1-2. Eaa te atinga oko, e eaa ka anoanoia ai te reira?

TE ARA anga te tangata apa kore ko Adamu, kua ngaro iaia e tana tamariki te tikaanga kia ora e tuatau ua atu. Kare a Adamu kotoeanga. Kua rave akakoro aia i te ara. Inara akapeea tana tamariki? Kare ratou i akakeu ana ia Adamu kia rave i te ara. (Roma 5:12, 14) E apinga ainei tetai tei akanooia no te akaora ia ratou mei te mate tei tau kia Adamu? Ae! I muri ua ake i to Adamu ara anga, kua akamata a Iehova i te akaari akapeea aia me akaora i ta Adamu tamariki e mirioni ua atu, mei te ara e te mate. (Gene. 3:15) I te tuatau tei tau kia Iehova, ka tono mai aia i tana Tamaiti mei te rangi “kia oronga atu aia i tona ora ei oko no te tangata e manganui.”—Mare. 10:45; Ioa. 6:51.

² Eaa te atinga oko? Taiku te Tuatua Tapu Ereni Kerititiano, e ka oronga a Iesu i tona oraanga ei tutaki no te au apinga tei ngaro ia Adamu. (1 Kori. 15:22) Eaa ra ka anoanoia ai te atinga oko? I roto i ta Iehova Ture, kia orongaia tetai oraanga no te oraanga. (Exo. 21:23, 24) Kua ngaro ia Adamu te tu oraanga apa kore ei tangata. Kia tupu ta te Atua i akanoo, ka anoanoia a Iesu kia akaatinga i tona oraanga apa kore ei tangata. (Roma 5:17) Ka riro mai aia i reira ei “Metua no te tuatau mutu kore” ki te aronga tei akarongo ki te atinga oko.—Isa. 9:5; Roma 3:23, 24.

3. Ia Ioane 14:31 e te 15:13, eaa a Iesu i inangaro ei i te akaatinga i tona oraanga apa kore ei tangata?

³ Kua inangaro a Iesu i te akaatinga i tona oraanga no tona aroa maata i tona Metua i te rangi, e ia tatou. (E tatau ia Ioane 14:31; 15:13.) No tona aroa, kua iki aia kia vai tiratiratu e tae ua atu ki te openga o tona oraanga e kia tupu te anoano o tona Metua. No ta Iesu i rave, ka  akatupuia ta Iehova akakoroanga mua no te tangata e no te enua. I roto i teia apii, ka uriuri tatou eaa a Iehova i akatika ai ia Iesu kia takinokino maataia i mua ake ka tamateia ai aia. Ka uriuri katoa tatou i te akaraanga o tetai tata Pipiria tei akaperepere maata i te atinga oko. E ka uriuri tatou akapeea me akaari i te tu āriki no te atinga oko, e akapeea tatou me akaketaketa i to tatou tu akaperepere no te atinga ta Iehova e Iesu i oronga mai.

4. Eaa tei tupu kia Iesu i mua ake ka mate ei aia?

⁴ Akamanako ana eaa tei tupu kia Iesu i mua ake ka tamateia ai aia. Noatu ka rauka iaia i te kapiki i te au angera kia paruru iaia, kua akatika ra aia i te au vaeau Roma kia takinokino iaia. (Mata. 26:52-54; Ioa. 18:3; 19:1) Kua pāpāia aia ki te taura rikiriki kia motumotu tona kopapa. E oti, kua amo aia i tetai rakau teiaa. Kua tauta a Iesu i te apai i teia rakau, inara i muri mai, kua akaueia tetai tangata ke kia amo i te reira. (Mata. 27:32) Te tae anga a Iesu ki te ngai ka tamateia aia, kua patia te au vaeau iaia ki runga i te rakau, ki te naero na roto i tona rima e te vaevae. Riro te teiaa o tona kopapa i te aae i te ngai i patiaia aia ki te naero. Te aue ra tona au oa e tona metua vaine, e te aviri ra te au arataki ngati Iuda iaia. (Luka 23:32-38; Ioa. 19:25) E kino maata tikai tona mamae e kua ngatā iaia i te akaea. I mua ua ake ka mate ei aia, kua pure aia kia Iehova. E oti, kua tuku atura i tona oraanga. (Mare. 15:37; Luka 23:46; Ioa. 10:17, 18; 19:30) E mate anga marie, mamae kino e te taakama tikai tona!

