1-2. Andi da di lusupaima, nöö faandi mbei u bi abi ën fanöudu?

ADAM an bi abi zöndu, ma di a pasa Gadu buka, hën a mbei hën ku dee bakamii fëën tuu lasi di okasi di de bi abi u libi u teego. Ku hënseei kë Adam pasa Gadu buka. Ma unfa a dë ku dee bakamii fëën? De de an du na wan soni (Lom. 5:12, 14). Adam bi du zöndu, nöö fëën mbei a bi musu dëdë. Ma Jehovah bi o sa du wan soni sö taa de bakamii fëën bi o sa libi u teego u? Wë aai! Kölö sö baka di Adam du zöndu, hën Jehovah bigi tja ko a limbo pikipiki unfa a bi o puu milionmilion bakamii u Adam a zöndu ku dëdë basu (Ken. 3:15). Te di juu u Jehovah dou, nöö a bi o manda di Womi Mii fëën ko a goonliba aki, faa ’paka hën libi kuma paima fu sömëni hia sëmbë sa ko bunu ku Gadu’.​—Maik. 10:45; Joh. 6:51.

² Andi da di lusupaima? Te di Giiki pisi u Bëibel ta taki u di lusupaima, nöö a ta taki u di paima di Jesosi paka, u toona bai dee soni dee Adam bi lasi (1 Kol. 15:22). Faandi mbei u bi abi di lusupaima fanöudu? U di di wëti di Jehovah bi da dee Isaëli sëmbë, bi dë taa ee wan sëmbë bi kii wan wotowan, nöö de bi musu toona kii ën baka. Di soni aki ta lei u taa Jehovah ta du soni a wan leti fasi (Ëki. 21:23, 24). Adam bi ko dë wan zöndu libisëmbë. Fëën mbei Jesosi bi musu ko dëdë a goonliba aki kuma wan sëmbë di an abi zöndu, u soni sa pasa a wan leti fasi kumafa Jehovah kë (Lom. 5:17). Jesosi ko dë di „Teego Tata”, da hii sëmbë di ta biibi taa a ko dëdë paka di lusupaima da u.​—Jes. 9:6; Lom. 3:23, 24.

3. Faandi mbei Jesosi bi dë kabakaba u dëdë da libisëmbë, te u luku di soni di sikifi a Johanisi 14:31 ku Johanisi 15:13?

 ³ Jesosi bi dë kabakaba u dëdë paka zöndu da u, u di a bi lobi hën Tata, söseei u di a bi lobi u. (Lesi Johanisi 14:31; 15:13.) Di lobi aki mbei Jesosi bi dë kabakaba u du hii soni di hën Tata bi piki ën faa du. Jesosi bi du di soni aki u di a bi hoi hënseei u te a dëdë. Di soni dë mbei Jehovah bi sa du hii soni di a bi abi a pakisei faa du da libisëmbë ku di goonliba aki tuu. A di woto aki woo taki faandi mbei Jehovah bi da pasi taa Jesosi bi tja sitaafu u te a dëdë, söseei woo taki kölö sö u wan sikifima u Bëibel di bi lei taa a bi ta tei di lusupaima u bigi. Baka di dë, woo luku unfa u sa ta möön tei di soni di Jehovah ku Jesosi du da u u bigi.

4. Konda unfa de kii Jesosi.

⁴ Pakisei unfa soni bi o sa dë da Jesosi a di lasiti daka di a bi dë a goonliba aki. A bi sa hakisi Gadu faa manda wanlö gaan hia ëngëli ko tjubi ën. Ma an du sö. A bi disa hënseei da dee Loomë sodati u de ko kisi ën tja go, söseei a bi disa hënseei da de u de fon mën a wan hogihati fasi (Mat. 26:52-54; Joh. 18:3; 19:1). De bi wipi ën sö gaanfa taa a bi kisi makei. Baka di dë, de bi mbei a bi tja wan gaan hebi posu nëën baka, hii fa de bi wipi ën dëën makei nëën baka. Jesosi bi bigi tja di posu go ka de bi o kii ën, ma wan Loomë sodati bi piki wan womi di bi ta waka pasa, faa heepi Jesosi tja di posu (Mat. 27:32). Di Jesosi waka dou a di kamian ka de bi o kii ën, hën dee sodati peka hën maun ku hën futu a di posu. Di de hopo di posu taanpu, hën a fii pen möön gaanfa. Dee mati fëën bi ta këë, hën mama seei bi ta këë, ma dee hedima u dee Dju bi ta mbei ën fa (Luk. 23:32-38; Joh. 19:25). Wantu juu longi Jesosi tja di sitaafu aki. A bi ko ta möön taanga dëën faa hai böö. Nöö hii fa soni bi dë sö da Jesosi, tökuseei a ta begi wan lasiti pasi. A bendi hedi, hën böö fëën koti (Maik. 15:37; Luk. 23:46; Joh. 10:17, 18; 19:30). Wë an dë u taki taa Jesosi bi dëdë a wan hogihati fasi.

