1-2. (a) Pe bilong baim bek man em wanem samting? (b) Wai na yumi nidim pe bilong baim bek man?

TAIM Adam em man i gutpela olgeta i mekim sin, em na ol pikinini bilong em i lus long kisim laip oltaim. Adam i save long samting em i mekim na em i min long mekim sin. Tasol olsem wanem long ol pikinini bilong em? Ol i no kirapim Adam long mekim sin. (Rom 5:12, 14) I stret long Adam i dai long sin em i bin mekim. Tasol yu ting Jehova inap mekim sampela samting long helpim ol pikinini bilong Adam long stap laip oltaim? Yes! Bihain stret long Adam i mekim sin, Jehova i tokaut long hau em bai kisim bek planti milion tumbuna pikinini bilong Adam long sin na dai. (Stt. 3:15) Long taim stret Jehova i makim, em bai salim Pikinini bilong em i kam daun long graun bilong “givim laip bilong em olsem pe bilong baim bek planti manmeri.”—Mak 10:45; Jon 6:51.

² Pe bilong baim bek man em wanem samting? Long Ol Skripsa Grik, pe bilong baim bek man i makim pe Jisas i bin givim bilong baim bek samting em Adam i bin lusim. (1 Kor. 15:22) Wai na yumi nidim pe bilong baim bek man? Yumi nidim dispela ofa bikos Lo i kamapim stretpela kot bilong Jehova olsem man i mas givim laip bilong baim bek laip i bin lus. (Kis. 21:23, 24) Adam i lusim laip i gutpela olgeta. So Jisas i mas givim laip bilong em i gutpela olgeta bilong baim bek samting em Adam i bin lusim, na dispela i stret wantaim kot bilong God. (Rom 5:17) Long dispela rot, em i kamap “Papa Bilong Oltaim Oltaim” long olgeta man husat i bilip long ofa bilong em.—Ais. 9:6; Rom 3:23, 24.

3. Long Jon 14:31 na 15:13, wai na Jisas i redi long givim laip bilong em i gutpela olgeta olsem ofa?

³ Jisas i redi long givim laip bilong em olsem ofa bikos em i laikim tru Papa bilong em na em i laikim yumi. (Ritim Jon 14:31; 15:13.) Dispela pasin laikim i mekim na em i tingting strong long  holimpas bilip i go inap long pinis na long pinisim wok Papa i givim long em. Jisas i mekim olsem taim em i stap gut long God i go inap long em i dai. Dispela i opim rot na samting Jehova i tingting pinis long mekim long ol manmeri na long dispela graun bai kamap tru. Long dispela atikol, yumi bai stori long wai na God i larim Jisas i karim bikpela pen na hevi paslain long em i dai. Na tu, yumi bai stori liklik long wanpela man bilong raitim Baibel husat i bin pilim tru pe bilong baim bek man. Na yumi bai stori tu long hau yumi ken soim tenkyu bilong yumi long pe bilong baim bek man, na hau yumi ken strongim pasin bilong yumi long pilim tru ofa em Jehova na Jisas i givim bilong helpim yumi.

4. Stori long hau Jisas i dai.

⁴ Lukim ol samting i kamap long laspela de bilong Jisas long stap laip long graun. Em inap askim ol ensel long helpim em, tasol em i no mekim olsem, em i larim ol soldia bilong Rom i arestim em na paitim em nogut tru. (Mat. 26:52-54; Jon 18:3; 19:1) Ol i wipim em long wanpela kain wip we i brukim na kamautim ol mit long bodi bilong em. Blut i wok long ron yet long baksait bilong em, na ol i putim traipela diwai long baksait bilong em long karim. Jisas i karim dispela diwai na pulim i go long ples we ol bai kilim em long en, tasol bihain ol i askim wanpela man long karim dispela diwai. (Mat. 27:32) Taim Jisas i kamap long ples we ol bai kilim em long en, ol soldia i nilim tupela han na lek bilong em long dispela diwai. Taim ol i sanapim pos, hevi bilong bodi bilong Jisas i mekim na skin bilong em i wok long bruk long hap we ol i sutim nil long en. Ol pren bilong em i krai na mama bilong em i krai sori, tasol ol hetman bilong Juda i wok long tok bilas long Jisas. (Luk 23:32-38; Jon 19:25) Inap sampela aua Jisas i pilim bikpela pen nogut tru. Em i hangamap na em i lusim planti blut, olsem na klok bilong em i hatwok long pamim blut na em i hatwok long pulim win. Em i pulim laspela win bilong em na em i mekim wanpela beten. Na em i daunim het na em i dai. (Mak 15:37; Luk 23:46; Jon 10:17, 18; 19:30) Ol i mekim nogut long em na em i pilim bikpela pen tru na ol i semim em long ai bilong ol man na em i dai.

