1-2. Mauri davana be dahaka, bona dahaka dainai ita edai na mai anina bada?

TAU ḠOEVADAENA Adam e kara dika neganai, ia ese mauri hanaihanai na e haboioa, dia ia mo to gabeai baine havaradia besedia danu. Adam ese e karaia karana na kara dika badana badina mai ena ura ibounai ida e karaia. To ia natuna be ede heto? Idia na asi edia kerere bona Adam na se durua una kara dika baine karaia. (Roma 5:12, 14) Ta ese Adam natuna be mase amo baine ruhadia diba, a? Oibe! Adam e kara dika bona se daudau murinai, Iehova ese taina ruana Adam natuna milion momo na kara dika bona mase amo baine ruhadia dalana e hahedinaraiava. (Gen. 3:15) Nega korikori ai, Iehova ese Natuna na guba amo baine siaia “ena mauri baine henia, hutuma ihamauridia” totona.​—Mar. 10:45; Ioa. 6:51.

² Mauri davana be dahaka? Kristen Grik Toretoredia ai e hahedinaraia, mauri davana na Iesu ese e heni Adam ese e haboioa ḡauna baine hoia lou totona. (1 Kor. 15:22) Dahaka dainai mauri davana na mai anina bada? Badina Iehova na ena Taravatu ai e hahedinaraia mauri davana na mauri. (Eso. 21:23, 24) Adam ese ena mauri ḡoevadaena e haboioa. Una dainai Iesu ese mauri davana baine karaia totona, ena mauri ḡoevadaena e bouboulaia Iehova ena hahemaoro maoromaoro heḡereḡerena. (Roma 5:17) Unu amo ia na una boubou ḡauna e abidadama heniamu taudia iboudiai ‘Tamadia Hanaihanai’ ai ela.​—Isa. 9:6; Roma 3:23, 24.

3. Ioane 14:31 bona 15:13 heḡereḡeredia, dahaka dainai Iesu na mai ena ura ida ena mauri ḡoevadaena e bouboulaia?

³ Iesu na Tamana gubai bona ita e lalokau henida dainai, mai ena ura ida ena mauri e bouboulaia. (Ioane 14:31; 15:13 ba duahi.) Una lalokau dainai, lalona e hadaia ena kara maoromaoro basine negea ela bona dokona, bona Tamana  ena ura baine haḡuḡurua. Unu amo Iehova ena ura taunimanima ediai bona ina tanobada enai na be haḡuḡuruamu. Ina atikol ai baita itaiamu, dahaka dainai Iehova ese Iesu na se koua baine hisihisi bada herea bena gabeai baine mase. Danu Baibul e torea tauna ta ena haheitalai baita herevalaiamu, ia ese mauri davana na e laloa bada. Dokonai, baita itaiamu edena dala ai mauri davana dainai eda tenkiu karana baita hahedinaraia bona edena dala ai ita ese Iehova bona Iesu e heni boubou ḡauna baita laloa bada.

4. Iesu e mase dalana mani a herevalaia.

⁴ Mani tanobada ai Iesu ena mauri ginigabenai e vara ḡaudia aita lalodia. Ena be ia ese aneru oreadia bema boiridia diba ia bae gimaia totona, to ia na unu se kara toma. Ia ese Roma tuari taudia na se koudia ia bae dabaia tao bona bae dadabaia. (Mat. 26:52-54; Ioa. 18:3; 19:1) Idia ese whip ta amo Iesu e kwadia bona tauanina e haberoa. Gabeai, idia ese Iesu doruna e haberoa gabuna ai, au metauna ta e atoa kau. Iesu ese una au na e veria laova ia bae hamasea gabuna, to se daudau idia ese tau ta e hamaoroa una au baine huaia. (Mat. 27:32) Iesu na bae hamasea gabuna ai e kau neganai, aena bona imana na au ai e kokodia kau. Iesu tauanina metauna dainai e kokodia gabudia na e hedare. Ia turana bona sinana be e taiva, a Iuda hanua lohiadia be ia e kirikirilaiava. (Luka 23:32-38; Ioa. 19:25) Hora momo lalodiai e hisihisi. Ia kudouna bona baragina na se goadava dainai, ena hahodi danu e aukava. Ena hahodi oreorenai, e ḡuriḡuri. Bona kwarana e atoa diho bena e mase. (Mar. 15:37; Luka 23:46; Ioa. 10:17, 18; 19:30) Momokani, ia na e hisihisi bada, bona e hahemaraia!

