1-2. Ekuliloyambo oshike, nomolwashike twe li pumbwa?

ESHI omulumenhu a wanenena Adam a nyona, okwa kanifa oufembanghenda wokukala nomwenyo fiyo alushe. Osho osha li yo tashi ka kuma oludalo laye lomonakwiiwa. Adam ka li ta dulu okulipopila mwaasho a ninga. Okwa nyonena owina. Ndele ongahelipi shi na sha noludalo laye? Oludalo laye inali kufa ombinga menyono laye. (Rom. 5:12, 14) Mbela opa li osho tashi dulu okuningwa po, opo oludalo laye li xupifwe kefyo, olo li li oilanduliko yenyono laye? Heeno! Diva konima eshi Adam a nyona, Jehova okwa li a ulika nghee ta ka xupifa ovanhu omamiliyona vomoludalo laAdam koulunde nefyo. (Gen. 3:15) Jehova okwa li e na okutuma Omona waye okudja meulu peufwafimbo laye, e uye a ‘yandje omwenyo waye u ninge ekulilo lavahapu.’ — Mark. 10:45; Joh. 6:51.

² Ekuliloyambo oshike? She likolelela kOmishangwa dopaKriste dOshigreka, ekuliloyambo olo ofuto oyo Jesus a yandja, opo a futile po osho sha kanifwa kuAdam. (1 Kor. 15:22) Omolwashike twa pumbwa ekuliloyambo? Omolwaashi omufikamhango waJehova wouyuki, oo tau hangwa mOmhango, owa popya kutya omwenyo ou na okuyandjelwa omwenyo mukwao. (Ex. 21:23, 24) Adam okwa kanifa omwenyo wa wanenena. Jesus okwa li e na okuyamba po omwenyo waye wopanhu wa wanenena, opo a ulike kutya Kalunga omuyuki. (Rom. 5:17) Kungaho, okwa ninga “Tate yaalushe” kwaaveshe ovo ve na eitavelo mekuliloyambo. — Jes. 9:6; Rom. 3:23, 24.

3. Metwokumwe naJohannes 14:31 nosho yo 15:13, omolwashike Jesus a yandja nehalo liwa omwenyo waye wopanhu wa wanenena?

³ Jesus okwa yandja nehalo liwa omwenyo waye u li ekuliloyambo, molwaashi oku hole unene Xe womeulu novanhu. (Lesha Johannes 14:31; 15:13.) Ohole oyo ye mu linyengifa a kale a tokola toko okukanyatela oudiinini waye nokuwanifa po ehalo laXe.  Okwe shi ulika mokukala omudiinini fiyo omefyo. Oshidjemo? Elalakano laJehova lopehovelo li na sha novanhu nosho yo nedu otali ka wanifwa po. Moshitukulwa eshi ohatu ka kundafana kutya omolwashike Kalunga a efa Jesus a mone oixuna neenghono ofimbo ina fya. Ohatu ka tala pauxupi koshihopaenenwa shomushangi umwe wOmbiibeli, oo a li a pandula neenghono ekuliloyambo. Hauxuuninwa, ohatu ka kundafana nghee hatu dulu okuulika kutya otwa pandula ekuliloyambo. Ohatu ka tala yo nghee hatu dulu okukulika olupandu letu li na sha nekuliloyambo, olo twa longekidilwa kuJehova naJesus.

4. Hokolola nghee Jesus a fya.

⁴ Diladila nghee efiku laJesus laxuuninwa lokombada yedu la li fimbo ina dipawa! Nonande okwa li ta dulu okwiifana eengudu dovaengeli di mu amene, okwa li a efa a kwatwe po kovakwaita vaRoma, ovo va li ve mu denga shinyanyalifa. (Mat. 26:52-54; Joh. 18:3; 19:1) Ova li ve mu denga nongola, oyo ya li ye mu ninga oipute. Nolwanima ova li ve mu twika opala idjuu, oyo ya li tai kumu poipute oyo i li kombuda yaye tai di eehonde. Jesus okwa li a humbata omuti oo, opo e u twale konhele oko a li ta ka dipaelwa, ashike okwa li a yakulwa mo diva kuumwe, oo a li e u fininikilwa kovakwaita vaRoma. (Mat. 27:32) Eshi va fika ponhele opo Jesus a li ta ka dipaelwa, ovakwaita ova li va valela eenyala neemhadi daye komuti. Olutu laye ola li tali tauka opo pa dengelwa eembosha omolwondjudo yolutu. Ookaume kaye ova li va nyika oluhodi, naina okwa li ta lili. Ashike ovapangeli vaJuda ova li tava sheke Jesus. (Luk. 23:32-38; Joh. 19:25) Jesus okwa kala ta luluma oule weevili. Okwa li ta funda noudjuu, molwaashi omutima nomapunga aye okwa li a loloka. Jesus okwa li e shii kutya okwa kanyatela oudiinini waye nokwa li a ilikana ofimbo ina fya. Okwa li a fidimika omutwe waye, ndele ta yandje omwenyo waye. (Mark. 15:37; Luk. 23:46; Joh. 10:17, 18; 19:30) Oshoshili kutya Jesus okwa dipawa monghedi inyanyalifa, iyahameka noififa ohoni!