5. Jisas i wari moa long wanem samting?

⁵ Jisas i no wari tumas long hau ol i kilim em i dai. Em i wari moa long risen na ol i kilim em i dai. Em i wari long ol i sutim tok giaman long em olsem em i no rispektim God na nem bilong God. (Mat. 26:64-66) Jisas i tingting planti long tok ol man bai sutim long em olsem em i no rispektim God na dispela i mekim em bel hevi na em i laik bai Papa bilong em i no ken larim em i kisim kain sem olsem. (Mat. 26:38, 39, 42) Wai na Jehova i larim Pikinini bilong em i karim pen na hevi na i dai? Yumi ken skelim 3-pela risen.

6. Wai na Jisas i mas hangamap na dai long diwai pos?

⁶ Namba 1 risen, Jisas i mas hangamap na dai long diwai pos bambai em i ken kisim bek ol Juda em ol i stap long mak bilong bagarap. (Gal. 3:10, 13) Ol dispela Juda i bin promis long bihainim Lo bilong God, tasol ol i no bin bihainim. Dispela i mekim na ol i stap long mak bilong bagarap, na tu, ol bai bagarap bikos ol i tumbuna pikinini bilong Adam. (Rom 5:12) Lo God i givim long ol Israel i tok sapos wanpela man i mekim sin na i stret em i mas dai, orait ol i mas kilim em i dai na hangamapim bodi bilong em long wanpela pos. * (Lo 21:22, 23; 27:26) Taim Jisas i hangamap long diwai pos, dispela i opim rot long ol Juda i ken kisim helpim long ofa bilong em, maski ol i bin sakim em.

7. Wanem namba 2 risen na God i larim Pikinini bilong em i karim pen na hevi?

 ⁷ Yumi ken skelim namba 2 risen na God i larim Pikinini bilong em i karim pen na hevi. Em i trenim Jisas long mekim wok olsem Hetpris long bihain. Ol samting i painim Jisas i mekim na em i save olsem i hatwok long stap gut long God taim bikpela traim i painim yumi. Em i pilim bikpela presa olsem na taim em i beten “em i bin singaut strong na krai na aiwara i pundaun.” Jisas i bin pilim bikpela bel hevi tru, olsem na em i save long ol samting yumi nidim, na em inap ‘helpim yumi taim traim i painim yumi.’ Yumi amamas tru olsem Jehova i makim wanpela Hetpris husat i gat pasin marimari na em “inap pilim tru ol samting i save traim yumi”!—Hib. 2:17, 18; 4:14-16; 5:7-10.

8. Wanem namba 3 risen na God i larim bikpela traim tru i painim Jisas?

⁸ Namba 3 risen, Jehova i larim bikpela traim tru i painim Jisas bilong bekim wanpela bikpela askim: Olsem wanem? Ol man inap stap gut long God taim bikpela traim tru i painim ol? Satan i tok nogat! Em i tok ol man i tingim ol yet olsem na ol i mekim wok bilong God. Na em i bilip olsem ol man i wankain olsem tumbuna papa bilong ol Adam na ol i no gat laik long stap gut long Jehova. (Jop 1:9-11; 2:4, 5) Jehova i save olsem Pikinini bilong em bai stap gut long em, olsem na em i larim ol samting i kamap bilong traim tru Jisas. Jisas i stap gut long God i go inap long em i dai na em i pruvim olsem Satan em man bilong giaman.

