1-2. Yinki sakrifise ya Yesu futá, mpe samu na yinki ya vandá important?

NTANGU Nzambi yidiká yandi, Adam vandá ve na disumu. Kasi ntangu yandi salá disumu, yandi bebisá okazion ya kuzwa luzingu ya ntangu nyonso, kaka samu na yandi mosi ve, kasi mpe samu na bana yina yandi zolá buta. Adam meriteke ve ba pardone yandi na mambu yina yandi salá. Yandi mosi baká desizion ya kusala disumu. Kasi, bana ya yandi salá ata kima ya yimbi mpe ni bawu ve nata Adam na kusala disumu. (Rom. 5:12, 14) Adam meriteke kufwa na mambu yina yandi salá. Kasi Yehova zolá sala kwandi kima samu bana ya Adam kuzwa luzingu ya ntangu nyonso? Ee! Kaka mwa ntangu fioti na manima ya disumu ya Adam, Yehova bandá kulakisa faso yandi ke sala, samu na kuvuukisa bamilion ya bana ya Adam, na disumu mpe lufwa. (Kub. 3:15) Na ntangu ya kulunga, Yehova zolá filisa mwana ya yandi awa na ntoto samu yandi “pesa luzingu ya yandi [faso sakrifise samu na] bantu mingi.”—Mrk. 10:45; Yoa. 6:51.

² Yesu pesá luzingu ya yandi samu na kufuta kima yina Adam zimbisá: luzingu ya muntu yina ke ve na masumu. (1 Ko. 15:22) Samu na yinki ya vandá important? Samu misiku yina Nzambi pesá na Moyize, vandá zonza ti kaka luzingu lenda futa luzingu ya nkaka. (Bas. 21:23, 24) Samu na kufuta luzingu yina Adam zimbisá, Yesu pesá luzingu ya yandi samu yandi vandá na nzutu yina vandá ve na masumu. (Rom. 5:17) Samu yandi salá yawu, yandi kumá ‘Papa ya ntangu nyonso’ samu na muntu nyonso yina ke tula kiminu na sakrifise ya yandi.—Iza. 9:6; Rom. 3:23, 24.

3. Faso me zonza Yoane 14:31 mpe 15:13, samu na yinki na ntima mosi Yesu pesá nzutu ya yandi na sakrifise?

³ Na ntima mosi Yesu ndimá kupesa luzingu ya yandi faso sakrifise, samu yandi vandá na luzolo ya mingi samu na Papa ya yandi mpe samu na beto. (Tanga Yoane 14:31; 15:13.) Luzolo yina  natak’ yandi na kusala volonte ya Nzambi luzingu ya yandi nyonso, mpe na kubwa ata fioti ve na mambu ya yimbi. Dyaka, ya sadisak’ yandi na kuvanda kaka ya kukangama na Papa ya yandi. Samu na mambu yina yandi salá, dikanisi ya Yehova samu na bantu mpe samu na ntoto ke lungana. Na artikle yayi, beto ke zonzila samu na yinki Nzambi biká ba talisa Yesu vrai mpasi avant yandi kufwa. Beto ke zonzila mpe, ekzample ya muntu mosi yina soniká Biblia yina vandá pesá valere ya mingi na sakrifise ya Yesu. Mpe na kumanisa, beto ke zonzila wa’ faso beto lenda lakisa ti beto ke sepelá mpe beto ke pesá valere ya mingi na sakrifise yina Yehova na Yesu pesá samu na beto.

