1-2. Yowobola ddiniyani, ki mwahaya bwaddi nigahowela?

ADAWU nuuthega oyelela ofuru wowakela egumi yohimala, ni anayeya yabaliwege osogolo. Yothega ya Adawu, kiyanna makalelo ooleveleliwa. Oliye dasakunle othega, bumwahaya ofwanelela okwa. Kiwera anaaye? Aliwa kithukunle nibili mwaha wayothega ya Adawu. (Rom. 5:12, 14) Yohoweleya weriwana ethu-sithu wihina yoboliwe muukwani? Hee! Adawu nuumala othega, Yehova wasoriha madhu yatonyihedha ethu afuniye werana wihina mbwabwadda ni mbwabwadda waathu ekumile murasi wa Adawu, yoboliwe muuthegani ni muukwani. (Gén. 3:15) Mudhidhiya wakwana, Yehova ere omuruma mwanaye odhulu wihina ‘apeleke egumaye ninga mukuthu waathu atene.’ — Mar. 10:45; João 6:51.

² Yowobola ddiniyani? Muwari mwanipangano nixa, yowobola muthengo alinve Yesu wihina apeleke vamburoni va Adawu ayeleliye. (1 Cor. 15:22) Mwahaya bwaddi nigahowela woboliwa? Mwaha wamalamulo apama a Yehova. Nlamulo Yehova avahiliye amwaana Ezarayeli, nawoga wihina muthu ampa muthu mukwaye nuliyeya apiwe. (Êx. 21:23, 24) Adawu ohuyelela egumi yologomana. Wihina yakwanele malamulo apama a Yehova, yohoweleya wihina Yesu aali muthu oologomana akwe. (Rom. 5:17) Nuwindo oliye okala ‘Babi amalabo amatene’ aathu enna nroromelo ni mukuthu wa Yesu. — Isa. 9:6; Rom. 3:23, 24.

3. Mowiwana ni João 14:31 ni 15:13, mwahaya bwaddi Yesu adhe apelekege egumaye yologomana?

³ Yesu onomudhivela vanlubale babe odhulu, ni ohukanna odhivela ni kadda muthu wa iyo, siyeyo yamuthukulele opeleka egumaye yologomana. (Omwileri João 14:31; 15:13.)  Mwaha wodhivela wula onniyena oliye wiikoma wihina akale ororomeleya ofiyedha okwa ni osakula werana efunelo ya babe. Ni makalelo yala, efunelo ya Yehova anniyena omambelelowene ni elabo yavati yere wakwanela. Ohudhera wula weddaga, nnere woona mwahaya bwaddi Mulugu adhe amwenyege Yesu woona goyi ofiyedha okwa. Namala, nnere omuhudhere muthu a mBibliyani avaha thima mukuthu wa Yesu. Nindo, nnere wawona makalelo otonyihedha wihina nnovaha thima mukuthu apelekile Yesu. Omagomihero nnere wahudhera makalelo owenjhedhedha otamalela wehu mukuthu onivahile Yehova vamodha ni Yesu.

4. Kasorihamo makalelo akwile Yesu.

⁴ Kubuwela labo noogomihera Yesu agaali elabo yavati, ahafune ere wawithana matxikwi ni matxikwi aangero wihina emwakihedhe. Mbwenye ohiya werana ndo, oliye wahiya anyakoddo akudda Roma ommaga ni omuukutha yahimweddele thagaraga (Mat. 26:52-54; João 18:3; 19:1) Ayankoddo ale yahikanna muwaxuxo wadarula nyama ya Yesu yamukuthaga. Naarive Yesu agaali makwaddave oddunni, aliwa omuwaddihedha othukula ntxikwa nonyemela yafuniwa omukomelavo. Yesu otxetxeresa ntxikwa nne ofiyedha ofiyana mburo yafuniwa ompavo. Vano mudhidhi vang’no, aliwa omuwaddihedha mulobwana mmodha wihina amwaakele. (Mat. 27:32) Yesu nuufiya mburo yafuniwa ompavo, atoropa ale omukomela maladaaye ni manyalwaye vantxikwani. Teto nuunyemela wamwiilaye vantxikwani vale ni peregu yamukomeliwana, makwadda ale weraga othabwa. Akwaye wambela omukubanyedha, amaye yeraga wiipa nuwunla mbwenye ajudewu olibagabana omuteya. (Luc. 23:32-38; João 19:25) Kadda mudhidhi wavira widdela wule weraga othabwa. Murimaye ni madhadhu aye kuukanna kopolo. Vano ovuma weraga okapulela. Nuwindo, ovuma wogomihera Yesu olobela dila yogomihera, vano asugwihaga muru vati oliye okwa. (Mar. 15:37; Lucas 23:46; João 10:17, 18; 19:30) Mohanganyedha okwa wa Yesu wereyile vang’ono vang’ono mwamakalelo owiddela ni amanyazo!

