1-2. Ekitambo ni enki, kandi shi ahabw’enki turi kucetenga?

ADAMU owabire ahikirire ku yacumwire, akaferwa amagara agatahwaho, kandi yatuma abamukomokireho na bo bagaferwa. Adamu akaba atine ec’okwekwasa. Ni we owayeshariremu kucumura. Kandi shi abamukomokireho? Bo tibaracumwire kandi tibaragambire Adamu ngu akikore. (Rom 5:12, 14) Mbwenu shi hine ecabire kirakorwe kugira ngu kibakize orufu oru ishe yabaragire kandi orwabire rumushemerire? Yego! Adamu ku yamazire kucumura, Yehova akahika ari kwereka oku yabire arije kucungura abantu bingi ababire baramukomokeho ngu baruge omu muceno gw’ekibi n’orufu. (Kut 3:15) Yehova akataho obwire obu yabire arije kohereza Omwana weye ngu ‘aheyo amagara geye omu kucungura bingi.’—Mak 10:45; Yoh 6:51.

² Ekitambo ni enki? Ekitambo nikigambwa omu Byahandikirwe by’Orugurika bya Kikristo, kiri kumanyisa ekiguzi eki Yesu yahireyo ngu ashashurire eki Adamu yaburize. (1 Kor 15:22) Ahabw’enki nitwetenga ekitambo? Ni ahabw’okuba omusinge gwa Yehova g’oburinganiza oguri omu biragiro gwabire nigwereka ku amagara gashemerire kurihwa agandi. (Kur 21:23, 24) Adamu akaferwa amagara agahikirire. Obwe rero, Yesu akahayo amagara geye agahikirire kugira ngu habeho oburinganiza. (Rom 5:17) Omuri obwo buryo, akaba ‘Tata otahwaho’ w’abantu bona abari kwikiriza ekitambo.—Isa 9:6; Rom 3:23, 24.

3. Tukuratize ebiri omuri Yohaana 14:31 na 15:13, ahabw’enki Yesu yayikirize kuhayo amagara geye agahikirire?

³ Yesu akikiriza kuhayo amagara geye agahikirire ahabwa rukundo eyi ari kukunda Ishe w’omu iguru n’eyi ari kutukunda. (Shoma omuri Yohaana 14:31; 15:13.) Eyo rukundo ni yo eyatumire yaguma ari omwesigwa kuhisya aha kufa ngu ahikirize ebi Ishe yabire amutumire. Eco nikija kutuma ekigendererwa  eki Yehova ayinire abantu n’eki ayinire ensi cahikirira. Omuri eki kicweka, twaza kushwijuma enshonga Yehova yayikirize ngu Yesu abonabone munonga mbere y’okufa kweye. Nambwenu, twaza kureba kace aha cokureberaho c’omuhandiki wa Bibuli owayerekire ku nasima munonga ahabw’ekitambo. Bwanyima, nitwija kureba oku turi kubasa kwereka ku nitusima munonga Yehova na Yesu ahabw’ekitambo eki batuhire.

4. Shoborora oku Yesu yafire.

⁴ Tekateka aha byahikire ahari Yesu hari kuburaho kace ngu ayitwe. Akaba ari kubasa kweta ba marayika abari kukira legiyoni ngu bamurinde, konka akikiriza ngu abasirikare b’Abaroma bamukwate, kandi bakamutera batari kumusaasira. (Mat 26:52-54; Yoh 18:3; 19:1) Bakamuteza enkoba ezamuhutarize munonga. Bwanyima, bakamweguza ekiti kihango aha mugongo ogwabire guri kujwa eshagama. Yesu akatandika kwegura eco kiti ngu akihise ahu babire bari kwenda kumuhanikira, konka bwanyima y’aho, bakabugana omushija, rero abasirikare bamugema ngu acegure. (Mat 27:32) Yesu ku yahikire ahu babire bari kwenda kumuhanikira, abasirikare bakamutera emisimari omu ngaro n’omu bigeri, bamuhanika. Za kiro ezi yabire ayine zikatuma ahu bamutire emisimari haguma hari kutatamuka. Ebyo bikatuma banywani beye na nyina barira munonga, konka abategeki b’Abayudaya baguma bari kumujuma. (Luk 23:32-38; Yoh 19:25) Akamara amashaha mingi ari omuri obwo busaasi. Omutima gweye n’ebihaha byeye bikaremwa, rero catuma yayisa kubi. Ku yabire yaza kwisa ogw’aha muheru, akagamba eshara eyayerekire ku yasingura. Bwanyima, akinika omutwe, rero yahayo amagara geye. (Mak 15:37; Luk 23:46; Yoh 10:17, 18; 19:30) Mazima, akafa ari omu busaasi bwingi kandi omu buryo oburi kwisa enshoni!