9. Aposel Jon i mekim wanem na em i stap gutpela eksampel long yumi?

⁹ Pe bilong baim bek man i strongim bilip bilong planti Kristen. Ol i wok yet long autim tok maski i gat pasin birua i stap na ol i sanap strong na ol i karim kain kain hevi i go inap long ol i lapun. Tingim eksampel bilong aposel Jon. Winim 60 yia, em i bin givim bel tru long autim tok i tru bilong Krais na long pe bilong baim bek man. Taim em i gat 90 krismas samting, ol i ting olsem em i laik daunim gavman Rom olsem na ol i kalabusim em long ailan Patmos. Em i mekim wanem rong? Em i “bin autim tok bilong God na . . . tokaut long Jisas.” (Rev. 1:9) Em i stap gutpela eksampel long pasin bilong bilip na sanap strong!

10. Olsem wanem ol buk Jon i raitim i soim olsem em i pilim tru pe bilong baim bek man?

¹⁰ Long ol buk Jon i raitim em i kamapim klia olsem em i laikim tru Jisas na em i pilim tru pe bilong baim bek man. Winim 100 taim em i stori long pe bilong baim bek man na ol gutpela samting pe bilong baim bek man inap mekim long yumi. Olsem, Jon i tok “sapos man i mekim sin, yumi gat wanpela helpim i stap wantaim Papa, em Jisas Krais, wanpela stretpela man.” (1 Jon 2:1, 2) Na tu, ol buk Jon i raitim i kamapim klia olsem em i bikpela samting long “autim tok bilong Jisas.” (Rev. 19:10) I klia tru olsem Jon i pilim tru pe bilong baim bek man. Olsem wanem yumi ken mekim olsem tu?

11. Wanem samting inap helpim yumi long sakim ol traim?

¹¹ Sakim ol traim bilong mekim sin. Sapos yumi pilim tru pe bilong baim bek man, yumi no inap tingting olsem: ‘Taim traim i painim mi i no gat wok long mi sakim traim. Mi ken mekim sin na bihain askim God long fogivim mi.’ Nogat, taim traim i painim yumi, mobeta yumi tok olsem: ‘No! Jehova na Jisas i bin mekim planti samting long helpim mi, olsem na wai bai mi mekim sin?’ Yumi ken askim Jehova long strongim yumi na tok olsem: ‘No ken larim mi pundaun long traim.’—Mat. 6:13.

12. Hau yumi ken bihainim skultok i stap long 1 Jon 3:16-18?

 ¹² Laikim ol bratasista bilong yu. Taim yumi laikim ol bratasista bilong yumi, yumi soim olsem yumi pilim tru pe bilong baim bek man. Wai? Bikos Jisas i givim laip bilong em bilong helpim yumi, na tu, bilong helpim ol bratasista bilong yumi. Em i redi long dai bilong helpim ol, na dispela i makim olsem ol i dia tumas long ai bilong em. (Ritim 1 Jon 3:16-18.) Yumi soim olsem yumi laikim ol bratasista bilong yumi taim yumi mekim gutpela pasin long ol. (Efe. 4:29, 31–5:2) Olsem, yumi helpim ol taim ol i sik o taim ol i karim ol bikpela hevi, na long taim bilong ol netrol disasta samting. Tasol yumi mas mekim wanem taim wanpela wanbilip i mekim wanpela tok o pasin i bagarapim bel bilong yumi?

13. Wai na yumi mas fogivim ol narapela?

¹³ Sampela taim yu pilim hatwok long fogivim wanpela brata o sista bilong yu? (Wkp. 19:18) Sapos olsem, orait bihainim dispela edvais: “Yupela i mas wok yet long karim hevi narapela i putim long yupela na amamas long fogivim narapela, na mekim olsem maski sapos i gat as na wanpela i gat tok long narapela. Jehova i amamas long fogivim yupela, olsem na yupela tu i mas mekim wankain pasin.” (Kol. 3:13) Long olgeta wan wan taim yumi fogivim brata o sista bilong yumi, yumi soim long Papa bilong yumi long heven olsem yumi pilim tru pe bilong baim bek man. Yumi ken mekim wanem bilong strongim yet pasin bilong yumi long tenkyu tru long dispela presen i kam long God?

