1, 2. Kʼaʼut naq li Jesús kixqʼaxtesi li xyuʼam saʼ qakʼabʼaʼ, ut kʼaʼut naq naʼajmank chiqu?

NAQ laj Adán, li tzʼaqal re ru li xyuʼam, kimaakobʼk, kixsach li junelik yuʼam choʼq re ut choʼq rehebʼ li ralal xkʼajol li teʼwanq moqon. Laj Adán maaʼani tkoloq re chiru li kixbʼaanu, xbʼaan naq yal kiraj xchʼool naq kimaakobʼk. Joʼkan naq xkʼulubʼ naq tkamsiiq. Abʼan, ut ebʼ li ralal xkʼajol? Ebʼ aʼan moko xeʼxbʼaanu ta li kixbʼaanu laj Adán (Rom. 5:12, 14). Ma naru teʼkoleʼq chiru li kamk? Chʼolchʼo naq joʼkan. Tojaʼ ajwiʼ kimaakobʼk laj Adán naq li Jehobʼa kixye chanru tixkolebʼ li ralal xkʼajol laj Adán chiru li maak ut li kamk (Gén. 3:15). Saʼ xhoonalil, li Jehobʼa tixtaqla chaq li Ralal saʼ Ruuchichʼochʼ «re xkʼeebʼal li xyuʼam re xkolbʼalebʼ rix chixjunilebʼ» (Mar. 10:45; Juan 6:51).

² Kʼaʼut naq li Jesús kixqʼaxtesi li xyuʼam saʼ qakʼabʼaʼ? Saʼ xtasal li Santil Hu li kitzʼiibʼamank saʼ Griego naxchʼolobʼ naq aʼan li kixtoj li Jesús re xtawbʼal wiʼ chik li kixsach laj Adán (1 Cor. 15:22). Kʼaʼut naq naʼajmank chiqu? Xbʼaan naq li Xchaqʼrabʼ laj Moisés naxye naq li xtiikilal xchʼool li Jehobʼa naxtzʼaama naq ttojmanq rix «[...]yuʼam rikʼin yuʼam» (Éx. 21:23, 24). Laj Adán kixsach li yuʼam li tzʼaqal re ru. Joʼkan bʼiʼ, re naq tbʼaanumanq li kixye li Jehobʼa, tento naq li Jesús tixqʼaxtesi li xyuʼam li tzʼaqal re ru (Rom. 5:17). Chi joʼkaʼan, li Jesús nakanaak joʼ «Yuwaʼbʼej chi junelik» choʼq rehebʼ li teʼxpaabʼ naq aʼan kixqʼaxtesi li xyuʼam saʼ xkʼabʼaʼebʼ (Is. 9:6; Rom. 3:23, 24).

3. Joʼ naxye saʼ Juan 14:31 ut 15:13, kʼaʼut naq li Jesús kixqʼaxtesi li xyuʼam li tzʼaqal re ru?

 ³ Saʼ xkʼabʼaʼ naq naxra li Xyuwaʼ ut nokooxra ajwiʼ laaʼo, li Jesús kixqʼaxtesi li xyuʼam (taayaabʼasi Juan 14:31; 15:13). Li rahok aʼin kiʼekʼasink re chi xbʼaanunkil li rajom li Xyuwaʼ ut chi wank saʼ tiikilal chiru toj saʼ xkamik. Chi joʼkaʼan, ttzʼaqloq ru li rajom li Yos choʼq rehebʼ li poyanam ut choʼq re li Ruuchichʼochʼ. Saʼ li tzolom aʼin tqil kʼaʼut naq li Yos kixkanabʼ naq qʼaxal trahobʼtesiiq li Jesús naq tkamsiiq? Tqatzʼil ajwiʼ li kixbʼaanu jun rehebʼ li kixtzʼiibʼa li Santil Hu re xkʼutbʼesinkil naq oxloqʼ chiru naq li Jesús kixqʼaxtesi li xyuʼam saʼ qakʼabʼaʼ. Ut saʼ xraqik tqatzʼil rix chanru naq laaʼo ajwiʼ rajlal kutan tqakʼutbʼesi naq oxloqʼ chiqu ut naq naqabʼanyoxi li kixbʼaanu li Jehobʼa ut li Jesús saʼ qakʼabʼaʼ.

