1, 2. ¿Tiʼ aju chojbʼil ex tiquʼn iltoq tiʼj tuʼn t-xi qʼet?

TZʼAQLITOQ Adán tej tkubʼ tbʼinchaʼn il, tuʼntzunju xi tnajsaʼn ambʼil tuʼn tanqʼin te jumajx, ex nya oʼkx te, sino ax ikx qe tyajil. Iltoq tiʼj tuʼn tkyim tuʼnju ojtzqiʼntoq tuʼn qa jun il aju otoq kubʼ tbʼinchaʼn. ¿Yajtzun qe tkʼwal? Mintiʼtoq kyoklen tiʼj il otoq bʼant tuʼn (Rom. 5:12, 14). Tuʼntzunju, ¿atpe jun tiʼ jakutoq bʼant tuʼntzun kyklet tiʼj kamik? At. Tej tzmatoq tikʼlen chʼin ambʼil tkubʼlen tbʼinchaʼn Adán il, tzaj tyekʼin Jehová tzeʼn tuʼn kyklet nim millón tyajil Adán tiʼj il ex tiʼj kamik (Gén. 3:15). Ex ajtoq tpon ambʼil otoq kubʼ t-ximen Jehová, ktzajeltoq tsamaʼn Tkʼwal tuʼn tkyim «tuʼn kykolpet nimku xjal» (Mar. 10:45; Juan 6:51).

² ¿Tiʼ aju chojbʼil? Kyoj uʼj tiʼj Tyol Dios e kubʼ tzʼibʼin toj yol griego, atz in yolin tiʼj chojbʼil bʼant tuʼn Jesús tuʼn tlaqʼet juntl maj aju otoq txi tnajsaʼn Adán (1 Cor. 15:22). ¿Tiquʼn iltoq tiʼj tuʼn t-xi qʼet jun chojbʼil? Tuʼnju tzʼaqli qe tkawbʼil Jehová ex otoq tqʼama toj Ley xi tqʼoʼn te Moisés qa iltoq tiʼj tuʼn tkyim jun xjal qa ma kubʼ tbʼyoʼn jun tukʼil (Éx. 21:23, 24). Otoq txi tnajsaʼn Adán tanqʼibʼil tzʼaqli, ex tuʼn kyjapun kywi tkawbʼil Jehová, iltoq tiʼj tuʼn tkyim Jesús tukʼil t-xmilal tzʼaqli (Rom. 5:17). Iktzun tten in nok Jesús te «Mambʼaj te jumajx» kye qeju in nok qeʼ kykʼuʼj tiʼj chojbʼil (Is. 9:6; Rom. 3:23, 24).

3. Ik tzeʼn in tzaj tqʼamaʼn Juan 14:31 ex 15:13, ¿tiquʼn xi tqʼoʼn Jesús ambʼil tuʼn tkyim?

³ Xi tqʼoʼn Jesús ambʼil tuʼn tkyim tuʼnju kʼujlaʼn Jehová  tuʼn ex tuʼnju kʼujlaʼn qoʼ tuʼn (kjawil uʼjit Juan 14:31; 15:13). Onin kʼujlabʼil lu tiʼj tuʼn kukx txi tbʼinchaʼn tajbʼil Jehová ex tuʼn kukx tten tzʼaqli twitz. Noq tuʼn jlu kjapunel twi t-ximbʼetz Jehová at kyiʼj xjal ex tiʼj Txʼotxʼ. Toj xnaqʼtzbʼil lu, kʼelel qnikʼ tiʼj tiquʼn xi tqʼoʼn Jehová ambʼil tuʼn tikʼ Jesús toj kʼixkʼoj tej naʼmxtoq tkyim. Ax ikx, qo xnaqʼtzal tiʼj jun aj tzʼibʼil tiʼj Tyol Dios aju ok tqʼoʼn toklen chojbʼil. Yajxitl, kʼelel qnikʼ tiʼj tzeʼn jaku kubʼ qyekʼin qa in xi qqʼoʼn chjonte tiʼj chojbʼil. Ex te mankbʼil, kʼelel qnikʼ tiʼj tzeʼn jaku tzʼok qqʼoʼn mas toklen chojbʼil bʼant tuʼn Jehová ex tuʼn Jesús qiʼj.

