1-2. Ano ang gawad, kag ngaa kinahanglan naton ini?

SANG nagpakasala si Adan nga isa ka perpekto nga tawo, wala na sia sing paglaum nga mabuhi sing wala sing katapusan, pati man ang iya mga anak sa ulihi. Hungod sia nga nagpakasala, gani indi sia mapatawad. Pero wala sing labot ang mga anak ni Adan sa ginhimo niya nga sala. (Roma 5:12, 14) Dapat gid man silutan si Adan sing kamatayon bangod sang iya ginhimo. Pero may mahimo pa bala si Jehova para mabuhi sing wala sing katapusan ang mga anak ni Adan? Huo. Wala madugay pagkatapos magpakasala si Adan, amat-amat nga ginpabalo ni Jehova kon paano niya luwason sa sala kag kamatayon ang minilyon ka anak ni Adan. (Gen. 3:15) Sa tion nga gintalana ni Jehova, ginpadala niya ang iya Anak halin sa langit para “ihatag ang iya kabuhi nga gawad kabaylo sang madamo.”—Mar. 10:45; Juan 6:51.

² Ano ang gawad? Sa Cristianong Griegong Kasulatan, ang gawad amo ang bili nga ginbayad ni Jesus para gawaron ang nadula ni Adan. (1 Cor. 15:22) Ngaa kinahanglan naton ang gawad? Bangod ginapatuman ni Jehova ang hustisya. Suno sa Kasuguan, dapat kabuhi ang ibayad sa kabuhi. (Ex. 21:23, 24) Nadula ni Adan ang iya perpekto nga kabuhi. Para masunod ang hustisya nga ginapatuman sang Dios, ginhalad ni Jesus ang iya perpekto nga kabuhi. (Roma 5:17) Gani sia ang nangin “Dayon nga Amay” para sa tanan nga nagatuo sa gawad.—Isa. 9:6; Roma 3:23, 24.

3. Suno sa Juan 14:31 kag 15:13, ngaa handa si Jesus nga ihalad ang iya perpekto nga kabuhi?

³ Handa si Jesus nga ihalad ang iya kabuhi bangod palangga gid niya ang iya Amay sa langit kag palangga niya kita. (Basaha ang Juan 14:31; 15:13.) Bangod sini, ginhimo niya ang iya bug-os nga masarangan nga mangin matutom asta sa iya kamatayon kag gintuman niya ang kabubut-on sang iya Amay. Bangod sang iya  ginhimo, matuman gid ang katuyuan ni Jehova para sa katawhan kag para sa duta. Sa sini nga artikulo, binagbinagon naton kon ngaa gintugutan sang Dios nga maagyan ni Jesus ang grabe nga pag-antos antes sia mapatay. Binagbinagon man naton ang halimbawa sang isa ka manunulat sang Biblia nga nagpabalor gid sa gawad. Kag binagbinagon naton kon paano naton mapakita nga nagapasalamat kita bangod sa gawad kag kon paano naton mapabaloran pa gid ang ginsakripisyo ni Jehova kag ni Jesus para sa aton.

4. Isaysay kon paano napatay si Jesus.

⁴ Imadyina ang natabo kay Jesus antes sia ginpatay. Puede kuntani nga magpangabay sia nga amligan sia sang madamo nga anghel. Pero wala niya ini ginhimo. Sa baylo, ginpabay-an niya nga dakpon sia sang Romano nga mga soldado kag bunalon sia. (Mat. 26:52-54; Juan 18:3; 19:1) Ginlatigo nila sia, gani nagkalariri ang iya mga unod kag nagdulugo ang iya likod. Dayon, ginpapas-an nila sa iya ang mabug-at nga usok pakadto sa lugar nga pagalansangan sa iya. Ginpas-an ini ni Jesus, pero halos indi na niya ini madala. Gani ginmanduan sang Romano nga mga soldado ang isa ka tawo nga pas-anon ang usok. (Mat. 27:32) Pag-abot ni Jesus sa lugar diin pagapatyon sia, ginlansang sang mga soldado ang iya mga kamot kag mga tiil sa usok. Sang ginpatindog sang mga soldado ang usok, nagdaku pa gid ang mga pilas ni Jesus bangod sang iya kabug-aton. Nasubuan ang mga abyan ni Jesus kag nagahibi ang iya iloy, pero ginayaguta sia sang mga lider sang mga Judiyo. (Luc. 23:32-38; Juan 19:25) Nag-antos si Jesus sing pila ka oras. Bangod sang iya posisyon, nabudlayan na sia sa pagginhawa. Kabalo si Jesus nga nangin matutom sia, gani nangamuyo sia kay Jehova sa katapusan nga tion antes sia mapatay. Dayon, nagduko sia kag gintugyan niya kay Jehova ang iya kabuhi. (Mar. 15:37; Luc. 23:46; Juan 10:17, 18; 19:30) Amat-amat, masakit, kag makahuluya ang pagkapatay ni Jesus.

