1-2. Engombôlo byo bici, na bulya gurhi rhuba rhuyilagirireko?

ERHI Adamu mulume mwimana ajira ecaha, aheza obulyo bw’okulama ensiku n’amango, ciru n’abana bage barhakacibire nabo. Adamu arhakababalirwe kw’ebyo ajiraga. Yene wacishogaga okujira eco caha. Cikoki gurhi byakaberire abana bage? Barhaliho erhi Adamu ajira ecaha. (Rm. 5:12, 14) Ka hali ebyakacijijirwe lyo abo bana barhenga mw’obo buhane b’olufû bwalerhagwa n’eco caha ca bashakuluza wabo? Neci! Kasanzi kasungunu enyuma za Adamu okujira ecaha, Yehova arhôla emihigo okubiyerekire oku emiliyoni y’iburha lya Adamu yakarhenzibwemwo omu bujà bw’ecaha n’olufû. (Murh. 3:15) Omu kasanzi kashinganine, Yehova akarhumire Omugala kurhenga empingu mpu ‘ahâne obuzine bwage lyo acungula banji.’​—Mk. 10:45; Yn. 6:51.

² Engombôlo byo bici? Amandiko g’Ecigriki g’Ecikristu gayerekine oku engombôlo lir’ibeyi Yezu ahânaga ly’alipa ebi Adamu ahezagya. (1 Kr. 15:22) Bulya gurhi rhuba rhulagirire oku ngombôlo? Bulya amakanuni ga Yehova gw’obushinganyanya nk’oku ganayerekinwe omu Irhegeko, galihunyîre oku obuzine bushinganine bulipire obundi. (Lub. 21:23, 24) Adamu ahezize obuzine bwage bwimana. Ly’obushinganyanya bwa Nnamahanga buhikirizibwa, Yezu ahâna obuzine bwage nterekêro. (Rm. 5:17) Muli ntyo, Yezu ahikira okuba “Larha w’ensiku n’amango” kwa balya boshi bajira obuyemere omu ngombôlo.​—Iz. 9:6, Mashi Bible; Rm. 3:23, 24.

3. Nk’oku binayerekinwe omu Yowane 14:31 na 15:13, bici byashumyagya Yezu ahâne obuzine bwage bwimana nterekêro?

³ Obuzigire bwa Yezu kuli Ishe w’empingu, na kuli rhwê, bo bwamushumyagya ahâne obuzine bwage nterekêro. (Osome Yowane 14:31; 15:13.) Obwo buzigire bwa Yezu bwamurhabala ahiga okugendekera abêra mwishwekerezi kuhika ebuzinda  n’okuhikiriza obulonza bw’Ishe. Yezu ajijire ntyo omu kubêra mwishwekerezi kuhika okufâ kwage. Enyanya z’ebi Yezu ajiraga, omuhigo gwa Yehova gw’aha murhondero kuyerekera bene bantu n’igulu, gwayish’ihikirizibwa. Mw’eci cigabi, rhwaganirira bulya gurhi Yehova alekaga Yezu alibuzibwe bwenene embere afê. Na kandi, rhwaganirira kwa bofofi olwiganyo lwa mwandisi muguma w’Ebibliya wayerekine oku ashagalukire engombôlo. Na buzinda rhwaganirira gurhi rhwakayerekanamwo oku rhuvuzire omunkwa okubiyerekire engombôlo n’oku rhwakayushûla obushagaluke bwirhu okubiyerekire enterekêro Yehova na Yezu barhuhîre.

4. Oganirire gurhi Yezu afâgamwo.

⁴ Orhanye gurhi olusiku luzinda lw’akalamo ka Yezu hanw’igulu lwaliyosire. Ciru akaba agwerhe obuhashe bw’okuhamagala ecigusho ca bamalahika lyo bamulanga, ayemera abasoda b’e Roma bamugwarhe banamushurhagule. (Mt. 26:52-54; Yn. 18:3; 19:1) Amataraki bakag’ikolesa lyo bamushurha, gakagiyomola eminyafu oku mubiri gwage. Enyuma z’aho bamuhesa omurhi muzirho bwenene oku mugongo gwakagidw’omuko. Yezu arhondera abulula ogo murhi ly’aguheka emunda bajimumanikira, cikone erhi bali omu njira barhimana muntu muguma, bamuseza oku arhwaze Yezu kw’ogo murhi. (Mt. 27:32) Erhi Yezu ahika aho bamunigiraga, abashombanyi bage bamukomerha emisumari omu maboko n’omu magulu. Obuzirho b’omubiri gwa Yezu bwarhuma halya bakomerherhaga emisumari haja ebihulu. Abîra ba Yezu na nnina balaka bwenene, abarhegesi b’Abayahudi bohe bakamushekera. (Lk. 23:32-38; Yn. 19:25) Yezu alibuzibwa nsa nyinji. Omurhima gwage n’amahaha gage, birhacikag’ikola bwinja n’oku kwarhuma arhaciyisa bwinja. Embere afê ajira isala lizinda ly’okubona ahimire byoshi. Ayinamya irhwê lyage, na ntyo ahâna obuzine bwage. (Mk. 15:37; Lk. 23:46; Yn. 10:17, 18; 19:30) Yezu afâ bunyi-bunyi, omu njira y’amalumwa na yakugayaguzibwa!

