1, 2. ¿Ni kökanintari ño aune ñobätä nita ribere jai?

ADÁN töi nämäne metre akwa ja mikani ngite kwe. Ye köböite niara aune monsoitre kwe ñan namanina nüne kärekäre. Kukwe ñan namani Adán ie mikakäre jabiti, ñobätä ñan aune kukwe nämäne gare ie yebiti ta ja mikani ngite kwe. Yebätä niara krütadre. ¿Akwa Adán monsoitre yebätä dre nie raba? Niaratre ñan ja mikani ngite Adanbe (Rom. 5:12, 14). ¿Akwa Adán monsoitre ye mika raba kwäre? Jän. Adán ja mikani ngite ye bätäräbe Jehovakwe dre nuaindi nitre kwati ye kökatarikäre ngite aune gata yebätä mikani gare kwe (Gén. 3:15). Jehovakwe ja töi mikani kä debe näre te Jesús juen “ja mike müre ketadre ni kwati kökatarikäre” (Mar. 10:45; Juan 6:50, 51).

² ¿Ni kökanintari ño? Dre nianinte Adán kän ye ütiä biani Jesukwe ye erere ni kökanintari mikata gare Bibliabätä (1 Cor. 15:22). ¿Ni kökadretari ye ñobätä nita ribere jai? Kukwe biani Jehovakwe tä niere erere, nire nämäne ni mada murie kete rabadre ja nire kwe bien ütiäre (Éx. 21:23, 24). Ja nire metre nianinte Adán kän, meden aisete Jesukwe ja nire metre kwe yebiti ütiä biani (Rom. 5:17). Ye medenbätä, Jesukwe ja nire biani ye köböire nire nire tä tödeke ni kökanintari yei, ye kräke niara namani ni Rün kärekäre erere (Is. 9:6; Rom. 3:23, 24, TNM).

3. Juan 14:31 aune 15:13 tä niere erere, ¿ñobätä Jesús namani juto biare ja nire biankäre ni ütiäre?

³ Jesús tä Jehová tarere aune ni tarere yebätä namani juto biare ja nire biankäre ni ütiäre (Ñäkädre Juan 14:31; 15:13 yebätä). * Ye käkwe dimikani Jehová töi nuainne aune ja  ngwen metre Jehovai nememe murie ketadre ye näire. Ye köböire, Jehová töi nämäne ño ni aune kä tibien kräke rabai bare. Kukwe ja tötikara nekänti kukwe ketamä rabai gare nie. Kena, ñobätä Jehovakwe Jesús tuanimetre ja tare nike krubäte. Ketebukäre, ni Biblia tikaka iti nämäne debe bien krubäte ni kökanintari yei, yebätä blitai. Aune mrä, ni kökanintari ye kukwe ütiäte krubäte nuainbare Jehová aune Jesukwe ni kräke, yebätä nita debe bien aune nita mike ütiäte jai ye ni raba bämike ño ye rabai gare nie kukwe ja tötikara nekänti arato.

4. ¿Jesús murie ketani ño? Mä raba mike gare.

⁴ Jesús murie ketadre ye känenkri ja tuani kwe kukwe ño ben ye ani bämike ja töite. Raba ja di kärere angeletre kwati ie, akwa ja tuanimetre kwe kain ngite aune metakäre krubäte nitre rükä romano ie (Mat. 26:52-54; Juan 18:3; 19:1). Kwata metani kö ribi aune grine yebiti, ye namani niara ngätä denkä. Biti mikani kri doboko ye ngwen kötärä trö träine yebiti ta, nememe metadre kribätä yekänti. Ye bitikäre, nitre rükä romano käkwe ni iti mikani ja dibiti kri ye ngwen kötärä mada (Mat. 27:32, TNM). Namanina kä yekänti ngwane, nitre ja mikaka niara rüere käkwe kise aune ngoto metani kribätä. Däbä kwe ye nämäne träin kwe ngiente bäri. Ja ketamukotre kwe aune mräkätre kwe namani nekwetekä jiebiti aune muaire, akwa nitre gobranka judío namani niara kötaire (Luc. 23:32-38, TNM; Juan 19:25, TNM). Ja tare nikabare kwe ora kabre te. Niara brukwä aune bukrän ñan di namanina yebätä ñan namanina nuäre kräke burie jäkäkäre. Nämäne ja ngwen metre Jehovai nämäne gare ie yebätä ja di mräbiti orabare kwe Jehovai. Biti, ngärä ngitianinkä jabiti aune ja nire biani kwe (Mar. 15:37; Luc. 23:46; Juan 10:17, 18; 19:30). Jesús ja tare nikabare krubäte kä raire te aune mikani yakrä jai.

