1-2. Ko dipo nchani, ndipo ndawa chani ni yodikana kwa ise?

POMWE mwamuna wangwiro Adamu adachimwa, adaluza mwayi wokhala na moyo wosapera, osati iye yekha basi koma na wana wose wakutsogolo. Ndawa ya vomwe Adamu adachita, angadekanalini kukhululukiriwa. Ndawa adachita kufuna. Manje tani wana wake? Iwo alibe kuchimwako naye pabodzi. (Aro. 5:12, 14) Ko pali chilichose chomwe chidakachitika kuti awapulumuse ku mulandu womwe azibereki wawo ndiwo angadikana kulangiwa? Inde! Padandoti Adamu wachimwa, mwa pang’ono-pang’ono Yahova adaulula momwe adakapulumusirira mamidyau ya wana wa Adamu ku uchimo na impfa. (Gen. 3:15) Ndipo panthawe yake yoikhiwa, Yahova adakatumiza Mwana wake kuchoka kudzulu ‘kudzapereka moyo wake ninge dipo kuti apulumuse wanthu azinji.’—Maliko 10:45; Yoh. 6:51.

² Ko dipo nchani? Mobverana na Malemba ya Chigiriki ya Chikhrisitu, dipo ni malipiro yomwe Yesu adapagali kuti abweze vomwe Adamu adaluza. (1 Akor. 15:22) Ko ndawa chani tichadekana dipo? Ndawa yakuti malamulo yachilungamo yomwe Mulungu adapereka yambafuna kuti moyo ulipire moyo.’ (Eks. 21:23, 24) Adamu adaluza moyo wangwiro. Kuti akwanirise chilungamo cha Mulungu, Yesu adapereka moyo wake wangwiro. (Aro. 5:17) Ndawa ya vimwevi, iye adakhala ‘Baba Wosapera’ kwa wose wokhulupirira dipo.—Yes. 9:6; Aro. 3:23, 24.

3. Mobverana na Yohane 14:31 na 15:13, ndawa chani Yesu wenze wotsimikiza kupereka moyo wake wangwiro kuti awombole wanthu wochimwa?

³ Yesu wenze wokonzeka kupereka moyo wake ndawa ya yokonda maninge Ababa wake na ise. (Lewengani Yohane 14:31; 15:13.) Ndawa ya chikondi chake, wenze wosaina kupitiriza kukhala wokhulupirika mpakana mapeto na  kukwanirisa chakulinga cha Ababa wake. Yesu adachita vimwevi mwa kukhala wokhulupirika mpakana impfa. Ndipo vimwevi vidachitisa kuti chakulinga cha Yahova kwa wanthu na dziko yapasi chikwanirisike. Mu nkhani ino, tipfunzire kuti ndawa chani Mulungu adabvuma kuti Yesu adzudzike maninge akanati wafa. Tikambirane soti vitsanzo va onemba Baibolo womwe angatembeja dipo. Pomalizira, tikambirane momwe tingawonesere kutembeja kwathu dipo na momwe tingakulisire kutembeja Yahova na Yesu pa vomwe adatichitira.

4. Fotokozani momwe Yesu adafera.

⁴ Ndoganizani mweyenzere ntsiku yomaliza ya Yesu padziko yapasi. Olo kuti iye adakakwanisa kuchemera gulu ya angelo kuti adzamuteteze, iye adabvuma kuti amangiwe na masocha yachiroma achimenyewa mwankhanza. (Mat. 26:52-54; Yoh. 18:3; 19:1) Iwo adamukwapula na vingwe vomwe vidamupweteka maninge. Patsogolo pake, adamusenzesa chintanda chikulu cholema paphewa. Yesu adayamba kuguza chintanda chile kuyenda nacho kumalo yadamukhomerera. Patsogolo pake adaphata munthu munango nkumunyamulisa pomwe. (Mat. 27:32) Pomwe adafika pamalo yomwe adakapherewa, masocha yale yadamukhomerera manja na minyendo pamuti. Kulemera kwa thupi ya Yesu kungachitisa kuti ambabve kuwawa. Azishamwali wake na amayi wake adalira maninge, koma atsogoleri wachiyuda ambandomunyoza. (Luka 23:32-38; Yoh. 19:25) Yesu adadzudzika kwa maola yazinji. Ndawa yakuti wenze adapanikizika mtima na mapapu, kupuma kwenze komushupa. Uku ankushupika kupuma, adachita pemphero kwa Yahova komaliza. Patsogolo pake adagwesa msolo wake ndipo adamalizika. (Maliko 15:37; Luka 23:46; Yoh. 10:17, 18; 19:30) Impfa mweyi yenze ya pang’ono-pang’ono, yowawa na yonyozeka!

