1-2. Tlanna chu eng nge ni a, engvângin nge kan mamawh?

MIHRING ṭha famkim Adama’n thil sual a tih khân, ama tân chauh ni lovin, a thlahte tân pawh chatuana nun theihna a chân a. A thil sual tih chu thiam chantîr theih a ni lo. Duh rêng vânga thil sual ti a ni si a. A nih chuan, a thlahte chungchâng hi eng nge ni ve? Anni chu Adama’n thil sual a tih khân, pian pawh an la piang si lo va. (Rom 5:12, 14) Adama chu a thiltih avângin thi tlâk a ni a. Mahse, a thlahte chatuanna an nun theih nân Pathian Jehova’n thil engemaw tih theih a nei em? Aw, nei e! Adama’n thil sual a tih hnu lawkah, Pathian Jehova’n sualna leh thihna ânchhe lak ata Adama thlah mi maktaduai tam takte chu a chhan chhuak dâwn tih a sawi si a. (Gen. 3:15) A hun ruatah chuan, a Fapa chu ‘mi tam tak tlan nâna a nun pe tûrin’ vân aṭangin a rawn tîr ang.—Mk. 10:45; Joh. 6:51.

² Tlanna chu eng nge ni? He ṭawngkam hi Kristian Grik Pathian Lehkha Thu-a târ lan a nih chuan Adama hloh tâkte hmu leh tûra Isua pêk tlâk a man sawina a ni. (1 Kor. 15:22) Engvângin nge tlanna kan mamawh? Dâna târ lan rorêl dikna chungchânga Jehova tehna chuan nun aiah nun pe tûra a phût vâng a ni. (Ex. 21:23, 24) Adama chuan a nun ṭha famkim a hloh va. Pathian rorêl dikna nêna inmil tûrin, Isua chuan a hringnun ṭha famkim chu a hlân a. (Rom 5:17) Chutiang chuan, ani chu tlanna ringtu zawng zawngte tâna “Chatuan Pa” a lo ni ta a ni.—Is. 9:6; Rom 3:23, 24.

3. Johana 14:31 leh 15:13-a sawi angin, engvângin nge Isua’n a nun ṭha famkim chu inhuam taka a hlan?

³ Isua chuan a Pa vâna mi leh keini mihringte hi min hmangaih êm avângin inhuam takin a nun a hlân a. (Johana 14:31;  15:13 chhiar rawh.) Chu hmangaihnain a chêttîr avângin a tâwp thlenga rinawmin a Pa duh zâwng hlen chhuah chu a tum tlat a. Chutiang chuan, thih thlengin a rinawm ta rêng a ni. Chuvângin, mihringte leh leilung tâna a tîra Pathian thiltum chu a thleng famkim ang. He thuziakah hian, Pathianin Isua chu a thih hmaa hrehawm tam tak tawrh a phal chhan sawiho a ni ang a. Tlanna ngaihlu tak zettu Bible-a mi rinawm pakhat entawn tûr siam pawh tâwi têa ennawn a ni ang. A tâwpah, tlanna avânga kan lâwmzia lantîr theih dân leh Pathian Jehova leh Isua’n kan tâna an buatsaih inthawina avânga kan lâwmna kan tihzual theih dân pawh sawiho a ni bawk ang.

4. Isua thih dân chu sawi rawh.

⁴ Isua hringnuna a ni hman hnuhnûng ber chu eng ang nge a nih han mitthla teh. Amah humhim tûrin vântirhkoh tam tak ko thei mah se, Rom sipaite a inmantîr a ni. (Mt. 26:52-54; Joh. 18:3; 19:1) Anni chuan Isua taksa chu saruh leh thîr hriam tela siam hruihrualin an vaw hrep a. A hnuah, thisen chhuak zawih zawih chungin ban rit tak an puttîr leh a. Isua’n chu ban chu amah tihhlumna tûr hmun lamah chuan pu chungin a hnûk ṭan a; mahse, a hnuah a sîr aṭanga lo thlîrtu mi pakhat chu an puttîr a ni. (Mt. 27:32) An tihhlumnatûr hmun a thlen chuan, Rom sipaite’n a kut leh kête chu banah chuan an khêngbet a. Nghaisakna ban an tun chuan, a taksa rihnain an khenbehna hliamte chu a uai thlêr a ni. A ṭhiante chu an lungngai hle a, a nu phei chu a ṭap a; mahse, Juda rorêltute chuan ani chu an deusawh a ni. (Lk. 23:32-38; Joh. 19:25) Isua chuan dârkâr engemawti chhûng chu hrehawm takin a tuar a. Chutianga thinga khai kân a nih avângin, a lung leh chuapte chu a rimin, a tân thâwk lâk ringawt pawh a harsa telh telh a. A thih dâwn ṭêpah, a tâwpna atân a ṭawngtai a. Tichuan, a thi ta a ni. (Mk. 15:37; Lk. 23:46; Joh. 10:17, 18; 19:30) Hrehawm tak leh mualpho taka thihna a va ni tak êm!