5. ¿Kukwe meden namani bäri tare Jesús ie murie ketani ye ngwane?

⁵ Jesús murie ketani ño ye ñan nämäne tare krubäte kräke, ñakare aune nämäne Ngöbö aune Ngöbö kä mike ngwarbe jai yebätä murie ketani niebarebätä ye namani bäri tare ie (Mat. 26:64-66). Jesús nämäne Ngöbö mike ngwarbe jai nie nämänebätä ye namani mike töbike krubäte. Yebätä Jehovakwe mikadre kwäre kukwe yebätä ye ribebare kwe ie (Mat. 26:38, 39, 42). ¿Ñobätä Jehovakwe monso kwe tuanimetre ja tare nike aune murie kete? Kukwe ketamäbätä ye ani mike gare jai.

6. ¿Ñobätä Jesús metani kribätä?

⁶ Kukwe käme ñäkäbare nitre judío kräke ye ütiä biankäre Jesús metani kribätä (Gál. 3:10, 13, TNM). Kukwe käme ñäkäibare niaratre kräke ñobätä ñan aune niaratre Ngöbö Kukwei mikai täte niebare kwetre, akwa ñan nuainbare kwetre. Ne madakäre, Adán ja mikani ngite ye köböite kukwe käme ñäkäibare kräke ye nikani bititre arato (Rom. 5:12). Nire nämäne ja mike ngite krubäte ye murie ketadre ye nie nämäne kukwe biani Ngöbökwe nitre Israel ie yebätä. Biti, ruäre ngwane ni ye ngwäkä meta nämäne kribätä (Deut. 21:22, 23; 27:26). * Aisete, Jesús metani kribätä yebiti nitre judío ñan niara kani ngäbiti ye kökanintari kwe arato.

7. ¿Kukwe meden ketebukärebätä Jehovakwe Monso kwe tuanimetre ja tare nike?

⁷ Ketebukäre, Jesús rabadre juto sribi sacerdote bäri kri ye nuainkäre, yekäre Jehovakwe tuanimetre ja tare nike. Nita ja tuin kukwe  tare ben ngwane, ñan tä nemen nuäre ni kräke Ngöbö mikakäre täte, kukwe yebe ja tuani Jesukwe. Kukwe ben nämäne ja tuin ye ñan namani nuäre kräke yebätä ja di käräbare kisere kwe Jehovai aune muare kwärä. Jesukwe ja tuani töbika krubäte yebe. Ye köböire raba ni töi mike nüke gare jai aune tä juto biare nireta ja tuin kukwe tare ben ye dimikakäre. Jehovakwe Jesús kädekani sacerdote bäri kri yebätä nita debe bien krubäte ñobätä ñan aune raba ni töi mike nüke gare jai ye (Heb. 2:17, 18; 4:14-16; 5:7-10).

8. ¿Kukwe meden ketamäkärebätä Jehovakwe Jesús tuanimetre nuadrete nememe mrä?

⁸ Ketamäkäre, Jehovakwe Jesús tuanimetre ja tare nike kukwe keteiti ütiäte ngwantarita ne mikakäre gare: Ni kä nebätä ja tuadre kukwe tare krubäte ben ngwane, ¿raba ja ngwen metre Jehovai ya? Ñakare nieta Satanakwe, ñobätä ñan aune nita Ngöbö mike täte jondron täri nieta kwe. Ne madakäre, ni ñaka Jehová tarere Adán erere ruin ie (Job 1:9-11; 2:4, 5). Jesús ja ngwain metre ye nämäne gare kwin Jehovai yebätä tuanimetre kwe nuadrete nememe mrä. Jesukwe ja ngwani metre yebiti Satana ni ngökö bämikani kwe.

9. ¿Kukwe meden kwin bämikani Juankwe ni käne?