5. Bici byaligayisize Yezu bwenene kulusha oku afâgamwo?

⁵ Yezu arhabonaga nk’oku anigagwa ko kwalimugayisize bwenene. Aciyumvirhe kubi bwenene okubiyerekire ebi bamushobekaga byarhumaga anigwa. Bamushobekaga mpu ali ojacira Nnamahanga: mpu arhakagikenga Nnamahanga ciru n’izino lyage. (Mt. 26:64-66) Ebyo bamushobekaga byakagimuluma bwenene oku murhima na ntyo alangalira oku Ishe arhaleke bamugayaguze mw’eyo njra. (Mt. 26:38, 39, 42) Bici byarhumaga Yehova alekerera Omugala muzigirwa alibuzibwe n’okufâ? Rhuganirire birhumire bisharhu.

6. Bici byarhumaga Yezu amanikwa oku murhi gw’amalibuko?

⁶ Burhangiriza, Yezu amanikwa oku murhi ly’akûla Abayahudi omu buheherere bwago-bwago balimo. (Gl. 3:10, 13) Baliyemire oku barhumikira Amarhegeko ga Nnamahanga, cikone barhagarhumikiraga ciru n’ehitya. Erhi baleka okugarhumikira, ecaha bayimaga kurhenga emwa Adamu cayushulwakwo obuheherere. (Rm. 5:12) Irhegeko Nnamahanga ahâga Israheli, lyaliyerekine oku omuntu wakaba anajijire cirya caha cakarhumire bamutwira okufâ, alishinganine anigwe. Buzinda omurhumba gwage gwalishinganine okumanikwa oku murhi. * (Lush. 21:22, 23; 27:26) Erhi Yezu amanikwa oku murhi, byahashikana kuli el’ishanja lyamulahiraga nalyo liyunguke n’engombôlo ahânaga.

7. Kantu kahi ka kabirhi karhumaga Nnamahanga aleka Omugala alibuke?

 ⁷ Rhuganirire akantu ka kabirhi karhumaga Nnamahanga aleka Omugala alibûke. Akagikomereza Yezu oku mukolo gw’okuba Mudahwa Mukulu akahabirwe enyuma z’aho. Yezu abwine kunganaci biba bizibu okurhumikira Nnamahanga amango omuntu ali omu malibuko. Amalumwa ageragamwo gamushumya ohune oburhabale “omu kuyama bwenene n’omu kurhoza emirenge.” Kobinali amazibu n’amalumwa Yezu ageziremo, garhumire ahugûkwa bwinja amalagirire girhu, ‘anahash’irhurhabala,’ amango rhuli “omu malibuko.” Rhuvuzire Yehova omunkwa bwenene okubona acishozire oyo Mudahwa Mukulu ‘wakarhuyumviza olukogo lw’obuzamba bwirhu!’​—Hb. 2:17, 18; 4:14-16; 5:7-10.

8. Kantu kahi ka kasharhu karhumaga Yehova aleka Omugala alibuka?

⁸ Bwakasharhu, Yehova alekaga Omugala alibuke ntyo, ly’ashuza okw’idoso ly’obulagirire: Ka byanahashikana omuntu abêre mwishwekerezi kuli Nnamahanga ciru akaba ali omu marhangulo? Shetani yehe alahire! Adesire oku bene bantu banakolere Nnamahanga bulya abahire ecituliro. Ananaba ayemire oku aka shakuluza wabo Adamu, nabo barhakabêra bishwekerezi kuli Yehova. (Ayu. 1:9-11; 2:4, 5) Omu kulangalira obwishwekerezi bw’Omugala kuli ye, Yehova ayemera Yezu arhangulwe analibuke kulusha oku mwene muntu akalembera. Yezu abêra mwishwekerezi ciru akaba ago marhangulo na ntyo ayerekana oku Shetani ali munywesi.

