1-2. Tlanhnak man timi cu zeidah a si, zeicah mah cu kan herh?

MITLING a simi Adam nih sualnak a tuah tikah amah lawng si loin a tefa vialte zong zungzal nunnak hmuh ding tinvo sung kha an rak sung. Adam nih hramhram in sualnak a tuahmi a si caah silnalhnak nawl a ngei lo. Asinain a fale kong he aa tlaiin tah zeitin? Adam nih a tuahmi sualnak bantuk kha an tuah lo. (Rom 5:12, 14) Adam cu a tuahmi thil ruangah thih awkah aa tlak. Asinain Adam fale nih zungzal an nun khawh nakhnga Jehovah nih thil cheukhat a tuah kho maw? A tuah khawh. Adam nih sualnak a tuah hnu tlawmpal ah Jehovah nih Adam tefa nuai tampi nih sualnak le thihnak in an luat khawh nakhnga a rak timhtuah colh. (Gen. 3:15) Jehovah nih ri a khiahmi caan ah a Fapa kha ‘mi tampi tlanhnak ding ca i a nunnak pek’ awkah vancung in a rak thlah.—Mar. 10:45; Johan 6:51.

² Tlanhnak man timi cu zeidah a si? Khrihfa Greek Baibal ah tlanhnak man timi cu Adam nih a sunghmi kha Jesuh nih a man in a cawk ṭhanmi kha a si tiah a fianter. (1 Kor. 15:22) Zeicah tlanhnak man kan herh? Jehovah i a dingmi a phunglam ningin Nawlbia nih nunnak caah nunnak pek ding tiah a kan hal caah a si. (Ex. 21:23, 24) Adam nih a tlingmi minung a nunnak kha a rak sung. Pathian dinnak ruangah Jesuh nih a tlingmi minung a nunnak kha a rak pek. (Rom 5:17) Cuticun Jesuh cu tlanhnak man a zummi hna caah “Zungzal Hmunmi Pa” a hung si.—Isa. 9:6; Rom 3:23, 24.

3. Johan 14:31 le 15:13 ningin Jesuh nih a tlingmi minung a nunnak kha zeicah lungtho tein a rak pek?

³ Jesuh nih vancung a Pa le kanmah a kan dawt tuk caah lungtho tein a nunnak kha a rak pek. (Johan 14:31; 15:13 rel.) Mah dawtnak nih a dongh tiang zumhfek tein um awk le a Pa duhnak liim awkah biakhiahnak tuah dingin a rak forh.  Cutin a tuah caah Jesuh cu a thih tiang zumhfek tein a rak um kho. Cun minung le vawlei ca i Jehovah a hrampi aa tinhnak zong kha a tlinter lai. Hi capar ah Jehovah nih Jesuh kha a thih hlanah sifah harnak in dingin zeicah nawl a awnh timi kong kan i ruah hna lai. Cun tlanhnak man a sunsak tukmi Baibal ṭialtu pakhat kong zong kha a tawinak in kan i ruah hna lai. Mah lengah tlanhnak man caah kan i lawmhnak kha zeitindah kan langhter khawh timi kong le Jehovah le Jesuh nih kan caah an kan pekmi raithawinak kan sunsak kha zeitindah kan langhter khawh timi kong zong kan i ruah hna lai.

4. Jesuh a thih ning kha fianter.

⁴ Jesuh a thih lai ni ah a cangmi kong kha na mitthlam ah cuanter hmanh. Amah kilven awkah vancungmi tampi kha bawmhnak a hal khawh ko hna nain a rak hal hna lo. Mah canah Rom ralkap pawl nih an tuk i an tlaihmi kha a rak in. (Matt. 26:52-54; Johan 18:3; 19:1) Fung in an tuk caah a pum cu hma a pu. A hnuah amah thahnak ding thingtung kha an putter. Jesuh nih amah an thahnak ding hmun tiang put awkah a rak i zuam. Asinain tlawmpal ah Rom ralkap pawl nih a dang pa pakhat tu kha an rak putter ṭhan. (Matt. 27:32) An thahnak ding hmun an phanh tikah ralkap pawl nih tungcung ah a kut le a ke kha thir in an khenh chih. Tungcung i an thlai ruangah a pum rihnak nih a hma kha a fahter chin. A hawile cu an ngaih a chia tuk i a nu cu a ṭap nain Judah uktu pawl nih cun an rak nihsawh. (Luka 23:32-38; Johan 19:25) Jesuh cu suimilam tampi chung fahnak a rak ing. A lung le a cuap cu ṭha tein rian a ṭuan khawh lo caah thawchuah kha a rak i harh. Jesuh nih a thih hlanah zumhfek tein ka um ti kha a hngalh i Jehovah sinah hmanung bik thla a rak cam. Mah hnuah ah a lu kha a khun i a thi. (Mar. 15:37; Luka 23:46; Johan 10:17, 18; 19:30) Fahnak le ningzahnak tuar buin a rak thi.

