1-2. Asuh öng ngam ṙāi ṙinanyi, kūö yòh angū-ö nö hòṅ kētu?

TÖHET ök sin Ātöm nö tarik. Hē ò pöri ngaich nö köölö fālen, löhlö tī ngaich anga-aṅ töm nômö tö-örheūheū aṅ, tö më kūön ò inrē. Tölngenre ang Ātöm nö kēken ngam tökööl lökten òn kētu sācha töm kinpaha. Öt vanachu pöri më kūön ò. (Rōm. 5:12, 14) Mihôiṅ aich rih më kūön ò nö ṙānyu nö ṙa-ang im kinpaha? Heūṅ! Vënyu nang in tö Yāvē tö inlahen tī ò min nö ṙanyö më kūön Ātöm nö ṙa-ang im kinpaha. Tīntö ngam kūön re anga-aṅ nö ‘ṙāi ṙinānyö tömaṙôngö’ hē sanölta ngam ṙētak.—Māk. 10:45; Yôh. 6:51.

² Hòṅ kēngö nômö re ang Yēsū nö ṙāi nômö Ātöm. Ṙāi ṙinānyi ngö ṙô in tö e öi iṙô Krīk. (1 Kòr. 15:22) Kūö yòh ang Yēsū nö hòṅ kēngö nômö re? Pön ngatī ṙô ngam chööngö Yāvē nö hòṅ ṙāi tö nômö ngam nômö. (Man. 21:23, 24) Lökten ang Yēsū nö hòṅ kēngö nômöre nö ṙāi nômö Ātöm. (Rōm. 5:17) Hēten tö e ngaich ang Yēsū nö “Yöng Taṙòkhöre” yip töng ṙamatö-ellōnre, nö im inlahen ò nö kēngö nômöre.—Isa. 9:6; Rōm. 3:23, 24.

3. Kūö yòh ang Yēsū nö hō nö kēngö nômöre, sā ṙô ngam Yôhan 14:31 töm 15:13?

³ Kēngö nômöre ang Yēsū pön hangenlōn tö Yāvē, tö hī inrē. (Vë-evkūö Yôhan 14:31; 15:13.) Kūö ngam hanangenlōnre anga-aṅ nö söl kinpahare nö hateung ngö minë lōn ngam Yöng re. Löktö in e min nö teung minë kuilōn ngam Tēv nö ing panam. In ngih ātiköl in min mikahtökūöre töm lāinyngen Yāvē nöng hökngö vah ngam kūönre nö chöökö kinpaha. Haköp inlahen Yôhan min ayī-ö ngam mahameuktö minlēḵṙenre töm ṙāi ṙinānyi. Sitih inlahen öi  min ayī-ö hameuktö minlēḵṙenre öi im kinpaha Yēsū.

4. Vë-eny inlaha kinpaha Yēsū.

⁴ Töi asehkūöre töm ṙētak, urēhěkūö finëlngö Yēsū. Yih më kumyung nö kē-an. Mihôiṅ öre anga-aṅ nö havëtö më ma-ahānga nö laklen ò. Hö-ö pöri anga-aṅ pön höng hökngenre nö kē-ě tö më kumyung, më mumṙēngen ò nö fëlan. (Mët. 26:52-54; Yôh. 18:3; 19:1) Chök anga-aṅ tö minë finôhòre, sön cha-a nö tölṙô ò nö keun ngam chōn ngam chūök ò min nö kilöllöngö. Hē ò nö öt kô nö keun ngam chōn, ngaich hayöökaṙen anga-aṅ tök töhěngtak tarik nö keun ngam chōn. (Mët. 27:32) Hē cha nö teung nö im chūök ò nö fëli, ngaich më kumyung nö tōk eltī ò kalröön ò inrē. Keuheūtnyöre anga-aṅ tö chanöököre hē cha nö kilöllen ò nö irōi ngam chōn. Keuheūtnyöre më hol ò tö miṙivlōnre nö meuk kanihngen ò. Höng peunyan ngam yöng ò. Hayīölngen ò pöri më mākūö më Yahuti. (Lūk. 23:32-38; Yôh. 19:25) Im rò-òten ò ngaich nö kilölhak nö irōi ngam chōn, ngatī sanīöpö ṙôken ngam chanöökö ò, kihngen anga-aṅ nö uhôm. Akahalōn pöri ang Yēsū töre nö ṙamölōn tī töm yöngre lökten anga-aṅ nö vë-ekūö ngam yöngre, ngaich meuchngö mat re nö kapah. (Māk. 15:37; Lūk. 23:46; Yôh. 10:17, 18; 19:30) Kô-en ang Yēsū nö miṙē-ěyö, chök takô inrē!

