1, 2. Σο ισί ο λύτρος, ντα σόσκε τθεράσα-λες ανάγκη;

ΚΑΝΑ ο Αδάμ σο ισινέ τέλειος τζενό αμαρτιντάς, βοβ ντα λέσκε τσσαβέ χασαρντέ ι ευκαιρία σο τθερένας τι τζουβντιόν για πάντα. Νανέ καέκ δικαιολογία ανταλέσκε σο κερντάς ο Αδάμ, σόσκε βοβ τραμπιντάς τι κερέλ-λες. Αλλά σο φταίνενας λέσκε τσσαβέ; Βον ατζέ να μπιάντιλεας κάνα ο Αδάμ αμαρτιντάς. (Ρωμ. 5:​12, 14) Ο Αδάμ αξίνελας τι μερέλ οντουλέσκε σο κερντάς. Αλλά κα κερέλας κάτι ο Ιεχωβά για τι τζουβντιόν για πάντα ο τσσαβέ ι Αδαμίσκε; Βα! Χάνικ σοράν κατά αμαρτία σο κερντάς ο Αδάμ, ο Ιεχωβά αρχισάλο τι μουτθαβέλ σαρ κα σώνελας εκατομμύριε τσσαβέν ι Αδαμίσκε κατά αμαρτία ντα κατά μεριπέ. (Γέν. 3:​15) Κάνα αβιλό ο σαάτι, ο Ιεχωβά μπουτσσαντάς πι Τσσαβές κατά ουρανός για «τι ντελ πι ζωή σαρ λύτρος μπουτέ τζενένγκε».​—Μάρκ. 10:​45· Ιωάν. 6:51.

² Σο ισί ο λύτρος; Κο Χριστιανικές Ελληνικές Γραφές ο λύτρος μανγκέλα τι βακερέλ οντουβά σο ντινάς ο Ιησούς για τι λελ παλάλ οντουβά σο χασαρντάς ο Αδάμ. (1 Κορ. 15:​22) Σόσκε τθεράσα ανάγκη ο λύτρος; Επειδή ο νόμος ι Ιεχωβάσκο βακερέλας ότι έπρεπε τι ντιντιόλ ζωή οντουλέ ζωγιάκε σο χασάρντιλι. (Έξοδ. 21:​23, 24) Ο Αδάμ χασαρντάς πι τέλεια ζωή. Για τι αβέν-πες ο πράγματα δίκαια, αντικάς σαρ μανγκέλας ο Ντεβέλ, ο Ιησούς ντινάς πι τέλεια ζωή. (Ρωμ. 5:​17) Αντικάς, αβιλό «Ντατ για πάντα» σαρέ οντουλένγκε σο τθερένα πίστη κο λύτρος.​—Ησ. 9:6· Ρωμ. 3:​23, 24.

3. Σόσκε ο Ιησούς μανγκέλας τι ντελ πι τέλεια ζωή σαρ βακερένα ο εδάφια Ιωάννης 14:​31 ντα 15:13;

³ Ο Ιησούς ισινέ έτοιμος τι ντελ πι ζωή σόσκε μανγκέλα μπουτ πι Νταντές ντα αμέν. (Διαβάνεν Ιωάννης 14:​31· 15:​13) Ανταγιά αγάπη κερντάς-λες τι ατσσικιαρέλ σαστό πο γκι μέχρι κο μεριπέ ντα τι κερέλ οντουβά σο μανγκέλας λέσκο  Ντατ. Επειδή κερντάς-λες ανταβά, ο σκοπός σο τθερέλας ο Ιεχωβά ι τζενένγκε ντα ι πφουβιάκε κα νικιόλ μπαγιά. Ανταλέ μαθημάστε, κα ντικχάς σόσκε ο Ντεβέλ μουκχλάς τι ταλαιπωρίντιβελ αζόμ μπουτ ο Ιησούς πριν τι μερέλ. Κα ντικχάς επίσης χάνικ λαφίντζαρ ο παράδειγμας σο μουκχλάς εκ συγγραφέας ι Γραφιάκο σο εκτιμίνελας μπουτ ο λύτρος. Κο τέλος, κα ντικχάς σαρ μπορίνασα τι σικαβάς ότι εκτιμίνασα ο λύτρος ντα σαρ μπορίνασα τι μπαριαράς ανταγιά εκτίμηση.

