1, 2. ¿Tuku talakgmaxtut, chu tuku xlakata maklakaskinaw?

ADÁN ni xkgalhi talakgalhin, pero akxni makglakgalhinalh makgatsankgalh talakaskin xlakata xlatamalh putum kilhtamaku chu nachuna xlakkamanan nema xkgalhikgolh. Adán nila wi tuku xlikilhalh xlakata makglakgalhinalh, xlakata liwana xkatsi pi tuku tlawalh akgtum talakgalhin xlitaxtu. Xlakgchan nani, pero ¿tuku tlan nawanaw xpalakata xlakkamanan? Xlakan ni xlinkgo kuenta xlakata Adán makglakgalhinalh (Rom. 5:12, 14). ¿Wi tuku tlan xtlawaka xlakata xkalakgmaxtuka kkalinin? Chuna, Jehová tsinu tsinu masiyalh la xʼama kalakgmaxtu lhuwa millones xlakkamanan Adán ktalakgalhin chu klinin (Gén. 3:15). Akxni xchalh kilhtamaku, Jehová xmakamilh xKgawasa “xlakata xmastalh xlatamat chu xkalilakgmaxtulh lhuwa latamanin” (Mar. 10:45; Juan 6:51).

² ¿Tuku talakgmaxtut? Anta ktatsokgni xagriego, wa xtapalh nema xokgolh Jesús xlakata nalakgmaxtu tuku Adán xmakgatsankganit (1 Cor. 15:22). ¿Tuku xlakata maklakaskinaw? Xlakata chuna la wan xlimapakgsin Jehová, xtalakaskin pi latamat nalixokgokan latamat (Éx. 21:23, 24). Adán makgatsankgalh xlatamat nema ni xkgalhi talakgalhin. Wa xlakata, xtalakaskin pi Jesús xmastalh xlatamat nema ni xkgalhi talakgalhin xlakata tlan xkgantaxtulh tuku Jehová xlakkaxwilinit (Rom. 5:17). Chuna tlan litaxtulh «Tlat tiku putum kilhtamaku wi» xpalakatakan putum tiku xlimasiyakgolh pi kanajlanikgo talakgmaxtut (Is. 9:6; Rom. 3:23, 24).

3. Chuna la wan Juan 14:31 chu 15:13, ¿tuku xlakata Jesús xatapaxuwan mastalh xlatamat nema ni kgalhi talakgalhin?

³ Jesús xatapaxuwan mastalh xlatamat xpalakata tapaxkit nema kgalhini xTlat chu nema kinkakgalhiniyan (kalikgalhtawakga Juan 14:31; 15:13). Uma tapaxkit makgpuwantinilh ni namakgatsankganani Jehová asta klinin chu natlawa xtalakaskin xTlat. Xlakata tlawalh uma, tlan nakgantaxtu  tuku Jehová xlakpuwanit xapulana xpalakata latamanin chu xpalakata Katiyatni. Kʼuma artículo naʼakxilhaw tuku xlakata Dios mastalh talakaskin pi Jesús lu xpatinalh akxni nilh. Nachuna, nalichuwinanaw xliʼakxilhtit chatum tiku na tsokgwililh tuku wan Biblia tiku lu xpaxtikatsini Jehová chu Jesús xlakata talakgmaxtut. Chu xaʼawatiya, naʼakxilhaw la tlan akinin nachuna nakalimasiyaniyaw Jehová chu Jesús pi kapaxtikatsiniyaw xlakata talakgmaxtut chu la tlan tlakg xtapalh naliʼakxilhaw tuku xlakan tlawakgolh kimpalakatakan.