9. Lwiganyo luhi entumwa Yowane erhulekire?

⁹ Obuyemere bwa Bakristu banji bunakasêra enyanya z’enyigirizo lugenda engombôlo. Banagenderere okujira omukolo gw’amahubiri ciru akaba bali bahagalikwa, banalembere amazibu ga ngasi lubero gabahikira omu kalamo kabo koshi. Rhuganirire olwiganyo lw’entumwa Yowane. Ayusize nkaba myaka kulusha 60 ali ayaliza okuli lugenda Yezu n’engombôlo. Erhi agwerhe hofi myaka 100, bamushobeka oku ali ahira akavulindi omu Burhegesi bw’e Roma, n’oko kwarhuma bamuhira omu mpamikwa oku cirhwa c’e Patmosi. Bici byarhumaga bamuhira omu mpamikwa? Bulya akagiderha “oluderho lwa Nyamuzinda n’obuhamirize bwa Yezu.” (Maf. 1:9) Olwo luli lwiganyo lwinja lw’obuyemere n’okulembera!

10. Gurhi amandiko gayandikagwa na Yowane gayerekinemwo oku alishagalukire engombôlo?

¹⁰ Kugerera amandiko Yowane ayandikaga galongozibagwa n’iroho litagatifu, ayerekine oku alizigire Yezu n’oku alishagalukire engombôlo bwenene. Omu mandiko gage, aderhire kulusha kali 100 engombôlo erhi obunguke engombôlo yakarhuha. Kwa lwiganyo, Yowane ayandisire ntya: “Erhi hankajira owahirima omu caha, rhugwerhe omulagizi emwa Larha, ye mushinganyanya Yezu Kristu.” (1 Yn. 2:1, 2, NWT) Kandi amandiko Yowane ayandikaga gaganirire obulagirire bw’okuhâna “obuhamirizi bwa Yezu.” (Maf. 19:10) Bibonekine bwinja oku Yowane ashagalukire engombôlo. Gurhi nirhu rhwakayerekanamwo oku rhushagalukire engombôlo?

11. Bici byakarhurhabala rhuhagalike amashumi gw’okujira ecaha?

¹¹ Ohagalike amashumi gw’okujira ecaha. Erhi akaba rhuba rhushagalukire engombôlo, rhurhakakarhanya ntya: ‘Kurhali kwa bulagirire nkacihangana bwenene ly’ompagalika amashumi gw’okujira ecaha, bulya ciru nakacijira naciyunjuza co.’ Lubero n’oko, amango rhwamashumikwa okujira ecaha, rhushinganine  rhuderhe ntya: ‘Nanga! Gurhi nakajira aka kantu kabi n’obo Yehova na Yezu banjirire bintu binji?’ Mw’ako kanga, rhushinganine rhuhûne Yehova emisi omu kumushenga ntya: ‘Orhandekaga nje omu marhashumi.’​—Mt. 6:13.

12. Gurhi rhwakakolesamwo ihano liri omu 1 Yowane 3:16-18?

¹² Ozigire bene winyu na bali binyu. Erhi rhuzigira bene wirhu na bali birhu, rhunayerekane oku rhushagalukire engombôlo. Bulya gurhi? Bulya Yezu arhahânaga obuzine bwage kuli rhwê rhwêne cikone ajijire ntyo kuli bene wirhu na bali birhu nabo. Bulya Yezu arharhindiraga okubafîra, oko kuyerekine n’obwalagale oku anababone oku bali ba bulagirire. (Osome 1 Yowane 3:16-18.) Ebi rhujirira bene wirhu na bali birhu, byo biyerekana oku rhuba rhubazigire. (Ef. 4:29, 31–5:2) Kwa lwiganyo, rhunabarhabale amango balwazire, amango bali omu mazibu, kwa lwiganyo amango bahikirwe n’obuhanya. Gurhi rhushinganine rhujire erhi owirhu Mukristu akaderha erhi arhujirire kantu kalebe kakarhugayisa?

13. Bulya gurhi kuli kwa bulagirire rhukababalirana?

¹³ K’ojira enkomedu y’okubikira abinyu Bakristo akarhinda? (Lev. 19:18) Erhi akaba ntyo, er’ihano lyanakurhabala: ‘Mukalemberana munababalirane akaba hali owagayisize owabo. Nyakasane [Yehova, NWT] ammubabalire: mumuyankirekwo olwiganyo.’ (Kl. 3:13) Ngasi mango erhi rhubabalira bene wirhu na bali birhu, rhunayereke Larha wirhu w’omu mpingu oku kobinali rhushagalukire engombôlo. Gurhi rhwakagendekera rhwayushûla obushagaluke bwirhu okubiyerekire olo luhembo Nnamahanga arhuhîre?

