1-2. Kodi cakulombolera n’ciyani, ndipo thangwe ranyi timbafunikira cakulomboleraco?

POMWE Adamu adaphonya, iye adaluza mwayi wakukhala na moyo wakusaya kumala, sikuti mwayi wa iye yekha, koma na wa wana wace wentse. Adamu akhalibe mathangwe yakubveka yakucitira bzinthu bzakuphonyeka bzomwe iye adacitabzo. Iye adaphonya utowa. Tsono tani pakulewa bza wana wace? Wanawo alibe kuphonya cinthu ciri-centse ndipo alibe kuthandizira kuphonya kwa Adamu. (Waroma 5:12, 14) Adamu adathemera kufa thangwe ra bzomwe iye adacita. Tsono kodi Yahova adacita cinthu ciri-centse kuti wana wa Adamu adzakhale na moyo wakusaya kumala? Inde! Pambuyo pa Adamu kuphonya, Yahova adalatiziratu momwe angadadzalombolera wanthu azinji, wa mbadwe za Adamu ku pikado na infa. (Ciyambo 3:15) Pa nthawe yomwe iye adailinganiza, Yahova adadzatumiza Mwana wace kucokera kudzulu ‘kudzapereka moyo wace, ninga cakulombolera wanthu azinji.’—Marko 10:45; Juwau 6:51.

² Kodi cakulombolera n’ciyani? M’Bzinembo bza Cigirego, cakulombolera ni pereso yomwe Jezu adapereka kuti alombole moyo omwe Adamu adaluza. (1 Wakolinto 15:22) Thangwe ranyi tikhafunikira cakulombolera? Thangwe ra mitemo yakulungama ya Yahova, ninga yomwe ikhali mu lamulo lomwe iye akhadalipereka kwa Ajirayeri lakuti moyo kulipira moyo. (Kufuluka 21:23, 24) Adamu adaluza moyo wace wakulungamiratu. Kuti ateweze cilungamo ca Mulungu, Jezu adapereka moyo wace wakulungamiratu. (Waroma 5:17) Mwa njira imweyi, iye angadakhala ‘Baba Wamuyaya’ kuna wentse omwe ambakhulupira cakulombolera.—Zaiya 9:6; Waroma 3:23, 24.

3. Mwakubverana na Juwau 14:31 na 15:13, thangwe ranyi Jezu adakhala wakukonzeka kupereka moyo wace wakulungamiratu ninga ntsembe?

³ Jezu adakhala wakukonzeka kupereka moyo wace thangwe ra lufoyi likulu kuna Baba wace na kuna ifepano kubodzi. (Werengani  Juwau 14:31; * 15:13. *) Na lufoyi limweri, iye adatsimikiza kupitiriza kukhala wakukhulupirika mpaka moyo wace wentse, kuti bzomwe Baba wace akhafuna bzikwanisike. Bzomwe Jezu adacitabzi, bzidacitisa kuti bzomwe Yahova akhafuna kuna wanthu pa dziko la pantsi bzikwanisike. Mu nkhani ino, tin’cezerana kuti thangwe ranyi Yahova adalekerera kuti Jezu abonere kwene-kwene pomwe akhanati kufa. Ndipo tin’pfunzambo ciratizo ca munembi wa Bibliya, omwe akhambalatiza kutenda kwene-kwene cakulombolera. Ndipo tikamala, tiniwona momwe tingalatizire kuti timbatenda cakulombolera. Pakumalizira, tin’pfunza momwe tingakulisire kutenda kwathu ntsembe yomwe Yahova na Jezu adaipereka kuna ifepano.

