1-2. Ndando ya kupatula yapwa ika, co mwafwa bika Yesu wapandele kuifweta?

ADAMA uje wapwile wa kulumbunuka mwalingile bubi, wazimbalesele mwonyo wa myaka yoshe, co na bana bendi kubasele kuyoya myaka yoshe. Njambi kakonekelele Adama mwafwa walingilile shakelo. Oloni bana bendi bakebo kubesi na mulonga mwafwa kubamusindiiye alinge bubi. (Loma 5:12, 14) Ngeci, Yehova walingileko bimo mangana akwase bana ba Adama bawane mwonyo wa myaka yoshe. Adama mwabiisile, Yehova washangumukile kumwesa kamandondo-kamandondo mwakobwelamo bana ba Adama ku bubi na ku kutsa. (Kusha 3:15) Yehova wayongwele kutuma Munendi hano hasi mangana akwane “mwonyo wendi ngeci apatule banu babangi.”—Mako 10:45; Yowa 6:51.

² Ndando ya kupatula yapwa ika? Mu Bisoneka bya Cingiliki bya baka-Kilistu, lijwi lya ndando ya kupatula lilumbununa ndando yafwetele Yesu mangana elwise bije byazimbalesele Adama. (1 Koli 15:22) Mwafwa bika Yesu wapandele kwana ndando ya kupatula? Mwafwa mashiko a Yehova amwesele ngwawo mwonyo bapandele kuwufweta na mwonyo. (Kutu 21:23, 24) Adama wazimbalesele mwonyo wa kulumbunuka. Ngeci, Yesu uje wapwa wa kulumbunuka wapandele kutsa mangana afwete mwonyo wazimbalesele Adama. (Loma 5:17) Co Yesu napu ‘Tate wa Myaka Yoshe’ ku banu boshe baje bakulahela ndando ya kupatula.—Isaya 9:6; Loma 3:23, 24.

3. Kwesekesa na mukanda wa Yowano 14:31; 15:13, mwafwa bika Yesu walyanene kututsila?

³ Yesu walyanene kututsila mwafwa wazema manene Ishe na banu. (Tandeni Yowano 14:31; 15:13.) Cizemo cendi camukwasele atwaleleleho kupwa wa kulongwa na kulinga cizango ca  Ishe kweta na kushongo. Byuma byalingile Yesu bikalingisa biyongola bya Yehova ha banu na kaye bikalishulisilile. Muno mu cilongesa, tusimutwiya byuma byalingisile Njambi ecelele Yesu ayande manene simbu kanda atse. Tusimutwiya lalo bya munu umo wasonekele mikanda imo ya mu Mbimbiliya uje wamwene ndando ya kupatula kupwa ya seho. Kutundaho, tusimutwiya mutwasa kumwesela kukandelela ku ndando ya kupatula yatwanene Yehova na Yesu nebi bitunapande kulinga mangana tuimone kupwa ya seho.

4. Byuma muka byalingiwile ha litangwa lyatsile Yesu?

⁴ Tucisimutwiyeni ha byuma byalingiwile ha litangwa libatsiile Yesu. Nameme wasele kulomba tungelo mangana baije bakumunyungilile, Yesu wecelelele maswalale ba Baloma bamukwate na kumupupanga. (Mateo 26:52-54; Yowa 18:3; 19:1) Bamupupisile cibanzi cije camubulumwine manene. Co bamukambekele citi ca kulema ha mwongo uje wakele na bimbandu. Yesu washangumukile kupulunya cije citi na kucitwala ku mutambela kuje kubakamutsiilile. Oloni simbu kanda ete, maswalale ba Baloma balekele munalume umo mangana ambate cije citi. (Mateo 27:32) Yesu mwaketele kuje ku mutambela, baje maswalale bapameyeye maboko na mendi endi haje ha citi. Mubemikile citi ca kuyandesela, bimbandu byendi byakele na kwanjunuka mwafwa ya kulema kwa mubila. Babusamba ba Yesu bakele mu busiwa bwakama, bainaco bakele na kulila. Oloni bantwama ba Bayunda bakebo bakele na kumushendumuna. (Luka 23:32-38; Yowa 19:25) Yesu wayandele ha maola amangi. Ha simbu ije kwamukaluwilile kuhwima mwafwa mbunge yendi na mashapala endi byapangele manene. Simbu kanda atse, Yesu walombele kuli Yehova lwa mamaneselelo. Mwamanesele kulombela, watepwile mutwe wendi, co watsile. (Mako 15:37; Luka 23:46; Yowa 10:17, 18; 19:30) Yesu wazibile manene kubabala ha simbu yailaha simbu kanda atse. Co lalo, wazibile manene shwamwa.