5. Jesuh caah an thah ning nakin zeidah a poi deuhmi a si?

⁵ Jesuh nih a lungre a theih deuhmi cu an thah ning kha si loin an thahnak a ruang tu kha a si. Anih cu Pathian a upat lomi le a min zei ah a rel lomi mi pakhat in sual puh a si. (Matt. 26:64-66) Pathian a upat lomi in mi nih sual an puhmi ca tu ah a lungre a rak thei deuh i a Pa nih cu bantuk lam in ningzahnak ton awkah nawl a awnh lai lo tiah a rak i ruahchan. (Matt. 26:38, 39, 42) Jehovah nih a dawtmi a Fapa kha sifah harnak tonter dingin zeicah nawl a awnh? A ruang pathum in i ruah hna hmanh u sih.

6. Jesuh cu zeicah tungcung ah thlai a rak si?

⁶ Pakhatnak, Judah mi chiatserhnak in an luat khawh nakhnga Jesuh cu tungcung ah thlai a hau. (Gal. 3:10, 13) Annih nih Pathian Nawlbia cu an cohlan ko nain mah nawlbia tu cu an zul lo. Annih cu Adam tefa an si caah thih awkah an i tlak, cucaah mah chiatserhnak kha an in ve. (Rom 5:12) Israel mi hna sin Pathian pekmi Nawlbia ningin thih awk tlak sualnak a tuahmi, mi pakhat cu thah a si. Thil cheukhat ahcun a thih hnuah a pum cu tungcung ah thlai a si. * (Deut. 21:22, 23; 27:26) Jesuh cu tungcung i thlai a si caah Judah mi pawl cu chiatserhnak in an luat kho i Jesuh kha an hlawt ko nain Jesuh pekmi raithawinak nih a bawmh khawh hna.

7. Pathian nih a Fapa sihfah harnak innak nawl a awnnak a pahnihnak a ruang cu zeidah a si?

⁷ Pathian nih a Fapa sihfah harnak innak  nawl a awnnak a pahnihnak a ruang kha zohhmanh hna u sih. Hmailei i kan Tlangbawi Ngan caah Jehovah nih Jesuh kha a cawnpiakmi a si. Jesuh caah a fakmi hneksaknak in buin Pathian nawl ngaih cu zeitlukin dah a har lai. Hneknak tam pi a ton caah “aihramnak le mitthli he” Pathian sinah thla a rak cam. Lungretheihnak tampi a ton caah Jesuh nih kan herhmi kha a hngalhthiam i “tukforhnak le temh innak” kan ton tikah “a [kan] bawmh khawh.” Jehovah nih “kan santlaihlonak ah kan cung i zaangfahnak a ngei” khomi, zaangfahnak in a khatmi Tlangbawi Ngan a kan pek caah kan i lawm tuk.—Heb. 2:17, 18; 4:14-16; 5:7-10.

8. Pathian nih a Fapa sifah harnak innak nawl a awnnak a pathumnak a ruang cu zeidah a si?

⁸ Pathumnak, mah a biapimi biahalnak leh khawh awkah Jehovah nih Jesuh kha sifah harnak innak nawl a awnhmi a si: Minung nih hneksaknak tampi an ton buin Pathian cungah zumhfek tein an um kho lai maw? Satan nih an um kho lai lo tiah a ti. Satan nih thil cheukhat hmuh an duh caah Pathian an biakmi a si tiah a ti. Satan nih Adam bantukin midang zong nih Jehovah kha an daw ve lo tiah a zumh. (Job 1:9-11; 2:4, 5) Jehovah nih a Fapa cu zumhfek tein a um lai ti kha a zumh caah minung nih an inkhawhmi ri tiang hneksak awkah nawl a rak awnh. Jesuh cu zumhfek tein a rak um peng i Satan cu mi lihchim a si ti kha a rak langhter.

