1-2. Ka ki laranson é poukwa sa té nésésè ?

LÈ ADAN péché i té pawfè. Sè-y ki chwazi péché, kifè i pèd lavi étèwnèl é i fè désandan a-y pèd vi-lasa osi. É poutan yo pa té ni ayen a vwè adan sa (Wom. 5:12, 14). Ès Jéova té pé fè on biten pou sové-yo ? Wi ! Sé pousa, piti-a-piti, Jéova montré kijan i ké woté onlo désandan a Adan anba jouk a péché-la é anba jouk a lanmò (Jén. 3:15). Lè moman-la rivé, Jéova voyé Gason a-y pou i « ba-y vi a-y an ranson pou libéré onlo moun » (Mawk 10:45 ; Jan 6:51).

² Ka ki laranson ? Adan Lézékriti grèk, lè yo ka palé dè ranson-la sé pou palé dè pri-la Jézi péyé la pou achté sa Adan pèd (1 Kor. 15:22). Poukwa nou bizwen ranson-la ? Konm Jéova sé on Bondyé ki jis, Lwa-la i té ba-y la té jis osi. Lwa-la té ka di : « Fò ou ké bay on vi pou on vi » (Ègz. 21:23, 24). Kifè, konm Adan té pèd vi pawfé la i té ni la, fò Jézi té sakrifyé vi pawfé la i té ni la pou fè sa Lwa a Bondyé té ka mandé (Wom. 5:17). Lè i fè sa, i vin on « Papa étèwnèl » pou toutmoun ki ka montré kè yo ni fwa an ranson-la (Iz. 9:6 ; Wom. 3:23, 24).

3. Dapré Jan 14:31 é 15:13, poukwa Jézi té dakò pou sakrifyé vi a-y ?

³ Jézi té dakò pou bay vi a-y pas i té enmé Pap’a-y onlo é pas i té enmé-nou osi (li Jan 14:31 ; 15:13). Tèlman i té enmé Pap’a-y é tèlman i té enmé-nou, i té byen désidé a rété fidèl a san pou san é a fè volonté a Pap’a-y. É Jézi fè sa joustan i mò. Kifè, sa Bondyé té prévwa odépa pou limanité ké réyalizé. Adan awtik-lasa, nou ké vwè poukwa  Jéova lésé Jézi soufè onlo konsa. Nou ké vwè osi kijan on moun ki maké déotwa liv adan Bib-la montré kè i té ni rèkonésans pou ranson-la. É pou fin, nou ké vwè kijan nou pé montré rèkonésans an nou pou ranson-la é ka nou pé fè pou nou ni plis rèkonésans pou sakrifis-la Jéova é Jézi fè ban nou la.

4. Rakonté kijan Jézi mò.

⁴ An-nou pran tan imajiné sa Jézi viv jou-la i té k’ay mò la. I té’é pé mandé on lawmé zanj vin a sèkou a-y men a pa sa i fè (Mat. 26:52-54 ; Jan 18:3 ; 19:1). I lésé sé sòlda women la tchenbé-y é ba-y bon kou. É a pa èvè nenpòt ki biten yo sèvi, yo sèvi èvè on fwèt ki chiré tout kò a-y. Aprésa, magré do a-y té ja chiré yo ba-y pòté on poto ki té lou toubònman. É sé asi poto-lasa, yo té k’ay pann-li. I koumansé trenné poto-la men konm i pa té ni asé fòs, yo mandé on boug pòté poto-la anplas a-y (Mat. 27:32). Lè yo rivé la yo té k’ay tchouyé Jézi, yo kloué men a-y é pyé a-y asi poto-la. Lè yo mèt poto-la doubout, nou ka tou konprann kijan sé klou-la té ka chiré men a-y é pyé a-y akòz dè pwa a kò a-y. Zanmi a Jézi é manman-y té ka pléré men sé chèf juif-la té ka fè jé èvè tèt a-y (Lik 23:32-38 ; Jan 19:25). Soufrans a-y pa té ka fin menm. Pi tan-la té ka pasé é pi i té ni dimal a rèspiré pas tchè a-y é poumon a-y té ka fòsé. Jézi té sav i rété fidèl, é avan i mò, i priyé Pap’a-y on dènyé fwa, i bésé tèt a-y é i rann souf a-y (Mawk 15:37 ; Lik 23:46 ; Jan 10:17, 18 ; 19:30). Aaa sèlman, Jézi soufè bon soufè la pas i pa mò tousuit é jan-la i mò la sé té on honté !