14. Wanem wanpela rot yumi ken strongim pasin bilong yumi long pilim tru pe bilong baim bek man?

¹⁴ Tok tenkyu long Jehova long pe bilong baim bek man. Wanpela sista i gat 83 krismas, nem bilong em Joanna, em i save stap long India, em i tok: “Mi pilim olsem long olgeta de taim mi beten, em bikpela samting long mi mas tok tenkyu long Jehova long pe bilong baim bek man.” Taim yu mekim beten bilong yu yet, tingim ol popaia yu mekim long dispela de na askim Jehova long fogivim yu. Tasol sapos yu mekim wanpela bikpela sin, orait yu mas go askim ol elda long helpim yu. Ol bai putim yau long yu na yusim ol gutpela tok bilong Baibel long helpim yu. Ol bai beten wantaim yu, na askim Jehova long fogivim yu long rot bilong ofa bilong Jisas “na bai [yu] ken kamap orait.”—Jems 5:14-16.

15. Wai na yumi mas lusim sampela taim long ritim stori bilong pe bilong baim bek man na tingim tingim long bel?

¹⁵ Tingim tingim long bel pe bilong baim bek  man. Wanpela sista em nem bilong em Rajamani, em i gat 73 krismas, em i tok: “Taim mi ritim stori bilong Jisas i karim pen na hevi, mi save aiwara.” Ating yu tu i bin pilim bikpela bel sori tru taim yu tingim tingim long bel hau Pikinini Bilong God i bin karim bikpela pen na hevi tru. Tasol taim yu tingim tingim long bel dispela ofa bilong Jisas, dispela bai strongim tru pasin bilong yu long laikim tru Jisas na Jehova. Bilong helpim yu long pilim tru pe bilong baim bek man, yu ken stadi moa long dispela topik.

16. Taim yumi skulim ol narapela long ofa bilong Jisas olsem wanem dispela i helpim yumi yet? (Lukim fran pes piksa.)

¹⁶ Skulim ol narapela long pe bilong baim bek man. Long olgeta taim yumi tokim ol narapela long pe bilong baim bek man, dispela bai strongim pasin bilong yumi long pilim tru dispela ofa. Yumi gat sampela gutpela pablikesen na ol vidio bilong helpim yumi long skulim ol narapela long wai na Jisas i dai bilong helpim yumi. Olsem, yumi ken yusim lesen 4 bilong buklet Gutpela Nius i Kam Long God! Taitol bilong en “Jisas Krais Em i Husat?” O yumi ken yusim sapta 5 bilong buk Tok Baibel i Skulim Yumi Long En. Taitol bilong en “Pe Bilong Baim Bek Ol Man—Nambawan Gutpela Presen God i Givim.” Long olgeta yia, yumi soim olsem yumi pilim tru pe bilong baim bek man taim yumi go long Memorial bilong tingim dai bilong Jisas na yumi singautim ol narapela long kam bung wantaim yumi. Jehova i givim gutpela wok tru long yumi long skulim ol narapela long Pikinini bilong em!

17. Wai na pe bilong baim bek man em nambawan gutpela presen God i givim long yumi?

¹⁷ Tru tumas, i gat gutpela risen long yumi mas kisim pasin bilong pilim tru pe bilong baim bek man na holimpas dispela pasin. Pe bilong baim bek man i mekim na yumi ol sinman inap pas gut wantaim Jehova. Pe bilong baim bek man tasol inap bagarapim ol samting Devil i kamapim. (1 Jon 3:8) Na long rot bilong pe bilong baim bek man, Jehova bai kamapim samting em i tingting pinis long mekim long dispela graun. Em long mekim graun olgeta i kamap wanpela paradais. Olgeta manmeri bai laikim Jehova na mekim wok bilong em. Olsem na long olgeta de, yumi ken painim rot bilong soim olsem yumi pilim tru pe bilong baim bek man—em nambawan gutpela presen God i givim long yumi!