1-2. Topollo ke eng, gona ke ka baka la’ng re e hloka?

GE Adama a be a dira sebe, o ile a lahlegelwa ke kholofelo ya gore yena le bana bao a bego a tla ba le bona ba tle ba phele ka mo go sa felego. Go be go se na lebaka la gore Adama a dire sebe. Ka baka leo, o dirile sebe ka boomo. Eupša bana ba Adama ba tsena bjang tabeng ye ka gobane ba be ba se ba tšwa ba belegwa ge a dira sebe? (Baroma 5:12, 14) Adama o be a swanelwa ke go hwa ka baka la seo a se dirilego. Eupša na go na le seo Jehofa a bego a ka se dira go thuša bana ba Adama gore ba tle ba phele ka mo go sa felego? Ee, se gona! Kapejana ka morago ga gore Adama a dire sebe, ganyenyane-ganyenyane Jehofa o ile a utolla kamoo a bego a tla lokolla bana ba Adama ba dimilione bokgobeng bja sebe le lehu. (Gen. 3:15) Ka nako yeo Jehofa a bego a e beile, o be a tla romela Morwa wa gagwe mo lefaseng ‘go tlo neela bophelo bja gagwe e le topollo bakeng sa ba bantši.’—Mar. 10:45; Joh. 6:51.

² Topollo ke eng? Ge Mangwalo a Bakriste a Segerika a bolela ka topollo, a šupa go seo Jesu a ilego a se dira go rekolla seo Adama a bego a dirile gore yena le bana ba gagwe ba se sa se hwetša. (1 Bakor. 15:22) Ke ka baka la’ng re hloka topollo? Ke ka gobane go ya ka Molao woo Modimo a bego a o neile Baisiraele, bophelo bo be bo swanetše gore bo lefše ka bophelo gore go be le toka. (Ek. 21:23, 24) Adama o ile a lahla bophelo bja gagwe bjo bo phethagetšego. Ka baka leo, e le gore go be le toka go ya ka Modimo, Jesu o ile a swanelwa ke go neela bophelo bja gagwe bjo bo phethagetšego. (Baroma 5:17) Ka go dira bjalo o ile a ba “Tate wa ka mo go sa Felego” go bohle bao ba bontšhago tumelo sehlabelong sa gagwe.—Jes. 9:6; Baroma 3:23, 24.

3. Go ya ka Johane 14:31 le 15:13, ke ka baka la’ng Jesu a be a ikemišeditše go neela bophelo bja gagwe bjo bo phethagetšego?

³ Jesu o be a ikemišeditše go neela bophelo bja gagwe e le  sehlabelo ka ge a rata Tatagwe kudu e bile le rena a re rata. (Bala Johane 14:31; 15:13.) Ka baka leo Jesu o be a ikemišeditše go dula a botega go fihlela a ehwa le go phetha thato ya Tatagwe. Seo Jesu a se dirilego se tla thuša go dira gore morero wa Jehofa ka batho le ka lefase o phethagale. Sehlogong se re tlo kwa gore ke ka baka la eng Modimo a ile a dumelela gore Jesu a tlaišege kudu pele a ka hwa. Le gona re tlo boledišana ganyenyane ka mohlala wa mongwadi yo mongwe wa Beibele yo a bego a leboga sehlabelo sa topollo kudu. Mafelelong re tlo kwa gore re ka bontšha bjang gore re leboga sehlabelo sa Jesu le kamoo re ka oketšago tsela yeo re lebogago seo Jehofa le Jesu ba re diretšego sona.

4. Hlalosa gore Jesu o hwile bjang.

⁴ Nagana gore go be go le bjang letšatšing leo Jesu a bolailwego ka lona. Le ge Jesu a be a ka kgona go kgopela madira a barongwa gore a tle a mo šireletše, o ile a no dumelela mašole a Baroma a mo swara e bile a mo itia ga sehlogo. (Mat. 26:52-54; Joh. 18:3; 19:1) Mašole ao a ile a mo itia ka sefepi seo se bego se gagoganya nama ya gagwe. Ka morago a ile a mo rweša kota e boima mokokotlong wa gagwe wo o bego o elela madi. Jesu o ile a thoma go goga kota yeo gore a e iše moo a bego a tlo bolaelwa gona, eupša go se go ye kae mašole a Baroma a ile a laela monna yo mongwe gore a mo rwalele yona ka ge yena a be a felelwa ke matla. (Mat. 27:32) Ge Jesu a be a fihla moo, batho bao ba bego ba tlo mmolaya ba ile ba kokotela diatla tša gagwe le maoto a gagwe koteng. Boima bja mmele wa Jesu bo be bo dira gore dintho tša moo a kokotetšwego gona di gagoge. Bagwera ba gagwe ba be ba kwele bohloko gomme mmagwe a lla, eupša baetapele ba Bajuda bona ba be ba kwera Jesu. (Luka 23:32-38; Joh. 19:25) Jesu o ile a fetša diiri tše mmalwa a ekwa bohloko. O ile a se sa kgona go hema gabotse ka baka la tsela yeo a bego a kokotetšwe ka yona koteng, ka gona pelo ya gagwe le maswafo a gagwe di ile tša swanelwa ke go šoma ka thata. Jesu o be a tseba gore o be a botegile go fihlela mafelelong, ka baka leo pele a ka hwa o ile a rapela Jehofa la mafelelo. O ile a inamiša hlogo, a napa a hwa. (Mar. 15:37; Luka 23:46; Joh. 10:17, 18; 19:30) Jesu o ile a hwa ganyenyane-ganyenyane ka tsela e sehlogo le yeo e theošago motho seriti!