5. Para kay Jesus, ano ang mas grabe pa sangsa paagi sang pagpatay sa iya?

⁵ May gin-antos pa gid si Jesus nga mas grabe pa sangsa paagi sang pagpatay sa iya. Mas nasubuan sia sa akusasyon sa iya nga amo ang ginbasihan kon ngaa patyon sia. Gin-akusahan sia nga nagapasipala sia sa Dios ukon wala nagarespeto sa ngalan sang Dios. (Mat. 26:64-66) Nasubuan gid si Jesus bangod sini, gani ginpangabay niya ang iya Amay nga kuntani indi Niya pagtugutan nga mapatay sia sa sini nga paagi. (Mat. 26:38, 39, 42) Ngaa gintugutan ni Jehova nga mag-antos kag mapatay ang iya pinalangga nga Anak? Binagbinagon naton ang tatlo ka rason.

6. Ngaa dapat gid ibutang si Jesus sa usok sang pag-antos?

⁶ Una, dapat ibutang sa usok si Jesus para mahilway ang mga Judiyo sa pagpakamalaut sa ila. (Gal. 3:10, 13) Ginpakamalaut sila bangod nagpromisa sila nga tumanon nila ang Kasuguan sang Dios pero wala nila ini gintuman. Dugang ini nga pagpakamalaut sa ila kay ginpakamalaut na sila bangod mga anak sila ni Adan. (Roma 5:12) Suno sa Kasuguan sang Dios sa Israel, dapat patyon ang isa ka tawo nga nakahimo sang sala nga takus sa silot nga kamatayon. Dayon, mahimo ibutang ang iya bangkay sa usok. * (Deut. 21:22, 23; 27:26) Gani bangod ginbutang si Jesus sa usok, posible na nga mahilway ang mga Judiyo sa sini nga pagpakamalaut kag mabuligan sila sang halad ni Jesus bisan pa ginsikway nila sia.

7. Ano ang ikaduha nga rason kon ngaa gintugutan sang Dios nga mag-antos ang iya Anak?

⁷ Binagbinaga ang ikaduha nga rason kon ngaa gintugutan sang Dios nga mag-antos ang iya Anak. Ginhanas niya si Jesus sa iya responsibilidad  sa ulihi nga mangin aton Mataas nga Saserdote. Naeksperiensiahan ni Jesus ang grabe nga pagtilaw, kag naeksperiensiahan niya kon daw ano kabudlay ang pagtuman sa Dios sa amo sini nga kahimtangan. Nabudlayan gid sia amo nga nagpangamuyo sia “nga may mabaskog nga paghibi kag mga luha.” Bangod naeksperiensiahan ni Jesus ang grabe gid nga pagtilaw, ‘mahangpan niya ang kahimtangan naton kon ginatilawan kita kag buligan niya kita.’ Nagapasalamat gid kita kay Jehova kay gintangdo niya ang maluluy-on nga Mataas nga Saserdote nga “makapakita sing kahanuklog sa aton mga kaluyahon.”—Heb. 2:17, 18; 4:14-16; 5:7-10.

8. Ano ang ikatlo nga rason kon ngaa gintugutan sang Dios nga matilawan sing bug-os si Jesus?

⁸ Ikatlo, gintugutan ni Jehova nga mag-antos sing bug-os si Jesus para masabat ining importante nga pamangkot: Makapabilin bala nga matutom kay Jehova ang mga tawo bisan pa makaeksperiensia sila sang grabe nga pagtilaw? Nagsiling si Satanas nga indi. Nagsiling sia nga nagaalagad lang sa Dios ang mga tawo bangod lang sa mga kaayuhan nga mabaton nila. Kag nagapati sia nga pareho kay Adan, indi man nila palangga si Jehova. (Job 1:9-11; 2:4, 5) Nagasalig si Jehova nga mangin matutom ang iya Anak, gani gintugutan niya nga matilawan sing bug-os si Jesus asta sa iya kamatayon. Bangod nangin matutom si Jesus, napamatud-an niya nga butigon si Satanas.

