1-2. Soj tani i otkupnina hem sose valjani amenđe?

KED o savršeno manuš, o Adam grešinđa, ov našalđa i prilika te živini zauvek. Ama, na samo ov nego hem olese ćhave. Na hine nisavo opravdanje aso odova so o Adam ćerđa. Ov namerno grešinđa. Ama, soj tano olese ćhavencar? On nane kriva sebepi so o Adam grešinđa (Rimlj. 5:12, 14). O Adam zaslužinđa te merel sebepi odova so ćerđa. Ama, da li o Jehova šajinđa te ćerel diso te šaj e Adamese ćhave te živinen večno? Ja! Hari palo odova so o Adam grešinđa, o Jehova počminđa te mothovi sar ka spasini e Adamese ćhaven ando greh hem ando meribe (Post. 3:15). Ko vreme kova odredinđa, o Jehova kotar nebo bićhalđa pe Ćhave „te del po životi sar otkupnina butenđe“ (Mar. 10:45; Jov. 6:51).

² Soj tani i otkupnina? Ked spomini pe ko hrišćanska grčka spisija, i otkupnina tani cena koja o Isus platinđa te šaj te lel napalal odova so o Adam našalđa (1. Kor. 15:22). Sose valjani amenđe i otkupnina? Premalo e Jehovase merilija asi pravda kola tane pisime ko oleso Zakon, valjanđa te del pe životi aso životi (Izl. 21:23, 24). O Adam našalđa po savršeno životi. Te šaj te zadovoljini e Devlesi pravda, o Isus žrtvujinđa po savršeno životi (Rimlj. 5:17). Ađahar ulo „Večno Dad“ aso sa okola kola mothovena vera ki otkupno žrtva (Is. 9:6; Rimlj. 3:23, 24).

3. Premalo Jovan 14:31 hem 15:13, sose o Isus hine spremno te del po savršeno životi?

³ O Isus hine spremno te del po đivdipe odolese so manglja pe nebesko Dade hem e manušen. (Čitin Jovan 14:31; 15:13.) Odova mangipe podstakninđa le te aćhol verno celo po životi hem te ćerel pe Dadesi volja. Sebepi odova e Devlesi namera asi phuv hem aso manuša ka ispunini pe. Ko  akava članko ka vaćera odolestar sose o Devel dozvolinđa o Isus odobor te patini angleder te merel. Isto ađahar, ka dikha o primer ando apostol Jovan kova but ceninđa i otkupnina. Ko krajo, ka dikha sar šaj amen te mothova so hijam zahvalna asi otkupnina hem sar šaj pana pobuter te cenina i žrtva koja ćerđe o Jehova hem o Isus.

4. Vaćer sar o Isus mulo.

⁴ Zamislin so sa desinđa pe ko poslednjo dive angleder te merel o Isus. Iako ov šaj te zamolini bute anđelen te zaštitinen le, ov dozvolini o rimska vojnikija te astaren le hem te maren le (Mat. 26:52-54; Jov. 18:3; 19:1). O bič koleja šibinena le phravela lese rane ko telo. Palo odova, ćhivena lese ko dumo te akhari jekh stubo, ama ko dumo već isi le phravde rane. O Isus pokušini te akhari odova stubo đi o than ko kova valjani te ovel mudardo. Ama, na nakhlo but, o rimska vojnikija naredinena jekhe manušese te akhari odova stubo (Mat. 27:32). Ked o Isus resela ko than ko kova valjani te ovel mudardo, o rimska vojnikija kovinena olese vasta hem olese pre ko stubo. I težina ando oleso telo phravela o rane kola ćerđe o klinija, kola isi le ko vasta hem ko pre. Olese amala tane tužna, olesi daj rovela, ama o jevrejska starešine marena lese muj (Luka 23:32-38; Jov. 19:25). O Isus nekobor satija trpini bari dukh. Oleso vilo hem olese pluća hine opteretime hem odolese jedva dišini. Ov đanela so aćhilo verno hem hari angleder te merel poslednjo puti molini pe e Jehovase. Palo odova, ov teljari po šero hem merela (Mar. 15:37; Luka 23:46; Jov. 10:17, 18; 19:30). O način sar mulo ćaće hine sporo, dukhavdo hem ponižavajućo.