5. Ke’ng seo se ilego sa dira gore Jesu a gateletšege kudu go feta tsela yeo a bego a tlo bolawa ka yona?

⁵ Selo seo se ilego sa dira gore Jesu a gateletšege kudu, e be e se tsela yeo a bego a tlo bolawa ka yona. Eupša e be e le molato wo ba bego ba re o o dirile. O ile a latofatšwa ka maaka a gore ke morogaki, e lego motho yo a sa hlomphego Modimo goba leina la Gagwe. (Mat. 26:64-66) Ge Jesu a be a nagana ka taba ya gore batho ba mo latofatša ka gore ga a hlomphe Modimo, seo se ile sa mo gateletša kudu moo a ilego a rapela Tatagwe gore a se mo dumelele gore a hwe ka tsela yeo. (Mat. 26:38, 39, 42) Ke ka baka la’ng Jehofa a ile a dumelela Morwa wa gagwe yo a rategago gore a tlaišege le go hwa? A re boledišaneng ka mabaka a mararo.

6. Ke ka baka la’ng Jesu a ile a swanelwa ke go fegwa koteng ya tlhokofatšo?

⁶ Sa pele, Jesu o ile a swanelwa ke go kokotelwa koteng ya tlhokofatšo e le gore a lokolle Bajuda ka ge ba be ba rogakilwe. (Bagal. 3:10, 13) Bajuda ba be ba rogakilwe ka ge ba be ba tshepišitše gore ba tla kwa Molao wa Modimo eupša ba se ba ka ba dira bjalo. Ba be ba rogakilwe e bile ba swanelwa ke go hwa ka ge e le bana ba Adama bao ba nago le sebe. (Baroma 5:12) Molao woo Modimo a bego a o neile Baisiraele o be o laetše gore ge motho a ka dira sebe seo se bego se swanelwa ke kahlolo ya lehu, gona motho yoo a bolawe. Ka morago ga moo setopo sa  gagwe se be se ka fegwa koteng. * (Doit. 21:22, 23; 27:26) Ka gona taba ya gore Jesu o ile a kokotelwa koteng e ile ya dira gore sona setšhaba seo se bego se sa dumele go yena se holwe ke sehlabelo sa gagwe sa topollo.

7. Lebaka la bobedi leo Modimo a ilego a dumelela gore Morwa wa gagwe a tlaišege ke lefe?

⁷ Nagana ka lebaka la bobedi leo le dirilego gore Modimo a dumelele gore Morwa wa gagwe a tlaišege. O be a tlwaetša Jesu gore a swanelege go tlo ba Moperisita wa rena yo Phagamego. Jesu o ile a kgona go bona gore go thata gakaakang gore motho a kwe Modimo ge a lebeletšane le teko e kgolo. O be a gateletšegile kudu moo a ilego a kgopela thušo ka go rapela Modimo “ka megoo e matla le megokgo.” Re kgodišegile gore ka ge Jesu le yena a kile a gateletšega kudu, o a re kwešiša e bile ‘o kgona go re thuša ge re lekwa.’ Re leboga Jehofa kudu gore o re kgethetše Moperisita yo a Phagamego yo a gaugelago le yoo a kgonago ‘go re kwela bohloko mafokoding a rena.’—Baheb. 2:17, 18; 4:14-16; 5:7-10.

8. Lebaka la boraro la gore Modimo a dumelele gore Jesu a tlaišege ke lefe?

⁸ Lebaka la boraro la gore Jehofa a dumelele gore Jesu a tlaišwe o šoro e be e le gore go arabege potšišo ye ya bohlokwa: Na go na le batho bao ba ka dulago ba botegela Modimo le ge ba tlaišwa o šoro? Sathane o re ga ba gona! O bolela maaka a gore batho ba hlankela Modimo feela ka gobane ba nyaka gore a ba nee selo se itšego. Le gona o dumela gore ba tla swana le rakgolokhukhu wa bona Adama gomme ba se ke ba botegela Modimo. (Jobo 1:9-11; 2:4, 5) Ka ge Jehofa a be a kgodišegile gore Morwa wa gagwe o tla dula a botega, o ile a dumelela gore a lekwe go fihla a ehwa. Jesu o ile a dula a botegela Modimo gomme a hlatsela gore Sathane o bolela maaka.

