1-2. Ekitambo niki, kandi ahabw’enki kyabaire nikyetengyesa?

OMUSHAIJA ohikiriire Adamu ku yaasiisire, akafeerwa amagara agatahwaho na baijukuru be boona aba bwanyima. Adamu akaba ataine rwekwatso ahabw’eki yaakozire. Akashiisha nkana. Kandi shi abaana be? Tibarakwataniise n’Adamu omu kushiisha kwe. (Rom. 5:12, 14) Haine ekyabaire nikibaasa kukorwa kubacungura orubanja rwa ishenkurubo orw’okufa? Eego! Ahonaaho Adamu yaaheza kushiisha, Yehova akaguma naayoreka mporampora oku araacungure abantu nyamwingi kuruga omu kibi n’okufa. (Kut. 3:15) Yehova omu bwire bwe obuhikire, akaba naija kwohereza Omwana we kuruga omu iguru kwija kuhayo “amagara ge [nk’ekitambo] okucungura baingi.”​—Mak. 10:45; Yoh. 6:51.

² Ekitambo niki? Ekitambo omu Byahandiikirwe eby’Orugriika, n’omuhendo ogu Yesu yaahaireyo kushashurira eki Adamu yaafeereirwe. (1 Kor. 15:22) Ahabw’enki ekitambo kyabaire nikyetengyesa? N’ahabw’okugira ngu ekiragiro ky’oburingaaniza nikyetengyesa ngu amagara garihwe agandi. (Kur. 21:23, 24) Adamu akafeerwa amagara ge agahikiriire. Yesu kubaasisa oburingaaniza bwa Ruhanga kubaho, akahayo amagara ge ag’obuntu agahikiriire. (Rom. 5:17) Niyo nshonga ahabw’enki yaabaire “Tataitwe Otahwaho” ahari boona abarikwikiririza omu kitambo kye.​—Isa. 9:6; Rom. 3:23, 24.

3. Kurugiirira ahari Yohaana 14:31 na 15:13, ahabw’enki Yesu yaabaire ayeteekateekire kuhayo amagara ge ag’obuntu agahikiriire?

³ Yesu akaba ayeteekateekire kuhayo amagara ge ahabwa rukundo mpango ei ainiire Ishe ow’omu iguru naitwe. (Shoma Yoh. 14:31; 15:13.) Ahabwa rukundo egyo akamariirira kuguma ari omwesigwa kuhitsya aha muheru, kuhikiiriza ekigyendererwa kya Ishe. Eki Yesu akakikora arikuguma ari omwesigwa  kuhitsya aha kufa. N’ekyarugiremu, ekigyendererwa eki Yehova yaabaire ainiire abantu n’ensi omu kubanza nikiija kuhikiirira. Omu kicweka eki, nituza kureeba ahabw’enki Ruhanga yaikiriize Yesu kubonabona n’okwitwa. Nituza n’okushwijuma omu bugufu ebirikukwata aha muhandiiki wa Baibuli owaabaire naasiima munonga ekitambo. Kandi aha muheru, nituza kureeba oku turikubaasa kwongyera kusiima ekitambo eki Yehova na Yesu baahaireyo.

4. Shoboorora oku Yesu yaafiire.

⁴ Teekateeka oku ebiro bya Yesu ebyahererukireyo omu nsi byabaire biri. N’obu araabe yaabaire naabaasa kweta baamaraika kumurinda, akaikiriza abaserukare Abarooma kumukwata, kandi baamuteera bataine saasi na kakye. (Mat. 26:52-54; Yoh. 18:3; 19:1) Bakamuteera emboko zaamutaaha omu mubiri gwazaho n’emihiririzi. Bwanyima, bakamwekoreza empimbi y’omuti aha mugongo gurikujwererana ahabw’ebironda. Akatandika kukurura omuti arikugutwara ahu baabaire nibaza kumuhanika, kwonka ahonaaho abaserukare Abarooma bakagyemesereza ondiijo kugwekorera kuguhitsyayo. (Mat. 27:32) Ku baamuhikizeyo, bakamuteererera emisimaari omu ngaro n’omu bigyere aha muti. Ahabw’omubiri gwe kuremeera, ebihengyere by’emisimaari bikaguma nibyeyongyera kuhanguha. Banywani be bakagira enaku na nyina yaacura, kwonka abategyeki b’Abayudaaya bo bakamushungisa. (Luk. 23:32-38; Yoh. 19:25) Obusaasi bwe bukaguma nibweyongyera buri kuhinguraho eshaaha. Ahabw’okuhanikwa aha muti, omutima gwe n’ebihaha bye bikateganisibwa kyamureetera kugumirwa kwitsya gye. Arikuza kufa, akashaba okushaba kwe kukuru okw’aha muheru, reero yainika omutwe yaahayo amagara ge. (Mak. 15:37; Luk. 23:46; Yoh. 10:17, 18; 19:30) Buzima akafa mporampora omu busaasi bwingi, kandi omu muringo gurikuhemurana!

