1-2. Mauri hanaihanai be dahaka, bona dahaka dainai ia be mai anina bada?

GOEVADAE tauna Adamu ia kara dika neganai, ia bona ena natudia totona mauri hanaihanai helarona ia haboioa. Adamu be mai ena ura ida ia kara dika, to ena natudia be edena bamona? Idia be kerere lasi bona Adamu idia doria lasi kara dika ia karaia totona. (Roma 5:12, 14) Adamu ia kara dika dainai ia mase be maoro. To Iehova be gau ta do ia karaia Adamu ena natudia ese mauri hanaihanai idia abia totona, a? Adamu ia kara dika murinai, Iehova be karaharaga Adamu ena natudia milioni be unai kara dika bona mase amo do ia ruhaia dalana ia gwauraia hedinarai. (Gen. 3:15) Iehova ese ia abia hidi dinana ai guba amo iena natuna do ia siaia “ena mauri ia henia taunimanima momo edia mauri davana karaia totona.”​—Mar. 10:45; Ioa. 6:51.

² Mauri davana be dahaka? Keristani Grik Revarevadia ai mauri davana ena anina be, Iesu ese Adamu ia haboioa gauna ena davana ia karaia. (1 Kor. 15:22) Dahaka dainai mauri davana be mai anina bada? Badina Iehova ena kara maoromaoro taravatuna ai mauri ena davana be mauri. (Eso. 21:23, 24) Adamu be mauri goevadaena ia haboioa. Dirava ena kara maoromaoro taravatuna hagugurua totona, Iesu ese ena mauri goevadaena ia bouboulaia. (Roma 5:17) Unai amo mauri davana idia abidadama henia taudia ibounai dekenai, ia be “Noho Hanaihanai Tamana” ai ia lao.​—Isa. 9:6; Roma 3:23, 24.

3. Ioane 14:31 bona 15:13 hegeregerena, dahaka dainai Iesu be ena mauri goevadaena ia bouboulaia?

³ Iesu be ena guba Tamana bona ita ia lalokau henia bada dainai, mai ura ida ena mauri ia bouboulaia. (Ioane 14:31; 15:13 duahia.) Unai lalokau dainai ena lalona ia hadaia ena  mauri ibounai lalonai Dirava do ia badinaia bona ena Tamana ena ura do ia hagugurua. Iesu be unai bamona ia karaia dainai, Iehova ena ura ginigunana taunimanima bona tanobada totona be do ia guguru. Inai atikol ai do ita itaia dahaka dainai Dirava be Iesu ese ia davaria hisihisi ia koua lasi ela bona ia mase. Danu mauri davana ia laloa bada Baibel torea tauna ta ena sivarai do ita herevalaia. Bona dokonai mauri davana totona iseda tanikiu karana, bona Iehova bona Iesu ese idia henia boubou gauna ita laloa bada karana do ita herevalaia.

4. Iesu ena mase dalana mani oi herevalaia.

⁴ Iesu do idia hamasea dinana ai idia vara gaudia mani oi laloa. Ia ese aneru milioni momo ia noia diba ia idia gimaia totona. To unai ia karaia lasi, bona Roma tuari taudia ese ia idia guia bona idia dadabaia dikadika. (Mat. 26:52-54; Ioa. 18:3; 19:1) Idia ese varo ta amo idia kwadia bona ena hidio ia darea. Gabeai, au metauna ta idia henia ia huaia totona. Iesu ese unai hisihisi auna ia veria lao do idia hamasea gabuna dekenai, to daudau lasi murinai Roma tuari taudia ese tau ta idia oda henia Iesu ena hisihisi auna ia huaia totona. (Mat. 27:32) Iesu be do idia hamasea gabuna dekenai ia ginidae neganai, soldia taudia ese iena imana bona aena be hisihisi auna dekenai idia kokoa. Iesu ena tauanina ia metau dainai, ikoko ese ena hidio idia darea. Iena turadia idia lalohisihisi bona ena sinana ia taitai, to Iuda gunalaia taudia ese Iesu idia kirikirilaia. (Luka 23:32-38; Ioa. 19:25) Iesu be hora momo lalonai hisihisi ia mamia. Iena kudouna bona baragi idia gaukara namonamo lasi dainai iena hahodi dalana ia auka. Iesu ia diba ia be ena Tamana ia badinaia, bona ena hahodi ginigabena ai Iehova ia guriguri henia. Iena kwarana ia atoa diho bona ia mase. (Mar. 15:37; Luka 23:46; Ioa. 10:17, 18; 19:30) Iesu be hisihisi ia mamia ela bona ia mase!