9. Moapostola Johane o re beetše mohlala ofe?

⁹ Bakriste ba bantši ba ile ba kgotlelela diteko tše dintši bophelo ka moka. Eupša ba ile ba tšwela pele ba bolela ditaba tše dibotse ka ge tumelo ya bona e ile ya matlafatšwa ke thuto ya topollo. Nagana ka mohlala wa moapostola Johane. O ile a dula a botega ka go ruta batho therešo ka Kriste le ka topollo ka mengwaga ya ka godimo ga e 60. Ge a be a na le mengwaga e ka bago e 100, Mmušo wa Roma o ile wa mo golega sehlakahlakeng sa Patimo ka ge o be o re ke motho yo kotsi kudu. Molato wa gagwe e be e le ofe? O be a “bolela ka Modimo le go nea bohlatse ka Jesu.” (Kut. 1:9) Ruri o re beetše mohlala o mobotse kudu wa go ba le tumelo le go kgotlelela!

10. Dipuku tšeo Johane a di ngwadilego di bontšha bjang gore o be a leboga topollo?

¹⁰ Ka Beibeleng, Johane o ngwadile kamoo a ratago Jesu kudu le kamoo a lebogago topollo. Ka dipukung tšeo, Johane o ngwadile ka makga a fetago a 100 ka taba ya topollo le ka mehola yeo re e hwetšago ka baka la topollo yeo. Ka mohlala, Johane o ngwadile gore: “Ge e ba motho a ka dira sebe, re na le mothuši go Tate, e lego Jesu Kriste, moloki.” (1 Joh. 2:1, 2) Le gona dipuku tšeo Johane a di ngwadilego di gatelela bohlokwa bja “go nea bohlatse ka Jesu.” (Kut. 19:10) Ga go pelaelo gore Johane o be a leboga topollo kudu. Re ka bontšha bjang gore le rena re leboga topollo?

11. Ke’ng seo se ka re thušago gore re se ke ra ineela ge re lekega go dira sebe?

¹¹ O se ke wa ineela ge o lekega go dira sebe. Ge e ba re tloga re leboga sehlabelo sa Jesu sa topollo, re ka se ke ra no ipotša gore: ‘Ga go hlokagale gore ke leke ka thata gore ke se ke ka dira sebe. Nka no dira sebe ke moka ka morago  ka tla ka kgopela Modimo gore a ntebalele.’ Go e na le moo, ge re lekega go dira sebe re tla re: ‘Nka dira bjang selo sa mohuta wo ka morago ga gore Jehofa le Jesu ba ntirele seo ba ntiretšego sona?’ Le gona o ka kgopela Jehofa gore a go nee matla. O ka mo rapela ka gore: ‘Hle nthuše gore ke se ke ka tsena molekong.’—Mat. 6:13.

12. Re ka diriša bjang keletšo yeo e lego go Johane wa Pele 3:16-18?

¹² Rata bana beno le dikgaetšedi ka phuthegong. Ge re rata bana babo rena le dikgaetšedi ka phuthegong, re bontšha gore re leboga topollo. Ke ka baka la’ng re re’alo? Ke ka gobane Jesu ga se a hwela rena feela, eupša o hwetše le bana babo rena le dikgaetšedi. Ge e ba le bona a be a ikemišeditše go ba hwela, go ra gore o ba rata kudu. (Bala 1 Johane 3:16-18.) Re bontšha gore re rata bana babo rena le dikgaetšedi ka tsela yeo re ba swarago ka yona. (Baef. 4:29, 31–5:2) Ka mohlala, re a ba thuša ge ba babja goba ge ba wetšwe ke dikotsi tša tlhago. Eupša re swanetše go dira’ng ge e ba Mokristegotee le rena a dira goba a bolela selo seo se re kwešago bohloko?

13. Ke ka baka la’ng re swanetše go lebalela ba bangwe?

¹³ Na ka dinako tše dingwe o thatafalelwa ke go lebalela ngwaneno goba kgaetšedi? (Lef. 19:18) Ge e ba go le bjalo, latela keletšo ye yeo e rego: “Tšwelang pele le kgotlelelana gomme le lebalelana ka bolokologi le ge e ba motho a na le lebaka la go ba le pelaelo ka yo mongwe. Go etša ge Jehofa a le lebaletše ka bolokologi, le lena le dire bjalo.” (Bakol. 3:13) Nako e nngwe le e nngwe ge re lebalela ngwanabo rena goba kgaetšedi, re bontšha Jehofa gore re tloga re leboga topollo. Re ka dira’ng gore re tšwele pele re bontšha gore re tloga re leboga mpho ye yeo Modimo a re neilego yona?