4. Βακερέν σαρ μουλό ο Ιησούς.

⁴ Ανέν τουμαρέ γκοντιάτε σο αβιλό-πες ο τελευταίος ντιβές πριν τι μερέλ ο Ιησούς. Παρόλο σο μπορίνελα τι τθερέλ ι βοήθεια μπουτέ αγγελόνγκι, μουκχέλα ι Ρωμαίε στρατιωτέν τι ασταρέν-λες ντα τι νταπέν-λες. (Ματθ. 26:​52-54· Ιωάν. 18:3· 19:1) Ντένα-λες εκχέ μαστιγιόσαρ ντα πουτρένα λέσκε μπαρέ πληγές. Σοράν, οπράλ λέσκε πλατιάτε σο τθάβντελα ρατ, τσσουβένα εκ πφαρό κας. Ο Ιησούς αρχίνελα τι γκερέλ ο κας κάρινγκ κο τθαν σο κα μουνταρέν-λες, αλλά ατζεχάνικ ο Ρωμαίοι στρατιώτες βακερένα εκχέ γιαβερέ μουρσέσκε τι γκερέλ-λες βοβ. (Ματθ. 27:​32) Κάνα ο Ιησούς ερεσέλα κο τθαν σο κα μερέλ, ο στρατιώτες καρφώνενα λέσκε βαστά ντα λέσκε πιντρέ κο κας. Καζόμ ισί οπράλ κο κας, λέσκο βάρος πουτρέλα πιο μπουτ ο πληγές σο κερντέ λέσκε ο καρφιά. Λέσκε αμαλά ισί μπουτ στεναχωριμέ ντα λέσκι ντάι ροβέλα, αλλά ο Ιουδαίοι αρχηγοί πρασάνα-λες. (Λουκ. 23:​32-38· Ιωάν. 19:​25) Ο Ιησούς ταλαιπωρίντιβελα οπράλ κο κας μπουτ σαάτια. Λέσκι καρδιά ντα λέσκε πνευμόνια ζορίντιβενα, ντα καζόμ νακχέλα ο σαάτι ισί πιο δύσκολος τι λελ ανάσα. Χάνικ πριν τι μερέλ, κερέλα πι τελευταία προσευχή κο Ιεχωβά. Σοράν, κερέλα πο σορό τελέ ντα μερέλα. (Μάρκ. 15:​37· Λουκ. 23:​46· Ιωάν. 10:​17, 18· 19:​30) Βα, ο Ιησούς ταλαιπωρισάλο μπουτ μέχρι τι μερέλ!

5. Καλέ πραγμάσκε στεναχωρισάλο πιο μπουτ ο Ιησούς;

⁵ Ι Ιησούς να στεναχωριντάς-λες αζόμ μπουτ ο τρόπος σο μουνταρντέ-λες. Οντουβά σο στεναχωριντάς-λες πιο μπουτ ισινέ ο λόγος σο μουνταρντέ-λες. Κατηγοριντέ-λες σινανέ ότι να τθερέλας καέκ σεβασμός ι Ντεβλέσκε αλλά ούτε Λέσκε ναβέσκε. (Ματθ. 26:​64-66) Σάντε σο σκεφτίνελας ότι τσσουντέας λέσκε ο βάρετα ανταλέ πραγμάσκε, μανγκλάς πι Νταντέσταρ τι λελ οπρά-λέσταρ ανταγιά λατζ. (Ματθ. 26:​38, 39, 42) Σόσκε μουκχλάς ο Ιεχωβά πι Τσσαβές σο μανγκέλας αζόμ μπουτ τι ταλαιπωρίντιβελ ντα τι μερέλ; Κα ντικχάς τριν λόγους.