5. Iesu ese e lalohekwarahilaia ḡauna badana be dahaka?

⁵ Iesu enai, ia e hamasea dalana na dia ḡau badana. Ia ese e lalohekwarahilaia ḡauna badana na ia e hahemaoro henia dalana. Koikoi dalanai ia na e gwauraiava Dirava ladana e hadikaia tauna eiava Dirava se matauraia tauna. (Mat. 26:64-66) Una ese Iesu lalona na e hahekwarahia bada dainai, e urava bema mai dalana Iehova ese una na bema abia oho. (Mat. 26:38, 39, 42) To dahaka dainai Iehova ese Iesu na se koua e hisihisi bona e mase? Mani badi toi aita herevalai.

6. Iesu hisihisi auna ai e taua dae badina be dahaka?

⁶ Badi ginigunana na, Iesu na au ai e taua dae, unu amo Iuda taudia na dika amo baine ruhadia. (Gal. 3:10, 13) Idia na e gwauhamata Dirava ena Taravatu bae badinaia, to unu na se kara toma. Una dainai, una hahedika na idia latadiai e atoa kau, to danu idia na Adam ena amo e abia hanai kara dikana dainai bae mase na maoro. (Roma 5:12) Dirava ena Taravatu Israel taudia ediai na eto bema ta na kara dikana ta e karaiava, bae hamasea na namo. Gabeai, tauanina na au ai bae taua dae. * (Deu. 21:22, 23; 27:26) Iesu au ai e taua dae dainai, ia e dadaraia besena na una boubou ḡauna amo namo bae davari diba.

7. Dirava ese Natuna se koua baine hisihisi badina iharuana be dahaka?

⁷ Dirava ese Natuna se koua baine hisihisi badina iharuana mani aita herevalaia. Ia ese Iesu na trainin e heniava badina gabeai iseda Hahelaḡa Tauna Badana ai bainela. Iesu na enai e vara ḡaudia amo e diba hahetoho aukadia lalodiai Dirava ibadinana na mai hekwarahina. Hisihisi bada herea e mamia dainai ia na “mai taina bona mai irurumatana”  ida e ḡuriḡuri. Momokani, Iesu na lalometau mamina e abia dainai edai e varamu ḡaudia na e lalopararalaimu bona hedibaḡani ta davarimu neganai, e durudamu. Ta moalemu badina Iehova ese Hahelaḡa Tauna Badana mai ena hebogahisi e abia hidi bona ia na “eda manoka-manoka mamina” mai dibana!​—Heb. 2:17, 18; 4:14-16; 5:7-10.

8. Dirava ese Iesu se koua baine hisihisi badina ihatoina be dahaka?

⁸ Badi ihatoina na, Iehova ese Iesu se koua baine hisihisi unu amo ina henanadai badana baine haerelaia: Taunimanima be heḡereḡere hahetoho aukadia lalodiai Dirava bae badinaia, a? Satana na eto lasi! Ia na e tomu taunimanima na Dirava e hesiai heniamu badina sibodia edia namo e lalomu. Bona ia na e abia daemu idia ese Iehova na asie lalokau heniamu​—tamadia Adam heḡereḡerena. (Iobu 1:9-11; 2:4, 5) Iehova na e abia dae Natuna ese ia na be badinaiamu, una dainai se koua hisihisi bada baine davari. Iesu ese Dirava na e badinaia bona e hamomokania Satana na koikoi tauna.

