1, 2. ¿Kʼusi jaʼ li pojelale, xchiʼuk kʼu yuʼun ti chtun kuʼuntike?

TA SKOJ ti la saʼ smul li Adan ti jaʼ toʼox jun tukʼil vinike, muʼyuk xa chkuxi sbatel osil. Taje jaʼ jech kʼot ta stojolal li xnichʼnabtak eke. Jaʼ yuʼun, li Adane sta-o xcham ta skoj ti lokʼ ta yoʼonton stuk li kʼusi la spase. Pe ¿kʼusi chkʼot ta stojolal li xnichʼnabtake? Li stukike muʼyuk smulik (Rom. 5:12, 14). ¿Mi oy van kʼusi stakʼ pasel sventa xichʼik pojel li ta lajelale? Oy. Kʼalal oy xa ox kʼuk sjalil yechʼel ti la saʼ smul li Adane, li Jeovae laj yakʼ ta ilel kʼu yelan tspoj ta mulil xchiʼuk ta lajelal li snitilulale (Jen. 3:15). Mi kʼot yoraile, li Jeovae tstak talel Xnichʼon sventa xtal «yakʼ xkuxlejal kʼuchaʼal pojelal sventa tspoj epal krixchanoetik» (Mar. 10:45; Juan 6:51).

² ¿Kʼusi jaʼ li pojelale? Li Tsʼibetik ta Griego Kʼope chal ti jaʼ li kʼusi la spas Jesus yoʼ xichʼ tojel li kʼusi la xchʼay Adane (1 Kor. 15:22). Pe ¿kʼu yuʼun chtun kuʼuntik? Yuʼun li stukʼil mantaltak Jeovae chal ti skʼan me xichʼ milel ek li buchʼu milvane (Eks. 21:23, 24). Ta skoj ti la spas smul Adane, maʼuk xa tukʼil krixchano kom. Jaʼ yuʼun, sventa xichʼ chʼunel li smantal Jeovae, skʼan xakʼ xkuxlejal li Jesuse (Rom. 5:17). Vaʼun, jaʼ jech chkʼot ta «Totil sbatel osil» yuʼun li buchʼutik chakʼ xchʼunel yoʼontonik ta stojolale (Is. 9:6; Rom. 3:23, 24).

3. Jech kʼuchaʼal chal Juan 14:31 xchiʼuk 15:13, ¿kʼu yuʼun ta sjunul yoʼonton laj yakʼ xkuxlejal li Jesuse?

³ Li Jesuse ta sjunul yoʼonton laj yakʼ xkuxlejal ta skoj ti skʼanoj tajek Jeova xchiʼuk ti skʼanojutike (kʼelo Juan 14:31; 15:13). Li kʼanelal taje jaʼ tijbat yoʼonton sventa tukʼ-o xakʼ sba jaʼ to ti kʼuxi chame xchiʼuk ti spas li kʼusi oy ta yoʼonton Stote. Koliyal ti jech la spase, chkʼot ta pasel li  kʼusi oy ta yoʼonton Jeova ta jtojolaltik xchiʼuk ta sventa li jbalumiltike. Li ta xchanobil liʼe, ta jkʼeltik kʼu yuʼun laj yakʼ permiso Jeova ti akʼo xil svokol Jesus kʼalal skʼan toʼox xchame. Jech xtok, chkalbetik jutuk skʼoplal jun jtsʼibajom ta Vivlia ti la stoj tajek ta vokol li pojelale. Ta slajeb une, ta jkʼeltik kʼuxi xuʼ xkakʼtik ta ilel ti ta jtojtik ta vokol eke xchiʼuk ti masuk to ep sbalil xkiltik li kʼusi la spas ta jtojolaltik li Jeova xchiʼuk Jesuse.

