1-2. Anni i tavvu, anna ngatta mawag tam yatun?

TAGGA ta nakaliwa i perfekto nga tolay nga si Adan, nawawanna anna na gaka-gakana i chansa nga mattolay tu mannanayun. Awan tu puede nga ipambar ni Adan ta kingnguana. Sinadyana i makaliwa. Ngem kumusta gapa i ánana? Awan tu nakaliwatadda anna ari tu ira i makagafu nu ngatta nakaliwa si Adan. (Roma 5:12, 14) Mepangngo laman nga matay si Adan megafu ta kingnguana. Ngem egga kari i remediu tapenu makapattolay lagapa tu mannanayun i gaka-gaka ni Adan? Wan! Ari nabbayag kabalin nga nakaliwa si Adan, sisinu nga nipakannammu ni Jehova nu kunnasina nga ipaliag ta liwa anna patay i minillion nga gaka-gaka ni Adan. (Gen. 3:15) Egga i mepangngo nga tiempo nu kanni nga zinog ni Jehova i Anana taw ta davvun tapenu “iyawa na i inango na tapenu matavvu i aru nga totolay.”​—Mar. 10:45; Juan 6:51.

² Anni i tavvu? Ta Cristiano nga Griego nga Katurakan, i tavvu ay i balor nga pinagan ni Jesus tapenu magatang uli i nawawan ni Adan. (1 Cor. 15:22) Ngatta kawagattam i tavvu? Base gare ta hustisia ni Jehova nga nakagi ta Dob, inango lagapa i katali na inango. (Ex. 21:23, 24) Nawawan ni Adan i perfekto nga inangona. Tapenu gafu matuttul i hustisia na Dios, nisakrifisio ni Jesus i perfekto nga inangona. (Roma 5:17) Megafu tatun, si Jesus i nabbalin tu “Mannanayun nga Yama” na ngamin nga mangurug ta tavvu.​—Isa. 9:6; Roma 3:23, 24.

3. Segun ta Juan 14:31 anna 15:13, ngatta sigga-paran si Jesus nga isakrifisio i perfekto nga inangona?

³ Sigga-paran si Jesus nga isakrifisio i inangona megafu ta kuruga ayatanna ittam anna i nelangitan nga Yama tam. (Bibbigan i Juan 14:31; 15:13.) Megafu tatun nga aya, determinadu yayya nga mattalupaddian nga matalo adde ta patena tapenu  makuana i uray na Yamana. Megafu ta kingngua ni Jesus, matuppal noka i orihinal nga gakkag ni Jehova para ta totolay anna ta davvun. Gigiammuattam taw nga artikulo nu ngatta nipamavulun na Dios nga grabe i nikaziga-riga ni Jesus nigena nga natay. Ammuattam gapa i ehemplo na tadday nga nattura ta Biblia nga kuruga nangappresia ta tavvu. Tapus paguruvovugattam nu kunnasi tam mepasingan nga mappappabalo ittam ta tavvu anna nu kunnasi tam nga mas maappresia i sakrifisio ni Jehova anna ni Jesus para nittam.

4. Iyistoriam nu kunnasi nga natay si Jesus.

⁴ Imajinammu i ultimu nga aggaw ni Jesus taw ta davvun. Awayyana nakuan nga agalan i rinivu-rivu nga anghel tapenu protektadda yayya ngem nipamavulunna nga arestowan yayya na Romano ira nga suddalu. Binubbubbugda si Jesus. (Mat. 26:52-54; Juan 18:3; 19:1) Nilatigoda yayya adde ta tullo yatun ta tabbi anna pattagna. Tapus nipakattuda nisa i madaddammo nga kayu maski nu maddaga-daga i likugna. Kinattu ni Jesus i estaka mappange ta lugar nu sitawda yayya nga patayan. Ngem nadafudda i tadday nga tolay, tapus finuersa yayya na suddalu ira nga kattuan i estaka megafu ta nofu ngana i sikan ni Jesus nga akkatan yatun. (Mat. 27:32) Ta pakadde ni Jesus tari, nipato na suddalu ira i limi-lima anna i takki ni Jesus ta estaka. Megafu ta dammo na baggi ni Jesus, sumussussu i taki na bigag megafu ta nikepatona. Maddangngul i kokkofunna anna tumatangi i yenana. Ngem paguyoyungan yayya na mammaguray ira nga Judio. (Luc. 23:32-38; Juan 19:25) Piga oras nga naziga-riga si Jesus. Megafu ta posision na baggina, marigatan nga maffunsina i futu anna i bagana yatutta mas marigatan yayya nga maginango. Magimmamatay ngana si Jesus ngem ammuna nga matalo yayya. Nige nga magappo i inangona, nakimallo yayya kani Jehova. Naddukag yayya tapus natay ngana yayya. (Mar. 15:37; Luc. 23:46; Juan 10:17, 18; 19:30) Sisinu, mataka-taki, anna kappasirang i nikapatay ni Jesus!

