1-2. Ifutu danyiloña hichumanyi nawa tunakudikeñeladi?

CHAVULUMWINIYI muntu wawanina Adama, wajimbesheli chawana chakwikala nawumi wahaya nyaaka, niwawanyanindi ejima alondelelihu. Hadiña hosi hakuleyela nachuma cheliliyi Adama. Wakoñelelimu hohu nshidi. Indi anyanindi? Kwosi chuma chatama chakoñeliwu. (Rom. 5:12, 14) Adama chamuteleleli kufwa hachuma chakoñeliyi. Ilaña Yehova welilihu chuma chimu kulonda anyana kaAdama akekali nawumi wahaya nyaka. Hanyima yakwila Adama navulumuni dehi, Yehova wamwekesheli chakamwinayi anyana kaAdama kunshidi nikukufwa. (Kutach. 3:15) Hampinji yatoñweliyi, Yehova watemesheli Mwanindi hanu hamaseki “[nakuhana] wumi windi kwikala ifutu danyiloña dakukuula nachu antu amavulu.”—Maku 10:45; Yow. 6:51.

² Ifutu danyiloña hichumanyi? Neyi chadishimunawu muNsona jawakwaKristu jachiGriki, ifutu danyiloña hiwuseya wahaniniyi Yesu kulonda alandi nachu chuma chajimbesheliyi Adama. (1 Kor. 15:22) Muloñadi chitunakukeñela ifutu danyiloña? Muloña nshimbi jaYehova jahosheleña hawuñanji jashimwini muNshimbi nawu wumi nawumi. (Kwid. 21:23, 24) Adama wajimbesheli wumi windi wawanina. Hakwila nawu wuñanji waNzambi wushikijewi, Yesu wahanini wumi windi wawanina neyi muntu. (Rom. 5:17) Wekalili “Tata Wahaya Nyaka” kudi ejima akuhwelelaña mwifutu danyiloña.—Isa. 9:6; Rom. 3:23, 24.

3. Kwesekeja naYowanu 14:31 ni 15:13, muloñadi Yesu chahaniniyi wumi windi wawanina kwikala mulambu?

³ Yesu wahanini wumi windi kwikala mulambu muloña wakumukeña Tata yindi wamwiwulu ninetu. (Tañenu Yowanu 14:31; 15:13.) Chineli Yesu wamukeñeli Tata yindi ninetu,  wafuukwilihu kwikala washinshika muchihandilu chindi chejima kushika nikukufwa kwindi. Dichi hamuloña wachuma cheliliyi Yesu, chuma chafuukwiliyi Yehova hakusambila kutalisha kumuchidi wamuntu niiseki chikashikijewa. Muchinu chibaaba, tukuhanjeka chuma chaletesheli Nzambi yamwiteji Yesu kukabakana henohu kanda yafwi. Tukuhanjeka cheñi chantesha hadi nsoneki waBayibolu walemesheli chikupu ifutu danyiloña. Nkumininaku, tukuhanjeka chitunateli kumwekesha kusakilila hefutu danyiloña nichitunateli kumwekesha chitwalemesha mulambu watwinkawu kudi Yehova niYesu.

4. Lumbululenu chafwiliyi Yesu.

⁴ Toñojokenu yuma yamumwekeneni Yesu hefuku dakukumishaku nakufwa. Hela chakwila nateli kutambika mazaza awañelu kulonda amukiñi, ilaña neteji mashidika awaRoma kumukwata, nawa anamweti nankashi. (Mat. 26:52-54; Yow. 18:3; 19:1) Anakumuvupola natubama tunakumushila yilonda hamujimba. Kuhiñahu, anamusendeshi mutondu walema hanyima. Yesu natachiki kumukulula nakumutwala kwiluña dakuyandishila. Ilaña mukapinji kantesha hohu amashidika awaRoma anenki muntu wacheñi kumusendelaku iwu mutondu. (Mat. 27:32) Yesu chinashikiyi kwiluña kukumujahilawu, amashidika anamupopeli hamutondu kumakasa nikunyendu. Dichi chineli mujimba waYesu walema nyisumali yinakutabula yilonda. Amabwambu jindi ananeñi nawa mama yindi nakudila, ilaña anyuli awaYudeya anakumuseha nikumusupisha Yesu. (Luka 23:32-38; Yow. 19:25) Yesu nakabakani hadi maora amavulu. Dichi chinakumukalila kwona chiwahi muloña muchima wunazati nankashi. Hakona kakukumishaku, nalombi kudi Yehova kakukumishaku. Nawa nkumininaku nanoñami nawa wumi windi wunakumi. (Maku 15:37; Luka 23:46; Yow. 10:17, 18; 19:30) Mwamweni wafwili kufwa kwayeña nawa amusawishili.