5. Ethu baani yathabwa omukubanyiha Yesu nuukomeliwa vantxikwani na goyi?

⁵ Yamukubanyiha Yesu kiyaali makalelo aakwiliye vantxikwani na goyi. Yathabwa omukubanyiha, waali winkedhiwa ofiyedha okwa. Oliye ahifiyedha winkedhiwa wihina muthu aalupa malamulo — muthu ahimuriha Mulugu newene ndina na Mulugu. (Mat. 26:64-66) Mubuwelove ole wowi onyemula nlamulo woothuusa mubuwelo wa Yesu, bumwahaya adhe amulobege Babe wihina avugule makalelo ale onyemuliwa. (Mat. 26:38, 39, 42) Mwahaya bwaddi Yehova adhe enyege wihina mwanaye amudhiveliye anyemuliwe ofiyedha okwa? Nnafuna noone mwaha miraru.

6. Mwahaya bwaddi Yesu adhe akwege vantxikwani na goyi?

⁶ Yobajha, Yesu ahifiyedha okwa vantxikwani na goyi wihina awobole majudewu mugoyini. (Gál. 3:10, 13) Ajudewu yulumeliwe mwaha woorumedha wihina nnerege wawiwelela nlamulo a Mulugu, mbwenye walupa wula eganonne. Mwaha wa yeyo, ohiya othongeliwa okwa mwaha wokala ahima Adawu, ajudewu yahulumeliwa. (Rom. 5:12) Nlamulo na Mulugu wodhela amwaana Ezarayeli nawoga negi mulobwana anerena yothega anofwanelela opiwa. Teto muruthu waye were okomeliwa vantxikwani na goyi. * (Deut. 21:22, 23; 27: 26) Nuukomeliwa vantxikwani na goyi, Yesu ohenya wihina nlogo nne naakoddiwe nawakele mareeliho a mukutho waye.

7. Mwaha wanabili wamuthukulele Mulugu weenya wihina mwanaye oone goyi buuvi?

⁷ Kasugwa mwaha wa nabili mwahaya bwaddi Mulugu adhe enyege wihina mwanaye oone goyi nimakalelo yala. Yehova era omuxagiha mwanaye wihina vasogolova akale namakutha munlubale. Yesu ohona ni mentwaaye enatapulela ddi woona goyi mwaha omwiwelela Mulugu ni ofwanyiwa makathamiho oorusa. Makalelo goyi ele yanfwanyiwa yahimuthukulela Yesu olobela alobaga nikavihero wa Yehova “ohulobela nuubebedha, nimutori.” Mohanganyedha, mwaha ofwanyiwa goyi enlubale, Yesu onowedha wonelamo nnahowelihu ni “podi onikavihera” “nehiwaga.” Enonihagalasa Yehova onivaha namakutha munlubale anna thagaraga ni anawedha “onona ndhe dhinanihalela”! — Heb. 2:17, 18; 4:14-16; 5:7-10.

8. Mwaha wa natharu wamuthukulele Yehova weenya wihina Mwanaye eehiwe ni makalelo orusa buvi?

⁸ Yanatharu, Yehova ohenya wihina mwanaye afwanyiwe yoweha yorusa wihina aakule muladdu atatamule Saddana mu Edeni: Enowandeya muthu okala ororomeleya vamentoni va Mulugu naari afwanyiwaga makathamiho orusa? Saddana onihina kadhinandeya! Oliye onihina athu enamulabela Mulugu mwaha wi enafuna yawakele mareeliho. Saddana onihina athu atene moligana ni Adawu kinamudhivela Yehova. (Jó 1:9-11; 2:4, 5) Mbwenye Yehova ahikanna ebaribari wihina Mwanaye ere okala ororomeleya, bumwahaya adhe eenyege wihina oliye eehiwe ofiyedha vinagomela kopolo dha muthu oomaningoni. Yesu ahiimela txithi ofiyedha otonyihedha wihina Saddana muliba woota.