4. Qʼamantza alkye tten kyim Jesús.

⁴ Qo ximen tiʼjju bʼaj tiʼj Jesús toj mankbʼil qʼij tej tten tzalu twitz Txʼotxʼ. Xi tqʼoʼn ambʼil kye soldad te Roma tuʼn tok kʼixbʼisaʼn kyuʼn maske jakutoq txi tqanin te Jehová tuʼn ttzaj tsamaʼn nim anjel tuʼn kykolin tiʼj (Mat. 26:52-54; Juan 18:3; 19:1). Bʼaj kykʼixbʼisaʼn tukʼil jun asyal ex bʼiʼx etz junjun piẍ tchibʼjal kyuʼn. Yajxitl, xi tiqan tzeʼ jatumel tuʼn tjaw yobʼin maske otoq bʼaj kʼixbʼisaʼn ttzel tiʼj. Pero kanet jun xjal kyuʼn soldad toj bʼe ex ok kychqʼoʼn tuʼn t-xi tiqan tzeʼ te t-xel Jesús (Mat. 27:32). Tejtzun kypon jatumel tuʼn tjaw yobʼin Jesús, ex kyqʼoʼn clav toj tqʼabʼ ex toj tqan. Ex tuʼnju al t-xmilal Jesús, mas xi kʼabʼchaj toj tqʼabʼ ex toj tqan. Akux in noqʼ María kyukʼil qe tamiw Jesús, e ok ten nejenel kye aj Judiy xmayil tiʼj (Luc. 23:32-38; Juan 19:25). Ikʼx tkyaqil nya bʼaʼn lu tuʼn Jesús toj nimku or. Chʼixtoq tjatz bʼaj t-xew ex chʼixtoq tbʼaj tipumal tanmi. Ojtzqiʼntoq tuʼn Jesús qa otoq ten tzʼaqli twitz Jehová ex tej chʼixtoq tkyim naʼn Dios te. Kubʼ tiʼn twiʼ ex kyim (Mar. 15:37; Luc. 23:46; Juan 10:17, 18; 19:30). ¡Xi tiʼn ambʼil tuʼn tkyim Jesús, kubʼ qʼoʼn tchʼixwi ex bʼaj kʼixbʼisaʼn!

5. ¿Tiʼ mas tzaj bʼaj tkʼuʼj Jesús tiʼj?

⁵ Mintiʼ tzaj bʼaj tkʼuʼj Jesús tiʼj alkye tten kyim, sino tiʼjju nya ax tok yol kyqʼama xjal tiʼj. Kyqʼama xjal qa otoq xmayin tiʼj Dios (Mat. 26:64-66). Tzaj tbʼis Jesús tuʼn kyyol xjal, tuʼntzunju xi tqanin te Jehová tuʼn miʼn tikʼ toj kʼixkʼoj lu (Mat. 26:38, 39, 42). ¿Tiquʼn xi tqʼoʼn Jehová ambʼil tuʼn tikʼ Jesús toj nim kʼixkʼoj ex tuʼn tkyim? Qo xnaqʼtzan tiʼj oxe tiquʼn bʼant jlu tuʼn.

6. ¿Tiquʼn iltoq tiʼj tuʼn tjaw yobʼin Jesús twitz tzeʼ?

⁶ Tnejel, iltoq tiʼj tuʼn tjaw yobʼin Jesús twitz tzeʼ tuʼntzun kytzaqpaj aj Judiy tuʼn tiʼj kysentens (Gál. 3:10, 13). Kubʼ qʼoʼn kysentens tuʼnju otoq txi kytziyen te Jehová tuʼn kynimen te, pero mintiʼ bʼant kyuʼn. Ex bʼaʼn tuʼn ttzaj qnaʼn qa aj il qeʼ tuʼnju otoq tzʼel kyiqen il tiʼj Adán (Rom. 5:12). Tzaj tqʼamaʼn Ley xi tqʼoʼn Jehová te Moisés qa iltoq tiʼj tuʼn tkyim jun xjal qa ma bʼant jun matij il tuʼn. Ex at maj jaw qʼoʼn kyxmilal twitz tzeʼ (Deut. 21:22, 23; 27:26). * Tej tjaw yobʼin Jesús twitz tzeʼ, tzaj tiʼn nim kʼiwlabʼil kye xjal ex kye qeju aj Israel maske otoq tzʼel kyikʼun.

7. ¿Alkye tkabʼin tiquʼn xi tqʼoʼn Jehová ambʼil tuʼn tikʼ Jesús toj kʼixkʼoj?

