1-2. Ino ty atao tihoe solovoigne, le nagnino tika ro soloam-boigne?

NIVORIRIKE ty Adama, le afake ty ho nivelogne nainai’e. Faie naho fa nanota reke, le nafoe’e zay. Nanjare tsy afake niaigne nainai’e ka ty tarana’e. I Adama avao ty tompon’andraikitse amy ty raha natao’e. Nijobogne ty hanota reke. Fa akore ty amy i tarana’e rey? Tsy nisy raha raty natao iareo, sady mbe tsy naterake iareo tamy izay. (Rom. 5:12, 14) Fagneva ty ho mate ty Adama. Faie misy raha azo i Jehovah atao vao hagnavotagne ty tarana i Adama mba hahafaha iareo hiaigne nainai’e? Eka. Tafara kede ty nanotà i Adama, le nambara i Jehovah tsikedetsikede ty fomba hagnafaha’e ty tarana i Adama an-tapetrisa’e amo o otao naho o fateo. (Gen. 3:15) Ie tamy ty fotoagne fa tinondro i Jehovah, le nalefa’e an-tane etoy i Ana-dahi’ey mba “hagnomey ty fiai’e ho solovoigne ho takalo ty ndaty maro.”​—Mar 10:45; Jaona 6:51.

² Ino ty atao tihoe solovoigne? Arake ty Soratse Grika Kristiana, le ty fagnomeza i Jesosy ty fiai’e mba hagneregnagne i raha nafoe i Adamay. (1 Kor. 15:22) Nagnino tika ie soloam-boigneo? Satria arake ty fitsipy i Jehovah miomba ty rare’e nimei’e tamy i Lalànay tao, le aigne ho solo ty aigne. (Eks. 21:23, 24) Namoe i fiai’e voririkey ty Adama naho fa nanota. Mba hampiharagne i fitsipy i Jehovah miomba ty rare’ey areke, le nanao sorogne ty fiai’e voririke ty Jesosy. (Rom. 5:17) Nanjare “Rae Nainai’e” hoahy ze ndaty mino i solovoigney areke ty Jesosy.​—Isaia 9:6; Rom. 3:23, 24.

3. Nagnino ty Jesosy ro nivognogne hagnomey i fiai’e voririkey ho antika, arake ty Jaona 14:31 naho ty 15:13?

³ Nivognogne hamoe i fiai’e voririkey ty Jesosy noho ty hatea’e i Baba’e an-dagnitse agney naho ty hatea’e antika. (Vakio ty Jaona 14:31; 15:13.) Io ty nahavy i Jesosy ho tapa-kevetse tsy hivalike ampara-pahafate’e naho hanao ty zoton’arofon-dRae’e.  Ty voka’e, afake matoky tika fa ho tanterake ty raha safirie i Jehovah hoahy o ndatio naho miomba ty tane toy. Hodinehentika amy ty lahatsoratse toy tie nagnino ty Jesosy ro nengàn’Andrianagnahare hijale mafe taloha ty nimateza’e. Afara izay tika, le handineke kedekede miomba ty mpanoratse Baiboly raike tena nankasitrake i solovoigney. Amy ty fara’e tika, handineke ty fomba azontika ampisehoagne naho ampitomboagne ty fankasitrahantika i sorogne nimey i Jehovah naho i Jesosy antikagney.

4. Tantarao ty fomba namonoagne i Jesosy.

⁴ Mba vetsevetseo heike ty raha nanjò i Jesosy tamy i andro namonoagne azey! Ndra tie niazo’e natao aza ty nangatake taman-dRae’e mba handefa anjely maro hiaro aze, le tsy nanao izay reke. Tsy nizizo reke naho fa nitsepahegne sady jinera o maramila Romanao. (Mat. 26:52-54; Jaona 18:3; 19:1) Jinera iareo tamy ty karavasy misy raha maragnitse reke, le naradratse iaby ty vata’e. Naho fa niavy eo reke nampitarazoe iareo i hazo fijaleagne hipehagne azey, ie amy izao mavesatse o hatae iohoe, le i lambosi’ey maratse. Nikezake ninday i hazo fijaleagney ty Jesosy. Faie tampoke teo, le nisy ndaty raike zay sinere o maramila Romanao hinday i hataey. (Mat. 27:32) Nipehe i maramila rey ty tagna’e naho ty tombo’e naho fa niavy tamy i toeragne hamonoagne azey agne. Vao mainke naratse i tagna’ey naho i tombo’ey naho fa natsangagne i hazo fijaleagney, satria mavesatse i vata’ey. Nalahelo mafe i nama’e rey, le i rene’e nitagny. Faie o Jiosy nanam-pahefagneo nikizake aze. (Lioka 23:32-38; Jaona 19:25) Nijale mafe tagnate ty lera maro ka ty Jesosy. Nanjare tsy le tena niafake niaigne soa reke, satria niasa mafe ty fo’e naho ty rabo’e. Taloha kede ty nimateza’e, le nitoka mafe an’Andrianagnahare reke tamy ty vavake fara’e nanoe’e. Nagnondreke ty loha’e reke naho fa niavy eo, le nimate. (Mar 15:37; Lioka 23:46; Jaona 10:17, 18; 19:30) Nijale naho nanaintaigne vata’e ty Jesosy, sady tena nahamegnatse ty fomba namonoagne aze!