9. Yopadduwa ya murumiwi Juwawu enanikavihera addi?

⁹ Makiristawu owinjhiva nroromelo newa nahunnuwa mwaha wa yohudhiha ya mukutho wa Yesu. Aliwa odidela olaleya naarive eharahariwaga ni yahifwanyiwa makathamiho ohiyana-iyana naari egali athu owunnuwelavo. Kasugwa yopadduwa na murumiwi Juwawu. Oliye ohulaleya nuuviheya ebaribari wodhela Kiristu, mukutho okwaranya yaka 60. Vano ahalaga vang’ono wihina aakwanihe yaka 100 Mumweneni mwakudda Roma yamoona ninga muthu owoopiha bumwahaya edhe erumege wihina afugeliwe mukambura eliga yo Patimo. Aathegile ddi? ‘Mwaha wonvuwiha Mulugu ni wodhela ovaha onamona wodhela Yesu.’ (Apo. 1:9) Ela yotajhiha yapama ya nroromelo ni yovilela!

10. Malivuru alembe Juwawu enoniha avi wihina ovaha thima mukutho wa Yesu?

¹⁰ Malivuru a mBibliyani alembe Juwawu enotonyihedha wi oliye omudhivela Yesu ni otamalela mukutho waye. Malivuru aye enowoga wodhela mukutho ni makalelo onanikaviheriwa dila dhowakwana 100. Motajhiha, murumiwi Juwawu ohuleba egi: ‘Ole anatheege, nokalana namakavihera ori vamodha ni ababa: Yesu Kiristu, muthu owogowa.’ (1 João 2:1, 2) Malivuru alembe Juwawu enothabwa owoga thima enna ‘ovaha onamona wa Yesu’. (Apo. 19:10) Mohanganyedha Juwawu ovaha thima mukutho wa Yesu. Nnamuthajhihe ni makalelo baani?

11. Nehiwaga enaanikavihere ddiniyani?

¹¹ Orabele otheega yapudhave. Akala iyo nnovaha thima mukutho wa Yesu kannadha nuubuwela negi: ‘Ginilibiherelege ddi wihina  githawe wehiwa. Miyo podi othega gamala gilobe nikurumuwelo’ Ohiya werana ndo, natujeliwaga wihina nerena yothega sapama owoga negi: Naari! Ginande avi werana ethu ninga yeyo wula Yehova vamodha ni Yesu agaavahile mukutho?’ Niharaga mubuwelo ola iyo podi omuloba Yehova wihina anivahe kopolo ofiyedha ompigireyela negi: ‘Kamwerena, kamugihiye omorela muwehiwani.’ — Mat. 6:13.

12. Nnawedhe avi ohara yolaga eli va 1 João 3:16-18?

¹² Wadhivelege addibila. Nakanna odhivela nnotonyihedha wihina nnotamalela mukutho wa Yesu. Mwaha waddi? Mwaha wihina Yesu kanikwenle iyo baahi mbwenye aakwele naaddibilaya. Akala oliye ohakwela nihikanna ebaribari wihina Yesu onowavaha thima. (Omwileri 1 João 3:16-18.) Makalelo owooniha wi nnowadhivela addibilihu fuwaweddiha pama. (Efé. 4:29, 31–5:2) Iyo podi wakavihera yakala aredda obe naari yaafwanyiwaga makathamiho orusa ninga yafwanyiwa ngovi. Ki ddibila erana obe awoga ethu enipile mbani nnere ddi?

