1-2. Kansi dipo n’cinji, ndipo ndaŵa yanji tenzofunikila dipo?

MUNTHU wangwilo Adamu pecicimwa etaya mwai wonkhala na moyo wosasila, ndipo izi zekhuza soti ŵana ŵake. Adamu enzeve cifukwa cozikhululukila cifukwa yove ecimwila dala. Lomba ndaŵa yanji ŵana ŵake ekhuziwa? Ove aliyocite colakwa ciliconse, ndipo aliyocilikize Adamu pa cimo yake. (Aro. 5:12, 14) Adamu enzofunika kufwa cifukwa ca cimo yake. Kansi Yehova ecitapo kanthu kuti ŵana ŵa Adamu ankhale na moyo wosasila? Eee! Nthawi itontho pavuli pakuti Adamu wacimwa, Yehova eulula mwati akapulumusile ŵana ŵa Adamu mamiliyoni ku ucimo na imfwa. (Gen. 3:15) Pa nthawi yake yoikika, Yehova enze kuzotuma mwana wake kuti “azatwale moyo wake monga dipo kuti apulumuse ŵanthu anyinji.”​—Mko. 10:45; Yoh. 6:51.

² Kansi dipo ni cinji? M’Malemba acigiriki acikhristu, dipo yutanthauza malipilo yecitwala Yesu polipila zecitaya Adamu. (1 Akor. 15:22) Ndaŵa yanji tenzofunikila dipo? Molingana na mfundo zolungama za Yehova zolembewa m’cilamulo, moyo wenzofunika kulipila moyo. (Eks. 21:23, 24) Adamu etaya moyo wangwilo ndipo pofuna kukwanilisha cilungamo ca Yehova, Yesu etwala soti moyo wangwilo. (Aro. 5:17) Tetyo, enkhala “Tata Wangwilo” kwa onse okhulupilila nsembe ya dipo.​—Yes. 9:6; Aro. 3:23, 24.

3. Molingana na Yohane 14:31 na 15:13, ndaŵa yanji Yesu enze wofunishisha kutwala moyo wake monga dipo?

³ Yesu enze wofunishisha kutwala moyo wake monga dipo cifukwa cokonda ŵanthu na Ausuwake. (Ŵelengani Yohane 14:31; 15:13.) Cifukwa ca cikondi camene ici, Yesu epitilizhya kunkhala wokhulupilika mpaka posilizhyila pa umoyo wake koma soti kukwanilisha cifunilo ca Ausuwake. Cifukwa ca  izi, colinga ca Yehova pa ŵanthu na calo cikakwanilishiwe. M’nkhani ino, tilaŵizhyane cifukwa cake Mulungu elola kuti Yesu avutike akaliyokufwa. Mwacidule tilaŵizhyane soti cisanzo ca wolemba Baibo muyakine wamene eyamikila ngako makonzedwe a dipo. Posilizhyila tilaŵizhyane mwatingaoneshele ciyamikilo casu pa nsembe ya dipo. Ndipo tione soti mwatingakulishile ciyamikilo casu pa Yehova na Yesu cifukwa cotipasa dipo.

4. Fotokozani mwecifwila Yesu.

⁴ Ganizilani zecitika pa siku yosilizhyila ya umoyo wa Yesu wa pacalo. Yove sembe esenga angelo kuti amuyavye. M’malomwake elola masoja aciroma kuti amumange nomuniata. (Mat. 26:52-54; Yoh. 18:3; 19:1) Ove eseŵenzesha mshamu wamene enzocita kuti akamuniata nao, enzocita vilonda. Pavuli pake ove emunyamulisha cimuti colema. Yesu eyesayesa kunyamula cimuti camene ici kuluta naco ku malo kweenzokuzomupaila. Koma nthawi itontho pavuli pake masoja aciroma euzhya munthu muyakine kuti amunyamulileko. (Mat. 27:32) Pecifwika ku malo amene ao, masoja ekhokhomela manja na mendo ŵake pa cimuti. Kulema kwa muŵili wake kwecitisha kuti acite vilonda m’malo mwecimukhokhomela misomali. Ayake na amai ŵake enzolila koma asogoleli Aciyuda enzomuseka. (Luka 23:32-38; Yoh. 19:25) Yove evutika kwa maawazi anyinji. Koma cifukwa cakuti enze wokhokhomelewa pa cimuti conzunzikilapo, mtima koma soti mapwapwa ŵake yenzofunika kuseŵenza mwamphamvu. Izi zecitisha kuti cinkhale covuta kuŵesa. Yesu eziŵa kuti enkhala wokhulupilika ndipo akaliyokufwa etwala pemphelo yosilizhyila kwa Yehova. Posilizhyila ezhyolika nosilizhyika. (Mko. 15:37; Luka 23:46; Yoh. 10:17, 18; 19:30) Kulaŵila cendi, iyi yenze imfwa yoŵaŵa!