4. Seeraqʼi chanru kikamk li Jesús.

⁴ Qayalaq xkʼoxlankil kʼaru kixkʼul li Jesús naq jun kutan aj chik kiwank saʼ Ruuchichʼochʼ. Kixkanabʼ naq tchapeʼq ut tteniiq xbʼaanebʼ laj puubʼ re Roma usta kiruuk raj xbʼoqbʼal naabʼalebʼ li ánjel re naq tkoleʼq (Mat. 26:52-54; Juan 18:3; 19:1). Xeʼxrap chi tzʼuum ut aʼin naxmichʼ li xtibʼel. Ut moqon, usta nujenaq chi kikʼ li xyirix (xxaal rit), xeʼxkʼe chi xpaqonkil jun li cheʼ li jwal aal. Li Jesús kiʼok xjukukinkil li cheʼ toj saʼ li naʼaj bʼarwiʼ tkamsiiq. Abʼan ebʼ laj puubʼ re Roma xeʼxmin ru jun li winq re xpaqonkil li cheʼ (Mat. 27:32, TNM). Naq kiwulak saʼ li naʼaj bʼarwiʼ tkamsiiq, ebʼ li xikʼ nekeʼilok re keʼxklawxi li ruqʼ ut li roq chiru li cheʼ. Naq kikanaak chi tʼuytʼu, li raalal naxbʼaanu naq qʼaxal tnimanq li xtiqʼilal xbʼaan li klawx. Naq ebʼ li ramiiw ut li xnaʼ yookebʼ chi yaabʼak xbʼaan xrahilebʼ xchʼool, ebʼ laj judiiy li nekeʼawabʼejink saʼ xbʼeen li tenamit, nekeʼxseʼe li Jesús (Luc. 23:32-38; Juan 19:25). Chiru naabʼal hoor kixkuy aʼin. Inkʼaʼ chik naxkuy li raanm ut li xpospoʼoy, ut qʼaxal nachʼaʼajkoʼk chiru musiqʼak. Naxnaw naq kiwank saʼ tiikilal, joʼkan naq, naq yook chi osoʼk li xmetzʼew kitijok chiru li Jehobʼa. Tojaʼ naq kixkʼutzubʼ li xjolom ut kikamk (Mar. 15:37; Luc. 23:46; Juan 10:17, 18; 19:30). Relik chi yaal naq ra, xutaanal ut chiru naabʼal hoor kixkuy aʼin!

5. Kʼaʼut naq maawaʼ li rahobʼtesiik li kixkʼul li Jesús naq kikamsiik li qʼaxal kikʼehok re xkʼaʼuxl?

⁵ Li qʼaxal kixkʼe xkʼaʼuxl li Jesús aʼan li kiqʼabʼaak wiʼ re naq tkamsiiq, maawaʼ chanru kikamsiik. Kiqʼabʼaak chi xmaajewankil li Yos ut li xkʼabʼaʼ (Mat. 26:64-66). Xkʼoxlankil aʼin qʼaxal naxkʼe xkʼaʼuxl li Jesús, ut naroybʼeni raj naq li Xyuwaʼ trisi saʼ xbʼeen li xutaan aʼin (Mat. 26:38, 39, 42). Kʼaʼut naq li Jehobʼa kixkanabʼ naq trahobʼtesiiq ut tkamsiiq li xraarokil Alal? Qilaq oxibʼ xyaalal.