4. Albo skʼoplal ti kʼu yelan cham li Jesuse.

⁴ Jnoptik noʼox li kʼusi la snuptan Jesus kʼalal jun xa ox kʼakʼal kuxul liʼ ta balumile. Muʼyuk la stak ta ikʼel epal anjeletik sventa xtal koltaatuk kʼalal laj yichʼ chukel xchiʼuk kʼalal majat yuʼun li soltaroetik ta Romae (Mat. 26:52-54; Juan 18:3; 19:1). Tsots tajek la stsitsik ti yayij-o li sbekʼtale. Ta tsʼakale, akʼo mi chlokʼ tajek xchʼichʼel li spate, laj yakʼik ti akʼo xkuch batel jtel teʼ jaʼ to mi kʼot ti bu chichʼ milele. Pe ta anil noʼoxe, li soltaroetike la sujik jun vinik sventa jaʼ xkuch batel li jtel teʼe (Mat. 27:32). Kʼalaluk kʼot ti bu chichʼ milele, laj yichʼ bajbel li yok skʼobe. Kʼalal te xa ox jokʼole, mas to jat li skʼob ti bu bajal ta lauxe. Te x-okʼolet li yamigotak xchiʼuk li smeʼe, pe jaʼuk li jnitvanejetik ta relijione jaʼ noʼox ta slabanik (Luk. 23:32-38; Juan 19:25). Oy jayibuk ora ti te laj yil svokol li Jesuse, jutuk xa tajek ch-abtej li yoʼontone xchiʼuk li spulmontake xchiʼuk vokol xa tajek chichʼ ikʼ. La skʼopon Jeova kʼalal jutuk xa ox skʼan xchame, yuʼun snaʼoj ti tukʼ laj yakʼ sbae. «La snijan sjol, vaʼun cham» (Mar. 15:37; Luk. 23:46; Juan 10:17, 18; 19:30). ¡Toj echʼ noʼox jal laj yil svokol kʼalal chame xchiʼuk laj yichʼ kʼexlaltasel!

5. ¿Kʼusi ti mas chopol chaʼi li Jesuse?

⁵ Li Jesuse maʼuk laj yat-o yoʼonton ti kʼu yelan ta xichʼ milele. Li kʼusi mas chopol chaʼie jaʼ ti jutbat smul ti laj la xchopol kʼopta li Diose (Mat. 26:64-66). Li Jesuse chopol tajek laj yaʼi ti jech laj yichʼ jutbel smule. Jaʼ yuʼun, oy ox tajek ta yoʼonton ti xkoltaat yuʼun Stot sventa mu jechuk xichʼ kʼexlaltasele (Mat. 26:38, 39, 42). ¿Kʼu yuʼun laj yakʼ permiso Jeova ti akʼo xil svokol li Xnichʼon xchiʼuk ti xchame? Jkʼelbetik batel oxib srasonaltak.

6. ¿Kʼu yuʼun laj yichʼ jokʼanel ta jtel teʼ li Jesuse?

⁶ Baʼyel, li Jesuse skʼan xichʼ jokʼanel ta jtel teʼ sventa spoj lokʼel li judaetik ta skoj ti yichʼojik chopol kʼoptaele (Gal. 3:10, 13). Jaʼo laj yichʼik chopol kʼoptael ta skoj ti laj toʼox yalik ta jamal ti chchʼunbeik li smantal Diose, pe mu jechuk la spasik. Pe maʼuk noʼox taje, yuʼun chopol kʼoptabilik xa onoʼox ta skoj ti xkuchojbeik talel smul li Adane (Rom. 5:12). Li mantal akʼbatik yuʼun Dios li j-israeletike jaʼ ti chichʼ milel li jun vinik ti la spas smul ti sta-o xchame. Bakʼintike ta xichʼ jokʼanel ta jtel teʼ li animae (Deut. 21:22, 23; 27:26). * Jaʼ yuʼun, kʼalal laj yichʼ jokʼanel ta jtel teʼ li Jesuse, jaʼ jech xuʼ stabeik sbalil judaetik ti laj yakʼ xkuxlejale.

7. ¿Kʼusi jaʼ li xchibal srasonal ti laj yakʼ permiso Dios ti akʼo xil svokol li Xnichʼone?