5. Kansi ni cinji cecitisha ngako nkhaŵa Yesu?

⁵ Kwa Yesu, kuvutika nopaiwa kwenzomucitisha lini ngako nkhaŵa. Koma zenzomucitisha nkhaŵa ngako ni mlandu wecipasiwa. Yove epasiwa mlandu wawenye wakuti enzolemekeza lini Mulungu na zina yake. (Mat. 26:64-66) Kuziŵa kuti apasiwe mlandu woteti kwenzomucitisha ngako nkhaŵa Yesu cakuti esenga Ausuwake kuti asalole kuti izi zimucitikile. (Mat. 26:38, 39, 42) Ndaŵa yanji Yehova elola kuti mwana wake wokondeka avutike na kufwa? Tiyeni tilaŵizhyane vifukwa vitatu.

6. Ndaŵa yanji Yesu enzofunika kupacikiwa pa cimuti conzunzikilapo?

⁶ Coyamba, Yesu epacikiwa pa cimuti conzunzikilapo kuti amasule Ayuda ku tembelelo. (Agal. 3:10, 13) Ove enkhala na tembelelo iyi cifukwa cakuti enze elonjeza kuti akomvwila cilamulo ca Mulungu koma aliyomvwile. Tetyo, enzofunika kufwa cifukwa ca ucimo wecitolela kwa Adamu na tembelelo yamene iyi. (Aro. 5:12) Cilamulo ca Mulungu kwa Aisiraeli cenzolaŵila kuti munthu wamene wacita cimo yoyenelela imfwa, enzofunika kupaiwa. Pavuli pake muŵili wake wenzoikiwa pa cimuti conzunzikilapo. * (Deut. 21:22, 23; 27:26) Kupacikiwa kwa Yesu pa cimuti conzunzikilapo, kwecitisha kuti Ayuda amasuliwe ku tembelelo yao olo kuti emukana.

7. Kansi n’cifukwa caciŵili cotyani cecilolela Mulungu kuti Yesu avutike na kufwa?

⁷ Cifukwa caciŵili cecilolela Mulungu kuti mwana wake avutike, n’cakuti enzomuphunzisa kuti akankhale Mkulu wa Ansembe  msogolo. Yesu eziŵa mwacunkhalila covuta kumvwila Mulungu pa nthawi yakuti wakumana na ciyeso cikulu. Evutika maganizo cakuti epemphela “mokuwa koma soti moponesha misozi.” Ndipo cifukwa cakuti Yesu ekumana na mavuto anyinji, omvwisha zatufunikila ndipo ni “wokonzeka kutiyavya” ngati “takumana na mavuto.” Tuyamikila ngako Yehova cifukwa cotipasa Mkulu wa Ansembe wacifundo “wamene otimvwishisha”!​—Aheb. 2:17, 18; 4:14-16; 5:7-10.

8. Kansi ni cifukwa cacitatu cotyani cecilolela Mulungu kuti Yesu avutike?

⁸ Cifukwa cacitatu cecilolela Yehova kuti Yesu avutike na kufwa cenze kuyankha konsho yakuti: Kansi ŵanthu angakwanishe kunkhala okhulupilika ngati akumana na mavuto anyinji? Satana olaŵila kuti ŵanthu otumikila Mulungu cifukwa ca dyela. Ndipo okhulupilila kuti molingana na Adamu ŵanthu onse okonda lini Yehova. (Yobu 1:9-11; 2:4, 5) Cifukwa cakuti Yehova enze na cidalilo cakuti mwana wake ankhale wokhulupilika, elola kuti Yesu ayesewe kufwika pa mlingo wakuti angakwanishe kupilila. Yesu epitilizhya kunkhala wokhulupilika ndipo eonesha patuŵa kuti Satana ni wawenye.

