1-2. Saide wan sama be mu dede gi u?

DI ADAN sondu, a lasi a gaandi di a be abi fu libi fu teego. A sondu fu Adan doo den bakapikin fi en, neen meke denseefi lasi a gaandi fu libi fu teego. Adan be sabi san ai du di a taangayesi Yehofa. A fu seefi sani a du, neen meke Yehofa á be poi gi en paadon. Ma san o pasa anga den bakapikin fu Adan, bika den á be abi wan ana aini a sondu fi en (Rom. 5:12, 14). A sitaafu fu a sani di Adan du a dede. Ma san Yehofa be o du gi den bakapikin fu Adan? A á langa baka di Adan sondu, neen Yehofa taki san a o du fu fii den bakapikin fi en (Gen. 3:15). Yehofa be o sende en Manpikin kon a goontapu ‘fu gi en libi enke wan paiman fu fii omen sama’.​—Malik. 10:45; Yoh. 6:51.

² Yesesi kon dede fu fii u fu sondu (1 Kor. 15:22). Saide Yesesi be mu dede gi u? A Weiti di Yehofa be gi den Islayelisama be e taki efu wan sama kii wan taawan, den be mu kii en baka (Ek. 21:23, 24). Di Adan sondu, a lasi a libi di Gadu be gi en. Neen meke a wan taa sama di á be abi sondu be abi fu dede fu fii u. A sama ya, a Yesesi (Rom. 5:17). A so Yesesi toon a ‘Teego Papa’ fu ala sama di e biibi.​—Yes. 9:6; Rom. 3:23, 24.

3. Enke fa Yohanisi 14:31 anga 15:13 e soi, da saide Yesesi be de kabakaba fu dede gi u?

³ A fu di Yesesi lobi Yehofa anga libisama meke a be de kabakaba fu kon dede gi u. (Leisi Yohanisi 14:31; 15:13.) Na a sani ya meke a dini Yehofa anga en hii ati te  enke a dede tu. Na a dede di Yesesi kon dede gi u, meke Yehofa poi du ala den sani di a be abi a pakisei di a meke libisama. Aini a artikel ya, wi o luku saide Gadu fika Yesesi fu pina fosi a dede. Wi o luku a toli fu wan Beibel sikiifiman tu di be soi taki ai teke a sani di Yehofa du gi u fu bigi. Baka dati wi o luku fa u sa soi taki wi e teke a sani di Yehofa anga Yesesi du gi u fu bigi.

4. Fa Yesesi dede?

⁴ Pakisei fa sani waka a dei di den kii Yesesi. Winsi fa a be sa akisi en Dda fu meke den miliyunmiliyun engel fi en kon feti gi en, toku a á du a sani ya. A meke den suudati fu Rome kisi en tyai go fon (Mat. 26:52-54; Yoh. 18:3; 19:1). Den wipi en te ala en mindiibaka e lon buulu. Baka dati, den gi en wan gaan ibi ponsu fu sow winsi fa ala en baka be de anga soo. Di Yesesi á be poi sow a ponsu moo, neen den suudati fu Rome meke wan taa sama tyai a ponsu fi en go doo (Mat. 27:32). Di den doo pe den be o kii Yesesi, den sipikii en ana anga en futu na a ponsu. Pakisei a pen di Yesesi be e fii di den opo a ponsu ya taampu. Den mati fi en di de ape e tyali, en mma e kee. Ma den Dyu fesiman di taampu e luku, e soso en (Luk. 23:32-38; Yoh. 19:25). A omen yuu langa Yesesi teke a pen ya. O moo a dei e gwe, o moo en sikin e swaki. En ati nai naki taanga moo, boo seefi e taanga gi en fu hali. Ma a be sabi taki a du sani pilisisi enke fa en Dda be wani. Neen meke fosi a dede, a taki anga en Dda wan lasiti leisi. Di a kaba begi, a bendi en ede, neen en boo koti (Malik. 15:37; Luk. 23:46; Yoh. 10:17, 18; 19:30). A wan hati dede Yesesi dede, ná pikin pen a fii fosi en boo koti.

5. San be hati Yesesi moo a fasi fa den be kii en?

⁵ A wan ogii-ati fasi den kii Yesesi, ma a sani di be moo du en ogii, a di den lei gi en taki a Gadu a kosi meke den kii en (Mat. 26:64-66). A sani ya be du Yesesi ogii te neen a begi en Dda efu a be sa puu a tesi ya gi en (Mat. 26:38, 39, 42). Saide Yehofa fika en Manpikin fu pina fosi a dede? Wi o luku dii sani di meke a du a sani ya.

