1-2. Wetin Jizɔs in day du fɔ wi? Wetin mek wi nid Jizɔs fɔ day fɔ wi?

WE ADAM we na bin pafɛkt man bin sin, i bin lɔs di chans fɔ gɛt layf we go de sote go. Bɔt nɔto in wangren lɔs da chans de, ivin in pikin dɛn we i bɔn leta bin lɔs am. No ɛkskyuz nɔ de fɔ di sin we Adam sin. Na bay wilful i du am. Bɔt we in pikin dɛn? Dɛn nɔ bin gɛt natin fɔ du wit Adam in sin. (Rom. 5:​12, 14) Adam bin fit fɔ day. Bɔt ɛnitin de we Jiova go du fɔ lɛ Adam in pikin dɛn gɛt layf sote go? Yɛs! Jɔs afta we Adam sin, smɔl smɔl, Jiova bin stat fɔ sho aw i go sev bɔku pan Adam in pikin dɛn frɔm sin ɛn day. (Jɛn. 3:​15) Jiova bin dɔn pik di rayt tɛm we i go sɛn in Pikin frɔm ɛvin “fɔ gi in layf as prayz fɔ fri bɔku pipul dɛn.”—Mak 10:​45; Jɔn 6:​51.

² Jizɔs bin gi in layf fɔ pe fɔ wetin Adam bin dɔn lɔs. (1 Kɔr. 15:​22) Wetin mek wi nid Jizɔs fɔ day fɔ wi? Na bikɔs ɔf Jiova in jɔstis we i tɔk bɔt na di Lɔ we i gi to Mozis, ɛn i se fɔ gi layf fɔ layf. (Ɛks. 21:​23, 24) Adam bin lɔs in pafɛkt layf. Fɔ sho se Jiova na Gɔd we lɛk jɔstis, Jizɔs bin sakrifays in yon pafɛkt layf. (Rom. 5:​17) So i dɔn bi “Ɛvalastin Papa” fɔ ɔl di wan dɛn we sho se dɛn gɛt fet pan in day.—Ayz. 9:​6; Rom. 3:​23, 24.

3. Akɔdin to Jɔn 14:​31 ɛn 15:​13, wetin mek Jizɔs bin rɛdi fɔ sakrifays in pafɛkt layf?

³ Jizɔs bin rɛdi fɔ sakrifays in layf bikɔs i rili lɛk in Papa we de na ɛvin, ɛn i lɛk wi bak. (Rid Jɔn 14:​31; 15:​13.) Dis lɔv we Jizɔs gɛt bin mek i mekɔp in maynd se i go kɔntinyu fɔ waka tret wan wit Gɔd te i day, ɛn i go du ɔl wetin in Papa want am fɔ du. So dis tin we Jizɔs du go mek di tin we Jiova bin want fɔ mɔtalman ɛn dis wɔl go apin. Insay dis atikul, wi go tɔk bɔt wetin mek Gɔd alaw  Jizɔs fɔ sɔfa bad bad wan bifo i day. Wi go tɔk smɔl bɔt wan man we rayt di Baybul we bin rili gladi fɔ we Jizɔs day fɔ wi. Dɔn, wi go tɔk bɔt aw wi go sho se wi gladi fɔ we Jizɔs day fɔ wi, ɛn wetin wi go du fɔ lɛ wi gladi mɔ ɛn mɔ fɔ di sakrifays we Jiova ɛn Jizɔs mek fɔ wi.