5. Kakele konghedi omo a dipawa, oshike unene sha udifa nai Jesus?

⁵ Jesus ka li unene a yahamekwa konghedi omo a dipawa. Ndele osho she mu udifa nai unene, etomheno olo le mu dipaifa. Okwa li a lundilwa kutya oku li omusheki, omunhu oo ina fimaneka Kalunga, ile edina laYe. (Mat. 26:64-66) Oshinima osho osha li sha udifa nai unene Jesus noka li a hala Xe e mu pitike a fifwe ohoni monghedi ya tya ngaho. (Mat. 26:38, 39, 42) Omolwashike Jehova a efa Omona waye omuholike a mone oixuna nokufya? Natu ka taleni komatomheno atatu.

6. Omolwashike Jesus a li e na okweendjelela komuti womahepeko?

⁶ Shotete, Jesus okwa li e na okweendjelelifwa komuti opo a mangulule Ovajuda mefingo. (Gal. 3:10, 13) Ovajuda ova li va dimina okudulika kOmhango yaKalunga, ashike ova li va dopa oku i wanifa po. Oshidjemo? Ova li ve na okufya, molwaashi ve li oludalo laAdam, ashike natango okwa li kwa wedwa efingo olo. (Rom. 5:12) Omhango oyo Kalunga a li a pa Ovaisrael oya popya kutya omunhu ngeenge okwa nyono, enyono olo tali mu ningifa a kale a wana okufya, okwa li e na okudipawa. Konima yaasho, oshimhu shaye osha li shi na okweendjelelekwa komuti. * (Deut. 21:22, 23; 27:26) Onghee hano, eshi Jesus a endjelelekwa komuti okwe shi ningifa tashi shiiva, opo ovanhu vomoiwana aishe va dule okumona ouwa mekuliloyambo laye.

7. Kalunga okwa efa Omona waye a mone oixuna omolwetomheno etivali lilipi?

⁷ Natu ka taleni ketomheno etivali kutya omolwashike Jehova a efa Omona waye a mone oixuna.  Jehova okwa li ta deulile Jesus onghandangala oyo a li ta ka dana monakwiiwa, eshi ta ka kala Omupristeri wetu Munene. Jesus okwa li a mona nghee shidjuu okudulika kuKalunga ngeenge u li meyeleko la kwata moiti. Okwa li a wililwa po neenghono. Okwa indila “nokukuwa pombada nomahodi” a kwafelwe. Molwaashi Jesus okwa pita meenghalo didjuu, oku shii eemhumbwe detu ‘nota dulu oku tu kwafela’ ngeenge hatu ‘yelekwa.’ Inatu pandula tuu eshi Jehova a nangeka po Omupristeri Munene omunanghenda, oo e tu uditile “oukwao wananghali omolwomaunghundi etu”! — Heb. 2:17, 18; 4:14-16; 5:7-10.

8. Kalunga okwa efa Jesus a pite meyeleko la kwata moiti netomheno etitatu lilipi?

⁸ Etitatu, Jehova okwa efa Jesus a mone oixuna neenghono opo a dule okunyamukula epulo la fimana olo kutya: Mbela ovanhu otava dulu ngoo okukala ovadiinini kuKalunga nonande otava yelekwa neenghono? Satana okwa popya kutya osho itashi shiiva. Okwa ti ovanhu ohava longela ashike Kalunga omolwoinima iwa oyo he va ningile. Okwa itavela kutya itava dulu okukala ovadiinini kuJehova, ngaashi ashike xekulululwa yavo, Adam. (Job 1:9-11; 2:4, 5) Molwaashi Jehova okwa li e lineekela Omona waye, okwa li a efa Jesus a yelekwe fiyo oposhitwa opo omunhu ita dulu okulididimika. Jesus okwa kala a kanyatela oudiinini waye nokwa ulika kutya Satana omunaipupulu.