⁷ Xchibal, li Diose laj yakʼ permiso ti akʼo xil svokol li Xnichʼon sventa lekuk chapal mi kʼot ta mero Bankilal Palee. Li Jesuse laj yaʼi ti toj vokol ta chʼunbel smantal Dios kʼalal tsots kʼusi ta jnuptantike.  Ta skoj ti kʼux tajek laj yaʼi li svokole, la skʼanbe koltael li Stote xchiʼuk xvokolet ta stojolal. Ta melel, xuʼ jchʼuntik ti xaʼibutik smelolal ti kʼu yelan chkaʼi jbatike xchiʼuk «xuʼ skolta li buchʼutik yakal ch-akʼatik ta prevae». Ta jtojbetik tajek ta vokol Jeova ti svaʼanoj jun mero Bankilal Pale kuʼuntik ti «xijkʼuxubaj ta yoʼonton ta skoj ti kʼunutike» (Ebr. 2:17, 18; 4:14-16; 5:7-10).

8. ¿Kʼusi jaʼ li yoxibal srasonal ti laj yakʼ Dios ti akʼo xil tajek svokol li Jesuse?

⁸ Yoxibal, li Jeovae laj yakʼ permiso ti akʼo xil svokol Jesus sventa xakʼ ta ilel ti xuʼ tukʼ xakʼ sba li jun krixchano akʼo mi tsots tajek xil svokol. Li Satanase mu jechuk chal, yuʼun li stuke chal ti chijtun ta stojolal Dios ta skoj ti jaʼ noʼox ta jsaʼ jtuktik li kʼusi ta jkʼantike. Jech xtok, chal ti muʼyuk jkʼanojtik Jeova jech kʼuchaʼal la spas li Adane (Job 1:9-11; 2:4, 5). Li Jeovae spatoj yoʼonton ta stojolal Xnichʼon ti tukʼ chakʼ sbae. Jaʼ yuʼun, laj yakʼ permiso ti akʼo x-akʼbat svokol yuʼun li Satanase. Ta skoj ti tukʼ laj yakʼ sba li Jesuse, laj yakʼ ta ilel ti jaʼ jun jutkʼop li Satanase.

9. ¿Kʼusi chakʼ jchantik li jtakbol Juane?

⁹ Li pojelal laj yakʼ Jesuse stsatsubtasojbe xchʼunel yoʼonton epal yajtsʼaklomtak, jech-o xcholojik talel mantal akʼo mi tsots chichʼik kontrainel xchiʼuk jech-o kuchem talel yuʼunik li prevaetike. Kalbetik skʼoplal li jtakbol Juane, te van mas ta 60 jabil la xcholbe-o talel skʼoplal li kʼusi melel ta stojolal li Kristoe xchiʼuk ta sventa li pojelale. Yichʼoj xa ox van sien jabil kʼalal laj yichʼ chukel batel li ta lum joyol ta nab ta Patmos yuʼun li jromaetike. ¿Kʼusi jaʼ ti smule? Jaʼ ta skoj ti laj yalbe skʼoplal li Diose xchiʼuk ti jamal laj yalbe skʼoplal li Jesuse (Apok. 1:9). ¡Toj lek ta chanbel li xchʼunel yoʼontone xchiʼuk ti kʼu yelan kuch yuʼune!

10. ¿Kʼuxi laj yakʼ ta ilel Juan ti tstoj tajek ta vokol li pojelale?

¹⁰ Li ta livroetik la stsʼiba Juane te laj yakʼ ta ilel ti skʼanoj tajek li Jesuse xchiʼuk ti tstoj ta vokol ti laj yakʼ xkuxlejale. Te van mas ta sien ta velta laj yalbe skʼoplal li pojelal o li sbalil chichʼ tabele. Jech kʼuchaʼal liʼe, xi la stsʼibae: «Oy jun jkoltavanej kuʼuntik ti te oy xchiʼuk Totil mi oy la asaʼ jtosuk amulike, jaʼ li Jesukristo ti jaʼ tukʼil vinike» (1 Juan 2:1, 2). Jech xtok, laj yal ti akʼo xkalbetik batel skʼoplal li Jesuse (Apok. 19:10). Jamal xvinaj ti tstoj tajek ta vokol ti laj yakʼ xkuxlejal li Jesuse. ¿Kʼuxi xuʼ xkakʼtik ta ilel ti ta jtojtik ta vokol eke?