5. Asuh ök tökiröng miṙivlōn Yēsū hē ò nö fëli?

⁵ Öt haṙivlōn ang Yēsū tö inlahen ngam finëlngöre, höng minë sinūöichlö fālen ò tökiröng miṙivlōn ò. Akahalōn anga-aṅ töre min nöng sūöichka nö ötlēkôre tö minë-eny ngam Tēv. (Mët. 26:64-66) Lökten anga-aṅ nö havëkö kūö ngam yöngre nö un fëli tö pô kūö minë töng sinūöichkö ò. (Mët. 26:38, 39, 42) Kūö yòh pöri ngam yöng ò nöng hökngen ò nö ngatī kinpaha? Töi ngëichkö minë tölūöi lāinyngen.

6. Kūö yòh ök Yēsū nö kilöllöngö nö irōi ngam chōn?

⁶ Ngam raneh lāinyngen, Hòn ṙānyu më Yahuti nö ṙa-ang elkatòh ngam chööngö ötinkôlò. (Kal. 3:10, 13) Sitih inlahen më Yahuti nö aṅhav kui töm ötinkôlò? Hēten tö cha nö öt teung nö hang minë chööngö ngam Tēv. Ngaich sin cha-a nö töt kôlò, kūöre nö kūön Ātöm, vītö kui re hēk cha-a töm öt inkôlò, kūö cha nö öt hang chööngö ngam Tēv. Lökten cha-a nö tö hòṅ kumpaha. (Rōm. 5:12) Ngatī minë chööngö kahë töm Tēv nö in më Israel, yěn ōt töfāluṙen ngaich hòṅ fëli cha-a ngaich kilöllöngö nö irōi chōn, nö vinënyö cha nö töt kôlò nö imat ngam Tēv. * (Chöö. 21: 22, 23; 27:26) Lökten ang Yēsū hē ò nö kilöllöng nö irōi ngam chōn, ngaich kē minë öt inkôlò më Yahuti anga-aṅ nö ikuire ngaich ṙanyen cha nö ṙa-ang im ötinkôlò. Ngatī inlahen anga-aṅ nö kēngöre nö chö-öny töm panam ngam tö sō tö ò.

7. Asuh öp innëtö lanyngen ngam Tēv nöng hökngen ngam Kūönre nö chöökö kinpaha?

⁷ Ngam innëtö lānyngen, haköpten Yēsū ang Yāvē pön anga-aṅ min unôichngöre nö mākūö kūönṙô hī. Haköplu ang Yēsū töm hināngö minë chööngö Yāvē nö öt lööṙen. “Pōitô anga-aṅ nö peunyhökūö”  ngam yöngre. Lökten ayī-ö min yěi kihngen ngaich mihôiṅ min ang Yēsū nö havëkö inyööken hī. Pön ngaich anga-aṅ nö ‘kalah minë kanihngen.’ Lökten in ṙamölōn pô ò nö kē-ěkūö hī töm töngatī Kūönṙô nö tö “akahakūö tö nup ötkumlē-en hī”, ngaich aṙē-ělōn tö hī.—Hep. 2:17, 18; 4:14-16; 5:7-10.

8. Asuh öp linūöyö lānyngen ngam Tēv nöng hökngen ngam kūönre nö kihngen?

⁸ Ngam linūöyö lāinyngen, Kētö sanapṙô ngih intöönö ang Yēsū: Mihôiṅ ang ngòh tarik nö köp nö löklōn ngam Tēv yēḵ ò nö kihngen? Hö-ö nyin öi kô tö ṙô ngam Sī-ö. Pöi höng kūö nup taneūngenre öi löklōn ngam Tēv, öt kūö ngam hanangenlōnre. Öi höng sā inlahen Ātöm sin. (Yōp 1:9-11; 2:4, 5) Ṙatö-ellōnre pöri Yāvē töm kūönre min nö öt ngatī. Lökten nöng hökngen ò nö ngatī ṙôken kinlaha. Kô-en pöri ang Yēsū nö köp nö hang chööngö ngam yöngre, pôrò nuk kanihngen ò, nö minyônyngö aṅ ngam Sī-ö.

