1-2. Ania ti subbot, ken apay a kasapulantayo dayta?

IDI nagbasol ti perpekto a lalaki a ni Adan, napukawna ken uray dagiti masanguanan nga annakna ti gundaway nga agbiag nga agnanayon. Saan a mapakawan ti inaramid ni Adan. Inggagarana ti nagbasol. Ngem dagiti ngay annakna? Saanda a karaman iti panagbasol ni Adan. (Roma 5:12, 14) Adda kadi maaramidan tapno maisalakanda iti sentensia nga ipapatay a pakaikarian unay ni Adan nga amada? Wen! Di nagbayag kalpasan a nagbasol ni Adan, in-inut nga impalgak ni Jehova no kasano nga ispalenna ti minilion nga annak ni Adan iti lunod a basol ken ipapatay. (Gen. 3:15) Iti tiempo nga inkeddeng ni Jehova, imbaonna ti Anakna manipud langit tapno “itedna ti biagna kas pangsubbot iti adu.”​—Mar. 10:45; Juan 6:51.

² Ania ti subbot? Iti Kristiano a Griego a Kasuratan, ti subbot ket ti gatad nga imbayad ni Jesus tapno maisubli ti napukaw ni Adan. (1 Cor. 15:22) Apay a kasapulantayo ti subbot? Ti ngamin pagalagadan ni Jehova maipapan iti hustisia sigun iti Linteg ket biag ti maibayad iti biag. (Ex. 21:23, 24) Napukaw ni Adan ti perpekto a biagna kas tao. Tapno maipatungpal ti hustisia ti Dios, insakripisio ni Jesus ti perpekto a biagna kas tao. (Roma 5:17) Gapu iti dayta, isu ti nagbalin nga “Agnanayon nga Ama” iti amin a mamati iti subbot.​—Isa. 9:6; Roma 3:23, 24.

3. Sigun iti Juan 14:31 ken 15:13, apay a situtulok ni Jesus a nangisakripisio iti perpekto a natauan a biagna?

³ Situtulok ni Jesus a nangisakripisio iti biagna gapu iti dakkel nga ayatna iti nailangitan nga Amana ken kadatayo. (Basaen ti Juan 14:31; 15:13.) Gapu iti dayta nga ayat, determinado nga agtalinaed a matalek iti unos ti panagbiagna ken mangitungpal iti pagayatan ni Amana. Inaramidna dayta babaen ti panagtalinaedna a matalek agingga ken patay. Gapu iti  inaramidna, matungpal ti orihinal a panggep ni Jehova para iti sangatauan ken iti daga. Iti daytoy nga artikulo, pagsasaritaantayo no apay nga impalubos ti Dios nga agsagaba ni Jesus iti nakaro sakbay a natay. Repasuentayo met biit ti ulidan ti maysa a mannurat iti Biblia a nauneg ti panangapresiarna iti subbot. Kamaudiananna, pagsasaritaantayo no kasano a maipakitatayo ti panagyamantayo gapu iti subbot ken no kasano a mapaunegtayo ti apresasiontayo iti sakripisio nga impaay kadatayo da Jehova ken Jesus.

4. Iladawam no kasano a natay ni Jesus.

⁴ Panunotem dagiti napasamak iti maudi nga aldaw ti biag ni Jesus ditoy daga. Mabalinna koma ti umawag iti adu a lehion dagiti anghel a mangsalaknib kenkuana. Ngem impalubosna a tiliwen dagiti Romano a soldado, a siuulpit a nangsapsaplit kenkuana. (Mat. 26:52-54; Juan 18:3; 19:1) Nagusarda iti latigo a nangderder iti lasag ti bagina. Kalpasanna, impabaklayda ti nadagsen a kayo iti agdardaran a bukotna. Nagpakpakarigat ni Jesus a nangulod iti kayo a mapan iti lugar a pangpapatayanda kenkuana. Ngem di nagbayag, adda lalaki a pinilitda a mangbagkat iti dayta. (Mat. 27:32) Idi nakadanon ni Jesus iti lugar a pakatayanna, inlansa dagiti soldado dagiti ima ken sakana iti kayo. Idi impatakderda ti kayo a nakailansaan ni Jesus, limmawa dagiti sugat a gapuanan dagiti lansa gapu iti dagsen ti bagina. Napalalo ti ladingit dagiti gagayyemna ken agsangsangit ni nanangna. Ngem linalais isuna dagiti agtuturay a Judio. (Luc. 23:32-38; Juan 19:25) Napalalo nga ut-ot ti sinagaba ni Jesus kadagiti simmaganad nga oras. Gapu iti posision ti bagina, marigrigatanen ti puso ken barana isu nga agpakpakarigat metten nga umanges. Uray no dandanin magsat ti angesna, nayebkasna pay laeng ti maudi a kararagna. Kalpasanna, nagdumog ket nauyosen ti biagna. (Mar. 15:37; Luc. 23:46; Juan 10:17, 18; 19:30) Talaga a daydi ket in-inut, nakaut-ut-ot, ken nakababain nga ipapatay!