5. Pou Jézi, ni on biten ki té pi rèd ki jan-la yo té k’ay tchouyé-y la. Ki biten ésa ?

⁵ A pa jan-la yo té k’ay tchouyé-y la ki té pi rèd pou Jézi men sa ki té ka fè-y pi lapenn la sé kè yo manti asi-y. Yo di konsa kè i té ka dérèspèkté Bondyé (Mat. 26:64-66). Lè i ta ka sonjé sa, sa té ka pran tèt a-y toubònman ! Kifè, i té ka èspéré kè Pap’a-y té’é fè on biten pou anpéché-y pasé pa la (Mat. 26:38, 39, 42). Poukwa Jéova lésé gason-la i té pi enmé la soufè konsa é poukwa i lésé-yo tchouyé-y ? An-nou vwè 3 rézon.

6. Poukwa fò-yo té kloué Jézi asi on poto ?

⁶ Prèmyèwman, fò-yo té kloué Jézi asi on poto pou libéré sé Juif-la pas Bondyé té modi-yo (Gal. 3:10, 13). Yo pwomèt kè yo té’é suiv Lwa a Bondyé men yo pa fè-y. Kifè, yo té mérité mò pas yo té désandan a Adan, men anplisdisa, yo té mérité sa pas Bondyé té modi-yo (Wom. 5:12). Lwa-la Jéova té ba Izrayèl la té ka di kè si on nonm té fè on péché, i té mérité lanmò é fò-yo té tchouyé-y. É défwa, yo té ka pann kò a-y asi on poto * (Dét. 21:22, 23 ; 27:26). Menmsi sé Juif-la té tchouyé Jézi asi on poto, Jézi fè ansòt pou sakrifis a-y pòté bon biten pou yo.

7. Pou ki dòt rézon, Jéova lésé Gason a-y soufè konsa ?

⁷ Dézyèmman, Jéova lésé Gason a-y soufè pou fòwmé-y pas sé-y i chwazi pou vin Gran Prèt. Jézi viv on éprèv ki té rèd toubònman é sa montré-y sa on moun pé viv lè i anba on gwo éprèv. Tèlman sa té rèd pou-y, i hélé é i pléré gwo-dlo pou mandé Pap’a-y édé-y. Jézi myé plasé pou konprann-nou é i kapab édé-nou lè nou  anba éprèv. A pa ti kontan nou kontan kè sé li Jéova chwazi konm Gran Prèt pas sé on gran prèt ki plen mizérikòd é ki « kapab konprann féblès an nou » ! (Ébr. 2:17, 18 ; 4:14-16 ; 5:7-10).

8. Pou ki dòt rézon ankò Jéova lésé Gason a-y soufè konsa ?

⁸ Twazyèmman, Jéova lésé Gason a-y soufè konsa pou réponn Satan. Satan di konsa kè ponmoun pé’é rété fidèl a Jéova si i anba éprèv é si i pa ni on entéré adan sa. Sé konsi i ka di : « Dapré zòt zò enmé Jéova men sé pawòl an bouch ! Zò kon pap’a-zòt Adan ! » (Jòb 1:9-11 ; 2:4, 5). Konm Jéova té sav kè Jézi té’é rété fidèl, i lésé-y jwenn onlo éprèv. É pa té ni pi gwo éprèv ki sa i viv la ! Jézi montré kè Satan sé té on mantè, pas i rété fidèl a san pou san.