9. Lamkaltu Johan nih kan caah zei zohchunhawk dah a chiah?

⁹ Khrihfa tampi nih tlanhnak man kong an cawnpiak hnanak thawngin an zumhnak kha an fehter. Ralchanhnak an tong ko nain phung an chim peng i hneksaknak an tonmi kha an inkhawh. Lamkaltu Johan kong kha zoh hna hmanh u sih. Khrih le tlanhnak man kong biatak kha kum 60 leng hrawng zumhfek tein a cawnpiak hna. Kum 90 leng a si ko nain Rom uktu hna nih ṭih a nung tukmi in an hmuh i Patmos tikulh ah thong an rak thlak. Zei palhnak dah a tuah? ‘Pathian bia a chim ca le Jesuh nih a phuanmi biatak a phuan caah’ a si. (Biat. 1:9) Zumhnak le inkhawhnak ah Johan nih zohchunhawk ṭha taktak a rak chiah.

10. Johan nih tlanhnak man a sunhsak kha a ṭialmi Baibal nih zeitindah a langhter?

¹⁰ A ṭialmi Baibal ah Johan nih Jesuh a dawt tuknak kong le a pekmi raithawinak caah aa lawmh tuknak kong kha a rak langhter. Tlanhnak man kong asiloah tlanhnak man nih a chuahtermi thil ṭha kong kha voi 100 leng a rak langhter. Tahchunhnak ah, Johan nih hitin a ti: “Pakhatkhat nih sualnak nan tuah ahcun, a dingmi Jesuh Khrih, Pa sin i bia a kan chimpiaktu kha kan ngei ko.” (1 Johan 2:1, 2) Johan nih a hleiin “Jesuh nih a phuanmi biatak” i a biapitnak kong kha a rak ṭial. (Biat. 19:10) Johan nih tlanhnak man a sunsak tuk ti cu a fiang ko. Kannih zong tlanhnak man kan sunsak kha zeitindah kan langhter khawh?

11. Lemnak al awkah zeinihdah a kan bawmh khawh?

¹¹ Sualnak tuah dingin lem na si tikah al. Tlanhnak man kha kan sunsak taktak ahcun hi bantuk ruahnak kan ngei lai lo: ‘Lem ka si tikah sualnak tuah lo awkah i zuam a hau lo. Sualnak ka tuah hmanhah ngaihthiam ka hal ṭhan lai.’ Mah canah palhnak cheukhat tuah dingin lem kan si ahcun hitin kan chim lai: ‘Ka tuah lai lo. Ka caah Jehovah le Jesuh nih thil vialte an ka tuahpiak hnuah cu bantuk thil cu zeitindah ka tuah khawh lai?’ Mah lengah Jehovah sinah thazaang kan ngeih khawh  nakhnga hitin kan hal khawh: “Hneksaknak chungah kan phanhter hla.”—Matt. 6:13.

12. Kuatkhat Johan 3:16-18 ah kan hmuhmi ruahnak cheuhnak kha zeitindah kan zulh khawh?

¹² Unau pawl kha daw hna. Dawtnak kan langhter tikah tlanhnak man kan sunsak kan langhtermi zong a si. Zeicah? Jesuh nih a nunnak kha kanmah ca lawngah si loin kan unau pawl ca zongah a pek caah a si. Jesuh nih an caah lungtho tein a nunnak a pek caah a dawt tuk hna ti cu a fiang ko. (1 Johan 3:16-18 rel.) Kan unau pawl kan dawt hna kha kan pehtlaih hna ningin kan langhter awk a si. (Efe. 4:29, 31–5:2) Tahchunhnak ah, An zawt tikah asiloah leiser ral i telin hneksaknak an tonmi poah an inkhawh nakhnga kan bawmh hna. Asinain zumtukhat unau pawl nih kan thin an kan hunter tikah zeidah kan tuah awk a si?

13. Zeicah kan i ngaihthiam awk a si?

¹³ A caan ah unau pawl ngaihthiam kha naa harh maw? (Lev. 19:18) Naa harh ahcun mah ruahnak cheuhnak hi zul: “Pakhat le pakhat lungsi lonak nan i ngeih tikah pakhat le pakhat i ngaithiam u law i bawm u. Bawipa nih aan ngaihthiam hna bantukin pakhat le pakhat nan i ngaithiam lai.” (Kol. 3:13) Kan unau pawl kan ngaihthiam hna tik paohah vancung kan Pa sinah tlanhnak man kan sunsak taktak ti kha kan langhtermi a si. Pathian sinin kan hmuhmi mah laksawng kan sunsak taktak kha zeitindah kan langhter peng khawh?