4. Zonzila faso Yesu kufwá.

⁴ Kanisa na bamambu nyonso yina salamá kilumbu ya nsuka avant ba kufwa Yesu. Yandi vandá na posibilite ya kulomba na bamilion ya ba-ange na kunwana samu na yandi, kasi yandi salá ve yawu. Yandi biká basolda Romain, kukanga yandi mpe kubula yandi. (Mat. 26:52-54; Yoa. 18:3; 19:1) Ba bulá yandi na bachikote yina lwalisá nzutu ya yandi. Na manima, ba zonzá na yandi na kunata poto ya kilo na mungongo ya yandi yina vandá deja na bamputa. Yesu nwana na kunata poto yina tii kote ba zolá kufwa yandi. Kasi, na manima ya mwa ntangu fioti, basolda Romain zonzá na bakala mosi na kunata yawu na plase ya yandi. (Mat. 27:32) Ntangu Yesu kumá na plase yina ba zolá kufwa yandi, basolda dameke yandi bapointe na maboko mpe na makulu na poto. Poids ya nzutu ya yandi vandá sala ti, bamputa yina vandá kote badameke yandi bapointe vandá funguka dyaka. Bakamarade ya yandi vandá na mawa na ntima mpe mama ya yandi vandá dila, kasi bamfumu ya bajwif vandá seka Yesu. (Luke 23:32-38; Yoa. 19:25) Bampasi ya yandi dureke ba-heure mingi. Pozision yina ba tulá yandi vanda sala ti ya vanda mpasi na ntima ya yandi mpe bapumon ya yandi na kusala na faso ya bien, mpe ya kumá vrai mpasi na yandi na kupema. Yesu zabá ti yandi vandá ya kukangama na Nzambi, mpe avant yandi kufwa, yandi sambilá Yehova mbala ya nsuka. Na manima, Yesu bwisá yintu, mpe vutulá luzingu ya yandi na maboko ya Yehova. (Mrk. 15:37; Luke 23:46; Yoa. 10:17, 18; 19:30) Yesu kufwa faso muntu ya mpamba, na kati ya vrai bampasi, mpe lufwa yandi kwizá malembe-malembe!

5. Samu na Yesu, yinki vandá sala yandi mpasi kulutila faso yina yandi zolá kufwa?

⁵ Samu na Yesu, faso ba kufwá yandi vandá ve susi samu na yandi. Kima yina vanda sala yandi surtu mpasi na ntima, vanda ni rezon yina bajwif pesá samu na kufwa yandi. Ba vuniná yandi bamambu ti, yandi vanda finga Nzambi to yandi pesá ve buzitu na Nzambi mpe na nkumbu ya yandi. (Mat. 26:64-66) Kuzaba ti ba zolá vunina yandi bamambu, ti yandi pesá ve buzitu na Nzambi, vandá nyongisa mingi Yesu. Mpe yandi vandá vingila ti Papa ya yandi bika ve mambu ya nsoni ya faso yina kumina yandi. (Mat. 26:38, 39, 42) Samu na yinki Yehova bika Mwana ya yandi yina yandi ke zolá mingi kutala mpasi mpe kufwa? Beto zonzila barezon tatu.

6. Samu na yinki ba tulá Yesu na zulu ya poto?

⁶ Ya ntete, ba tulá Yesu na poto samu na kulibere bajwif na malediksion. (Gal. 3:10, 13) Ba kuzwá malediksion yina samu ba salá promese ti ba ke landa misiku ya Nzambi, kasi na manima, ba landá dyaka ve yawu. Na yawu, ba zolá kufwa ve kaka samu ba vandá bana ya Adam, kasi mpe samu na malediksion yina vandá na bawu. (Rom. 5:12) Misiku yina Nzambi pesá na Izrael vandá zonza ti muntu yina zolá sala disumu yina ke natá na lufwa, ba zolá kufwa yandi. Na manima, ba zolá tula mvumbi ya yandi na zulu ya poto. * (Kul. 21:22, 23; 27:26) Samu Yesu kufwá na poto, malediksion ya bajwif zolá katuka. Na yawu sakrifise ya Yesu sadisá bawu ata ba mangak’ yandi.