5. Kuchosapo pa impfa yake, ko nchani chomwe chimbamuwawa maninge Yesu?

⁵ Chomwe chingamuchitisa nkhawa maninge Yesu yenzelini impfa yake yokha. Iye wenze soti na nkhawa ikulu ndawa ya vomwe angamunamizira. Iye adanamiziriwa kuti ni munthu wonyoza Mulungu panango dzina ya Mulungu. (Mat. 26:64-66) Vimwevi vidamuwawa maninge Yesu, ndipomwapa adakumbira Ababa wake kuti amupulumuse ku vinthu vochitisa manyazi vimwevi. (Mat. 26:38, 39, 42) Ndawa chani Mulungu adabvuma kuti Mwana wake wapamoyo adzudzike na kufa? Naboni tikambirane vifukwa vokwana vitatu.

6. Ndawa chani Yesu angadekana kudzudzika pamuti wodzudzikirapo?

⁶ Chakuyamba, Yahova adabvuma kuti iye akhomererewe pamuti pakufuna kuti awombole Ayuda. (Agal. 3:10, 13) Iwo ambati ankutewedza Chilamulo cha Mulungu, koma iwo alibe kuchiphatisa basa. Koma iwo ambachita vimwevi ndawa yakuti ni mbewu yochimwa ya Adamu. (Aro. 5:12) Chilamulo cha Mulungu kwa Aizirayeli chidati munthu yemwe wachimwa achadekana kuphewa mwa kuchita kukhomererewa. Patsogolo pake, thupi yake ichadekana kumanikiwa pamuti. * (Deut. 21:22, 23; 27:26) Ndipomwapa mwa kukhomererewa pamuti, Yesu adachitisa kuti Ayuda wose womwe adamulamba aphindule na ntsembe yake.

7. Ni chifukwa chachiwiri chiponi chomwe Mulungu adabvumira kuti Mwana wake abonere?

⁷ Onani chifukwa chachiwiri chomwe Mulungu  adabvumira kuti Mwana wake adzudzike. Iye angakonzekeresa Mwana wake pa udindo wokhala Wantsembe Nkulu. Yesu adawona momwe viliri voshupa kubvera Mulungu ukakhala kuti uli pachiyeso chikulu. Adapanikizika maninge mpakana adakumbira thandizo uku ‘ankulira na kuchosa misozi.’ Ndawa yakuti iye adagumanambo na vowawa ninge vimwevi, Yesu achabvesa vomwe tichadikana ndipo ‘ni wokonzeka kutithandiza’ tikakhala kuti ‘tagumana na chiyeso chikulu.’ Tinkutembeja maninge Yahova pakutipasa Wantsembe Nkulu wantsisi yemwe ‘achadziwa bwino vofoka vathu’!—Aheb. 2:17, 18; 4:14-16; 5:7-10.

8. Ko ni chifukwa chachitatu chiponi chomwe Mulungu adabvumira kuti Mwana wake ayesewe maninge?

⁸ Chachitatu, Yahova adabvuma kuti Yesu abonere maninge kuti adawire mibvunzo yakudikana maninge aya: Ko wanthu angakwanise kukhala wokhulupirira kwa Mulungu podiya kuti ankudzudzika? Satana adati vingakwanisikelini! Iye achati wanthu achatumikira Mulungu ndawa ya vinthu vabwino vomwe achapasiwa. Ndipo iye achati, ninge ababa wawo Adamu, iwo ni wosakhulupirika kwa Yahova. (Yobu 1:9-11; 2:4, 5) Ndawa yakuti angamuthemba Mwana wake, Yahova adabvuma kuti iye ayesewe pa saizi yakuti munthu angakwanise kupirira. Yesu adapitiriza kukhala wokhulupirika ndipo adawonesa kuti Satana ni wabodza.