5. I fomba namonoagne i Jesosỳ vao ty raha tena nimafe tama’e?

⁵ Tamy i Jesosy, le tsy i fomba namonoagne azey ty raha tena nimafe tama’e. Ty anto’e nahavy aze ho vonoegne ty raha tena nahakivy aze. Tena niteà i Jesosy ty Jehovah, faie nirehafegne reke tie nao niteratera an’Andrianagnahare zao. Ty anto’e, tsy nagnaja an’Agnahare ndra ty tahina’e zao reke. (Mat. 26:64-66) Tena nampalahelo aze ty nieretseretse izay. Nitamà areke reke fa tsy hagnenga aze ho ambanembanegne hoe izay ty Baba’e. (Mat. 26:38, 39, 42) Faie nagnino ty Jehovah ro nagnenga i Ana-dahi’e ikokoa’ey hijale naho hovonoegne? Andao tika handineke anto’e telo.

6. Nagnino ty Jesosy ro tsy maintsy nipehegne tamy i hazo fijaleagney tey?

⁶ Voaloha’e, tsy maintsy nipehegne tamy i hazo fijaleagney tey ty Jesosy mba hagnafahagne o Jiosio amy ty ozo i Lalànay. (Gal. 3:10, 13) Nampitamà iareo fa hagnorike ty Lalàn’Andrianagnahare faie tsy nitana iareo ze vava nanoe iareo zay. Ty voka’e, nanjare fokopatse iareo, satria tsy nagnorike i Lalànay. Faie fagneva ty ho mate ka iareo, satria nandova ota boake amy i Adama. (Rom. 5:12) Nirehafe i Lalàna nimeigne o Israelioy fa fagneva ty hovonoegne ty ndaty raike manao hakeo mahafate. Naho fa niavy eo aza, le va’e nipehegne tamy ty hazo fijaleagne reke. Mampiseho zay fa nozognen’Agnahare reke. * (Deot. 21:22, 23; 27:26) Naho fa nipehegne tamy i hazo fijaleagney tey ty Jesosy, le nisolo ty voy o Jiosy tambane i Lalànay rehoe, satria reke nahavita nankatò ze raha nitakégne tamy i Lalànay tao. Nanjare afake nitamà areke  o Jiosio tie handrambe soa amy i sorogne nanoe i Jesosỳ, ndra tie nandietse aze aza iareo.

7. Ino ty anto’e faharoe nahavy an’Andrianagnahare nagnenga i Ana-dahi’ey hijale?

⁷ Intoy ty anto’e faharoe nahavy an’Andrianagnahare nagnenga i Ana-dahi’ey hampijalegne: Nampiofagne i Jesosy amy i anjara asa’e amy ty hoavỳ Reke. Tsy ino zay fa i maha Mpisorom-bey i Jesosỳ. Hai’e tie tsy mora ty mankatò an’Andrianagnahare naho fa miatreke raha sarotse, satria fa niaigna’e zay, le nitsapa’e tie tena mafe. Izay ty nahavy aze “nitoreo mafe naho nitagny” naho fa nangatake fagnampeagne taman-dRae’e. Manjare mahay ze raha paliaentika areke ty Jesosy, sady ‘afake magnampe antika’ naho fa itika ‘miatreke tsapa hevetse.’ Tena mankasitrake i Jehovah tika noho i reke nanendre Mpisorom-bey mitretré ho antika mba “ho afake hitretré antika amy ty fahalementikagne.”​—Heb. 2:17, 18; 4:14-16; 5:7-10.

8. Ino ty anto’e fahatelo nahavy an’Andrianagnahare hagnenga i Jesosy hijale mafe?

⁸ Ty anto’e fahatelo nahavy i Jehovah nagnenga i Jesosy hijale mafe, le mba hamaleagne ty fagnonteneagne lahibey raike toy: Ho vita o ndatio vao ty tsy hivalike amy i Jehovah naho fa miatreke raha sarotse maro iareo? Aha’a, hoe ty Satana. Nirehake reke tie hatea tegna o mahavy o ndatio manompo an’Andrianagnahareo. Mino ka reke, fa tsy teà iareo ty Jehovah, manahake i Adama razambey iareo. (Joba 1:9-11; 2:4, 5) Faie natoky ty Jehovah fa ho vita i Ana-dahi’ey ty tsy hivalike ama’e, le nenga’e hiaretse fijaleagne mafe reke. Ty tsy fivaliha i Jesosy areke, le nagnaporofo tie mpavande ty Satana.