7. Wapi yina ke rezon ya zole yina salá ti Yehova bika Mwana ya yandi tala mpasi?

 ⁷ Beto tala rezon ya zole yina salá ti Nzambi bika Mwana ya yandi tala mpasi. Yandi vandá pesa formasion na Yesu, samu yandi kuma prete ya nene ya mbote. Yesu talá faso ya ke mpasi na kusadila misiku ya Nzambi ntangu beto ke na mantwala ya bampasi ya ngolo. Presion yina vandá na zulu ya yandi vandá ngolo mingi, ni yina pusek’ yandi na kusambila mpe na ‘kudilá na ngolo na mansangasa.’ Samu yandi zaba faso mambu lendá sala mpasi na ntima, Yesu lenda zaba bansatu ya beto, mpe ‘yandi lenda kwiza sadisa beto’ ntangu beto ‘ke lutisá bantangu ya mpasi.’ Beto ke na zonzá mersi na Yehova samu yandi me tula na zulu ya beto, prete ya nene yina ke na kyadi ya beto mpe yina lenda ‘tala beto kyadi samu na mwa bifu ya beto ya yimbi’!—Ebr. 2:17, 18; 4:14-16; 5:7-10.

8. Wapi yina ke rezon ya tatu yina salá ti Yehova bika Yesu tala bampasi ya ngolo?

⁸ Ya tatu, Yehova biká Yesu tala vrai mpasi tii na lufwa samu na kupesa reponse na kestion yayi: Muntu lenda vanda kaka ya kukangama na Yehova ata na kati ya bampasi ya ngolo? Samu na Satan ya lenda salama ve! Yandi me zonza ti bantu ke sambilá Yehova, kaka samu ba ke na nsatu yandi pesa bawu kima. Mpe yandi ke na kiminu ti: kaka faso papa ya bawu Adam, bantu ke zola ve Yehova. (Yobi 1:9-11; 2:4, 5) Samu Yehova vandá na konfianse ti Yesu ke vanda kaka ya kukangama na yandi, yandi biká yandi tala bampasi ya ngolo. Yesu vandá kaka ya kukangama na Nzambi mpe lakisá ti Satan ke muntu ya luvunu.

9. Wapi ekzample apotre Yoane me bikila beto?

⁹ Kiminu ya bakristo mingi kumá ngolo samu ba zabá ti Yesu pesá luzingu ya yandi samu na bawu. Ba ke kontinyeke kupreche ata ba ke na kwamisá bawu, mpe ba me kangá ntima na mantwala ya bampasi ya faso ni faso luzingu ya bawu nyonso. Beto zonzila ekzample ya apotre Yoane. Na kati ya bamvula kuluta 60, yandi kontinye kupreche verite yina ke zonzilá Kristo mpe sakrifise ya yandi. Yandi kumá pene-pene na 100 ans, ntangu guvernema ya Rome talá ti yandi vandá muntu ya yimbi, mpe filisá yandi na boloko na ile ya Patmos. Yinki ya yimbi yandi salá? ‘Samu yandi vandá zonzila mambu ya Nzambi mpe kunata bantu na kutula kiminu na Yesu.’ (Luz. 1:9) Yoane me bikila beto vrai ekzample ya mbote na yina me tadila kiminu mpe kukanga ntima!

10. Wa’ faso balivre ya Biblia yina Yoane soniká ke lakisá ti, yandi vandá pesá valere ya mingi na sakrifise ya Yesu?

¹⁰ Na balivre ya Biblia yina yandi soniká, Yoane lakisá luzolo ya mingi yina yandi vandá na yawu samu na Yesu mpe valere yina yandi vandá pesá na sakrifise ya Yesu. Bambala 100 yandi zonzilá sakrifise ya Yesu mpe bambote yina ya me natina beto. Na kifwani, yandi soniká: ‘Si muntu me sala disumu, beto ke na muntu yina ke sadisá beto, yina ke na kote ya Papa, Yesu Kristo muntu ya mbote.’ (1 Yoa. 2:1, 2) Na mikanda yina yandi soniká, Yoane lakisá importanse ya ‘kuzonzila na bantu ya nkaka mambu ya Yesu.’ (Luz. 19:10) Ya ke na talaná pwelele ti, Yoane vandá pesá valere ya mingi na sakrifise ya Yesu. Wa’ faso beto lenda lakisa ti beto mpe ke salak’ yawu?