5. Sose e Isusese o način sar mulo na hine najphari kušnja?

⁵ E Isusese, o način sar mulo na hine najpharo deo andi olesi kušnja. Ov pobuter brininđa pe aso odova sose hine optužimo. Ov hine optužimo so hine hulnik, neko ko na mothovi poštovanje premalo Devel ja oleso anav (Mat. 26:64-66). Čak hem ked razmislinđa odolestar, o Isus hine but uznemirimo hem nadinđa pe so oleso Dad na ka dozvolini te ovel ponizimo ko asavko način (Mat. 26:38, 39, 42). Sose o Jehova dozvolinđa oleso manglo Ćhavo te patini hem te merel? Akana ka dikha trin razlogija.

6. Sose o Isus valjanđa te ovel ćhivdo ko stubo?

⁶ Sar prvo, o Isus hine ćhivdo ko stubo te šaj te oslobodini e Jevrejen ando prokletstvo (Gal. 3:10, 13). On anđe upro peste odova prokletstvo sose obećinđe so ka ićeren pe ko e Devleso zakon, ama na ćerđe odova. Odolese, sar e Adamese grešna potomkija hem narodo kova anđa upro peste o prokletstvo, on valjanđe te meren (Rimlj. 5:12). Ko zakon, kova o Devel dinđa e Izraelconenđe, pisinđa so ako jekh manuš ćerela greh sebepi kova zaslužini te merel, ov valjani te ovel mudardo. Ko disave situacije, o telo bi palo odova valjanđa te ćhivel pe ko stubo * (Pon. zak. 21:22, 23; 27:26). Odolese so hine ćhivdo ko stubo, o Isus phravđa o drumo baš odova narodo kova odbacinđa le, te ovel oslobodimo ando odova prokletstvo.

7. Kova tano o dujto razlog sose o Jehova dozvolinđa oleso Ćhavo te patini?

⁷ Akana ka dikha o dujto razlog sose o Devel dozvolinđa oleso Ćhavo te patini. Ov ađahar sikavđa le sar te ispunini pi budućo  uloga ked ka služini sar Prvosvešteniko. O Isus osetinđa kobor šaj te ovel pharo te šune e Devle ked isi tut but phare kušnje. Olese hine odobor pharo so molinđa pe „bare dukhaja hem asvencar“. Odolese so o Isus osetinđa but bari dukh andral, ov šaj te haljol so valjani amenđe hem „šaj te pomožini amen“ ked „isi amen kušnje“. Amen hijam but zahvalna e Jehovase so ćhivđa jekhe milosrdno Prvosvešteniko kova „šaj te haljol amare slabostija“ (Jevr. 2:17, 18; 4:14-16; 5:7-10).

8. Kova tano o trito razlog sose o Jehova dozvolinđa o Isus te ovel odobor iskušimo?

⁸ O trito razlog sose o Jehova dozvolinđa o Isus odobor te patini hine te bi odgovorini ko jekh važno pućibe: Da li šaj o manuša te aćhon verna e Devlese čak ked tane ko bare kušnje? O Beng phenela so našti! Ov phenela so o manuša služinena e Devlese samo andi korist. Ov verujini, sar so o Adam na aćhilo verno e Devlese, ni avera manuša na ka ćeren odova (Jov 1:9-11; 2:4, 5). Odolese so hine sigurno so o Isus ka aćhol verno, o Jehova dozvolinđa te ovel odobor iskušimo. O Isus aćhilo verno hem mothovđa so o Beng tano hovavno.