9. Ino ty modely nenga i apostoly Jaona ho antika?

⁹ Maro ty Kristiana nanjare nanagne finoagne matanjake naho fa nahay ty miomba i solovoigney. Nitory avao ohatse iareo ndra tie nenjehegne aza, sady nahavita niaretse ty raha sarotse natrehe iareo ampara-pahafate’e. Dineho ohatse ty apostoly Jaona. Nitory ty hamarenagne miomba i Kristy naho i solovoigney reke. Va’e tagnate ty 60 taogne mahery ty nanoa’e ze asa fitoriagne zay. Tamy i Jaona fa narine ho 100 taogney, le nihevetse o fanjakagne Romanao tie nao magnoho-doza zao reke, hafara’e natao iareo sese-tane amy ty tokonose i Patmo agne. Fa ino ty raha natao’e? ‘Nirehake miomba an’Andrianagnahare naho ni-vavolombelogne nagnambara i Jesosy.’ (Apok. 1:9) Tena modely soa ho antika ty Jaona, satria nanam-pinoagne naho fiaretagne reke.

10. Nagnino i boke nisorate i Jaona rey ro ahatreavagne tie tena nankasitrake i solovoigney reke?

¹⁰ Trea amy i boke nisorate i Jaona rey fa tena tea’e ty Jesosy sady nankasitraha’e i solovoigney. In-jato mahery reke ty nirehake miomba i solovoigney naho ty soa azontika boake amy i solovoigney, amy i boke’e rey ao. Izao ohatse ty raha nisorate’e: ‘Naho misy sendra manota, le managne mpagnampe tika amy i Rae agne. Tsy ia zay fa i Jesosy Kristy, i maregney.’ (1 Jaona 2:1, 2) Nasongady i Jaona amy i boke’e rey ao ka, fa tena lahibey ty “asa fitoriagne miomba i Jesosy.” (Apok. 19:10) Tena nankasitrake i solovoigney vata’e ty Jaona. Akore ka ty azontika anahafagne aze?

11. Ino ty hagnampe antika hahavita hanohetse tsapa hevetse?

¹¹ Ko magneke ho rese ty tsapa hevetse. Naho tena mankasitrake i solovoigney tika, le tsy hieretseretse hoe izao: ‘Nagnino moa raho ro mila mikezake mafe mba hanohetse tsapa hevetse? Ndra aleo anoeko avao heike ty raha raty toy, le mbe hangatake famelan-keloke raho naho fa avy eo.’ Izao aza ty toko’e hoeretseretentika: ‘Aha’a! Le izao vao ty havaleko i Jehovah naho i Jesosy noho ze raha iaby natao iareo ho ahike zay?’ Mangataha hery amy i Jehovah naho fa avy eo, le  mihalalia ama’e tie: ‘Ko minday ahy amy ty tsapa hevetse.’​—Mat. 6:13.

12. Akore ty azontika ampiharagne i torohevetse amy 1 Jaona 3:16-18 aoy?

¹² Teao o rahalahio naho o rahavaveo. Naho manao izay tika, le mampiseho fa mankasitrake i solovoigney. Fa nagnino? Satria tsy itika avao ty nahafoea i Jesosy ty fiai’e fa o rahalahio naho o rahavaveo ka. Naho nivognogne hamoe ty fiai’e hoahy iareo areke ty Jesosy, le midika zay tie tena tea’e ka iareo. (Vakio ty 1 Jaona 3:16-18.) Toko’e ho trea amy ty fomba ifandrambesantika naho indesantika iareo tie teantika iareo. (Efes. 4:29, 31–5:2) Ohatse, ampeantikagne iareo naho fa marare, ndra miatreke raha sarotse hafa, manahake o tsikolonio, o horohoron-taneo, o kerégneo, naho o ranobeio. Faie ino ka ty toko’e hataontika naho misy rahalahy ndra rahavave raike amo o fiangonagneo eo mirehake ndra manao raha mahaboseke antika?

13. Nagnino tika ro tsy toko’e hitagne am-po?

¹³ Te hitagne am-po amy i rahalahỳ ndra amy i rahavavey vao rehe? (Lev. 19:18) Naho izay ty tsapa’o, le oriho ty torohevetse toy: “Mifankatanteza lognandro sady mahaia mifamela heloke tanterake, naho misy managne anto’e hitaraignagne miomba ty ila’e. Namela tanterake ty helo’areo ty Jehovah, le mba mifamelà heloke ka nareo.” (Kol. 3:13) Naho fa itika mamela o rahalahintikagneo ndra o rahavaventikagneo, le asehontika amy i Babantikagne an-dagnitse agney tie tena mankasitrake i solovoigney tika. Ino ty hagnampe antika hampitombo ty fankasitrahantika o fagnomezagne boake aman’Andrianagnahare iohoe?