5. Cuma muka cazibisile manene Yesu kubabala ku mbunge?

⁵ Ngila ibatsiililemo Yesu keti ikeyo yamuzibisile manene kubabala ku mbunge. Oloni mulonga ubamutsiilile ukewo wamuzibisile manene kubabala. Bamubangeyeye ngwabo wapwile muka-kushaula Njambi. (Mateo 26:64-66) Eyi ñanda yamuzibisile manene kubabala, co washakele ngwendi Ishe amunyungilile mangana keti ashauke mu ngila eyi. (Mateo 26:38, 39, 42) Mwafwa bika Yehova wecelelele Munendi yazema ayande na kutsa? Tusimutwiyeniko byuma bitatu byamulingisile ngoco.

6. Mwafwa bika Yesu bapandele kumushukika ha citi ca kuyandesela?

⁶ Ca kulibanga, Yesu bamushukikile ha citi ca kuyandesela mangana apatule Bayunda ku cisingo. (Ngala 3:10, 13) Babasingile mwafwa bonowele kwononoka mashiko a Njambi aje abalikumiiye ngwabo bawononoka. Ngeci, Bayunda bakele oni na bisingo bibali mwafwa batambwile lalo bubi kuli Adama. (Loma 5:12) Njambi washikile Baisalele ngwendi munu woshe uje walingile bubi bwakama, bapandele kumutsiya. Co bisimbu bimo, bashukikile cibimbi cendi ha citi. * (Kwitu 21:22, 23; 27:26) Ngeci, Yesu mubamushukikile ha citi wapatwile Bayunda oku ku cisingo nameme bamubyanene.

7. Cuma muka ca mu cibali calingisile Njambi ecelele Munendi ayande?

⁷ Tusimutwiyeni ha cuma ca mu cibali calingisile Njambi ecelele Munendi ayande. Wakele  na kukwasa Yesu alibwahesele cipangi ca kupwa Kapilistu Wakama. Yesu azibuka ngwendi kwapwa kwakukalu kwononoka Njambi nga munu naliwana na ceseko cakama. Mwaliwanene na ceseko cakama washotele manene mbunge, co walombele mu ‘kutambeka oku ali na kulila.’ Yesu atuzibisisa, co asa ‘kutukwasa’ omwo ‘tuliwana na byeseko’ mwafwa nendi waliwanene na byeseko. Twakandelela manene kuli Yehova mwanatwana Kapilistu Wakama uje wakala na ngozi, co asa “kututetela ku kuzeya kwetu.”—Heve 2:17, 18; 4:14-16; 5:7-10.

8. Cuma muka ca mu citatu calingisile Njambi ecelele Yesu aliwane na ceseko cakama?

⁸ Ca mu citatu, Yehova wecelelele Yesu ayande manene mangana amwese ngwendi byuma byendekele Satana byapwile bya makuli. Satana wendekele ngwendi kukwesi munu asa kutwalelelaho kupwa wa kulongwa nga aliwana na ceseko cakama mwafwa banu bakapangela Njambi mangana abaneko byuma bimo. Co wamona ngwendi banu boshe banalifu na cisemi cabo Adama uje kazemene Yehova. (Yombi 1:9-11; 2:4, 5) Yehova wakulahelele ngwendi Munendi atwalelelaho kupwa wa kulongwa mukemwo wamwecelelele aliwane na ceseko cakama. Yesu watwaleleleho kupwa wa kulongwa, co wamwesele ngwendi Satana wapwa muka-makuli.

