1-2. Cosa el rescate y porque kita necesita con este?

CUANDO ya culpa el perfecto gente que si Adan, ya hace le perde el oportunidad para vivi hasta para cuando​—gendeh lang para na de suyu mismo cuerpo sino pati para na de suyu maga anak tambien. Nuay valido razon si Adan na cosa le ya hace. Intencional le ya comete pecado. Pero, quetal el de suyu maga anak? Nuay sila cosa ya hace malo y nuay sila causa con Adan para comete culpa. (Roma 5:12, 14) Conviene muri si Adan na cosa le ya hace. Pero, tiene ba cosa puede hace para salva con el de suyu maga anak desde na sentencia de muerte? Si! Despues comete culpa si Adan, si Jehova hinay-hinay ya revela si paquemodo le salva con el millones del maga descendiente de Adan desde na pecado y muerte. (Gen. 3:15) Na de suyu justo tiempo, hay imbia si Jehova con el de suyu Anak estaba na cielo “para entrega [de suyu] vida para rescata con manada maga gente.”​—Mar. 10:45; Juan 6:51.

² Cosa el rescate? Si ta refiri con este na Cristiano Griego Escritura, el rescate amo el pago que ya paga si Jesus para cumpra otravez con el cosa ya hace perde si Adan. (1 Cor. 15:22) Porque kita necesita con el rescate? Cay asegun na principio de justicia de Jehova como cosa ya habla na Ley, debe paga vida para na vida. (Ex. 21:23, 24) Ya hace perde si Adan con el de suyu perfecto vida. Para cumpli con el principio del justicia del Dios, ya sacrificia si Jesus con el de suyu perfecto vida. (Roma 5:17) Poreso, ya queda le un “Tata Eterno” con todo quien ta demonstra fe na rescate.​—Isa. 9:6; Roma 3:23, 24.

3. Asegun na Juan 14:31 y 15:13, porque preparao sacrificia si Jesus con el de suyu perfecto vida?

³ Preparao sacrificia si Jesus con el de suyu vida por causa na de suyu grande amor para con el de suyu Tata na cielo y para kanaton. (Le con el Juan 14:31; 15:13.) Por causa na  de suyu amor, determinao le que esta fiel hasta na fin y cumpli con el voluntad del de suyu Tata. Como resulta, hay cumpli el original proposito de Jehova para na maga gente y para con el tierra. Na este articulo, hay discuti kita si porque el Dios ya permiti que grabe sufri si Jesus antes le muri. Hay discuti tambien kita unrato con el ejemplo del un escritor del Biblia quien ya aprecia gayot con el rescate. Y despues, hay discuti kita si paquemodo kita dale mira que ta rindi kita gracias na rescate y si paquemodo kita hace hondo con el diaton apresacion na sacrificio que ya hace si Jehova y si Jesus.

4. Relata si paquemodo ya muri si Jesus.

⁴ Imagina con el ultimo dia de Jesus antes con ele mata. Maskin pa puede le llama un batalion de maga angel para protege con ele, ya permiti le que cuji con ele el maga Romano soldao quien ya gulpia con ele sin lastima. (Mat. 26:52-54; Juan 18:3; 19:1) Ya latiga sila con ele y ya iri gayot el de suyu cuerpo. Despues, ya manda sila carga con ele pesao palo na de suyu irido detras. Ya principia hala si Jesus con el estaca para na lugar onde con ele mata pero nuay dura, nuay mas le fuerza para carga con este. Poreso, ya manda el maga Romano soldao con el otro gente para carga con el estaca. (Mat. 27:32) Cuando ya llega si Jesus na lugar onde con ele hay mata, el maga soldao ya clava con el de suyu mano y pies na estaca. Por causa na pesades del cuerpo de Jesus, ta rompe el maga irida onde con ele ya clava. Dolorido el de suyu maga amigo y amiga, y ta llura el de suyu nana. Pero, el maga Judio quien tiene autoridad ta gangguia con Jesus. (Luc. 23:32-38; Juan 19:25) Ya sufri si Jesus por cuanto hora. Por causa na posicion del de suyu cuerpo, necesita mas hace esfuerzo el de suyu corazon y pulmon. Poreso, mas yan dificil le resulla. Na de suyu ultimo maga resuello, ya reza le con Jehova por ultimo vez. Despues, ya agacha le y ya muri. (Mar. 15:37; Luc. 23:46; Juan 10:17, 18; 19:30) El de suyu muerte hinay-hinay, bien duele y maka-huya!

5. Para con Jesus, cosa el mas duele compara na manera si paquemodo con ele mata?

⁵ Para con Jesus, el manera si paquemodo con ele mata gendeh amo el de con todo duele que hay experiencia le. Mas yan lingasa le con el razon si porque con ele hay mata. Ya acusa con ele que ya comete blasfemia​—un persona que nuay respeto con Dios o na nombre del Dios. (Mat. 26:64-66) Ese acusacion ya hace bien dificil con Jesus poreso ya pidi le con el de suyu Tata que era no permiti que hace con ele huya na ansina manera. (Mat. 26:38, 39, 42) Porque ya permiti si Jehova con el de suyu Anak con quien le ta ama que sufri y muri? Considera kita con el tres razon.