⁷ Tkabʼin, xi tqʼoʼn Jehová ambʼil tuʼn tok kʼixbʼisaʼn Jesús tuʼntzun tbʼant tten  tuʼn tok te Tnejel Pal. El tnikʼ Jesús tiʼj qa kwest tuʼn qajbʼen te Jehová aj qok weʼ kywitz nya bʼaʼn. Ex tej ttzaj bʼaj tkʼuʼj «o naʼn Dios ex o kubʼsanxix wen, ex jaw tqʼajqʼajel twiʼ kyuw, ex jaw oqʼ twitz Dios». Tuʼnju o tzikʼ Jesús twitz nim nya bʼaʼn, in nel tnikʼ kyiʼj xjal ex «at tipumal tuʼn tonin kye qeju in che ok tuj joybʼil kyiʼj». In xi qqʼoʼn nim chjonte te Jehová tuʼnju o jaw tskʼoʼn jun «tnejel pal [...] bʼaʼn qʼaqʼan tkʼuʼj qiʼj tuʼn tlaj mintiʼ qipun» (Heb. 2:17, 18; 4:14-16; 5:7-10).

8. ¿Alkye toxin tiquʼn xi tqʼoʼn Jehová ambʼil tuʼn tikʼ Jesús toj nim kʼixkʼoj?

⁸ Toxin, xi tqʼoʼn Jehová ambʼil tuʼn tikʼ Jesús toj kʼixkʼoj tuʼntzun tel nikʼbʼaj tiʼj qa jaku che ten xjal tzʼaqli twitz Jehová aj kyok weʼ twitz nim nya bʼaʼn. In tzaj tqʼamaʼn Tajaw il qa in qo ajbʼen te Dios noq tuʼnju in qo tzaj tkʼiwlaʼn ex qa mlay ten jun xjal tzʼaqli twitz. Ex in kubʼ t-ximen qa nya kʼujlaʼn Jehová quʼn ik tzeʼn te Adán (Job 1:9-11; 2:4, 5). Ojtzqiʼntoq tuʼn Jehová qa kukx ktel Jesús tzʼaqli twitz, tuʼntzunju xi tqʼoʼn ambʼil tuʼn tikʼ toj nim kʼixkʼoj. Tuʼnju kukx ajbʼen Jesús te Jehová, kubʼ tyekʼin qa nikʼal yol te Tajaw il.

9. ¿Alkye techel kyaj tqʼoʼn apóstol Juan qwitz?

⁹ O chʼiy qʼuqbʼil kykʼuʼj nim okslal tuʼn xnaqʼtzbʼil tiʼj chojbʼil. Kukx in che pakbʼan maske in che el ikʼun. Ex o tzikʼx nim nya bʼaʼn kyuʼn toj kyanqʼibʼil. Qo xnaqʼtzan tiʼj techel kyaj tqʼoʼn apóstol Juan. Yolin mas te 60 abʼqʼi tiʼj Jesús kyukʼil xjal ex tiʼj chojbʼil bʼant tuʼn. Kubʼ kyximen aj kawil te Roma qa jakutoq tzaj nya bʼaʼn kyiʼj tuʼn Juan, tuʼntzunju xi kysamaʼn toj isla te Patmos tej chʼixtoq tjapun twi 100 abʼqʼi. ¿Tiquʼn bʼant jlu kyuʼn? Tuʼnju in pakbʼantoq tiʼj «tyol Dios» ex tuʼnju xi tchikʼbʼaʼn «aju yol tiʼj Jesucrist» (Apoc. 1:9). ¡Tbʼanelxix techel kyaj tqʼoʼn apóstol Juan qwitz tuʼnju kukx ten qʼuqbʼil tkʼuʼj ex ikʼx yajbʼil tuʼn!

10. ¿Tzeʼn kubʼ tyekʼin Juan qa xi tqʼoʼn chjonte tiʼj chojbʼil kyoj uʼj kubʼ ttzʼibʼin?

¹⁰ Kyoj qe uʼj kubʼ ttzʼibʼin Juan tiʼj Tyol Dios, kubʼ tyekʼin qa kʼujlaʼntoq Jesús tuʼn ex qa xi tqʼoʼn chjonte tiʼj chojbʼil. Kyoj uʼj lu, in yolin mas te 100 maj tiʼj chojbʼil moqa tiʼj kʼiwlabʼil in tzaj tiʼn. Jun techel, kubʼ ttzʼibʼin jlu: «Qa at jun ma bʼinchan il, at jun yolil qʼij tukʼil Qman Dios, ate Jesucrist aju tzʼaqlxix» (1 Juan 2:1, 2). Ax ikx, tqʼama qa nim toklen tuʼn t-xi qchikʼbʼaʼn «ax tok tiʼj Jesús» (Apoc. 19:10). Tuʼn jlu in nel qnikʼ tiʼj qa xi tqʼoʼn Juan chjonte tiʼj chojbʼil bʼant tuʼn Jesús. Yajtzun qe, ¿tzeʼn jaku kubʼ qyekʼin qa in xi qqʼoʼn chjonte?