14. O ka oketša bjang tsela yeo o lebogago topollo?

¹⁴ Leboga Jehofa ka ge a go neile sehlabelo sa Jesu sa topollo. Kgaetšedi Joanna yo a nago le mengwaga e 83 yoo a dulago kua India o re: “Ke nagana gore go bohlokwa gore letšatši le lengwe le le lengwe ge ke rapela ke leboge Jehofa ka ge a ile a re nea sehlabelo sa Jesu sa topollo.” Ge o rapela Jehofa o nnoši, nagana ka diphošo tšeo o di dirilego mosegare, ke moka o mo kgopele gore a go lebalele tšona. Eupša ge e ba o dirile sebe se segolo, o tlo swanelwa ke go kgopela thušo le go bagolo. Ba tla go theetša le go go nea keletšo e lerato yeo e tšwago ka Lentšung la Modimo. Ba tla rapela le wena, ba kgopela Jehofa gore a go lebalele e le gore o boele o be le segwera se sebotse le yena.—Jak. 5:14-16.

15. Ke ka baka la’ng re swanetše go ipha nako ya go bala le go naganišiša ka sehlabelo sa Jesu sa topollo?

 ¹⁵ Naganišiša ka sehlabelo sa Jesu sa topollo. Kgaetšedi Rajamani yoo a nago le mengwaga e 73 o re: “Ge ke bala ka tsela yeo Jesu a ilego a tlaišega ka yona, mahlo a ka a tlala megokgo.” Le wena o ka kwa bohloko kudu ge o nagana kamoo Morwa wa Modimo a ilego a tlaišega ka gona. Eupša ge o dutše o naganišiša ka sehlabelo seo Jesu a se dirilego, ke moo o tlago go rata yena le Tatagwe kudu. E le gore o kgone go naganišiša ka sehlabelo sa Jesu sa topollo, ke ka baka la eng o sa iphe nako ya go ithuta ka mo go tseneletšego ka taba ye?

16. Go ruta ba bangwe ka sehlabelo sa Jesu sa topollo go tla re hola bjang? (Bona seswantšho sa letlakala la ka ntle.)

¹⁶ Ruta ba bangwe ka sehlabelo sa Jesu sa topollo. Nako e nngwe le e nngwe ge re botša ba bangwe ka sehlabelo sa Jesu sa topollo, seo se dira gore re leboge sehlabelo seo le go feta. Re na le dikgatišo le dibidio tšeo di re thušago go hlalosetša ba bangwe gore ke ka baka la eng Jesu a ile a re hwela. Ka mohlala, re ka diriša thuto 4 ka poroutšheng ya Ditaba tše Dibotse tše di Tšwago go Modimo! Thuto yeo e na le sehlogo seo se rego, “Jesu Kriste ke Mang?” Goba re ka diriša kgaolo 5 ka pukung ya Beibele e re Ruta Eng? Kgaolo yeo e na le sehlogo seo se rego, “Topollo ke Mpho e Kgolo Kudu Yeo re e Neilwego ke Modimo.” Le gona ngwaga o mongwe le o mongwe re oketša tsela yeo re lebogago topollo ka go ba gona Segopotšong sa lehu la Jesu le ka go mema ba bangwe gore le bona ba be gona. Ruri Jehofa o re neile tokelo e kgolo kudu ya go ruta ba bangwe ka Morwa wa gagwe!

17. Ke ka baka la’ng sehlabelo sa Jesu sa topollo e le mpho e kgolokgolo yeo Modimo a re neilego yona?

¹⁷ Ga go pelaelo gore re na le mabaka a kwagalago a gore re dule re leboga sehlabelo sa Jesu sa topollo. Ka baka la sehlabelo seo, re ka kgona go ba le segwera se sebotse le Jehofa le ge re belegwe re na le sebe. Ka baka la topollo, Modimo o tlo fediša mediro ya Diabolo ka mo go feletšego. (1 Joh. 3:8) Le gona ka baka la topollo, morero wa Jehofa wa mathomong ka lefase o tlo phethagala. Lefase ka moka e tlo ba paradeise. Ka nako yeo motho yo mongwe le yo mongwe o tla be a rata Jehofa e bile a mo hlankela. Eka letšatši le lengwe le le lengwe re ka nyaka ditsela tšeo re ka bontšhago gore re leboga mpho e kgolokgolo yeo Modimo a re neilego yona, e lego sehlabelo sa Jesu sa topollo!