1-2. Otjisuta tjonguturiro tji heya ye, nu ongwaye tji tu hepa otjisuta tjonguturiro?

INDU omurumendu ohomonena Adam tja tjita ouvi, eye nozondekurona ze va pandjara ondjingonekero yokuhupa nga aruhe. Otjiṋa Adam tja tjita ka ya ri ondataiziro, nungwari wa tjitira owina. Hapo tjike novanatje ve? Ovanatje ve kave tjitire ouvi, nu ka va ri norupa mouvi Adam mbwa tjita. (Rom. 5:12, 14) Adam aa sokuṱa mena ra imbi mbya tjita. Posi yokutja, hapo pe notjiṋa Jehova tja tja yenena okutjita okuyama ovanatje va Adam kutja ve hupe nga aruhe? Ii. Katjisupi indu Adam tja tjita ouvi, Jehova wa raisa omuano mu ma yama omangete wovanatje va Adam kosengiro youvi nonḓiro. (Gen. 3:15) Moruveze Jehova nda twapo, eye aa sokuhinda Omuna we okuza keyuru ‘okuyandja omuinyo we, u rire onguturiro yovengi.’—Mar. 10:45; Joh. 6:51.

² Otjisuta tjonguturiro tji heya ye? Momatjangwa wOtjingrike otjisuta tjonguturiro, tji heya otjisuta Jesus tja suta okuranda imbi Adam mbya pandjarisa. (1 Kor. 15:22) Ongwaye tji tu hepa otjisuta tjonguturiro? Mena rokutja Jehova wa twapo etwako ndaari tja, omberero mai rire omuinyo komuinyo. (Eks. 21:23, 24) Adam wa pandjara omuinyo we ohomonena. Kutja ma yenenise etwako ra Mukuru ndo, Jesus wa yandja omuinyo we ohomonena. (Rom. 5:17) Momuano mbwo, eye wa rira “Ihe-ya Aruhe” ku imba avehe mbe raisa ongamburiro motjisuta tjonguturiro.—Jes. 9:6; Rom. 3:23, 24.

3. Otja ku Johanes 14:31 nekondwa 15:13, ongwaye Jesus tje riyandjera okuyandja omuinyo we ohomonena?

³ Jesus we riyandjera okuyandja omuinyo we, mena rorusuvero rwe ku Ihe womeyuru na kweṱe. (Lesa Johanes 14:31;  15:13.) Mena rorusuvero ndwo, Jesus we rimanena okurira omuṱakame ku Ihe nga konḓiro. Nu mena ra imbi Jesus mbya tjita, ondando ya Jehova kovandu na kehi mai kayenenisiwa. Morupa ndwi matu katara kutja ongwaye Mukuru tja yandjera Jesus okutatumisiwa tjinene ngunda e hi ya ṱa. Wina matu katara kotjihorera tjomutjange wOmbeibela ngwa raisa ondangi yatjiri kotjisuta tjonguturiro. Nu korusenina, matu katara komiano mu matu yenene okuraisa nokukurisa ondangi yetu kotjisuta tjonguturiro Jehova na Jesus tji ve tu pa.

4. Handjaura kutja Jesus wa ṱa momuano uṋe.

⁴ Ripura na imbi mbya tjitwa eyuva esenina ngunda Jesus e hi ya zepewa. Eye a tja yenena okuningira ombatero yovaengeli ovengi, posi yokutja katjitire nao. Nungwari wa yandjera ovarwe vovita vyOvaroma okumukambura nokumutona. (Mat. 26:52-54; Joh. 18:3; 19:1) Owo ve mu tona nongora nga tjaa ziza ombinḓu. Okuzambo ve mu tjindisa otjihenḓe nandarire kutja wa ri kehi yomihihamo. Jesus aa sokutjinda otjihenḓe ho nga koruveze kaa sokukaṱira, posi yokutja ovarwe vovita vyOvaroma va rakiza omurumendu warwe okumuvatera okutjitjinda. (Mat. 27:32) Okuzambo owo ve mu twirika komuti wondatumisire nu ave mu tono nozomboha momake nozombaze. Mena rohaveha yorutu rwa Jesus, ozomboha aaze mu hihamisire ko. Omapanga we na ina va ri moruhoze, posi yokutja ovanane vOvajuda aave mu nyekerere. (Luk. 23:32-38; Joh. 19:25) Jesus wa ri kehi yomihihamo oure wozoiri. Mena rongaro ma ri, omutima nomapunga we aaye tjiti kutja irire ouzeu ku ye okusuvana. Jesus aa tjiwa kutja wa yenena okurira omuṱakame ku Jehova, nu ngunda e hi ya ṱa wa kumba ku ye otjikando otjisenina. Okuzambo wa peta otjiuru nu a rire tja ṱu. (Mar. 15:37; Luk. 23:46; Joh. 10:17, 18; 19:30) Tjiri, Jesus wa toora orure okuṱa nu wa ṱa onḓiro ombi.