9. Aposetolo Ioane be dahaka haheitalai namona e hahedinaraia?

⁹ Kristen momo na mauri davana ihahedibalaina karana ese edia abidadama e hagoadaia. Idia ese haroro ḡaukara na e goadalaiava ena be inaidia ese e daḡedaḡe henidiava bona edia mauri lalonai hahetoho idauidau e haheaukalaiva. Mani aposetolo Ioane ena haheitalai aita laloa. Ia na laḡani 60 mai kahana lalodiai, mai momokanina ida Keriso sivaraina bona mauri davana e harorolaiava. Laḡanina 90 heḡereḡerenai, ia na e gwauraiava Roma Gavamanina e inai heniava tauna, una dainai Patamo motumotuna ai e hadiburaia. Dahaka kerere e kara? “Dirava ena hereva bona Iesu ena hereva e gwaurai hedinaraiva daidiai.” (Apok. 1:9) Abidadama bona haheauka karana ai Ioane na haheitalai namona e hahedinaraia!

10. Edena dala ai Ioane ena toretore ese e hahedinaraia ia ese mauri davana na e laloa badava?

¹⁰ Ioane ese e tore bukadia ai e hahedinaraia ia ese Iesu na e lalokau heniava bona mauri davana e laloa bada. Unu buka lalodiai nega 100 mai kahana mauri davana eiava una mauri davana ese baine havara ḡau namodia e herevalaidia. Heḡereḡere, Ioane na e gwa: “Ta bema kara dika, ita na mai ikahada tauna Tamada vairanai, Iesu Keriso, kara maoromaoro tauna, bunai.” (1 Ioa. 2:1, 2) Danu Ioane e tore bukadia lalodiai e hahedinaraia “Iesu ena hereva” iharorolaina karana na mai anina bada. (Apok. 19:10) E hahedinaraia ḡoevaḡoeva, Ioane ese mauri davana na e laloa badava. Ita danu edena dalai baita hahedinaraia mauri davana na ta laloa badamu?

11. Dahaka ese baine duruda hedibaḡani baita dadarai?

¹¹ Hedibaḡani ba dadarai. Bema ita ese mauri davana na ta laloa badamu, ina lalohadai kererena na basita abia: ‘Hahetoho na davarimu neganai baina dadaraia na asi anina. Baina kara dika, bena gabeai baina noinoi egu dika baine gwautao.’ Lasi, to namona na bema haida ese e dibaḡanidamu kara dika ta baita karaia neganai baitato: ‘Lasi! Iehova bona Iesu na lau daigu ai ḡau iboudiai e kara, dahaka dainai ina kara dikana baina karaia.’ Bona Iehova baita noia goada baine henida, baita noinoi goada baitato: ‘Hedibaḡani ai basio hakaugu vareai.’​—Mat. 6:13.

12. Ioane Ginigunana 3:16-18 ena sisiba be ede baita badinaia toma? 

 ¹² Tadikaka bona taihu ba lalokau henidia. Bema tadikaka bona taihu baita lalokau henidiamu, ta hahedinaraiamu mauri davana na ta laloa badamu. Dahaka dainai? Badina Iesu na dia ita mo daidai to eda tadikaka bona taihu daidiai danu ena mauri e heni. Bema Iesu na idia daidiai e mase, e hahedinaraiamu ia ese e lalokau henidiamu. (1 Ioane 3:16-18 ba duahi.) Iseda tadikaka bona taihu ta kara namo henidiamu amo ta hahedinaraiamu ta lalokau henidiamu. (Efe. 4:29, 31–5:2) Heḡereḡere, e goreremu, eiava hahetoho e davarimu, o disasta e varamu negadiai ta durudiamu. To tadikakada ese e karaia ḡauna ta o e gwauraia herevana ta ese ita be hahisidamu neganai dahaka baita kara?

13. Dahaka dainai dika baita gwautao?

¹³ Nega haida emu ai be auka tadikakamu ena dika ba gwautao totona, a? (Lev. 19:18) Bema oibe, ina sisiba ba badinaia: “Ba haheauka heheni. Ta ese bamona baine habadelaia negana ai, emui dika ba hegwau tao heheni; Lohiabada ese emui dika vada e gwau tao; umui danu unu ba kara toma.” (Kol. 3:13) Eda tadikaka bona taihu edia dika ta gwautaomu negadiai, Tamada gubai enai ta hahedinaraiamu, mauri davana na ta laloa badamu. Edena dalai baita hahedinaraia ita ese hanaihanai Dirava ena harihari ḡauna na ta laloa badamu?