6. Kʼaʼut naq tento ttʼuyubʼaaq li Jesús chiru cheʼ?

⁶ Xbʼeen, tento naq ttʼuyubʼaaq li Jesús chiru cheʼ re naq trisi saʼ xbʼeenebʼ laj judiiy jun li maajewank (Gál. 3:10, 13). Xeʼmaajewaak xbʼaan naq xeʼxyeechiʼi xpaabʼankil li Xchaqʼrabʼ li Yos ut inkʼaʼ xeʼxbʼaanu. Maajewanbʼilebʼ ajwiʼ xbʼaan naq xeʼrechani li xmaak laj Adán (Rom. 5:12). Li Chaqʼrabʼ li kixkʼe li Yos rehebʼ laj Israel naxye naq wi xkʼulubʼ naq tkamsiiq junaq li kristiʼaan xbʼaan li maak li kixbʼaanu, tento tkamsiiq. Wank sut, naq ak xkamsiik junaq li kristiʼaan natʼuyubʼaak chiru cheʼ (Deut. 21:22, 23; 27:26). * Chi joʼkaʼan, naq kitʼuyubʼaak li Jesús chiru cheʼ, kixbʼaanu naq li tenamit li kitzʼeqtaanank re tixtaw ajwiʼ rusilal li xkamik.

7. Bʼar wank li xkabʼ xyaalal naq li Jehobʼa kixkanabʼ naq trahobʼtesiiq li Ralal?

⁷ Xkabʼ, li Jehobʼa kixkanabʼ naq li Ralal trahobʼtesiiq  re xkawresinkil re naq truuq xbʼaanunkil chiʼus li xkʼanjel joʼ Xyuwaʼil aj Tij. Li Jesús kixnaw naq qʼaxal chʼaʼaj xpaabʼankil li Yos naq kaw nokoorahobʼtesiik. Kirekʼa naq inkʼaʼ chik naxkuy, joʼkan naq «kiʼelajink chi kaw xyaabʼ xkux ut rikʼin xyaʼal ru» naq kitijok chiru li Yos. Relik chi yaal, saʼ xkʼabʼaʼ naq kixkʼul chixjunil li rahilal aʼin, li Jesús naxtaw qu ut «naru xtenqʼankilebʼ» li nekeʼaaleek. Peʼyaal naq kʼajoʼ naqabʼanyoxi naq li Jehobʼa kixxaqabʼ jun Xyuwaʼil aj Tij li «naxnaw ruxtaanankil ut xtoqʼobʼankil qu»? (Heb. 2:17, 18; 4:14-16; 5:7-10).

8. Bʼar wank li rox xyaalal naq li Jehobʼa kixkanabʼ naq tyaleʼq rix li Jesús toj saʼ xkamik?

⁸ Rox, li Jehobʼa kixkanabʼ naq kaw trahobʼtesiiq li Jesús re xsumenkil li xnimal ru patzʼom aʼin: Ma teʼruuq ebʼ li kristiʼaan wank saʼ tiikilal chiru li Yos usta qʼaxal kaw tyaleʼq rixebʼ? Laj Tza naxye naq inkʼaʼ tooruuq, xbʼaan naq naxye naq inkʼaʼ nokookʼanjelak chiru li Jehobʼa chi anchal qachʼool. Joʼkan ajwiʼ, naxkʼoxla naq, joʼ laj Adán, laaʼo inkʼaʼ naqara li Jehobʼa (Job 1:9-11; 2:4, 5). Saʼ xkʼabʼaʼ naq li Jehobʼa naxnaw naq li Ralal inkʼaʼ tixqʼet ribʼ chiru, kixkanabʼ naq tyaleʼq rix toj saʼ xkamik. Saʼ xkʼabʼaʼ naq li Jesús inkʼaʼ kixqʼet ribʼ chiru li Yos, kixkʼutbʼesi naq laj Tza aj tikʼtiʼ.