9. Kansi Yohane etipasa cisanzo cotyani?

⁹ Cikhulupililo ca Akhristu anyinji catang’a ngako cifukwa coganizila makonzedwe a dipo. Ove opitilizhya kulalikila olo kuti okumana na mavuto anyinji pa umoyo. Ganizilani cisanzo ca mtumwi Yohane. Yove elalikila mokhulupilika za cendi cokhuza Khristu na dipo kwa vyaka pafupifupi 60. Peenze na vyaka pafupifupi 100, boma ya Aroma yeona kuti enzosokoneza ŵanthu na viphunziso. Tetyo yemumanga nomuika m’jele pa cisumbu ca Patimo. Kansi elakwanji? “Enzolaŵila za Mulungu nocitila umboni za Yesu.” (Chiv. 1:9) Yohane etwala cisanzo ciweme pa nkhani yonkhala wokhulupilika na kupilila!

10. Kansi zolemba za Yohane zuonesha tyani kuti enzoyamikila dipo?

¹⁰ M’mabuku a m’Baibo yecilemba, Yohane eonesha kuti enzokonda ngako Yesu ndipo enzoyamikila nsembe ya dipo. Etomola za dipo na zinthu ziweme zukwanilishiwa cifukwa ca dipo maulwendo opitilila pa 100. Mwacisanzo, Yohane elemba kuti: “Muyakine akacita cimo, tili na mthandizi wolungama Yesu Khristu wamene ali na Atata.” (1 Yoh. 2:1, 2) Zecilemba Yohane zuonesha “kufunika kocitila umboni za Yesu Khristu.” (Chiv. 19:10) Kulaŵila cendi, Yohane enzoyamikila ngako dipo. Kansi nase tingaoneshe tyani kuti tuyamikila dipo?

11. Kansi n’cinji cingatiyavye kuti tisagonje tikayesewa?

¹¹ Mukopewa mayeselo yamene yangakucitisheni kuti mucimwe. Ngati tuyamikila dipo, tupewa maganizo yakuti: ‘Paliye cifukwa coyesayesa mwamphamvu kuti tisacimwe, ndipo olo kuti ticimwe tisenge Yehova kuti atikhululukile.’ M’malomwake, tikayesewa kuti ticite cinthu ciipa tukana nozikonsha kuti: ‘Tingacitilenji cinthu coteti pamene Yehova na Yesu eticitila zinthu zikulu?’ Tetyo tingasenge Yehova kuti atipase mphamvu mwa kumuuzhya kuti: ‘Musalole kuti nigonje ku ciyeso ici.’​—Mat. 6:13.

12. Kansi tingaseŵenzeshe tyani malangizo opezeka pa 1 Yohane 3:16-18?

¹² Mukokonda akwasu na azilongosi. Ngati tukonda akwasu na azilongosi, niye kuti tuonesha kuti tuyamikila nsembe ya dipo.  Ndaŵa yanji? Cifukwa cakuti Yesu efwila seo koma soti akwasu na azilongosi. Yesu enze wokonzeka kuŵafwila, ndipo izi zuonesha kuti oŵakonda ngako. (Ŵelengani 1 Yohane 3:16-18.) Tuonesha kuti tukonda akwasu na azilongosi mwa zocita zasu. (Aef. 4:29, 31–5:2) Mwacisanzo, tuŵayavya ngati alwala olo ngati okumana na mavuto ayakine monga masoka acilengedwe. Kansi tufunika kucita cinji ngati wokhulupilila muyasu watikhumudwisha?

13. Ndaŵa yanji tufunika kukhululukila akwasu na azilongosi?

¹³ Kansi nthawi ziyakine cukuvutani kukhululukila mkwasu olo kalongosi wamene wakukhumudwishani? (Lev. 19:18) Ngati n’tetyo, mukokonkha malangizo aŵa: “Pitilizhyani kulolelana na kukhululukilana na mtima wonse olo kuti muyakine ali na cifukwa codandaulila pa muyake. Monga ni mwecikukhululukilani Yehova na mtima wonse, namwe citani cimozimozi.” (Akol. 3:13) Nthawi zonse tikakhululukila mkwasu olo kalongosi, tuonesha Ausuwasu akululu kuti tuyamikila nsembe ya dipo. Kansi tingakulishe tyani ciyamikilo casu pa mphaso iyi yofumila kwa Mulungu?