14. Mauri davana baita laloa bada dalana ta be dahaka?

¹⁴ Mauri davana dainai Iehova ba tenkiu henia. India ai, laḡanina 83 taihu ta ladana, Joanna na eto, “Na laloamu dina ta ta egu ḡuriḡuri ai mauri davana baina herevalaia na ḡau badana bona una mauri davana dainai Iehova na tenkiu heniamu.” Sibomu emu ḡuriḡuri ai, dina ai o kara kereredia na Iehova enai ba gwaurai hedinarai bona ba noia emu dika baine gwautao. To, bema oi na kerere badana ta o karaia, namona na elda edia heduru ba tahu danu. Idia ese be kamonai henimumu bona Dirava ena Hereva ai sisiba namodia amo be durumumu. Idia na oi ida be ḡuriḡurimu, bona Iehova be noiamu emu dika baine gwautao, unu amo emu hetura karana Iehova ida baine goada lou.​—Iak. 5:14-16.

15. Dahaka dainai nega baita ato mauri davana baita stadilaia bona baita laloa dobu?

¹⁵ Mauri davana ba laloa dobu. Rajamani, laḡanina 73 taihu ta na eto, “Iesu ena hisihisi  sivaraidia na duahimu negadiai, matagu ranudia na e dihomu.” Reana oi danu Dirava Natuna ena hisihisi bo haerodiamu neganai, bo hebogahisimu. To bema Iesu ese e karaia boubou ḡauna bo laloa dobu louloumu, emu lalokau ia bona Tamana ediai na be badamu. Mauri davana ba laloa dobu totona, una topik na emu stadi projek ai ba halaoa diba.

16. Haida ediai mauri davana baita herevalaiamu karana ese ita be ede be duruda tomamu? (Rau 1 laulauna ba itaia.)

¹⁶ Haida ediai mauri davana ba herevalaia. Haida ediai mauri davana ta herevalaiamu negadiai, una mauri davana na ta laloa badamu. Eda tulu namodia amo taunimanima baita hadibadia dahaka dainai Iesu na ita daidai e mase. Heḡereḡere, Sivarai Namodia Dirava Amo! buklet ena lesen 4 baita ḡaukaralaia diba. Una lesen ena sinado na, “Iesu Keriso be Daika?” Eiava Baibul Ena Hahediba Maorodia be Dahaka? bukana ena karoa 5 baita ḡaukaralaia. Una karoa ena sinado na, “Mauri Davana​—Harihari Ḡauna Hereadaena.” Bona laḡani ta ta ai mauri davana ta laloa badamu dalana ta na, Iesu ena mase ena Memorial hebouna ta laomu bona ta ḡaukara goadamu ma haida ta vavediamu una hebou baema. Oibe, Iehova ese ḡaukara namo hereana e henida ia Natuna sivaraina na ma haida baita hadibalaidia!

17. Dahaka dainai mauri davana na Dirava ena harihari ḡauna hereadaena ita edai?

¹⁷ Momokani, mauri davana baita laloa bada bona eda tenkiu karana baita hahedinaraia na namo. Badina ena be ita na dia ḡoevadae, to mauri davana dainai eda hetura karana Iehova ida baita hagoadaia dibamu. Bona mauri davana dainai, Diabolo ena kara dika iboudiai baine haoredia vaitani. (1 Ioa. 3:8) Danu mauri davana ese dala e kehoa matamanai Iehova ena ura tanobada totona na be haḡuḡuruamu. Una anina na tanobada ibounai paradaiso ai be laomu. Taunimanima iboudiai ese Iehova be lalokau heniamu bona be hesiai heniamu. Oibe, namona na hanaihanai dala idauidau ai eda tenkiu karana baita hahedinaraia mauri davana dainai​—una na Dirava ena harihari ḡauna hereadaena ita edai!