5. Iesu be dahaka ia lalohisihisilaia bada?

⁵ Iesu be ia davaria hisihisi ia laloa bada lasi, to idia hamasea ena badina ia lalohekwarahilaia bada. Koikoi dalanai ia idia gwauraia ladana hadikaia tauna, bona idia gwau ia be Dirava bona ena ladana ia matauraia lasi. (Mat. 26:64-66) Unai dainai Iesu be ia lalohisihisi bada bona ena Tamana ia noia unai hemarai ia kokia totona. (Mat. 26:38, 39, 42) Dahaka dainai Iehova ese ena lalokau natuna ia koua lasi ia hisihisi bona ia mase totona? Mani unai badina toi ita herevalaia.

6. Dahaka dainai Iesu be hisihisi auna ai idia tauadae?

⁶ Ginigunana, Iesu be hisihisi auna ai ia mase unai amo Iuda taudia be dika amo ia ruhaia. (Gal. 3:10, 13) Badina idia gwauhamata Dirava ena Taravatu do idia badinaia, to unai idia karaia lasi. Unai dainai idia be unai dika ena igui lalonai idia noho bona idia be Adamu ena natudia dainai idia mase be maoro. (Roma 5:12) Dirava ese Israela taudia dekenai ia henia taravatu ia gwau, kara dika ia karaia tauna idia hamasea be maoro. Unai murinai iena tauanina be hisihisi auna dekenai idia tauadae. * (Deut. 21:22, 23; 27:26) Unai dainai Iesu be hisihisi auna ai idia tauadae neganai, unai ese dala ia kehoa ia idia dadaraia besena be iena boubou gauna amo namo idia abia totona.

7. Dirava ese ena Natuna ena hisihisi ia koua lasi ena badina iharuana be dahaka?

⁷ Iharuana be, Dirava ese ena Natuna ia  koua lasi hisihisi ia abia totona. Unai amo Iesu be treinini ia abia vaira negai iseda Hahelaga Tauna Badana ai ia lao totona. Iesu ia mamia momokani, hahetoho lalonai Dirava badinaia karana be mai ena hekwarahi. Ia lalohisihisi bada dainai, “mai taitai bona mai mata ranu ida” heduru totona ia guriguri. Momokani, Iesu be ia lalohisihisi bada, unai dainai “hahetoho” ita davaria neganai, iseda hemami ia lalopararalaia bona ita ia “durua” diba. Ita moale bada badina Iehova be ita ia durua totona Hahelaga Tauna Badana mai ena hebogahisi ia abia hidi, bona ia be “iseda manoka ia mamia momokani!”​—Heb. 2:17, 18; 4:14-16; 5:7-10.

8. Dahaka badina ihatoina dainai, Iesu be hisihisi bada ia mamia neganai Dirava ese ia koua lasi?

⁸ Ihatoina be, Iehova ese Iesu ia koua lasi hisihisi bada ia mamia totona, unai amo mai anina bada henanadai ta ia haerelaia: Taunimanima be hahetoho idia davaria neganai Iehova idia badinaia noho diba, a? Satani ena haere be lasi! Ia gwau, taunimanima be Dirava idia hesiai henia badina idia ura edia ura gaudia do ia henia. Danu, ia laloa idia be Iehova idia lalokau henia lasi, Adamu hegeregerena. (Iobu 1:9-11; 2:4, 5) Iehova ia diba ena Natuna be ia do ia badinaia noho, unai dainai Iesu be hisihisi ia davaria neganai ia koua lasi. Iesu be Dirava ia badinaia noho bona ia hamomokania Satani be koikoi tauna.