5. Isua tân, tihhlum a nih dân aia tawrh hrehawm zâwk chu eng nge ni?

⁵ Isua tân tihhlum a nih dân chu a hrehawm tawrh zînga tawrh hrehawm ber a ni lo. Amah tihhlum nâna ṭanchhanna an hman puhna chu tawrh hrehawm a ti zâwk a ni. Ani chu Pathian leh A hming zahna rêng nei lotu—Pathian sawichhetu nia dik lo taka puh a ni a. (Mt. 26:64-66) Chu puhna chuan a rilru a tihhrehawm êm avângin a Pa chu chutianga tihmualphona laka chhanhim tûrin a beisei a ni. (Mt. 26:38, 39, 42) Engvângin nge Pathian Jehova’n a Fapa duh tak chu hrehawm tuara a thih a phal? A chhan pathum i lo ngaihtuah ang u.

6. Engvângin nge Isua chu nghaisakna bana khai kân a ngaih?

⁶ Pakhatna, Isua chu ânchhe laka Juda mite chhuah zalên tûrin thinga khai kân a ngai a. (Gal. 3:10, 13) Anni chuan Pathian Dân zâwm tûrin thu an tiam a; mahse, an zâwm leh si lo. Chuvângin, chu ânchhia chu mi sual Adama thlahte an nih anga anmahni thiam loh chantîrtu a ni. (Rom 5:12) Israelte hnêna pêk Pathian Dân chuan thihna khawp sual titu chu tihhlum tûr a ni a. Chumi hnuah, a ruang chu thinga khai kân tûr a ni tih a târ lang. * (Deut. 21:22, 23; 27:26) Chuvângin, Isua thinga khai kân a nihna chuan amah hnâwltu hnamte tân a inthawina hlâwkpui theihna kawng a hawnsak a ni.

7. Pathianin a Fapa hrehawm tawrh a phal chhan pahnihna chu eng nge ni?

⁷ Pathianin a Fapa hrehawm tawrh a phal  chhan a pahnihna hi han ngaituah teh. Ani chuan Isua chu kan Puithiam Lalber nia nakina a chanvo chelh tûr atân a zirtîr a. Isua chuan fiahna khirh tak hnuaia Pathian thuâwih a awlsam lohzia a hria a. Rilru lama lungngaihna tam tak a tawrh avângin, “nasa taka au leh mittui tla chungin” a ṭawngṭai a ni. Isua chuan chutianga lungngaihnate a lo tawrh tawh avângin, kan mamawhte chu hre thiamin, ‘thlêmnate kan tawh hunah min ṭanpui thei a ni.’ Pathian Jehova chuan “kan chak lohnate min hriatpui thei,” khawngaihna nei tak Puithiam Lalber kan chunga a ruat avângin kan va lâwm tak êm!—Heb. 2:17, 18; 4:14-16; 5:7-10.

8. Pathianin fiahna khirh tak Isua tawrh a phal chhan pathumna chu eng nge ni?

⁸ Pathumna, Pathian Jehova’n he zawhna pawimawh tak hi kan chhân theih nân Isua chu hrehawm namên lo a tawrh a phal a ni: Mihringte hian fiahna khirh tak an hmachhawn hunah pawh Pathian chungah rinawmna an vawng thei ang em? tih hi. Setana chuan an theih a ring lo! Ani chuan mihringte chu mahni hmasialna avâng chauhva Pathian rawngbâwl an nih thu a sawi a. Chu bâkah, mihringte chu an thlahtu Adama ang bawkin, Pathian Jehova hnênah an inpumpêk tak tak lo niin a sawi bawk a ni. (Job. 1:9-11; 2:4, 5) Pathian Jehova chuan a Fapa chu a rinawm ang tih a rin tlat avângin, mihring tawrh theih chin fiahna a tawrh a phal a. Isua chuan a rinawmna vawng nghet tlatin Setana chu dawthei a nihzia a finfiah a ni.