5. Eaa te mea kino rava atu kia Iesu?

⁵ Kia Iesu, kare ko te tu i tamateia ai aia te mea kino rava atu. Kua taitaia aia i ta ratou akaapa anga. Kua akaapa pikikaa ratou iaia ei tangata akakino Atua—kare e akangateitei ana i te Atua me kore i te ingoa o te Atua. (Mata. 26:64-66) Kua riro teia akaapaanga i te tamamae maata tikai ia Iesu, e kua inangaro aia i tona Metua kia apai ke i teia tu taakama. (Mata. 26:38, 39, 42) Eaa ra a Iehova i akatika ai i tana Tamaiti akaperepere kia takinokinoia e kia tamateia? Ka uriuri tatou e toru tumu.

6. Eaa a Iesu ka anoanoia ai kia riia ki runga i te rakau tamamae anga?

⁶ Mea mua, ka anoanoia a Iesu kia riia ki runga i te rakau no te akamatara i te ngati Iuda mei tetai taumaa anga. (Gala. 3:10, 13) Kua āriki ratou i te Ture a te Atua, inara kare i rave i te reira. Tei tupu, kua taumaaia ratou ei tamariki ara na Adamu. (Roma 5:12) Akakite te Ture a te Atua ki to Iseraela, ko tetai tangata tei rave i te ara e tei tau kia mate, kia tamateia rai aia. I muri ake, ka riia tona kopapa ki runga i te rakau. * (Deu. 21:22, 23; 27:26) No reira, me riia te kopapa o Iesu ki runga i te rakau, ka puapinga katoaia te iti tangata tei patoi ia Iesu mei tona atinga.

7. Eaa te rua o te tumu i akatika ai te Atua i tana Tamaiti kia takinokinoia?

⁷ Akamanako ana i te rua o te tumu i akatika ai te Atua i tana Tamaiti kia takinokinoia. Te tereni ra aia ia Iesu no tana tuanga ei Taunga Maata. Kua kite  tikai a Iesu i te tu ngatā kia akarongo ki te Atua me timata maataia aia. Kua kite aia i te teiaa o te reira e kua pure no te tauturu “ma te aue maata e te roi-mata.” No te mea kua na roto ana a Iesu i teia mamae ngakau kino tikai, ka mārama aia i ta tatou ka anoano e ka “tauturu mai” aia me “timataia” tatou. Kia akameitaki tatou ia Iehova no tei oronga mai i tetai Taunga Maata te ka “aroa mai ia tatou i to tatou au paruparu”!—Ebe. 2:17, 18; 4:14-16; 5:7-10.

8. Eaa te toru o te tumu i akatika ai te Atua ia Iesu kia timata pakariia?

⁸ Te toru, kua akatika a Iehova ia Iesu kia takinokino maataia no te pau i teia uianga puapinga: Ka rauka ainei i te tangata te vai tiratiratu kia Iehova me timata pakariia ratou? Karanga a Satani, kare! Akakite aia e te tavini ua nei te tangata i te Atua kia rauka tetai apinga na ratou. E kua irinaki aia e kare ratou e vai tiratiratu kia Iehova mei ia Adamu rai. (Iobu 1:9-11; 2:4, 5) Kua irinaki a Iehova e ka vai tiratiratu tana Tamaiti, no reira aia i tuku ei ia Iesu kia timata pakariia. Kua vai tiratiratu a Iesu e kua akapapu e e pikikaa a Satani.