5. Chumanyi chasweja kutama chamuneñesheli Yesu kubadika njila mwamujahililiwu?

⁵ Yesu haneñeli nanjila yamujahililiwuku. Ilaña nyiloña yamutwikiliwu nawa yaletesheli amujahi diyamuneñesheli. Amutwambilili nawu himukwakasawuntu, muntu wabulaña kumulemesha Nzambi hela ijina daNzambi. (Mat. 26:64-66) Nyiloña yamwinkeliwu antu nawu wamulemeshaña wanyi Nzambi diyamukabishili muyitoñojoka nawa wakuhweleleli nindi Tata yindi hakwiteja kumusawulu muniyi njilaku. (Mat. 26:38, 39, 42) Muloñadi Yehova chamwitejeleliyi Mwanindi kukabakana nikufwa? Tuhanjekenu hayuma yisatu yaletesheli.

6. Muloñadi Yesu chamujahililiwu hamutondu wakuyandishila?

⁶ Chatachi, Yesu ateleleli kumujahila hamutondu kulonda yayisubuli aYudeya kwishiñu. (Ñal. 3:10, 13) Etejeli nawu akwovwahilaña Nshimbi jaNzambi, ilaña alekeli kujovwahila. Chafuminimu, abombelelihu ishiñu dikwawu heshiñu daswaniniwu kunshidi yaAdama. (Rom. 5:12) Nshimbi yaNzambi yayinkeliwu aIsarela yashimwini nawu muntu neyi nakoñi nshidi yatela kufwilahu atela kumujaha. Kuhiñahu, mujimba windi wafwa atela kuwukudika hamutondu. * (Kuhit. 21:22, 23; 27:26) Dichi chamukudikiliwu hamutondu, Yesu wayikuulili aYudeya kunidi ishiñu.

7. Chumanyi chamuchiyedi chaletesheli Nzambi yamwiteji Mwanindi kukabakana?

⁷ Ichi dichuma chamuchiyedi chaletesheli Nzambi yamwiteji Mwanindi kukabakana. Wamudizishileña  Yesu hamudimu windi wakumbidi neyi nekali dehi Kapristu Muneni. Yesu watiyili ochu chichakala kumwovwahila Nzambi neyi wudi mukweseka kwasweja. Wadiña mukukala nankashi chakwila walombeli nindi amukwashi “iku nakudila chikupu nimadilu.” Chineli Yesu wahitamu dehi muyihuñu, yena weluka dehi kukala kwetu nawa “nateli [kutukwasha]” neyi ‘anakutweseka.’ Twamusakililaña Yehova hakutwinka Kapristu Muneni wunateli “kutiyisha kuzeyazeya kwetu.”—Heb. 2:17, 18; 4:14-16; 5:7-10.

8. Chumanyi chamuchisatu chaletesheli Nzambi yamwiteji Yesu amweseki chikupu?

⁸ Chamuchisatu, Yehova wamwitejeli Yesu kukabakana chikupu kulonda yakuli lwihu lwalema: Komana antu anateli kwikala ashinshika kudi Nzambi neyi anayeseki chikupu? Satana wahoshaña nindi inehi! Wahoshaña nindi antu amukalakelaña Nzambi muloña akeñaña nawu yayinkeña yuma. Nawa weluka nindi kufwana tata yawu Adama, hiyadihana kudi Yehovaku. (Yoba 1:9-11; 2:4, 5) Yehova wamukuhweleleli chikupu Mwanindi nawa wamwitejeli kumweseka kweseka kunateli kuumikayi muntu. Yesu wahembeli kashinshi kindi nawa wamwekesheli nindi Satana hitwambi.