5. Anni i mas pinroblema ni Jesus anne ta pinamateda nisa?

⁵ Para kani Jesus, ari tu i pinamateda nisa i pinakamariga nga inattammanna. Mas nga pinroblemana i rason nu ngatta patayadda yayya. Inakusadda gare yayya nga awan tu pangirespetona ta Dios onu ta ngagan na Dios. (Mat. 26:64-66) Mavuru-vurung si Jesus tatun nga akusasion yatutta iddanamanna nga ilisi yayya na Yamana ta kunnatun nga kepasiranan. (Mat. 26:38, 39, 42) Ngatta gafu ta nipamavulun ni Jehova nga maziga-riga anna matay i iddedduna nga Ana? Ammuattam i tallu nga rason.

6. Ngatta mawag nga mebesing si Jesus ta estaka?

⁶ Mawag nga mebesing si Jesus ta tadday nga estaka tapenu mapalubbangan i Judio ira ta kebariaw. (Gal. 3:10, 13) Nebariaw ira megafu ta nipromesada nga tuttuladda i Dob na Dios ngem ariadda mabba kingngua yatun. Fuera paga ta kebariawda, matay gapa ira megafu ta gaka-gaka ira ni Adan. (Roma 5:12) Segun ta Dob na Dios ta Israel, mapapatay i maski sinni nga nakaliwa. Tapus mebesing i baggina ta tadday nga estaka. * (Deut. 21:22, 23; 27:26) Yayya nga turi ta nebesing si Jesus ta tadday nga estaka, gittana yayya i nebariaw para ta Judio ira tapenu mapalubbangan ira taw nga kebariaw. Mabbenefisio gapa ira ta sakrifisiona maski nu pinammanakitadda yayya.

7. Anni i mekadua nga rason nu ngatta nipamavulun na Dios nga mazziga-riga i Anana?

 ⁷ Yaw i mekadua nga rason nu ngatta nipamavulun na Dios nga maziga-riga i Anana. Passanay yatun kani Jesus sonu mabbalin yayya nga Atannang nga Pari tam. Naekspiriensa ni Jesus nu kunnasi kariga nga tuttulan i Dios nu grabe i kapurueba. Kuruga narigatan yayya yatutta “nakimemallo yaya ta masikan nga ngaral anna aru nga lulua.” Megafu ta kunnatun i naekspiriensa ni Jesus, magga malippawana mismu i kawagattam ira anna moffunanna ittam nu matenta ittam. Daka-dakal i pappabalo tam nga sinunno ni Jehova i minaggallallo nga Atannang nga Pari tam nga “makatageno ta kalaray na kata-katolay tam”!—Heb. 2:17, 18; 4:14-16; 5:7-10.

8. Anni i mekatallu nga rason nu ngatta nipamavulun na Dios nga grabe nga mapurueban si Jesus?

⁸ Yaw i mekatallu nga rason. Nipamavulun ni Jehova nga grabe nga mapurueban si Jesus tapenu matabbag yaw nga importante nga pakkiavu: Makapattalupaddian kari nga matalo i tolay nu grabe nga mapurueban? Kakkagian ni Satanas nga ari! Tapus massesserbi kanu laman ta Dios i totolay megafu ta pammakapianadda. Kuruganna gapa nga kagitta ni Adan, ariadda nga iddukan si Jehova. (Job 1:9-11; 2:4, 5) Makkomfiansa si Jehova ta kinamatalo na Anana, yatutta nipamavulunna nga mapurueban yayya adde ta patay. Nakapattalupaddian nga matalo si Jesus anna napakurugna nga laddug si Satanas.