9. Kova primer aćhavđa amenđe o apostol Jovan?

⁹ But hrišćanija zorjaćerđe pi vera ked sikljilje andi otkupnina. On nastavinđe te propovedinen, iako hine len protivljenje hem istrajinđe ko razna kušnje kola hine len ko celo olengo životi. Hajde te dikha o primer ando apostol Jovan. Ov verno propovedinđa o ćaćipe ando Isus hem andi otkupnina, verovatno pobuter ando 60 berš. Ked hine le skoro 100 berš, o manuša kola hine ki rimsko vlast mislinđe so o apostol Jovan tano opasno manuš. Odolese ćhivđe le ko phanlipe ko ostrvo Patmos. Kova lošnipe ov ćerđa? Ov vaćerđa „ando Devel hem svedočinđa ando Isus“ (Otkr. 1:9). O apostol Jovan aćhavđa amenđe but šukar primer andi vera hem andi istrajnost!

10. Sar ko e Jovanese knjige dićhola so ov ceninđa i otkupnina?

¹⁰ Ko e biblijake knjige kola o apostol Jovan pisinđa, ov mothovđa kobor manglja e Isuse hem kobor ceninđa olesi žrtva koja ov dinđa. Ko odola knjige, o apostol Jovan prekalo 100 putija vaćeri andi otkupnina hem ando but šukar buća kola isi amen sebepi i otkupnina. Na primer, o Jovan pisinđa: „Ama ako neko hem ćerela greh, ko amaro Dad isi amen pomoćniko – o Isus Hrist, o pravedniko“ (1. Jov. 2:1, 2). Isto ađahar, o Jovan ko pe knjige istakninđa kobor tano važno „te svedočini pe ando Isus“ (Otkr. 19:10). Ćaće dićhola so ov but ceninđa i otkupnina. Sar šaj hem amen te mothova so but ceninaja i otkupnina?

11. So šaj te pomožini amenđe te ova odlučna te na grešina?

¹¹ Ov odlučno te na grešine. Ako ćaće ceninaja i otkupnina, tegani na ka ovel amen akava stav: „Ked hijum ko iskušenje, me na valjani te trudinav man but te na grešinav. Me šaj te ćerav disavo greh hem palo odova ka rodav e Jehovastar te oprostini maje.“ Umesto odova, ked hijam ki kušnja te ćera diso lošno, amen ka phena: „Na! Palo sa odova so o Jehova hem o Isus ćerđe maje, me niked ne bi šaj te ćerav diso ađahar!“ Amen šaj te roda e Jehovastar snaga hem ki molitva te phena lese: „Ma mukh te pera ko iskušenje“ (Mat. 6:13).

12. Sar šaj te primenina o savet andi 1. Jovanova 3:16-18?

 ¹² Mang te phralen hem te phenjen. Ako ćeraja odova, amen mothovaja so ceninaja i otkupnina. Sose? Odolese so o Isus na mulo samo amenđe, nego hem amare phraljenđe hem phenjenđe. Ako ov hine spremno te merel olenđe, odova značini soj tane on but vredno anglo olese jačha. (Čitin 1. Jovanova 3:16-18.) Odoleja sar ponašinaja amen premalo amare phralja hem phenja, amen mothovaja amaro mangipe (Ef. 4:29, 31–5:2). Na primer, amen pomožinaja len ked tane naborme ja ked isi len disavo pharipe, sar soj tane o prirodna katastrofe. Ama, so valjani te ćera ked dijekh phral ja phen ćerela ja vaćeri diso so povredini amen?

