1-2. Yobolo txini, vina ninfunelani?

OTTEGA wa Adamu ohimuyeleliha okalawo namukalakala vamodha na ziza notene na attu ambaliwa. Muladdu ototile Adamu kuleveleliwe. Sabwani iyene ole osakula ottega nona wanfwanyela okwa. Ki mwa ziza na anaye? Awene kana muladdu. (Rom. 5:12, 14) Mwa dhawene yahikalawo elobo ekosiwe wi oboleliwe mmuladduni obu ottongeliwani okwa? Ndde! Mmaleli Adamu ottega, Yehova vang’ono-vang’ono wahiroma woniha mukalelo ogavuniliye matxikwi na matxikwi a attu ali adhari a yottega vina okwa. (Wita 3:15) Mudhidhiya kofiya, Yehova agahimuruma Mwanaye velaboni ya vati ‘wila aperheke egumi yaye wi awobolele attu otene.’—Mk. 10:45; Jo. 6:51.

² Yobolo txini? Mmaleboni a Egrego a Okristu, nzu ntti yobolo ninaddiwana muttengo opitxile Yezu wi obolele ejile eyelelile Adamu. (1 Kor. 15:22) Ninfunelani yobolo? Sabwa ya mattongelo oligana a Yehova, Nlamulo naavahiliye ana Izrayel naloga wi egumi eliviwe na egumi. (Obud. 21:23, 24) Adamu ayelelile egumi yoligana. Wila akwanihedhe mattongelo oligana a Mulugu, Yezu ohiperheka egumi yaye yoligana. (Rom. 5:17) Dhahene iyene ohidha okala “Babi Wamukala-kala” wa abale otene anroromela yobolo.—Iza. 9:5 [Iza. 9:6 Tradução do Novo Mundo] Rom. 3:23, 24.

3. Mowiwanana na Joau 14:31 vina 15:13, txini emuttukulele Yezu operheka egumi yaye yoligana?

³ Yezu wali womala nawale wi aperheke egumi yaye sabwa ya omukwela waye Babe wa wirimu vina wakwela attu. (Kengesa Joau 14:31; 15:13.) Sabwa ya okwela oku Yezu wahigana okalavi wororomeleya vina okosa efunelo ya Babe. Yezu wonihile ejene modhela okalavi okuluveleya ofiyedha okwa waye. Yodhelavoya, efunelo ya  Yehova na elabo ya vati enele wakwanihedheya. Mwari mwa nsunzo ntti, ninele wona sabwaya ettiyile Yehova wi Yezu atabutxiwe venjene ofiyedha opiwa. Ngamala ninele osunza na yotagiha ya namaleba mmodha wa Bibilia wavaha ttima mukutto wa yobolo. Omamalelowa, ninele osekeserha mukalelo onatonyihedhihu nriho yobolo vina otamalela mukutto wa yobolo onikoseli Yehova vina Yezu.

4. Katapulelamo mukwelo wa Yezu.

⁴ Kobuwela dhimpadduweli Yezu labo nomariha velaboni ya vati. Iyene kofuna agahikuwela makuru na makuru a angelo wi ambarele, mbwenye iyene ohivittiya wi anyakoddo a akadda Roma ommaga vina omutabutxa ahimweddelaga ttagaraga. (Mt. 26:52-54; Jo. 18:3; 19:1) Awene ahimuwasula na zangarharha wavoreya maningo aye. Masiki na makwadda ana Yezu, anyakoddo ahimmagelela ottukula pingirhizi yolemela vaddiddi. Yezu wahivijela baroma oburulela mburho wadhowiye opiwa. Vasogorhova, ahimmagelela mulobwana dhahi ottukula pingirhizi wi amwakele. (Mt. 27:32) Mufiyelani mburo wadhowiye opiwa anyakoddoya ahimukomela mada na manyalo vapingirhizini. Amarho aye animukubanyedha, maye wanimumlela oku Ayuda animbedda. (Lk. 23:32-38; Jo. 19:25) Vakomeliwe Yezu ohitabuwa venjene ofiyedha okwa waye. Murima na madhadho aye aroma olema vina wanvuma na goyi. Amariheyaga wahikosa nlobelo nomariha. Nomala okunamiha musorho ohimariheya. (Mk. 15:37; Lk. 23:46; Jo. 10:17, 18; 19:30) Mohaganyedha, okwa wa Yezu wali wa manyazo vina wa otabuwa vaddiddi!