6. Σόσκε έπρεπε τι καρφώντιβελ ο Ιησούς κο κας;

⁶ Πρώτον, ο Ιησούς έπρεπε τι καρφώντιβελ κο κας για τι λελ κατά Ιουδαίους εκ αρμάν σο τθερένας. (Γαλ. 3:​10, 13) Οντιά αρμάν τθερένας-λα σόσκε ντινέας πουμαρό λάφι τι ντεν καν κο Νόμος κι Ντεβλέσκο αλλά βον να ντινέ καν. Οτθάρ, να τθερένας οπρά-πουμέντε σάντε ι αμαρτία σο μουκχλάς ο Αδάμ, αλλά ανταγιά αρμάν-ντα. (Ρωμ. 5:​12) Ο Νόμος σο ντινάς ο Ντεβέλ κο Ισραήλ βακερέλας ότι, άμα εκ τζενό κα κερέλας εκ μπαρί αμαρτία, έπρεπε τι μερέλ. Σοράν, ι μουλές μπορίνενας άμα μανγκένας τι καρφώνεν-λες κο κας. * (Δευτ. 21:​22, 23· 27:​26) Επειδή ι Ιησούς καρφωντέ-λες κο κας, ο Ιουδαίοι ισινέ ελεύθεροι κατά αρμάν σο τθερένας οπρά-πουμέντε ντα αντικάς λέσκι θυσία βοηθιντάς-λεν παρόλο σο βον να σικαντέ πίστη λέστε.

7. Καβά ισί ο δεύτερος λόγος σο μουκχλάς ο Ντεβέλ πι Τσσαβές τι ταλαιπωρίντιβελ;

 ⁷ Ο δεύτερος λόγος σο μουκχλάς ο Ντεβέλ πι Τσσαβές τι ταλαιπωρίντιβελ αζόμ μπουτ ισινέ ότι σικλιαρέλας-λες τι αβέλ αμαρό Αρχιερέας. Ο Ιησούς αγαντάς καζόμ δύσκολος ισί τι ντελ καν εκ τζενό κο Ντεβέλ καζόμ τθερέλα μπαρέ δοκιμασίες. Τσσιντιντάς μπουτ, οτθάρ κερντάς προσευχή «βικόσαρ ντα ροϊμάσαρ» για τι μανγκέλ βοήθεια. Επειδή ο Ιησούς νακχλάς-λεν σαρέ ανταλά, αγαβέλα-αμέν ντα “μπορίνελα τι βοηθίνελ-αμέν κάνα νακχάσα δοκιμασίες”. Καζόμ μπαρί εκτίμηση τθεράσα ι Ιεχωβάσκε σο τσσουντάς εκχέ Αρχιερεάς σο μπορίνελα τι σικαβέλ έλεος ντα τι “αγαβέλ αμαρέ αδυναμίες”!​—Εβρ. 2:​17, 18· 4:​14-16· 5:​7-10.

8. Καβά ισί εκ τρίτος λόγος σο μουκχλάς ο Ντεβέλ ι Ιησούς τι νακχέλ αζόμ μπαρέ δοκιμασίες;

⁸ Τρίτον, ο Ιεχωβά μουκχλάς ι Ιησούς τι ταλαιπωρίντιβελ αζόμ μπουτ για τι ντιντιόλ απάντηση ακαλέ σημαντικέ ερωτησιάτε: Μπορίνενα ο τζενέ τι ατσσόν πιστοί κο Ιεχωβά ατζέ-ντα άμα νακχένα εκ μπαρί δοκιμασία; Ο Μπενγκ βακερέλα όχι! Βακερέλα ότι ο τζενέ υπηρετίνενα ι Ντεβλές σάντε για τι λεν κάτι παλάλ. Πακιάλα ότι, σαρ Αδάμ, βον-ντα νανέ αφοσιωμέ κο Ιεχωβά. (Ιώβ 1:​9-11· 2:4, 5) Επειδή ο Ιεχωβά ισινέ σίγουρος ότι ο Ιησούς κα ατσσόλας πιστός, μουκχλάς-λες τι νακχέλ ο πιο μπαρέ δοκιμασίες σο κα μπορίνελας τι νακχέλ εκ τζενό. Ο Ιησούς ατσσικιαρντάς σαστό πο γκι κο Ντεβέλ ντα σικαντάς ότι ο Μπενγκ ισί ψεύτης.