9. Ano nga halimbawa ang ginpakita ni apostol Juan para sa aton?

⁹ Bangod sang gawad, nagbakod ang pagtuo sang madamo nga Cristiano. Padayon sila nga nagbantala bisan pa ginpamatukan sila, kag nabatas nila ang tanan nga sahi sang pagtilaw sa bilog nila nga kabuhi. Binagbinaga ang halimbawa ni apostol Juan. Matutom niya nga ginbantala ang kamatuoran parte sa Cristo kag sa gawad, posible sing sobra 60 ka tuig. Sang halos 100 ka tuig na ang iya edad, ginpriso sia sang Emperyo sang Roma sa isla sang Patmos bangod para sa ila, may indi maayo nga epekto sa ila gobierno ang iya ginahimo. Ano ang iya ginahimo? ‘Nagahambal sia tuhoy sa Dios kag nagapanaksi tuhoy kay Jesus.’ (Bug. 1:9) Nagpakita gid si Juan sang dalayawon nga pagtuo kag pagbatas.

10. Paano ginapakita sang mga sulat ni Juan nga ginpabaloran niya ang gawad?

¹⁰ Sa mga libro sa Biblia nga ginsulat ni Juan, mabasa naton nga palangga gid niya si Jesus kag ginpabaloran gid niya ang halad-gawad ni Jesus. Sobra 100 ka beses nga ginsambit niya ang parte sa gawad ukon ang parte sa mga benepisyo sini. Halimbawa, nagsulat si Juan: “Kon may isa sa inyo nga makahimo sang sala, may manugbulig kita nga kaupod sang Amay, si Jesucristo, ang isa nga matarong.” (1 Juan 2:1, 2) Ginpakita man sang mga sulat ni Juan nga importante “ang pagpanaksi tuhoy kay Jesus.” (Bug. 19:10) Gani masiling naton nga ginpabaloran gid ni Juan ang gawad. Paano naton mapakita nga ginapabaloran man naton ini?

11. Ano ang makabulig sa aton para indi kita madala sang pagsulay?

¹¹ Indi magpadala sa pagsulay nga magpakasala. Kon ginapabaloran naton ang gawad, indi kita maghunahuna sing pareho sini: ‘OK lang nga magpadala ako sa pagsulay, kay kon makasala ako, mangayo lang ako dayon sang patawad.’ Sa baylo, kon ginasulay kita nga maghimo sang sala, amo ini ang dapat naton isiling: ‘Indi ko gid ina mahimo. Pagkatapos sang tanan nga ginhimo ni Jehova kag ni Jesus para sa akon, indi gid ako dapat magpadala sa pagsulay.’ Dayon, puede kita makapangayo sing bulig kay  Jehova kag mangabay sa iya: ‘Buligi ako para indi ako madaug sang pagsulay.’—Mat. 6:13.

12. Paano naton maaplikar ang laygay sa 1 Juan 3:16-18?

¹² Palanggaa ang imo mga kauturan. Kon ginapalangga naton sila, ginapakita man naton nga ginapabaloran naton ang gawad. Ngaa? Bangod ginhatag ni Jesus ang iya kabuhi indi lang para sa aton kundi para man sa aton mga kauturan. Nahimo ini ni Jesus bangod palangga gid niya sila. (Basaha ang 1 Juan 3:16-18.) Mapakita naton nga palangga naton ang aton mga kauturan paagi sa mga ginahimo naton para sa ila. (Efe. 4:29, 31–5:2) Halimbawa, ginabuligan naton sila kon nagamasakit sila, nahalitan sang kalamidad, ukon may iban pa nga mabudlay nga problema. Pero ano ang dapat naton himuon kon may ginhimo ukon ginsiling ang aton utod nga nagpalain sang aton buot?