9. Aposetolo Ioane be dahaka haheitalai namona ia hahedinaraia?

⁹ Keristani taudia momo be mauri davana ena hahediba herevana ese edia abidadama ia hagoadaia. Idia be haroro gaukara idia karaia noho ena be dagedage idia davaria, bona edia mauri ibounai lalonai hahetoho idauidau idia haheaukalaia. Mani aposetolo Ioane ena haheitalai ita laloa, ia be lagani 60 mai kahana lalonai, mai abidadama ida Keriso bona mauri davana ia harorolaia. Ena mauri lagani be 100 bamona neganai, Roma gavamani ese idia inai henia bona Patamo motumotu dekenai idia siaia lao. Ia be dahaka kerere ia karaia? ‘Dirava ia herevalaia bona Iesu ia gwauraia hedinarai.’ (Apok. 1:9) Abidadama bona haheauka karana dekenai ia be haheitalai namona!

10. Edena dala ai Ioane ia hahedinaraia ia be mauri davana ia laloa bada?

¹⁰ Ioane ese ia torea bukadia ai, iena lalokau Iesu totona bona mauri davana ia laloa bada karana ia herevalaia. Ia ese nega 100 mai kahana, mauri davana bona mauri davana dainai idia vara gau namodia ia herevalaia. Hegeregere, Ioane ia gwau: “Bema ta ese kara dika ta ia karaia, ita be mai iseda durua tauna, ia be Tamana ida ia noho, Iesu Keriso, kara maoromaoro tauna unai.” (1 Ioa. 2:1, 2) Ioane ena toretore lalonai ia hahedinaraia, “Iesu gwauraia hedinarai” karana be mai anina bada. (Apok. 19:10) Ioane be mauri davana ia laloa bada. Edena dala ai ita be unai ita hahedinaraia diba?

11. Dahaka ese ita ia durua hahetoho ita dadaraia totona?

¹¹ Hahetoho ita dadaraia. Bema mauri davana ita laloa bada, do ita gwau lasi: ‘Hahetoho lau dadaraia totona do lau hekwarahi lasi. Kara dika lau karaia sibona, gabeai Dirava ese lau do ia gwauatao.’ To, hahetoho ita davaria neganai do ita gwau: ‘Lasi! Iehova bona Iesu ese lau totona idia karaia gaudia dainai unai do lau karaia lasi.’ Danu goada totona Iehova ita noia,  ita gwau: ‘Lau oi durua hedibagani lalonai do lau moru lasi.’​—Mat. 6:13.

12. Edena dala ai 1 Ioane 3:16-18 ena sisiba ita badinaia diba?

¹² Emu tadikaka bona taihu oi lalokau henidia. Unai ita karaia neganai ita hahedinaraia, mauri davana ita laloa bada. Dahaka dainai? Badina Iesu be ita sibona lasi, to iseda tadikaka taihu totona ia mase danu. Unai ese ia hahedinaraia idia ia lalokau henia bada. (1 Ioane 3:16-18 duahia.) Iseda tadikaka taihu ita kara henia dalana amo iseda lalokau ita hahedinaraia. (Efe. 4:29, 31–5:2) Hegeregere, idia gorere eiava hekwakwanai ta idia haheaukalaia bona disasta idia davaria neganai idia ita durua be namo. To dahaka do ita karaia bema tadikaka eiava taihu ta ena hereva eiava kara ese ita ia hahisia?