9. Asuh öp haköplö hī öi in Yôhan?

⁹ Pōyen yip Kristīön mameuk kūö nup tö ṙōlkangen kanihngen, kinlaha inrē. Sön nöng öt ṙāngenre nö löklōn ngam Tēv. Ṙën cha-a nö ngatī inlahen kūö ngam ṙinatö-ellōn cha nö ngön nö lā im Tēv. Ngatī inlahen misī ang Yôhan. Lohten anga-aṅ nö 60 samyeūheu rò-òten nö ahangken Kristū ngam tökētu ṙāi ṙinānyi. Uroh nö ahööti nö i Petmòs tö më mā aṅ Rōm, hē ò ngaich nö 100 samyeūheu ṙēḵti, pön kapah nyin më tarik tö ṙô cha, yěn höng ngöh anga-aṅ, lökten cha-a nö haköövö ò. Ngam fālen ò nö haköövö, pò ò nö ‘Vë-eny inlahen ngam Tēv, eūken Yēsū inrē.’ (Inm. 1:9) Kô-en an nö tövai nö inchōkūö yip ṙamatö-ellōnre, nö tömöi nö inup kanihngenre.

10. Sitih inlahen ön minë kahūich Yôhan nö inmeuktö minlēḵṙen ò töm ṙāi ṙinanyi?

¹⁰ Vënyö ngam tökiröng hanangenlōnre ang Yôhan nö imat minë kahūichre līpöre. Töm minlēḵṙen ò inrē töm tökitaknyu mahām Kristū. Lohten anga-aṅ nö 100 tum heuh ṙô nö vë-eny minë yanöölen hī, öi löktö im ṙāi ṙinānyi. Tö sā ngih ṙô ò: “Yěn tarīkuvö tököölö fālen, vamëlukui in im yöng tö Yēsū Kristū ngam tölöök.” (1 Yôh. 2:1, 2) Hōten hī ang Yôhan öi kumlēḵlö alahare öi ‘eūken Yēsū.’ (Inm. 19:10) kô-en ang Yôhan nö milēḵṙen töm ṙāi ṙinānyi. Sitih inlahen öi min ayī-ö?

11. Asuh öp min inyööken hī öi la-al nup kinlahare?

¹¹ Hòṅ ṙangen nup tövaich in kahëkenre. Yēḵ hī kô-en minlēḵṙen min töm ṙāi ṙinānyi, ngaich öt ngölōn min ayī-ö: ‘Mihôiṅ chin kēken nup töchōich, môkö min öich havëkö inṙē-ěl re öich in Yāvē.’ Öt löng yěi ngatī mufē. Yēḵ hī pöri min öi kalaha, ngaich hòṅ fē-ělre ayī-ö tö inlahen Yāvē hēk Yēsū inrē nö aṙēlen hī. Lökten mihôiṅ öi hatöönö re öi ngö ṙô, ‘sitih inlahen öich min yēḵ chu kalaha?’ Mihôiṅ in havëkökūö Yāvē tö hinòlṙenre. Hòṅ hī ‘öt fukngö tö nup kinlaha.’—Mët. 6:13.

12. Sitih inlahen öi min kēkö kaha ngam inlēnö im 1 Yôhan 3:16-18?

¹² Hòṅ hangenlōn in tö yip hol maneukre. Yēḵ hī min milēṙen tö ngam tökitaknyu mahām Yēsū, ngaich hangenlōn min ayī-ö tö yip prötör sistör re. Kūö yòh angū-ö nö töt ṙanangen? Pön kēngö nômöre inrē  ang Yēsū tö pôkūö cha. Nö inmeuktö Yēsū inrē nö hangenlōn tö cha. (Vë-evkūö 1 Yôhan 3:16-18.) Hòṅ meūkö ngam hanangenlōn hī nö in nup la-en hī. (Efi. 4:29, 31–5:2) Yěn vahavö min cha-a hēk īnu tö kanihngenre, sā nup töfaltöre pinlāngen, ngaich hòṅ hayööken cha ayī-ö. Ngaich sitih inlahen yěn miṙivngölōn hī cha-a?

13. Kūö yòh öi hòṅ aṙēḵlö holre?

¹³ Kihngen öi ṙung aṙēḵlö nup vanachö yip holre? (Lēv. 19:18) Hòṅ hang ngih inlēnö in chěi yěi ngatī: “Kö ṙāpö höö, kö aṙēlen höö, yĕn tarīku tö miṙivulōn nö i töng holre; sā tī ngam Tēv nö aṙēlen yīö, ngatī yin yēḵ yī-ö inrē.” (Kòl. 3:13) Yēḵ hī min aṙēlö yip holre ngaich hameuktöre ayī-ö öi milēḵṙen tö ngam ṙinanyö hī tö Yēsū. Sitih inlahen öi min asīöp ngam minlēḵṙen re töm ṙāi ṙinanyi?