11. Yinki lenda sadisa beto na kubwa ve na disumu?

¹¹ Manga kubwa na disumu. Si nge ke pesá valere na sakrifise ya Yesu, nge zolá kanisa ve: ‘Mu ke ve na nsatu ya kusala bangolo na kubwa ve na disumu ntangu mu ke vandá na mantwala ya tentasion. Mu lenda sala ya munu mambu ya yimbi, mpe na manima mu ke lomba pardon na Nzambi.’ Kasi, si nsatu ya ya kusala mambu ya yimbi ke na kwizilá beto, beto zolá zonza: ‘Ve! Na manima ya nyonso yina Yehova na Yesu salá samu na munu, mu lenda sala ve mambu ya yimbi yayi.’ Lomba na Yehova pesa nge ngolo, nge  lenda zonza na yandi: ‘Kubika ve tentasion bwisa munu.’—Mat. 6:13.

12. Wa’ faso beto lenda sadila konseye yina ke na 1 Yoane 3:16-18?

¹² Zola bampangi ya nge ya kento na ya bakala. Si nge zola bampangi ya nge, nge ke lakisa mpe ti nge ke pesá valere na sakrifise ya Yesu. Samu na yinki? Samu Yesu pesá ve luzingu ya yandi kaka samu na beto, kasi mpe samu na bampangi ya beto ya kento na ya bakala. Si yandi eziteke ve na kufwa samu na bawu, ya ke na lakisá ti ba ke na valere ya mingi na meso ya yandi. (Ntanga 1 Yoane 3:16-18.) Beto ke lakisá luzolo na bampangi ya beto na faso ya beto ya kubakila bawu. (Ef. 4:29, 31–5:2) Na kifwani, beto ke sadisá bawu ntangu ba ke vandá na maladi, ntangu ba ke lutisá bantangu ya mpasi, mpe ntangu bamvula ya nene to bima ya nkaka ke natiná bawu bampasi. Kasi, yinki beto ke sala si mpangi mosi na kati ya kimvuka me sala to me zonza mambu yina me lwalisa beto?

13. Samu na yinki beto me lunga kupardone bampangi?

¹³ Ya ke vandá kwandi mpasi samu na nge bantangu ya nkaka na kupardone bampangi ya nge ya kimvuka? (Lev. 19:18) Si ya ke faso yina, landa konseye yayi: ‘Beno zolá suporte bampangi mpe kupardone bampangi, ata si muntu mosi na kati ya beno ke na rezon ya kudasukila mpangi. Faso Yehova pardoneke beno na ntima nyonso, beno mpe me lunga kupardone bampangi na ntima nyonso.’ (Kol. 3:13) Ntangu nyonso yina beto ke pardoneke bampangi, beto ke lakisá na Papa ya beto ya zulu ti, beto ke pesá valere na sakrifise ya mwana ya yandi. Wa’ faso beto lenda kontinye kupesa valere ya mingi na kado yayi Nzambi me pesa beto?