4. Fotokozani momwe Jezu adafera.

⁴ Kumbukirani ntsiku yakumalizira ya moyo wa Jezu pa dziko la pantsi. Iye angadakumbira wanjo wazinji kuti amuthandize na kumukhotcerera. Tsono iye alibe kucita bzimwebzi. M’mbuto mwace, iye adabvuma kuti acikunda wa Aroma amumange na kumumenya. (Mateu 26:52-54; Juwau 18:3; 19:1) Iwo adamupfumbula na ntcamu omwe adaukonza, omwe ukhacitisa kuti thupi la Jezu litemeke-temeke kwene-kwene. Napo kuti kumbuyo kwa Jezu kukhadatemeka-temeka, acikundawo adamungingimiza kunyamula muti wakulemera kwene-kwene. Jezu adayamba kukwekweta mutiyo kuti ayende nawo ku mbuto yomwe angadamuphera. Tsono mu njira, acikunda wa Aromawo adauza mwamuna munango kuti anyamule mutiyo. (Mateu 27:32) Pomwe Jezu adafika pa mbuto yomwe angadafera, acikundawo adamukhomerera manja na minyendo pa mutipo. Kulemera kwa thupi la Jezu kudacitisa kuti bzironda bzomwe akhadakhomereredwa na maperego bzikule. Axamwali wace adadandaula, mai wace adalira, tsono atongi wa Adjuda akhamuseka na kumunyoza. (Luka 23:32-38; Juwau 19:25) Jezu adamala nthawe izinji akubva kuwawa kwene-kwene. Thangwe ra momwe thupi lace likhaliri, mtima na masapi yace bzikhaphata lini bwino basa, ndipo akhatazira kupuma bwino-bwino. Pomwe iye akhadasala pang’ono kumalizika, adacita mpembo wace wakumalizira. Ndipo patsogolo pace, iye adatsulimisa msolo wace acimalizika. (Marko 15:37; Luka 23:46; Juwau 10:17, 18; 19:30) Tikupenukira lini kuti infa ya Jezu idakhala ya pang’ono pang’ono, yakuwawa, na yakupasa manyazi!

5. Kodi n’ciyani comwe Jezu adawawidwa naco kwene-kwene kuposa kukhomereredwa pa muti wakuzunzidwira?

⁵ Bzomwe bzidamuwawa kwene-kwene Jezu ni bzinthu bzomwe adanamiziridwa kuti aphedwe, sikuti momwe iye adafera. Iye adanamiziridwa kuti akhanyoza Mulungu, ayai dzina la Mulungu. (Mateu 26:64-66) Bzomwe iwo adalewabzo bzidamuwawa kwene-kwene, mwakuti iye adakumbira Baba wace kuti aleke kulekerera wanthu kuti amupasise manyazi mwa njira imweyi. (Mateu 26:38, 39, 42) Thangwe ranyi Yahova adalekerera kuti Mwana wace, omwe ambamufuna kwene-kwene, abonere na kufa? Mbatiwoneni mathangwe matatu.

6. Thangwe ranyi bzikhali bzakufunika kuti Jezu akhomereredwe pa muti wakuzunzidwira?

⁶ Thangwe lakuyamba, Jezu akhafunikira kufa kuti atsudzule Adjuda thangwe ra themberero lawo. (Wagalata 3:10, 13) Adjuda adakhala wakutembereredwa thangwe rakuti iwo akhadalewa kuti angadabvera lamulo la Mulungu. Tsono iwo alibe kudzateweza lamulolo. Na thangwe limweri, kuthimizira pa nkhani yakuthemera kufa thangwe ra kukhala mbadwe za Adamu, Adjudawo adabzikolomolera pomwe pikado inango. (Waroma 5:12) Lamulo la Mulungu kwa Ajirayeri, likhalewa kuti munthu omwe an’cita pikado yakuthemera kufa, akhafunika kuphedwa. Patsogolo pace, thupi la munthuyo likhafunika kumanikidwa pa muti. * (Bzakutonga 21:22, 23; 27:26) Tenepo,  kumanikidwa kwa Jezu pa muti, kudacitisa kuti Adjudawo agumane phindu na ntsembe yace.