5. Niki ekyakizireyo kuteganisa Yesu kukira omuringo ogu yaitsirwemu?

⁵ Ahari Yesu, omuringo ogu baamwitsiremu tigwo gwabaire nigukirayo obubi. Ekyakizireyo kumureetera amaganya n’orubanja oru baamuteireho orwamureeteire kwitwa. Bakamubeiherera ngu tarikuha eiziina rya Ruhanga ekitiinisa, reero baamweta omurogotsi. (Mat. 26:64-66) Okuteebwaho orubanja oru kikamuteganisa munonga yaahika n’aha kuteekateeka ngu Ishe naabaasa kumukiza okuhemuka oku. (Mat. 26:38, 39, 42) Ahabw’enki Yehova yaikiriize Omwana we kubonabona kandi akafa? Ka tureebe enshonga ishatu.

6. Ahabw’enki Yesu yaahanikirwe aha muti?

⁶ Enshonga y’okubanza, Yesu akaba aine kuhanikwa aha muti kubaasa kucungura Abayudaaya omu mukyeeno gw’omutaano. (Gal. 3:10, 13) Bakaba baikiriize kworobera Ebiragiro bya Ruhanga kwonka baaremwa kubyorobera. N’ekyarugiremu, omukyeeno ogu gukongyerera aha kibi kyabo ky’obuzaarwa ahabw’okuba baijukuru b’Adamu abasiisi. (Rom. 5:12) Ebiragiro ebi Ruhanga yaahaire Abaisraeli bikaba nibigira ngu omuntu yaakora omushango gw’okufa aine kwitwa. Bwanyima, omutumbi gwe gukaba nigubaasa kuhanikwa aha muti. * (Bir. 21:22, 23; 27:26) N’ahabw’ekyo Yesu okuhanikwa aha muti, kikabaasisa eihanga ryenyini eryamwangire kugasirwa omu kitambo kye.

7. Enshonga ya kabiri ahabw’enki Ruhanga yaikiriize Yesu kubonabona n’eha?

⁷ Yetegyereze enshonga ya kabiri ahabw’enki Ruhanga yaikiriize Omwana we kubonabona.  Akaba naatendeka Yesu kwija kuba Omunyamurwa waitu Omukuru omu biro by’omumaisho. Yesu akakireeba gye butunu oku kigumire kworobera Ruhanga omu bwire bw’okugyezibwa munonga. Akahikwaho oburemeezi bw’amaani yaahika n’aha kushaba obuhwezi ‘arikurira munonga, n’okutaka.’ Buzima, ahabw’okugira ngu Yesu akahikwaho embeera eyaamureeteire amaganya maingi n’obujune, naayetegyereza gye oburemeezi bwaitu kandi ‘naabaasa kutuhwera’ twaba nitugyezibwa. Ka nitusiimira kimwe Yehova ahabw’okututooranira Omunyamurwa Omukuru ow’embabazi orikubaasa “kusaasira hamwe naitwe omu bweremwa bwaitu”!​—Heb. 2:17, 18; 4:14-16; 5:7-10.

8. Enshonga ya kashatu ahabw’enki Ruhanga yaikiriize Yesu kugyezibwa munonga n’eha?

⁸ Eya kashatu, Yehova akaikiriza Yesu kubonabona munonga kubaasa kugarukamu ekibuuzo kikuru eki: Hariho abantu abarikubaasa kuguma beemariire ahari Ruhanga baagyezibwa munonga? Sitaane we naagira ngu ngaaha! Naagira ngu abantu nibaheereza Ruhanga ahabw’okweyendeza. Kandi naateekateeka ngu nka ishenkurubo Adamu, tibeemariire aha kuheereza Yehova. (Yob. 1:9-11; 2:4, 5) Yehova ahabw’okugira obwesigye omu Mwana we, akamwikiriza kugyezibwa kurenga aha rurengo oru omuntu arikubaasa kugumisiriza. Yesu akarinda obwesigwa bwe kandi yaayoreka gye ngu Sitaane n’omubeihi.

