1-2. Gibawu gidi itshi? Mukunda natshi tudi nu funu ya gibawu?

 ADAMA wakhalele muthu watagana, uvi hakalegele muene gubola, watotelesele luendu lua gujinga mayilago. An’enji avualele muene gungima akhalelego nji nu luendu lua gujinga mayilago. Gubola guakalegele Adama guakhalelego mutoga egi amutotesele, handaga wajiyile egi idi ndaga yabola uvi muene wayitshitshile genji. Itshi tuajiya guzuela mukunda nu an’enji? An’enji akalegelego nga gubola gumoshi, ishigo nji ene amutumine ha gutshita gubola. (Lomo 5:12, 14) Adama wakhalele naye gufua mukunda nu gubola guenji. Uvi gudi nu ndaga Yehowa wakalegele hagula ana a Adama afuigo ba? Ayi! Tangua Adama wakalegele gubola, Yehowa wamonesele mage-mage luholo ana a Adama mbaahuluga mu uhiga wa gubola nu gufua. (Gis. 3:15) Yehowa watumine mun’enji mu tangua diabonga ha “guhana monyo wenji gifua gibawu mukunda nu athu avula.”—Mako 10:45; Yone 6:51, NWT.

² Gibawu gidi itshi? Ha gutadila Écritures grecques chrétiennes, mbimbi ‘gibawu’, yana monesa ndando yafutshile Yesu ha gusumba gima giatotesele Adama. (1 Kol. 15:22) Mukunda natshi tudi nu funu ya gibawu? Handaga mikhuala yatagana ya Yehowa yakhalele mutoga egi monyo udi naye guta monyo na uko. (Guz. 21:23, 24) Adama watotesele monyo wenji watagana. Ha gutagenesa mikhuala yatagana ya Nzambi, Yesu wahanele monyo wenji watagana. (Lomo 5:17) Hene, wabuile “Tata wa ivo nu ivo” mukunda nu athu agasue ana monesa gutshigina mu gibawu giahanele muene.—Yesh. 9:6; Lomo 3:23, 24.

3. Ha gutadila Yone 14:31 nu 15:13, mukunda natshi Yesu watshiginyile ha guhana monyo wenji watagana?

³ Yesu watshiginyile ha guhana monyo wenji handaga wana zumba Sh’enji wa mu dilu nu wana gutuzumba nji. (Tanga Yone 14:31; 15:13.) Guzumba guamutumile ha gusala ya gujinginyina uu nu gu suga ha gutshita gutshigina gua Sh’enji. Wasalele yagujinginyina  uu nu gu gufua. Ndaga yatshitshile muene yakuatesele hagula felela dia gisendeselo dia Yehowa ditagenesewe. Mu longo edi, tuza mumona mukunda natshi Nzambi watshiginyile egi Yesu amone lamba diakola nu ashiyiwe. Tuza nji muzuelela mu giketu gifezegeselo gimoshi gia muthu mumoshi mu Biblia munu wasuangulugile muavula nu gibawu. Gu suga tuza mumona luholo tuajiya guhana mersi mukunda nu gibawu, nu luholo tuajiya gumonesa egi tuana suanguluga luholo Yehowa nu Yesu atuhanele gibawu giene.

4. Monesa luholo Yesu afuile.

⁴ Tangiza ndaga Yesu atagenele najio mu lusugu luenji lua gisugishilo ha mavu. Wakhalele naye gutamega anjelo avula ha guza gumubamba, uvi wabembele egi masuta a enya Roma amukuate nu amubete nu shidi yagasue. (Mat. 26:52-54; Yone 18:3; 19:1) Lufimbo akhalele gumubetela luakhalele gumunamenesa. Gungima, amuhanele gitshinyi gia mutshi wanema ha gubata, tangua mahatshi akhalele gumuzoga mu muila. Yesu wabatele mutshi ha guya nawo uu nu ha fundo akhalele naye gumushiya, uvi gungima masuta a enya Roma ahanele mutshi wene gudi muthu muko ha guwubata. (Mat. 27:32) Hahetele Yesu ha fundo diene, masuta akhokhele mago enji nu malu enji ha mutshi wa lamba. Ginemo gienji giakhalele mukawula phuta jia misumadi amukhokhele. Mafut’enji akhalele nu gikenene, gin’enji wakhalele mudila, uvi mafumu a enya Yuda akhalele gumulela. (Luka 23:32-38; Yone 19:25) Yesu wamonele lamba matangua avula. Luholo amukhokhele ha mutshi, mutshima wenji nu mazavu asendesele gukalagala mudimo wakola nu guene guhuima guabuile lamba. Wakhalele mujiya egi wasalele wagujinginyina, hene gutuama egi afue, wakombelele Yehowa giphungu gia suga. Gungima wazebuile muto, wafuile. (Mako 15:37; Luka 23:46; Yone 10:17, 18; 19:30) Yakhadile diago luholo lua gufua lua lamba nu lua sonyi!