13. Ekalele ddi yapama walevelela athu amodha?

¹³ Enowurusa omulevelela ddibila uuthegela? (Lev. 19:18) Akala siyeyo ohare yolaga ela: ‘Mudhowegenave nvilelanaga mmodha ni mukwaye mulevelelanaga mmodha ni mukwaye mohihiyedhedha, naari akala muthuya ohukanna mwaha wi amusumele mukwaye. Ninga Yehova uleveleleni mohihiyedhedha, ni nyuwa mweregena emodhave.’ (Col. 3:13) Nakanna elemelelo yowalevelela addibilihu vamodha ni arogolihu nnomoniha Yehova wihina nnotamalela mukutho wa Yesu. Nnere ddi wihina nenjhedhedhege otamalela mukono ola anivahile Mulugu?

14. Makalelo owenjhedhedha otamalela mukutho wa Yesu baavi?

¹⁴ Omutamalele Yehova mwaha ovaha mukutho. Jowana anna yaka 83 anakala elabo yo Indiya onowoga egi: “Miyo ginona wi sathima mudhidhi galobelaga osoriha mukutho wa Yesu ni omutamalela Yehova.” Kadda labo walobelaga wubuwelege dhoviriganiha weriliwena labo nenne. Windo omulobe Yehova wihina ukurumuwele. Mbwenye werana yothega yunlubale kuwerena wasayele anamaholela mulogo. Aliwa enere wuvuruwana ni enere wuvaha dholaga dhinadhela mmadhuni a Mulugu. Teto enere wulobelela ni enere omuloba Yehova wihina ukurumuwele wodhela mukutho  wa Yesu. Ndo we podi ovulumusiwa epaddi yomuzimuni ni ohogolowela wandana wanniwena ni Mulugu. — Tia. 5:14-16.

15. Mwahaya bwaddi sapama opatha mudhidhi wopendda mukutho wa Yesu?

¹⁵ Openddege mukutho wa Yesu. Rajamani, murogola anna yaka 73 onowoga egi: “Gilerigi ni gubuwela makalelo Yesu ooniliye goyi mwintoni mwaga munodhaala mitori.” Niweya podi wubuwela makalelo mwaana a Mulugu ooniliye goyi. Wapendda wodhela mukutho wa Yesu, onerege othabwa omudhivela vamodha ni Yehovaya. Wihina okavihereye opendda mukutho wa Yesu ononamo avi osuza muselu yoyo ohudhera wawo wavayeka?

16. Ekalele ddi yathima wahudhiha athu amodha woodhela mukutho wa Yesu? (Osugwe fotu yavakapani.)

¹⁶ Wahudhihe athu amodha woodhela mukutho wa Yesu. Kadda labo nnalaleyihu wodhela mukutho wa Yesu, otamalela wehu winowenjhedhedheya. Nihikanna dhipano dhapama dhinanikavihera wahudhihana athu amodha wodhela ethu emwerihe Yesu wi anikwele. Motajhiha, iyo podi olabihedha ohudhera 4 wa buruxura Muthenga dhapama dha Mulugu! Yohudhera ela ehikanna musolo onihina: “Yesu baani?” Teto iyo podi olabihedha musolo 5 wa livuru Bibliya onahudhiha ddi? Musoloya anihina: “Yowobola ddi? Kadda yaka nnowenjhedhedha wubuwela mukutho wa Yesu wodhela Muthupo Wowubuwela okwa wa Yesu, ni mwahaya bwaddi nigiilibihera wihina nawithane athu amodha wi yoone muthupo ola. Nnotamalela oneti onivahile Yehova wowahudhiha athu amodha wodhela Mwanaye!

17. Mwahaya bwaddi mukutho wa Yesu odhe okalege mukono munlubale Mulugu avahiliye athu?

¹⁷ Mohanganyedha nihikanna dhithu dhowinjhiva dhinanithukulela otamalela mukutho wa Yesu. Mwaha wa mukutho wa Yesu iyo podi okanna wandana wapama ni Yehova naarive nihili athu oologomana. Mwaha wa mukutho wa Yesu dhithu dhatedhene anoongile Saddana dhinere owomihedhiwa. (1 João 3:8) Teto, efunelo anna Yehova wodhela elabo yavati enere wakwanela. Elabo yatene enere osadduwa wi ekale parayizu. Athu atene onanoniwe enerege omudhivela ni omulabela Yehova. Bumwahaya kadda labo wilibiherege wooniha wi onotamalela nvaho munlubale avahile Mulugu — Yowobola!