9. Mwanja muka wanatumwesa kapositolo Yowano?

⁹ Cilongesa ca ndando ya kupatula cinakanyamesa likulahelo lya baka-Kilistu babangi. Bali na kutwalelelaho kwambulula nameme bali na kubalwisa. Co lalo, bali na kutwalelelaho kukolesa mu byeseko bibali na kuliwana nabyo mu kuyoya kwabo. Tusimutwiyeni hali kapositolo Yowano. Watwaleleleho kwambulula bya Kilistu na ndando ya kupatula ha myaka ya kutubakana 60. Mwakele na myaka ya kweta ku 100, Baloma basinganyekele ngwabo wakele na kutengulukila fulumende yabo, co bamukutile na kumutwala ha liñanda lya Patimose. Bamukutilile bika? Bamukutile mwafwa ‘wambulwile Lijwi lya Njambi na busunga buje bwasholwele Yesu.’ (Kujo 1:9) Yowano natumwesa mwanja waubwa manene mwafwa wakele na likulahelo lya kukanyama, co wakolesele mwaliwanene na byeseko.

10. Mikanda yasonekele Yowano imwesa bati ngwayo wamwene ndando ya kupatula kupwa ya seho?

¹⁰ Mu mikanda yasonekele, Yowano wamwesele ngwendi wazemene Yesu, co wakandelelele ku ndando ya kupatula. Wendekele bya ndando ya kupatula na seho yayo lwa kutubakana 100. Cakumwenako, Yowano wasonekele ngwendi: “Nga umo alinga bubi, tuli naumo muka-kutwimanena kuli Tate, ikeye Yesu Kilistu, muka-busunga.” (1 Yowa 2:1, 2) Yowano wasonekele lalo bya seho ya kwambulula bya Yesu. (Kujo 19:10) Cili bene, Yowano wamwene ndando ya kupatula kupwa ya seho manene. Twasa kumutembwinina bati?

11. Bika byasa kutukwasa tukolese omwo tuliwana na byeseko?

¹¹ Koleseni omwo muliwana na byeseko. Nga twamona ndando ya kupatula kupwa ya seho, kutusinganyeka ngwetu: ‘Nebi binjilisinina byahi. Njasa kulinga bubi, co munima njilomba likonekelo.’ Oloni tusinganyeka ngwetu: ‘Kunjapandele kulinga bubi bwa cifwa eci mwafwa Yehova na Yesu bananjimwesa manene cizemo.’ Twasa kulomba Yehova atukwase kukolesa na kumuleka ngwetu: ‘Keti unjecelele kukobela mu ceseko.’—Mateo 6:13.

12. Twasa kupangesa bati cinangulo cili ku mukanda wa 1 Yowano 3:16-18?

¹² Zemeni bandolome na bandokazi beni.  Nga tuzema bandolome na bandokazi betu, tumwesa ngwetu twakandelela ku ndando ya kupatula. Mwafwa bika? Mwafwa Yesu katsililile lika yetu, oloni watsililile na bandolome na bandokazi betu. Yesu wabatsililile mwafwa wabamona kupwa ba seho. (Tandeni 1 Yowano 3:16-18.) Tumwesa ngwetu twazema bandolome na bandokazi betu nga tuyoya nabo mwamubwa. (Efeso 4:29, 31–5:2) Cakumwenako, tunapande kubakwasa nga bali na kubinja nambe nga banaliwana na bukalu bwakama bwa kufwa ngwe bukalu bwa cishitukila. Oloni tunapande kulinga bika nga mukwetu muka-kukulahela alinga nambe kwendeka cuma cije cituzibisa kubabala ku mbunge?

13. Mwafwa bika tunapande kukonekela bakwetu?

¹³ Kuma simbu imo kukamikaluwila kukonekela ndolome nambe ndokazi yeni ndi? (Levi 19:18) Nga mukemwo, co pangeseni eci cinangulo: “Eceleleni tupenga twa bakweni na kulikonekela umo na mukwabo kutundilila kwisi ya mbunge nameme munu ali na cuma cimulingisa ayayabale hali mukwabo. Ngwe muje mwanamikonekela Yehova kutundilila kwisi ya mbunge, neni lingeni ngoco.” (Kolo 3:13, NWT) Nga tukonekela bandolome na bandokazi betu, tumwesa Tate yetu wa mwilu ngwetu twakandelela ku ndando ya kupatula. Bika bitukwasa tutwaleleleho kumona ndando ya kupatula kupwa ya seho?