9. Eaa te akaraanga ta te apotetoro ko Ioane i akanoo?

⁹ Kua akaketaketaia te akarongo o te au Kerititiano na te apii anga i te atinga oko. Kua tutu aere rai ratou noatu te au patoianga e kua akakoromaki i te au timataanga. Akamanako i te akaraanga o te apotetoro ko Ioane. Kua akakite aere aia i te tika no runga ia Iesu e te atinga oko, penei tere atu e 60 mataiti. Vaitata anga tona mataiti ki te 100, kua titiri te au arataki Roma iaia ki roto i te are auri i te enua ko Patamo. Eaa tana kino i rave? Te tutu aere i “te tuatua a te Atua ra, e no [te] akakite anga ia Iesu Mesia.” (Apo. 1:9) E akaraanga meitaki tikai a Ioane no te akarongo e te akakoromaki!

10. Akapeea ta Ioane au reta te akaari anga i tona akaperepere no te atinga oko?

¹⁰ Kua akakite a Ioane i tona aroa no Iesu e tona akaperepere maata no te atinga oko i roto i tana au reta. Kua taiku aia e 100 tuma taime i te atinga oko e te puapinga ta te reira i akatupu. Ei akaraanga, tata a Ioane: “Kia rokoia atura tetai tangata i te ara, e Tika to tatou tei ko i te Metua ra, ko Iesu Mesia tuatua-tika ra.” (1 Ioa. 2:1, 2) Akakite katoa a Ioane i te puapinga no tatou kia “akakite oki ia Iesu ra.” (Apo. 19:10) Taka meitaki e te akaperepere maata ra a Ioane i te atinga oko. Akapeea tatou me akaari katoa i te reira?

11. Eaa te ka tauturu ia tatou kia patoi i te timataanga?

¹¹ Patoi i te timataanga kia rave i te ara. Me akaperepere tikai tatou i te atinga oko, kare tatou e manako e: ‘Kare au e tauta pakari kia kore e rave i te ara. Ka rauka ua iaku i te rave i te reira e oti, ka pati ki te Atua kia akakore mai i taku ara.’ Me timataia tatou kia rave i tetai tarevake, kia tuatua tatou: ‘Kare! Eaa au ka rave ei i tetai apinga kino kia Iehova e Iesu?’ Pera katoa, ka rauka ia tatou i te pati akatenga kia Iehova no te tauturu: ‘Auraka e akaruke iaku kia timataia mai.’—Mata. 6:13.

12. Akapeea tatou me taangaanga i te ako ia 1 Ioane 3:16-18?

 ¹² E aroa i te au taeake e te au tuaine. Me aroa tatou ia ratou, te akaari ra tatou i te tu akaperepere no te atinga oko. No te mea kua oronga a Iesu i tona oraanga noou e no te au taeake e te au tuaine. Me kua mate katoa aia no ratou, e puapinga ratou kiaia. (E tatau ia 1 Ioane 3:16-18.) Ka akaari tatou i te aroa no te au taeake e te au tuaine na roto i te tu me akono ia ratou. (Ephe. 4:29, 31–5:2) Ei akaraanga, ka tauturu tatou me rokoia ratou e te maki, tetai timataanga e te tumatetenga natura. Akapeea i reira me tuatua e me rave tetai taeake i tetai apinga te ka akariri ia tatou?

13. Eaa tatou ka akakore ei i te ara a tetai ke?

¹³ Te akamoupuku ra ainei koe i te tarevake o tetai taeake? (Levi. 19:18) Me te pera ra koe, e aru i teia akoanga: “E tauturu atu tetai ki tetai, e akakore tetai i ta tetai ara, e tapepeanga ta tetai ki tetai ra; mei te Mesia i akakore i ta kotou na, e akapera katoa kotou.” (Kolo. 3:13) Me akakore tatou i te ara a te au taeake e te au tuaine, te akapapu ra tatou ki to tatou Metua i te rangi e te āriki maata ra tatou i te atinga oko. Akapeea tatou me akaperepere maata tikai i te apinga aroa no ko i te Atua?