9. Tirhkoh Johana’n kan tân entawn tûr eng nge min hnutchhiah?

⁹ Kristian tam takte rinna chu tlanna chungchâng zirtîrna avângin tihchakin a awm a. Anni chuan dodâlna kârah pawh thu an hril zawm zêl a, an dam chhûngin fiahna chi hrang hrang an tâwk a ni. Tirhkoh Johana entawn tûr siam hi han ngaihtuah teh. Ani chuan Krista leh tlanna chungchâng thutak chu kum 60 aia tam rinawm takin a hril a. Kum 100 dâwn lai a nih hunah pawh, Rom sawrkâr chuan mi hlauhawm taka an ngaih avângin Patmos thliarkârah a tântîr a ni. Engvângin nge? “Pathian thu avâng leh Isua hriattîrna thu” a hrilh vâng a ni. (Thup. 1:9) Rinna leh chhêlna kawnga entawn tûr ṭha a va ni êm!

10. Engtin nge Johana lehkhathawnte chuan tlanna a ngaihhlutzia a târ lan?

¹⁰ Johana chuan Isua a hmangaihzia leh tlanna a ngaihhlutzia chu thlarauva thâwk khum a lehkhathawnahte a ziak a. Chûngahte chuan tlanna, a nih loh leh tlanna kan hlâwkpui theih dân chungchâng vawi 100 chuang a sawi a ni. Entîr nân: “Tu pawhin thil a tihsual chuan, Pa hnêna min sawipuitu Isua Krista, mi fel chu kan nei e,” tiin a ziak a. (1 Joh. 2:1, 2) Johana lehkhathawnte chuan “Isua hriattîrna thu” a pawimawhziate pawh a sawi uar bawk. (Thup. 19:10) Tlanna chu a ngaihlu tak zet tih a chiang a ni. Engtin nge tlanna kan ngaihhlutzia kan lantîr ve theih?

11. Thlêmna do tûrin engin nge min ṭanpui thei?

¹¹ Sual tûra thlêmna chu do rawh. Tlanna avânga kan lâwm tak zet a nih chuan hetiang hian kan ngaihtuah lo vang: ‘Thlêmna ka tawh hunah theih tâwp chhuaha ka do a ngai lo. Thil sual ka tih pawhin, a hnuah ngaihdam ka dîl leh mai ang,’ tiin. Chu aiin, thil sual ti tûra thlêm kan nih hunah: ‘Pathian Jehova leh Isua’n thil engkim min tihsak hnuah, engtin nge he thil sual hi ka tih theih tehlul ang?’ tiin kan sawi zâwk ang. Pathian Jehova hnênah: ‘Sual tûra thlêmnaah min hruai lût suh la,’ tia ngênin a hnênah chakna kan dîl thei a ni.—Mt. 6:13.

12. Engtin nge 1 Johana 3:16-18-a kan hmuh fuihna chu kan nunpui theih?

 ¹² I Kristian unaute chu hmangaih rawh. Kan unaute chunga hmangaihna kan lantîr hian tlanna avânga kan lâwmzia kan lantîr a ni. Engvângin nge? Isua chuan kan tân chauh ni lovin, kan Kristian unaute tân pawha a nun a pêk vâng a ni. An tâna thih a inhuam a nih chuan, anni chu a ngaihlu hle tih a chiang a. (1 Johana 3:16-18 chhiar rawh.) Kan unaute kan cheibâwl dân aṭangin anmahni kan hmangaihzia kan lantîr a. (Eph. 4:29, 31–5:2) Entîr nân, leilung chhiatna pawh tiamin, an dam loh hunahte leh fiahna khirh tak an tawh hunahte kan ṭanpui a ni. A nih leh, kan unau tuemawin kan rilru tinatu thu a sawiin, thil a ti a nih chuan eng nge kan tih ang?

13. Engvângin nge kan ngaihdam ang?

¹³ I Kristian unau tuemaw chungah lungnih lohna i pai reng ṭhîn em? (Lev. 19:18) Chutiang a nih chuan, he fuihna: “Tu pawhin tu chungah pawh thupawi nei ang ula, indawh tawnin inngaidam tawn ula; Lalpa chuan a ngaidam che u ang tak khân ngaidam ve rawh u,” tih hi zâwm ang che. (Kol. 3:13) Kan unaute kan ngaihdam apiangin, tlanna avânga kan lâwmzia kan Pa vâna mi kan hriattîr tihna a ni. Engtin nge Pathian hnên aṭanga kan dawn he thilpêk avânga kan lâwmna hi kan tihzual zêl theih?