9. Anni nga ehemplo i nipasingan ni apostol Juan para nittam?

⁹ Masikan i pangurug na aru nga Cristiano megafu ta tuddu meyannung ta tavvu. Ari ira nagimmang nga mallayyagayya maski nu makokkontra ira. Inattammadda gapa i ngamin nga klase na kapurueba ta interu pattoleda. Nonopan i ehemplo ni apostol Juan. Posible nga maturu tu 60 dagun nga matalo nga nilayyagayyana i kinakurug meyannung kani Cristo anna ta tavvu. Turi ta ma-100 ngana i dagunna, nipefuku yayya na Imperio na Roma ta fugu na Patmos. Anni i nakuana nga liwa? ‘Nilammuyagna i uvovug na Dios, anna nipakannammuna si Jesus.’ (Nep. 1:9) Makakkasta yayya nga ehemplo na pangurug anna pagatta-attam!

10. Kunnasi ipasingan na nitura ira ni Juan nga inappresiana i tavvu?

¹⁰ Masingan ta libru ira na Biblia nga nitura ni Juan i dakal nga pangayana kani Jesus anna i pangappresiana ta tavvu. Maturu tu mami-100 nga niturana i meyannung ta tavvu onu ta benefisio ira natun. Yaw i tadday nga angngarigan: “Nu egga i mattagaruli, egga i mangipakimemallo nittam ta Yama: si Jesu-Cristo nga matunung.” (1 Juan 2:1, 2) Ipasigo paga na nitura ira ni Juan i importansia na ‘pamakurug meyannung kani Jesus.’ (Nep. 19:10) Manawag nga kuruga inappresia ni Juan i tavvu. Kunnasi tam gapa mepasingan yatun?

11. Anni i makoffun tapenu malabanattam i tentasion?

¹¹ Labanan i tentasion nga makaliwa. Nu talaga appresiattam i tavvu, ariattam nakuan nonopan yaw: ‘Nu matenta ngà nga mangngua tu liwa, awayyà lagapa nga ituloy yatun. Puede ngà laman nga mangngua tu liwa tapus makkiddaw ngà ngana laman tu pamakoma.’ Nu matenta ittam nga mangngua tu liwa, kunnaw nakuan gafu i kagiattam: ‘Ta ngamin nga kingngua ni Jehova anna ni Jesus para niakan, ariakku vuluvuga makua yaw nga  gannug!’ Awayya tam gapa nga ikiddaw kani Jehova nga pasikannanna ittam anna ipakimallo tam nisa yaw: ‘Ariammà ipamavulun ta pangakkakka’ onu tentasion.​—Mat. 6:13.

12. Kunnasi tam meyaplika i 1 Juan 3:16-18?

¹² Ayatan i wawwaragim. Nu ipasingattam i kunnatun nga aya, mepasingattam gapa nga appresiattam i tavvu. Ngatta? Megafu ta niyawa ni Jesus i inangona, ari laman tu para nittam, nu ari, para gapa ta wawwaragi tam. Sigga-paran si Jesus nga natay para nira megafu ta kuruga iddukanna ira. (Bibbigan i 1 Juan 3:16-18.) Mepasingattam ta pattratu tam ta wawwaragi i pangaya tam nira. (Efe. 4:29, 31–5:2) Angngariganna, uffunattam ira nu mataki ira onu magatta-attam ira ta grabe nga problema, nelagum i kalamidad ira. Ngem anni i kuattam nu natakitan ittam ta kingngua onu kinagi na tadday nga wagi?