11. ¿Tiʼ jaku tzʼonin qiʼj tuʼn miʼn qkubʼ tzʼaq toj il?

¹¹ Miʼn txi qqʼoʼn ambʼil tuʼn tkubʼ qiʼj tuʼn il. Qa in xi qqʼoʼn chjonte tiʼj chojbʼil, mlay kubʼ qximen jlu: «Nya il tiʼj tuʼn tok tilil wuʼne tuʼn miʼn tkubʼ wiʼje tuʼn il, jaku kubʼ nbʼinchaʼne ex yajxitl jaku tzʼajtz tiʼj wanmiye». Mlay bʼant jlu quʼn aj qok weʼ twitz jun joybʼil, sino mas bʼaʼn qa ma kubʼ qximen jlu: «Mlay kubʼ nbʼinchane jlu, tuʼnju o bʼant nim tiʼchaq tuʼn Jehová ex Jesús wiʼje». Ex nya oʼkx jlu jaku bʼant quʼn, sino ax ikx jaku txi qqanin qipumal te Jehová ex jaku txi qqʼamaʼn jlu te: «Miʼn taqʼa ambʼil tuʼn qoke tuj joybʼil» (Mat. 6:13).

12. ¿Tzeʼn jaku txi qbʼiʼn nabʼil tkuʼx toj 1 Juan 3:16 a 18?

 ¹² Qkʼujlank qe erman. Aj tbʼant jlu quʼn in kubʼ qyekʼin qa in xi qqʼoʼn chjonte tiʼj chojbʼil. ¿Tiquʼn? Tuʼnju nya oʼkx qiʼj xi tqʼoʼn Jesús tchwinqlal, sino ax ikx kyiʼj qerman. Xi tqʼoʼn Jesús tchwinqlal tuʼn qpaj qkyaqilx tuʼnju kʼujlaʼn qoʼ tuʼn (kjawil uʼjit 1 Juan 3:16-18). Qa ma kubʼ qyekʼin tbʼanel qmod kyiʼj erman, in kubʼ qyekʼin qa kʼujlaʼn qe quʼn (Efes. 4:29, 31–5:2). In qo onin kyiʼj aj kyok weʼ kywitz nya bʼaʼn ik tzeʼn aj ttzaj jun yabʼil kyiʼj moqa aj ttzaj jun xitbʼil tuʼnx twitz txʼotxʼ. Yajtzun qa ma tzʼok tbʼinchaʼn jun erman jun nya bʼaʼn qiʼj, ¿tiʼ qmod kbʼel qyekʼin tukʼil?

13. ¿Tiquʼn il tiʼj tuʼn tkubʼ qnajsaʼn kyil txqantl?

¹³ ¿In xipe qkʼuʼn qʼoj kyiʼj qeju in nok kybʼinchaʼn jun nya bʼaʼn qiʼj? (Lev. 19:18). Qa ikju, qbʼinx nabʼil lu: «Kukx tzikʼx kyuʼne kyxolxe ex kynajsam kyile tuʼn tkyaqil kykʼuʼje. Ik tzeʼn te Jehová kubʼ tnajsaʼn kyile, ax ikx kyeye bʼaʼn tuʼn tbʼant kyuʼne» (Col. 3:13, TNM). Aj tkubʼ qnajsaʼn til jun erman, in kubʼ qyekʼin qa in xi qqʼoʼn chjonte te Jehová tiʼj chojbʼil bʼant tuʼn Jesús. ¿Tiʼ mas jaku bʼant quʼn tuʼn tkubʼ qyekʼin qa in xi qqʼoʼn chjonte te Jehová tiʼj chojbʼil?

14. ¿Tiʼ mas jaku tzʼonin qiʼj tuʼn tok qqʼoʼn toklen chojbʼil?