11. ¿Kʼusi tskoltautik sventa mu xijtsʼuj li ta mulile?

¹¹ Mu me xijtsʼuj ta mulil. Mi ta melel ta jtojtik ta vokol ti laj yakʼ xkuxlejal Jesuse, mu xiuk ta jnoptike: «Mu persauk xkakʼ persa ti mu xitsʼuj ta mulile, yuʼun xuʼ jkʼan perton mi la jsaʼ jmule». Mas lek ti xiuk xkaltik kʼalal ch-ayan ta koʼontontik spasel li kʼusi chopole: «Moʼoj, ¿kʼuxi xa noʼox jech ta jpas ti ep kʼusi spasojik ta jtojolal li Jeova xchiʼuk Jesuse?». Jech xtok, xuʼ me jkʼanbetik ti akʼo skoltautik li Jeovae xchiʼuk xi jkʼanbetik ta vokole: «Mu me xavakʼ xiyalkutik ta mulil» (Mat. 6:13).

12. ¿Kʼuxi xuʼ xkakʼ ta jkuxlejaltik li kʼusi chal ta 1 Juan 3:16 kʼalal ta18?

¹² Jkʼantik li kermanotaktike. Mi jech ta jpastike, jaʼ jech chkakʼtik ta ilel ti ta  jtojtik ta vokol li pojelale, yuʼun li Jesuse maʼuk noʼox laj yakʼ xkuxlejal ta jtojolaltik, laj yakʼ xkuxlejal ta stojolal li kermanotaktik eke. Jaʼ yuʼun, jamal xvinaj ti skʼanojutik jkotoltike (kʼelo 1 Juan 3:16-18). Ti kʼu yelan chkiltik li kermanotaktike jaʼ te chkakʼtik ta ilel mi jkʼanojtik ta melel (Efes. 4:29, 31–5:2). Ta jkoltatik kʼalal ipike, kʼalal tsnuptanik tsatsal prevaetike xchiʼuk kʼalal chil svokolik ta nikel, nojelal ta voʼ o yan kʼusitik. Pe ¿kʼu yelan chkaʼi jbatik kʼalal oy kʼusi chopol chalbutik o tspasbutik junuk ermanoe?

13. ¿Kʼu yuʼun skʼan xkakʼtik perton?

¹³ ¿Mi nopem xkaʼitik ta jnakʼ skʼakʼal koʼontontik kʼalal oy buchʼu chopol kʼusi tspasbutike? (Lev. 19:18). Mi jaʼ jeche, kakʼ ta jkuxlejaltik li tojobtasel liʼe: «Jechuk-o me tsʼikbo abaik ta jujuntal xchiʼuk mu me xajalanbe abaik ta jujuntal ti chapasbe abaik pertone akʼo mi oy buchʼu tsaʼ smul ta atojolalik. Jech kʼuchaʼal muʼyuk la sjalanboxuk perton li Jeovae, jech me skʼan xapasik ek» (Kol. 3:13). Kʼalal chkakʼtik ta perton li kermanotaktike, jaʼ jech chkakʼbetik yil Jeova ti ta jtojtik ta vokol li pojelale. Pe ¿kʼusi to yan xuʼ jpastik sventa xkakʼtik ta ilel ti ep sbalil chkiltik li matanal laj yakʼ Diose?

14. ¿Kʼusi tskoltautik sventa masuk to ep sbalil xkiltik li pojelale?