5. Para ken Jesus, ania ti dakdakes ngem iti pamay-an ti pannakapapatayna?

⁵ Para ken Jesus, ti kadaksan a paset ti panagsagabana ket saan a ti pamay-an ti pannakapapatayna. Ad-adda a nariribukan iti darum a nakaibatayan ti panangpapatayda kenkuana. Siuulbod a naakusaran kas managtabbaaw, kayatna a sawen, awan ti panagraemna iti Dios wenno iti nagan ti Dios. (Mat. 26:64-66) Napalalo ti ladingit ni Jesus iti dayta a darum, isu a ninamnamana nga iliklik koma ni Amana iti dayta a pannakaibabain. (Mat. 26:38, 39, 42) Apay nga impalubos ni Jehova nga agsagaba ken matay ti dungdungnguenna nga Anak? Usigentayo ti tallo a rason.

6. Apay a masapul a maibitin ni Jesus iti kayo a pagtutuokan?

⁶ Umuna, masapul a maibitin ni Jesus iti kayo a pagtutuokan tapno mawayawayaan dagiti Judio iti nagpaiduma a lunod. (Gal. 3:10, 13) Immanamongda idi a tungpalenda ti Linteg ti Dios ngem dida nagtungpal. Nagbanaganna, dayta a lunod ket nayon ti pannakailunodda kas kaputotan ni managbasol nga Adan. (Roma 5:12) Sigun iti Linteg ti Dios iti Israel, masapul a mapapatay ti tao a makaaramid iti basol a maikari iti ipapatay. Kalpasanna, ti bangkayna ket mabalin a maibitin iti kayo. * (Deut. 21:22, 23; 27:26) Isu nga idi naibitin ni Jesus iti kayo a pagtutuokan, pinagbalinna a posible a magunggonaan iti datonna ti mismo a nasion a nangilaksid kenkuana.

7. Ania ti maikadua a rason nga impalubos ti Dios nga agsagaba ti Anakna?

 ⁷ Daytoy ti maikadua a rason nga impalubos ti Dios nga agsagaba ti Anakna: Sansanayenna idi ni Jesus para iti akemna iti masanguanan kas Nangato a Paditayo. Napadasan ni Jesus no kasano karigat ti agtulnog iti Dios idi napasaranna ti nagkaro a pannubok. Napalalo a rigat ti sinagabana nga uray la nagpatpatulong babaen ti kararag “a napakuyogan iti napigsa a sangsangit ken lulua.” Gapu ta napasaranna ti nasaem unay a situasion, talaga a maawatan ni Jesus dagiti kasapulantayo ken “kabaelanna[tayo] a tulongan” no “masubsubok[tayo].” Anian a yamantayo ken Jehova iti panangpilina iti maysa a naasi a Nangato a Padi a ‘maawatanna dagiti pagkapuyantayo’!​—Heb. 2:17, 18; 4:14-16; 5:7-10.

8. Ania ti maikatlo a rason nga impalubos ti Dios a mapasaran ni Jesus ti nagkaro a pannubok?

⁸ Maikatlo, impalubos ni Jehova a mapasaran ni Jesus ti nagkaro a pannubok tapno masungbatan ti maysa a napateg a saludsod: Kabaelan kadi dagiti tattao ti agtalinaed a matalek iti Dios uray mapasaranda ti nagkaro a pannubok? Para ken Satanas, saan! Ibagbagana nga agserserbi laeng dagiti tattao iti Dios gapu kadagiti managimbubukodan a rason. Mamati met ni Satanas a dagiti tattao ket kas ken amada nga Adan a saan a mangay-ayat ken Jehova. (Job 1:9-11; 2:4, 5) Sigurado ni Jehova a matalek ti Anakna. Gapu iti dayta, impalubosna a masubok ni Jesus agingga iti kabaelan nga ibturan ti tao. Nagtalinaed a matalek ni Jesus ket pinaneknekanna nga ulbod ni Satanas.