9. Omuyapostoli Johannes okwe tu tulila po oshihopaenenwa shilipi?

⁹ Eitavelo lOvakriste vahapu ola pamekwa kehongo lekuliloyambo. Ova kala nokuudifa nonande otava patanekwa nove lididimikila omayeleko e lili noku lili mokukalamwenyo kwavo akushe. Natu ka taleni koshihopaenenwa shomuyapostoli Johannes. Okwa udifa nouladi oshili kombinga yaKristus nosho yo yekuliloyambo, tashi dulika omido di dulife pomilongo 60. Eshi a li e na omido 90 nasha, Ouhamba waRoma owa li we mu tala ko a nyika oshiponga neenghono noku mu tula modolongo oyo i li kokanhunhu kaPatmos. Mbela okwa li a longa oshimbuluma shilipi? Omolwaashi ashike a li ta “hepaulula kombinga yaKalunga noyaJesus.” (Eh. 1:9) Johannes ine tu tulila po tuu oshihopaenenwa sha tongomana shi na sha neitavelo nosho yo nelididimiko!

10. Eendjovo odo da shangwa kuJohannes oda ulika ngahelipi kutya okwa pandula ekuliloyambo?

¹⁰ Eendjovo da nwefa mo daJohannes otadi ulike kutya oku hole neenghono Jesus nokwa pandula ekuliloyambo. Okwa popya kombinga yekuliloyambo lwoikando i dulife 100, ile ouwa oo wa etifwa kulo. Pashihopaenenwa, Johannes okwa shanga a ti: “Ngeenge umwe okwa nyono, otu na omukwafi oo e li puTate, sha hala okutya omuyuki Jesus Kristus.” (1 Joh. 2:1, 2) Okwa shanga yo nghee sha fimana ‘okuhepaulula kombinga yaJesus.’ (Eh. 19:10) Osho otashi ulike kutya Johannes okwa pandula neenghono ekuliloyambo. Ndele mbela ongahelipi nafye hatu dulu oku shi ulika?

11. Oshike tashi dulu oku tu kwafela tu henuke omayeleko?

¹¹ Henuka okunyona. Ngeenge owa pandula shili ekuliloyambo, ito ka diladila kutya: ‘Inandi pumbwa okukondja nda mana mo opo ndi henuke okunyona ngeenge handi yelekwa. Ohandi nyono ashike, ndele handi ilikana kuJehova a dimine nge po.’ Ponhele yaasho, ngeenge hatu yelekwa tu nyone, ohatu ka tya: ‘Ahowe! Ongahelipi handi dulu okuya momwiyo wa tya ngaho konima yaashishe osho nda ningilwa kuJehova naJesus?’ Onghee hano, natu kale alushe hatu pula Jehova e tu pameke, noku mu indila hatu ti: ‘Ino efa nge ndi ye momayeleko.’ — Mat. 6:13.

12. Ongahelipi hatu dulu okutula moilonga omayele oo taa hangwa mu 1 Johannes 3:16-18?

 ¹² Kala u hole ovamwaxo. Eshi hatu ulikile ovamwatate novamwameme ohole, kungaho ohatu ulike yo kutya otwa pandula ekuliloyambo. Omolwashike mbela? Omolwaashi Jesus ina yandja ashike omwenyo waye molwetu, ndele okwe u yandjela yo ovamwatate novamwameme. Osha yela kutya ove na ongushu kuye, molwaashi navo okwe va fila. (Lesha 1 Johannes 3:16-18.) Ohatu ulike kutya otu hole ovamwatate novamwameme monghedi omo hatu ungaunga navo. (Ef. 4:29, 31–5:2) Pashihopaenenwa, ohatu va kwafele ngeenge tava ehama, ile tave lididimikile omayeleko a kwata moiti, mwa kwatelwa oiponga yopaushitwe. Mbela oshike tu na okuninga po ngeenge omwiitaveli mukwetu okwa ningi sha, ile a popya sha osho she tu udifa nai?