4. Kalichuwinanti la nilh Jesús.

⁴ Kalilakpuwaw xaʼawatiya kilhtamaku akxni Jesús latamalh unu kKatiyatni. Mastalh talakaskin pi soldados romanos xchipakgolh chu xwilinikgolh maski tlan xtikatasanilh lhuwa millón ángeles xlakata xmakgtayakgolh (Mat. 26:52-54; Juan 18:3; 19:1). Likgesnokgka lisnokgni xla xuwa nema xmakilhkini xliwa. Alistalh makukika kgantum lanka kiwi nema lu tsinka xwanit, maski xla lu xʼakglhchastajpuxtakgma. Jesús tsukulh xwatalin uma lanka kiwi asta niku xʼamaka makgnikan, pero soldados fuerza tlawakgolh pi chatum chixku xmakgtayalh chu xkukalilh uma lanka kiwi (Mat. 27:32). Akxni Jesús chalh niku xʼamaka makgnikan, soldados makgaxtokgowakakgolh chu tuxtokgowakakgolh kʼuma lanka kiwi. Xlitsinka xtiyatliwa xtlawa pi niku makgaxtokgoka chu niku tuxtokgoka tlakg xtakilhkilh. Akxni xʼamigos chu xtse xlakgtasamakgolh, mapakgsinanin judíos kaj xlitsimakgolh (Luc. 23:32-38; Juan 19:25). Xtapatin lhuwa horas makgapalalh, nialh xkgalhi litliwakga xlakata liwana najaxanan, chu xnaku nialh xkgalhi litliwakga. Xlakata liwana xkatsi pi nitu xmakgatsankgananinit Jehová, tlawanilh oración xliputum litliwakga nema xkgalhijku. Alistalh takilhputalh chu makamastalh xlatamat (Mar. 15:37; Luc. 23:46; Juan 10:17, 18; 19:30). Lu lakgasiyu nilh, katsanilh, chu mamaxanika.

5. ¿Tuku tlakg xlilakgaputsa Jesús akxni nilh?

⁵ Jesús ni wa lilakgaputsalh chuna la makgnika, wata wa xlilakgaputsa tuku xlakata makgnika. Limawakaka pi ni xmaxki kakni Dios chu xmaxkajwi xtukuwani (Mat. 26:64-66). Jesús lu nitlan xlimakgkatsi uma tuku limawakaka chu xkgalhkgalhi pi xTlat xlakkaxtlawalh uma tuku latamanin limawakakgolh (Mat. 26:38, 39, 42). ¿Tuku xlakata Jehová mastalh talakaskin pi xKgawasa tiku lu paxki xpatinalh chu xnilh? Kaʼakxilhwi pulaktutu tuku xlakata.

6. ¿Tuku xlakata xtalakaskin pi Jesús xmawakaka kkgantum kiwi?

⁶ Pulana, xtalakaskin pi Jesús xmawakaka kkgantum kiwi xlakata nakalakgmaxtu judíos ni napatikgo tuku nitlan xkalakgchan (Gál. 3:10, 13). Xlipatitkan xwanit uma tuku nitlan xlakata xmalaknukgonit pi xʼamakgolh kgalhakgaxmatkgo xlimapakgsin Dios, pero ni xmakgantaxtikgonit, chu nachuna xpalakata talakgalhin nema xtlawanit Adán (Rom. 5:12). Limapakgsin nema Dios xkamaxkinit Israel xlichuwinan pi komo chatum chixku xtlawalh akgtum talakgalhin nema xlakgchan nalimakgnikan, nila xtapatikan chu xmakgnikan. Alistalh, komo xlakgchan chuna xtlawaka, xtiyatliwa uma chixku, xmawakakan kkgantum kiwi (Deut. 21:22, 23; 27:26). * Wa xlakata, akxni Jesús mawakaka kkgantum kiwi, tlawalh pi kachikin nema xlakgmakganit tlan xlitamakgtayakgolh talakgmaxtut nema xla kxokgoma.