4. Tɔk smɔl bɔt aw Jizɔs day.

⁴ Tink bɔt wetin bin apin di las de bifo Jizɔs day. Pan ɔl we i bin ebul fɔ kɔl bɔku bɔku enjɛl dɛn fɔ kam protɛkt am, i bin alaw di Roman sojaman dɛn fɔ arɛst am ɛn bit am bad bad wan. (Mat. 26:​52-54; Jɔn 18:​3; 19:​1) Dɛn bit am wit wip we bin de wund am bad bad wan. Leta, dɛn bin mek i tot ebi ebi tik na in bak we bin de blid. Jizɔs bin stat fɔ drɛg di tik fɔ go na di say we dɛn de go kil am. Bɔt afta shɔt tɛm, di Roman sojaman dɛn fos wan ɔda man fɔ kɛr di tik go fɔ Jizɔs. (Mat. 27:​32) We Jizɔs rich na di ples we i gɛt fɔ day, di sojaman dɛn nel in an ɛn in fut dɛn na di tik. Di wund bin de opin mɔ ɛn mɔ na di say we dɛn nel am bikɔs na de ɔl in wet bin de. Jizɔs in padi dɛn at bin pwɛl bad bad wan, ɛn in mama bin de kray. Bɔt di Ju rula dɛn bin de provok am. (Lyuk 23:​32-38; Jɔn 19:​25) Bikɔs ɔf di we aw dɛn bin ɛng in bɔdi, in at ɛn in lɔngs dɛn nɔ bin de wok fayn, ɛn di mɔ we i de tray fɔ blo, na di mɔ i de fil pen. Jizɔs bin sɔfa fɔ lɔng tɛm, bɔt i bin no se i dɔn du ɔl wetin Jiova want. So jɔs bifo i day, i pre to Jiova fɔ di las tɛm. We i pre dɔn, i butu in ed ɛn day. (Mak 15:​37; Lyuk 23:​46; Jɔn 10:​17, 18; 19:​30) Fɔ tru, Jizɔs bin fil pen fɔ lɔng tɛm, ɛn di we aw i day bin rili shemful.

5. Wetin bin mek Jizɔs in at pwɛl bad bad wan we bin pas di we aw dɛn kil am?

⁵ Jizɔs in at nɔ bin pwɛl bikɔs ɔf di we aw dɛn kil am. Bɔt na di rizin we mek dɛn kil am bin mek in at pwɛl bad bad wan. Dɛn lay pan am se i de tɔk bad bɔt Gɔd. So dɛn bin de tray fɔ se i nɔ gɛt wan rɛspɛkt fɔ Gɔd ɔ ivin Gɔd in nem. (Mat. 26:​64-66) Dis lay we dɛn go lay pan Jizɔs bin mek i rili fil bad, ɛn i bin wish se in Papa nɔ go alaw am fɔ go tru dis kayn shemful tin. (Mat. 26:​38, 39, 42) Wetin mek Jiova bin alaw in Pikin we i lɛk fɔ sɔfa ɛn day? Lɛ wi tɔk bɔt tri rizin dɛn.

6. Wetin mek dɛn bin gɛt fɔ ɛng Jizɔs pan tik we i sɔfa pan?

⁶ Fɔs, dɛn bin gɛt fɔ ɛng Jizɔs pan tik so dat i go pul di swɛ we bin de pan di Ju pipul dɛn. (Gal. 3:​10, 13) Dɛn bin gɛt swɛ bikɔs dɛn bin dɔn prɔmis se dɛn go obe Gɔd in Lɔ, bɔt dɛn nɔ bin du am. So dis bin ad to di swɛ we dɛn gɛt bikɔs dɛn na Adam in pikin dɛn. (Rom. 5:​12) Di Lɔ we Gɔd bin gi di Izrɛlayt dɛn bin se if pɔsin kɔmit sin we mek i fit fɔ day, dɛn fɔ kil am. Ɛn tɛm dɛn bin de we dɛn go ɛng di pɔsin in dedebɔdi na tik. * (Dit. 21:​22, 23; 27:​26) So di ɛng we dɛn ɛng Jizɔs pan tik bin mek am pɔsibul fɔ lɛ di Ju pipul dɛn nɔ gɛt swɛ igen, ɛn in sakrifays go bɛnifit dɛn pan ɔl we dɛn bin dɔn tɔn dɛn bak pan am.