14. Tlanna avânga kan lâwmna kan tihzual theih dân kawng khat chu eng nge ni?

¹⁴ Tlanna avângin Jehova chungah lâwm rawh. India rama awm kum 83-a upa Unaunu Joanna-i chuan; “Nî tin ka ṭawngṭainaahte chuan tlanna chungchâng sawi leh chumi avânga Pathian Jehova hnêna lâwmthu sawi chu thil pawimawh tak niin ka hria,” tiin a sawi. I mi mal ṭawngṭainaah chumi nîa i thil tihsualte chu ngaihtuah chhuakin, Jehova hnênah ngaihdam dîl ang che. Ni e, thil sual lian tak kan ti a nih chuan, kohhran upate ṭanpuina kan mamawh ngei ang. Anni chuan i thusawi chu ngaithlain, Bible aṭangin fuihna ṭha tak tak an pe ang che a. Pathian Jehova nêna inlaichîna ṭha i neih leh theih nân ṭawngṭaiin a ngaihdamna an dîlsak bawk ang che.—Jak. 5:14-16.

15. Engvângin nge tlanna chungchâng chhiar nân leh chhût ngun nân hun kan pêk ang?

¹⁵ Tlanna chungchâng chhût ngun rawh. Kum 73-a upa Unaunu Rajamani-i chuan, “Isua hrehawm tawrhna chungchâng ka chhiar  apiangin ka mittui a tla ṭhîn,” tiin a sawi. Nang pawh, Pathian Fapain hrehawm a tawrh nasat dân i ngaihtuah hian i lung a chhe mai thei. Mahse, Isua inthawina chungchâng i chhût ngun nasat poh leh amah leh a Pa i hmangaihna a pung lehzual ang. Tlanna chungchâng i chhût ngun theih nân, engvângin nge chumi chungchâng chu i zir chian loh vang?

16. Engtin nge mi dangte hnêna tlanna chungchâng zirtîr chu kan hlâwkpui theih? (A kâwma milem en rawh.)

¹⁶ Mi dangte chu tlanna chungchâng zirtîr rawh. Mite hnêna tlanna chungchâng kan zirtîr apiangin chumi avânga kan lâwmna pawh a zual sauh vang. Kan tâna Isua a thih chhan mi dangte zirtîrnaa hman tûr hmanraw ṭha tak tak kan nei a ni. Entîr nân, Pathian Min Pêk Chanchin Ṭha! tih brochure, zirlai 4-na chu kan hmang thei a. A thupui chu “Isua Krista Chu Tu Nge Ni?” tih a ni. A nih loh leh, Bible Hian Eng Nge Min Zirtîr? tih lehkhabu bung 5-na chu kan hmang thei bawk. A thupui chu “Tlanna—Pathian Thilpêk Ropui Ber,” tih a ni. Chu bâkah, kum tina neih Isua thih Hriatrengnaa telna leh kan ruala lo tel tûra ṭhahnemngai taka mi dangte sâwmna hmangin kan lâwmna kan tizual a ni. Pathian Jehova’n mi dangte hnêna a Fapa chungchâng zirtîr theihna chanvo min pêk avângin kan va lâwm tak êm!

17. Engvângin nge tlanna hi mihringte hnêna Pathian thilpêk ropui ber a nih?

¹⁷ Tlanna avânga lâwm zêlna tûr chhan ṭha kan nei tih a chiang hle. Ṭha famkim lo ni mah ila, tlanna avângin Pathian Jehova nêna inlaichîna ṭha kan nei thei a. Tlanna avângin diabola hnathawhte chu tihboral vek a ni ang. (1 Joh. 3:8) Tlanna avângin, leilung atâna a tîra Pathian thiltum chu tihfamkim a ni ang a. Leilung pum pui hi paradis-ah a chang tawh ang. I mi hmuh apiang chu Pathian Jehova hmangaihtu leh a rawngbâwltute an ni tawh ang. Chuvângin, nî tin hian mihringte hnêna Pathian thilpêk ropui ber he tlanna avânga kan lâwmzia lantîr theih dân kawng i zawng zêl ang u!