6. Saide Yesesi be mu dede a wan ponsu?

⁶ A fosiwan, a taki Yesesi be mu dede a wan ponsu fu puu a fuuku di be de a den Dyu tapu (Gal. 3:10, 13). Den Dyu be sweli taki den be o du san a Weiti fu Gadu taki. Ma den á be du san den be paamisi, neen meke fuuku be kon a den tapu (Rom. 5:12). A Weiti di Gadu be gi den Islayelisama be e soi taki den be mu kii wan sama di be du wan gaan sondu. Baka dati den be e fasi a dedesikin fu son wan fu den sama ya a wan ponsu * (Deit. 21:22, 23; 27:26). A dede di Yesesi dede a wan ponsu be puu a fuuku ya a den Dyu tapu. A so denseefi be sa fende wini fu a dede fi en.

7. San a du fu tu sani di meke Yehofa fika en Manpikin fu pina fosi a dede?

⁷ Du fu tu sani, a taki Yehofa be e seeka Yesesi gi a wooko di a be o gi en enke Gaan pilisite. Yesesi be fii fa a tan fu holidoo te tesi e miti i. Son leisi sani be e moo Yesesi te da a ‘be e bali kee te a be e  begi Gadu’. Fu di Yesesi seefi sabi fa a tan te tesi e miti wan sama, meke ‘a poi yeepi u te tesi e miti u’. Ná pikin bigi ai bigi gi u taki Yehofa gi u ‘wan Gaan pilisite di e fusutan u’.​—Heb. 2:17, 18; 4:14-16; 5:7-10.

8. San a du fu dii sani di meke Yehofa fika Yesesi fu pina fosi a dede?

⁸ Du fu dii, Yehofa fika en Manpikin fu pina fu soi taki libisama poi tan dini Gadu winsi tesi e miti den. Saatan taki a te libisama e fende wini namo den e dini Yehofa. A taki leti enke Adan, nawan sama e dini Yehofa fu di den lobi en tuutuu (Yopu 1:9-11; 2:4, 5). Yehofa be e biibi taki noiti en Manpikin be o gwe fika en, winsi san be e miti en. Neen meke a fika Saatan anga libisama fu tesi Yesesi. Di Yesesi holidoo, a soi kiin taki Saatan a wan leiman.

9. Saide u sa waka a apostel Yohanisi baka?

⁹ A omen Kelesten biibi e taanga te den pakisei san Yehofa anga Yesesi du gi u. A sani ya e yeepi den fu tan peleiki winsi san e miti den. Winsi gaandi kon a sikin seefi toku den e tan peleiki. Luku a toli fu apostel Yohanisi. A moo enke 60 yali langa Yohanisi be e leli sama sani fu Yesesi anga a dede di a be kon dede gi u. Di a pasa 90 yali, den tiiman fu Rome be poti en a sitaafu na a tabiki den e kai Patmos, ‘fu di a be e taki fu Gadu anga Yesesi’ (Openb. 1:9). Ala u mu meke moiti fu waka a apostel Yohanisi baka.

10. Fa den Beibel buku di Yohanisi sikiifi e soi taki a be e teke a dede di Yesesi kon dede gi u fu bigi?

¹⁰ Den Beibel buku di apostel Yohanisi sikiifi e soi kiin taki a be lobi Yesesi. A be e soi tu taki a be e bigi gi en taki Yehofa sende en Manpikin kon dede gi u. A moo enke 100 leisi Yohanisi taki fu a dede di Yesesi kon dede gi u, anga den wini di wi e fende fu a sani ya. Yohanisi sikiifi taki: ‘Efu wan fu u du wan ogii, da wi abi wan yeepiman na a Dda. A sama de a Yesesi Kelestesi, di e du sani a wan letifasi’ (1 Yoh. 2:1, 2). Den biifi fu Yohanisi e soi tu taki a pelensipali fu e ‘taki fu Yesesi’ (Openb. 19:10). Yohanisi be soi kiin taki a dede di Yesesi kon dede gi u, e bigi gi en. Fa i sa soi taki a sani ya e bigi gi i tu?

11. San o yeepi u te wi e fii fu du sani di á bun?

¹¹ Meke moiti fi yu á sondu. Efi yu e teke a sani di Yehofa anga Yesesi du gi u fu bigi, i ná o denki taki: ‘A ná abi toobi efu mi du wan sondu, bika mi sa akisi Yehofa paadon bakaten.’ Ma te i fii fu du wan sani di Yehofa á lobi, yu o taki: ‘Mi ná o du a sani de, bika Yehofa anga Yesesi pai dii gi mi.’ Te u fii fu du wan sani di á bun u sa begi Yehofa taki: ‘Gaantangi baa, yeepi mi fu mi á sondu.’​—Mat. 6:13.

12. Fa u sa wooko anga a sani di sikiifi a 1 Yohanisi 3:16-18?

¹² I mu lobi den baala anga sisa fi i. Te u lobi den baala anga sisa fu u, da wi e soi taki wi e teke a dede di Yesesi kon dede gi u fu bigi. Saide u sa taki a sani ya? Bika a ná u wawan Yesesi dede gi, a dede gi den baala anga sisa fu u tu. A sani ya e soi taki denseefi pelensipali gi Yehofa anga Yesesi. (Leisi 1 Yohanisi 3:16-18.) Na a fasi fa wi e libi anga den baala anga sisa fu wi o soi efu u lobi den tuutuu (Efe. 4:29, 31–5:2). U mu e du ala san u  poi fu yeepi den te den siki, te tesi e miti den, efuso te wan gaan ogii pasa na a pisi pe den e tan. Ma san yu o du te wan baala efuso sisa taki efuso du wan hati sani anga i?