5. Andi bi bigi da Jesosi möön di fasi fa de bi o kii ën?

⁵ Di kii di de bi o kii Jesosi, an bi dë di möön hogi soni di bi o miti ën. Ma di soni di bi ta möön da Jesosi bookohedi, hën da di soni mbei de bi kë kii ën. De bi kuutu ën taa an ta lesipeki Gadu seepiseepi (Mat. 26:64-66). Di soni aki bi hati Jesosi sö tee taa a bi hakisi hën Tata faa du wan soni sö taa an abi fu tja di lö në dë (Mat. 26:38, 39, 42). Faandi mbei Jehovah bi da pasi u di Womi Mii fëën tja sitaafu u te a dëdë? Boo luku dii soni di mbei Jehovah du di soni aki.

6. Faandi mbei de bi musu peka Jesosi a wan posu?

⁶ Di fosu soni di mbei Jehovah bi da pasi taa di Womi Mii fëën tja sitaafu u te a dëdë, hën da u di de bi musu pekëën a wan posu u dee Dju bi sa ko dë bööböö u di wan fuuku bi dë a de liba (Gal. 3:10, 13). Dee Dju bi piki taa de bi o ta hoi dee wëti u Gadu, ma de an bi du ën kumafa de bi taki. Di soni aki bi ko dë wan woto zöndu, boiti di zöndu di Adam bi tja ko da dee bakamii fëën (Lom. 5:12). Di Wëti di Gadu bi da dee Isaëli sëmbë, bi ta taki taa ee wan sëmbë du wan gaan zöndu, nöö de bi musu kii ën. Bakaten, nöö de bi musu peka di sinkii fëën a wan posu * (Deto. 21:22, 23; 27:26). U di de bi peka Jesosi a wan posu, mbei dee Dju bi sa ko fii u di fuuku di bi ko a de liba.

7. Andi da di u tu soni mbei Jehovah da pasi u di Womi Mii fëën tja sitaafu u te a dëdë?

 ⁷ Luku di u tu soni mbei Jehovah bi da pasi u di Womi Mii fëën tja sitaafu u te a dëdë. A bi ta seeka Jesosi faa sa du di wooko fëën kuma gaan mindima. Jesosi bi ko sabi unfa a taanga tjika u piki Gadu buka te a ta taanga da u gaanfa. A bi hebi dëën sö gaanfa taa a bi begi wan „gaan begi, ku bai këë, ku wata a wojo seei”. Wë u di dee soni aki bi miti Jesosi, mbei a sa fusutan unfa soni dë da u, söseei „a sa heepi u awaa te u dë a fuka”. U ta tei ën u bigi seei taa Jehovah da u wan Gaan Mindima, di ta „fii ku u tee wan soni taanga da u poi fuu musu du”!​—Heb. 2:17, 18; 4:14-16; 5:7-10.

8. Andi da di u dii soni mbei Jehovah bi da pasi, u sëmbë du ku Jesosi gaanfa?

⁸ Di u dii soni mbei Jehovah da pasi u Jesosi tja sitaafu u te a dëdë, hën da u di a bi musu piki wan fanöudu soni. Di soni dë da: Libisëmbë sa hoi deseei a Gadu hii fa fuka ta miti de gaanfa seei ö? Wë Saatan bi taki taa libisëmbë an sa du di soni aki. Saatan bi taki taa libisëmbë ta dini Gadu u di de kë feni wini da deseei nöö a kaba. Söseei a ta feni taa de dë kuma Adam. De an ta dini Jehovah ku hii de hati (Jöpu 1:9-11; 2:4, 5). U di Jehovah bi sabi taa di Womi Mii fëën bi o hoi hënseei nëën, mbei a bi da pasi u sëmbë du ku ën a hii futu. Jesosi bi hoi hënseei a Jehovah, nöö a bi lei taa Saatan da wan mindisonima.