14. Asuh öp töhěng talöökö hī öi hameuktö minlēḵṙenre töm ṙāi ṙinanyi?

¹⁴ Hòṅ ha-öönyö Yāvē in tö kūö ngam ṙāi ṙinanyi. Hang ṙô sistör Choënā aṅ Intiā ngam tö 83 samyeūheu ṙēḵti, nö ngö ṙô: “Kaheuk sakamö chin öich ha-öönyö Yāvē tö pôkūö ngam ṙāi ṙinanyi.” Hòṅ ngatī in ayī-ö inrē. Nup vanachkören inlahen hī kaheuk sakamö, ngaich hòṅ vë-eny nang Yāvē ayī-ö tö u. Yěn tökiröng pöri nup fālen hī ngaich hòṅ vë-eny nang yip minṙöinylen ayī-ö tö u. Ngaich hang ṙô hī min cha-a ngaich löknyö mat ngam Paipöl ṙô min nö halēnö hī, vë-elkui hī min inrē cha-a, hòṅ Yāvē nö aṙēḵlen hī, ‘ngaich yöölen min öi [im ṙô ngam Tēv] ngaich lööken.’—Yāk. 5:14-16.

15. Kūö yòh öi hòṅ kē-ěny ṙētak hòṅ haköp inlahen ngam ṙāi ṙinānyi fēken e inrē?

¹⁵ Hòṅ örheūheu in fēkö ngam ṙāi ṙinanyi. Hang ṙô sistör Rāchmönī ngam tö 73 samyeūheu ṙēḵti, nö ngö ṙô, “Yēḵ chu öich vë-ekūö nup inlahen Yēsū nö kihngen tö pôkūö hī ngaich öt lanakenröön nup makmat chu öich fēkö nuk kanihngen ò.” Lökngöre ellōn öich fēkö nuk kanihngen ò. Kô-en in hòṅ fēkö ngam inlahen Yēsū nö kēngö nômöre tö pôkūö hī, ngaich sīöp min ngam minlēḵṙen hī tö e. Mötlö sanīöpö ṙôken min ngam minlēḵṙen hī yěi chumkūöṙen öi kahngenre öi haköp.

16. Sitih inlahen öi min yöölen yěi haköptö yip tahëng tö ngam ṙāi ṙinanyi? (Ngëichköm nyat lama-uk.)

 ¹⁶ Hòṅ haköpten yip tahëng in tö e. Yēḵ hī min öi haköptö yip tahëng tö ngam ṙāi ṙinanyi ngaich sīöp min ngam minlēḵṙen hī tö e. Pōyen nup līpöre hēk vitiō vahī ngam söngkötön nö chehetī hī kò-òren öi haköptö yip tahëng tö minë inlahen Yēsū nö kūö yòh nö kapah tö pôkūö hī. Tö sā ngih, mihôiṅ öi haköpten ngam lësön 4 “Yīshu Masīh Kaun Hei?” Imat ngam prōsör Pörmēsvör Ki Taraf Sē Khusköprī! hēk ngam Paipöl Hamen Kya Sikhati Hei? Kitāp im lësön 5 ngam tö ngö “Firôtī- Pörmēsvör Ka tiyā Ēk Nayāp Tohfā.” Yēḵ hī inrē yihtökūö kaheuk samyeūheu im infēkö kinpaha ò, havëtö yip tahëng inrē nö yihtökūö ngaich sīöp min ngam minlēḵṙen hī töm ṙāi ṙinānyi.

17. Kūö yòh öng ngam ṙāi ṙinanyi nö tökiröng nö inlōntö hī nö kahëtö ngam Tēv?

¹⁷ Haköplu in ngaich in ngih ātiköl tö hī hòṅ ha-öiny ngam ṙinānyöre, pö hī lökten in e mihôiṅ haröhtöre in Yāvē pôrò öi höng töthet. Lökten in e min inrē ngam Sī-ö nö ahëti. (1 Yôh. 3:8) Lökten in e min ngam kuilōn ngam Tēv nö teung nö ing panam. Vī-i min hēk angū-ö nö peretāis. Möl min taṙòkhöre tarik nö hangenlōn tö Yāvē, ha-öönyan inrē. Ta-a chěi töi kaheuk sakamö hameuktö minlēḵṙen re töm ṙāi ṙinanyi, ngam inlōnti aṅ im Tēv.