9. Entumwa Yohaana akatuteeraho ky’okureeberaho ki?

⁹ Okwikiriza kw’Abakristaayo baingi kubaasize kuhama ahabw’enyegyesa y’ekitambo. Babaasize kugumizamu nibabuurira n’obu baraabe nibahiiganisibwa, kandi bagumisiriize okugyezibwa kw’emiringo yoona kuhitsya omu myaka ya bukuru. Teekateeka aha ky’okureeberaho ky’entumwa Yohaana. Omu bwesigwa akagumizamu naabuurira ahari Kristo n’ekitambo, obundi kumara emyaka erengire 60. Obu yaabaire arengize omu myaka nka 90, abategyeki b’obutware bwa Rooma bakaba nibamureeba nk’omuntu orikubaasa kuba ow’akabi aha butegyeki bwabo baamuta omu kihome aha kirwa kya Patumo. Akaba aine mushango ki? Bakaba nibamutura okugamba ahari “Ruhanga n’okuhamya ebya Yesu.” (Kush. 1:9) Ka yaataireho eky’okureeberaho ky’omutaano eky’okwikiriza n’okugumisiriza!

10. Ebi Yohaana yaahandiikire nibyoreka bita ngu akaba naasiima ekitambo?

¹⁰ Yohaana omu mabaruha agu yaahandiikire, naayoreka ngu naakundira kimwe Yesu kandi ngu naasiima n’ekitambo. Akahandiika emirundi erengire ahari 100 aha kitambo nari oku kirikutugasira. Nk’eky’okureeberaho, Yohaana akahandiika ati: “Omuntu weena ku araashiishe, twine Omutonganizi ahari Isheboona, niwe Yesu Kristo ohikiriire.” (1 Yoh. 2:1, 2) Ebi Yohaana yaahandiikire nibihamiiriza n’obukuru ‘bw’okuhamya amazima agarikukwata ahari Yesu.’ (Kush. 19:10) Buzima, Yohaana akaba naasiima munonga ekitambo. Nitubaasa kworeka tuta ngu naitwe nitukisiima?

11. Niki ekirikubaasa kutuhwera kwangira okwohibwa?

¹¹ Yangira okwohibwa kushiisha. Buzima twaba nitusiima ekitambo, nitwija kwetantara kuteekateeka ngu, ‘titwine kuteeraho munonga kwangira okwohibwa. Ngu nitubaasa kushiisha, reero tushabe okusaasirwa.’ Kureka, twayohibwa kukora ekintu kigwire, nitwija kwanga! Turikugira tuti: ‘Ahabwa buri kimwe eki Yehova na Yesu baankoreire nimbaasa nta kukora ekintu nk’ekyo?’ Reero, nitubaasa  kushaba Yehova kutuha amaani, turikumweshengyereza tuti: ‘Otaikiriza nkagwa omu kwohibwa.’​—Mat. 6:13.

12. Nitubaasa kugyendera tuta aha buhabuzi oburi omu 1 Yohaana 3:16-18?

¹² Kunda ab’eishe-emwe. Twaba nitubakunda, nitworeka ngu nitusiima ekitambo. Ahabw’enki? N’ahabw’okugira ngu tarahaireyo amagara ge ahabwaitu twenka, beitu n’ahabw’ab’eishe-emwe bagyenzi baitu. Ahabw’okwehayo kubafeera, nikyoreka gye ngu n’ab’omuhendo munonga omu maisho ge. (Shoma 1 Yohaana 3:16-18.) Nitworeka ngu nitukunda ab’eishe-emwe kurugiirira aha ku turikubatwariza. (Efe. 4:29, 31–5:2) Nk’eky’okureeberaho, nitubahwera baaba barwaire, nari baaba baine okugyezibwa kw’amaani, otwariiremu ebihikiirizi ebirikwereeta. Kwonka shi twine kukora ki ow’eishe-emwe mugyenzi waitu yaakora ekintu ekirikutugwisa kubi nari yaakigamba?

13. Ahabw’enki twine kusaasira abandi?

¹³ Nookira kugirira ab’eishe-emwe bagyenzi baawe enziika? (Lev. 19:18) Kyaba nikwo kiri, kuratira obuhabuzi oburikugira ngu mugumizemu “nimugumisiririzana kandi ku haraabe hariho oine eki arikufa na mugyenzi we, musaasirane, nk’oku [Yehova] yaabasaasiire, mube nikwo mwatwaza.” (Kol. 3:13) Buri murundi ogu turikusaasira ow’eishe-emwe, nitworeka Tataitwe ow’omu iguru ngu buzima nitusiima ekitambo. Nitubaasa kwongyera tuta kusiima ekiconco eki kuruga ahari Ruhanga?