⁹ Ni kökanintari drieta ye käkwe tödeka nitre kristiano kwatikwe mikanina dite. Ja mikata rüere yebiti ta tätre kukwe driere jankunu. Aune kukwe tare ben ja tuanina kwetre, akwa tätre kä ngwen nüke jai. Kä 60 biti bäri te Juankwe kukwe metre driebare Jesubätä aune ni kökanintari yebätä. Aune kä namanina bäsi 100 biti ngwane, jänikani ngite kä mutu kädekata Patmos yekänti ñobätä ñan aune raba kukwe tare nuainne Imperio romano yebätä nütü nämänebätä. ¿Kukwe medenbätä ja mikani ngite kwe? Nämäne kukwe mike gare Jehová aune Jesús yebätä (Apoc. 1:9). Juan nämäne tödeke krubäte aune kä ngwani nüke kwe jai yebiti kukwe kwin bämikani kwe ni käne.

10. Juan nämäne debe bien krubäte ni kökanintari yebätä, ¿ye bämikani ño kwe tärä tikani kwe yebätä?

¹⁰ Juan nämäne Jesús tarere krubäte aune ni kökanintari yebätä nämäne debe bien ye bämikani kwe tärä tikani kwe yebätä. Ni kökanintari aune ye köböire kukwe kwin tä nemen nikwe yebätä kukwe 100 biti bäri tikani kwe täräbätä. Ñodre, 1 Juan 2:1, 2 (NGT) yekänti niebare kwe: “Ni iti käkwe ja mikadre ngite nane ngwane, ni tä iti ni Rün ngwärekri blitaka ni kräke, ne ara Jesús Gobran kri kwin metre”. Ne madakäre, blitadre Jesubätä ye ütiäte krubäte mikani gare Juankwe (Apoc. 19:10). Juan nämäne debe bien krubäte ni kökanintari yebätä bämikani metre kwe. ¿Nita debe bien krubäte ni kökanintari yebätä ye ni raba bämike ño?

11. ¿Dre käkwe ni dimikai ñan ja mike ngite ni nuaite ngwane?

¹¹ Ja di ngwandre ñaka ja mikakäre ngite. Ni kökanintari yebätä nita debe bien krubäte ngwane, nikwe ñaka töbikai krörö, “ti raba ja mike ngite, biti ti raba ngite kitamana ta jabiti Jehovai”, ñakare aune ni nuadrete ngwane, “ñakare” nikwe niedi. “Jehová aune Jesús kukwe ütiäte nuainbare ti kräke, ¿se ñobätä ti raba kukwe ne nuainne?”. Biti, Jehovakwe ni dimikadre ye nikwe kärädre ie aune ne ribedre orasionte ie: “Mäkwe ñaka nun tuametre nuadrete” (Mat. 6:13, TNM).

12. ¿Kukwe nieta 1 Juan 3:16-18 ye ni raba mike ño täte?

¹² Nikwe ja mräkätre taredre. Nikwe nuaindi ngwane, ni kökanintari yebätä nita debe bien  ye nikwe bämikai. Jesús ñan ja nire biani ni aibe ütiäre, ñakare aune ja mräkätre kräke arato. Jesús namani juto biare ja nire biankäre ütiäre ñobätä ñan aune tare krubäte kwe yebätä (ñäkädre 1 Juan 3:16-18 yebätä). Nita ja mräkätre mike tuin ño jai yebiti tare nikwe o ñakare ye nita bämike (Efes. 4:29, 31–5:2, TNM). Tätre bren o tätre ja tuin kukwe tare ben ngwane nita dimike. Ñodre, kukwe tare tä nemen bare käite ngwane, nita dimike. Akwa ja mräkä iti käkwe kukwe ñaka kwin niedre o nuaindre nibätä ngwane, ¿nikwe dre nuaindre?

13. ¿Ñobätä nikwe ngite juandre ta ja mräkätrebiti?

¹³ Ja mräkätre ñaka tä kukwe kwin nuainne nibätä ngwane, ¿nita nemen romon jankunu kräke? (Lev. 19:18). Ye erere akräke, kukwe nieta Colosenses 3:13 ne nikwe mikadre täte: “Ni mda mda tä kukwe nuene mun rüere ne ngwane, munkwe ñan ja ngie mika amne, kukwe tärä ja rüere kwärikwäri munkwe ne ngwane, munkwe kukwe ye dian jabti ta kwärikwäri. Ye abko, ni Dänkien käkwe mun ngite diani munbti ta, ye kwrere munkwe nuen jakrä kwärikwäri arato”. Batire batire nita ngite juen ta ja mräkätrebiti ngwane, ni kökanintari yebätä nita debe bien krubäte ye nita bämike Jehovai. Jehovakwe kukwe ütiäte nuainbare ni kräke yebätä nita debe bien bäri, ¿ye ni raba bämike ño?