5. Txini yamukubanyiha Yezu opitta okwa vapingirhizini?

⁵ Yamukubanyihetxa Yezu kiyali mukwelo waye. Mbwenye, yamukubanyiha yali muladdu wamagedhiwiye mpaka opiwa. Iyene wahimagedhiwa muladdu wa omusutta Mulugu—ekalelo ya muttu ohinimuriha Mulugu nne nzina naye. (Mt. 26:64-66) Otanalela mazu aba awi omusutta Mulugu aninmukubanyiha venjene ofiyedha omuloba Babe wi amurabelihe masoso afuna omugwela. (Mt. 26:38, 39, 42) Yehova ottiyeleni wi mwanaye wokweleya atabutxiwe venjene ofiyedha opiwa? Ninele wona sabwa ttaru.

6. Yafuneyelani Yezu otomeyiwa vapingirhizini?

⁶ Yoroma, yanfuneya Yezu okwa vapingirhizini wila avune Ayuda agweliwe ntowa. (Gal. 3:10, 13) Awene ahigweliwa ntowa sabwa ya opikirhela wi agahiwelela Nlamulo na Mulugu nanda omamalelowa akodda ovirihamo. Sabwa ya ejuwene, ottiya ottongeliwa okwa oravilani na yottega ya Adamu ahigwihedhiwa vina ntowa. (Rom. 5:12) Nlamulo na Mulugu navahiliye ana Izrayel naloga wi muttu ddi-muttu waliga muladdu oninfwanyelihedha okwa, apiwe. Agamala opiwa wantomeyiwa mmurini. * (Olib. 21:22, 23; 27:26) Sabwa ya otomeyiwa vapingirhizi, Yezu ohiwodhiha wi nlogo notene namukoddile nileveleliwe dhottega dhawa.

7. Mwaha wanawili omutukuleli Mulugu orumela wi Mwanaye atabutxiwe buvi?

⁷ Kang’ana mukalelo wanawili wattiyeli Yehova wi Mwanaye atabutxiwe. Iyene wela omushagiha Yezu wi musogorho akale Namakutta wehu Munddimuwa. Yezu wahoona na mento aye wi jorutxa omwiwelela Yehova nigafwanyiwa makattamiho. Iyene wahigumanana makattamiho orutxa ofiyedha omuloba nikamihedho Mulugu “na nzu noliba, ahabaga mintori.” Sabwa ya ovira mmatabuwoni mpu motene iyene onononelamo pama nigatabuwaga, “dhahene onowodha” onikamihedha  nigakala ‘mowehiwani vina mmatabuwoni.’ Ninotamaalela sabwa ya Yehova onivaha Namakutta Munddimuwa wattagaraga onziwa “okubanyedha dhawobana dhehu!”—Aheb. 2:17, 18; 4:14-16; 5:7-10.

8. Mwaha gani waneraru omuttukulele Yehova ottiya wi Yezu atabutxiwe venjene?

⁸ Yanoraru, Yehova ohirumeela wi mwanaye atabutxiwe venjene wi akule nivuzo ntti namakamaka: Enowodheya attu okalavi ororomeleya masiki afwanyiwaga makattamiho ottabwa? Satana bela kinwodheya! Iyene onloga wi attu animulabela Mulugu sabwa ya dhokaana dhawa. Osogorhowa Satana ohiloga wi Dhahene ninga—Adamu—awene kanimukwela Yehova. (Job 1:9-11; 2:4, 5) Yehova wanroromela weddeyana wa Mwanaye, nona wahimuttiya wehiwa mpaka okwa waye. Yezu wahikalavi wororomeleya, dhawene ohoniha wi Satana muttambi.