14. Ni muringo ki gumwe ogu turikubaasa kwongyera kusiima ekitambo?

¹⁴ Yebaza Yehova ahabw’ekitambo. “Ninteekateeka ngu ni kikuru kugamba aha kitambo buri izooba omu kushaba kwangye kandi nkebaza Yehova ahabw’ekitambo,” nikwo munyaanyazi-itwe orikutuura omuri India ow’emyaka 83 orikwetwa Joanna arikugira. Omu kushaba kwawe ori wenka, teekateeka aha nshobe ezi waakora omu izooba, reero oshabe Yehova kukusaasira. Kwonka waaba okozire ekibi ky’amaani, nooba oine n’okutunga obuhwezi bw’abareeberezi. Nibaija kukuhurikiza kandi bakuhe obuhabuzi bwa rukundo kuruga omu Kigambo kya Ruhanga. Nibaija kushaba naiwe, barikweshengyereza Yehova kugumizamu naihirira aha muhendo gw’ekitambo kya Yesu kukuhwera ‘kukira’ omu by’omwoyo.​—Yak. 5:14-16.

15. Ahabw’enki twine kugira obwire bw’okushoma aha kitambo n’okukiteekateekaho?

 ¹⁵ Teekateeka aha kitambo. Munyaanyazi-itwe ow’emyaka 73 orikwetwa Rajamani naagira ati: “Ku ndikushoma aha kubonabona kwa Yesu, amaisho gangye nigaijura amarira.” Naiwe nikibaasa kuba nikikureetera obusaasi bwingi waateekateeka aha ku Omwana wa Ruhanga yaabonaboine munonga. Kwonka waayongyera kuteekateeka aha kwefeerereza kwa Yesu, nooyongyera kumukunda n’okukunda Ishe. Kubaasa kukuhwera kuteekateeka aha kitambo, ahabw’enki otarikuhindura ekitambo enshonga y’okwegaho?

16. Okwegyesa abandi ebirikukwata aha kitambo nikibaasa kutugasira kita? (Reeba ekishushani ekiri aha kipampagare.)

¹⁶ Yegyesa abandi aha kitambo. Buri murundi ogu turikugambira abandi aha kitambo, nitwongyera kukisiima. Twine eby’okukoresa kuhwera abandi kumanya ahabw’enki Yesu yaabaire aine kutufeera. Nk’eky’okureeberaho, nitubaasa kukoresa eishomo rya 4 omu katabo Amakuru Marungi Kuruga Ahari Ruhanga! Eishomo eryo riine omutwe “Yesu Kristo n’Oha?” Nari nitubaasa kukoresa eshuura ya 5 ey’ekitabo Niki Eki Turikwega omu Baibuli? Eshuura egyo eine omutwe, “Ekitambo n’Ekiconco kya Ruhanga Ekirikukirayo.” Kandi buri mwaka nitwongyera kusiima ekitambo turikuza aha mukoro gw’okwijuka okufa kwa Yesu, kandi turikwejumbira kimwe omu kweta abantu kutwegaitaho. Yehova ka atuhaire omugisha gw’amaani ogw’okwegyesa abandi ebirikukwata aha Mwana we!

17. Ahabw’enki ekitambo nikyo kiconco kya Ruhanga ekirikukirayo eki yaahaire abantu?

¹⁷ Hatariho kubangaanisa, twine enshonga nungi kusiima munonga ekitambo. Ekitambo nikibaasa kutuhwera kuba banywani ba Yehova n’obu turaabe tutahikiriire. Ekitambo nikiija kubaasisa emirimo y’Omuregi kucwekyererezibwa kimwe. (1 Yoh. 3:8) Kandi nabwo ahabw’ekitambo, ekigyendererwa kya Yehova eki yaabaire ainiire ensi omu kubanza nikiija kuhikiirira. Ensi yoona neija kuba paradiso. Buri omwe oraabe ariyo, naija kuba naakunda Yehova kandi arikumuheereza. N’ahabw’ekyo buri izooba, ka tuteereho kusherura oburyo bw’okworeka ngu nitusiima ekitambo, ekiconco kya Ruhanga ekirikukirayo eki yaahaire abantu!