14. Ino ty raha raike azontika atao mba hampitomboagne ty fankasitrahantika i solovoigney?

¹⁴ Isaoro ty Jehovah noho i reke nagnomey i solovoigney. Hoe ty Joanna, rahavave raike 83 taogne mitoboke a Inde agne: “Tena ilaegne, hoe raho, ty mirehake miomba i solovoigney naho fa itika mivavake isan’andro, le misaotse i Jehovah noho ty nagnomea’e io.” Naho fa mivavake manokagne rehe, le saintsaigno ty hadisoagne natao’o tamy i andro ignehoe, le mangataha famelan-keloke amy i Jehovah. Naho fahotagne lahibey ty natao’o, le mangataha fagnampeagne amo o androanavi-pagnahio. Tena vognogne hitsanogne naho hagnomey torohevetse azo aman-katea boake amy Baiboly ao iareo. Hivavake ho azo ka iareo, le hangatake amy i Jehovah mba hamela heloke azo mioregne amy i sorogne sarobily nanoe i Jesosỳ, amy izay rehe ho ‘sitragne’ [ara-pagnahy].​—Jak. 5:14-16.

15. Nagnino tika ro toko’e hanokagne fotoagne mba hamakiagne andinin-teny miomba i solovoigney naho hisaintsaignagne izay?

 ¹⁵ Saintsaigno ty raha niareta i Jesosy naho fa nagnomey i solovoigney. Hoe ty Rajamani, rahavave raike 73 taogne zay: “Naho fa mamaky i andinin-teny mirehake miomba ty raha niareta i Jesosy rey raho, le mipopoke ty ranomasoko.” Va’e ho tsapa’o ka tie tena nijale mafe i Anan’Andrianagnaharey naho fa i rehe misaintsaigne ty raha niareta’e naho fa nagnomey i solovoigney reke. Faie arakarake ty anoa’o izay, ty vao mainke hahavy azo ho tea aze naho i Baba’e. Nagnino areke naho mba manokagne fotoagne hianaragne ty miomba i solovoigney? Naho manao izay rehe, le vao mainke hihevetse i solovoigney ho sarobily.

16. Ino ty soa rambesentika naho mampianatse o ndatio miomba i solovoigney tika? (Henteo ty sare amy ty fogno ty gazete toy.)

¹⁶ Ampianaro miomba i solovoigney o ndatio. Isake tie mirehake miomba i solovoigney amy ty ndaty hafa tika, le hitombo ty fankasitrahantika aze. Maro ty fitaovagne fanjaka anagnantika, natao mba hagnampeagne o ndatio hahafantatse ty anto’e nimateza i Jesosy ho antika. Azontika ampiasaegne ohatse ty lesogne fahaefatse amy ty bokekele Talily Soa Boake Aman’Andrianagnahare! Izao ty lohaheve o lesogne iohoe: “Ia o Jesosy Kristy Zao?” Ndra ty toko fahadime amy ty boke tihoe Inogne ty Ampianare ty Baiboly Antikagne? Izao ka ty lohaheve o toko fahadime iohoe: “Fagnomezan’Andrianagnahare i Solovoigney.” Mampitombo ty fankasitrahantika o solovoigne iohoe ka ty fagnatrehagne ty Fahatsiarovagne ty nimateza i Jesosy isan-taogne, naho ty fanasantikagne o ndatio mba hiarake hankalaza amantika o Fahatsiarovagne iohoe. Nimey i Jehovah tombotsoa tena lahibey tika. Tsy ino zay fa ty hampianatse o ndatio miomba i Ana-dahi’ey.

17. Nagnino i solovoigney ro fagnomezagne tsy misy hoe’e boake aman’Andrianagnahare?

¹⁷ Maro ty anto’e mahavy antika toko’e hampitombo lognandro ty fankasitrahantika i solovoigney. Naho tsy nisy i solovoigney, le tsy ho niafake nifandrambe marine amy i Jehovah tika, satria tsy voririke. Amy ty alala o solovoigne iohoe ka ty handravàgne ty asa i Devoly. (1 Jaona 3:8) Noho i solovoigney, le afake matoky tika fa ho tanterake i raha nisafirie i Jehovah tamboaloha’e tagne miomba ty tane toỳ. Tsy ino zay fa i hagnova ty tane toy iaby ho paradisay. Ho tea i Jehovah naho hanompo aze iaby ze ndaty ambone tane eto amy ze fotoagne zay. Lonike areke tika mba hipay fomba hampisehoagne ty fankasitrahantika i fagnomezagne tsy misy hoe’e boake aman’Andrianagnaharey, le i solovoigney!