14. Akapeea tatou me akaari e te akaperepere maata ra tatou i te atinga oko?

¹⁴ E akameitaki ia Iehova no te atinga oko. Karanga te tuaine ko Joanna no Initia, e 83 ona mataiti, “Kua manako au e mea puapinga kia taiku i te atinga oko i roto i taku pure i te au rā ravarai, e ka akameitaki au ia Iehova no te reira.” I roto i taau uaorai pure, e akakite kia Iehova i te au tarevake taau i rave i tera rā, e oti e pati kiaia kia akakore i te reira. Inara, me kua rave koe i tetai ara kino, ka anoanoia koe kia kimi i te tauturu a te aronga pakari. Ka akarongo ratou e ka oronga mai te au akoanga aroa mei te Tuatua a te Atua. Ka pure ratou noou e ka pati ia Iehova kia akakore i taau ara, “kia akaoraia” koe i te pae vaerua.—Iako. 5:14-16.

15. Eaa ra tatou ka akanoo ei i tetai taime no te tatau e te akamanako oonu i te atinga oko?

¹⁵ Akamanako oonu i te atinga oko. Karanga  te tuaine ko Rajamani, e 73 ona mataiti, “Me tatau ua rai au i te tu mamae ta Iesu i na roto, ka pururu ua rai toku roimata.” Penei ka pururu rai toou roimata me akamanako koe i te mamae ta te Tamaiti a te Atua i na roto ana. Me akamanako oonu koe i te atinga ta Iesu i oronga, ka inangaro maata atu koe iaia e tona Metua. No reira, e akanoo i tetai taime no te akamanako oonu i te atinga oko.

16. Eaa te ka tupu me apii tatou i tetai ke no runga i te atinga oko? (Akara i te tutu i te kapi mua.)

¹⁶ Apii i tetai ke no runga i te atinga oko. Me akakite tatou i te atinga oko ki tetai ke, ka akaperepere maata atu tatou i te reira. E maata te au puka e te au vitio te ka tauturu ia tatou kia apii i tetai ke i te tumu i mate ei a Iesu no tatou. Ei akaraanga, penei ka taangaanga tatou i te apii 4, “Koai a Iesu Karaiti?” i roto i te poroutia Nuti Meitaki no ko i te Atua! Me kore, ka taangaanga tatou i te pene 5, “Te Oko—Ta te Atua Apinga Aroa Maata Rava Atu” i roto i te puka Eaa ta te Pipiria ka Apii Mai ia Tatou? E i te au mataiti ravarai, ka rauka ia tatou i te pati i tetai ke kia piri mai ki te Akamaaraanga i te matenga o Iesu. E tikaanga manea teia ta Iehova i oronga mai kia apii i tetai ke no runga i tana Tamaiti!

17. Eaa te atinga oko i riro ei ei apinga aroa maata rava atu na te Atua ki te tangata?

¹⁷ Kare e ekoko, e tumu meitaki to tatou kia akaperepere ua rai i te atinga oko. No te atinga oko, ka rauka ia tatou tetai pirianga vaitata kia Iehova noatu to tatou tu apa ua. No te atinga oko, ka takoreia te au angaanga a te Tiaporo. (1 Ioa. 3:8) No te atinga oko, ka akatupuia to Iehova akakoroanga mua no te enua. Ka akariroia te enua katoa ei parataito. Ka inangaro e ka tavini te katoatoa ia Iehova. No reira, kia rauka ia tatou i te akaari i te au rā ravarai i to tatou tu akaperepere maata no te atinga oko—te apinga aroa maata rava atu na te Atua ki te tangata!