13. Ngatta minammakoma ittam nakuan?

¹³ Egga kari i ipappappammu nga taki na nono ta kapangngurug mu? (Lev. 19:18) Nu kunnatun, tuttulammu yaw nga tabarang: “Makkapasa-pasensia anna makkapaka-pakoma kamu nu egga i taki na nono nu ta kataggi-tadday nikamu. Mawag tu makkapaka-pakoma kamu ta kunna nipamakoma na Yafu nikamu.” (Col. 3:13) Kada pakomattam i wagi tam, mapakurug tam ta nelangitan nga Yama tam nga talaga appresiattam i tavvu. Kunnasi tam gafu nga mas paga nga appresian yaw nga regalu na Dios?

14. Anni i tadday nga makua tam tapenu mas paga nga maappresia i tavvu?

¹⁴ Mappabalo ka kani Jehova megafu ta tavvu. “Para nio, talaga importante nga kagiakku i meyannung ta tavvu ta pakimallo ku ira kadaggaw anna mappabalo ngà kani Jehova megafu tatun,” kagian na 83-anios nga si Joanna nga taga-India. Ta personal ira nga pakimallo mu kadaggaw, ikagim kani Jehova i nakuam ira nga liwa anna ikiddom i pamakomana. Siempre, nu nakaliwa ka tu madammo, kawagammu gapa i uffun na elder ira. Ginnaddaka anna meddu nga tabarangngaddaka base ta Biblia. Ipakimallo daka anna ikiddoda kani Jehova nga pakoman naka tapenu mapeggakka uli tu makasta nga relasion nisa.​—Sant. 5:14-16.

15. Ngatta egga nakuan i tiempo tam nga bibbigan anna pannonopan tu mapia i tavvu?

¹⁵ Pannonopan tu mapia i tavvu. “Kada bibbigakku i nikaziga-riga ni Jesus, makatangi  ngà,” kinagi na 73-anios nga si Sister Rajamani. Baka kunnatun gapa i matageno mu nu manono mu i grabe nga nikaziga-riga na Ana na Dios. Ngem nu mas nga pannonopammu tu mapia i pinassakrifisio ni Jesus, mas nga iddukammu yayya anna i Yamana. Tapenu mas mapannonopammu tu mapia i tavvu, ngatta ariammu nga ipersonal study yatun?

16. Anni i pammakapianattam nu ituddu tam ta tanakuan i meyannung ta tavvu? (Innan i letratu ta vungun.)

¹⁶ Tudduan i tanakuan meyannung ta tavvu. Kada ikagi tam ta tanakuan i meyannung ta tavvu, mas maappresia tam yatun. Napakaru i makakkasta ira nga publikasion anna video tam nga makoffun tapenu mepakanawag tam ta tanakuan nu ngatta natay si Jesus para nittam. Angngariganna, awayya tam nga usan i leksion 4 na brosiur nga Makakkasta nga Balita Naggafu ta Dios! I tema natun nga leksion ay “Sinni si Jesu-Cristo?” Onu awayya tam usan i kapitulo 5 na libru nga Anni i Ituddu na Biblia Nittam? I tema natun nga kapitulo ay “I Tavvu—Kakastan nga Regalu na Dios.” Kada dagun gapa, mas nga umunag i pappabalo tam ta tavvu nu magatende ittam ta Memorial na patay ni Jesus anna nu matalikarag nga imbitattam i tanakuan nga makipasselebra nittam. Fugurammu yatun nga pribilehio maggafu kani Jehova nga ituddu ta tanakuan i meyannung ta Anana!

17. Ngatta i tavvu i kakastan nga regalu na Dios ta totolay?

¹⁷ Awan tu duda nga napakaru i rasottam nu ngatta appresiattam i tavvu anna mas paga ipasingan i pappabalo tam tatun. Megafu tatun, mapeggan ittam tu madukko nga pakikkofun kani Jehova maski nu imperfekto ittam. Kunne na gapa, interamente noka nga madaral i kingngua ira na Demonio. (1 Juan 3:8) Megafu paga ta tavvu, matuppal noka i orihinal nga gakkag ni Jehova para ta davvun. Mabbalin noka tu paraiso i interu nga planeta. Ngamin noka nga tolay tari ay iddukadda si Jehova anna passerbiadda yayya. Kadaggaw gafu nakuan nga magaleg ittam tu chansa tapenu ipasingan i appresasiottam ta tavvu—i kakastan nga regalu na Dios ta totolay!