5. Ni enki ecabire kiri kushasha Yesu ekiri kukira oburyo obu yayisirwemu?

⁵ Oburyo obu Yesu yayisirwemu ti bwo obwabire buri kumushasha. Emanja ezi babire bamutireho ni zo ezabire ziri kumushasha munonga. Abantu bakamubeherera ngu najuma Ruhanga kandi ngu tari kuha izina ryeye ekitinisa. (Mat 26:64-66) Ezo manja zikashasha munonga Yesu, catuma yagira amasiko ngu shana Ishe namwiha omuri eco kishwaro. (Mat 26:38, 39, 42) Ahabw’enki Yehova yayikirize ngu Omwana weye owu ari kukunda abonabone kandi afe? Twaza kushwijuma enshonga ishatu.

6. Ahabw’enki Yesu yabire ashemerire kuhanikwa aha kiti c’obusaasi?

⁶ Enshonga y’okubanza: Yesu akahanikwa aha kiti ngu acungure Abayudaya omuceno. (Gal 3:10, 13) Bakaba baraganisize ku babire bariyorobera ebiragiro bya Ruhanga, konka tibarabyobire. Eco kikatuma batunga omuceno ogwayeyongire aha kibi eki Adamu yaturagire. (Rom 5:12) Bimwe omu biragiro ebi Ruhanga yabire ahire Abisirayeli bikaba nibigamba ku omuntu owabire ari kukora ekibi ecabire kiri kuhanisibwa orufu yabire ashemerire kwitwa. Bwanyima, omutumbi g’ogo muntu gukaba niguhanikwa aha kiti. * (Bir 21:22, 23; 27:26) Obwe rero, ahabw’okuba Yesu yahanikirwe aha kiti, kikatuma ihanga eryamwangire ryagasirwa aha kitambo ceye.

7. Ni eha nshonga ya kabiri eyatumire Ruhanga yayikiriza ngu Omwana weye abonabone?

⁷ Enshonga ya kabiri: Yehova kaba ari kumanyiza Yesu ngu ayije kuba Omutambi  witu mukuru. Yesu akerebera ku kigumire kuguma ori omwesigwa ahari Ruhanga waba ori omu kigezo kigumire. Akabonabona munonga, yahika n’aha ‘kushaba ari kweshengereza munonga, narira.’ Mazima, ahabw’okuba Yesu yarabire omu busaasi bwingi, naba eyetegwire kututabara twaba turi kugezibwa. Twine omugisha gw’amani ahabw’okuba Yehova akatutoranira Omutambi mukuru ow’embabazi kandi ow’okwesigwa ori ‘kushasha hamwe n’itwe omu bweremwa bwitu’!—Heb 2:17, 18; 4:14-16; 5:7-10.

8. Ni eha nshonga ya kashatu eyatumire Yehova yayikiriza ngu Omwana weye agezibwe munonga?

⁸ Enshonga ya kashatu: Yehova akikiriza Yesu ngu abonabone kugira ngu atunge ecokugarukamu c’ekibuzo ekiri kugira ngu: Mbehi omuntu nabasa kuguma ari omwesigwa ahari Ruhanga n’obu yakuba ari kugezibwa munonga? Sitaane we nagamba ngu tikiri kubasika! Nagamba ku abantu bari kukorera Ruhanga ahabwa ebi ari kubaha. Kandi natekateka ngu nka Adamu, n’itwe tituri kukunda Yehova. (Yob 1:9-11; 2:4, 5) Ahabw’okuba Yehova yabire ari kwesiga Omwana weye Yesu, akamwikiriza ngu agezibwe munonga okukira oku abantu bagezibwe. Yesu akaguma ari omwesigwa yayereka ku Sitaane ari omubihi.