5. Ndaga itshi yakhalele musagesa Yesu muavula?

⁵ Luholo Yesu amonesewe lamba nu luholo akhalele naye gufua, ishigo yene yakhalele gumusagesa. Ndaga yakhalele gumusagesa yakhadile, gishina athu ene akhadile naye gumushiyila. Amufundile egi wakhalele mushinga Nzambi, wakhadilego munemesa Nzambi nga jina dienji, uvi ndaga eji jiagasue jiakhalele jia mambo. (Mat. 26:64-66) Ndaga eyi yasagesele Yesu muavula, hene washile mutshima gudi Yehowa egi muene mbaashigo gumubemba ha guvuishiwa sonyi jia luholo elu. (Mat. 26:38, 39, 42) Mukunda natshi Yehowa abembele egi Mun’enji amonesewe lamba nu afue? Tutadilenu ndaga thathu jidi mumonesa ndaga eyi.

6. Mukunda natshi Yesu wakhalele naye gufua ha mutshi wa lamba?

⁶ Thomo, Yesu wakhalele naye gushiyiwa ha mutshi wa lamba ha gukula enya Yuda gu mukumbu atewe. (Gal. 3:10, 13) Enya Yuda atewe mukumbu wene handaga alayele ha gutumagela Mikhuala ya Nzambi, uvi ene alanduilego guyitumagela. Akhalele naye gufua mukunda nu gubola guakalegele Adama, uvi akhalele nji nu mukumbu wene. (Lomo 5:12) Mikhuala Nzambi ahanele enya Isalele yakhalele muzuela egi muthu wakalagala gubola gudi mutoga egi afue, wakhadile naye gushiyiwa. Gungima, muila wenji wakhalele naye gukhokhewa ha mutshi. * (Mikh. 21:22, 23; 27:26) Hene, luholo Yesu afuile ha mutshi wa lamba, luakuatesele enya Yuda ha gukudiwa gu mukumbu atewe nu ha guheta gubonga gua mulambu wenji ngatshima ene amutunyile gawo.

7. Ndaga ya mbadi yatumine Nzambi ha gubemba egi Mun’enji amone lamba idi itshi?

⁷ Tutadilenu ndaga ya mbadi yatumine Nzambi  ha gubemba egi Mun’enji amone lamba. Wakhadile muhana Yesu formasio ha gukhala Nganga-nzambi Wakoma. Yesu wakotelesele diago egi yakhala lamba ha gutumagela Nzambi gula gulolewa guatubadiga ngolo. Wakhalele nu gikenene hene akombelele ha gutoga ukuateshi “nu gudila guakola nu masoji.” Luholo Yesu hakhenji amonele lamba diakola, wana gukotelesa muabonga ndaga tudi najio funu nu luholo tudi gudivua nu “wajiya gutukuatesa” tangua tudi “mulolewa.” Tudi muhana Yehowa mersi avula luholo atombele mukunda nu esue Nganga-nzambi Wakoma munu wajiya ‘gutuvuila khenda mu guleba guetu.’—Heb. 2:17, 18; 4:14-16; 5:7-10.

8. Ndaga ya thathu yatumine Nzambi ha gubemba egi Mun’enji amone lamba diakola idi itshi?

⁸ Ya thathu, Yehowa wabembele egi Yesu amonesewe lamba diakola ha guhana mvutu gu muhu owu wa ndando: Athu ajiya diago gusala agungujinyina gudi Yehowa gula atagana nu gulowewa guakola ba? Satana wazuelele egi ndo! Wazuelele egi athu ana kombelela Nzambi handaga adi mutshigina guheta gima gimoshi ngenyi gudi muene. Luko, wamonesele egi athu anago guzumba Yehowa gifua Adama. (Yobo 1:9-11; 2:4, 5) Yehowa wakhalele musha mutshima egi Yesu mbawusala wagunjinginyina, hene abembele egi Mun’enji alolewe muavula. Yesu wasalele wagunjinginyina nu wamonesele diago egi Satana udi muenya mambo.