9. Yotagiha gani enittiyedhi murumiwi Joau?

⁹ Akristu enjene ororomeleya anolibiheya venjene na masunziho a yobolo. Awene andhowavi alaleyaga masiki veddiwani, vagumananina makattamiho vina makattamiho a vyaka dhowunuwelavo. Katanalela yotagiha ya murumiwi Joau. Mororomeleya-mwene iyene ohilaleya ebaribari sabwa ya Kristu vina ttima ya mukutto wa yobolo okwaranya vyaka 60. Vanihe vyaka zana, Alamuleli a elabo y’o Roma amoona ninga muttu wowopiya nona batxedheliwa vesuwani enromoliwa Pátmos. Elobo gani yabure yakosiliye? ‘Sabwa y’olaleya Nzu na Mulugu, vina yokala munamoona wa Yezu.’ (Ovuh. 1:9) Txibarene eji yotagiha ya muttu wa nroromelo vina wovilela!

10. Manivuru alebile Joau anooniha dhavi wi iyene wanvaha ttima mukutto wa yobolo?

¹⁰ Manivuru ankosa mpaddi wa Bibilia alebile Joau anowoniha wi iyene wannimukwela venjene Yezu vina wantamaalela mukutto wa yobolo. Manivuru aye anovaha mitonyo dhowakwana 100 dhinloga sabwa ya yobolo vina vilobo dhapama dhiwodheyile sabwa ya mukutto wa yobolo. Motagiha, Joau ohileba dhahi: “Akala mmodhavo wenyu onothega, nikana onnilogela wa Baba, ddi Yezu Kristu, oli wokoddela murima.” (1 Jo. 2:1, 2) Vina manivuru alebile Joau anowoniha ttima ya ovaha ‘onamoona wa Yezu.’ (Ovuh. 19:10) Txibarene Joau wanttittimiha venjene mukutto wa yobolo. Iyo ninawodhe dhavi okosa yakakene?

11. Txini enanikamihedhe orabela okosa yottega?

¹¹ Karabela okosa yottega. Iyo nigakala attu antamaalela yobolo, kaninafiyedhe wubuwela dhahi: ‘Kili yofuneya miyo okosa guru wi ddirabele yottega. Vina akala ddinottega enowodheya okumbirha nlevelelo.’ Ottiya okana mubuwelo obo, iyo nigakwekwetteliwa okosa yottega ninofwanyela orabela! Vina ovikosa nivuzo ntti: ‘Ddinawodhe dhavi okosa dhilobo dhotakala ninga esi oku dditanaalelaga dhilobo dhapama dhiddikoseli Yehova na Yezu?’ Bili dhawene enfwanyelihu okosa ja omuloba Yehova wi anivahe guru wi ‘Nihigwele munyengetteyani.’—Mt. 6:13.

12. Ninavirihemo dhavi nlago ninfwanyeya nlebo na 1 Joau 3:16-18?

¹² Wakwele abali na arogora. Iyo nigalagiha okwela ninele woniha wi ninotamaalela yobolo. Namukalelo gani? Sabwani Yezu kanikwele iyo bahi, ohakwela vina abali na arogora. Nona sabwa ya waperhekela egumi yaye, eji enlagiha wi awene akana ttima vamentoni vaye. (Kengesa 1 Joau 3:16-18.) Iyo ninoniha wi ninowakwela abali na arogora sabwa ya makalelo anaweddiha iyo. (Ef. 4:29, 31–5:2)  Motagiha, Iyo ninowakamihedha agakala aredda obe agapadduweliwa makattamiho orutxa ninga dhifoyo dha mwilaboni. Ovano txini enfwanyelihu okosa akala mbali wile okosa obe ologa elobo eninyimulile?

13. Ninfwanyelela nni okala attu olevelela?

¹³ Mbali obe murogora agokosela elobo yabure onorutxiwaga omulevelela? (Onam. 19:18) Akala pumwenemo kafwara nlago ntti: “Muvilelagane, mulevelelagane dila dhetene dhinthegelana nyuwo. Muthu-muthu amulevelele mukwaye n’ekalelo euleveleleni Nabuya.” (Kol. 3:13) Mudhidhi wotene onalevelelehu abali na arogora, ninomulagiha Babihu wa wirimu wi txibarene iyo ninotamaalela yobolo. Txini enfwanyelihu okosa wi nunuwihe omutamaalela wehu Mulugu sabwa ya nvaho wa yobolo?