9. Kʼaru li eetalil kixkanabʼ li apóstol Juan?

⁹ Naabʼalebʼ li hermaan nekeʼxkʼul li xikʼ ileʼk ut jalan chik rahilal; abʼanan, inkʼaʼ nekeʼxkanabʼ puktesink usta cheekebʼ chik xbʼaan naq kawebʼ li xpaabʼal chirix li xkamik li Jesús. Qatzʼilaq rix li kixbʼaanu li apóstol Juan. Numenaq tana 60 chihabʼ kixpuktesi li yaal chirix li Jesús ut chirix li xkamik. Maare wank jun siʼeent chihabʼ re, naq li awabʼej re Roma kixtaqla chi preexil saʼ li naʼajej Patmos xbʼaan naq kixkʼoxla naq naru naxkʼe saʼ chʼaʼajkilal li xtenamit. Kʼaʼut? «Saʼ xkʼabʼaʼ li Raatin li Yos ut saʼ xkʼabʼaʼ xchʼolobʼankil resil li Jesus» (Apoc. 1:9). Kʼajoʼ xchʼinaʼusal li eetalil kixkanabʼ chirix li paabʼal ut li kuyuk!

10. Chanru kixkʼutbʼesi laj Juan saʼebʼ li xtasal li Santil Hu li kixtzʼiibʼa naq qʼaxal oxloqʼ chaq chiru naq li Jesús kixqʼaxtesi li xyuʼam saʼ qakʼabʼaʼ?

¹⁰ Saʼebʼ li xtasal li Santil Hu li kixtzʼiibʼa, laj Juan kixye naq qʼaxal naxra li Jesús ut naq qʼaxal oxloqʼ chiru naq kixqʼaxtesi li xyuʼam saʼ qakʼabʼaʼ. Saʼebʼ li hu aʼan, numenaq jun siʼeent sut naʼaatinak chirix li xkamik li Jesús ut li rusilal li naxkʼam chaq. Jun eetalil, aʼan kixtzʼiibʼa: «Wi wanq junaq taamaakobʼq, wank jun aj aatinanel chiqix chiru li Yuwaʼbʼej, aʼ li Jesukriist, li tiik xchʼool» (1 Juan 2:1, 2). Joʼkan ajwiʼ, kixye naq jwal aajel ru xkʼutbʼal li yaal chirix li Jesús (Apoc. 19:10). Relik chi yaal, qʼaxal oxloqʼ chaq chiru laj Juan naq li Jesús kixqʼaxtesi li xyuʼam saʼ qakʼabʼaʼ. Chanru tooruuq xkʼutbʼesinkil naq qʼaxal oxloqʼ ajwiʼ chiqu laaʼo?

11. Kʼaru ttenqʼanq qe re naq inkʼaʼ tootʼaneʼq saʼ li aaleek?

¹¹ Qakuyaq qibʼ chiru li maak. Wi tzʼaqal yaal naq oxloqʼ chiqu naq li Jesús kixqʼaxtesi li xyuʼam saʼ qakʼabʼaʼ, moko tqaye ta: «Moko aajel ta ru naq tinkuy wibʼ chiru li aaleek, naru ninmaakobʼk ut moqon tinpatzʼ xkuybʼal inmaak» Naq tchalq saʼ qabʼeen junaq li aaleek, tqaye bʼan: «Maajoqʼe bʼiʼanan! Ak ninnaw li kixbʼaanu li Jehobʼa ut li Jesús saʼ inkʼabʼaʼ! Chan put ru naq tinbʼaanu li maaʼusilal aʼin?». Joʼkan ajwiʼ, tooruuq xpatzʼbʼal qatenqʼankil re li Jehobʼa ut xtzʼaamankil re: «Moohaakanabʼ chi tʼaneʼk saʼ li aaleek» (Mat. 6:13).