9. Σο παράδειγμας μουκχλάς αμένγκε ο απόστολος Ιωάννης;

⁹ Μπουτ Χριστιανοί τθερένας μπουτ μπαρί πίστη κο λύτρος. Οτθάρ, να τσσιναντέ τι κερέν έργος παρόλο σο τζάνας λέντζαρ κόντρα ντα τθερένας σαβέ τι μανγκές δοκιμασίες σαρί πουμαρί ζωή. Σκεφτίνεν για παράδειγμας ι απόστολε Ιωαννής. Βακερέλας πιστά ι αλήθεια ι Χριστόσκε ντα ι λυτρόσκε, μάλλον 60 ντα πιο μπουτ μπρεσά. Κάνα ισινέ περίπου 100 μπρεσένγκο, η Ρωμαϊκή Αυτοκρατορία πακιάλας ότι ισινέ επικίνδυνος ντα τσσουντέ-λες φυλακή κι Πάτμος. Σο λάθος κερντάας; “Κερέλας λάφι ι Ντεβλέσκε ντα ντέλας μαρτυρία ι Ιησούσκε”. (Αποκ. 1:9) Σο λατσσό παράδειγμας τζενέσκο σο σικαβέλας πίστη ντα τθερέλας υπομονή!

10. Σαρ σικαβένα ο βιβλία σο γραφιντάς ο Ιωάννης ότι εκτιμίνελας ο λύτρος;

¹⁰ Κο βιβλία κι Γραφιάκε σο γραφιντάς, ο Ιωάννης βακερέλα καζόμ μπουτ μανγκέλας ι Ιησούς ντα καζόμ μπουτ εκτιμίνελας ο λύτρος. Κερέλα λάφι πιο μπουτ από 100 φορές ι λυτρόσκε ή ι λατσσέ πραγματένγκε σο κα ανέλ αμένγκε. Για παράδειγμας, ο Ιωάννης γραφιντάς: «Άμα κάποιος αμαρτιντάς, τθεράσα βοηθός σο ισί μαζί ι Νταντέσαρ, ι Ιησού Χριστός σο ισί δίκαιος». (1 Ιωάν. 2:1, 2) Επίσης, ο Ιωάννης γραφιντάς καζόμ σημαντικός ισί τι “κεράς λάφι ι Ιησούσκε”. (Αποκ. 19:​10) Σίγουρα, ο Ιωάννης εκτιμίνελας μπουτ ο λύτρος. Σαρ μπορίνασα τι σικαβάς ότι εκτιμίνασα-λες αμέν-ντα;

11. Σο κα βοηθίνελ-αμέν τι τζας κόντρα κο πειρασμός;

¹¹ Τι τζαν κόντρα κο πειρασμός τι αμαρτίνεν. Άμα εκτιμίνασα μπαγιά ο λύτρος, να κα βακεράς: “Να χρειαζίντιβελα τι προσπαθίναβ αζόμ μπουτ κάνα αβέλα μάνγκε εκ πειρασμός. Μπορίναβα τι κεράβ εκ αμαρτία ντα σοράν τι μανγκάβ κατά Ντεβέλ τι συγχωρίνελ-μαν”. Οκιά μπάνταρ, κάνα αβέλα αμένγκε ο πειρασμός τι κεράς εκ λάθος, κα βακεράς: “Όχι! Ο Ιεχωβά ντα ο Ιησούς κερντέ μπουτ πράγματα μάνγκε, σαρ κα μπορίναβας τι κεράβ κάτι ασακό;” Κα μολίνας ι Ιεχωβάς τι ντελ-αμέν ζορ ντα κα  βακεράς λέσκε: “Βοήθινε-μαν μα τι περάβ κο πειρασμός”.​—Ματθ. 6:13.