7. Kalichuwinanti xlipulaktiy tuku xlakata Dios mastalh talakaskin pi xKgawasa xpatinalh.

⁷ Xlipulaktiy, Dios mastalh talakaskin pi  xKgawasa xpatinalh xlakata tlan xmakgantaxtilh taskujut nema xʼama lakgayawa chuna la sacerdote tiku tlakg kgalhi limapakgsin. Jesús makgkatsilh pi lu tuwa kgalhakgaxmatkan Dios akxni kgalhikan lhuwa taputsan. Lu nitlan xmakgkatsima uma kilhtamaku. Chu asta «tasalh chu pixlanka takgaxmatli» akxni skilh tamakgtay kxoración. Xlikana tlan nawanaw pi xlakata Jesús titaxtulh putum tuku lu tuwa, kinkaʼakgatekgsniyan. Chu xlakata putum tuku titaxtulh, «tlan nakamakgtaya tiku kaliʼakxilhmaka». Lu paxtikatsiniyaw Jehová pi laksaknit chatum sacerdote tiku tlakg kgalhi limapakgsin, tiku «kinkaʼakgatekgsniyan akxni xlajwananaw» (Heb. 2:17, 18; 4:14-16; 5:7-10).

8. Kalichuwinanti xlipulaktutu tuku xlakata Dios mastalh talakaskin pi Jesús xpatinalh.

⁸ Xlipulaktutu, Jehová mastalh talakaskin pi Jesús xpatinalh xlakata nakgalhtinan uma lu xlakaskinka takgalhskinin: ¿tlan latamanin ni namakgatsankgananikgo Jehová asta maski napatikgo tuku lu tuwa? Satanás wan pi nila. Chu wan pi skujnaniyaw Jehová xlakata wi tuku lakaskinaw. Nachuna, lakpuwan pi xtachuna la Adán, ni paxkiyaw Jehová (Job 1:9-11; 2:4, 5). Xlakata Jehová liwana xkatsi pi xKgawasa ni xʼama makgatsankganani, mastalh talakaskin pi Jesús xtitaxtulh tuku lu tuwa. Xlakata ni makgatsankgananilh Dios, Jesús limasiyalh pi Satanás xaʼakgsanina.

9. ¿Tuku liʼakxilhtit kinkawilinin apóstol Juan?

⁹ Tamasiy xlakata talakgmaxtut kamatliwakglhninit xtakanajlakan lhuwa kstalaninanin Cristo. Chuntiya lichuwinankgo Dios maski kaputsastalanikan, chu putum kxlatamatkan tayanikgonit maski titaxtukgo tuku lu tuwa. Kaʼakxilhwi xliʼakxilhtit apóstol Juan, ankgalhin lichuwinalh xaxlikana xlakata Cristo chu talakgmaxtut. Max liwaka 60 kata, Juan lichuwinalh xaxlikana xlakata Cristo chu xlakata talakgmaxtut. Max atsinu ni 100 kata xkgalhi akxni latamanin xalak Roma limawakakgolh pi nitlan tuku xtlawa chu makanka kʼisla de Patmos. ¿Tuku xtlawanit? Xlichuwinanit Dios chu xlichuwinanit xpalakata Jesús (Apoc. 1:9). Juan limasiyalh lanka takanajla chu ankgalhin tayanilh.

10. Anta klibros nema katsokgwililh Juan, ¿la limasiya pi lu paxtikatsini Jehová xlakata talakgmaxtut?

¹⁰ Klibros nema tsokgwililh, Juan lichuwinan tapaxkit nema kgalhini Jesús chu limasiya pi lu paxtikatsini xlakata talakgmaxtut. Anta klibros nema tsokgli max liwaka akgtum ciento la xlimakglit lichuwinalh xlakata talakgmaxtut, o xlakata la litamakgtayayaw. Akgtum liʼakxilhtit, lichuwinalh: «Komo wi tiku lakgalhinan, kgalhiyaw chatum makgtayana tiku akxtum tawi xaTlat: Jesucristo, tiku xaʼakgstitum» (1 Juan 2:1, 2). Nachuna lichuwinalh pi lu xlakaskinka nalichuwinanaw xlakata Jesús (Apoc. 19:10). Liwana tasiya pi Juan lu xpaxtikatsini Jehová xlakata talakgmaxtut. ¿La tlan nalimasiyayaw akinin pi nachuna makgkatsiyaw?