12. Chanru tqayuʼami li naʼlebʼ li natawmank saʼ 1 Juan 3:16-18?

 ¹² Qarahaq ebʼ li qechpaabʼanel. Naq naqabʼaanu aʼin, naqakʼutbʼesi naq oxloqʼ ajwiʼ chiqu li xkamik li Jesús, xbʼaan naq li Jesús moko kaʼaj tawiʼ saʼ qakʼabʼaʼ kixqʼaxtesi li xyuʼam, kixqʼaxtesi ajwiʼ saʼ xkʼabʼaʼebʼ li qechpaabʼanel. Aʼan kikamk saʼ xkʼabʼaʼebʼ xbʼaan naq qʼaxal naxrahebʼ (taayaabʼasi 1 Juan 3:16-18). Ut laaʼo naqakʼutbʼesi naq naqarahebʼ naq naqakʼe qachʼool chirixebʼ (Efes. 4:29, 31–5:2). Naqatenqʼahebʼ naq yajebʼ malaj naq kaw yookebʼ chi rahobʼtesiik, maare naq nachalk junaq li kaqsut-iqʼ malaj junaq li nimla rahilal. Abʼan, chanru toonaʼlebʼaq naq junaq li hermaan tixye malaj tixbʼaanu junaq li naʼlebʼ li tixtochʼ qachʼool?

13. Kʼaʼut tento tookuyuq maak?

¹³ Ma kʼaynaqo chi xxokbʼal saʼ qachʼool li nekeʼxbʼaanu qe ebʼ li junchʼol? (Lev. 19:18). Wi joʼkan, qayuʼamiq li naʼlebʼ aʼin: «Chaabʼilaqex bʼan cheribʼil eeribʼ, aj uxtaanaqex, chekuyaq eemaak cheribʼil eeribʼ, joʼ ajwiʼ naq li Yos kixkuy eemaak saʼ xkʼabʼaʼ li Kriist» (Efes. 4:32). Naq naqakuy xmaak junaq li hermaan, naqakʼutbʼesi chiru li qachoxahil Yuwaʼ naq relik chi yaal naq oxloqʼ chiqu naq li Jesús kixqʼaxtesi li xyuʼam saʼ qakʼabʼaʼ. Chanru tqakʼutbʼesi rajlal kutan naq qʼaxal oxloqʼ chiqu naq li Jesús kixqʼaxtesi li xyuʼam saʼ qakʼabʼaʼ?

14. Kʼaru ttenqʼanq qe re naq rajlal kutan tqakʼutbʼesi naq qʼaxal oxloqʼ chiqu naq li Jesús kixqʼaxtesi li xyuʼam saʼ qakʼabʼaʼ?

¹⁴ Qabʼanyoxiq re li Jehobʼa naq li Jesús kixqʼaxtesi li xyuʼam saʼ qakʼabʼaʼ. Li xJoanna jun li qechpaabʼanel li wank 83 chihabʼ re ut wank saʼ li tenamit India, naxye: «Ninkʼoxla naq rajlal kutan naq nintijok tento tinʼaatinaq rikʼin li Jehobʼa chirix li xkamik li Ralal ut tinbʼanyoxi re». Naq tootijoq saʼ junesal, qayehaq re li Jehobʼa li qapaltil ut qatzʼaamaq re, naq chixkuyaq qamaak. Abʼanan, wi xootʼaneʼk saʼ jun li nimla maak, tento ajwiʼ tqapatzʼ qatenqʼankil rehebʼ li cheekel winq. Ebʼ aʼan tooʼeʼrabʼi ut saʼ tuulanil teʼroksi li Santil Hu re xkʼebʼal qanaʼlebʼ. Teʼtijoq chiqix ut teʼxtzʼaama re li Jehobʼa naq chixkuyaq li qamaak saʼ xkʼabʼaʼ li xkamik li Ralal re naq tooruuq chi wank wiʼ chik saʼ amiiwil rikʼin (Sant. 5:14-16).