9. Ko Yohane adatisiyira chitsanzo chiponi?

⁹ Chikhulupiriro cha wanthu azinji chidalimba padandodziwa va dipo. Abale anango wachikulire adapitiriza kulalikira podiya kuti ambatsutsiwa ndipo adapirira mayesero ya khaindi na khaindi. Wonani chitsanzo cha mtumi Yohane. Iye adalalikira mokhulupirika choonadi cholewa va Yesu Khrisitu na dipo kwa magole yoposha 60. Pewenze na magole ya m’ma 90, iye ambagopsewambo na wolamulira wa ku Roma womwe enze adamumanga pa ntsuwa ya Patimo. Manje iye adaphonya chani? Ndawa ‘angalewa va Mulungu na kuchitira umboni va Yesu.’ (Chiv. 1:9) Chimwechi ni chitsanzo chabwino maninge cha chikhulupiriro na kupirira!

10. Ko vomwe Yohane adanemba vinkuwonesa tani kuti iye angatembeja dipo?

¹⁰ M’mabukhu yomwe adauziriwa kunemba, Yohane adawonesa kuti angakonda maninge Yesu na kutembeja dipo. Iye adanemba mawu yakuti dipo kupitirira ka 100 panango ubwino womwe iyo idabweresa. Mwakulinganiza, Yohane adanemba kuti: ‘Munango akachimwa, tinaye mthandizi wolungama Yesu Khrisitu yemwe ali pabodzi na Ababa.’ (1 Yoh. 2:1, 2) Vonemba va Yohane vinkutsindika soti kudikana ‘kochitira umboni va Yesu.’ (Chiv. 19:10) Vinkuchita kuwonekeratu kuti Yohane angatembeja maninge dipo. Ko isembo tingawonese tani kuti tinkutembeja dipo?

11. Nchani chingatithandize kulimba pachiyeso?

¹¹ Mumbalimbe mukambayesewa kuti muchimwe. Peno tichatembejadi dipo, tingakhalelini na maganizo yakuti: ‘Kwa inembo viliralini kuti nimbachite khama nikambayesewa kuti nichimwe. Podiya nifike pakuchimwa palibe vuto ndawa nthawe mweyo nimbakumbire kuti anikhululukire.’ Koma tikambayesewa kuti tichite voipa, tingalambe nkulewa kuti: ‘Ko ningachitirenyi chinthu choipa tene pa vose vomwe Yahova na Yesu adanichitira?’ Ndipo tingachite bwino kukumbira Yahova kuti atipase mphanvu pakumugwigwirira  kuti: ‘Ayi kubvuma kuti ningene m’mayesero.’—Mat. 6:13.

12. Ko tingaphatise tani basa malangizo ya pa 1 Yohane 3:16-18?

¹² Kondani abale na alongo wanu. Tikambawakonda, tingawonese kuti tinkutembeja dipo. Ndawa chani tinkulewa tene? Ndawa yakuti Yesu adapereka moyo wake osati ndawa ya ise chabe, koma ndawa ya abale na alongo wathu. Peno ndise wokonzeka kuwafera, iwo angatiwone kuti ndise wodikana maninge m’maso mwawo. (Lewengani 1 Yohane 3:16-18.) Tingawonese kuti tiwakonda abale na alongo wathu pa momwe tichachitira nawo vinthu. (Aef. 4:29, 31–5:2) Mwakulinganiza, tingawathandize akakhala kuti ankudwala, akambagumana na mabvuto kuphatanidzapo matsoka yachilengedwe. Ko tichadekana kuchita chani peno Mkhrisitu wachita panango kulewa vinthu vomwe vatikalipisa?

13. Ndawa chani tichadekana kumbakhululuka?

¹³ Ko imwepo nthawe zinango mushupika kuti muleke kusungira akhrisitu anzanu chakukhosi? (Lev. 19:18) Peno teno, tewedzani malangizo aya: ‘Pitirizani kulolerana na kukhululukirana na moyo wose, peno munango anachifukwa na mwanzake. Ninge momwe Yahova adakukhululukirani na moyo wose, imwepombo mumbakhululuke.’ (Akol. 3:13) Nthawe iliyose yomwe takhululukira abale na alongo wathu, tichakhala tikuwonesa kuti tinkutembeja Ababa wathu wakudzulu ndawa ya dipo. Ko tingapitirize tani kukulisa kutembeja kwathu pa mphaso mweyi yochokera kwa Mulungu?