9. Ni kiha cokureberaho eki entumwa Yohana yatuterireho?

⁹ Okwikiriza kw’Abakristo bingi kukakizaho kuguma ahabw’enyegesa y’ekitambo. Nibagumizamu kuburira n’obu abantu bari kubahakanisa kandi bagumizamu kwehanganira ebigezo byona ebi bari kubugana. Reka tushwijume ecokureberaho c’entumwa Yohana. Akamara emyaka eri kurenga 60 ari kuburira omu bwesigwa amazima agari kukwata ahari Kristo n’ekitambo. Obu yabire yahika omu myaka ya za 90, obutegeki bwa Roma bukaba nibugamba ku ari kubugomera, catuma bamusibira aha kirwa ca Patumo. Konka shi ni enki eki babire nibamuziza? Bakaba nibamuziza kuburira ‘ekigambo ca Ruhanga n’okuhamya ebya Yesu.’ (Kush 1:9) Ku ni ecokureberaho kirungi c’okwereka okwikiriza n’okwehangana eki tushemerire kutoreza!

10. Ni bata oku ebi Yohana yahandikire omu bitabo byeye biri kwereka ku yabire nasima ahabw’ekitambo?

¹⁰ Yohana akereka ku nakunda Yesu kandi ku nasima ahabw’ekitambo omu bitabo ebi yahandikire. Akagamba aha kitambo n’aha migisha eyi kiri kutuma twatunga emirundi eri kurenga ahari 100. Ecokureberaho: Yohana akahandika ngu: ‘Konka omuntu wena ku arashishe, twine omutonganizi ahari Ishe, ni we Yesu Kristo ohikirire.’ (1 Yoh 2:1, 2) Omu bitabo bya Yohana akereka omugasho g’‘okuhamya amazima ga Yesu.’ (Kush 19:10) Mazima, Yohana akereka ku nasima ahabw’ekitambo. Ni bata oku turi kubasa kumutoreza?

11. Ni enki ekiri kubasa kutukwasa kusingura ekigezo?

¹¹ Yerinde kucumura. Twaba turi kwereka ku nitusima ahabw’ekitambo titushemerire kutekateka ngu: ‘Nagezibwa tinshemerire kutaho amani ngu ntacumura. Nimbasa kuguma ndi kwekorera ebibi, rero nshabe embabazi.’ Omu mwanya gw’eco, twagezibwa kukora ekintu kibi, tushemerire kuhika turi kucerinda, rero twebuza ngu: ‘Nimbasa kukora nta ekibi nk’eki n’ebintu ebi Yehova na Yesu bankorire?’ Twahika omu mbera nk’ezo, nitubasa kushaba Yehova ngu atuhe amani turi tumweshengereza tuti: “Otatutwara omu kohibwa.”—Mat 6:13.

12. Ni bata oku turi kubasa kuta omu nkora omusinge oguri omuri 1 Yohaana 3:16-18?

 ¹² Kunda benetata na banyanyazi. Ku turi kwereka rukundo, nituba twayereka ku nitusima ahabw’ekitambo. Ahabw’enki? Ni ahabw’okuba Yesu tarahireyo amagara geye aha bwitu kusha, ahobwe akagahayo n’aha bwa benetata na banyanyazi. Obu yabaferire, akaba yayereka ku bari ab’omuhendo omu misho geye. (Shoma omuri 1 Yohaana 3:16-18.) Nitwereka ku nitukunda benetata na banyanyazi birabire omu ku turi kubatwariza. (Efe 4:29, 31–5:2) Ecokureberaho: Nitubakwasa baba barwire, baba bari omu bigezo ninga babugana ebihikirizi. Konka shi nitukora ki Omukristo mugenzi witu yatugambira ninga akatukorera ekintu kibi?

13. Ahabw’enki tushemerire kusaasira abandi?

¹³ Mbehi nikikugumira kusaasira Omukristo mugenzi wawe yakushobeza? (Lev 19:18) Yaba kiri kisyoya, kuratiza obuhabuzi oburi kugira ngu: ‘Nimugumisiririzana; kandi ku harabe hariho oyine eki arikufa na mugenzi weye, musaasirane; nk’oku [Yehova] yabasaasire, mube ni ko mwatwaza.’ (Kol 3:13) Ku turi kusaasira benetata na banyanyazi, nituba twayereka ku nitusima Tata witu w’omu iguru ahabw’ekitambo. Ni bata oku turi kubasa kugumizamu kwereka ku nitusima ahabw’ekitambo?