14. Bika bitukwasa tutwaleleleho kumona ndando ya kupatula kupwa ya seho?

¹⁴ Kandeleleni kuli Yehova ha kumyana ndando ya kupatula. Ndokazi Joanna wa myaka 83 wa ku India wendekele ngwendi: “Njananguka ngwange kwapwa kwa seho kutumbula ndando ya kupatula mu malombelo ange ha litangwa na litangwa na kukandelela kuli Yehova ha kunjanayo.” Simbu kanda mulombele, anukeniko byuma bimo bimunabiisa mukati ka litangwa, co lombeni Yehova amikonekele. Oloni nga munalingi bubi bwakama, co munapande lalo kulomba bukwasi ku bakulunu. Bamitolilila na kuminangula mu cizemo kupangesa Lijwi lya Njambi. Balombela hamo neni, co balomba Yehova amikonekele mangana mutwaleleleho kumupangela.—Yako 5:14-16.

15. Mwafwa bika tunapande kulilongesa bya ndando ya kupatula na kusinganyekesesaho?

¹⁵ Singanyekeseseni ha ndando ya kupatula. Ndokazi Rajamani wa myaka 73 wendekele ngwendi: “Munjikatanda biñanda bimwesa  mwayandelele Yesu, njikalili.” Neni hamo mukazibi kubabala ku mbunge mumukatanda biñanda bimwesa mwayandelele Yesu. Oloni nga musinganyekesesa manene ha ndando ya kupatula, muzema manene Yesu na kuzema manene Ishe. Nga mushaka kusinganyekesesa ha ndando ya kupatula, waneniko simbu ya kutanda na kulilongesa biñanda bije byendeka ha ndando ya kupatula.

16. Kulongesa bakwetu bya ndando ya kupatula kutukwasa bati? (Taleni cikupulo cili ha liputa lya kulibanga.)

¹⁶ Longeseniko bakweni bya ndando ya kupatula. Kulekako bakwetu bya ndando ya kupatula kutukwasa tuimone kupwa ya seho. Tuli na bikwata byabibwa bitwasa kupangesa mu kulongesa bakwetu byalingisile Yesu atutsile. Cakumwenako, twasa kupangesa cilongesa 4 ca mu Broshuwa ya Muzimbu Waubwa wa Kutunda Kuli Njambi cije cili na mutwe wa “Yesu Kilistu Ikeye Iya?” Nambe kupangesa capita 5 ya libulu lya Bika Biitulongesa Mbimbiliya? Ije ili na mutwe wa “Ndando Ya Kupatula Inapu Bwana Bwakama Bwa Kutunda Kuli Njambi.” Co lalo mwaka na mwaka tukamwesa kukandelela ku ndando ya kupatula mutukakala ku Canukiso na kulanya bakwetu baije oku ku cilika. Twabezika manene omwo Yehova natutabesa kulongesa bakwetu bya Munendi.

17. Mwafwa bika ndando ya kupatula yapwa bwana bwa kulitila?

¹⁷ Kuli byuma byabingi bitulingisa tutwaleleleho kukandelela ku ndando ya kupatula. Ndando ya kupatula yatulingisa tulikute busamba na Yehova nameme kutwalumbunukile. Co lalo, ikalingisa bipangi bya Liyabolo bikanyonge. (1 Yowa 3:8) Kutundaho, ndando ya kupatula ikalingisa byanayongola kulinga Yehova hano hasi bilishulisilile. Kaye koshe kakapwa Paradaisi. Co banu boshe bakayoyaho bakazema Yehova na kutwalelelaho kumupangela. Ngeci, ha litangwa na litangwa tumweseni kukandelela ku bwana bwanatwana Njambi bwa ndando ya kupatula.