13. Ngaa dapat kita magpatawad?

¹³ Nabudlayan ka bala kon kaisa nga patawaron ang imo utod? (Lev. 19:18) Iaplikar ini nga laygay: “Padayon nga batasa ninyo ang isa kag isa kag magpinatawaray kamo sing kinabubut-on bisan pa ang isa may rason nga magreklamo sa isa. Subong nga si Jehova nagpatawad sing kinabubut-on sa inyo, amo man sini ang himuon ninyo.” (Col. 3:13) Sa kada tion nga ginapatawad naton ang aton utod, ginapakita naton sa aton Amay sa langit nga ginapabaloran naton ang gawad. Ano ang dapat naton himuon para mapabaloran pa gid naton ining regalo sang Dios?

14. Ano ang isa ka paagi para mapabaloran pa gid naton ang gawad?

¹⁴ Pasalamati si Jehova bangod sang gawad. Ang 83 anyos nga sister nga si Joanna nga taga-India nagsiling, “Ginasambit ko gid sa akon mga pangamuyo kada adlaw ang parte sa gawad kag ginapasalamatan ko si Jehova bangod sini.” Kada adlaw sa imo personal nga mga pangamuyo, isugid kay Jehova ang imo mga sala nga nahimo kag mangayo sing patawad sa iya. Pero kon serioso nga sala ang imo nahimo, kinahanglan mo man ang bulig sang mga gulang. Palangga ka nila, gani mamati sila sa imo kag laygayan ka nila base sa Pulong sang Dios. Magapangamuyo sila upod sa imo, kag pangabayon nila si Jehova nga patawaron ka para mangin maayo liwat ang imo kaangtanan sa iya.—Sant. 5:14-16.

15. Ngaa dapat naton tun-an ang parte sa gawad kag pamalandungan ini?

¹⁵ Pamalandungi ang parte sa gawad. Ang 73 anyos nga sister nga si Rajamani nagsiling,  “Sa kada tion nga mabasa ko ang parte sa mga gin-antos ni Jesus, nagahibi ako.” Mahimo nga nasakitan ka man kon pamensaron mo ang grabe nga pag-antos sang Anak sang Dios. Pero kon pirme mo pamalandungan ang ginsakripisyo ni Jesus, mas palanggaon mo pa gid sia kag ang iya Amay. Para mapamalandungan mo ang parte sa gawad, tilawi nga tun-an sing maayo ini nga topiko sa imo personal nga pagtuon.

16. Ano ang epekto sa aton kon ginatudluan naton ang iban parte sa gawad? (Tan-awa ang piktyur sa kober.)

¹⁶ Itudlo sa iban ang parte sa gawad. Sa kada tion nga ginasugid naton sa iban ang parte sa gawad, mas ginapabaloran naton ini. May mga publikasyon kita kag mga video nga makabulig sa aton para mapaathag sing maayo sa iban kon ngaa dapat gid mapatay si Jesus para sa aton. Halimbawa, magamit naton ang leksion 4 sa brosyur nga Maayong Balita Halin sa Dios! Ini nga leksion may tig-ulo nga “Sin-o si Jesucristo?” Ukon puede naton gamiton ang kapitulo 5 sang libro nga Ano ang Ginatudlo sang Biblia sa Aton? Ini nga kapitulo may tig-ulo nga “Ang Gawad—Pinakabilidhon nga Regalo sang Dios.” Kag kada tuig, mapakita pa gid naton nga ginapabaloran naton ang gawad paagi sa pagtambong sa Memoryal sang kamatayon ni Jesus kag paagi sa mapisan nga pag-agda sa iban nga magtambong sa sini nga okasyon. Isa gid ka pribilehiyo ang ginhatag ni Jehova sa aton nga tudluan ang iban parte sa iya Anak.

17. Ngaa masiling naton nga ang gawad amo ang pinakabilidhon nga regalo sang Dios sa mga tawo?

¹⁷ Gani dapat naton padayon nga pabaloran pa gid ang gawad. Paagi sa gawad, posible nga mangin suod kita kay Jehova bisan pa indi kita perpekto. Paagi sa gawad, gub-on sing bug-os ang mga binuhatan sang Yawa. (1 Juan 3:8) Paagi sa gawad, matuman gid ang katuyuan ni Jehova para sa duta. Mangin paraiso ang bilog nga duta. Sa sina nga tion, ang tanan nga tawo nagapalangga na kag nagaalagad kay Jehova. Gani kada adlaw, ipakita gid naton nga ginapabaloran naton ang gawad, kay amo ini ang pinakabilidhon nga regalo sang Dios sa mga tawo.