15. Kʼaʼut tento tqakʼe qahoonal chi xtzʼilbʼal ut xkʼoxlankil rix li kixbʼaanu li Jesús saʼ qakʼabʼaʼ?

¹⁵ Qakʼoxlaq rix li kixbʼaanu li Jesús saʼ qakʼabʼaʼ. Li xRajamani jun li qechpaabʼanel li wank 73 chihabʼ re, naxye: «Nachalk inyaabʼ naq nawil  chanru kirahobʼtesiik li Jesús». Maare nayotʼeʼk ajwiʼ qachʼool naq naqil chanru kirahobʼtesiik li Ralal li Yos. Abʼan, wi naqakʼe qachʼool chi xkʼoxlankil li kixbʼaanu li Jesús, qʼaxal tqara li Jesús ut qʼaxal tqara ajwiʼ li Jehobʼa. Re xbʼaanunkil aʼin, kʼaʼut naq inkʼaʼ naqatzʼil rix naq nokootzolok saʼ junesal chanru naq li Jesús kixqʼaxtesi li xyuʼam saʼ qakʼabʼaʼ?

16. Kʼaru rusilal naqataw naq naqakʼut chiruhebʼ li junchʼol kʼaʼut naq li Jesús kixqʼaxtesi li xyuʼam saʼ qakʼabʼaʼ? (Chaawil li jalam u chiru li hu).

¹⁶ Qakʼutaq chiruhebʼ li junchʼol kʼaʼut naq li Jesús kixqʼaxtesi li xyuʼam saʼ qakʼabʼaʼ. Naq nokooʼaatinak rikʼinebʼ li junchʼol chirix li xkamik li Jesús, naqakʼutbʼesi naq qʼaxal oxloqʼ wiʼ chik chiqu. Wank li chaabʼil kʼanjelobʼaal qikʼin re xchʼolobʼankil kʼaʼut naq li Jesús kikamk saʼ qakʼabʼaʼ. Jun eetalil, naru tqoksi li tzolom 4 re li hu Li chaabʼil esil li nachalk rikʼin li Yos, li naxkʼabʼaʼi «Ani tzʼaqal li Jesukriist?». Malaj li tzolom 5 re li tasal hu Kʼaru tzʼaqal naxchʼolobʼ li Santil Hu?, li naxkʼabʼaʼi «Li xkamik li Jesus aʼan jun nimla maatan». Ut rajlal chihabʼ naqakʼutbʼesi naq qʼaxal oxloqʼ chiqu li kixbʼaanu li Jesús naq nokoowulak chi xnimankil li xkamik ut naq naqabʼoqebʼ li junchʼol chi wulak ajwiʼ saʼ li chʼutam aʼin. Ut peʼyaal naq qʼaxal oxloqʼ chiqu naq li Jehobʼa kixkʼe saʼ quqʼ xkʼutbʼal chiruhebʼ li junchʼol chirix li Ralal?

17. Kʼaʼut naq li xkamik li Jesús aʼan li xnimal ru maatan li kixkʼe li Yos choʼq rehebʼ li kristiʼaan?

¹⁷ Relik chi yaal naq wank naabʼal xyaalal kʼaʼut naq oxloqʼaq chiqu ut naq junelik tqabʼanyoxi naq li Jesús kixqʼaxtesi li xyuʼam saʼ qakʼabʼaʼ. Li xkamik li Jesús naxbʼaanu naq tooruuq chi wank saʼ tzʼaqal amiiwil rikʼin li Jehobʼa usta laaʼo aj maak. Saʼ xkʼabʼaʼ aʼin, tjukʼeʼq chixjunil li xkʼanjel laj Tza (1 Juan 3:8). Joʼkan ajwiʼ, ttzʼaqloq ru li kiraj li Jehobʼa chalen chaq saʼ xtiklajik: naq li Ruuchichʼochʼ tkanaaq joʼ jun Chʼinaʼusil Naʼajej ut naq chixjunilebʼ li kristiʼaan teʼkʼanjelaq chiru ut teʼxra. Joʼkan bʼiʼ, qasikʼaq rajlal kutan junaq li naʼlebʼ re xkʼutbʼesinkil naq oxloqʼ chiqu naq li Jesús kixqʼaxtesi li xyuʼam saʼ qakʼabʼaʼ, aʼ li xnimal ru maatan li kixkʼe li Yos choʼq rehebʼ li kristiʼaan.