13. Saide u mu e gi taawan paadon?

¹³ Yu e holi i baala efuso sisa na ati? (Lef. 19:18) Efu ai taanga gi i fu gi i baala anga sisa paadon, da meke moiti fu du a sani di sikiifi a Kolosesama 3:13. Ai taki: ‘U mu abi boo anga taawan. U mu e gi taawan paadon anga u hii ati te den du wan hati sani anga u. Leti enke fa Yehofa e gi u paadon anga en hii ati, a so useefi mu gi taawan paadon tu.’ Te wi e gi u baala anga sisa paadon, wi e soi taki wi e teke en fu bigi taki Yehofa sende en Manpikin kon dede gi u. San o yeepi u fu moo teke a sani di Yehofa anga Yesesi du gi u fu bigi?

14. Fa u sa soi taki wi e teke a sani di Yehofa anga Yesesi du gi u fu bigi?

¹⁴ I mu e gi Yehofa daa fu di a meke en Manpikin kon dede gi u. Joanna, wan sisa di abi 83 yali di e tan a Indiya taki: ‘Ala dei te mi e begi, mi e gi Yehofa daa fu a gaan bun di a du gi mi.’ Ala dei te yu begi, taigi Yehofa pilisisi sowtu fowtu i meke a dei de, da yu akisi en fu a gi i paadon. Ma efu a wan gaan sondu i du, a ná begi namo i mu begi, i mu go taki anga den owluman tu. Den o aliki yu anga pasensi, den o gi i taanga-sikin anga den sani di sikiifi aini Beibel. Den o begi anga i tu. Den o akisi Yehofa fu gi i paadon fi yu anga en sa kon bun baka.​—Yak. 5:14-16.

15. Saide u mu e teke ten pakisei a sani di Yehofa anga Yesesi du gi u?

¹⁵ Teke ten pakisei a sani di Yehofa anga Yesesi du gi u. Rajamani, wan sisa di abi 73 yali taki: ‘Ala mi ain e fuu anga wataa te mi e leisi ala den sani di miti Yesesi fosi a dede.’ Kande iseefi ain e fuu anga wataa te i denki fa Yesesi pina fosi a dede. O moo yu e teke ten pakisei a sani di Yesesi du gi u, o moo yu o lobi en anga en Dda. Kande i sa poti wan dei fu sutudeli a toli ya moo fini. I sa taki fi en na a osufamii anbegi tu.

16. Sowtu wini wi e fende te wi e taigi taawan san Yehofa anga Yesesi du gi u? (Luku a fowtow a fesise fu A Wakititolen.)

¹⁶ Taigi taawan san Yehofa anga Yesesi  du gi u. Ala yuu te wi e taigi taawan san Yehofa anga Yesesi du gi u, wi e moo teke a sani ya fu bigi. A omen buku, bolosilo, talakitaati, anga felon wi abi di e yeepi u fu soi sama saide Yesesi kon dede gi u. Te wi e taki anga den, u sa soi den pisi 4 fu a Bun nyunsu! bolosilo. A nen fu a pisi ya na ‘Sama a Yesesi Kelestesi?’ I sa soi den kapitel 5 fu a San Beibel kan leri wi? buku tu. A nen fu a kapitel ya na ‘A lusu-paiman na a moro bigi kado di Gado gi wi’. Ala yali te wi e kai sama kon na a Membeefesa, u biibi e moo taanga. A Membeefesa e yeepi u fu moo teke a sani di Yehofa anga Yesesi du gi u fu bigi. A wan gaandi Yehofa gi u fu taigi taawan san en Manpikin du gi u.

17. Saide a dede di Yehofa meke Yesesi kon dede gi u na a moo gaan kado di a gi libisama?

¹⁷ A omen wini u sa fende fu a sani di Yehofa anga Yesesi du gi u. Fu di Yesesi kon dede gi u meke wi anga Yehofa poi toon mati winsi fa wi abi sondu. Na a dede fu Yesesi meke dyonson Saatan ná o poi du ogii anga sama moo (1 Yoh. 3:8). Na a dede fu Yesesi meke Yehofa o poi du ala san a be abi a pakisei di a be meke libisama na a bigin. A hii goontapu o toon wan paladeisi. Ala sama a goontapu o lobi Yehofa, den o dini en anga den hii ati. A sani di Yehofa du gi u ya, na a moo gaan kado di wan sama be sa gi u. Neen meke na ala dei u mu e suku fasi fu soi en taki wi e teke a sani ya fu bigi.