1, 2. ¿Bin-a te stojol kolel sok bin yuʼun la yakʼ sba ta lajel te Jesús?

TE BITʼIL yal ta mulil te Adán chʼay yuʼun te bitʼil ya xkuxaj ta sbajtelkʼinal sok te yal snichʼnabe. Te bitʼil yal ta mulil te Adán sok spasemal yoʼtan la spas, jaʼ yuʼun ma sta skolel. Pero te snichʼnabe maʼyuk smul stukelik (Rom. 5:12, 14). ¿Aybal bin ya xjuʼ ya yichʼ pasel yuʼun ya sta skolelik? Ay. Te kʼalal yal ta mulil te Adán te Jehová kʼunkʼun la yal te bin-utʼil ya sta skolelik te stsʼumbal te Adán ta swenta te mulil sok te lajele (Gén. 3:15). Te Jehová la stikun tal te sNichʼan yuʼun ya «yacʼ scuxlejal scuenta scolel tsobolic» (Mar. 10:45; Juan 6:51).

² ¿Bin-a te stojol kolele? Ta Escrituras Griegas Cristianas ya yal te jaʼ stojol te bitʼil la yakʼ sba ta lajel te Jesús ta swenta te bin la schʼay te Adane (1 Cor. 15:22). ¿Bin yuʼun te la yakʼ sba ta lajele? Te Ley ya yal te toj te bin ya spas te Jehová, jaʼ yuʼun ya yichʼ akʼel kuxlejal ta swenta yan kuxlejal (Éx. 21:23, 24). Te Adán chʼay yuʼun te bitʼil tojil winik-ae, jaʼ yuʼun swenta ya yichʼ kʼotesel ta pasel te bin ya yal te Jehová, te Jesús la yakʼ te skuxlejale (Rom. 5:17). Te Jesús jich ya xkʼot bitʼil «Tatil sbahtel qʼuinal» ta stojol te machʼatik ya yakʼ schʼuunel yoʼtanik te bitʼil la yakʼ sba ta lajele (Is. 9:6; Rom. 3:23, 24).

3. Jich bitʼil ya yal te Juan 14:31 sok 15:13, ¿bin yuʼun la yakʼ sba ta lajel ta jtojoltik te Jesús?

³ Te Jesús kʼux ta yoʼtan te sTat soknix te joʼotik, jaʼ yuʼun la yakʼ te skuxlejal (kʼopona Juan 14:31; 15:13). Te bitʼil ay skʼuxul yoʼtan jun yoʼtan la yakʼ sba jaʼto kʼalal laj sok la spasbey te skʼanojel yoʼtan te sTate. Te bitʼil jich  la spas ya xkʼot ta pasel te bin skʼanojel yoʼtan te Jehová ta stojol te ants winiketik sok te Balumilal. Ta artikulo ini ya kiltik bin yuʼun te Dios la yakʼ te ya xkʼax swokol te Jesuse. Jaʼnix jich ya kilbeytik skʼoplal te Juan te bitʼil la yal wokol yuʼun te stojol kolel sok te bin-utʼil te joʼotik ya xjuʼ ya kaltik wokol sok te mukʼ skʼoplal ya kiltik te bin la spas te Jehová sok te Jesús ta jtojoltik.

4. Chola te bin-utʼil laj te Jesús.

⁴ Jnop kaʼiytik te slajibal kʼajkʼal kuxin ta balumilal te Jesús. La yakʼ sba ta tsakel sok ta majel yuʼun te soldado romanoetik manchukme ya xjuʼ ya yikʼ tal chʼul-abatetik yuʼun ya xkoltayot (Mat. 26:52-54; Juan 18:3; 19:1). La yichʼ tulan majel sok la yakʼbeyik skʼech jchʼix teʼ manchuke yak ta lokʼel schʼichʼel te spate. Te Jesús akʼbot skʼech bael te teʼ, pero te soldadoetik la yalbeyik jtul winik te jaʼ akʼa skʼech bael te bantito ya yichʼ milel te Jesús (Mat. 27:32). Te kʼalal kʼotik te ban ya yichʼ milele, te skontratak te Jesús la smajbeyik ochel klabo ta skʼab sok ta yok. Te bitʼil jipil ta teʼ sok te al te sbakʼetal te Jesús ya xjamxan te yejchene. Te kʼalal yakik ta okʼel sok yak ta kʼaxel swokolik-a te yamigotak sok te snan te Jesús, te judioetik yakiknax ta labanwanej (Luc. 23:32-38; Juan 19:25). Bayal-ora jalaj te swokole, te yoʼtan sok te spulmone maʼyukix yip sok wokolix ya yichʼ ikʼ. Te bitʼil jun yoʼtan la yakʼ sba sok te kʼalal ya xlajix-ae, la skʼopon te Jehová. Patil la snijan te sjol sok laj (Mar. 15:37; Luc. 23:46; Juan 10:17, 18; 19:30). ¡Kʼax bayal swokol sok utsʼinot te Jesús!