6. Porque necesita hace bitay con Jesus na estaca?

⁶ Una, necesita hace bitay con Jesus na estaca para libra con el maga Judio desde na un maldicion. (Gal. 3:10, 13) Ya promete sila que obedece con el Ley del Dios pero nuay sila hace con ese. Conviene sila muri cay maga anak sila de Adan y ya omenta pa este maldicion. (Roma 5:12) El Ley del Dios para na Israel ta habla que si el un gente comete pecado que muerte el pago, debe con ele mata. Ta menciona tambien na Ley que maldicido del Dios el un persona con quien ya hace bitay. * (Deut. 21:22, 23; 27:26) Cay ya hace bitay con Jesus na estaca, ya acepta le con el maldicion que para era na maga Judio. Como resulta, gendeh mas sila queda maldicido y el de suyu  sacrificio puede ayuda kanila maskin pa nuay sila acepta con ele.

7. Cosa el ika-dos razon si porque el Dios ya permiti que sufri el de suyu Anak?

⁷ Considera con el segundo razon si porque el Dios ya permiti que sufri el de suyu Anak. Yan train le con Jesus para na de suyu papel como el diaton Alto Sacerdote. Ya experiencia si Jesus si paquemodo de dificil obedece con Dios si bajo na bien grabe probanza. Ya enfrenta le grabe dificultad poreso ya pidi le ayuda na rezo “gritando y llorando.” Asigurao cay ya experiencia si Jesus sobra lingasa, sabe le el diaton necesidad y “puede Ele ayuda [kanaton]” si “ta sufri tamen [kita] tentacion.” Ta rindi gayot kita gracias con Jehova cay ya iscuji le un lastimoso Alto Sacerdote quien ta “puede sinti el paca-maluya diaton.”​—Heb. 2:17, 18; 4:14-16; 5:7-10.

8. Cosa el ika-tres razon si porque ya permiti el Dios que grabe sufri si Jesus?

⁸ Ika-tres, ya permiti si Jehova que grabe sufri si Jesus para puede contesta con este importante pregunta: Puede ba el maga gente esta fiel con Jehova maskin pa na grabe probanza? Ta habla si Satanas gendeh! Ta clama le que ta sirvi lang el maga gente con Dios cay tiene sila cosa ta puede saca con ele. Y ta creé le que igual con el diila tata, si Adan, gendeh sila ta ama con Jehova. (Job 1:9-11; 2:4, 5) Con confianza na lealtad del de suyu Anak, ya permiti si Jehova que pone na probanza con Jesus hasta na muerte. Ya mentena si Jesus con el de suyu integridad y ya dale prueba que imbustero si Satanas.

9. Cosa ejemplo ya dale kanaton si apostol Juan?

⁹ El enseñanza de rescate ya puede hace fuerte con el fe del manada Cristiano. Ya continua sila predica maskin pa na oposicion y ya aguanta na todo clase de probanza na diila entero vida. Considera con el ejemplo de apostol Juan. Leal ele ya predica con el verdad acerca del Cristo y del rescate, posible adentro de mas de 60 año. Cuando cerca le 100 año, el Imperio de Roma ya considera con ele como bien peligroso poreso ya hace con ele preso na isla de Patmos. El de suyu crimen? “Predicacion del Palabra de Dios y del [de suyu] paca-testigo acerca de Cristo.” (Rev. 1:9) Un buen ejemplo gayot si Juan por causa na de suyu fe y cay ya aguanta le!

10. Paquemodo ta dale mira el cosa ya escribi si Juan que ya aprecia gayot le con el rescate?

¹⁰ Ya dale mira si Juan con el de suyu hondo amor para con Jesus y el de suyu apresacion na rescate na cosa le ya escribi. Ya menciona le mas de 100 beses acerca na rescate o el maga beneficio que ya hace posible el rescate. Por ejemplo, si Juan ya escribi: “Si tiene quien ta peca, tiene kita un abogao [o ayudante] alli junto con el Tata, si Jesucristo, el noay gayot culpa.” (1 Juan 2:1, 2) Ya hace tambien claro si Juan con el importancia que man “testigo” acerca con Jesus. (Rev. 19:10) Claro que ya aprecia gayot si Juan con el rescate. Paquemodo tambien se kita puede dale mira?

11. Cosa puede ayuda kanaton para resisti con el tentacion?

¹¹ Resisti el tentacion que culpa. Si deverasan kita ta aprecia el rescate, gendeh kita pensa: ‘Si ta enfrenta yo tentacion, gendeh mas yo necesita evita culpa. Puede lang yo se hace y despues pidi lang yo perdon.’ Sino si ta enfrenta kita tentacion para hace  malo, hay habla kita: ‘Gendeh! Na todo cosa ya hace si Jehova y si Jesus para conmigo, porque man yo este hace?’ Uyun con ese, puede kita pidi con Jehova que dale kanaton fuerza y reza: ‘No deja conmigo cae na tentacion.’​—Mat. 6:13.