9. Ania ti inyulidan kadatayo ni apostol Juan?

⁹ Gapu iti pannursuro maipapan iti subbot, bimmileg ti pammati ti adu a Kristiano. Intultuloyda ti nangasaba iti laksid ti ibubusor ken inibturanda ti amin a kita ti suot iti unos ti panagbiagda. Usigentayo ti ulidan ni apostol Juan. Simamatalek nga inkasabana ti kinapudno maipapan ken Kristo ken iti subbot, posible nga iti nasurok nga 60 a tawen. Idi dandanin 100 ti tawenna, impagarup ti Imperio ti Roma nga isu ket pangta iti seguridad isu nga imbaludda iti isla ti Patmos. Ti basolna? ‘Ipakpakaammona ti maipapan iti Dios ken saksaksianna ti maipapan ken Jesus.’ (Apoc. 1:9) Nagsayaat nga ulidan iti pammati ken panagibtur!

10. Kasano nga ipakita dagiti insurat ni Juan nga inapresiarna ti subbot?

¹⁰ Kadagiti insurat ni Juan a libro iti Biblia, inyebkasna ti nauneg nga ayatna ken Jesus ken ti apresasionna iti subbot. Nasurok a namin-100 a dinakamatna ti subbot wenno dagiti gunggona nga ipaay dayta. Kas pagarigan, insurat ni Juan: “No adda asinoman nga agbasol, addaantayo iti katulongan a kadua ti Ama, ni Jesu-Kristo, daydiay nalinteg.” (1 Juan 2:1, 2) Impaganetget met dagiti insurat ni Juan ti kinapateg ti “panangsaksi ken Jesus.” (Apoc. 19:10) Nalawag a nauneg ti panangapresiar ni Juan iti subbot. Kasanotayo met a maipakita dayta?

11. Ania ti makatulong kadatayo a manglaban iti sulisog?

¹¹ Labanam ti sulisog nga agbasol. No talaga nga ap-apresiarentayo ti subbot, saantayo nga irason: ‘Saanen a masapul nga agreggetak a manglaban iti sulisog. Ngamin no agbasolak, makapagkiddawakto met laeng iti pammakawan.’ Imbes a kasta, no masulisogtayo nga agaramid iti di umiso, ibagatayo: ‘Saan! Kalpasan ti amin nga inaramid kaniak ni Jehova ken ni Jesus, apay koma nga aramidek dayta?’  Mabalintay met a kiddawen ken Jehova a pabilgennatayo, isu nga ipakaasitayo: ‘Dimo ipalubos a tumulokak iti sulisog.’​—Mat. 6:13.

12. Kasanotayo a mayaplikar ti balakad ti 1 Juan 3:16-18?

¹² Ayatem dagiti kakabsat. No ipakitatayo ti kasta nga ayat, ipakpakitatayo met nga ap-apresiarentayo ti subbot. Apay? Gapu ta inted ni Jesus ti biagna saan la a para kadatayo no di ket para met kadagiti kakabsat. No situtulok idi a matay para kadakuada, nalawag a nakapatpategda kenkuana. (Basaen ti 1 Juan 3:16-18.) Ipakpakitatayo nga ay-ayatentayo dagiti kakabsat iti pamay-an a panangtratotayo kadakuada. (Efe. 4:29, 31–5:2) Kas pagarigan, tulongantayo ida no masakitda wenno no ib-ibturanda dagiti nakaro a suot, a pakairamanan dagiti natural a didigra. Ngem ania ngay ti masapul nga aramidentayo no adda inaramid wenno imbaga ti maysa a kapammatiantayo a nangpasakit iti riknatayo?