7. Wetin na di sɛkɔn rizin we mek Gɔd alaw in Pikin fɔ sɔfa?

⁷ Lɛ wi tɔk bɔt wan ɔda rizin we mek Gɔd alaw in Pikin fɔ sɔfa. Jiova bin de tren Jizɔs fɔ di tɛm we i go bi wi Ay Prist.  Di tin dɛn we apin to Jizɔs ɛp am fɔ no se i rili tranga fɔ lɛ pɔsin obe Gɔd we sɔntin rili tɛst am. Di tin dɛn we bin apin to am bin rili mɔna am, ɛn “i bin de tɔk lawd wan ɛn kray” we i bin de pre to Gɔd fɔ ɛp am. Bikɔs Jizɔs bin dɔn go tru bɔku bɔku tin dɛn we bin mek in at rili pwɛl, so i ɔndastand wetin wi nid, ɛn i “ebul ɛp” wi di tɛm “we dɛn de tɛst” wi. Wi rili gladi we Jiova dɔn gi wi Ay Prist we gɛt sɔri-at ɛn we “ɔndastand di say dɛn we wi wik.”—Ibru. 2:​17, 18; 4:​14-16; 5:​7-10.

8. Wetin na di tɔd rizin we mek Gɔd alaw Setan fɔ tɛst Jizɔs siriɔs wan?

⁸ Tɔd, Jiova alaw Jizɔs fɔ sɔfa bad bad wan so dat I go ansa wan impɔtant kwɛstyɔn we se: Mɔtalman go ebul sav Jiova fetful wan ilɛk dɛn tɛst am siriɔs wan? Setan se no mɔtalman nɔ de we go du dat. I se wi jɔs de sav Gɔd bikɔs ɔf di tin dɛn we Gɔd dɔn gi wi, ɛn di tin dɛn we wi want fɔ mek i gi wi. Ɛn i biliv se jɔs lɛk aw Adam nɔ bin lɛk Jiova, na so wisɛf nɔ lɛk Am. (Job 1:​9-11; 2:​4, 5) Bikɔs Jiova gɛt kɔnfidɛns se in Pikin nɔ go kɔmɔt biɛn am, i bin alaw Setan fɔ tɛst Jizɔs ɔlkayn we we mɔtalman nɔ go ebul fɔ bia. Bɔt Jizɔs bin kɔntinyu fɔ waka tret wan wit Gɔd ɛn pruv se Setan na layman.

9. Us ɛgzampul we apɔsul Jɔn sɛt fɔ wi?

⁹ Bɔku Kristian dɛn de kɔntinyu fɔ gɛt fet pan Gɔd bikɔs dɛn dɔn lan se Jizɔs day fɔ wi. Dɛn de kɔntinyu fɔ prich pan ɔl we pipul dɛn de agens dɛn, ɛn dɛn kin bia difrɛn difrɛn prɔblɛm dɛn te dɛn ol. Lɛ wi tɔk bɔt apɔsul Jɔn in ɛgzampul. I bin kɔntinyu fɔ prich di tru bɔt Krays ɛn di day we Krays day fɔ wi, ɛn i go mɔs bi se i du dat fɔ pas 60 ia. We i bin de arawnd 100 ia, di Roman gɔvmɛnt bin de fred se i go kɔz prɔblɛm fɔ dɛn, so dɛn put am na prizin na wan ayland we nem Patmɔs. Wetin na bin di kraym we apɔsul Jɔn kɔmit? I bin “de tɔk bɔt Gɔd ɛn Jizɔs.” (Rɛv. 1:​9) I rili sɛt fayn ɛgzampul fɔ wi as pɔsin we gɛt fet ɛn we de bia.

10. Aw di tin dɛn we Jɔn rayt sho se i gladi fɔ we Jizɔs day fɔ wi?

¹⁰ Insay di Baybul buk dɛn we Jɔn rayt, i bin tɔk bɔt aw i rili lɛk Jizɔs ɛn aw i gladi fɔ we Jizɔs day fɔ wi. We di apɔsul Jɔn bin de rayt, i tɔk pas 100 tɛm bɔt di day we Jizɔs day fɔ wi ɔ di bɛnifit we wi go gɛt frɔm Jizɔs in day. Fɔ ɛgzampul, Jɔn bin rayt se: “If ɛnibɔdi sin, wi gɛt pɔsin we de ɛp wi, we na Jizɔs Krays, we de wit di Papa, ɛn we de du wetin rayt.” (1 Jɔn 2:​1, 2) Jɔn rayt bak bɔt aw i rili impɔtant fɔ “tɔk bɔt Jizɔs.” (Rɛv. 19:​10) Wi dɔn si klia wan se Jɔn bin rili gladi fɔ we Jizɔs day fɔ wi. Aw wisɛf go sho se wi gladi fɔ Jizɔs in day?