14. Ninlagiha dhavi wi ninotamaalela yobolo?

¹⁴ Kamutamaalele Yehova sabwa ya yobolo. Murogora Joanna ona vyaka 83 dhobaliwa onkala elabo ya Índia ologile dhahi: “miyo ddinowubuwela ttima ena yobolo, nona siku na siku ddigalobelaga ddinologa sabwa ya yobolo.” Ogalobelaga kobuwela dhovonya dhikoseliwe valaboni, ogamala kamukumbirhe Yehova wi olevelele. Enoziweya wi, akala okosile yottega enddimuwa onofwanyela otamela nikamihedho na anddimuwa a mulogo. Awene anele wuvuruwana vina anele wukamihedha na malago okwela andela mu Nzuni na Mulugu. Awene anele olobela na weyo, amulobaga Yehova nlevelelo modhela mukutto wa yobolo, ‘dhahene panawodhe weyo ovulumuwa mpaddi w’omuyani’ vina wiyelela wili mandano awo na Mulugu.—Tia. 5:14-16.

15. Ninfwanyelela nni otamela mudhidhi wi nengese vina nitanaalele yobolo?

¹⁵ Katanalela sabwa ya yobolo. Murogora dhahi onkuweliwa Rajamani wa vyaka 73 dhobaliwa ologile dhahi: “Miyo ddigengesa sabwa ya matabuwo a Yezu, ddinoweddiwa ttagaraga ofiyedha omottiya mintori.” Weyo vina onowiwa opa vaddiddi ogatanaalela matabuwo otene avileli Yezu mpaka okwa. Venevo vantanalela weyo mukutto wa yobolo okosile Yezu, omukwela wawo iyene vina Babe onelege wunuwavi. Wi opurelemo makani aba a yobolo, kigakalile y’ofwanyeelela osunza makani aba va webedhani wa ntakulu?

16. Wasunziha attu ena sabwa ya yobolo ennikamihedha dhavi? (Kang’ana foto ya kapa.)

 ¹⁶ Wasunzihe attu ena sabwa ya yobolo. Mudhidhi onloga iyo na attu ena nawaddelaga ttima ya yobolo, otamalela wehu onelege wunuwavi. Iyo nihikana vipano dhamakamaka dhinfwanyeelihu olabihedha wi nasunzihena attu sabwa ya Yezu onilevela egumi yaye. Motagiha, enowodheya olabihedha nsunzo 4 nili brochura fgMiselu Dhapama Dha Mulugu! Nsunzo ntti nihikana mutoma onloga “Yezu Kristu Bani?” Enowodheya vina olabihedha kapitulu 5 ya nivuru Txini Ennisunziha Bibilia? Kapituluya ekana mutoma onloga “Yobolo—Nvaho Munddimuwa wa Mulugu.” Vyaka dhotene iyo ninowunuwiha otamalela wehu yobolo modhela odhowa omatugumanoni wa Wubuwela okwa wa Yezu vina wawobelawo attu ena wi avitaganyihe na iyo. Gari enddimuwa ennivaha Yehova ya wasunziha attu ena sabwa ya Mwanaye!

17. Yobolo okalele nni mvaho munddimuwa ovahile Mulugu nlogo na attu?

¹⁷ Kuli waganyedha, iyo nikana sabwa dhinji dhinnithukulela wunuwiha vina otamalela mukutto wa yobolo. Sabwa ya yobolo, iyo ninowodha okana mandano na Yehova, masiki nikalaga attu ohiligana. Sabwa ya yobolo, mabasa a Satana anele otolotxiwa kakamwe. (1 Jo. 3:8) Vina sabwa ya yobolo, efunelo ya Yehova na elabo ya vati enele wakwanihedheya. Elabo yotene enele okala paraizu. Attu otene anafwanye weyo anelege omukwela vina omulabela Yehova. Ekalaga dhawene, ninofwanyela okosa mpaka vanwodhelihu wi nonihe otamalela wehu yobolo oli—nvaho munddimuwa wavahile Mulugu nlogo na attu!