13. Dahaka dainai ma haida ita gwauatao be namo?

¹³ Nega haida oi mamia tadikaka eiava taihu ta ena dika oi gwauatao be auka, a? (Lev. 19:18) Bema oibe, inai sisiba oi badinaia: “Bema ta be badina ta dainai ma ta dekenai ia maumau, ta ta emui kara do umui haheaukalaia noho bona mai kudouna ibounai ida do umui gwauatao heheni. Iehova ese mai kudouna ibounai ida umui ia gwauatao hegeregerena, namona be umui danu be unai bamona umui karaia.” (Kol. 3:13) Hanaihanai iseda tadikaka o taihu ita gwauatao neganai, iseda guba tamana dekenai ita hamomokania mauri davana ita laloa bada. Edena dala ai Dirava ese ia henia harihari gauna ita laloa bada noho?

14. Mauri davana ita laloa bada dalana ta be dahaka?

¹⁴ Mauri davana dainai Iehova oi tanikiu henia. India ai ia noho mauri lagani 83 taihu ta ladana, Joanna, ia gwau: “Lau laloa dina ta ta ai egu guriguri lalonai mauri davana lau gwauraia bona Iehova lau tanikiu henia be mai anina bada.” Sibona emu guriguri lalonai, dina ai oi karaia kerere idauidau o laloa bona Iehova oi noia oi ia gwauatao totona. To, bema oi be kerere badana ta oi karaia, elda taudia edia heduru oi tahua be namo. Idia ese oi do idia kamonai henia, bona mai lalokau ida Dirava ena Hereva amo sisiba do idia henia. Idia be oi ida do idia guriguri bona Iehova idia noia oi ia gwauatao totona, unai amo emu hetura karana Iehova ida do ia namo lou.​—Iam. 5:14-16.

15. Dahaka dainai nega ita atoa, mauri davana ita stadilaia bona laloa dobu totona?

 ¹⁵ Mauri davana oi laloa dobu. Mauri lagani 73 taihu ta ladana, Rajamani, ia gwau: “Iesu ia mamia hisihisi ena sivarai lau duahia neganai, egu matana ranu idia diho.” Reana oi danu be unai bamona do oi mamia. To, Iesu ena boubou gauna oi laloa dobu neganai, ia bona ena Tamana do oi lalokau henidia bada. Unai oi karaia totona, sibona emu stadi ai, Iesu ena mauri davalaia boubouna oi stadilaia diba.

16. Ma haida dekenai mauri davana ita hadibaia ena namo be dahaka? (Rau 1 ena laulau itaia.)

¹⁶ Ma haida dekenai mauri davana oi hadibaia. Nega ta ta ai ma haida dekenai mauri davana ita herevalaia neganai, do ita laloa bada noho. Tulu namodia idia noho ita gaukaralaia diba, ma haida dekenai Iesu be ita dainai ia mase ena badina ita hadibaia totona. Hegeregere, ta be Dirava Ena Sivarai Namona! buklet ena leseni 4 ai, sinado ladana, “Iesu Keriso be Daika?” ita gaukaralaia diba. Eiava Baibel Be Dahaka Ia Hadibaia? bukana ena karoa 5 ai sinado ladana, “Mauri Davana Dirava Ena Harihari Gauna Hereadaena” ita gaukaralaia diba. Bona lagani ta ta ai Iesu ena mase Memorial ita lao, bona ma haida ita boiria mai karana amo mauri davana ita laloa bada. Ita moale badina Iehova ese hahenamo badana ia henia ma haida dekenai iena Natuna ena sivarai ita hadibaia totona!

17. Dahaka dainai mauri davana be Dirava ena harihari gauna badana taunimanima totona?

¹⁷ Oibe, badina namodia dainai mauri davana ita laloa bada noho be namo. Mauri davana dainai ena be ita be goevadae lasi to Iehova ita tura henia diba. Mauri davana dainai Diabolo ena gaukara ibounai do ia haorea momokani. (1 Ioa. 3:8) Mauri davana dainai Iehova ena ura ginigunana tanobada totona be do ia guguru. Tanobada ibounai be Paradaiso ai do ia lao. Taunimanima ibounai be Iehova do idia lalokau henia bona hesiai henia. Unai dainai dina ta ta ai dala ita tahua mauri davana ita laloa bada totona. Unai be Dirava ena harihari gauna badana taunimanima totona.