9. Ki ègzanp lapòt Jan ban-nou ?

⁹ Onlo krétyen té ni fwa adan ranson-la é sa rann fwa a yo pi fò. Kifè, kèlkèswa éprèv yo jwenn adan vi a yo, yo andiré é yo kontinyé préché. An-nou palé dè ègzanp a lapòt Jan. Sa té ja ka fè plis ki 60 an i té ka préché, lèwgadé, sé Women-la mété-y lajòl asi lilèt a Patmòs. I té ni 100 an apépré. Pou yo, i té danjéré toubònman ! Men ka i té fè konsa ? ‘I palé dè Bondyé é i bay on témwanyaj asi Jézi’ (Rév. 1:9). Jan té ni onlo fwa é onlo andirans. Sé on bèl ègzanp pou nou toubònman !

10. Kijan sé liv-la Jan maké la ka montré kè i té ni onlo rèkonésans pou ranson-la ?

¹⁰ Adan sé liv-la i maké la, Jan ka montré kijan i enmé Jézi é kijan i ni onlo rèkonésans pou sakrifis-la Jézi fè la. I ka palé dè ranson-la é dè sé byenfé-la ranson-la ka pòté ban nou la plis ki 100 fwa. Pa ègzanp, mi sa i di: « Si on moun ka vin fè on péché, nou ni on moun pou édé-nou owa Papa-la, Jézikri, on moun ki jis » (1 Jan 2:1, 2). Nou ka tou konprann kijan sa té enpòwtan pou Jan dè palé dè Jézi (Rév. 19:10). Sa ka montré vréman kè i té ni onlo rèkonésans pou ranson-la. É nou aprézan, kijan nou pé imité-y ?

11. Ka ki pé édé-nou pou péché-la pa pran lanmen asi nou ?

¹¹ Fò pa nou lésé péché-la pran lanmen asi nou. Si nou ka aprésyé ranson-la vréman, nou pé’é di konsa : « An pé fè ti péché an mwen, aprésa, an ké mandé Jéova padon é i ké padoné-mwen. » Men olyé dè sa, nou ké di : « Apré tousa Jéova é Jézi ja fè pou mwen, kijan an pé fè on biten konsa ? » Anplisdisa, nou pé mandé Jéova fòs-la nou bizwen la. Pousa, nou ké priyé-y é nou ké di-y : ‘Pa fè-mwen antré an tantasyon’ (Mat. 6:13).

12. Kijan nou pé suiv konsèy-la nou ka touvé an 1 Jan 3:16-18 ?

¹² Fò nou enmé frè é sè an nou. Lè nou ka montré frè é sè an nou kè nou enmé-yo, sa ka montré kè nou ni rèkonésans pou ranson-la. Poukwa nou ka di sa ? Pas Jézi pa bay vi a-y yenki pou nou men pou tout frè é sè an nou osi. Sa ka montré kè i enmé-yo toubònman (li 1 Jan 3:16-18). Lè nou ka aji byen èvè frè é sè an nou, nou ka montré-yo jan nou enmé-yo (Éféz. 4:29, 31 – 5:2). Pa ègzanp, nou ka édé-yo lè yo malad, lè yo ka jwenn éprèv kon tranmanndtè oben  siklòn. Men, é lè on frè oben on sè ka di-nou oben ka fè-nou on biten ki ka malpasé-nou, ka pou nou fè ?

13. Poukwa fò-nou padoné frè é sè an nou ?

¹³ Dépawfwa, ès ou ni dimal a padoné frè é sè a-w an lasanblé-la ? (Lév. 19:18). Si sé sa, fè tousa ou pé pou mèt konsèy-lasa an pratik : « Menmsi on moun ni on rézon dè plenn-li dè ondòt moun, fò yonn kontinyé sipòté lòt é fò yonn kontinyé padoné lòt volontyé. Menmjan Jéova padoné-zòt volontyé, sé konsa fò zò padoné-zòt osi » (Kol. 3:13). Chakfwa ou ka padoné on frè oben on sè an lasanblé-la, ou ka montré Jéova kè ou ka ba ranson-la onlo valè. Men ka nou pé fè pou montré kè nou ni plis rèkonésans pou bèl kado-la Jéova fè-nou la ?