7. Kodi ndiponi thangwe laciwiri lomwe lidacitisa kuti Mulungu abvume kuti Mwana wace abonere?

⁷ Mbatiwoneni thangwe laciwiri lomwe lidacitisa Mulungu kulekerera kuti Mwana wace abonere. Yahova akhapfunzisa Jezu momwe angadadzakhalira Mkulu wa Antsembe. Jezu adakwanisa kuwona momwe bzimbakhalira bzakunesa kubvera Mulungu pomwe munthu akugumana na mayezo makulu. Iye adagumana na mabvuto yakuti bwerani mudzawone, mpaka adapemba kwa Yahova kuti amuthandize ‘mwakucita kulira na kugwesa misozi.’ Pakuti Jezu adabonera kwene-kwene, tikupenukira lini kuti iye ambabvesesa bzomwe ifepano timbafunikira, ndipo iye angatithandize tikakhala ‘tikugumana na mayezo.’ Timbatenda kwene-kwene Yahova thangwe ra kutipasa Mkulu wa Antsembe wa ntsisi omwe ngwakukonzeka ‘kutibvera ntsisi pakutepa kwathu.’—Wahebereu 2:17, 18; 4:14-16; 5:7-10.

8. Kodi ndiponi thangwe lacitatu lomwe lidacitisa kuti Mulungu alekerere kuti Jezu abonere kwene-kwene?

⁸ Thangwe lacitatu, Yahova adabvuma kuti Mwana wace Jezu abonere kwene-kwene thangwe ra kufuna kutawira mbvunzo wakufunika kwene-kwene wakuti: Kodi wanthu angapitirize kukhala wakukhulupirika kwa Mulungu napo pomwe akugumana na mabvuto makulu? Sathani adalewa kuti bzingakwanisike lini! Iye adalewa kuti wanthu ambatumikira Mulungu thangwe ra psete. Sathaniyo adalewambo kuti wanthuwo ali ninga baba wawo Adamu, ambafuna lini Yahova. (Djobi 1:9-11; 2:4, 5) Thangwe rakuti Yahova ambakhulupira Mwana wace Jezu, iye adalekerera kuti Jezuyo ayezedwe mwakupitirira malire. Jezu adapitiriza kukhala wakukhulupirika ndipo adalatiza kuti Sathani ni nyakunama.

9. Kodi Juwau adatisiyira ciratizo ciponi?

⁹ Akristau azinji adakhala na cikhulupiro camphanvu thangwe ra kupfunza nkhani ya cakulombolera. Iwo adapitiriza kupalizira napo kuti adazunzidwa, acigumana na mabvuto yakusiyana-siyana, napo pa nthawe yomwe akhadakalamba. Onani ciratizo ca mpostolo Juwau. Iye mwakukhulupirika adapalizira cadidi cakulewa bza Kristu na cakulombolera, kupitirira magole 60. Pomwe iye akhana magole pafupi-fupi 100, atongi wa boma la Roma, adamumanga acimuikha m’kawoko pa ntsuwa ya Patimo, thangwe ra kukumbuka kuti iye akhali munthu wakugopswa. Kodi iye akhadaphonya ciyani? Thangwe ra kuti iye akhalewa bza Mulungu na ‘kucitira umboni bza Jezu.’ (Cibvumbulutso 1:9) Juwau, ni ciratizo cabwino ca munthu wakukhulupirika na kupirira!

10. Kodi mabukhu yomwe Juwau akhanemba yambalatiza tani kuti iye akhatenda cakulombolera?

¹⁰ Mabukhu ya m’Bibliya yomwe Juwau adanemba yambalatiza kuti iye akhafuna kwene-kwene Jezu ndipo akhatenda cakulombolera. Iye adalewa bza cakulombolera, ayai bzinthu bzabwino bzomwe cakulomboleraco cimbacitisa kuti bzikwanisike maulendo yakupitirira 100. Mwa ciratizo, Juwau adanemba kuti: ‘Munthu akacita pikado, tina mthandizi wakulungama, Jezu Kristu omwe ali pabodzi na Baba.’ (1 Juwau 2:1, 2) Mabukhu yomwe Juwau adanemba yambatsindikambo nfundo yakufunika kwene-kwene yakucitira ‘umboni bwa Jezu.’ (Cibvumbulutso 19:10) Tikupenukira lini kuti Juwau akhatenda kwene-kwene cakulombolera. Kodi ifepano tingalatizembo tani kuti timbatenda cakulombolera?