5. ¿Bin-a te wokol la yil te Jesuse?

⁵ Te Jesús ma jaʼuk wokol la yil te bin-utʼil la yichʼ milel jaʼ wokol la yil te bin akʼbot smuline. Jaʼ la smulin te la sbolkʼoptay te Dios sok te malaj la yichʼbey ta mukʼ te sbiile (Mat. 26:64-66). Bayal la smel yoʼtan yuʼun te Jesús te bintik akʼbot smulin, jaʼ yuʼun la skʼanbey koltayel te sTate (Mat. 26:38, 39, 42). ¿Bin yuʼun la yakʼ te Jehová te ya xkʼax swokol sok te ya xlaj te sNichʼane? Kilbeytik oxeb skʼoplal.

6. ¿Bin yuʼun la yichʼ jijpanel ta teʼ te Jesús?

⁶ Ta sbabial, te bitʼil la yichʼ jijpanel ta teʼ te Jesús, jaʼ yuʼun te la skoltaybey skʼoplal te judioetik (Gál. 3:10, 13). La yichʼik albeyel chopol skʼoplalik, melel la yalik te ya schʼuunik te Ley yuʼun Dios, pero ma jichuk la spasik sok te bitʼil jmulawiletik ta skaj te Adán (Rom. 5:12). Te Ley yuʼun Dios te akʼbilik te israeletik ya yal teme jtul winik ya spas mulil yananix yichʼ milel-a, pero ay baeltik la yichʼ jijpanel ta teʼ te machʼa lajemixe (Deut. 21:22, 23; 27:26). * Te bitʼil la yichʼ jijpanel ta teʼ te Jesús jich la sta skolelik te machʼatik pʼajot yuʼun.

7. ¿Binxan yuʼun te Dios la yakʼ te ya xkʼax swokol te sNichʼane?

⁷ Schebal, te Dios la yakʼ te ya xkʼax swokol te sNichʼan yuʼun ya schajpan yuʼun ya yichʼ yaʼtel jich bitʼil Mukʼul Saserdote. Te Jesús la yil te tulan ta chʼuunbeyel skʼop te Dios te kʼalal ya xkʼax tulan wokolil. Te bitʼil kʼax wokol la yaʼiy «tulan awon soc ocʼ» ta skʼoponel te sTate. Te bitʼil kʼax ta tulan wokol te Jesús, jaʼ yuʼun  ya snaʼ yoʼbolil jbatik sok ya skoltay te «machʼatic ayic ta tsajel». Ya kaltik wokol yuʼun te Jehová la yotses ta Mukʼul Saserdote te Jesús te ya «snaʼbotic yoʼbolil jbahtic yuʼun te mayuc quiptic» (Heb. 2:17, 18; 4:14-16; 5:7-10).

8. ¿Bin-a te slajibal rason te Dios la yakʼ te kʼax swokol te Jesuse?

⁸ Yoxebal, te Jehová la yakʼ te kʼax swokol te Jesús yuʼun ya yichʼ akʼbeyel sujtib te jojkʼoyel ini: ¿Aybal jtuluk ants winik te jun yoʼtan ya yakʼ sba ta stojol Jehová manchukme ya xkʼax ta tulan wokol? Te Satanás ya yal te maʼuke, melel ya yal te ya kichʼtik ta mukʼ Dios yuʼun-nax ay bin lek ya xlokʼ kuʼuntik-a. Jaʼnix jich ya yal te malaj kʼux ta koʼtantik te Jehová jich bitʼil la spas te Adán (Job 1:9-11; 2:4, 5). Te bitʼil te Jehová snaʼoj te jun yoʼtan ya yakʼ sba te sNichʼane, jaʼ yuʼun la yakʼ te ya xkʼax tulan swokole. Te bitʼil jun yoʼtan la yakʼ sba te Jesús jich la yakʼ ta ilel te jaʼ jpas lot te Satanás.

9. ¿Bin ejemplo la yakʼbotik te jpuk-kʼop Juan?