11. Wetin go ɛp wi fɔ tinap tranga wan we sɔntin tɛmt wi?

¹¹ Tinap tranga wan we sɔntin tɛmt yu. If wi rili gladi fɔ di day we Jizɔs day fɔ wi, wi nɔ go de tink se: ‘If sɔntin tɛmt mi, nid nɔ de fɔ lɛ a tinap tranga wan fɔ lɛ a nɔ sin. A go kɔmit di sin, dɔn a aks fɔ fɔgivnɛs leta.’ Bifo dat, we sɔntin tɛmt wi, wi go tɛl wisɛf se: ‘Nɔ, a nɔ de du am. Aw a go du dis kayn tin afta ɔl wetin Jiova ɛn Jizɔs dɔn du fɔ mi?’ So i go fayn fɔ lɛ wi pre to Jiova lɛ i gi wi trɛnk ɛn beg am lɛ i nɔ alaw wi fɔ kɔmit di sin.—Mat. 6:​13.

12. Aw wi go fala di advays we de na 1 Jɔn 3:​16-18?

 ¹² Lɛk yu brɔda ɛn sista dɛn. We wi sho se wi gɛt dis kayn lɔv, wi go sho bak se wi gladi fɔ di day we Jizɔs day fɔ wi. Wetin mek? Na bikɔs nɔto wi wan Jizɔs gi in layf fɔ, i gi am bak fɔ wi brɔda ɛn sista dɛn. So if Jizɔs bin rɛdi fɔ day fɔ wi brɔda ɛn sista dɛn, dat min se i rili valyu dɛn. (Rid 1 Jɔn 3:​16-18.) Wi go sho se wi lɛk wi brɔda ɛn sista dɛn bay di we aw wi de trit dɛn. (Ɛfi. 4:​29, 31–5:​2) Fɔ ɛgzampul, wi kin ɛp dɛn we dɛn sik ɔ we siriɔs prɔblɛm mit dɛn, lɛk nachɔral dizasta. Bɔt wetin wi fɔ du we wi kɔmpin Kristian tɔk ɔ du sɔntin we mek wi vɛks?

13. Wetin mek wi fɔ de fɔgiv wi Kristian brɔda ɛn sista dɛn?

¹³ Tɛm dɛn kin de we yu kin want fɔ kip grɔj na yu at fɔ yu Kristian brɔda ɔ sista? (Lɛv. 19:​18) If na so i bi, na fɔ fala dis advays we se: “Una kɔntinyu fɔ bia una kɔmpin dɛn ɛn fɔgiv dɛn fɔ fri ivin if una gɛt rizin fɔ vɛks pan dɛn. Jɔs lɛk aw Jiova dɔn fɔgiv una fɔ fri, na di sem tin unasɛf fɔ du.” (Kol. 3:​13) Ɛnitɛm we wi fɔgiv wi Kristian brɔda ɔ sista, wi de mek wi Papa we de na ɛvin no se wi rili gladi fɔ we Jizɔs day fɔ wi. Wetin wi go du fɔ lɛ wi kɔntinyu fɔ gladi mɔ ɛn mɔ fɔ dis gift we Gɔd gi wi?

14. Wetin na wan tin we wi go du fɔ mek wi gladi mɔ ɛn mɔ fɔ we Jizɔs day fɔ wi?

¹⁴ Tɛl Jiova tɛnki fɔ we Jizɔs day fɔ wi. Wan 83 ia ol sista we nem Joana we de na India bin se: “A tink se ɛnide we a de pre, i rili impɔtant fɔ lɛ a tɔk bɔt di day we Jizɔs day fɔ wi ɛn fɔ tɛl Jiova tɛnki fɔ dat.” Ɛnide we yu wan de pre, tɛl Jiova bɔt di mistek dɛn we yu dɔn mek da de de, ɛn beg am lɛ i fɔgiv yu. Bɔt if yu dɔn kɔmit siriɔs sin, yu go nid fɔ tɛl di ɛlda dɛn bak lɛ dɛn ɛp yu. Dɛn go lisin to yu ɛn gi yu fayn advays frɔm Gɔd in Wɔd. Dɛn go pre wit yu ɛn beg Jiova lɛ i fɔgiv yu so dat yu go gɛt tayt padi biznɛs wit am bak.—Jems 5:​14-16.