9. Chakutalilahwinyi chatushililiyi kapostolu Yowanu?

⁹ Chikuhwelelu chawakwaKristu amavulu chakola nankashi hamuloña wantañishilu yefutu danyiloña. Anatwalekihu kushimwina hela chakwila anakumona ikañesha nawa anomiki kweseka kwashiyashana kushika tuhu nimuwushinakaji. Talenu chakutalilahu chakapostolu Yowanu. Washimwinini chalala chahosha hadi Kristu niifutu danyiloña, hadaha kubadika yaaka 60. Wadiña nayaaka kwakwihi na 100, ilaña nfulumendi yawaRoma yatoñojokeli nawu wadiña watama nawa amukasilili hachitutu chaPatamosa. Muloñanyi wakoñeliyi? “Kukoola mazu aNzambi, nikushimuna nsañu yaYesu.” (Chim. 1:9) Twatela kwimbujola chikuhwelelu chindi nikuumika kwindi!

10. Nyikanda yaYowanu yamwekeshaña ñahi nawu walemesheli ifutu danyiloña?

¹⁰ Yowanu wasonekeli chamukeñeliyi Yesu nichalemesheliyi ifutu danyiloña munyikanda yindi. Wahosha hefutu danyiloña niyuma yayiwahi yaleta ifutu danyiloña kubadika mapampa 100. Chakutalilahu, Yowanu wasonekeli nindi: “Neyi muntu yakoña nshidi, tukweti nkwashi mukwakuloña wudi naTata, yowu Yesu Kristu.” (1 Yow. 2:1, 2) Nsañu yasonekeliyi Yowanu yakonkomwenaña chichalemena “kushimuna wunsahu wansañu yaYesu.” (Chim. 19:10) Chinamwekani hatooka nawu Yowanu walemesheli ifutu danyiloña. Tunateli kumwekesha ñahi netu ninetu twadilemesha?

11. Chumanyi chinateli kutukwasha kukaana kweseka?

¹¹ Bayi muvulumunañaku. Neyi mwamweni twasakililaña hansañu yefutu danyiloña, hitukutoñojokaña netu: ‘Nukutwesha wanyi kuzata nañovu kulonda nibuli kuvulumuna neyi nidi mukweseka. Nateli kukoña nshidi nawa nikulomba kwanakena.’ Ilaña neyi anatweseki nawu tukoñi chuma chatama, tukuhosha netu: ‘Inehi! Nukukoña ñahi chuma chamuchidiwu henohu Yehova niYesu anañilili chuma chabadika?’ Neyi chumichi chimwekana, twatela kumulomba Yehova yatwinki ñovu, nakumulembelela netu; ‘Bayi wuñiteja nikali mukwesekaku.’—Mat. 6:13.

12. Tunateli kuzatisha ñahi kufumba kudi ha 1 Yowanu 3:16-18?

 ¹² Yikeñenu amanakwenu niahela. Neyi tumwekeshaña kukeña kwamuchidiwu, tunakumwekesha kusakilila hefutu danyiloña. Muloñadi? Muloña Yesu wahanini wumi windi kukoola etu niamanakwetu niahela. Neyi Yesu wayifwilili wena, dikwila nawu alema kudi yena. (Tañenu 1 Yowanu 3:16-18.) Twamwekeshaña netu twayikeña amanakwetu niahela kwesekeja nachitwayilaña. (Efwe. 4:29, 31–5:2) Chakutalilahu, twayikwashaña neyi anakati, hela neyi anakumona kukala kwasweja kushilahu niwubanji wadimwekenaña. Hanu tunateli kwila ñahi neyi mukwetu mukwakwitiya yatuneñesha namazu hela chuma chineliyi?

13. Muloñadi chitwatela kuyanakenaña akwetu?

¹³ Komana mwakeña kuyihembela akwenu akwakwitiya nkunyi? (Lev. 19:18) Neyi dimu, londelenu iku kufumba: “Ditiyililenuña wumu namukwawu nikudanakena wumu namukwawu chakufuma kumuchima hela chakwila kudi muntu wudi namuloña namukwawu. Neyi chayanakeneniyi Yehova chakufuma kumuchima, ninenu nawa mwatela kwila mwomumu.” (Kol. 3:13) Mpinji yejima yitwayanakenaña amanakwetu niahela, twamwekeshaña kudi Tata yetu wamwiwulu netu twasakililaña ifutu danyiloña. Tunateli kutwalekahu ñahi kulemesha ichi chawana chafuma kudi Nzambi?