5. Otjikwaye tji tja ri otjihihamise tjinene ku Jesus pendje nomuano mbwa zepewa?

⁵ Omuano Jesus ma ṱa katja ri otjiṋa otjihihamise tjinene ku ye. Nungwari eye wa hihamisiwa i epu ndi ve mu zepera. Owo ve mu kuminina kutja wa yamburura Ndjambi, nu omundu ngu ri nao omundu ngu ha raisa ondengero ku Mukuru poo kena re. (Mat. 26:64-66) Tjiri otjiṋa ho tja hihamisa Jesus tjinene, nga tjaa zeri kutja Ihe e he mu yandjere okuyambururwa momuano mbwo. (Mat. 26:38, 39, 42) Ongwaye Jehova tja yandjera Omuna we omusuverwa okutatumisiwa nokuzepewa? Ngatu katare komapu yetatu.

6. Ongwaye Jesus tjaa sokuturikwa komuti wondatumisire?

⁶ Rutenga, Jesus aa sokuturikwa komuti wondatumisire okukutura Ovajuda kosengiro. (Gal. 3:10, 13) Owo va sengirwe mena rokutja va kwizika okukara nonḓuviro komatwako wa Mukuru, posi yokutja kave tjitire nao. Kunao, aave sokuṱa mena rosengiro ndjo nu wina aave sokuṱa mena rokurira ovanatje va Adam. (Rom. 5:12) Omatwako wa Mukuru kOvaisrael aaye tja omundu ngwa pangurwa kokuṱa mena rourunde mbwa tjiti aa sokuzepewa. Mozongaro tjiva orutu rwe aaru turikwa komuti. * (Deut. 21:22, 23; 27:26) Mena rokutja Jesus wa turikwa komuti, Ovajuda va yenena okukuturwa kosengiro ndjo, nu ombunguhiro ye ya yenena okuvevatera nandarire kutja ve mu nakaura.

7. Epu riṋe oritjavari nda tjita kutja Mukuru ma yandjere Omuna we okutatumisiwa?

⁷ Ngatu tare kepu oritjavari rokutja ongwaye Mukuru tja yandjera Omuna we okutatumisiwa.  Eye ee mu rongerisa komerizirira we otjOmupristeri Omunene. Jesus wa yenena okumuna kutja, okukara nonḓuviro ku Mukuru indu tji u ri kehi yomarorero katjiṋa otjipupu. Eye wa ri kehi yombameno tjinene nga tja kumba “nondjuriro onene nomahoze.” Mena rokutja Jesus omuini wa ri mombameno, eye u yenena okuzuva ongaro mu tu ri nu u “sora okuvatera imba mbe rorwa.” Tjiri eṱe tu nondangi onene ku Jehova ngwe tu zikira Omupristeri Omunene ngu ma yenene “okuṱondjenda nomaungundi wetu.”—Hebr. 2:17, 18; 4:14-16; 5:7-10.

8. Epu riṋe oritjatatu nda tjita kutja Mukuru ma yandjere Jesus okutatumsiwa tjinene?

⁸ Otjitjatatu, Jehova wa yandjera Jesus okukatamisiwa tjinene kokutja ma zire epuriro enanḓengu ndi: Hapo ovandu mave yenene okurira ovaṱakame ku Jehova nandarire kehi yondatumisire onḓeu? Satan u tja ovandu kamaave yenene. Eye u tja ovandu ve karera Mukuru uriri mena rokuvanga okupewa otjiṋa i ye. Nu u muna kutja tjimuna Adam, owo kamaave suvere Jehova. (Job 1:9-11; 2:4, 5) Mena rongamburiro yokutja Omuna we ma yenene okurira omuṱakame ku ye, Jehova wa yandjera Jesus okurorwa pondondo yokombanda. Jesus wa panḓera pouṱakame we nu wa raisa kutja Satan omunavizeze.