11. Kodi n’ciyani cingatithandize kupirira tikayezedwa?

¹¹ Mbacitani nyongo kuti muleke kucita pikado. Penu ifepano timbatendadi cakulombolera, tin’dzakumbuka lini kuti: ‘Nin’funika lini kucita nyongo kuti ndileke kucita pikado pomwe ndikuyezedwa. Nin’cita pikado, ndipo ndikamala nin’mkumbira Mulungu kuti andilekerere.’ Tsono mwakusiyana na bzimwebzi, tikayezedwa kuti ticite pikado, tin’funika kumbalamba kuti: ‘Nee! Pambuyo pa bzentse bzomwe Yahova na Jezu  adandicitira, ningacite lini bzinthu bzimwebzi.’ Pomwe tikana makumbukidwe yamweya, tingamukumbire Yahova kuti atipase mphanvu, napo mwakucita kumudandaulira kuti: ‘Lekani kundilekerera kugwera m’mayezo.’—Mateu 6:13.

12. Kodi tingaphatise tani basa malango yakugumanika pa 1 Juwau 3:16-18?

¹² Mbafunani abale na mpfumakazi zanu. Tikambalatiza kuti timbatenda abale na mpfumakazi zathu, timbakhala tikulatizambo kuti timbatenda cakulombolera. Thangwe ranyi? Thangwe ra kuti Jezu alibe kufera ifepano tekha, koma adaferambo abale na mpfumakazi zathu. Penu iye akhali wakukonzeka kuwafera, bzimwebzi bzikulatiza kuti ambawafuna kwene-kwene. (Werengani 1 Juwau 3:16-18. *) Ifepano timbalatiza kuti timbafuna abale na mpfumakazi zathu kucokera pa bzinthu bzabwino bzomwe timbawacitira. (Wayefezo 4:29, 31–5:2) Mwa ciratizo, ifepano timbawathandiza iwo akaduwala, ayai akagumana na mabvuto yakusiyana-siyana, kuphatanidzambo malengwa ya pantsi. Tsono n’ciyani comwe tin’funika kucita m’bale akaticitira cinthu ayai kutilewa mafala yomwe yalibe kutidekera?

13. Thangwe ranyi tin’funika kumbalekerera anzathu nthawe zentse?

¹³ Kodi nthawe zinango imwepo bzimbakunesani kulekerera m’bale ayai mpfumakazi akakuphonyerani? (Mwambo 19:18) Penu n’tenepo tewezani malangoya: ‘Pitirizani kupirirana na kulekererana na mtima wentse napo penu alipo omwe ana mathangwe yakudandaulira mwanzace. Ninga momwe Yahova adakulekererani na mtima wentse, imwepo mucitembo tenepoyo.’ (Wakoloso 3:13) Nthawe zentse tikambalekerera m’bale ayai mpfumakazi yathu, timbakhala tikulatiza Baba wathu wakudzulu kuti timbatenda cakulombolera. Kodi tingacite ciyani kuti tikulise mtima wathu wa kumbatenda mphaso ya Mulungu?

14. Kodi ni njira iponi yomwe tingakulisire kutenda kwathu cakulombolera?

¹⁴ Mbatendani Yahova thangwe ra kutipasa cakulombolera. Mpfumakazi Joanna, ya magole 83, yomwe imbakhala ku Índia, idalewa kuti: “Nimbawona kuti mpsakufunika kwene-kwene kumbaguma cakulombolera ntsiku zentse pomwe ndikucita mpembo kwa Yahova, na kumutendambo thangwe ra kutipasa cakulomboleraco.” Pomwe mukucita mpembo wa pamwekha, mbakumbukirani bzinthu bzomwe mwaphonya ntsiku imweyo, ndipo mbakumbirani Yahova kuti akulekerereni. Tsono mukacita pikado ikulu, mun’funika  kukumbira akulu kuti akuthandizeni. Akuluwo an’dzakutetekerani, ndipo mwa lufoyi an’dzakupasani malango yakucokera m’Fala la Mulungu. Iwo an’dzapemba namwe pabodzi, acikumbira kuti Yahova akulekerereni mwakuphatisa basa ntsembe ya Jezu kuti ‘mucirisidwe’ mwauzimu.—Tiyago 5:14-16.

