani súdiniti le: Gayaraati san úaragua hamá gürigia lun Heowá íbini lidan óuchawaguni le deretimabei? Aba lariñagun Satanási uá lan, ariñagati weseriwidunbei lan lun Bungiu ladüga lan buiti le wibihibei lúmagiñe. Ámuya luéi lira, afiñeti Satanási ítara waña lan kei Adán le wagücha, mínsiñe lan Heowá woun (Hob. 1:9-11; 2:4, 5). Kei le subudi lani Heowá úaraguabei lan Lisaani, ligía lígirubei lun lóuchawagun darí lébeha. Lau úaragua lan Hesusu arufuda lumuti yee lan Mafia.

9. Ka hénpulu líchugubei apostolu Huan?

⁹ Adügaali arufudahani luáguti esefuruni lun derebugu lan hafiñen saragu kristiánugu. Añahagua apurichiha íbini laganagua éibaahouni, ani lidan sun habagari awandaaña ámuñegueinarügü óuchawaguni. Ariha waméi le asuseredubei lun apostolu Huan. Apurichiha lumuti inarüni luagu Kristu luma luagu esefuruni lau úaraguni, lóugiñe 60 irumu. Kei burí 100 irumu lau dan le hóunahabalin gumadimatiña rómana adaüra lidan ubouhu Pátümosu. Kati lidurunbei? Ladaürǘnbei ladüga lapurichihani Lererun Bungiu, luma luéigiñe lapurichihan luagu Hesukrístu (Aruf. 1:9 Lerérun Búngiu to lánina Iséri Darádu, LBID). Ma lubuidun hénpulu lánina afiñeni luma awanduni!

10. Ida liña larufuduni Huan leteingiradi luagu esefuruni tidan líburu to tídanboun Bíbülia to labürühaboun?

¹⁰ Tidan líburu burí to labürüdüboun apostolu Huan arufuda lumuti lanarime ínsiñeni le lasandirubei luagu Hesusu luma teinki lani luagu esefuruni. Tidan burí líburu tuguya adimurehati lóugiñe 100 wéiyaasu luagu esefuruni o luagu buiti le asagarubei lídangiñe. Kei hénpulu, ariñagati: Lau sun lira, ánhawa afigouha, ladimurehaba Wabureme Hesukrístu luéigiñe wafulesein ligibugiñe Wáguchi Bungiu ladüga ligíarügüñein richagua ligibugiñe Bungiu (1 Huan 2:1, 2, LBID). Ani adimurehati giñe Huan luagu lisudinin “uganu le lanügübei Hesusu” (Aruf. 19:10). Furanguti ruti lan Huan seremei luagu lebegi esefuruni. Ida luba warufuduni sandí wamani ligiaméme?

11. Ka gayaraabei líderaguniwa lun mábürühan wamá lidoun óuchawaguni?

¹¹ Rágügüwa wamá wougua luéi wafigouhan. Anhein inarüni lubéi seremei wamuti lan esefuruni, masaminarunbadiwa: “Memegeiruntina nárügüdagun nungua luéi nafigouha. Gayaraati nafigouhan ani ábame namuriahan ferudun lárigiñe”. Lubaragiñe lira, danme le wagagibudagun luma óuchawaguni lun wadügün katei wuribati, wariñaguba: “Uá! Ida luba nadügün aban katei ítarati lárigiñe le ladügübei Heowá luma Hesusu nuagu?”. Amu luéi lira, gayaraati wamuriahan erei luma Heowá luma lun wafurieidun lun, ariñageina: “Mígira bawa lun wábürühan lidoun óuchawaguni” (Mat. 6:13).

12. Ida luba wafalaruni adundehani le waliihabei lidan 1 Huan 3:16-18?

 ¹² Hínsiñe hamá wíbirigu woun. Dan le warufudun ínsiñeni arufudatiwa giñe seremei luagu esefuruni, lugundun mámarügüñein wawagu líchigei Hesusu libagari, ru lumuti giñe hawagu wíbirigu. Anhein aranseñu liña lubéi lun lounwen hawagu hínsiñerügü haña lun saragu (aliiha huméi 1 Huan 3:16-18). Ligaburi wóuseruniña wíbirigu ligía aban katei le arufudubalin ínsiñeni le wasandirubei hawagu (Efe. 4:29, 31–5:2). Íderagua wamutiña dan le sandi hamá o dan le hásügürün lídangiñe saragu lénrengunga, kéiburi, lídangiñe aban lanarime liñawan dan. Lau sun lira, ida luba wóunabun anhein adüga o ariñaga somu íbiri somu katei le gáriti woun?