9. Omuapostele Johanes we tu raisira otjihorera tjiṋe?

⁹ Omahongero wotjisuta tjonguturiro ya zeuparisa ongamburiro yOvakriste ovengi. Owo va kayenda komurungu okuzuvarisa nandarire kehi yomapirukiro, nu va tuurunga omauzeu pekepeke nga konḓiro. Tara kotjihorera tjomuapostele Johanes. Eye wa zuvarisa ouatjiri ohunga na Kristus notjisuta tjonguturiro, ape oure wozombura zokombanda 60. Indu tja ri nozombura ape 100, ohoromende yOvaroma aai munu kutja eye wa ri omunaumba, kunao wa hindwa kotjovakamburwa mokakoverwahi ka Patmos. Hapo eye wa tjita oumba waye? Eye aa ‘zuvarisa embo ra Ndjambi nouatjiri mbwi Jesus Kristus mbwa vandururire.’ (Omavan. 1:9) Tjiri Johanes we tu raisira otjihorera otjiwa tjonḓaro orure nongamburiro.

10. Omomuano uṋe oviṋa Johanes mbya tjanga mu vi raisa ondangi kotjisuta tjonguturiro?

¹⁰ Omambo wOmbeibela Johanes nga tjanga, ya ri ohunga nomuano ma suvera Jesus nomuano me nondangi kombunguhiro ye. Eye wa hungira povikando vyokombanda 100 ohunga notjisuta tjongutiriro poo ohunga noviṋa oviwa mbi za motjisuta tjonguturiro. Otjotjihorera, Johanes wa tja: “Ngamwa ngu ma tjiti ouvi, eṱe tu nomuhungirirepo ku Tate. Eye oJesus Kristus, ingwi omusemba.” (1 Joh. 2:1, 2) Nu wina oviṋa Johanes mbya tjanga vi ṋunisa ounanḓengu ‘womahongononeno Jesus nga zuvarisa.’ (Omavan. 19:10) Tjiri, Johanes wa raisa ondangi tjinene kotjisuta tjonguturiro. Hapo omomuano uṋe eṱe wina mu matu yenene okuraisa ondangi?

11. Otjikwaye tji matji tu vatere okupirukira omarorero?

¹¹ Pirukira omarorero wokutjita ouvi. Indu tji tu nondangi kotjisuta tjonguturiro, kamaatu vanga okuripura kutja, ‘Kahepero kwami okukondja nomasa okupirukira omarorero. Me yenene okutjita otjiṋa otjivi nu okuzambo e ningire ondjesiro.’ Nungwari, indu tji twa rorwa okutjita otjiṋa otjivi eṱe matu vanga okutja: ‘Kako, ami himee yenene okutjita otjiṋa ho mena ra imbi avihe Jehova na Jesus mbi ve ndji tjitira.’ Eṱe wina matu yenene okuningira omasa ku Jehova nokuriyarikaṋa ku ye kutja, ‘Ondji hitisa momarorero.’—Mat. 6:13.

12. Omomuano uṋe mu matu yenene okuṱakamisa omurari mbu ri mu 1 Johanes 3:16-18?

 ¹² Suvera ovakambure ovakweṋu. Indu tji matu raisa orusuvero kovakambure ovakwetu, wina tu raisa ondangi kotjisuta tjonguturiro. Omena ratjike? Mena rokutja Jesus kayandjere omuinyo we kweṱe uriri, nungwari wina wa ṱira ovakambure ovakwetu. Kunao, oukahu kutja we ve suvera tjinene. (Lesa 1 Johanes 3:16-18.) Eṱe tu raisa kutja twa suvera ovakambure ovakwetu momuano mu matu ve tjindi. (Ef. 4:29, 31–5:2) Otjotjihorera, eṱe tu ve vatera indu tji va vere poo indu tji va wirwa i yomauzeu, tjimuna omanyinganyingiro wehi. Posi yokutja, eṱe matu tjti vi indu omukambure omukwetu tje tu tjiti otjiṋa otjivi poo tje tu hungire omambo omavi ngu maye tu pindikisa?

13. Ongwaye tji matu sokuisira varwe?

¹³ Hapo povikando i rira ouzeu kove okuisira ovakambure ovakweṋu? (Lev. 19:18) Tji pe ri nao, kongorera ondunge ndji: “Tjindasaneye nu mu isirasane umwe tje nombiri nomukwao. Nu mamu sokuisirasana otja Muhona punga e mu isira.” (Kol. 3:13) Otjikando atjihe tji matu isire ovakambure ovakwetu, tu raisira Tate wetu womeyuru kutja tjiri tu nondangi kotjisuta tjonguturiro. Omomiano viṋe mu matu kayenda komurungu okuraisa ondangi kotjisuta tjonguturiro?