13. Apay a masapul a manangpakawantayo?

¹³ Adda kadi tendensiam nga agipempen iti sakit ti nakem iti maysa a kapammatiam? (Lev. 19:18) No wen, surotem daytoy a balakad: “Itultuloyyo ti agiinnanus ken situtulok nga agpipinnakawan uray no adda pangibatayan ti maysa nga agreklamo maibusor iti sabali. Kas iti situtulok a panangpakawan kadakayo ni Jehova, kasta met ti aramidenyo.” (Col. 3:13) Kada pakawanentayo dagiti kakabsattayo, pampaneknekantayo iti nailangitan nga Amatayo a talaga nga ap-apresiarentayo ti subbot. Kasanotayo a maitultuloy a paunegen ti apresasiontayo iti daytoy a sagut ti Dios?

14. Ania ti maysa a pamay-an a mapaunegtayo ti apresasiontayo iti subbot?

¹⁴ Agyamanka ken Jehova gapu iti subbot. “Para kaniak, masapul a dakamatek ti subbot tunggal agkararagak iti kada aldaw ken agyamanak ken ni Jehova gapu iti dayta,” kuna ti 83 ti tawenna a kabsat nga agnagan Joanna a taga-India. Kadagiti personal a kararagmo, mangpanunotka kadagiti espesipiko a nagkamaliam iti agmalem sa kiddawem ken Jehova a pakawanennaka. Siempre, no nakaaramidka iti nadagsen a basol, masapul met nga agpatulongka kadagiti panglakayen. Denggendaka ken mangipaayda iti naayat a balakad manipud iti Sao ti Dios. Ikararagandaka ket kiddawenda ken Jehova a pakawanennaka babaen ti subbot ni Jesus ‘tapno umimbagka’ iti naespirituan.​—Sant. 5:14-16.

15. Apay a masapul nga iwayaantayo ti agbasa ken agutob maipapan iti subbot?

 ¹⁵ Utobem ti maipapan iti subbot. “No basaek ti maipapan iti panagsagaba ni Jesus,” kuna ti 73 ti tawenna a kabsat a ni Rajamani, “makasangitak.” Mabalin a malidayanka met a mangpanunot iti kasta unay a panagsagaba ti Anak ti Dios. Ngem no ad-adda nga utobem ti daton ni Jesus, lallalo nga umuneg ti ayatmo kenkuana ken iti Amana. Tapno mautobmo ti subbot, dayta koma a topiko ti aramidem kas espesial a proyekto iti panagadalmo.

16. Kasano a magunggonaantayo iti panangisurotayo maipapan iti subbot? (Kitaen ti ladawan iti akkub.)

¹⁶ Isurom ti maipapan iti subbot. Kada ibagatayo iti sabsabali ti maipapan iti subbot, umun-uneg ti panangapresiartayo iti dayta. Addaantayo kadagiti nagsayaat nga alikamen a mausar iti panangisuro no apay a masapul a matay ni Jesus para kadatayo. Kas pagarigan, mabalintayo nga usaren ti leksion 4 iti broshur a Naimbag a Damag Manipud iti Dios. Dayta a leksion ket napauluan “Siasino ni Jesu-Kristo?” Wenno mabalintayo nga usaren ti kapitulo 5 ti libro nga Ania ti Isuro ti Biblia Kadatayo? Dayta a kapitulo ket napauluan “Ti Subbot​​—Kapatgan a Regalo ti Dios.” Ken kada tawen, mapaunegtayo ti panagyamantayo gapu iti subbot no umatendertayo iti Memorial ti ipapatay ni Jesus ken no sireregta nga awisentayo ti sabsabali a makikadua kadatayo. Talaga a maysa a pribilehio manipud ken Jehova ti panangisuro maipapan iti Anakna!

17. Apay a ti subbot ti kapatgan a regalo ti Dios para iti sangatauan?

¹⁷ Awan duadua nga adda nasayaat a rason a patanoren ken taginayonentayo ti nauneg nga apresasiontayo iti subbot. Gapu iti subbot, mabalintayo ti maaddaan iti nasinged a relasion ken Jehova uray no imperpektotayo. Gapu iti subbot, madadaelto ti amin nga aramid ti Diablo. (1 Juan 3:8) Gapu iti subbot, matungpalto ti orihinal a panggep ni Jehova para iti daga. Agbalinton a paraiso ti intero a daga. Amin a masabatmo ket kapadamton a mangay-ayat ken agserserbi ken Jehova. Inaldaw koma a mangbiroktayo iti pamay-an a maipakitatayo nga ap-apresiarentayo ti subbot​—ti kapatgan a regalo ti Dios para iti sangatauan!