⁹ Bayal j-abatetik yuʼun Dios mukʼubenxan schʼuunel yoʼtanik ta swenta te stojol kolel. Ma yijkitayojik te scholel skʼop Dios manchukme ya yichʼik tulan utsʼinel sok kujchem yuʼunik biluk wokoliletik. Te jpuk-kʼop Juan kʼaxem ta 60 jaʼbil la spuk ta alel te bin smelelil ta swenta te Cristo sok te stojol kolel. Ayniwan 100 yaʼbilal-a te kʼalal ikʼot bael ta chukel yuʼun te romanoetik ta isla yuʼun Patmos. ¿Bin-a te smule? Jaʼ «ta scaj te scʼop Dios soc te testigo-cʼop yuʼun te Jesucristo» (Apoc. 1:9). ¡Jaʼ jun lekil ejemplo yuʼun chʼuunel oʼtanil sok te ya xkujch kuʼuntike!

10. ¿Bin-utʼil la yakʼ ta ilel te Juan te la yal wokol yuʼun te stojol kolel ta libroetik te la stsʼibaye?

¹⁰ Ta libroetik te la stsʼibay te Juan la yakʼ ta ilel te skʼuxul yoʼtan ta stojol te Jesús sok te la yal wokol yuʼun te stojol kolele. Kʼaxem ta 100 buelta la yalbey skʼoplal te stojol kolel sok te bin lek ya xlokʼ-ae. Jich la stsʼibay: «Teme ay machʼa ya sta smul, ay machʼa ya xcʼopoj cuʼuntic ta stojol te Tatil, ha te Jesucristo te toj yoʼtan stuquel» (1 Juan 2:1, 2). Jaʼnix jich la yal te mukʼ skʼoplal te ya yalik «te testigo-cʼop yuʼun te Jesús» (Apoc. 19:10). Chikan ta ilel te Juan la yal wokol yuʼun te stojol kolele. ¿Bin-utʼil ya xjuʼ ya kakʼtik ta ilel te jich ya kaʼiy jbatik-euke?

11. ¿Bin ya skoltayotik yuʼun ma xyalotik ta mulil?

¹¹ Mame xyalotik ta mulil. Teme mukʼ skʼoplal ta koʼtantik te stojol kolele, ma jichuk ya jnoptik: «Ya xjuʼ ya jpas te mulil sok ta patil ya jkʼan perdon». Kʼalal ya jsitintay jbatik ta spasel mulil ya skʼan te jich ya kaltik: «¡Maʼuk! ¿Bin-utʼil jich kʼan jpas te bitʼil bayal bin spasojik ta jtojol te Jehová sok te Jesús?». Ya skʼan ya jkʼanbeytik yip koʼtantik te Jehová sok te jichuk ya kalbeytik: «Ma me xawacʼotcotic ta sujel ta mulil» (Mat. 6:13).

12. ¿Bin-utʼil ya skʼan ya jpastik te bin ya yal te 1 Juan 3:16-18?

¹² Kʼuxuk ta koʼtantik te kermanotaktik. Teme jich ya jpastik jaʼnix jich ya kakʼtik ta ilel te ya kaltik wokol yuʼun te stojol kolel, melel te Jesús la yakʼ  skuxlejal ta jpisiltik. Te bitʼil la yakʼ sba ta lajel ta stojol te kermanotaktik, yuʼun kʼux ta yoʼtan (kʼopona 1 Juan 3:16-18). Te bin yilel ya kiltik te kermanotaktik jaʼ jich ya xchiknaj te skʼuxul koʼtantik ta stojolik (Efes. 4:29, 31–5:2). Ya jkoltaytik te kʼalal ayik ta chamel o kʼalal yakik ta kʼaxel ta jun tulan wokolil, jich bitʼil te ya xkʼax ta Balumilal te bintik ya sjin jilel. Pero ¿bin ya jpastik kʼalal jtul ermano ya spas o ya yal te bin ya yutsʼin koʼtantik?

13. ¿Bin yuʼun ya skʼan ya jpastik perdon?

¹³ ¿Yabal jkʼej slab koʼtantik ta stojol te machʼa ay bin ma lek la spasbotike? (Lev. 19:18). Teme jichotike, akʼa jpastik te bin ya yal te teksto ini: «Talel cʼaxel cuhchuc awuʼunic soc pasbeya abahic perdón teme ay ya xhahch cʼop awuʼun soc te yane. Hich te bin utʼil la spasbeyex perdón te Cristo, ha ni me hich xapasbe abahic perdón» (Col. 3:13). Te kʼalal ya jpasbeytik perdon jtul ermano ya kakʼbeytik yil te Jehová te ya kaltik wokol yuʼun te stojol kolele. ¿Bin-utʼil mukʼxan skʼoplal ya kiltik te majtanil ini?