14. Ni kökanintari ye rabadre bäri ütiäte ni kräke, ¿yekäre nikwe dre nuaindre?

¹⁴ Ni kökanintari yebätä nikwe debe biandre. Meri testiko kädekata Joanna, kä 83 biti, nünanka India tä niere: “Ni kökanintari ye kädekadrete orasionte köbö kwatire kwatire aune debe biandrebätä Jehovai ye ütiäte ruin tie”. Kukweta nainte nie köbö kwatire kwatire yebätä nikwe töbikadre, biti kädekadrete orasionte aune Jehovakwe ngite juandre ta nibiti ye nikwe ribedre ie. Akwa, nikwe ja mikadre ngite krubäte ngwane, nikwe ja di kärädre nitre umbre ji ngwanka konkrekasionte ie. Niaratre käkwe ni kukwe nuai aune Bibliabiti mäträi töi kwinbiti kwetre nibätä. Ne madakäre, nitre umbre ji ngwanka oradi nibe aune ngite juandre ta nibiti ye kärädi kwetre orasionte ni kökanintari ye köböire, ne kwe ni rabadreta kwin kukwe ja üairebiti (Sant. 5:14-16).

15. Nikwe ñäkädre aune töbikadretari ni kökanintari yebätä, ¿ye ñobätä ütiäte?

¹⁵ Ni kökanintari yebätä nikwe töbikadretari.  Meri testiko kädekata Rajamani, kä 73 biti, tä niere: “Jesukwe ja tare nikabare ño yebätä tita ñäke ngwane, ti motota nemen ulire”. Jesukwe ja tare nikabare ño yebätä nikwe töbikadre ngwane, ja raba nemen ruin ye erere nie arato. Aune ni kökanintari yebätä nikwe töbikadretari bäri ngwane, Jehová aune Jesús rabai bäri tare nikwe. Akwa rabadre bare yekäre, nita ja tötike kaibe ngwane ni raba ja tötike ni kökanintari yebätä.

16. Ni kökanintari yebätä nita blite ni mada ngwane, ¿ye tä ni dimike ño? (Üai kena täräkwatabätä mikadre ñärärä).

¹⁶ Ni kökanintari yebätä nikwe blitadre ni madabe. Ni kökanintari yebätä nita blite batire batire ni madabe ngwane, tä nemen bäri ütiäte ni kräke. Ñobätä Jesús murie ketani ni kräke ye mikakäre gare juta Ngöbökwe käkwe täräkwata aune video keta kabre sribebarera. Ñodre, täräkwata Ngöböta kukwe kwin mike gare nie kukwe ja tötikara 4 kädekata, “¿Nire abokän Jesukristo?” yebiti ni raba kukwe mike gare. Aune tärä ¿Dre drieta nie Bibliabätä? kapitulo 5 kädekata “Ngöbökwe ni kökanintari ye kukwe bäri ütiäte” yebiti ni raba dirire arato. Ni kökanintari ye nita ngwen törö jai kä kwatire kwatire te aune nita kä jutobiti ni mada nübaire ye erere nuainne ngwane, tä nemen bäri ütiäte ni kräke. ¡Jehovakwe ni mikani blite Jesubätä ye sribi bäri ütiäte biani kwe nie!

17. ¿Ñobätä ni kökanintari ye abokän kukwe bäri ütiäte nuainbare Jehovakwe ni kräke?

¹⁷ Ni kökanintari yebätä kukwe tärä keta kabre nie debe biankäre aune mikakäre ütiäte jai. Ni töi ngite yebiti ta ni raba ja kete kwin Jehovabe ni kökanintari ye köböire. Aune sribi nuainta Diablukwe ye dikainte (1 Juan 3:8). Ne madakäre, Jehová töi nämäne kä tibien kwitabätä bä nuäre aune ni jökrä niara taredre aune mikadre täte ye rabai bare. Aisete ni kökanintari ye abokän kukwe bäri ütiäte nuainbare Jehovakwe ni kräke yebätä nikwe debe biandre köbö kwatire kwatire.