15. Thangwe ranyi tin’funika kumbapambula nthawe kuti timbawerenge nkhani yakulewa bza cakulombolera na kumbaikumbukira?

¹⁵ Mbakumbukirani cakulombolera. Mpfumakazi inango yakucemeredwa Rajamani, yomwe ina magole 73 yakubadwa, idalewa kuti: “Ndikambawerenga bza kubonera kwa Jezu, maso yangu yambadzala na misozi.” Imwepo bzingakuwawenimbo mukakumbukira kuti Mwana wa Mulungu adabonera kwene-kwene. Tsono mukakumbukira ntsembe yomwe Jezu adapereka, lufoyi lanu kwa iye na kwa Baba wace lin’dzakula kwene-kwene. Comwe cingakuthandizeni kukumbukira bza cakulombolera, ndico kupfunza bza nkhani imweyi.

16. Kodi timbagumana phindu liponi tikambapfunzisa wanthu winango pakulewa bza cakulombolera? (Onani cithunzi-thunzi pa tsamba lakuyamba.)

¹⁶ Pfunzisani winango bza cakulombolera. Kuuza winango bza cakulombolera, kumbacitisa kuti kutenda kwathu cakulomboleraco kuthimizirike. Tina mabukhu mazinji yomwe yangatithandize kupfunzisa wanthu kuti adziwe thangwe race Jezu adatifera. Mwa ciratizo, tingaphatise basa pfunziro 4 la broxura lakuti Bzipsa Bzabwino Bzakucokera kwa Mulungu! Pfunziro limweri lina msolo wakuti “Kodi Jezu Kristu Mbani?” Ayai tingaphatise basa msolo 5 wa bukhu lakuti Bzomwe Bibliya Limbapfunzisa. Msolo umweyu umbalewa kuti “Cakulombolera—Mphaso Ikulu Yakucokera kwa Mulungu.” Ndipo gole liri-lentse timbakulisa kutenda kwathu cakulombolera mwa kugumanika pa msinda wakukumbukira infa ya Jezu, na mwakuphata basa na nyongo pa kucemerera wanthu azinji kuti adzagumanikembo pa msindayo. Yahova adatipasa mwayi ukulu kwene-kwene wakuti timbapfunzise wanthu winango pakulewa bza Mwana wace!

17. Thangwe ranyi cakulombolera ni mphaso ikulu kwene-kwene yomwe Mulungu adapasa wanthu?

¹⁷ Mwakusaya kupenukira tina mathangwe yakubveka ya kukulisira kutenda kwathu cakulombolera. Thangwe ra cakulombolera, timbakhala pa uxamwali bwakulimba na Yahova napo kuti ndife wanthu wakuperewera. Thangwe ra cakulombolera, mabasa yentse ya Dyabu yan’dzapfudzidwa. (1 Juwau 3:8) Thangwe ra cakulombolera, bzomwe Yahova akhafuna kucita na dzikoli bzin’dzakwanisika. Bzomwe bzikuthandauza kuti dziko lentse la pantsi lin’dzakhala paraizo. Ndipo munthu ali-wentse omwe mun’dzamuwona mu dzikomo, an’dzakhala mtumiki wa Yahova. Ndipopa, citani ciri-centse comwe mungakwanise kuti mulatize kutenda kwanu cakulombolera, yomwe ni mphaso ikulu kwene-kwene yomwe Mulungu adapasa wanthu!