9. Andi u sa lei a di woto u Johanisi?

⁹ Di biibi u sömëni Keesitu sëmbë bi ko möön taanga, u di de bi ta biibi di lei u di lusupaima. De bi ta peleiki go dou hii fa sëmbë bi ta du ku de, söseei hii fa tesi bi ta miti de a de libi. Buta pakisei a di woto u Johanisi. A kan taa a bi konda soni u Keesitu ku di lusupaima söwan 60 jaa longi. Di a bi abi söwan 100 jaa, dee lanti u Loomë bi ta fëëë sö tee taa a bi o poi soni da de, hën de mandëën go a di paati de kai Patimosi. Faandi mbei? ’Fu di de an bi kë faa musu ta konda dee wöutu u Masa Gadu da sëmbë, söseei de an bi kë faa taki dee soni u Masa Jesosi dee a sabi’ (Ako. 1:9). U sa djeesi Johanisi tuutuu a di biibi di a bi abi, söseei a di hoi di a bi ta hoi dou!

10. Unfa dee buku dee Johanisi sikifi ta lei taa a bi ta tei di lusupaima u bigi?

¹⁰ A dee buku u Bëibel dee Johanisi sikifi, a ta taki unfa a lobi Jesosi tjika, söseei unfa a ta tei di lusupaima u bigi tjika. Möön leki 100 pasi, dee buku aki ta taki u di lusupaima ku dee wini dee a o tja ko. Johanisi bi taki taa: „Ee a ko dë taa un du hogi, nöö un musu sabi taa i abi wan Sëmbë dë a Masa Gadu bandja di ta begi ën da u. Hën da Jesosi Keesitu, di Sëmbë di an du hogi wan daka” (1 Joh. 2:1, 2) Dee buku dee Johanisi sikifi ta taki tu u di peleiki di u musu ta peleiki ta konda soni u Jesosi (Ako. 19:10). Wë a dë gbelingbelin u si taa Johanisi bi ta tei di lusupaima u bigi. Unfa useei sa lei taa u ta tei ën u bigi tu?

11. Andi sa heepi u fuu duwengi useei fu wa du zöndu?

¹¹ Duwengi iseei fu ja du zöndu. Ee u ta tei di lusupaima u bigi tuutuu, nöö te tesi miti u wa o ta pakisei taa: ’An dë u mi ta duwengi miseei sö u ma du zöndu. Te mi mbei wan föutu, nöö mi sa hakisi u Gadu da mi paadon.’ Ka fuu pakisei sö, nöö te u ta fii fuu du wan soni di an bunu, nöö a bi o möön bunu fuu taki taa: ’Nönö! Ma sa du sö wan soni, Jehovah ku Jesosi du sömëni soni da mi poi u mi go du sö wan gaan zöndu.’ Boiti di dë, u sa hakisi Jehovah faa da u taanga. U sa begi ën taa: ’Na  disa mi da dee soni dee sa hai mi tja go a di së u hogi e.’​—Mat. 6:13.

12. Unfa u sa du di soni di sikifi a 1 Johanisi 3:16-18?

¹² Lobi dee baaa ku dee sisa fii. Te u ta lei taa u lobi dee baaa ku dee sisa fuu, nöö u ta lei taa u ta tei di lusupaima u bigi tu. Faandi mbei u taki sö? Wë u di Jesosi an ko dëdë da u wanwan nöö, ma a ko dëdë da dee baaa ku dee sisa fuu tu. Jesosi bi dë kabakaba u dëdë da de, nöö di soni dë ta lei gbelingbelin taa a lobi de gaanfa seei. (Lesi 1 Johanisi 3:16-18.) U ta lei taa u lobi dee baaa ku dee sisa fuu, a di fasi fa u ta libi ku de (Ef. 4:29, 31–5:2). U ta heepi de te de dë ku suwaki, te tesi ta miti de, söseei te gaan ventu nasö gaan wata ko booko soni u de. Ma andi u musu du ee wan baaa nasö wan sisa du wan soni di hati u?