9. Gifezegeselo gitshi giatubembele mupostolo Yone?

⁹ Gutshigina gua Aklisto avula guana kola tangua ana longuga longo dia gibawu. Ana landula gulongesa lukuma luabonga ikhale adi mutagana nu umbalagaji, ana kolesela nji mu malamba agasue adi mutagana nawo ikhale adi athu agukola. Tutadilenu gifezegeselo gia mupostolo Yone. Walanduile gulongesa giamatshidia giatadila Klisto nu gibawu mu sungi ya ivo gubadiga 60. Tangua atagenesele ivo hehi nu 100, guvernema ya enya Roma yakhalele mutangiza egi udi mbundudi, hene amutumine mu bologo gu hongo dia Phatimose. Ndaga itshi yabola wakalegele? Wakhalele ‘mulongesa Mbimbi ya Nzambi nu giamatshidia giatadila Yesu.’ (Yat. 1:9) Mupostolo Yone wabembele diago gifezegeselo kiawaha mu ndaga yatadila gutshigina nu gukolesela!

10. Luholo lutshi ndaga jiasonegele Yone jidi mumonesa egi wasuangulugile muavula nu gibawu?

¹⁰ Mu mikanda ya Biblia yasonegele Yone, wamonesele luholo akhadile muzumba Yesu nu gusuanguluga akhalele nago mu mulambu wenji. Mu mikanda yene mudi nu mbimbi gibawu nga gubonga tuana heta mu gibawu iphungu gubalega 100. Ha gufezegesa, Yone wasonegele egi: ‘Gula muthu watshita ndaga jiabola, tudi nu muzueledi udi gudi Tata, Yesu Klisto, udi muthu watagana.’ (1 Yone 2:1, 2) Ndaga jiasonegele Yone jiana zuelela muavula ndando ya ‘giamatshidia giatadila Yesu.’ (Yat. 19:10) Yadiago, Yone wakhalele musuanguluga muavula nu gibawu. Luholo lutshi tuajiya gumonesa egi tuana suanguluga nji nu gibawu?

11. Itshi yajiya gutukuatesa ha gutuna gubua mu muheto wa gubola?

¹¹ Khala mukolesela hagula ubuigo mu ndaga idi gututuma ha gutshita gubola. Gila tudi musuanguluga nu gibawu, mbatushigo mutangiza egi: ‘Ishigo nu ndando egi ngutshite yagasue ha gukolesela tangua ngudi mulolewa. Ngajiya gami gukalagala gubola, uvi gungima ngutogi pardo.’ Uvi, gula tudi mulolewa ha gukalagala ndaga yabola, mbatutuna nu mutshima wagasue egi: ‘Ndo! Yehowa nu Yesu angukalegele ndaga jiavula jiawaha, ngajiyilego gutshita gubola gua luholo elu nga hazonda.’ Ngenyi, tuajiya gukombelela Yehowa ha gumutoga ngolo egi: ‘Ubembigo egi ngubue mu gubola.’—Mat. 6:13.

12. Luholo lutshi tuajiya gukalegela longo didi mu 1 Yone 3:16-18?

 ¹² Khala muzumba aphangi’aye a mala nu a akhetu. Gula tudi muzumba aphangi’etu, tudi monesa nji egi tudi musuanguluga nu gibawu. Mukunda natshi? Handaga Yesu wafuile nji mukunda aphangi’etu a mala nu a akhetu. Luholo Yesu wahanele nji monyo wenji mukunda nu ene, idi mumonesa egi ene nji ana khala nu ndando yavula gu meso enji. (Tanga 1 Yone 3:16-18.) Luholo tuana kalegela aphangi’etu ndaga luana monesa guzumba guetu mukunda nu ene. (Ef. 4:29, 31–5:2) Ha gufezegesa, tuana guakuatesa tangua adi mukata nga ndo gila adi mukolesela mu malamba akola gifua gudigita gua mavu nga ba aksida ako. Na henyaha gula phangi wa yala nga wa mukhetu wa mu hungu watukalegela nga wazuela ndaga imoshi yatusagesa, itshi tuajiya gutshita?

13. Mukunda natshi tudi naye gukhala nu khadilo dia gutotesela aphangi’etu?

¹³ Matangua ako yana khala lamba gudi aye ha gutotesela aphangi’aye ba? (Levi 19:18) Gila idi ngenyi, kalegela longo edi dia ndando: “Khalenu mukanga mutshima mu ndaga jia athu ako, khalenu nji guditotesela nu mutshima wagasue, ngatshima gudi nu muthu udi nu mulonga nu muthu muko. Khalenu guditotesela gifua luholo Yehowa wamitotesele gubola guenu nu mutshima umoshi.” (Kol. 3:13, NWT) Tangua diagasue tuana totesela aphangi’etu a mala nu a akhetu, tuana monesa Tata wetu wa mu dilu egi tuana suanguluga lume nu gibawu. Luholo lutshi tuajiya gulandula gusuanguluga nu kado gatuhuile Nzambi?