15. Wetin mek wi fɔ mek tɛm fɔ rid bɔt di day we Jizɔs day fɔ wi ɛn fɔ tink gud gud wan bɔt am?

¹⁵ Tink gud gud wan bɔt di day we Jizɔs day fɔ wi. Wan 73 ia ol sista we nem Rajamani bin se: “Wata kin gɛda na mi yay ɛnitɛm we a de rid bɔt di we aw Jizɔs  sɔfa.” Sɔntɛm yusɛf go rili fil am we yu tink bɔt di we aw Gɔd in Pikin bin rili sɔfa. Bɔt di mɔ we yu de tink gud gud wan bɔt di sakrifays we Jizɔs mek, na di mɔ yu de lɛk in ɛn in Papa. Fɔ ɛp yu fɔ tink gud gud wan bɔt di day we Jizɔs day fɔ wi, yu nɔ tink se i go fayn fɔ lɛ yu fɛn spɛshal tɛm fɔ stɔdi bɔt dis tɔpik?

16. Aw wi go bɛnifit we wi tich ɔda pipul dɛn bɔt di day we Jizɔs day fɔ wi? (Luk di pikchɔ na di frɔnt pej.)

¹⁶ Tich ɔda pipul dɛn bɔt di day we Jizɔs day fɔ wi. Ɛnitɛm we wi de tɛl ɔda pipul dɛn bɔt di day we Jizɔs day fɔ wi, na di mɔ wi go gladi fɔ wetin Jizɔs du. Wi gɛt pɔblikeshɔn ɛn vidio dɛn we wi go yuz fɔ tich pipul dɛn bɔt di rizin we mek Jizɔs day fɔ wi. Fɔ ɛgzampul, wi kin yuz lɛsin 4 na di brosho we nem Gɔd Gɛt Gud Nyuz fɔ Wi! Di taytul fɔ da lɛsin de na “Udat Na Jizɔs Krays?” Ɔ wi go yuz chapta 5 na di buk we nem Wetin Wi Go Lan Frɔm di Baybul? Di taytul fɔ da chapta de na “Di Day we Jizɔs Day fɔ Wi Na di Bɛst Gift we Gɔd Dɔn Gi Wi!” Ɛn ɛni ia, wi de gladi mɔ ɛn mɔ fɔ di day we Jizɔs day fɔ wi bay we wi de atɛnd di Mɛmorial ɛn prich wit zil fɔ invayt ɔda pipul dɛn fɔ jɔyn wi. Jiova dɔn gi wi di big big ɔnɔ fɔ tich pipul dɛn bɔt in Pikin.

17. Wetin mek di day we Jizɔs day fɔ wi na di bɛst gift we Gɔd dɔn gi mɔtalman?

¹⁷ Wi nɔ gɛt wan dawt, wi no se wi gɛt gud rizin fɔ kɔntinyu fɔ gladi mɔ ɛn mɔ fɔ di day we Jizɔs day fɔ wi. Bikɔs Jizɔs day fɔ wi, wi ebul fɔ gɛt tayt padi biznɛs wit Jiova pan ɔl we wi nɔ pafɛkt. Bikɔs Jizɔs day fɔ wi, dat go pwɛl pwɛl ɔl di tin dɛn we di Dɛbul de du. (1 Jɔn 3:​8) Bikɔs Jizɔs day fɔ wi, Jiova go du ɔl wetin i bin want fɔ di wɔl. Di wan ol wɔl go bi Paradays. Ɔl di wan dɛn we go de na Paradays go lɛk Jiova ɛn dɛn go de sav am. So, ɛvride, lɛ wi kɔntinyu fɔ luk fɔ we fɔ sho se wi gladi fɔ di day we Jizɔs day fɔ wi, we na di bɛst gift we Gɔd dɔn gi mɔtalman.