14. Kansi ni njila iyakine yotyani yatingakulishile ciyamikilo casu pa nsembe ya dipo?

¹⁴ Mukoyamikila Yehova cifukwa ca dipo. Kalongosi Joanna wa ku India wamene ali na vyaka 83, elaŵila kuti: “Nuona kuti n’cinthu cofunika ngako kutomola dipo m’mapemphelo ŵangu noyamikila Yehova cifukwa ca mphaso yamene iyi.” Ngati mupemphela pamweka, mukouzhya Yehova vinthu vamwalakwisa pa siku yamene iyo nosenga kuti akukhululukileni. Koma ngati mwacita cimo ikulu, mufunika kusenga thandizo kwa akulu. Ove amvwishile nokupasani malangizo acikondi ofumila m’Mau a Mulungu, Baibo. Apemphele namwe nosenga Yehova kuti akukhululukileni kuti munkhale soti pa ushamwali wotang’a na yove.”​—Yak. 5:14-16.

15. Ndaŵa yanji tufunika kupatula nthawi yosinkhasinkha nophunzila zokhuza dipo?

¹⁵ Mukosinkhasinkha zokhuza dipo. Kalongosi Rajamani wa vyaka 73, elaŵila kuti: “Nthawi zonse nikaŵelenga mwecivutikila Yesu, nulila.” Payakine namwe mukumvwa citinthi mukaganizila mwecivutikila mwana wa Mulungu. Pamusinkhasinkha za nsembe ya  Yesu, cikondi canu pa yove na Ausuwake cukulilako. Kuti mukokwanisha kusinkhasinkha za dipo, mungacite luweme kupatula nthawi yophunzila nkhani yamene iyi.

16. Kansi tupindula tyani ngati tuphunzisako ayakine za dipo? (Onani Cithunzithunzi Pacikuto.)

¹⁶ Mukophunzisa ayakine zokhuza dipo. Ngati tuuzhya ayakine zokhuza dipo, ciyamikilo casu cukula. Tili na zofalisa ziweme na mavidyo yatingaseŵenzeshe pophunzisa ayakine cifukwa cake Yesu etifwila. Mwacisanzo, tingaseŵenzeshe phunzilo 4 m’kabuku kakuti, Uthenga Uweme Wofumila Kuli Mulungu! Phunzilo iyi ili na mutu wakuti “Ko Yesu Khilisitu ni Ŵani?” Olo tingaseŵenzeshe mutu 5 m’buku yakuti Kansi Baibolo Ingatiphunzise Cinji? Phunzilo iyi ili na mutu wakuti, “Dipo ni Mphaso Yamtengo Wapatali Yofumila Kwa Mulungu.” Caka ciliconse tukulisha ciyamikilo casu mwa kupezeka pa Cikumbuso notolamo mbali mu nchito yoitila ŵanthu ku cocitika camene ici. Yehova watipasa mwai ukulu wophunzisako ayakine za mwana wake!

17. Ndaŵa yanji dipo ni mphaso ikulu yofumila kwa Mulungu?

¹⁷ Mosakaikila tili na vifukwa vinyinji vamene vuticitisha kupitilizhya kukulisha ciyamikilo casu pa nsembe ya dipo. Cifukwa ca dipo, tukwanisha kunkhala pa ushamwali wotang’a na Yehova olo kuti tiliye ungwilo. Ndipo cifukwa ca dipo nchito za Maleŵania zikaonongewe. (1 Yoh. 3:8) Kuyangizhyila apo, colinga ca Yehova coyambilila cokhuza calo cikwanilishiwe. Calo conse cikankhale Paladaiso. Pa nthawi yamene iyo, ŵanthu onse akokonda Yehova nomutumikila. Tetyo, lekani kuti aliyense wa seo akosakilasakila njila zooneshelamo kuti oyamikila dipo yamene ni mphaso ikulu yofumila kwa Mulungu!