11. ¿Tuku tlan nakinkamakgtayayan natayaniyaw akxni kinkamatlawiputunkanan tuku nitlan?

¹¹ Ni katlawaw talakgalhin. Komo xlikana paxtikatsiniyaw Jehová xlakata talakgmaxtut, ni katilakpuwaw: «Ni talakaskin ni naktlawa tuku nitlan, tlan naktlawa talakgalhin chu alistalh nakskin pi kakintapatika». Nichuna. Wata akxni nakinkamatlawiputunkanan tuku nitlan, nawanaw: «¡Ni ktitlawalh! Jehová chu Jesús tlawakgolh lanka tamakamastan kimpalakata, ¿la naktlawa tuku nitlan?». Nachuna, tlan naskiniyaw Jehová pi kakinkamaxkin litliwakga. Chu natasaskiniyaw: “Ni kamasta  talakaskin naktlawa tuku nitlan” (Mat. 6:13).   

12. ¿La tlan nastalaniyaw xtastakyaw 1 Juan 3:16-18?

¹² Kakapaxkiw kinatalankan. Akxni kapaxkiyaw kinatalankan, na limasiyamaw pi paxtikatsiniyaw Jehová xlakata talakgmaxtut. Xlakata Jesús ni mastalh xlatamat kaj kimpalakatakan, nachuna xpalakatakan kinatalankan. Xla nilh xpalakatakan xlakata lu kapaxkilh (kalikgalhtawakga 1 Juan 3:16-18). Chuna la kalikatsiniyaw limasiya pi lu kapaxkiyaw (Efes. 4:29, 31–5:2). Tlan kamakgtayayaw akxni xlakan tatatlakgo o akxni titaxtumakgolh tuku max lu tuwa, chuna la akxni la tuku masputunan. Pero ¿tuku kilitlawatkan akxni chatum tala wi tuku tlawa o wi tuku wan nema nitlan kinkamamakgkatsiniyan?

13. ¿Tuku xlakata kinkalitapatitkan amakgapitsin?

¹³ ¿Chuntiya lakapastakaw akxni wi tuku nitlan kinkatlawanikanan? (Lev. 19:18). Komo chuna, kalilakgtsakgsaw uma tastakyaw: «Chuntiya kalatatayanitit chu lu kalatapatiputuntit, maski wi tuku nakalimakgasitsikanatit. Chuna la Jehová lu katapatin wixin, nachuna wixin militlawatkan» (Col. 3:13). Makgatunu akxni tapatiyaw chatum tala, limasiyaniyaw kinTlatkan xalak akgapun pi xlikana paxtikatsiniyaw xlakata talakgmaxtut. ¿La tlan nalimasiyayaw pi lanka xtapalh liʼakxilhaw uma xalanka xtamaskiwin Dios?

14. ¿Tuku nakinkamakgtayayan tlakg xtapalh naliʼakxilhaw talakgmaxtut?

¹⁴ Kapaxtikatsiniw Jehová xlakata talakgmaxtut. Joanna, chatum tala tiku kgalhi 83 kata, tiku lama kʼIndia, lichuwinan: «Klakpuwan pi lu xlakaskinka chali chali naklichuwinan xlakata talakgmaxtut kkioraciones chu nakpaxtikatsini Jehová xlakata uma». Akxni tlawayaw kioracionkan, kalilakpuwaw tuku max nitlan tlawayaw chali chali, chu kaskiniw Jehová pi kakinkatapatin. Xlikana pi komo tlawaw akgtum lanka talakgalhin natalakaskin nakaskiniyaw tamakgtay lakgkgolotsin, xlakan liwana nakinkakgaxmatnikgoyan, chu nalimaklakaskinkgo Biblia akxni nakinkastakyawakgoyan. Nachuna, akxtum nakinkatatlawakgoyan oración, chu naskinikgo Jehová pi kakinkatapatin xpalakata xtamakamastan Jesús chu chuna tlan natalalimparayaw (Sant. 5:14-16).