14. Omomuano uṋe mu matu yenene okukurisa ondangi yetu kotjisuta tjonguturiro?

¹⁴ Raisa ondangi ku Jehova kotjisuta tjonguturiro. Omukazendu omukambure wozombura 83 wena Joanna, ngwa tura moIndia wa tja: “Ami mbi muna kutja ounanḓengu okutamuna otjisuta tjonguturiro eyuva arihe mozongumbiro zandje nokutja ndangi ku Jehova ku tjo.” Eyuva arihe tji mo kumbu kove omuini, raera Jehova oviṋa ovivi mbi wa tjiti nu u mu ningire okukuisira. Otjiperi kutja indu tji wa tjiti ouvi ounene, ove wina mo hepa ombatero okuza kovanene vombongo. Owo mave puratene kove nu norusuvero mave kupe omaronga okuza mEmbo ra Mukuru. Ovanene vombongo mave kumbu puna ove, nave ningire Jehova okukuisira kokutja u kare noupanga ouwa kuna ye rukwao. —Jak. 5:14-16.

15. Omena ratjike tji matu sokukara noruveze okulesa ohunga notjisuta tjonguturiro nokuripurira ko oukoto?

¹⁵ Ripurira ko oukoto kotjisuta tjonguturiro. Omukazendu omukambure wozombura 73 wena Rajamani, wa tja: “Indu tji me lese ohunga nomuano Jesus ma tatumisiwa ami mbi kara noruhoze.” Ove wina mape ya u kara nomuhihamwatima indu tji mo ripura ohunga  nomuano Omuna wa Mukuru ma tatumisiwa tjinene. Posi yokutja, tji mo kayenda komurungu okuripurira ko oukoto kombunguhiro Jesus ndja tjita, orusuvero rwoye ku ye na ku Ihe opu maru kurire ko. Kunao, ma rire nawa tji wa tjiti omakonḓononeno ohunga notjisuta tjonguturiro.

16. Okuhonga varwe ohunga notjisuta tjonguturiro maku tu vatere vi? (Tara kotjiperendero tjokombanda yokambo nga.)

¹⁶ Honga varwe ohunga notjisuta tjonguturiro. Otjikando atjihe tji matu raere varwe ohunga notjisuta tjonguturiro ondangi yetu i kurira ko. Eṱe tu nomambo tjiva omawa nozovidio nḓu maze tu vatere okukahururira varwe ohunga nokutja ongwaye Jesus tje tu ṱira. Otjotjihorera, matu yenene okuungurisa ehongwa 4 rokambrosjure nga Ombuze ombwa okuza ku Mukuru! Ehongwa ndo ri nepu ndi, “Jesus Kristus omungendu?” Poo matu yenene okuhungirira kekondwa 5 rembo ndi Ombeibela mai yenene okutuhonga tjike? Ekondwa ndo ri nepu ndi, “Otjisuta tjonguturiro ootjiyandjewa otjinenenene okuza ku Mukuru.” Nu ombura aihe tu kayenda komurungu okuraisa ondangi kotjisuta tjonguturiro mokukara pomazemburukiro wonḓiro ya Jesus, nokuṋanga varwe okuyekukara puna eṱe. Tjiri Jehova we tu pa ondjingonekero yokuhonga varwe ohunga nOmuna we.

17. Ongwaye otjisuta tjonguturiro tji tji ri otjiyandjewa otjinenenene okuza ku Mukuru?

¹⁷ Nokuhina omakeyakeyero eṱe tu nomapu omawa okukayenda komurungu okuraisa ondangi kotjisuta tjonguturiro. Mena rotjisuta tjonguturiro, eṱe tu yenena okukara noupanga ouwa kuna Jehova nandarire kutja kaweṱe ohomonena. Nu mena rotjisuta tjonguturiro oviungura vya Satan mavi kayandekwa nga aruhe. (1 Joh. 3:8) Nu wina mena rotjisuta tjonguturiro ondando ya Jehova kehi mai kayenenisiwa. Ehi arihe ma ri rire oparadisa. Omundu auhe ngu mwa hakaene ma suvere Jehova nokumukarera. Kunao, ngatu kondje pu matu yenene eyuva arihe okupaha omiano mu matu yenene okuraisa ondangi yetu kotjisuta tjonguturiro, tji tji ri otjiyandjewa otjinenenene Mukuru tja yandja kovandu.