14. Ka nou pé fè pou nou ni plis rèkonésans pou ranson-la ?

¹⁴ Fò nou di Jéova mèsi pou ranson-la. Joanna, sé on sè ki ni 83 an é ki ka viv an End. Mi sa i ka di : « Chakjou, lè an ka priyé, an ka palé Jéova dè ranson-la é an ka di-y mèsi pou sa. Pou mwen, sa enpòwtan toubònman. » Lè ou ka priyé Jéova, di-y tout mové biten ou fè an jouné-la é mandé-y padon. Men si ou fè on péché ki grav, mandé sé ansyen-la édé-w. Yo ké kouté-w é yo ké sèvi èvè Pawòl a Bondyé pou ba-w dè bon ti konsèy ki plen lanmou. Yo ké priyé èvè-w é yo ké mandé Jéova padoné-w. Konsa, ou ké pé wouvin bon bon zanmi èvè-y (Jak 5:14-16).

15. Fò-nou étidyé é fò-nou pran tan réfléchi asi ranson-la. Poukwa sa enpòwtan ?

¹⁵ Fò nou pran tan réfléchi asi ranson-la. Mi sa Rajamani, on sè ki ni 73 an ka di :« Lè an ka li istwa a Jézi é kè an ka vwè jan i soufè, dlo ka sòti an zyé an mwen. » Vou osi, sa dwèt ka fè-w lapenn lè ou ka sonjé jan Gason a Bondyé soufè bon soufè la. Men pi ou ké pran tan réfléchi asi sakrifis a Jézi é pi ou ké enmé Jézi é Pap’a-y fò. Sa té’é byen si ou té ka étidyé sijé-lasa adan étid pèwsonèl a-w oben adan étid familyal a-w. Konsa, sa ké édé-w pran tan réfléchi asi ranson-la.

16. Lè nou ka anségné sé moun-la pou yo konprann ka ki laranson, kijan sa ka édé-nou ? (gadé imaj-la ki anlè po a jounal-la).

¹⁶ Fò nou fè lézòt konnèt ka ki laranson.  Pi nou ké palé èvè lézòt dè ranson-la é pi nou ké ni rèkonésans pou bèl kado-lasa. Nou ni onlo bèl vidéo é nou ni onlo bèl piblikasyon ki ka édé-nou anségné sé moun-la é montré-yo poukwa fò Jézi té mò pou nou. Pa ègzanp, nou ni bwochi-la Bondyé ni bon nouvèl pou nou ! É nou pé sèvi èvè lèson 4 la, tit a-y sé : « Jézikri, kimoun i yé ? ». Nou ni osi liv-la Ka Labib ka aprann-nou ? é nou pé sèvi èvè chapit 5 la, tit a-y sé : « Ranson-la : pli bèl kado Bondyé fè-nou ». Chak lanné, lè nou ka vin an Mémoryal-la é lè nou ka envité dòt moun vin èvè nou, sa ka édé-nou ni plis rèkonésans pou ranson-la. A pa ti kontan nou kontan kè Jéova ka pèwmèt-nou palé dè Gason a-y ! Sé on lonnè pou nou !

17. Poukwa nou pé di kè ranson-la sé pi bèl kado Jéova fè-nou ?

¹⁷ Sa enpòwtan toubònman kè nou kontinyé aprésyé ranson-la é kè nou fè tousa nou pé pou nou ni plis rèkonésans pou-y. Adan awtik-lasa, nou vwè plizyè rézon ki ka ankourajé-nou fè sa. Dépi konnyéla, nou pé vin bon bon zanmi èvè Jéova menmsi nou enpawfè. Talè, Bondyé ké détwi travay a Dyab-la (1 Jan 3:8). I ké fè sa i té ni lentansyon fè dépi odépa. I ké fè latè wouvin on paradi é toutmoun ki ké viv anlè-y ké enmé-y é ké sèvi-y. É si tout sé biten-lasa posib, sé grasa ranson-la. Alò, an-nou fè tousa nou pé pou montré Jéova kè nou ka aprésyé ranson-la, pas sé pi bèl kado-la i fè nou la !