15. ¿Tuku xlakata kilimaxtutkan kilhtamaku xlakata nalikgalhtawakgayaw xpalakata talakgmaxtut chu nalilakpuwanaw?

¹⁵ Kalilakpuwaw talakgmaxtut. Chatum tala tiku kgalhi 73 kata wanikan Rajamani, lichuwinan:  «Akxni klikgalhtawakga putum tuku Jesús patilh, ktsuku ktasa». Max akinin na nitlan limakgkatsiyaw akxni lilakpuwanaw putum tuku patilh xKgawasa Dios. Pero akxni tlakg nalilakpuwanaw tamakamastan nema tlawalh Jesús, tlakg napaxkiyaw chu nachuna tlakg napaxkiyaw xTlat. Xlakata tlan natlawayaw uma, ¿tlan tlakg xlikgalhtawakgaw xlakata tamakamastan akxni kiʼakstukan lakputsananiyaw Biblia?

16. ¿La litamakgtayayaw akxni kamasiyaniyaw amakgapitsin xlakata talakgmaxtut? (Kaʼakxilhti xmakni revista).

¹⁶ Kakamasiyaniw amakgapitsin xlakata talakgmaxtut. Makgatunu akxni lichuwinanaw talakgmaxtut, limasiyayaw pi xtapalh liʼakxilhaw. Kgalhiyaw pulaklhuwa tamakgtay xlakata tlan nalichuwinanaw tuku xpalakata Jesús nilh kimpalakatakan. Akgtum liʼakxilhtit, tlan namaklakaskinaw lección 4 xla folleto Lakwan tamakatsin masta Dios, anta niku wan «¿Tiku Jesucristo?». O tlan namaklakaskinaw capítulo 5 xla libro ¿Tuku masiya Biblia?, nema kgalhi xtema «Talakgmaxtut, tlakg xalanka xtamaskiwin Dios». Chu akgatunu kata akxni anaw akxni talakapastaka akxni tinilh Cristo chu akxni xatapaxuwan kawaniyaw amakgapitsin pi kaʼankgolh, limasiyayaw pi lanka xtapalh liʼakxilhaw xtamakamastan Jesús. ¡Akgtum lanka talakgalhaman pi Jehová kinkamaxkinitan talakaskin xlakata nakamasiyaniyaw amakgapitsin xpalakata xKgawasa!

17. ¿Tuku xlakata talakgmaxtut tlakg xalanka xtamaskiwin Dios?

¹⁷ Liwana katsiyaw pi anan pulaklhuwa tuku xlakata nalimasiyayaw pi lanka xtapalh liʼakxilhaw talakgmaxtut chu ankgalhin paxtikatsiniyaw Jehová xlakata uma. Talakgmaxtut kinkamaxkiyan talakaskin tlan natalalinaw Jehová maski makglakgalhinanin akinin, chu nachuna masta talakaskin pi nalaktlawakan putum tuku tlawanit Akgskgawini (1 Juan 3:8). Chu kkilhtamaku nema aku mima, nakgantaxtu tuku Jehová xlakpuwanit natlawa: pi Katiyatni akgtum paraíso nawan chu putum latamanin napaxkikgo chu naskujnanikgo. Wa xlakata, chali chali kalakputsaw la tlan nalimasiyaniyaw Jehová pi paxtikatsiniyaw xlakata talakgmaxtut, tlakg xalanka tamaskiwin nema katlawaninit latamanin.