12. Σαρ μπορίνασα τι κεράς ι συμβουλή σο ισί κο εδάφια 1 Ιωάννη 3:​16-18;

¹² Τι μανγκέν ι πφραλέν ντα ι πφενίν. Κάνα μανγκάσα ι πφραλέν ντα ι πφενίν, σικαβάσα ότι εκτιμίνασα ο λύτρος-ντα. Σόσκε; Επειδή ο Ιησούς ντινάς πι ζωή, όχι σάντε αμένγκε, αλλά εμ αμαρέ πφραλένγκε ντα πφενίνγκε. Αφού ο Ιησούς ισινέ έτοιμος τι μερέλ λένγκε, σίγουρα τθερένα λέσκε αξία. (Διαβάνεν 1 Ιωάννη 3:​16-18) Σικαβάσα αμαρί αγάπη ι πφραλένγκε ντα ι πφενίνγκε οντουλέντζαρ σο κεράσα λένγκε. (Εφεσ. 4:​29, 31–5:2) Για παράδειγμας, βοηθίνασα-λεν κάνα ισί νασφαλέ ή κάνα νακχένα μπαρέ δοκιμασίες, σαρ ισί ο φυσικές καταστροφές. Αλλά σο πρέπει τι κεράς κάνα εκ πφραλ ή εκ πφεν κερέλα ή βακερέλα κάτι σο προσβαλίνελα-αμέν;

13. Σόσκε πρέπει τι συγχωρίνας;

¹³ Μήπως μπάζιμα ατσσικιαρένα χολί; (Λευιτ. 19:​18) Άμα βα, κερέν ακαγιά συμβουλή: «Τι νταϊντίνεν ο εκ ι γιαβερές ντα τι συγχωρίνεν ο εκ ι γιαβερές αντράλ τουμαρέ γκίσταρ, ατζέ-ντα άμα εκ τζενό τθερέλα παράπονος εκχέ γιαβερέσταρ. Σαρ ο Ιεχωβά συγχωριντάς-τουμέν αντράλ πι γκίσταρ, αντικάς τι κερέν τουμέν-ντα». (Κολ. 3:​13) Κάθε φαρ σο συγχωρίνασα αμαρέ πφραλές ή αμαρέ πφενιά, σικαβάσα κο Ιεχωβά ότι εκτιμίνασα μπαγιά ο λύτρος. Σαρ μπορίνασα τι μπαριαράς ανταγιά εκτίμηση ανταλέ δωρόσκε σο κερντάς αμένγκε ο Ντεβέλ;

14. Καβά ισί εκ τρόπος σο μπορίνασα τι μπαριαράς αμαρί εκτίμηση ι λυτρόσκε;

¹⁴ Τι βακερέν ευχαριστώ κο Ιεχωβά σο ντινάς ο λύτρος. Η Τζοάνα, εκ πφεν σο ισί 83 μπρεσένγκι ντα τζουβντιόλα κι Ινδία, βακερέλα: «Πακιάβα ότι ισί μπουτ σημαντικός κάθε ντιβές μι προσευχιέντε τι βακεράβ ευχαριστώ κο Ιεχωβά σο ντινάς ο λύτρος». Κο προσευχές σο κερένα κορκορέ, τι βακερέν κο Ιεχωβά ο λάθη σο κερντέν αντρέ κο ντιβές ντα τι μανγκέν λέσταρ τι συγχωρίνελ-τουμέν. Άμα όμως κα κερέν εκ μπαρί αμαρτία, πρέπει τι μανγκέν βοήθεια κατά πρεσβύτεροι-ντα. Βον κα ασουνέν-τουμέν ντα κα ντεν-τουμέν μανγκιμάσαρ συμβουλή κατά Λάφι ι Ντεβλέσκο. Κα κερέν προσευχή τουμέντζαρ ντα κα μανγκέν κατά Ιεχωβά τι συγχωρίνελ-τουμέν για τι αβέν πάλι λατσσέ αμαλά λέσαρ.​—Ιακ. 5:​14-16.