14. Njilanyi yimu mutunateli kusakilila chikupu hefutu danyiloña?

¹⁴ Musakililenu Yehova hamuloña wefutu danyiloña. Muhela Joanna wudi nayaaka 83 wakuIndia wahosheli nindi: “Chalema kutena ifutu danyiloña ifuku dejima dinnakulomba nikumusakilila Yehova hefutu danyiloña.” Neyi munakulomba, toñojokenuña mumwaluwañesha hanodu ifuku nawa mulombenu Yehova yayanakeni. Hela chochu, neyi munakoñi nshidi yeneni mwatela cheñi kulejamu akulumpi kulonda ayikwashi. Akuyitiyilila nawa akuyikwasha kuzatisha Izu daNzambi. Akulombela hamu nanenu, akumulomba Yehova yazatishi kulema kwamulambu waYesu “kulonda ayuuki,” mwikali cheñi nawubwambu wawuwahi naNzambi.—Yak. 5:14-16.

15. Muloñadi chitwatela kwikala nampinji yakutaña hansañu yefutu danyiloña nikutoñojokahu chikupu?

¹⁵ Toñojokenuña chikupu hefutu danyiloña. Muhela Rajamani wudi nayaaka 73 wahosheli  nindi: “Mpinji yejima neyi nitaña chakabakeniyi Yesu, mumesu ami mwenzalaña madilu.” Ninenu munateli kuneña nankashi neyi mutoñojoka chakabakeniyi Mwana kaNzambi. Ilaña neyi mutoñojokaña chikupu hamulambu wahaniniyi Yesu, mukusweja kumukeña nankashi yena niTata yindi. Hakwila nawu chiyikwashiku kutoñojoka chikupu, kwila mwikala nampinji yakudiza iyi nsañu nehi?

16. Indi kudizisha antu hefutu danyiloña kwatukwashaña ñahi? (Talenu mwevulu wudi hakava.)

¹⁶ Yidizishenuña antu nsañu yefutu danyiloña. Tukumwekeshaña kusakilila neyi tuyilejaña antu nsañu yefutu danyiloña. Tukweti nyikanda yayiwahi nimavidiyo atukwashaña kulumbulwila antu muloña waweni Yesu chatufwililiyi. Chakutalilahu, tunateli kuzatisha kudiza 4 mubuloshuwa yaNsañu Yayiwahi Yinafumi Kudi Nzambi! Iku kudiza kwahoshaña nawu “Yesu Kristu Hinyi?” Hela tunateli kuya mukapetulu 5 kamukanda waYumanyi Yinateli Kutudizisha Bayibolu? Aka kapetulu kadi namutu nawu “Ifutu Danyiloña Hichawaana Cheneni Chatwinkayi Nzambi.” Chaaka nichaaka twamwekeshaña kusakilila hefutu danyiloña chitwayaña kuChanukishu chakufwa kwaYesu nikutambika antu amavulu kwinza nakupompa nanetu. Yehova watwinka mudimu walema wakudizisha antu kulonda amwiluki Mwanindi.

17. Muloñadi ifutu danyiloña chidekalila chawana cheneni chatwinkayi Nzambi?

¹⁷ Chakadi nikujina, tukweti yuma yikuletesha tutwalekihu kusakilila nankashi hefutu danyiloña. Muloña wefutu danyiloña, tunateli kwikala nawubwambu wakola naYehova hela twawanina wanyi. Muloña wefutu danyiloña, nyidimu yaDiyabolu yejima akayikisañana. (1 Yow. 3:8) Muloña wefutu danyiloña, yuma yafuukwiliyi Yehova kutalisha heseki yakashikijewa. Iseki dejima dikekala paradisa. Antu ejima akekalamu akamukeña Yehova nawa akamukalakelaña. Dichi, ifuku-niifuku tumwekesheña kusakilila hefutu danyiloña, chawana cheneni chatwinkayi Nzambi.