¹⁴ Qqʼonx chjonte te Jehová tiʼj chojbʼil. In tzaj tqʼamaʼn Joanna jlu, jun ermana te 83 abʼqʼi ex in nanqʼin atz India: «In kubʼ nximane qa il tiʼj tuʼn ttzaj nnaʼne chojbʼil toj nnaʼj Diose tkyaqil qʼij ex tuʼn t-xi nqʼoʼne chjonte tiʼj te Jehová». Aj qnaʼn Dios te Jehová qjunalx, qo ximen kyiʼj nya bʼaʼn otoq che bʼant quʼn aj tex qʼij ex qqaninx te Jehová tuʼn tkubʼ tnajsaʼn qil. Ex qa otoq bʼant jun matij il quʼn, nim toklen tuʼn t-xi qqanin onbʼil kye ansyan. Ktzajel kyqʼoʼn ansyan onbʼil qe tukʼil Tyol Dios ex qo okel bʼiʼn kyuʼn. Ax ikx, che naʼl Dios qiʼj tuʼntzun tkubʼ tnajsaʼn qil ex tuʼn tten juntl maj qamiwbʼil tukʼil. Ex jaku bʼant tkyaqil jlu noq tuʼn chojbʼil bʼant tuʼn Jesús (Sant. 5:14-16).

15. ¿Tiquʼn bʼaʼn tuʼn tel qpaʼn ambʼil tuʼn quʼjin ex tuʼn qximen tiʼj chojbʼil?

¹⁵ Qo ximen tiʼj chojbʼil. In tzaj tqʼamaʼn Rajamani jlu, jun ermana te 73 abʼqʼi:  «Bʼiʼx in netz taʼl nwitze aj wuʼjine tiʼj kʼixkʼoj ikʼx tuʼn Jesús». Bʼalo ax ikx qe chʼixme in qo jaw oqʼ aj qximen tiʼj kʼixkʼoj ok weʼ Jesús twitz. Pero qa mas ma qo ximen tiʼj chojbʼil, mas kʼokel qkʼujlaʼn Jehová ex Jesús. Tuʼn tbʼant jlu quʼn, jaku qo xnaqʼtzan tiʼj chojbʼil aj qxnaqʼtzan qjunalx.

16. ¿Tzeʼn in nonin qiʼj aj qyolin tiʼj chojbʼil kyukʼil xjal? (Qʼonka twitza tiʼj tilbʼilal tok tiʼj t-xkʼomil).

¹⁶ Qo yolin tiʼj chojbʼil kyukʼil xjal. Aj qyolin mas tiʼj chojbʼil, mas kʼokel qkʼujlaʼn. At nim onbʼil jaku che ajbʼen quʼn tuʼn t-xi qchikʼbʼaʼn tiquʼn kyim Jesús. Jun techel, jaku tzʼajbʼen uʼj Tbʼanel tqanil tzajni tukʼil Dios quʼn ex jaku qo yolin tiʼj xnaqʼtzbʼil kyaje, aju tok tbʼi «¿Alkye Jesucristo?». Moqa jaku qo yolin tiʼj xnaqʼtzbʼil jweʼ tkuʼx toj uʼj ¿Tiʼ in tzaj t-xnaqʼtzaʼn Tyol Dios qe?, aju tok tbʼi «Aju oyaj mas tbʼanel o tzaj tqʼoʼn Dios». Ex aj tikʼ junjun abʼqʼi, in nok qqʼoʼn mas toklen chojbʼil aj qxiʼ toj Nabʼitz Tkyimlen Jesucristo ex aj t-xi qqʼoʼn txokbʼil kyiʼj xjal tuʼn kypon. O tzaj tqʼoʼn Jehová jun tbʼanel oklenj qe tuʼn t-xi qyekʼin kye xjal alkye Jesucristo.

17. ¿Tiquʼn in nok chojbʼil te mas tbʼanel oyaj o tzaj tqʼoʼn Dios kye xjal?

¹⁷ At nim tiquʼn tuʼn t-xi qqʼoʼn chjonte tiʼj chojbʼil ex tuʼn tok qqʼoʼn toklen. Noq tuʼn chojbʼil jaku ten jun tbʼanel qamiwbʼil tukʼil Jehová maske aj il qoʼ. Ex noq tuʼn chojbʼil kbʼel xiten tkyaqilju tbʼinchbʼen Tajaw il (1 Juan 3:8). Ax ikx, kjapunel twi t-ximbʼetz Jehová tuʼn tok Txʼotxʼ te jun tbʼanel najbʼil. Toj ambʼil aju, kʼokel kykʼujlaʼn xjal Jehová ex oʼkx te che kʼulil. Tuʼntzunju, qjyonx tumel tkyaqil qʼij tuʼn t-xi qqʼoʼn chjonte tiʼj chojbʼil, aju oyaj mas tbʼanelxix o tzaj tqʼoʼn Dios kye xjal.