15. Σόσκε πρέπει τι ντας αμαρέ σαατίσταρ για τι σκεφτίνας πιο λατσσές ο λύτρος ντα τι διαβάνας πράγματα σο τθερένα τι κερέν ανταλέσαρ;

 ¹⁵ Τι σκεφτίνεν λατσσές ο λύτρος. Η Ράτζαμανι, εκ πφεν 73 μπρεσένγκι, βακερέλα: «Κάνα διαβάναβα οντουλένγκε σο νακχλάς ο Ιησούς, μο γιακχά πφερντιόνα δάκρυα». Μπορεί τουμέν-ντα τι νιωθίνενα αντικάς κάνα σκεφτίνενα καζόμ μπουτ ταλαιπωρισάλο ο Τσσαβό ι Ντεβλέσκο. Αλλά καζόμ πιο μπουτ σκεφτίνενα ι θυσία σο κερντάς ο Ιησούς, αζόμ πιο μπουτ κα μανγκέν λες ντα λέσκε Νταντές. Οντουβά σο κα βοηθίνελ-τουμέν τι σκεφτίνεν λατσσές ο λύτρος ισί τι ντεν τουμαρέ σαατίσταρ για τι διαβάνεν πιο μπουτ πράγματα σο τθερένα τι κερέν ανταλέσαρ.

16. Σαρ βοηθίντιβασα κάνα σικλιαράσα κο γιαβερά ο λύτρος; (Ντικχέν ι φωτογραφία κι ανγκλαϊνί σελίδα)

¹⁶ Τι σικλιαρέν κο γιαβερά ο λύτρος. Κάθε φαρ σο βακεράσα κο γιαβερά ι λυτρόσκε, μπαριόλα αμαρί εκτίμηση. Τθεράσα μπουτ λατσσέ έντυπα ντα βίντεα σο βοηθίνενα-αμέν τι σικλιαράς ι γιαβερέν σόσκε έπρεπε τι μερέλ ο Ιησούς αμένγκε. Για παράδειγμας, μπορίνασα τι σικαβάς λένγκε ο μάθημας 4 κατά βιβλιάριος Ο Λατσσέ Αμπέρια ι Ντεβλέσκε! σο τθερέλα ο θέμας «Κον Ισί ο Ιησούς Χριστός;» Ή κα μπορίναας τι σικαβάς λένγκε ο κεφάλαιος 5 κατά βιβλίος Σο Μπορίνελα τι Σικλιαρέλ-αμέν η Αγία Γραφή; σο τθερέλα ο θέμας «Ο Λύτρος​—Ο Πιο Μπαρό Δώρος ι Ντεβλέσκο». Ντα κάθε μπρες μπαριαράσα αμαρί εκτίμηση ι λυτρόσκε κάνα τζάσα κι Ανάμνηση για τι ντας-αμέν γκοντί ο μεριπέ ι Ιησούσκο, ντα κάνα καλίνασα γιαβερέν-ντα τι αβέν αμέντζαρ. Σο μπαρό προνόμιος ντινάς-αμέν ο Ιεχωβά τι σικλιαράς γιαβερέν λέσκε Τσσαβέσκε!

17. Σόσκε ισί ο λύτρος ο πιο μπαρό δώρος σο κερντάς ο Ντεβέλ ι τζενένγκε;

¹⁷ Σίγουρα, υπαρχίντιβενα μπουτ λόγοι για τι τθεράς ντα τι μπαριαράς αμαρί εκτίμηση ι λυτρόσκε. Χάρη κο λύτρος, μπορίνασα τι αβάς λατσσέ αμαλά ι Ιεχωβάσαρ παρόλο σο ισινάμ ατελείς. Χάρη κο λύτρος, κα αβέν καταστροφή σαρέ ο μπέτι πράγματα σο κερέλα ο Μπενγκ. (1 Ιωάν. 3:8) Χάρη κο λύτρος, κα νικιόλ μπαγιά ο σκοπός σο τθερέλας ο Ιεχωβά ι πφουβιάκε. Σαρί η πφουβ κα αβέλ παράδεισος. Κας-ντα τι ντικχέν κα μανγκέλ ι Ιεχωβάς ντα κα υπηρετίνελ-λες. Οτθάρ, τι αρακχάς κάθε ντιβές τρόπους για τι σικαβάς αμαρί εκτίμηση ι λυτρόσκε σο ισί ο πιο μπαρό δώρος σο κερντάς ο Ντεβέλ ι τζενένγκε!