13. Faandi mbei u musu ta da wotowan paadon?

¹³ A ta taanga da i fu ja hoi dee baaa ku dee sisa fii a bëë u? (Leif. 19:18) Wë ee sö, nöö du di soni di di Bëibel ta taki. A ta taki taa: „Un musu hoi pasensi da unuseei ta da unuseei paadon ku hii unu hati, aluwasi un feni taa wan wotowan du wan soni di hati unu. Leti kumafa Jehovah ta da unu paadon, sö nöö un musu ta da wotowan paadon tu” (Kol. 3:13). Hiniwan pasi te u ta da dee baaa ku dee sisa fuu paadon, nöö u ta lei di Tata fuu di dë a liba ala taa u ta tei di lusupaima u bigi. Unfa u sa ko ta möön lei taa u ta tei di kado di Gadu da u aki u bigi?

14. Andi da wan fasi fa u sa möön lei taa u ta tei di lusupaima u bigi?

¹⁴ Da Jehovah tangi u di a seeka di lusupaima da u. Wan sisa de kai Joanna di abi 83 jaa di ta libi a India bi taki taa: „Mi ta si ën kuma wan fanöudu soni, u mi ta da Jehovah tangi u di lusupaima hiniwan daka.” Te i ta begi Jehovah, nöö pakisei dee föutu dee i bi du a di daka dendu, nöö i hakisi ën paadon u de. Ma an dë u taki taa ee i du wan gaan zöndu, nöö i musu go a dee gaanwomi u de heepi i. Dee gaanwomi o haika andi i abi u taki, nöö de o heepi i ku di Wöutu u Gadu. De o begi makandi ku i, nöö de o hakisi Jehovah faa wooko ku di lusupaima u mbei i kisi iseei.​—Jak. 5:14-16.

15. Faandi mbei u musu ta lesi soni u di lusupaima, söseei faandi mbei u musu ta pakisei fundu fëën?

¹⁵ Pakisei fundu u soni u di lusupaima. Wan sisa de kai Rajamani di abi 73 jaa, bi taki taa: „Wata ta pasa a mi wojo te mi ta lesi fa Jesosi  bi tja sitaafu.” Kandë a ta hati i tu, te i ta pakisei unfa di Womi Mii u Gadu bi tja sitaafu. Ma möön i ta pakisei fundu u di lusupaima di Jesosi ko paka da u, möön joo ko lobi hën ku hën Tata. A bi o bunu fii seti wan ten fii öndösuku soni u di lusupaima, nöö i pakisei fundu fëën.

16. Unfa di lei di u ta lei wotowan soni u di lusupaima sa tja wini ko da u? (Luku di peentje u di kafiti.)

¹⁶ Lei wotowan soni u di lusupaima. Möön woo ta konda soni u di lusupaima da wotowan, möön woo ta tei di lusupaima u bigi. Sömëni buku ku woto soni dë di u sa tei u lei wotowan faandi mbei a bi dë fanöudu u Jesosi ko dëdë da u. U sa wooko ku woto 4 u di brochure Gadu abi bunu buka da u! Di në u di woto dë da „Ambë da Jesosi Keesitu?” Nasö u sa wooko ku woto 5 u di buku Andi di Bëibel ta lei u tuutuu? Di në u di woto dë da „Di lusupaima da di möön gaan kado di Gadu da u.” Hiniwan jaa te u nango mëni di dëdë u Jesosi, söseei te u ta kai sëmbë u de ko mëni di dëdë fëën ku u, u ta lei taa u ta tei di lusupaima u bigi. Wan gaandi wë i si Jehovah da u fuu sa lei wotowan soni u di Womi Mii fëën!

17. Faandi mbei u sa taki taa di lusupaima da di möön gaan kado di Gadu da libisëmbë?

¹⁷ An dë u taki taa u ta feni wini seei te u ta mbei möiti fuu ko ta möön tei di lusupaima u bigi. Di lusupaima mbei u ku Jehovah sa ko dë gaan mati, hii fa u da zöndu libisëmbë. Di lusupaima hën o puu hii dee hogi di Saatan tja ko (1 Joh. 3:8). Di lusupaima o mbei taa Jehovah o du hii dee soni dee a bi abi a pakisei u du da di goonliba. Hii di goonliba o toon wan paladëisi. Hii sëmbë di o dë ala, o lobi Jehovah, söseei hii de tuu o ta dini ën. Fëën mbei boo ta mbei möiti hiniwan daka fuu lei taa u ta tei di lusupaima u bigi. A dë di möön gaan kado di Jehovah da libisëmbë!