14. ¿Bin ya skoltayotik yuʼun mukʼxan skʼoplal ya kiltik te stojol kolel?

¹⁴ Kalbeytik wokol te Jehová yuʼun te stojol kolele. Te Joanna, jtul ermana te 83 yaʼbilal te ay ta India, jich ya yal: «Mukʼ skʼoplal ya kil te jujun kʼajkʼal ya kalbey wokol te Jehová yuʼun te stojol kolele». Te kʼalal ya jkʼopontik te Diose, jnop kaʼiytik te bintik ma lek la jpastik sok jkʼanbeytik perdon. Pero teme ay jpasojtik tulan mulil ya skʼan ya jkʼanbeytik koltayel te ansianoetik. Jaʼ ya yaʼiybotik te jkʼoptik sok ya yakʼbotik tojobtesel te lokʼem ta Biblia. Jaʼnix jich ya skʼoponik Dios ta jtojoltik sok ya skʼanbeyik te Jehová te akʼa spasbotik perdon ta swenta te la yakʼ sba ta lajel te Jesús yuʼun jich ya xtulanubxan-a te schʼuunel koʼtantik (Sant. 5:14-16).

15. ¿Bin yuʼun ya skʼan ya jlokʼestik tiempo ta skʼoponel sok ta snopilanel ta koʼtantik ta swenta te stojol kolele?

¹⁵ Jnopilan ta koʼtantik te stojol kolel. Jtul ermana te Rajamani sbiil te ayix 73 yaʼbilal, jich ya yal: «Kʼalal ya jkʼopon spisil te bintik kʼax ta stojol te Jesús ya  x-okʼon yuʼun». Jichniwan ya kaʼiy jbatik-euk kʼalal ya jnoptik te bintik kʼax ta stojol te Jesús. Pero te kʼalal ya jnopilantikxan te bitʼil la yakʼ sba ta lajel te Jesús kʼux-xan ya kaʼiy ta koʼtantik soknix te sTate. Yuʼun ya xmukʼubxan te skʼuxul koʼtantik ya skʼan ya jnopbeytikxan skʼoplal ta swenta te stojol kolele.

16. ¿Bin-utʼil ya skoltayotik kʼalal ya jnojptestik te yantik ta swenta te stojol kolele? (Ilawil te dibujo ta yelaw te rebista).

¹⁶ Jnojptestik te yantik ta swenta te stojol kolele. Mukʼxan skʼoplal ya kiltik te kʼalal ya kalbeytik yantik ta swenta te stojol kolele. Bayal aʼtejibaletik kuʼuntik te ya xjuʼ ya jcholbeytik skʼoplal bin yuʼun laj ta jtojoltik te Jesús. Ya xjuʼ ya jtuuntestik te leksion 4 yuʼun te foyeto Lek yachʼil kʼop te talem ta stojol Dios, te sbiilinej «¿Machʼa-a te Jesucristoe?» o ya xjuʼ ya jtuuntestik te kapitulo 5 yuʼun te libro ¿Bin ya yakʼ jnoptik te Bibliae?, te sbiilinej «Te mukʼul majtanil yakʼojbotik te Dios». Ta jujun jaʼbil ya kaltikxan wokol ta swenta te stojol kolel kʼalal ya xbootik ta Snaʼojibal slajel te Jesús sok te kʼalal ya jpastik inbitar te yantik. Te Jehová yakʼojbotik jun mukʼul majtanil jaʼ te ya jnojptestik te yantik ta swenta te sNichʼane.

17. ¿Bin yuʼun te stojol kolel jaʼ jun mukʼul majtanil yakʼojbotik te Diose?

¹⁷ Ay bayal rason kuʼuntik yuʼun mukʼxan skʼoplal ya kiltik te stojol kolel sok te ya kaltikxan wokol yuʼun. Te stojol kolel ya yakʼ te ya kamigointikxan te Jehová manchukme jmulawilotik sok ya slajinbey spisil te yaʼtel te Satanás (1 Juan 3:8). Jaʼnix jich ya xkʼot ta pasel te skʼanojel yoʼtan te Jehová jaʼ te ya xpastaj ta Nichimal Kʼinal te Balumilal sok te kʼuxuk ta koʼtantik soknix te ya x-abatinotik ta stojol. Jaʼ yuʼun jletik ta jujun kʼajkʼal te bin-utʼil ya kaltik wokol yuʼun te stojol kolel te jaʼ te mukʼul majtanil la yakʼbotik te Diose.