14. Njira nguma ehi rhwakayushulamw’obushagaluke bwirhu okubiyerekire engombôlo?

¹⁴ Ovuge Yehova omunkwa enyanya z’engombôlo. Mwali wirhu Joanna ogwerhe myaka 83 olama e Inde adesire ntya: “Ntanyize oku kuli kwa bulagirire nkahira engombôlo omu masala gani ga ngasi lusiku, n’okuvuga Yehova omunkwa lugenda engombôlo.” Amango oli wasalira wene, okarhanya oku magosa wajijire omu mulegerege goshi n’okuhûna Yehova obonjo kuli go. Cikoki erhi akaba wajijire ecaha cizibu, byanahûna olonze oburhabale bw’abagula. Banakuyumvirhiza n’okukuha amahano gw’obuzigire garhenga omu Kanwa ka Nnamahanga. Banasalira haguma na nawe, n’okuhûna Yehova akolese enterekêro Yezu ahânaga ly’ohikira aha ‘wafuma [kiroho].’​—Yk. 5:14-16.

15. Bulya gurhi kuli kwa bulagirire okuciha akasanzi kw’okusoma n’okurhanya oku emyanzi eyerekire engombôlo?

¹⁵ Okarhanya oku ngombôlo. Mwali wirhu  Rajamani ogwerhe myaka 73, adesire ntya: “Erhi nsoma emyanzi eyerekire amalibuko Yezu ageziremo, emirenge enantenge omu masu.” Hali amango nawe wakaciyumva kubi amango oli warhanya oku mazibu Mwene Nyamuzinda ageziremo. Cikone, erhi wakagendekera warhanya oku nterekêro Yezu ahânaga, wanazigira Yezu bwenene ciru n’Ishe. Ocihirireho omuhigo gw’okurhanya oku ngombôlo Yezu ahanaga amango g’ifunzo lyawe ly’Ebibliya.

16. Bunguke buci rhuba nabo erhi rhuyigiriza abandi okubiyerekire engombôlo? (Olole enfoto eri oku cijalada c’eyi gazeti.)

¹⁶ Oyigirize abandi okubiyerekire engombôlo. Ngasi mango erhi rhuganirira abandi okubiyerekire engombôlo, rhunayishagalukire bwenene kulusha. Rhugwerhe bikolanwa binji byakarhurhabala rhuyigirize abandi bamanye bici byarhumaga Yezu arhufîra. Kwa lwiganyo, rhwanakolesa isomo lya 4 ly’ebroshire Omwanzi mwinja kurhenga emwa Nnamahanga! Er’isomo liba lidesire ntya: “Yezu Kristu ye Ndi?” Erhi kandi rhwanalonza amahûgulo omu cigabi ca 5 c’ecitabu Bici Ebibliya erhuyigiriza? Eco cigabi ciba cidesire “Engombôlo: Luhembo lwinja lwa Nnamahanga.” Na ngasi mwaka rhunayushule obushagaluke bwirhu lugenda engombôlo, omu kuja oku lusiku lw’Okukengera olufû lwa Yezu n’okulalika abandi nabo balujeko. Luli lukengwa lunene Yehova arhuhîre l’okuyigiriza abandi okubiyerekire Omugala!

17. Bulya gurhi engombôlo lwo luhembo lwinja Nnamahanga ahîre bene bantu?

¹⁷ Kobinali, rhugwerhe ecirhumire cinja c’okugendekera rhwashagalukira engombôlo. Kugerera engombôlo, rhwanaba n’obwîra bwa hofi-hofi haguma na Yehova ciru akaba rhurhali bimana. Kandi kugerera engombôlo, emikolo yoshi ya Ibilisi yayishihererekezibwa. (1 Yn. 3:8) Na kandi kugerera engombôlo, omuhigo Nnamahanga agwerhe aha murhondero okubiyerekire igulu gwayishihikirizibwa. Igulu lyoshi lyayish’iba paradizo. Muli ago mango abantu boshi bayish’izigira Yehova n’okumukolera. Rhucihangane rhugendekere rhwalola omu njira nci rhwakayerekanamwo ngasi lusiku oku rhushagalukire engombôlo: luhembo lwinja Nnamahanga ahîre bene bantu boshi!