¹⁴ Jtojbetik ta vokol Jeova ta sventa li pojelale. Li Joanna ti 83 sjabilal xchiʼuk ti te nakal ta Indiae xi chale: «Toj tsots skʼoplal chkil ti xkal ta j-orasion ti laj yakʼ xkuxlejal li Jesuse xchiʼuk ti jtojbe ta vokol li Jeovae». Kʼalal ta jpastik orasione, jnopbetik skʼoplal li kʼusi chopol la jpastik jujun kʼakʼale xchiʼuk jkʼanbetik Jeova ti akʼo xakʼutik ta pertone. Pe mi tsots la jpas jmultike, skʼan me jkʼanbetik koltael li moletik ta tsobobbaile, li stukike ta xchikintabutik xchiʼuk ta slekil yoʼontonik tstojobtasutik ta Vivlia. Jech xtok, tspasik orasion ta jtojolaltik; xchiʼuk koliyal li pojelal laj yakʼ Jesuse, xuʼ skʼanbeik Jeova ti akʼo xakʼutik ta perton sventa xijtsatsub ta mantal yan veltae (Sant. 5:14-16).

15. ¿Kʼu yuʼun skʼan jchʼakbetik yorail sventa jchanbetik mas skʼoplal li pojelale xchiʼuk ti jnopbetik skʼoplale?

¹⁵ Jnopbetik skʼoplal li pojelale. Li ermana  Rajamani ti 73 sjabilale xi chale: «Kʼalal ta jchanbe skʼoplal ti kʼu yelan laj yil svokol li Jesuse, chlik lokʼuk yaʼlel jsat». Xuʼ van jaʼ jech chkaʼi jbatik ek kʼalal ta jnopbetik skʼoplal ti toj ep laj yil svokol li Xnichʼon Diose. Pe kʼalal mas ta jnopbetik skʼoplal ti laj yakʼ xkuxlejal li Jesuse, mas to chlik jkʼantik xchiʼuk mas chlik jkʼantik li Stote. Sventa spas kuʼuntik taje, toj lek ti jsabetik mas skʼoplal ta sventa pojelal kʼalal chijchanunaj jtuktike.

16. ¿Kʼusi sbalil ta jtabetik kʼalal ta jchanubtastik yantik ta sventa li pojelale? (Kʼelo li lokʼol ta pajina 1).

¹⁶ Jchanubtastik yantik ta sventa li pojelale. Kʼalal jech ta jpastike, mas to me ep sbalil chkiltik li pojelale. Oy ep kabtejebtik ti jaʼ tskoltautik sventa xkalbetik smelolal kʼu yuʼun ti cham ta jtojolaltik li Jesuse. Jech kʼuchaʼal liʼe, xuʼ jtunestik li foyeto Lekil aʼyejetik yakʼoj Dios ta xchanobil 4 ti xi sbie: «¿Buchʼu jaʼ li Jesukristoe?». O xuʼ jtunestik li livro ¿Kʼusi chchanubtasvan li Vivliae? ta kapitulo 5 ti xi sbie: «Li Diose laj yakʼ ta matanal li xkuxlejal Jesuse». Mas to me chkakʼtik ta ilel ti ta jtojtik ta vokol ti laj yakʼ xkuxlejal Jesus kʼalal chijbat jujun jabil li ta snaʼobil slajele xchiʼuk kʼalal ta jtaktik ta ikʼel li yantike. ¡Jaʼ jun matanal yakʼojbutik Jeova ti xuʼ jchanubtastik yantik ta sventa li Xnichʼone!

17. ¿Kʼu yuʼun jaʼ jun mukʼta matanal yakʼojbutik Dios li pojelale?

¹⁷ Oy ep srasonaltak kuʼuntik sventa epuk sbalil xkiltik li pojelale xchiʼuk ti jechuk-o jtojtik ta vokole. Yuʼun koliyal li pojelale, xuʼ lek xkil jbatik xchiʼuk Jeova akʼo mi jmulavilutik xchiʼuk chichʼ akʼbel slajeb li kʼusitik spasoj tal li Diabloe (1 Juan 3:8). Jech xtok, chkʼot ta pasel li kʼusi oy ta yoʼonton Jeovae, ti tspas ta jun paraiso li balumile, ti chkʼanat yuʼun skotol li krixchanoetike xchiʼuk ti chtunik ta stojolale. Jaʼ yuʼun, jnopbetik skʼoplal kʼu yelan xuʼ xkakʼtik ta ilel ti ta jtojtik ta vokol jujun kʼakʼal li pojelale, ti jaʼ li mukʼta matanal yakʼojbutik Diose.