14. Ni njira ibodzi iponi yatingawonesere kuti tinkutembeja dipo?

¹⁴ Mbatembejani Yahova ndawa ya dipo. Mulongo Joanna wa magole 83 yemwe ankukhala ku Índia adati: ‘Ninkuwona kuti ni vabwino maninge kuti ntsiku iliyose m’mapemphero yangu nimbagume dipo na kumutembeja Yahova ndawa ya kuipereka.’ Ntsiku iliyose tikambapemphera patekha, vingakhale bwino kuwona vataphonyesa pantsiku mweyo nkukumbira Yahova kuti atikhululukire. Koma peno taphonyesa vikulu, tingachite bwino kukawonana na akulu. Iwo angatitetekere na kutipasa malangizo ya m’Mawu ya Mulungu. Iwo adzapemphere nase pabodzi, nkukumbira Yahova kuti atikhululukire nakuti tikhale pomwe ‘pa ushamwali na iye.’—Yak. 5:14-16.

15. Ndawa chani tichadekana kupatula nthawe yolewenga na kuganizira va dipo?

 ¹⁵ Mbaganizirani dipo. Mulongo Rajamani wa magole 73 adalewa kuti: ‘Nikambalewenga va kudzudzika kwa Yesu, maso yangu yachadzala na misozi.’ Imwepo mungawonembo kuti ni vowawa mukaganizira momwe Mwana wa Mulungu adadzudzikira. Ndipo imwepo mukambaganizira va ntsembe ya dipo, mudzayambe kukonda maninge Yesu pabodzi na Ababa wake. Kuti mukwanise kuganizira va dipo, tani kutenga nkhani ino kuti ikhale pfunziro yanu ya pamwekha?

16. Ko kupfunzisa anango va dipo kuchatiphindulisa tani? (Onani foto ya pakhava.)

¹⁶ Mbapfunzisani anango va dipo. Nthawe iliyose tikambauza anango va dipo, tidzakulise mtima wathu wotembeja. Tinavitsulo vizinji vabwino vipfunzisira wanthu anango kuti adziwe ndawa yake Yesu adatifera. Mwakulinganiza, tingaphatise basa pfunziro 4 ya kabulosha ka Ntontholo wabwino wochokera kwa Mulungu! Pfunziro mweyi inankhani yakuti: ‘Ko Yesu khrisitu ni mbani?’ Panango tingandomuwonesa msolo 5 wa bukhu yakuti: Vomwe Baibolo ichapfunzisa. Msolo moyu unankhani yakuti: ‘Dipo ya Yesu ni mphaso yapadera yomwe Mulungu adatipasa.’ Ndipo gole iliyose kutembeja kwathu dipo kuchathimizirika tikambagumanika pa Chikumbuso chokumbukira impfa ya Yesu na kuchemerera anango mwakhama. Yahova adatipasa mwayi ukulu maninge wa kuuza anango va Mwana wake!

17. Ndawa chani dipo ni mphaso ikulu yomwe Mulungu adapasa wanthu?

¹⁷ Shuwadi, tinavifukwa vabwino vopitirizira kutembeja dipo. Ndawa ya dipo, tingakhale pa ushamwali wabwino na Yahova podi kuti ndise wochimwa. Ndawa ya dipo, mabasa ya Ndyerekezi yadzadzongewe. (1 Yoh. 3:8) Ndawa ya dipo, chakulinga cha Yahova padziko yapasi chidzakwanirisike. Ndipo dziko yose yapasi idzakhale Paradaiso. Aliyese wati mudzagumane naye m’Paradaiso adzakhale wokonda Yahova na kumutumikira. Naboni tose, ntsiku iliyose timbanyag’ane njira zotembejera mphaso ya dipo yomwe ni mphaso ikulu yomwe Mulungu adapereka kwa wanthu!