14. Wapi yina ke mosi ya bafaso yina nge lenda lakisa ti nge ke pesá valere ya mingi na sakrifise ya Yesu?

¹⁴ Zonza mersi na Yehova na sakrifise ya mwana ya yandi. Joanna, mpangi ya kento ya 83 ans yina ke vandá na Inde me zonza: “Mu kanisa ti ya ke important na kuzonzilá sakrifise ya Yesu bilumbu nyonso na bapriere ya munu, mpe kuzonza mersi na Yehova samu na yawu.” Bilumbu nyonso ntangu nge ke sambilá nge mosi, zonza na Yehova mambu ya yimbi yina nge me sala mpe lomba na yandi na kupardone nge. Ya vrai, si nge me sala disumu ya nene, nge ke vanda mpe na nsatu bakuluntu sadisa nge. Ba ke kuwa nge mpe ba ke pesa nge bakonseye yina me katuka na Biblia na luzolo nyonso. Ba ke sambila na nge mpe ba ke lomba na Yehova na kupardone nge samu nge ‘vutukila dyaka kikamarade ya mbote na Yandi.’—Zaki 5:14-16.

15. Samu na yinki beto zola baka ntangu ya kutanga mpe ya kukanisa mbote-mbote na mambu yina ke zonzilá sakrifise ya Yesu?

 ¹⁵ Baka ntangu ya kukanisa na sakrifise ya Yesu. Rajamani mpangi mosi ya kento yina ke na 73 ans me zonza: “Ntangu mu ke tangá ti, Yesu talá mpasi, mansangasa ke fuluká munu na meso.” Nge mpe ya lenda sala nge mpasi na ntima na kukanisa na mpasi nyonso yina talá mwana ya Nzambi. Kukanisa mingi na sakrifise yina Yesu salá, ke kulisa luzolo ya beto samu na yandi mpe samu na Papa ya yandi. Samu na kusadisa beto na kukanisa mbote-mbote na sakrifise ya Yesu, beto lenda sala programe ya kulongoka yawu, ntangu beto ke longoká Biblia.

16. Wa’faso kulonga na bantu sakrifise ya Yesu ke sadisa beto mosi mpe? (Tala foto ya kuverture.)

¹⁶ Longa bantu ya nkaka mambu yina ke zonzilá sakrifise ya Yesu. Ntangu nyonso yina nge ke zonzilá sakrifise ya Yesu na bantu ya nkaka valere ya yawu na meso ya nge ke kulá. Beto ke na mikanda mpe na bavideo mingi ya mbote, yina beto lenda sadila samu na kulakisa na bantu ya nkaka samu na yinki Yesu kufwa samu na beto. Na kifwani, beto lenda sadila leson 4 ya mukanda Nzambi me pesa beto bansangu ya beto! Leson yango ke na titre “Yesu Kristo ke nani?” To beto lenda sadila chapitre 5 ya buku Yinki Biblia ke longa beto? Yina ke na titre, “Munkayulu ya Yesu—Dikabu ya Nzambi yina me lutila kitoko.” Mpe bamvula nyonso beto lenda kulisa dyaka valere yina beto ke pesá na sakrifise ya Yesu, ntangu beto ke vandá na Memorial ya lufwa ya yandi mpe ntangu na tiya nyonso, beto ke bokilá bantu ya nkaka na kwiza vukuna na beto. Yehova me pesa beto okazion ya nene ya kulonga na bantu Mwana ya yandi!

17. Samu na yinki sakrifise ya Yesu ke kado ya kulutila nene yina Nzambi me pesa na bantu?

¹⁷ Ya vrai, beto ke na rezon ya mbote ya kukontinye na kupesa valere na sakrifise ya Yesu. Na sakrifise ya Yesu, beto lenda vanda na kikaramade ya ngolo na Yehova, ata beto ke bantu ya masumu. Na sakrifise ya Yesu, mambu nyonso ya yimbi yina Satan me sala, ke vanda dyaka ve. (1 Yoa. 3:8) Na sakrifise ya Yesu, dikanisi ya ntete yina Yehovah vandá na yawu samu na ntoto, ke lungana. Ntoto nyonso ke kuma paradis. Bantu nyonso na ntoto ke zola Yehova mpe ke sadila yandi. Na yawu, bilumbu nyonso, beto tala faso beto lenda lakisa ti beto ke pesá valere na sakrifise ya Yesu, kado ya kulutila nene yina Nzambi me pesa na bantu!