14. Ni buha buryo bumwe obu turi kubasa kwerekamu ku nitusima ahabw’ekitambo?

¹⁴ Sima Yehova ahabw’ekitambo. Omunyanyazi w’emyaka 83 otwire omuri Indiya akagamba ati: “Nintekateka ngu ni ec’omugasho kugamba ekitambo omu shara zange buri izoba n’okumusima ahabw’okukituha.” Washaba, otekateke aha nshobe ezi okozire izoba ryona kandi oshabe Yehova ngu akusaasire. Konka waba okozire ekibi c’amani, noba oshemerire kurondera obuyambi aha bazehe b’ekibina. Nibija kukuhurikiza kandi bakuhe obuhabuzi burungi oburi omu Kigambo ca Ruhanga. Nibija kushabira hamwe n’iwe kandi bashabe Yehova ngu akusaasire akoresize ekitambo ca Yesu kugira ngu oshube okire omu by’omwika.—Yak 5:14-16.

15. Ahabw’enki tushemerire kugira obwire bw’okushoma ebiri kukwata aha kitambo kandi tukabitekatekaho?

¹⁵ Guma otekateke aha kitambo. Omunyanyazi w’emyaka 73 ori kwetwa Rajamani akagamba ati: “Ku ndi kushoma omuri Bibuli  oburyo obu Yesu yabonabwinemu, nindira.” N’iwe nobasa kwehurira kubi watekateka oku Omwana wa Ruhanga yabonabwine munonga. Konka oku orikizaho kutekateka aha kitambo ca Yesu ni ko orikizaho kumukunda kandi ni ko ori kizaho kukunda Ishe. Mbehi kugira ngu otekateke aha biri kukwata aha kitambo, tori kubasa kubyeyegesa?

16. Nitugasirwa tuta ku turi kwegesa abandi ebiri kukwata aha kitambo? (Reba ekishushani c’aha kishembeso.)

¹⁶ Yegesa abandi omugasho gw’ekitambo. Oku turi kukizaho kugambira abandi ebiri kukwata aha kitambo, ni ko turi kuzaho kukireba nk’ec’omuhendo ahari itwe. Twine ebikoreso by’omutano ebi turi kukoresa omu kwegesa abandi enshonga ahabw’enki Yesu yatuferire. Ecokureberaho: Nitubasa kukoresa ishomo rya 4 ry’akatabo Obutumwa burungi oburi kuruga ahari Ruhanga! Eryo ishomo ryine omutwe oguri kugira ngu, “Yesu Kristo ni oha?” Ninga shi tukoresa ekicweka ca 5 c’akatabo Bibuli netwegesa ki? Eco kicweka kine omutwe oguri kugira ngu, “Ekitambo ni ekiconco ekiri kuruga ahari Ruhanga.” Kandi buri mwaka nobasa kwereka ku nosima ahabw’ekitambo ori kwekwatanisa omu kijusyo kandi otumira abandi ngu bekwatanise n’itwe. Ku ni omugisha gw’amani ogu Yehova yatuhire g’okugambira abandi ebiri kukwata aha Mwana weye!

17. Ahabw’enki ekitambo kiri ekiconco ekiri kukira ebindi eki Ruhanga yahire abantu?

¹⁷ Hatariho okubanganisa, twine enshonga nyingi eziri kutuma twagumizamu kwereka ku nitusima ahabw’ekitambo. Ekitambo nikituma twagira obunywani burungi na Yehova n’obu turi abantu abatahikirire. Ahabw’ekitambo, emirimo ya Sitaane neyija kucwecerezibwa. (1 Yoh 3:8) Ahabw’ekitambo, ekigenderera eki Yehova ayinire ensi nikija kuhikirira. Ensi yona neyija kuhinduka paradiso. Obwo bwire buri omwe nayija kuba ari kukunda Yehova kandi ari kumuhereza. Ni mureke buri izoba tugume twereke ku nitusima ahabw’ekitambo c’omuhendo eki Ruhanga yahire abantu!