14. Tlanhnak man sunsak chin khawhnak lam pakhat cu zeidah a si?

¹⁴ Tlanhnak man caah Jehovah kha lawm. India ah a ummi, kum 83 a simi unaunu Joanna nih hitin a ti: “Nifatin thla ka camnak ah tlanhnak man kong chim le mah caah Jehovah sinah lawmhnak bia chim cu a biapi tukmi a si tiah ka ruah.” Pumpak na thlacamnak ah nikhat chungah na tuahmi palhnak kong kha ruat law Jehovah sinah ngaihthiamnak hal. Asinain sualnak ngan na tuah sual ahcun Khrihfa upa pawl sinah bawmhnak na hal hna a hau lai. Annih nih na bia kha an ngaih lai i Baibal in dawtnak he ruahnak an in cheuh lai. Cun thla an in campiak lai i Jesuh raithawinak kha na sunsak peng nakhnga le “[thlarau lei] damnak” na hmuh nakhnga Jehovah sinah an hal lai.—Jeim 5:14-16.

15. Tlanhnak man kong rel awk le ṭha tein ruah awkah zeicah a caan kan pek awk a si?

 ¹⁵ Tlanhnak man kong kha ṭha tein ruat. Kum 73 a simi unaunu Rajamani nih “Jesuh nih sifah harnak a inmi kong ka rel tikah ka mitthli a ha” tiah a ti. Nang zong Pathian Fapa nih a tonmi sifah harnak kong na ruah tikah cutin na intuar ve men lai. Asinain Jesuh pekmi raithawinak kong kha tam deuh in na ruah ahcun amah le a Pa na dawt hnanak kha a fek chinchin lai. Tlanhnak man kong ṭha tein ruah awkah aan bawm khomi mah kong hna kha ṭha tein na hlathlai awk a si ko lo maw?

16. Midang sinah tlanhnak man kong kan cawnpiakmi hna nih zeitindah a kan ṭhathnemh khawh? (A phawh hmanthlak zoh.)

¹⁶ Tlanhnak man kong kha midang cawnpiak hna. Midang sinah tlanhnak man kong kan chim fatin tlanhnak man kha kan sunsak chinchin lai. Midang sinah kan caah Jesuh a thihnak kong cawnpiak awkah a ṭha tukmi cawnpiaknak hriamnam hna kan ngei. Tahchunhnak ah, Pathian Sinin A Rami Thawngṭha! timi brochure ṭhen 4nak kha na hman khawh. A biatlangpi cu “Jesuh Khrih Cu Ahodah A Si?” timi a si. Asiloah Baibal Nih Zeidah A Kan Cawnpiak? timi cauk ṭhen 5nak kha na hman khawh. A biatlangpi cu “Tlanhnak Man—Pathian Laksawng Ngan Bik” ti a si. Cun kum fatin tlanhnak man caah kan i lawmhnak kha Jesuh A Thih Philh Lonak Puai ah kan i pumhnak thawngin le mah pumhnak ah lungtho tein midang kan sawm hnanak thawngin kan langhter khawh. Jehovah nih midang sinah a Fapa kong cawnpiak dingin rian a kan pekmi cu zeitluk tinvo sung dah a si.

17. Tlanhnak man cu zeicah Pathian nih a kan pekmi laksawng ngan bik a si?

¹⁷ Tlanhnak man sunsaknak peng awk le sunsak chinchin awkah a ruang ṭha kan ngei ti cu lunghrin awk a um lo. Tlanhnak man thawngin mitling lo kan si ko nain Jehovah he hawikom kan si kho. Tlanhnak man thawngin Khuachia rianṭuannak kha tling tein hrawh a si lai. (1 Johan 3:8) Tlanhnak man thawngin vawlei caah Jehovah i a hmasa aa tinhnak cu a tling lai. Mah tikah vawleicung pumpi cu paradis ah a cang lai. Mi kip cu Jehovah a dawmi le amah a biami an si lai. Cucaah nifatin Jehovah nih minung a kan pekmi laksawng ngan bik a simi tlanhnak man kan sunsaknak langhter khawh ning lam hna kha kawl hna u sih.