13. Sose valjani te oprostina?

¹³ Da li tano tuće podijekh puti pharo te oprostine te phralese ja te phenjaće? (Lev. 19:18). Ako ja, tegani šun akava savet: „Podnosinen jekh jekhe hem ando vilo oprostinen jekh jekhese čak hem ked neko uvredini tumen. Sar so o Jehova ando vilo oprostinđa tumenđe, ađahar ćeren hem tumen“ (Kol. 3:13). Svako puti ked oprostinaja amare phralese ja phenjaće, amen mothovaja amare Dadese so ćaće ceninaja i otkupnina. Sar šaj pana pobuter te mothova so ceninaja akava poklon kova dobinđam ando Devel?

14. Kova tano jekh način sar šaj pana pobuter te mothove so cenineja i otkupnina?

¹⁴ Zahvalin tut e Jehovase asi otkupnina. Jekh phen koja vićini pe Džoana, a isi la 83 berš hem živini ki Indija, phenela: „Mislinava soj tano važno svako dive ko me molitve te spominav i otkupnina hem te zahvalinav man e Jehovase aso odova so ćerđa.“ Ked tu kokri molineja tut, razmislin ando konkretna greške kola ćerđan odova dive hem rode e Jehovastar te oprostini tuće. Ama, naravno ako ćerđan dijekh ozbiljno greh, ka valjani te rode pomoć ando starešine. On ka šunen tut hem ka den tut savet ando e Devleso Lafi. Isto ađahar, ka molinen pe tuvaja hem ka molinen e Jehova te oprostini tuće te šaj palem te ove ko šukar odnos oleja (Jak. 5:14-16).

15. Sose valjani te odvojine vreme te čitine andi otkupnina hem hor te razmisline olatar?

¹⁵ Hor razmislin andi otkupnina. Jekh phen koja vićini pe Radžamani hem isi la 73 berš,  phenela: „Svako puti ked čitinava kobor o Isus patinđa, me jaćha pherđona asva.“ Šaj tano hem tuće pharo ked razmislineja ando odova kobor o Isus patinđa. Ama, so pobuter razmislineja andi žrtva koja o Isus ćerđa, pana pobuter ka barjol to mangipe premalo oleste hem oleso Dad. Ako mangeja pohor te razmisline andi otkupnina, sose ne bi andi odija tema poviše istražineja ko to lično proučibe?

16. Sar šaj te pomožini amen odova so averen sikavaja andi otkupnina? (Dikh i slika ki naslovno strana.)

¹⁶ Sikav averen andi otkupnina. Svako puti ked averenđe vaćeraja andi otkupnina, amaro cenjenje premalo late barjola. Amen isi amen but šukar publikacije hem videa kola pomožinena amen te sikava averen ando odova sose o Isus morandilo te merel amenđe. Na primer, šaj te koristina i štarto lekcija andi brošura Šukar haberi ando Devel. Odija lekcija vićini pe „Koj tano o Isus Hrist“? Ja šaj te mothova o panđto poglavlje andi knjiga So sikavi amen i Biblija? Odova poglavlje vićini pe „O Isus dinđa po đivdipe amenđe“. Isto ađahar, svako berš pana pobuter ceninaja i otkupnina ked đaja ki Spomen-svečanost hem ked daja sa amendar te vićina averen te aven amencar. Kobor bari čast o Jehova mothovđa amenđe so šaj te sikava averen ando oleso Ćhavo!

17. Sose tani i otkupnina o najbaro poklon kova o Devel dinđa e manušenđe?

¹⁷ Amen isi amen but šukar razlogija te razvijina hem te mothova zahvalnost asi otkupnina. Sebepi i otkupnina, amen šaj te ova paše amala e Jehovaja, čak iako hijam nesavršena. Isto ađahar, sa e Bengese delija ka oven uništime (1. Jov. 3:8). Uzo odova, ka ispunini pe e Jehovasi namera e phuvjaja, celo phuv ka ovel raj. Sa o manuša kola ka živinen ka mangen e Jehova hem ka služinen lese. Odolese, hajde svako dive te trudina amen te mothova so hijam zahvalna asi otkupnina – o najbaro poklon kova o Devel dinđa e manušenđe!