13. Ka uagu mosu lubéi feruduna wamaniña amu?

¹³ Gagaburi wamuti san wareidahan igarihabu habá ha adügübaña lun wuriba lan wasandiragun woungua? (Fad. 19:18). Anhein ítara liña lubéi adüga waméi le lariñagubei adundehani le: “Buidu humá, gudemehabu huguyame húmagua, ferudunagua humá húmagua ítara kei feruduna lanün Bungiu lidan Kristu” (Efe. 4:32). Sagü feruduna wamá aban íbiri, warufuduñein lau sun wanarün seremei wamani Wáguchi Bungiu le siélubei luagu esefuruni. Ida luba gebegitima lan idewesei lúmagiñeti Bungiu le woun?

14. Kaba íderaguawa lun gebegitima lan esefuruni woun?

¹⁴ Ru wamá seremei lun Heowá luagu esefuruni. Ariñagatu Joanna, aban íbiri 83 irumu tau to awinwanduboun India: “Afiñetina lunti lan níriduni esefuruni lidan nafurieidun sagü weyu luma lun níchugun seremei lun Heowá luagu”. Lidan wafurieidun wábugua, samina wamá luagu charati le wadügübei weyu ligía ani amuriaha wamá luma Heowá lun feruduna lániwa. Íbini wéiguadun lidoun aban figóu wéiriti, mosu giñe wamuriahan ídemuei hama wéiyaaña lidan afiñeni. Haganbubadiwa ani híchuguba giñe adundehani woun lau ínsiñeni lau hayusurunu Bíbülia. Ani hafurieiduba wau ani hamuriahaba luma Heowá lun feruduna lániwa, seremei lani Hesusu sákürifisiu gayaraabei gamadagua wamaaña luma Heowá (Sant. 5:14-16).

15. Ka uagu mosu lubéi wadireirun dan lun waliiha luma lun wararamagun asaminara luagu esefuruni?

¹⁵ Ráramagua wamá asaminara luagu esefuruni.  Ariñagatu aban íbiri 73 irumu tau to gíriboun Rajamani: “Dan le naliihani sun le lasufurirubei Hesusu, aba labuinchun nagu lau águiraü”. Másiñati sandigua wamá woungua ítara dan le wasaminarun luagu saragu asufuriruni le lasufurirubei Liráü Bungiu. Ani éibutima wararamagun asaminara luagu sákürifisiu le ladügübei Hesusu, éibutimaame línsiñedun woun lau sun Lúguchi. Lun wibihini le, ka uagu maturiahan wabéi luagu esefuruni lidan waturiahan wábugua?

16. Ida liña lahuudun woun warufudahan houn amu luagu esefuruni (Ariha huméi dibuhu le luágubei tidáü garüdia).

¹⁶ Arufudaha wamá houn amu luagu esefuruni. Sagü wayanuhan houn amu luagu esefuruni ábatima gebegitima lan woun. Anihein saragu ariñahani buíduburiti wama lun wafuranguagüdüni ka lan uagu mosu lubéi meha lounwen Hesusu wawagu. Kei hénpulu gayaraati wayusuruni leksióun 4 le tídanbei garüdia Uganu buiti lúmagiñeti Bungiu, le gíribei “Ka Hesukrístubei?”. O gayaraati wayusuruni kapítulu 5 tidan líburu Kátima san tarufudahabei Bíbülia?, le gíribei “Lebegi asalbaruni ligía idewesei wéiritimabei lúmagiñe Bungiu”. Sagü irumu laganwoundun weteingiradi luagu esefuruni lau wachülürün lidoun Aritaguagülei luagu lounwen Hesusu luma lau wagunbirahaniña amu lau ubebeni lun hadügüni ligiaméme. Ru hali Heowá aban lubuidun chansi woun lun warufudahan houn amu luagu Lisaani!

17. Ka san uagu esefuruni lubéi ligía aban idewesei le gebegitimabei lúmagiñe Bungiu houn gürigia?

¹⁷ Chouru wamuti anihein lan resun buiti wama lun gebegi lan esefuruni woun luma lun mígirun wamani weteingiradi luagu. Adügati esefuruni lun gamadagua wamá buidu luma Heowá íbini chará wamá. Seremei lun esefuruni lagünrinchawaguba luadigimari Mafia sunsuinagubei (1 Huan 3:8). Ani lagunfuliruba giñe le labusenrubei Heowá lúmagiñe furumiñeti dan, lun paraísu lan Ubóu luma lun hínsiñe lan houn súngubei ani seriwi hagíame lun. Ligíati sagü weyu áluaha wamá lun warufudun seremei wamani Bungiu luagu esefuruni, idewesei le gebegitimabei lúmagiñe houn gürigia.