12. Paquemodo kita puede aplica con el consejo na 1 San Juan 3:16-18?

¹² Ama con el de tuyu maga hermano y hermana. Si ta dale kita mira ese amor, ta dale tambien kita mira apresacion na rescate. Porque? Cay ya dale si Jesus el de suyu vida gendeh lang para kanaton sino para na diaton maga hermano y hermana tambien. Si preparao le muri para kanila, asigurao que valoroso sila para con ele. (Le con el 1 San Juan 3:16-18.) Ta dale kita mira el diaton amor para na diaton maga hermano y hermana por medio na diaton tratamiento kanila. (Ef. 4:29, 31–5:2) Por ejemplo, ta ayuda kita kanila si enfermo sila o si ta enfrenta sila maga grabe probanza, incluido ya si tiene maga calamidad. Pero, cosa kita debe hace si el un hermano o hermana na congregacion tiene cosa ya hace o ya habla que ya hace sinti duele kanaton?

13. Porque kita debe perdona?

¹³ Tan dificil ba tu tiene vez perdona con el de tuyu hermano o hermana? (Lev. 19:18) Si ansina, sigui con este consejo: “Aguanta y perdona con uno y otro si uno tiene reclamo con otro. Igual como ya perdona el Señor con ustedes, ansina tamen perdona ustedes.” (Col. 3:13) Cada vez ta perdona kita con el diaton hermano o hermana, ta dale kita prueba na diaton Tata na cielo que deverasan kita ta aprecia con el rescate. Paquemodo kita puede continua hace hondo el diaton apresacion para na este regalo estaba con Dios?

14. Cosa el un manera que puede ayuda kanaton hace hondo el diaton apresacion para na rescate?

¹⁴ Rindi gracias con Jehova por causa na rescate. “Ta pensa yo importante que menciona con el rescate cada dia na de mio rezo y rindi gracias con Jehova por causa con este,” ya habla el un 83 año hermana que el nombre Joanna, quien ta queda na India. Na de tuyu maga privado rezo, pensa con el maga especifico kamali que ya puede tu hace durante el entero dia y despues pidi perdon con Jehova. Siempre si ya puede tu hace serioso culpa, necesita tambien tu el ayuda del maga anciano. Hay oi sila contigo y hay dale sila amable consejo estaba na Palabra del Dios. Hay reza sila  junto contigo y pidi con Jehova que continua contigo aplica el valor del sacrificio de Jesus “para ay queda [tu] curao” na espiritual.​—Sant. 5:14-16.

15. Porque kita debe dale tiempo para le acerca con el rescate y medita con este?

¹⁵ Medita acerca con el rescate. “Si ta le yo acerca con el sufrimiento de Jesus,” ya habla el un 73 año hermana que si Rajamani, “ta puede yo llura.” Posible, ta sinti tambien tu duele si ta pensa tu si paquemodo ya sufri el Anak del Dios. Pero si mas medita tu acerca con el sacrificio que ya hace si Jesus, hay queda mas hondo el de tuyu amor para con ele y con el de suyu Tata. Para ayuda contigo medita acerca con el rescate, puede tu usa con este topico para hace un study project.

16. Paquemodo kita puede beneficia si ta enseña kita con otro acerca na rescate? (Mira con el letrato na cover.)

¹⁶ Enseña con otro acerca con el rescate. Cada vez ta habla kita con otro acerca na rescate, mas ta queda hondo el diaton apresacion con este. Tiene kita maga bonito tool que puede ayuda kanaton enseña con otro si porque necesita muri si Jesus para kanaton. Por ejemplo, puede kita usa con el leccion 4 del brosyur Buen Noticia Estaba con Dios! Ese leccion tiene titulo “Quien si Jesucristo?” O puede kita usa con el capitulo 5 del libro Cosa Kanaton Puede Enseña el Biblia? Ese capitulo tiene titulo “Rescate​—El de con Todo Precioso Regalo del Dios.” Y cada año, ta hace kita hondo con el diaton apresacion para na rescate si ta atende kita na Comemoracion del muerte de Jesus y si activo kita ta invita con otro que man junto kanaton. Ya dale si Jehova kanaton el grande privilegio que enseña con otro acerca con el de suyu Anak!

17. Porque el rescate amo el de con todo precioso regalo del Dios para na maga gente?

¹⁷ Claro que manada kita razon para tiene y mentena hondo apresacion para na rescate. Por causa na rescate, puede kita tiene cerca relacion con Jehova maskin pa imperfecto kita. Por causa na rescate, hay destroza con el maga trabajo del Diablo. (1 Juan 3:8) Por causa na rescate, hay cumpli con el original proposito de Jehova para na tierra. El entero planeta hay queda paraiso. El todo con quien tu puede conoce ta ama y ta sirvi con Jehova. Ojala, busca kita manera cada dia para dale mira el diaton apresacion na rescate​—el de con todo precioso regalo del Dios para na maga gente!