14. Luholo lutshi tuajiya gumonesa egi tudi musuanguluga nu gibawu?

¹⁴ Khala muhana Yehowa mersi mukunda nu gibawu. Phangi Joanna udi nu ivo 83, wana jinga gu Inde. Udi muzuela egi: “Ngudi mutangiza egi guzuelela gibawu mu isambu yami masugu agasue nu guhana Yehowa mersi mukunda nu gibawu giene gudi nu ndando yavula.” Mu isambu yaye ya lusugu nu lusugu, khala muwambela Yehowa ndaga jiabola wakalagala, mutoge nji ha gugutotesela. Yadiago, gila watshita gubola guakoma, udi naye gukamba ukuateshi wa akulu. Mbaagutegelela muabonga nu mbaaguhana nji malongo a mu Mbimbi ya Nzambi nu guzumba guagasue. Mbaakombelela nu aye ha gutoga egi Yehowa agutotesele hagula wajiya luko gukhala nu ufuta wawaha n’enji.—Yak. 5:14-16.

15. Mukunda natshi tudi naye guzula tangua dia gutanga nu gutangigiza ndaga jiatadila gibawu?

¹⁵ Khala mutangigiza mukunda nu gibawu.  Phangi wa mukhetu wa ivo 73 mu jina dia Rajamani udi muzuela egi: “Tangua diagasue ngana tanga luholo Yesu amonele lamba, masoji ana gunguwenda mu meso.” Aye nji wajiya guvua gikenene giavula tangua udi mutangiza luholo Mun’a Nzambi amonele lamba diavula. Uvi gila udi mutangigiza muavula mu ndaga yatadila mulambu wahanele Yesu, mbawukolesa diago guzumba guaye gudi muene nu gudi Tata wenji. Gula wazula tangua diavula ha longuga ndaga jiavula jiatadila gibawu, mbayigukuatesa ha gutangigiza muabonga!

16. Luholo lutshi gulongesa athu ako ndaga jiatadila gibawu guana gutukuatesa? (Tala gifuanesa holu dia gizula.)

¹⁶ Khala mulongesa athu ako ndaga jiatadila gibawu. Tangua diagasue tuana longesa athu ako ndaga jiatadila gibawu, gusuanguluga guetu mukunda nu gibawu giene guana vula diago. Tuana khala nu mikanda nu video jiavula jiana gutukuatesa ha gukotelesela athu gishina Yesu afuile mukunda nu esue. Ha gufezegesa, tuana kalegela longo 4 dia gamukanda Mene Jiabonga Jiakatuga Gudi Nzambi! Longo diene didi nu muto wa lumene egi: “Yesu Klisto udi nanyi?” Nga ndo tuajiya gutadila mukhapho 5 wa mukanda Itshi Biblia Yajiya gutulongesa? Mukhapho wene udi nu muto wa lumene egi: “Gibawu Gidi Kado Yabalega Gukoma Nzambi Watuhanele.” Luko, givo giaguasue luholo tuana guya mu gudibungisa gua Guwunguluga Gufua gua Yesu nu luholo tuana tamega athu ako ha guza luana monesa diago egi tudi musuanguluga nu gibawu. Yehowa watuhanele diago luendu lua gulongesa athu ako ndaga jiatadila Mun’enji!

17. Mukunda natshi gibawu gidi kado gabalega ndando gatuhanele Nzambi?

¹⁷ Tudi nu ishina yavula yajiya gututuma ha gukudisa nu gubamba gusuanguluga guetu mukunda nu gibawu. Thomo, gibawu giana gutukuatesa ha gukuata ufuta wakola nu Nzambi ikhale tushigo athu atagana. Ya mbadi, mu njila ya gibawu, midimo yagasue ya Diabulu mbayishiyiwa. (1 Yone 3:8) Ya thathu, mu njila ya gibawu, felela dia thomo dia Yehowa mukunda nu mavu mbaditaganesewa diago. Mavu agasue mbaabua Phaladiso yawaha. Athu agasue mbatukhala nawo, mbakhala athu ana kombelela Yehowa nu ana gumuzumba muavula. Hene, lusugu nu lusugu, tulandulenu gukamba maluholo tuajiya gumonesa egi tuana suanguluga lume nu gibawu, kado gabalega ndando gatuhanele Nzambi!