13. Omolwashike tu na okudimina po ovanhu vakwetu?

¹³ Mbela oho mono shidjuu okudimina po omwiitaveli mukweni oo e ku udifa nai? (Lev. 19:18) Ngeenge osho, tula moilonga omayele aa taa ti: “Twikileni okulididimikilafana nokudiminafana po nehalo liwa ngeenge mwa ningafana nai. Ngaashi Jehova he mu dimine po nehalo liwa, nanye yo osho mu na okuninga.” (Kol. 3:13) Efimbo keshe hatu dimine po omumwatate ile omumwameme, kungaho ohatu ulikile Tate wetu womeulu kutya otwa pandula shili ekuliloyambo. Ongahelipi hatu dulu okutwikila okukulika olupandu li na sha noshali oyo twa pewa kuKalunga?

14. Omonghedi imwe ilipi hatu dulu okuulika kutya otwa pandula ekuliloyambo?

¹⁴ Pandula Jehova omolwekuliloyambo. Omumwameme Joanna, womido 83 wokoIndia, okwa popya a ti: “Onda mona kutya osha fimana okukala handi tumbula ekuliloyambo efiku keshe momailikano ange nokupandula Jehova omolwalo.” Eshi to popi naJehova pauhandimwe okupitila meilikano, diladila kondadalunde komapuko oo wa ninga momukokomoko wefiku nokupula Jehova e ku dimine po. Oshoshili kutya ngeenge owa nyono enyono la kwata moiti, owa pumbwa yo ekwafo lovakulunhuongalo. Otava ka pwilikina kwoove, noku ku pa omayele opahole okudja mEendjovo daKalunga. Otava ka ilikana pamwe naave nokupula Jehova e ku dimine po pakanghameno longushu yekuliloyambo laJesus, opo u ‘veluke pamhepo.’ — Jak. 5:14-16.

15. Omolwashike twa pumbwa okukonga efimbo lokulesha kombinga yekuliloyambo nokudilonga kulo?

¹⁵ Dilonga kekuliloyambo. Omumwameme Rajamani,  womido 73, okwa popya a ti: “Efimbo keshe handi lesha kombinga yanghee Jesus a mona oixuna, ohandi kala handi lili.” Naave otashi dulika ho kala wa nyika oluhodi ngeenge to diladila kombinga yanghee Omona waKalunga a mona oixuna. Ashike shi fike ngoo apa to dilonga kombinga yeyambo olo Jesus a ninga, osho ngoo ohole yoye yoku mu hola noyokuhola Xe tai ende tai kulu. Opo u kale ho dilonga kombinga yekuliloyambo, litulila po efimbo le likalekelwa u kale ho konakona oshitukulwa eshi.

16. Ohatu mono ouwa ulipi ngeenge hatu hongo vamwe kombinga yekuliloyambo? (Tala efano kombada yoshifo.)

¹⁶ Honga vamwe kombinga yekuliloyambo. Efimbo keshe hatu lombwele vamwe kombinga yekuliloyambo, ohatu kulike olupandu letu li na sha nalo. Otu na oilongifo ya denga mbada yokuhonga vamwe kutya omolwashike Jesus e tu fila. Pashihopaenenwa, ohatu dulu okulongifa oshileshwa 4 shokambo Onghundana iwa ya dja kuKalunga! Oshileshwa osho oshi na oshipalanyole tashi ti: “Jesus Kristus oye lyelye?” Ile ohatu dulu okulongifa etukulwa 5 lembo Oshike hatu lihongo mOmbiibeli? Etukulwa olo oli na oshipalanyole tashi ti: “Ekulilo oshali inene ya dja kuKalunga.” Omudo keshe ohatu kulike olupandu letu mokukala pEdimbuluko lefyo laJesus nokushiva vamwe nouladi ve tu waimine. Kau fi tuu oufembanghenda oo twa pewa kuJehova wokuhonga ovanhu kombinga yOmona waye!

17. Omolwashike ekuliloyambo li li oshali inenenene oyo Kalunga a pa ovanhu?

¹⁷ Osha yela kutya otu na omatomheno a femba okuulika kutya otwa pandula ekuliloyambo. Ekuliloyambo ole shi ningifa tashi shiiva, opo tu dule okupanga oukaume naJehova nonande inatu wanenena. Ole shi ningifa tashi shiiva, opo oilonga yOndiaboli i ka xulifwe po filufilu. (1 Joh. 3:8) Ole shi ningifa yo tashi shiiva, opo elalakano laJehova lopehovelo li na sha nedu li ka wanifwe po. Edu alishe otali ka ninga oparadisa. Keshe oo ta ka kala mo ota ka kala e hole Jehova noku mu longela. Onghee hano, efiku keshe natu konge eenghedi omo hatu dulu okuulika kutya otwa pandula ekuliloyambo, oshali inenenene oyo Kalunga a pa ovanhu.